Piya evelisi: Ɛbɛ ɩpɩzɩɣ ɩla nɛ ɛyaa lalaa taa-mɩ liu?

1. Toovenim tɔm ndʋ ɖɩsɩm ɖo-koobiya piya evelisi yɔɔ?

PIYA evelisi, ɩpɩzɩɣ nɛ ɩwɛɛ wazaɣ siŋŋ ɛgbɛyɛ taa. Mɩ-taa sakɩyɛ wɛ ɖoŋ. (Adu. 20:29) Ɩlakɩ tʋma sakɩyɛ nɛ ɩsɩɣnɩ mi-koobiya ɛgbɛyɛ taa. Pɩtɩla ɩɖaŋ kpam se paha-mɩ waɖɛ nɛ ɩpɩsɩ ɛgbɛyɛ taa tʋmlaɖaa. Ɛlɛ pɩtɩla pɩlakɩ-mɩ ɛzɩ lalaa maɣzɩɣ se ɩtɩpaɣlɩ yaa ɩfɛyɩnɩ lɛɣtʋ ndʋ pɩpɔzʋʋ yɔ se paɖʋ-mɩ tʋma wena a-tɔm cɛyaa yɔ. Paa ɩkɛ piya evelisi yɔ, ɩpɩzɩɣ nɛ ɩla nabʋyʋ lɛɛlɛɛyɔ nɛ ɛgbɛyɛ taa mba taa-mɩ liu nɛ pañam-mɩ.

2. Ɛbɛ taa ɖɩkaɣ tazʋʋ tɔm ñʋʋ kʋnɛ kɩ-taa?

² Tɔm ñʋʋ kʋnɛ kɩ-taa, ɖɩkaɣ tazʋʋ Wiyaʋ Daviid wezuu caɣʋ tɔm taa. Ðɩkaɣ tazʋʋ ɖɔɖɔ mbʋ pɩlabɩ Aazaa nɛ Yozafaatɩ pe-wezuu caɣʋ taa yɔ, pɩ-taa pazɩ. Paakɛ Yuuda awiya. Ðɩkaɣ tazʋʋ ɖɔɖɔ nɛ ɖɩna kala wena abalaa panɛ pa-naadozo paakataa yɔ, nɛ mbʋ palaba nɛ pɔcɔnɩ kala ana a-ɖeɖe yɔ, nɛ lɔŋ weyi pa-kɩɖaŋ pɩzɩɣ nɛ ɩkpɛlɩkɩ piya evelisi yɔ.

KPƐLƖKƖ LƆŊ WIYAƲ DAVIID CƆLƆ

3. Nʋmɔŋ weyi ɩ-yɔɔ piya evelisi pɩzɩɣ sɩtɩŋna nɛ sɩsɩnɩ ɛyaa sɔsaa ɛgbɛyɛ taa yɔ ɩ-taa lɛɛkʋ lɛ ŋgʋ?

³ Alɩwaatʋ ndʋ Daviid kaakɛ pɩɣa evelaɣ yɔ, ɛɛkpɛlɩkɩ lɛɣtʋ ndʋ lalaa maɣzaɣ se tɩwɛ wazaɣ yɔ. Pɩnaɣaɣ kpayɩ kpayɩ se taabalɩyɛ kɩbanɖɛ kaawɛ ɛ nɛ Yehowa pɛ-hɛkʋ taa. Nɛ ɛɛñaɣ pana nɛ ɛwɛɛ niye cɩmʋʋ mabʋ taa nɛ ɛlabɩnɩ tʋmɩyɛ lɛɣtʋ ndʋ ɛɛwɛnɩ cɩmʋʋ mabʋ taa yɔ nɛ ɛsɩnɩ Sɔɔlɩ, weyi Yehowa kaalɩzaa se ɛkɛ wiyaʋ yɔ. (1 Sam. 16:16, 23) Piya evelisi, ɩwɛnɩ lɛɣtʋ ndʋ ɩpɩzɩɣ nɛ ɩlabɩnɩ tʋmɩyɛ nɛ ɩsɩnɩ ɛyaa lalaa ɛgbɛyɛ taa yɔ? Mɩ-taa sakɩyɛ wɛnɩ lɛɣtʋ natʋyʋ. Pɩtɩla iɖiɣzinaa se ɛyaa sɔsaa taa lakɩ leleŋ siŋŋ alɩwaatʋ ndʋ ɩsɩɣnɩ-wɛ se patɩlɩ ɛzɩma palabɩnɩ tʋmɩyɛ taabɩlɛɛtɩwaa yaa wondu lɛɛtʋ nɛ pɛkpɛlɩkɩ pa-tɩ yɔɔ yaa palabɩnɩ-tʋ tʋmɩyɛ kediɣzisi taa yɔ. Lɛɣtʋ ndʋ ɩwɛnɩ wondu ndʋ tɩ-yɔɔ yɔ, tɩpɩzɩɣ nɛ tɩwazɩ ɛyaa sɔsaa siŋŋ.

