Ɛzɩma tɩyɛ Yehowa huuzuu ñɔ-yɔɔ?

1. Ɛbɛ yɔɔ Yesu pɔzɩ Yehowa se ɛcɔnɩ ɛ-tɔmkpɛlɩkɩyaa yɔɔ?

ÐOO kɛdɛzaɣ ñɩna wena Yesu caɣ wezuu tɛtʋ yɔɔ yɔ a-taa, ɛɛwɛɛ nɛ ɛmaɣzɩɣ kala wena payɩ ɛ-tɔmkpɛlɩkɩyaa kaɣ katʋʋ yɔ a-yɔɔ. Ɛɛsɔɔlɩ ɛ-tɔmkpɛlɩkɩyaa nɛ pʋyɔɔ lɛ, ɛpɔzɩ ɛ-Caa se “kañatʋ tʋ yɔɔ lɛ, [ɛcɔnɩ] pɔ-yɔɔ.” (Yoh. 17:14, 15) Yesu kaanawa se ɛpɩsɩɣ ɛsɔdaa nɛ pɩtɛ lɛ, Sataŋ Eleeu kaɣ wobu pɩ-yɔɔ nɛ eyouni mba payɩ pɔsɔɔlʋʋ se pɛsɛɛ Yehowa yɔ. Pɩwɩlɩɣ kpayɩ kpayɩ se pɩpɔzʋʋ se pohuuzi Yehowa samaɣ yɔɔ.

2. Ɛbɛ yɔɔ ɖa-taa pɩzɩɣ nɛ pɩtɛ se Yehowa kaɣ cosuu ɖa-adɩma yɔɔ?

² Yehowa cosi ɛ-Pɩyalʋ Yesu adɩma yɔɔ mbʋ pʋyɔɔ yɔ, ɛsɔɔlɩ-ɩ. Ye ɖɩñakɩ pana siŋŋ se ɖɔ-tɔm ɛkɛdɩnɩ Yehowa yɔ, ɛkaɣ-ɖʋ sɔɔlʋʋ ɖɔɖɔ nɛ ɛkaɣ cosuu adɩma wena ɖɩlakɩ nɛ ɖɩpɔzʋʋ-ɩ se ɛsɩnɩ-ɖʋ nɛ ehuuzi ɖɔ-yɔɔ yɔ a-yɔɔ. Yehowa kɛ hɔʋ Ñʋʋdʋ weyi ɛmaɣzɩɣ ɛ-hɔʋ yɔɔ yɔ, nɛ ɛkaɣ wobu pɩ-yɔɔ nɛ ɛcɔŋnɩ e-piya yɔɔ nɛ sɔɔlɩm. Ye ɛtɩla mbʋ yɔ, pɩkaɣ pisuu ɛ-hɩɖɛ!

3. Ɛbɛ yɔɔ pɩpɔzʋʋ se Yehowa ehuuzi ɖɔ-yɔɔ sɔnɔ?

³ Lɛɛlɛɛyɔ pɩpɔzʋʋ se Yehowa ehuuzi ɖɔ-yɔɔ nɛ pɩkpaɖɩ alɩwaatʋ ndʋ tɩɖɛwa yɔ tɩ-taa. Potuzi Sataŋ nɛ ɛsɔdaa nɛ pɛpɛɖɩ tɛtʋ yɔɔ, “nɛ ɛkɔ pana siŋŋ.” (Natʋ 12:12) Eyeba nɛ ɛyaa nabɛyɛ maɣzɩɣ se alɩwaatʋ ndʋ panazɩɣ-ɖʋ yɔ lɛ, pɛwɛɛ nɛ palakɩ “tʋmɩyɛ kiɖeɖee naɖɩyɛ” Ɛsɔ. (Yoh. 16:2) Ɛyaa lalaa mba paatisiɣ Ɛsɔ yɔɔ yɔ, panazɩɣ-ɖʋ mbʋ pʋyɔɔ yɔ, ɖɩwɛ ndɩ nɛ mba pɛwɛ ɛjaɖɛ yɔɔ yɔ. Paa ɛbɛ yɔɔ ɛyaa ɩnazɩɣ-ɖʋ yɔ, sɔɔndʋ ɛɛkpaɣ-ɖʋ. Ɛbɛ yɔɔ? Mbʋ pʋyɔɔ yɔ, Ɛsɔtɔm yɔɔdʋʋ se: “Kɩbaɣlʋ wɛ siɣsiɣ, nɛ ɛkaɣ-mɩ kpazʋʋ ɖoŋ nɛ ehuuzi mɩ-yɔɔ se kañatʋ tʋ ɛtaalabɩ-mɩ pʋyʋ.” (2 Tes. 3:3) Ɛzɩma tɩyɛ Yehowa huuzuu ɖɔ-yɔɔ? Iyele nɛ ɖɩna nʋmɔŋ naalɛ weyi ɩ-yɔɔ ɛtɩŋɩɣna nɛ ehuuzuu ɖɔ-yɔɔ yɔ.

