Le ŋpɩzɩɣ nɛ ŋhiɣ mbʋ pɩpɩzɩɣ pɩsɩnɩ-ŋ nɛ piɖeni-ŋ cee wayɩ yɔ?

Ɛzɩ pɔyɔɔdʋʋ tɔm ñʋŋ weyi ɩɖɛwa yɔ ɩ-taa yɔ, ɛyaa ta liu ñʋʋ leleŋ, sukuli sɔsɔʋ labʋ, ñɩm nɛ ɛyʋ kɩbanʋ kɛʋ se pɩkaɣ yebu nɛ piɖeni-wɛ cee wayɩ. Ɛlɛ ye ɖɩtɩŋɩɣnɩ nʋmɔŋ ɛnɩ ɩ-yɔɔ se piɖeni-ɖʋ cee wayɩ yɔ, pɩwɛ ɛzɩ ɛyʋ ñakʋʋ pana se ewolo lone nɖɩ ɖɩ-taa ɛɛsɩŋ yɔ ɖɩ-taa, ɛlɛ ɛɛlakɩnɩ tʋmɩyɛ tɛtʋ anjaʋ kɩbaŋʋ yɔ. Ye mbʋ, pɩwɩlɩɣ se nabʋyʋ ɛɛpɩzɩɣ pɩsɩnɩ-ɖʋ nɛ piɖeni-ɖʋ cee wayɩ? Aayɩ!

ÐƖÑƖNƖ SƖNƲƲ WEYI ƐKPAÐAA YƆ Ɛ-CƆLƆ

Ðoŋ ɖoŋ lɛ, ye ɖɩcaɣ se ɖɩkpaɣ lɩmaɣza yɔ, ɖɩpɔzʋʋ lɔŋ tasʋʋ weyi ɛkɩlɩ-ɖʋ pɩnzɩ nɛ lɔŋsɩnɖɛ yɔ. Mbʋ ɖɔɖɔ, pɩsa nɛ piɖeni-ɖʋ cee wayɩ lɛ, pɩpɔzʋʋ se ɖɩpɔzɩ lɔŋ tasʋʋ Weyi ɛkɩlɩ-ɖʋ pɩnzɩ nɛ ɛwɛɛnɩ lɔŋsɩnɖɛ nɛ pɩkpaɖɩ-ɖʋ yɔ. Nɛ ɖɩpɩzɩɣ nɛ ɖɩna ɛ-lɔŋ tasʋʋ mbʋ masɩ kiɖeɖesi taa; nɛ pamaʋ-sɩ yɔ, pɩlakɩ pɩnzɩ 3500 mbʋ yɔ. Masɩ kiɖeɖesi nzɩ sɩkɛnɩ takayaɣ ŋga payaɣ se Bibl yɔ.

Ɛbɛ yɔɔ pɩwɛɛ se ŋtaa Bibl liu? Mbʋ pʋyɔɔ yɔ weyi ɛ-cɔlɔ kɩlɩnaa yɔ ɛnʋ kɩlɩnɩ ɛjaɖɛ kpeekpe yɔɔ nɛ ɛnʋ kɩlɩnɩ lɔŋsɩnɖɛ ɖɔɖɔ. Pɔyɔɔdɩ ɛ-tɔm se ɛkɛ “kɩyakɩŋ akpadɩyʋ” nɛ “tam lɛ [ɛkɛ] Ɛsɔ paa ɛzɩmtaa.” (Danɩyɛɛlɩ 7:9; Keɣa 89:2) Ɛkɛ “weyi ɛlɩzɩ ɛsɔdaa yɔ, Ɛsɔ maɣmaɣ, ɛnʋ ɛmanɩ tɛtʋ nɛ ɛlɩzɩ-tʋ.” (Izaayii 45:18) Eyeba nɛ patɩlɩ-ɩ nɛ hɩɖɛ nɖɩ ɛya ɛ-tɩ se Yahve yaa Yehowa yɔ.—Ejipiti Lɩʋ 3:15.