4. Ɛzɩ Daviid yɔ, wɛtʋ kɩbandʋ ndʋ pɩpɔzʋʋ se piya evelisi ɩñaɣ pana nɛ sɩwɛɛna? (Cɔnɩ takayaɣ huyuu yɔɔ kɩlɛmʋʋ.)

⁴ Daviid wezuu caɣʋ taa, paa evemiye nɖɩ, ɛwɩlaa se ɛkɛ ɛyʋ weyi papɩzɩɣ nɛ pataa-ɩ liu yɔ. Alɩwaatʋ ndʋ ɛɛkɛ pɩɣa evelaɣ yɔ, ɛɛñaɣ pana siŋŋ nɛ ɛcɔnɩ ɛ-caa heŋ yɔɔ camɩyɛ. Pɩɩkɛ tʋmɩyɛ nɖɩ ɖɩwɛ kaɖɛ siŋŋ yɔ. Daviid heyi Wiyaʋ Sɔɔlɩ se: “Ña-lɩmɖʋyʋ tɩŋaɣ ɛ-caa wondu lɛ, tɔɔyʋ yaa toye ɛkɔma nɛ ɖikpi ɛyaʋ nakʋyʋ wondu hɛkʋ taa kɔyɔ, mantɩŋaɣ ɖɩ-wayɩ nɛ mɛlɛɣ nɛ malɩzɩɣ ɖɩ-nɔɔ taa.” (1 Sam. 17:34, 35) Daviid kaanawa se ɛ-tʋmɩyɛ pɩkɛnaa se ɛcɔnɩ heŋ yɔɔ, nɛ ɛlʋbɩ ɩ-yɔɔ nɛ abalɩtʋ. Piya evelisi pɩzɩɣ nɛ sɩmaɣzɩnɩ Daviid ye sɩñakɩ pana nɛ sɩlakɩ tʋma wena payɩ paɖʋʋ-sɩ yɔ camɩyɛ yɔ.

5. Ɛzɩ Keɣa 24:14 yɔɔdʋʋ yɔ, ɛbɛ piya evelisi pɩzɩɣ sɩla nɛ pɩ-tɔm cɛyaa nɛ pɩkpaɖɩ?

⁵ Daviid kaakɛ pɩɣa evelaɣ lɛ, ɛɛñaɣ pana nɛ taabalɩyɛ kɩbanɖɛ wɛɛ ɛ nɛ Yehowa pɛ-hɛkʋ taa. Taabalɩyɛ kɩbanɖɛ nɖɩ ɖɩ-tɔm kaacɛyaa nɛ pɩkɩlɩ abalɩtʋ yaa cɩmʋʋ mabʋ lɛɣtʋ ndʋ Daviid kaawɛna yɔ. Yehowa taakɛ Daviid tɛ Ɛsɔ yem, ɛɛkɛ ɖɔɖɔ Daviid taabalʋ kɩbanʋ. (Kalɩ Keɣa 24:14.) Piya evelisi, ɩpɩzɩɣ nɛ ɩcɛyɩsɩ taabalɩyɛ nɖɩ ɖɩwɛ mɩ nɛ mɩ-Caa weyi ɛwɛ ɛsɔdaa yɔ mɩ-hɛkʋ taa yɔ; nɛ pɩ-tɔm cɛyɩna nɛ pɩkɩlɩ. Ye ɩlabɩ mbʋ yɔ, papɩzɩɣ nɛ paha-mɩ wala ɛgbɛyɛ taa nɛ pɩkpaɖɩ.