YEHOWA HAƔ-ÐƲ YOU WONDU

4. Ɛzɩ Efɛɛzɩ mba 6:13-17 yɔɔdʋʋ yɔ, ɛbɛ Yehowa ha-ɖʋ se pihuuzi ɖɔ-yɔɔ?

⁴ Yehowa ha-ɖʋ you wondu ndʋ tɩpɩzɩɣ nɛ tɩkandɩyɩ ɖɔ-yɔɔ se Sataŋ ɛtaalabɩ-ɖʋ nabʋyʋ yɔ. (Kalɩ Efɛɛzɩ mba 6:13-17.) Fezuu taa you wondu ndʋ, tɩwɛ ɖoŋ nɛ tɩlakɩ tʋmɩyɛ camɩyɛ. Ɛlɛ, pɩwɛɛ se ɖiwolo pɩ-yɔɔ nɛ ɖɩlakɩnɩ paa you wonuu ŋgʋ lɛ tʋmɩyɛ ye ɖɩsɔɔlaa se kɩkandɩyɩ ɖɔ-yɔɔ yɔ. Paa you wonuu ŋgʋ lɛ, ɛbɛ kɩsɩŋnaa? Iyele nɛ ɖɩna.

5. (a) Ɛbɛ payaɣ se toovenim tambaɖɛ? (b) Nɛ ɛbɛ yɔɔ pɩwɛɛ se ɖɩtam-ɖɩ?

⁵ Toovenim tambaɖɛ sɩŋnɩ toovenim tɔm ndʋ tɩwɛ Ɛsɔtɔm Bibl taa yɔ. Ɛbɛ yɔɔ pɩpɔzʋʋ se ɖɩta tambaɖɛ nɖɩ? Pɩpɔzʋʋ se ɖɩtam-ɖɩ mbʋ pʋyɔɔ yɔ, Sataŋ kɛ “cɛtɩm caa.” (Yoh. 8:44) Ɛpaɣzʋʋ cɛtʋʋ yɔ, pɩlakɩ pɩnzɩ kudokiŋ sakɩyɛ yɔ, nɛ epeɣzi “tɛtʋ tɩŋa”! (Natʋ 12:9) Ɛlɛ, toovenim tɔm ndʋ tɩwɛ Bibl taa yɔ, tihuuzuu ɖɔ-yɔɔ se pataapeɣzi-ɖʋ. Ɛzɩma ɖɩtaŋ toovenim tambaɖɛ nɖɩ? Ðɩlakɩ mbʋ ye ɖɩkpɛlɩkɩɣ toovenim tɔm Yehowa yɔɔ, ɖɩsɛɣ-ɩ “fezuu taa nɛ toovenim taa,” nɛ ɖɩyɔɔdʋʋ toovenim pɩtɩŋa pɩ-taa ɖe-wezuu caɣʋ taa yɔ.—Yoh. 4:24; Efɛz. 4:25; Ebr. 13:18.

6. (a) Ɛbɛ siɣsiɣ wɛtʋ ñɩɣyʋʋ toko ŋgʋ kihuuzuu laŋɩyɛ yɔɔ yɔ kɩkɛnaa? (b) Nɛ ɛbɛ yɔɔ pɩpɔzʋʋ se ɖisuu-kʋ?