Bibl lɩnɩ Weyi ɛlɩzɩ ɛyaa kpeekpe yɔ ɛ-cɔlɔ, nɛ pʋyɔɔ lɛ, kɩɩyɔɔdʋʋ se sɔnzɩ yaa tomnaɣ tɔlɩm nabʋyʋ wɛ ɖeu nɛ pɩkpaɖɩ lɛɛbʋ. Kɩ-lɔŋ tasʋʋ wɛ wazaɣ paa ɛzɩmtaa, nɛ ɩwazɩ ajɛɛ tɩŋa taa ɛyaa. Pɛɖɛzɩ-kʋ kʋnʋmɩŋ sakɩyɛ taa, nɛ patayɩ-kʋ ɛjaɖɛ kpeekpe yɔɔ nɛ pɩkpaɖɩ takayɩsɩ lɛɛsɩ.a Pɩwɩlɩɣ se paa ɛyʋ ɛtɩɩwɛ le yɔ, ɛpɩzɩɣ nɛ ɛkalɩ-kʋ nɛ ɛnɩɩ pɩ-taa yem kɛlɛʋ nɛ kɩ-lɔŋ tasʋʋ wazɩ-ɩ. Pɩlabɩ nɔɔ kʋɖʋmaɣ nɛ tɔm ndʋ kɩ-maɣmaɣ kɩyɔɔdʋʋ yɔ:

“Ɛsɔ ɛɛtʋkʋʋ ɛyaa taa, ɛlɛ paa ɛjaɖɛ nɖɩ ɖɩ-taa, weyi ɛñaŋɩ-ɩ nɛ ɛlakɩ mbʋ pɩwɛ ɖeu yɔ ɛ-tɔm kɛdɩɣnɩ-ɩ.” —TƲMA LABƲ 10:34, 35.

Ɛzɩ lʋlɩyʋ sɔɔlɩm tʋ nɔɔyʋ cɔŋnʋʋ e-piya yɔɔ nɛ eɖiyiɣ-sɩ yɔ, mbʋ ɖɔɖɔ Yehowa Ɛsɔ weyi ɛkɛ Caja sɔɔlɩm tʋ yɔ, ɛtɩŋɩɣnɩ ɛ-Tɔm Bibl yɔɔ nɛ ɛsɩɣnɩ-ɖʋ. (2 Timootee 3:16) Ŋpɩzɩɣ nɛ ŋtaa ɛ-tɔm liu, mbʋ pʋyɔɔ yɔ, ɛnʋ labɩnɩ-ɖʋ nɛ ɛsɩm wezuu ŋgʋ ɖɩpɩzɩɣ ɖɩcaɣ nɛ pɩha-ɖʋ taa leleŋ yɔ.

LƆŊ TASƲƲ MBƲ ÐƖPƖZƖƔ NƐ ÐƖTAA-PƲ LIU YƆ

Ðɩpɩzɩɣ nɛ ɖɩtaa liu se lɔŋ weyi Bibl tasɩɣ yɔ, ɩpɩzɩɣ nɛ ɩsɩnɩ-ɖʋ nɛ piɖeni-ɖʋ mbʋ pʋyɔɔ yɔ, pɩlakɩ pɩnzɩ 2 000 yɔ, tɔm ndʋ kɩɩyɔɔdaa pɩlɩɩnɩ ɛjaɖɛ yɔɔ wɛtʋ nɛ ɛyaa wezuu caɣʋ yɔɔ yɔ, ɖɩwɛɛ nɛ ɖɩnaɣ-tʋ sɔnɔ.

ƐJAÐƐ YƆƆ WƐTƲ

“Ɛjaɖɛ lɛɛɖɛ kaɣ kʋyʋʋ ɛjaɖɛ lɛɛɖɛ yɔɔ, nɛ kewiyaɣ lɛɛka kaɣ kʋyʋʋ kewiyaɣ lɛɛka yɔɔ. Tɛtʋ kaɣ ñamsʋʋ siŋŋ, nɛ ñɔɔsɩ nɛ kʋdɔmɩŋ sɔsɔŋ pakaɣ lɩʋ lona ndɩ ndɩ taa.”—LUKA 21:10, 11.