6. Lɩmaɣza kɩdɛkɛda wena nabɛyɛ kaawɛnɩ Daviid yɔɔ?

⁶ Pɩɩpɔzaa se Daviid ɛlʋbɩnɩ lɩmaɣza kɩdɛkɛda wena ɛyaa lalaa kaawɛnɩ ɛ-yɔɔ yɔ. Alɩwaatʋ ndʋ Daviid kaaha ɛ-tɩ faaa se eyouni Gooliyaatɩ yɔ, Wiyaʋ Sɔɔlɩ kaañaɣ pana se eyele nɛ pitibi-i yɔɔɔ. Ɛyɔɔdaa se: “Ŋkɛ pɩɣa eleeu yem.” (1 Sam. 17:31-33) Pʋcɔ nɛ pɩtalɩɣ mbʋ lɛ, Daviid ɖalʋ maɣmaɣ kaaheyi-i se ɛkɛ pɩɣa ŋga kaasɩɣ ka-tɩ pɩ-cɔlɔ yɔ. (1 Sam. 17:26-30) Ɛlɛ Yehowa ñataamaɣzɩɣ se Daviid kaakɛ pɩɣa yem yaa ɛɛsɩɣ ɛ-tɩ pɩ-cɔlɔ. Ɛɛsɩm Daviid camɩyɛ, nɛ Daviid pɩzaa nɛ ɛkʋ Gooliyaatɩ mbʋ pʋyɔɔ yɔ ɛta liu ɛ-taabalʋ Yehowa.—1 Sam. 17:45, 48-51.

7. Daviid yɔɔ kɛdaɣ ŋga kɔ-tɔm pɔyɔɔdɩ tayʋʋ pʋnɛ pɩ-taa yɔ, ɛbɛ kɛkpɛlɩkɩɣ-ŋ?

⁷ Mbʋ pɩtalɩ Daviid yɔ, ɛbɛ pɩpɩzɩɣ nɛ pɩkpɛlɩkɩ-ɖʋ? Tɔm ndʋ tɩkpɛlɩkɩɣ-ɖʋ se pɩpɔzʋʋ se ɖɩwɛɛ suuɖu. Pɩpɩzɩɣ nɛ pɩkpaɣ alɩwaatʋ pʋcɔ nɛ ɛyaa mba paasɩmɩ-ŋ alɩwaatʋ ndʋ ŋŋkɛ pɩɣa yɔ, peɖiɣzina se ŋpɩsɩ ɛyʋ sɔsɔ. Ɛlɛ ña-taa pɩzɩɣ nɛ pɩtɛ se Yehowa ɛɛcɔŋnɩ ɛyʋ weyi ŋkɛnɩ ɛsa yɔɔ yem yɔ. Ɛsɩm weyi ŋkɛnaa yɔ nɛ mbʋ ŋpɩzɩɣ nɛ ŋla yɔ. (1 Sam. 16:7) Cɛyɩsɩ ña nɛ Ɛsɔ mɩ-taabalɩyɛ. Daviid kpakaɣ alɩwaatʋ nɛ ɛcɔŋnɩ wondu ndʋ Yehowa lɩzaa yɔ. Piyeba nɛ ɛ nɛ Yehowa pa-taabalɩyɛ cɛyɩsɩ. Daviid kpakaɣ alɩwaatʋ nɛ ɛmaɣzɩɣ mbʋ wondu kɩlɩzɩtʋ ndʋ tɩkpɛlɩkaɣ-ɩ Lɩzɩyʋ yɔɔ yɔ pɩ-yɔɔ. (Keɣa 8:4, 5; 138:14; Roma 1:20) Mbʋ ŋpɩzɩɣ nɛ ŋtasɩ labʋ yɔ mbʋ yɔ: Pɔzɩ Yehowa se ɛha-ŋ ɖoŋ weyi pɩpɔzʋʋ-ŋ yɔ. Ño-sukuli taa taabalaa nabɛyɛ woŋuu-ŋ mbʋ pʋyɔɔ ŋkɛ Yehowa Aseɣɖe Tʋ na? Ye pɩkɛ mbʋ yɔ, tɩmnɩ Yehowa se ɛsɩnɩ-ŋ nɛ ŋlʋbɩnɩ kaɖɛ nɖɩ. Ðɔ lɔŋ tasʋʋ kɩbam mbʋ pɩwɛ Ɛsɔtɔm, ɖɛ-ɛgbɛyɛ takayɩsɩ, nɛ videowaa taa yɔ pɩ-yɔɔ. Alɩwaatʋ ndʋ payɩ ŋnaɣ se Yehowa sɩnɩ-ŋ nɛ ŋlʋbɩnɩ kaɖɛ naɖɩyɛ yɔ, tisuu mbʋ ŋwɛna se ɛkaɣ-ŋ sɩnʋʋ kala lɛɛna taa yɔ, pɩkaɣ paɣlʋʋ. Pɩtasɩ lɛ alɩwaatʋ ndʋ lalaa naɣ se ŋtaɣ liu Yehowa lɛ, pakaɣ-ŋ taʋ liu ɖɔɖɔ.