⁶ Siɣsiɣ wɛtʋ ñɩɣyʋʋ toko ŋgʋ kihuuzuu laŋɩyɛ yɔɔ yɔ, kɩsɩŋnɩ Yehowa paɣtʋ siɣsiɣ ñɩndʋ. Ɛbɛ yɔɔ pɩpɔzʋʋ se ɖisuu ñɩɣyʋʋ toko ŋgʋ? Ñɩɣyʋʋ toko huuzuu sɔɔja laŋɩyɛ yɔɔ, nɛ mbʋ ɖɔɖɔ siɣsiɣ wɛtʋ ñɩɣyʋʋ toko ŋgʋ kihuuzuu laŋɩyɛ yɔɔ yɔ, kihuuzuu ɖɔ-yɔɔ se ɛjaɖɛ ɖɩnɛ ɖɩ-wɛtʋ kɩdɛkɛdɩtʋ ɛtaawɛɛnɩ ɖoŋ ɛyʋ weyi ɖɩkɛnɩ ɖooo ɖa-taa yɔ ɛ-yɔɔ. (Adu. 4:23) Yehowa ñɩnɩɣ se ɖɩsɔɔlɩ-ɩ nɛ ɖɩsɛɛ-ɩ nɛ ɖa-laŋɩyɛ pilim. (Mat. 22:36, 37) Pʋyɔɔ lɛ, Sataŋ ñakɩ pana se eyele nɛ ɖa-laŋɩyɛ tayɩ nɛ ɖɩpaɣzɩ sɔɔlʋʋ ɛjaɖɛ ɖɩnɛ ɖɩ-yɔɔ wondu ndʋ Yehowa paɖɩɣ yɔ. (Yak. 4:4; 1 Yoh. 2:15, 16) Ye ɛtɩŋnɩ nʋmɔʋ ŋgʋ kɩ-yɔɔ nɛ etihiɣ-ɖʋ yɔ, ɛkaɣ ñaɣʋ pana se ɛnazɩ-ɖʋ nɛ piyele nɛ ɖɩla mbʋ pɩɩkɛdɩɣnɩ Yehowa yɔ.

7. Ɛzɩma ɖisuu siɣsiɣ wɛtʋ ñɩɣyʋʋ toko ŋgʋ kihuuzuu laŋɩyɛ yɔɔ yɔ?

⁷ Ðisuu siɣsiɣ wɛtʋ ñɩɣyʋʋ toko ŋgʋ kihuuzuu laŋɩyɛ yɔɔ yɔ ye ɖitisiɣ paɣtʋ ndʋ Yehowa ɖʋ kɩbam nɛ kɩdɛkɛdɩm yɔɔ yɔ tɩ-yɔɔ nɛ ɖɩɖɔŋ tɩ-yɔɔ ɖe-wezuu caɣʋ taa yɔ. (Keɣa 96:10) Ɛyaa nabɛyɛ pɩzɩɣ nɛ pamaɣzɩ se Yehowa paɣtʋ iiyeki se ɖɩwɛɛ ɖa-tɩ yɔɔ. Ɛlɛ ye ɖiyebi ɖɔm Bibl paɣtʋ kila yɔɔ ɖe-wezuu caɣʋ taa yɔ, ɖɩkaɣ wɛʋ ɛzɩ sɔɔja weyi ɛhɔzʋʋ ɛ-ñɩɣyʋʋ toko alɩwaatʋ ndʋ you saɣ miŋ yɔ mbʋ pʋyɔɔ yɔ, ɛmaɣzɩɣ se kɩkɩlɩ yuŋ. Pɩkɛɣnɩ kɩmɛlɛndʋ siŋŋ! Ɛlɛ ye ɖɩsɔɔlɩ Yehowa yɔ, ɖɩnaɣ se “ɛ-paɣtʋ fɛyɩ yuŋ” ɛlɛ tɩyakɩ ɖa-ñʋʋ kɩyabʋ.—1 Yoh. 5:3.

8. Ye pɔtɔm se ɖɩlɛɛ ɖa-nɩŋgbanzɩ naakoma nɛ pɩwɩlɩ se ɖɩñɔɔzɩ ɖa-tɩ se ɖisusi laŋhɛzɩyɛ tɔm kɩbandʋ yɔ, pʋ-tɔbʋʋ lɛ suwe?