ƐYAA WEZUU CAƔƲ

“Kɛdɛzaɣ kɩyakɩŋ taa lɛ, alɩwaatʋ kaɖɛ ñɩndʋ ndʋ tɩ-lʋbɩnʋʋ wɛɣ kaɖɛ yɔ, tɩkaɣ wɛʋ. Mbʋ pʋyɔɔ yɔ, ɛyaa kaɣ pa-tɩ sɔɔlʋʋ, pakaɣ liidiye sɔɔlʋʋ, pakaɣ wɛnʋʋ agʋnda, pakaɣ pa-tɩ kpazʋʋ, pakaɣ kɛʋ Ɛsɔ yɔɔ tɔm kɩdɛkɛdɩtʋ yɔɔdɩyaa, paakaɣ pa-lʋlɩyaa ñam, paakaɣ wɛnʋʋ ɛsɩmɩyɛ, paakaɣ wɛʋ siɣsiɣ, paakaɣ wɛnʋʋ sɔɔlɩm, paakaɣ tisuu lalaa tɔm yɔɔ, pakaɣ kɛʋ kɔlɔmɔtʋ tɩnaa, paakaɣ wɛnʋʋ tɩ ɖɔkʋʋ, pakaɣ wɛʋ ñaŋ, paakaɣ kɩbandʋ sɔɔlʋʋ, pakaɣ kɛʋ ɛyaa wayɩ lɩyaa, pakaɣ kɛʋ ñʋʋ taa ɖoŋ tɩnaa, pa-taa kaɣ suu nɛ tɩ kpazʋʋ, mbʋ ɛzɩ paasɔɔlɩ Ɛsɔ lɛ, pakaɣ sɔɔlʋʋ leleŋ nɩʋ na.”—2 TIMOOTEE 3:1-4.

Ɛzɩma ŋwɛɛ nɛ ŋnaɣ se tɔm ndʋ Bibl kaayɔɔdɩ ɖooo lɔŋ yɔ, tɩwɛɛ nɛ tɩlakɩ sɔnɔ ɖeyi ɖeyi yɔ, suwe ŋkɔʋ tɔm ñʋʋ? Pɩtʋʋ fɛyɩ se ŋkaɣ tisuu tɔm ndʋ Leung yɔɔdaa yɔ tɩ-yɔɔ. Ɛyɔɔdaa se: “Pamaʋ Bibl taa natʋ tɔm yɔ pɩtɩkɛ sɔnɔ. Ɛyʋ ɛɛpɩzɩɣ nɛ ɛyɔɔdɩ tɔm ndʋ nɛ tɩla ɖeyi ɖeyi mbʋ. Weyi ɛ-cɔlɔ Bibl lɩnaa yɔ, ɛwɛ lɔŋ kpem nɛ pɩkpaɖɩ-ɖʋ.”

Bibl taa natʋ tɔm mɩnɩŋ sakɩyɛ tɛm labʋ.b Pɩwɩlɩɣ se toovenim taa lɛ, Bibl kɛ Ɛsɔ tɔm. Yehowa yɔɔdʋʋ se: “Mɛnkɛnɩ Ɛsɔ nɛ Ɛsɔ nɔɔyʋ fɛyɩ ɖɔɖɔ . . . ɛzɩ ma yɔ. Ðooo kiɖe tɛɛ monkuluu cee wayɩ tɔm yɔɔ.” (Izaayii 46:9, 10) Pʋyɔɔ lɛ, ŋpɩzɩɣ nɛ ŋtaa liu tɔm ndʋ Bibl yɔɔdʋʋ cee wayɩ yɔɔ yɔ.

LƆŊ TASƲƲ MBƲ PƖWAZƖƔ-Ŋ LƐƐLƐƐYƆ NƐ TAM TAM YƆ

Ye ŋɖɔŋ lɔŋ tasʋʋ mbʋ pɩwɛ Masɩ kele kele taa yɔ pɩ-yɔɔ yɔ, pɩwazɩɣ-ŋ. Iyele nɛ ɖɩna kɩɖaŋ nɩɩyɩ.