8-9. (a) Ɛbɛ sɩnɩ Daviid nɛ ɛɖaŋnɩ suuɖu nɛ pɩkɔɔ pɩtalɩ alɩwaatʋ ndʋ ɛpɩsɩ wiyaʋ yɔ? (b) Nɛ lɔŋ weyi piya evelisi pɩzɩɣ nɛ sɩkpɛlɩkɩ Daviid cɔlɔ?

⁸ Iyele nɛ ɖɩyɔɔdɩ kaɖɛ lɛɛɖɛ nɖɩ Daviid kataa yɔ ɖɩ-tɔm. Pata Daviid num se ɛpɩsɩ wiyaʋ nɛ pɩtɛ lɛ, pɩɩwɛɛ se ɛɖaŋ pɩnzɩ sakɩyɛ pʋcɔ nɛ ɛpɩsɩ Yuuda wiyaʋ. (1 Sam. 16:13; 2 Sam. 2:3, 4) Alɩwaatʋ ndʋ tɩ-taa, ɛbɛ kaasɩnɩ-ɩ nɛ ɛɖaŋnɩ suuɖu? Mbʋ ɛzɩ Daviid kaayeba nɛ pitibi-i yɔɔɔ lɛ, ɛɛkam ñʋʋ nɛ mbʋ ɛpɩzaɣ labʋ yɔ. Alɩwaatʋ ndʋ Daviid kaasewa nɛ ɛmɛlɩ Filistii mba tɛtʋ taa yɔ, ɛɛtɩŋnɩ waɖɛ nɖɩ ɖɩ-yɔɔ nɛ eyooni Izrayɛɛlɩ koyindinaa. Ɛlabɩ mbʋ nɛ ɛkandɩyɩ Yuuda tɛtʋ kamasɩ yɔɔ.—1 Sam. 27:1-12.

⁹ Ɛbɛ piya evelisi pɩzɩɣ nɛ sɩkpɛlɩkɩ Daviid cɔlɔ? La mbʋ ŋpɩzɩɣ yɔ nɛ ŋsɩnɩ ño-koobiya. Payaɣ koobu abalɩñɩnʋ nɔɔyʋ se Ricardo,b maɣzɩ mbʋ pɩtalɩ-ɩ yɔ pɩ-yɔɔ nɛ ŋna. Ɛɛsɔɔlɩ ɖooo lɔŋ se ɛpɩsɩ paa ɖooye nʋmɔʋ lɩzɩyʋ. Ɛlɛ Ɛgbɛyɛ taa ɛzʋtʋyaa heyi-i se ɛtasɩ ɖaŋʋʋ pazɩ. Mbʋ ɛzɩ piitibi Ricardo yɔɔɔ nɛ ɛkɔ pana lɛ, ewobi pɩ-yɔɔ nɛ esusuu tɔm sakɩyɛ nɛ pɩkɩlɩɣ. Ɛyɔɔdaa se: “Mamaɣzɩɣ pɩnzɩ nzɩ sɩɖɛwa yɔ sɩ-yɔɔ lɛ, menɖiɣziɣna se pɩɩkɛnɩ lɩmaɣzɩyɛ kɩbanɖɛ se mansɩŋ pazɩ nɛ mantasɩ ɖɛnʋʋ ɛsɩndaa nɛ pʋcɔ. Mañakaɣ pana nɛ manpɩsɩɣ ɛyaa mba pawɩlaa se toovenim tɔm kɛdɩnɩ-wɛ yɔ pɔ-cɔlɔ, nɛ mɔñɔɔzaɣ man-tɩ pʋcɔ nɛ manpɩsɩɣ pa-taa paa weyi lɛ ɛ-cɔlɔ. Halɩ maapaɣzɩ nɔɔyʋ Bibl kpɛlɩkɩnʋʋ. Maawɛɛ nɛ monsusuu tɔm nɛ pɩkɩlɩɣ lɛ, sɔɔndʋ ndʋ tɩkpaɣaɣ-m yɔ tɩwɛɛ nɛ tɩpasɩɣ.” Lɛɛlɛɛyɔ Ricardo pɩsɩ paa ɖooye nʋmɔʋ lɩzɩyʋ nɛ ɛgbɛyɛ taa tʋmlaɖʋ.