⁸ Pɔɔlɩ seɣti-ɖʋ ɖɔɖɔ se ɖɩlɛɛ ɖa-nɩŋgbanzɩ naakoma nɛ pɩwɩlɩ se ɖɩñɔɔzɩ ɖa-tɩ se ɖisusi laŋhɛzɩyɛ tɔm kɩbandʋ. Pʋ-tɔbʋʋ lɛ se pɩpɔzʋʋ se ɖɩkɛ mba pɔñɔɔzɩ pa-tɩ paa ɛzɩmtaa se posusi Kewiyaɣ tɔm kɩbandʋ yɔ. Alɩwaatʋ ndʋ ɖiheyiɣ lalaa Bibl taa tɔm yɔ, pɩkpazɩɣ ɖa-maɣmaɣ ɖe-tisuu ɖoŋ. Alɩwaatʋ ndʋ ɖɩnaɣ ɛzɩma tɛtʋ kpeekpe yɔɔ Yehowa samaɣ taa ñɩma tɩŋɩɣnɩ paa nʋmɔʋ ŋgʋ lɛ kɩ-yɔɔ nɛ posusuu tɔm paa le patɩɩwɛɛ yɔ, pɩkpazɩɣ-ɖʋ ɖoŋ. Posusuu tɔm tʋmɩyɛ taa yaa sukuli taa, alɩwaatʋ ndʋ powoki kpaɣ ɖɩɣa nɛ ŋwolo ɖɩɣa yaa powoki tadɩyɛ kookasɩ taa yɔ, alɩwaatʋ ndʋ powoki wondu yabʋ yaa powoki se pekilimi pɔ-hɔʋ taa ñɩma mba patɩkɛ Yehowa Aseɣɖe Tɩnaa yɔ pɔ-yɔɔ yɔ yaa alɩwaatʋ ndʋ pɔyɔɔdʋʋnɩ pɛ-ɛyɩsɩmaa yɔ. Ye ɖiyeba nɛ sɔɔndʋ kpa-ɖʋ siŋŋ nɛ ɖiyele tɔm susuu yɔ, ɖɩkaɣ wɛʋ ɛzɩ sɔɔja weyi ɛhɔzʋʋ ɛ-naakoma you taa yɔ; pɩwɛɣ kɛlɛʋ se pɩkʋ ɛ-naataŋ. Nɛ pʋyɔɔ lɛ, pɩkaɣ-ɩ wɛʋ kaɖɛ se ɛlʋ ɛ-tɩ yɔɔ alɩwaatʋ ndʋ poyouni-i yɔ, nɛ ɛɛkaɣ pɩzʋʋ nɛ ɛɖɔ paɣtʋ ndʋ ɛ-ñʋʋdʋ ɖʋʋ-ɩ yɔ tɩ-yɔɔ.

9. Ɛbɛ yɔɔ pɩpɔzʋʋ se ɖɩɖɔkɩ tisuu kpayʋʋ sɔsɔʋ?

⁹ Tisuu kpayʋʋ sɔsɔʋ sɩŋnɩ tisuu mbʋ ɖɩwɛnɩ Yehowa yɔɔ yɔ. Ðɩwɛnɩ tisuu se ɛkaɣ ɖɔm tamasɩ nzɩ payɩ ɛlaba yɔ sɩ-yɔɔ. Tisuu mbʋ, pɩkaɣ-ɖʋ sɩnʋʋ se ɖɩɖɩzɩ “kɩdɛkɛdɩm tʋ tɔʋ ñɩma miŋ ñɩna tɩŋa.” Ɛbɛ yɔɔ pɩpɔzʋʋ se ɖɩɖɔkɩ kpayʋʋ sɔsɔʋ ŋgʋ? Mbʋ pʋyɔɔ yɔ, kihuuzuu ɖɔ-yɔɔ se tisuu yebiyaa wɩlɩtʋ ɛtaawɛɛnɩ ɖoŋ ɖɔ-yɔɔ, nɛ kɩsɩɣnɩ-ɖʋ se alɩwaatʋ ndʋ lalaa woŋuu-ɖʋ yɔ, pitaatibi-ɖʋ yɔɔɔ. Ye ɖɩfɛyɩnɩ tisuu yɔ, ɖɩɩkaɣ wɛnʋʋ ɖoŋ se ɖɩɖɔkɩ ɖa-tɩ alɩwaatʋ ndʋ lalaa ñakɩ pana se pañɩɣ ɖɔ-yɔɔ nɛ ɖɩmaanɩ Yehowa paɣtʋ yɔɔ yɔ. Ɛlɛ alɩwaatʋ ndʋ payɩ ɖikiziɣ se ɖɩɩlakɩ mbʋ Yehowa tɩsɔɔlɩ yɔ tʋmɩyɛ taa yaa sukuli taa yɔ, pɩwɩlɩɣ se ɖe-tisuu wɛɛ nɛ pihuuzuu ɖɔ-yɔɔ. (1 Pɩy. 3:15) Alɩwaatʋ ndʋ payɩ ɖikiziɣ se ɖɩɩlakɩ tʋmɩyɛ nɖɩ ɖɩ-taa pɛhɛyɩɣ camɩyɛ nɛ ɖɩkaɣ wɛnʋʋ ɖoŋ ɖɛ-Ɛsɔ sɛtʋ yɔɔ lɛ, pɩwɩlɩɣ se ɖɩwɛɛ nɛ ɖɩɖɔkʋʋ ɖa-kpayʋʋ. (Ebr. 13:5, 6) Nɛ alɩwaatʋ ndʋ payɩ ɖiwoki pɩ-yɔɔ nɛ ɖɩsɛɣ Yehowa paa pakaɖɩɣnɩ-ɖʋ yɔ, pɩwɩlɩɣ se ɖe-tisuu wɛɛ pihuuzuu ɖɔ-yɔɔ.—1 Tes. 2:2.