WƐƐNƖ LƖMAƔZA KƖBANA LIIDIYE NƐ TƲMƖYƐ YƆƆ

“Hɛzʋʋ nikpiɖe tɛɛ ɖo kɩlɩ ɖeu nesi naalɛ tɛɛ ɖo nɛ tʋmɩyɛ nɛ fezuu kʋñɔŋ.”—EKLESƖYASTƖ 4:6.

HƆƲ TAA WEZUU CAƔƲ

“Pɩwɛɛ se mɩ-taa paa weyi ɛsɔɔlɩ ɛ-halʋ ɛzɩ ɛsɔɔlʋʋ ɛ-maɣmaɣ ɛ-tɩ yɔ; ɛlɛ pɩwɛɛ se halʋ ɛña ɛ-walʋ siŋŋ.”—EFƐƐZƖ MBA 5:33.

ƐZƖMA PƖWƐƐ SE ÑA NƐ LALAA MƖ-HƐKƲ TAA ƐWƐƐ YƆ

“Pɩtaawɩzɩ-ŋ, kʋ ñɔ-hɔyɛ, taamʋ miŋ, pɩkɛ kɩwɛɛkɩm.”—KEƔA 36:8.

Ye ŋɖɔŋ Bibl lɔŋ tasʋʋ yɔɔ yɔ, pɩwazɩɣ-ŋ lɛɛlɛɛyɔ nɛ pɩkaɣ-ŋ ɖenuu cee wayɩ ɖɔɖɔ. Ðɩnaɣ tamasɩ kɩbanzɩ nzɩ Yehowa labɩ-ɖʋ cee wayɩ yɔɔ yɔ sɩ-tɔm Bibl taa, nɛ sɩ-taa nasɩyɩ yɔ

LAŊHƐZƖYƐ NƐ PƐƐYƐ

“Ðɛfɛɛ tɩnaa [kaɣ wɛʋ] tamtam ɖɩhɛzɩyɛ taa.”—KEƔA 36:11.

PAA WEYI ƐKAƔ WƐNƲƲ ÐƖZƲYƐ NƐ TƆƆNAƔ

“Nɛ pakaɣ maʋ ɖɩsɩ nɛ pasʋʋ sɩ-taa nɛ pakaɣ sɔʋ viiñi tɩŋ nɛ pɔtɔɔ i-pee.”—IZAAYII 65:21.

KƲDƆŊ NƐ SƖM PAAKAƔ TASƲƲ WƐƲ

“Sɩm ɛɛkaɣ tasʋʋ wɛʋ, kʋñɔwiye nɛ kubusi mabʋ nɛ wɩzasɩ paakaɣ tasʋʋ wɛʋ ɖɔɖɔ.”—NATƲ 21:4.

Ɛbɛ pɩpɔzʋʋ se ŋla nɛ ŋhiɣ cee wayɩ kɩbaŋʋ ŋgʋ? Tɔm ñʋʋ ŋgʋ kɩkɔŋ yɔ, kɩkaɣ-ŋ sɩnʋʋ nɛ ŋna mbʋ pɩwɛɛ se ŋla yɔ.

a Ye ŋsɔɔlaa se ŋtɩlɩ ɛzɩma pɛɖɛzɩɣ Bibl nɛ patayɩɣ-kʋ yɔ pɩ-yɔɔ tɔm nɛ pɩkaɖɩ yɔ, wolo www.jw.org hɔɔlʋʋ LA BIBLE ET VOUS > LA BIBLE ET L’HISTOIRE taa.

b Ye ŋsɔɔlaa se ŋtɩlɩ nɛ pɩkpaɖɩ yɔ, kalɩ takayaɣ La Bible: Parole de Dieu ou des hommes? tɛ ñʋʋ 9. Yehowa Aseɣɖe Tɩnaa lɩzɩnɩ-kɛ. Kɛwɛ intɛrnɛɛtɩ lone www.jw.org yɔɔ. Wolo hɔɔlʋʋ BIBLIOTHÈQUE > LIVRES & BROCHURES taa.