10. Ɛbɛ Daviid labɩ alɩwaatʋ natʋyʋ pʋcɔ nɛ ɛkpaɣ lɩmaɣzɩyɛ kɩcɛyɩyɛ naɖɩyɛ?

¹⁰ Maɣzɩ Daviid wezuu caɣʋ kɛdaɣ lɛɛka yɔɔ nɛ ŋna. Ɛ nɛ ɛ-ɛyaa paasewa nɛ pɛmɛlɩ Filistii mba tɛtʋ taa lɛ, alɩwaatʋ natʋyʋ paayebi pɔ-hɔŋ nɛ pɛɖɛɛ you nakʋyʋ labʋ. Pɛɖɛwa lɛ, koyindinaa nabɛyɛ kɔɔ nɛ pasʋʋ pa-ɖɩsɩ taa nɛ pakpaɣ pɔ-hɔŋ nɛ pɛɖɛnɩ yomiye taa. Daviid pɩzaɣ se ɛmaɣzɩ se ɛwɛnɩ lɛɣtʋ sakɩyɛ you labʋ taa nɛ pʋyɔɔ lɛ ɛpɩzɩɣ nɛ ɛla ɖʋtʋ nɛ ewolo nɛ ɛya ɛyaa mba pakpawa nɛ pɛɖɛnɩ yomiye taa yɔ pa-ñʋʋ. Daviid tɩla mbʋ, ɛlɛ ɛpɔzɩ Yehowa se ɛsɩnɩ-ɩ. Daviid pɔzɩ cɔjɔ Abiyaataarɩ nɛ ɛlɛ sɩnɩ-ɩ nɛ ɛpɔzɩ Yehowa se: “Ɛzɩ mense yaa mantaase hasɩ sɩnɛ yɔ sɩ-wayɩ nɛ mankpa-sɩ?” Yehowa heyi Daviid se ese pa-wayɩ nɛ ɛkaɣ yabʋ yomaa ñʋʋ. (1 Sam. 30:7-10) Mbʋ pɩlaba yɔ, ɛbɛ pɩpɩzɩɣ nɛ pɩkpɛlɩkɩ-ŋ?

11. Pʋcɔ nɛ ŋkpaɣ lɩmaɣza naayɛ lɛ, ɛbɛ ŋpɩzɩɣ nɛ ŋla?

¹¹ Pʋcɔ nɛ ŋkpaɣ lɩmaɣza naayɛ lɛ, pɔzɩ nɛ patasɩ-ŋ lɔŋ. Pɔzɩ ña-lʋlɩyaa lɔŋ tasʋʋ. Ŋpɩzɩɣ ɖɔɖɔ nɛ ŋyɔɔdɩnɩ ɛgbɛyɛ taa ɛzʋtʋyaa mba pɛwɛnɩ lɛɣtʋ yɔ nɛ patasɩ-ŋ lɔŋ kɩbaŋ. Yehowa taɣ abalaa mba liu nɛ ña ɖɔɖɔ ŋpɩzɩɣ nɛ ŋtaa-wɛ liu. Yehowa kpakɩɣ-wɛ se pɛkɛ kʋjɔŋ ɛgbɛyɛ taa. (Efɛz. 4:8) Ye ŋmaɣzɩɣnɩ pe-tisuu nɛ ŋwelisiɣ lɔŋ weyi patasɩɣ-ŋ yɔ, ŋkaɣ kpaɣʋ lɩmaɣza kɩbana. Lɛɛlɛɛyɔ iyele nɛ ɖɩna lɔŋ weyi ɖɩpɩzɩɣ nɛ ɖɩkpɛlɩkɩ Wiyaʋ Aazaa cɔlɔ yɔ.