10. (a) Ɛbɛ payaɣ se ñʋʋ yabɩtʋ ñɩɣyʋʋ hulaɣ? (b) Nɛ ɛbɛ yɔɔ pɩwɛɛ se ɖɩpam-kɛ?

¹⁰ Ñʋʋ yabɩtʋ ñɩɣyʋʋ hulaɣ kɛnɩnɩ lidaʋ ŋgʋ Yehowa haɣ-ɖʋ yɔ. Ɛha-ɖʋ lidaʋ se ɛkaɣ yabʋ ɖa-ñʋʋ sɩm nesi tɛɛ, nɛ ɛkaɣ hɛyʋʋ mba payɩ palakɩ ɛ-sɔɔlɩm yɔ. (1 Tes. 5:8; 1 Tim. 4:10; Tiiti 1:1, 2) Ɛzɩ hulaɣ maɣmaɣ huuzuu sɔɔja ñʋʋ yɔɔ yɔ, mbʋ ɖɔɖɔ ñʋʋ yabɩtʋ lidaʋ huuzuu ɖa-maɣzɩm yɔɔ. Ɛzɩma tɩyɛ? Tisuu mbʋ, piyeki se ɖɩka ɖa-lɩmaɣza Ɛsɔ tamasɩ yɔɔ nɛ pɩsɩɣnɩ-ɖʋ se ɖɩtaakɩlɩɣ nɩɣzʋʋ kala wena ɖɩkatɩɣ yɔ a-yɔɔ. Ɛzɩma tɩyɛ ɖɩpaŋ ñɩɣyʋʋ hulaɣ ŋga? Ðɩpaŋ-kɛ ye ɖiwoki pɩ-yɔɔ nɛ ɖiyeki se ɖa-maɣzɩm ɛla nɔɔ kʋɖʋmaɣ nɛ Ɛsɔ maɣzɩm yɔ. Ðɩɩɖʋʋ ɖe-lidaʋ ñɩm mbʋ paapɩzɩɣ nɛ pataa-pʋ liu yɔ pɩ-yɔɔ, ɛlɛ Ɛsɔ yɔɔ ɖɩɖʋʋ-kʋ.—Keɣa 25:2; 103:34 1 Tim. 6:17.

11. (a) Ɛbɛ payaɣ se fezuu laɣɖɛ? (b) Nɛ ɛbɛ yɔɔ pɩwɛɛ se ɖɩlabɩnɩ-ɖɩ tʋmɩyɛ?

¹¹ Fezuu laɣɖɛ kɛnɩnɩ Ɛsɔtɔm, Bibl. Laɣɖɛ nɖɩ, ɖɩwɛnɩ ɖoŋ se ɖikuli paa cɛtɩm mbʋ lɛ pɩ-yɔɔ nɛ ɖɩsɩnɩ ɛyaa nɛ palɩɩ cɛtɩm wɩlɩtʋ nɛ lakasɩ kɩdɛkɛdɩsɩ yomiye taa. (2 Kɔr. 10:4, 5; 2 Tim. 3:16, 17; Ebr. 4:12) Alɩwaatʋ ndʋ ɖɩkpɛlɩkɩɣ ɖa-tɩ yɔɔ nɛ ɖɩmʋʋ falɩsʋʋ Yehowa ɛgbɛyɛ taa yɔ, pɩwɩlɩɣ se ɖɩwɛɛ nɛ ɖɩkpɛlɩkɩɣ ɛzɩma ɖɩlabɩnɩ laɣɖɛ nɖɩ tʋmɩyɛ camɩyɛ yɔ. (2 Tim. 2:15) Pɩtasɩnɩ you wondu ndʋ lɛ, Yehowa tɩŋɩɣnɩ nʋmɔʋ nakʋyʋ yɔɔ ɖɔɖɔ nɛ ehuuzuu ɖɔ-yɔɔ. Nʋmɔʋ ŋgʋ lɛ ŋgʋ?

YEHOWA TƖŊƖƔNƖ NƲMƆƲ LƐƐKƲ YƆƆ ÐƆÐƆ NƐ EHUUZUU ÐƆ-YƆƆ

12. (a) Ɛbɛ ɖɔɖɔ pɩpɔzʋʋ-ɖʋ? (b) Nɛ ɛbɛ yɔɔ?

¹² Sɔɔja weyi ɛwɛ niye yɔ, ɛnawa se e-ɖeke ɛɛpɩzɩɣ nɛ eyooni sɔɔjanaa sakɩyɛ nɛ ɛwabɩ-wɛ. Pɩpɔzʋʋ se ɛ-taabalaa ɩsɩnɩ-ɩ. Mbʋ ɖɔɖɔ ɖe-ɖeke ɖɩɩpɩzɩɣ nɛ ɖɩkaɖɩnɩ Sataŋ nɛ ɛ-wayɩ tɩŋɩyaa nɛ ɖɩwabɩ-wɛ, pɩpɔzʋʋ se ɖo-koobiya ɩsɩnɩ-ɖʋ. Yehowa ha-ɖʋ sɔɔjanaa miiliyɔɔwaa sakɩyɛ mba papɩzɩɣ nɛ pasɩnɩ-ɖʋ yɔ. Mba lɛ “ɛjaɖɛ kpeekpe yɔɔ koobiya.”—1 Pɩy. 2:17.

13. Ɛzɩ Ebree mba 10:24, 25 yɔɔdʋʋ yɔ, ye ɖiwoki ɖe-kediɣzisi yɔ, ɛzɩma pɩwazɩɣ-ɖʋ?

¹³ Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ lalaa sɩnɩ-ɖʋ yɔ, ɩ-taa nakʋyʋ lɛ kediɣzisi wobu. (Kalɩ Ebree mba 10:24, 25.) Pitiki ɖa-tɩŋa yɔɔɔ nabʋyʋ taa, nɛ alɩwaatʋ ndʋ pɩtalɩɣ-ɖʋ mbʋ yɔ, kediɣzisi pɩzɩɣ nɛ sɩkpazɩ-ɖʋ ɖoŋ. Tɔm ndʋ ɖo-koobiya cosuu kediɣzisi taa nɛ pa-laŋɩyɛ pilim yɔ, tɩkpazɩɣ-ɖʋ ɖoŋ. Samaɣ taa tɔm ndʋ patɩŋɩɣnɩ Bibl yɔɔ nɛ pɔyɔɔdʋʋ yɔ nɛ la ŋwɩlɩwaa piseɣtiɣ-ɖʋ se ɖiwolo pɩ-yɔɔ nɛ ɖɩsɛɣ Yehowa. Nɛ kɛdɛsɩ kɩbanzɩ nzɩ ɖa nɛ ɖo-koobiya ɖɩlakɩ pʋcɔ nɛ kediɣzaɣ paɣzɩ yaa kɛtɛŋ lɛ yɔ, sɩkpazɩɣ-ɖʋ ɖoŋ. (1 Tes. 5:14) Pɩtasɩ lɛ, ɖe-kediɣzisi haɣ-ɖʋ waɖɛ se ɖɩsɩnɩ lalaa, nɛ pɩhaɣ-ɖʋ taa leleŋ. (Tʋma 20:35; Roma 1:11, 12) Ðe-kediɣzisi sɩɣnɩ-ɖʋ hɔɔlɩŋ lɛɛŋ taa ɖɔɖɔ. Sɩsɩɣnɩ-ɖʋ se ɖɩkɛ tɔm susuyaa nɛ tɔm wɩlɩyaa kɩbama nɛ pɩkpaɖɩ. Sɩ-taa ɖɩkpɛlɩkɩɣ ɛzɩma ɖɩlabɩnɩ wondu ndɩ ndɩ ndʋ tɩwɛ ɖɔ-Tɔm wɩlʋʋ wondu taa yɔ tʋmɩyɛ camɩyɛ yɔ. Pʋyɔɔ lɛ, ñɔɔzɩ ɛgbɛyɛ taa kediɣzisi camɩyɛ pʋcɔ nɛ ŋwolo sɩ-taa. Paalakɩ kediɣzaɣ lɛ, welisi camɩyɛ. Kediɣzaɣ tɛŋ lɛ, labɩnɩ tʋmɩyɛ falɩsʋʋ mbʋ ŋmʋwa yɔ. Ye ŋlakɩ mbʋ yɔ, ŋkaɣ pɩsʋʋ “Krɩstʋ Yesu sɔɔja kɩbanʋ.”—2 Tim. 2:3.

14. Mba sɩɣnɩ-ɖʋ ɖɔɖɔ?

¹⁴ Ɛsɔ tiyiyaa miiliyaarɩwaa sakɩyɛ mba pɛwɛ ɖoŋ yɔ, pasɩɣnɩ-ɖʋ ɖɔɖɔ. Maɣzɩ mbʋ tiyiyu kʋɖʋm ɖeke pɩzɩɣ nɛ ɛla yɔ pɩ-yɔɔ nɛ ŋna! (Iza. 37:36) Lɛɛlɛɛyɔ maɣzɩ mbʋ tiyiyaa canɖaʋ sɔsɔʋ nakʋyʋ pɩzɩɣ nɛ kɩla yɔ pɩ-yɔɔ nɛ ŋna. Ɛyʋ nɔɔyʋ yaa eleeu nɔɔyʋ ɛɛpɩzɩɣ nɛ ɛwa Yehowa sɔɔjanaa mba pɛwɛ ɖoŋ yɔ. Yehowa kpaɖɩnɩ ɖoŋ kedeŋa kpeekpe yɔɔ. Pʋyɔɔ lɛ, ye ɛwɛ ɖɔ-hɔɔlʋʋ yɔɔ yɔ, ɖɩkaɣ wɛʋ ɖoŋ paa ɛzɩmtaa nɛ pɩkpaɖɩ mba pakaɖɩɣnɩ-ɖʋ yɔ paa pɔɖɔ ɛzɩma yɔ. (Th. 6:16) Ða-taa pɩzɩɣ nɛ pɩtɛ se tɔm ndʋ tɩkɛ toovenim! Alɩwaatʋ ndʋ ña-tʋmɩyɛ taa tʋ nɔɔyʋ, ño-sukuli taa tʋ nɔɔyʋ yaa ñɔ-hɔʋ taa tʋ weyi ɛtɩkɛ Aseɣɖe Tʋ yɔ, ɛyɔɔdʋʋ natʋyʋ yaa ɛlakɩ nabʋyʋ nɛ pitibi-ŋ yɔɔɔ yɔ, maɣzɩ tɔm ndʋ tɩ-yɔɔ. Taasɔɔ se pɩtɩkɛ ñe-ɖeke ŋwɛna nɛ ŋlakɩ fezuu taa you ŋgʋ. Ŋwɛɛ nɛ ŋɖɔŋ nʋmɔʋ ŋgʋ Yehowa wɩlɩɣ-ŋ yɔ kɩ-taa.

YEHOWA KAƔ WOBU PƖ-YƆƆ NƐ EHUUZUU ÐƆ-YƆƆ

15. Ɛzɩ Izaayii 54:15, 17 yɔɔdʋʋ yɔ, ɛbɛ yɔɔ ɖoŋ nɩɩyɩ ɛɛpɩzɩɣ se ɛsɩnzɩ Yehowa samaɣ se kataasusi tɔm?

¹⁵ Lɩmaɣza sakɩyɛ yɔɔ lɛ, ɛjaɖɛ nɖɩ Sataŋ ɖiyiɣ yɔ, ɖɩpaɖɩɣ-ɖʋ. Ðɩɩɖʋʋ ɖɔ-nɔɔ politiki tɔm taa paa ññɩɩ nɛ ɖɩɩlakɩ you ɖɔɖɔ. Ðisusuu Ɛsɔ hɩɖɛ nɛ ɖisusuu ɖɔɖɔ se e-Kewiyaɣ ɖeke pɩzɩɣna nɛ kɔkɔnɩ laŋhɛzɩyɛ, nɛ ɖɩñaŋ ɛ-paɣtʋ siɣsiɣ ñɩndʋ. Ðɩwɩlɩɣ ɛyaa se weyi eɖiyiɣ ɛjaɖɛ ɖɩnɛ yɔ ɛkɛ kɩdɛkɛdʋ, cɛtɩyʋ nɛ ɛyaa kʋyʋ. (Yoh. 8:44) Nɛ ɖisusuu ɖɔɖɔ se piileɖiɣ lɛ, pakaɣ ɖɩzʋʋ Sataŋ ɛjaɖɛ. Sataŋ nɛ ɛ-wayɩ tɩŋɩyaa paakaɣ pɩzʋʋ kpa nɛ paɖɩɣ-ɖʋ nʋmɔʋ se ɖitaasusi tɔm. Ɛlɛ, ɖɩkaɣ wobu pɩ-yɔɔ nɛ ɖɩtɩŋɩɣnɩ wala wena payɩ ɖɩwɛna yɔ a-yɔɔ nɛ ɖɩsaŋ Yehowa! Paa Sataŋ kaawɛ ɖoŋ siŋŋ yɔ, ɛtɩpɩzɩ nɛ ɛɖɩɣ Kewiyaɣ tɔm nʋmɔʋ se tɩtaatalɩ ɛyaa ɛjaɖɛ kpeekpe yɔɔ. Ɛzɩma Yehowa huuzuu ɖɔ-yɔɔ yɔ, pi-ɖeke pɩ-yɔɔ ɖɩpɩzɩɣ nɛ ɖɩlakɩ mbʋ.—Kalɩ Izaayii 54:15, 17.

16. Ɛzɩma tɩyɛ Yehowa kaɣ yabʋ ɛ-samaɣ ñʋʋ kʋñɔŋ sɔsɔʋ alɩwaatʋ taa?

¹⁶ Ɛbɛ kaɣ labʋ nɛ ɛsɩndaa? Yehowa kaɣ tɩŋnʋʋ piti nʋmɔŋ naalɛ yɔɔ nɛ ɛya ɖa-ñʋʋ kʋñɔŋ sɔsɔʋ alɩwaatʋ taa. Kajalaɣ lɛ, ɛkaɣ yabʋ ɛ-sɛyaa siɣsiɣ ñɩma ñʋʋ alɩwaatʋ ndʋ eyeki se tɛtʋ yɔɔ awiya ɩɖɩzɩ Babilɔɔnɩ sɔsɔʋ yɔ, pʋ-tɔbʋʋ se cɛtɩm Ɛsɔ sɛtʋ agbaa tɩŋa. (Natʋ 17:16-18; 18:2, 4) Pʋwayɩ lɛ, ɛkaɣ yabʋ ɛ-samaɣ ñʋʋ alɩwaatʋ ndʋ ɛtɛzɩɣ ɖɩzʋʋ Sataŋ ɛjaɖɛ hɔɔlʋʋ ŋgʋ kɩkazaa yɔ Armaagedɔɔ taa yɔ.—Natʋ 7:9, 10; 16:14, 16.

17. Ye ɖiwobi pɩ-yɔɔ nɛ ɖɩñɔɔnɩ Yehowa yɔ, ɛzɩma pɩwazɩɣ-ɖʋ?

¹⁷ Ye ɖiwobi pɩ-yɔɔ nɛ ɖɩñɔɔnɩ Yehowa yɔ, Sataŋ ɛɛpɩzɩɣ nɛ ɛlabɩ-ɖʋ nabʋyʋ nɛ pɩcamɩ-ɖʋ tam. Toovenim taa lɛ, ɛnʋ pakaɣ ɖɩzʋʋ tam. (Roma 16:20) Pʋyɔɔ lɛ, suu you wondu tɩŋa, nɛ wolo pɩ-yɔɔ nɛ ŋlakɩnɩ-tʋ tʋmɩyɛ! Taañaɣ pana se ŋla you ñe-ɖeke. Ðʋ ño-koobiya nesi. Nɛ ɖɔ nʋmɔʋ ŋgʋ Yehowa wɩlɩɣ-ŋ yɔ kɩ-taa. Ye ŋlakɩ mbʋ yɔ, ña-taa pɩzɩɣ nɛ pɩtɛ se ña-Caa kʋsɔɔlʋ weyi ɛwɛ ɛsɔdaa yɔ, ɛkaɣ-ŋ kpazʋʋ ɖoŋ nɛ ehuuzi ñɔ-yɔɔ.—Iza. 41:10.