KPƐLƖKƖ LƆŊ WIYAƲ AAZAA CƆLƆ

12. Wɛtʋ kɩbandʋ ndʋ Wiyaʋ Aazaa kaawɛna alɩwaatʋ ndʋ ɛpaɣzɩ kewiyitu tɔɔʋ yɔ?

¹² Wiyaʋ Aazaa kaakɛ pɩɣa evelaɣ lɛ, eluzaɣ ɛ-tɩ nɛ ɛɛwɛ abalɩtʋ. Alɩwaatʋ ndʋ Aazaa caa Abiya sɩba nɛ Aazaa pɩsɩ wiyaʋ lɛ, ɛpaɣzɩ sɩʋ kpelisi yɔkʋʋ ɛjaɖɛ taa. Pɩtasɩ lɛ, “ɛɖʋ paɣtʋ Yuuda se ɛñɩnɩ [Yehowa,] ɛ-caanaa tɛ Ɛsɔ, nɛ ɛɖɔ paɣtʋ yɔɔ nɛ kpalɩtʋ kpeekpe yɔɔ.” (4 Aw. 13:23–14:1-6) Nɛ alɩwaatʋ ndʋ Etiyoopii tʋ Zeraa kpaɣ sɔɔjanaa miiliyɔɔ kʋɖʋmʋʋ nɛ ɛlɩɩ Yuuda wayɩ lɛ, Aazaa pɔzɩ Yehowa nɛ lɔŋsɩnɖɛ se ɛsɩnɩ-ɩ. Ɛyɔɔdaa se: “[Yehowa,] ŋtiposi kaaʋ, ŋpɩzɩɣ nɛ ŋsɩna nɛ ɛyaa pazɩ yaa ɛyaa sakɩyɛ; sɩnɩ-ɖʋ [Yehowa] ɖɛ-Ɛsɔ. Ðɩtaɣ liu ño-ɖoŋ.” Tɔm pee kɩbana anɛ awɩlɩɣ se Aazaa kaawɛnɩ tisuu sɔsɔm Yehowa yɔɔ se ɛpɩzɩɣ nɛ ɛya ɛ nɛ ɛ-samaɣ pa-ñʋʋ. Aazaa kaata liu Yehowa weyi ɛwɛ ɛsɔdaa yɔ nɛ “[Yehowa] ma Etiyoopii mba.”—4 Aw. 14:7-11.

13. Ɛbɛ talɩ Aazaa pʋwayɩ, nɛ ɛbɛ yɔɔ?

¹³ Pɩɩkɛnɩ Aazaa kaɖɛ sɔsɔɖɛ siŋŋ alɩwaatʋ ndʋ sɔɔjanaa miiliyɔɔ kʋɖʋmʋʋ kɔma se poyooni-i yɔ. Ɛlɛ Aazaa pɩzaa nɛ ɛwa mbʋ pʋyɔɔ yɔ ɛta liu Yehowa. Ɛlɛ pɩlabɩ pʋtɔdɩyɛ se alɩwaatʋ ndʋ Aazaa kaakatɩ kaɖɛ lɛɛɖɛ nɖɩ ɖɩwɛ ndɩ yɔ lɛ, ɛtɩtaa Yehowa liu. Alɩwaatʋ ndʋ Izrayɛɛlɩ Wiyaʋ kɩdɛkɛdʋʋ Baasa caɣaɣ se ɛla you nɛ Yuuda lɛ, Aazaa pɩsɩnɩ Siirii wiyaʋ yɔɔ se ɛlɛ ɛsɩnɩ-ɩ. Lɩmaɣzɩyɛ nɖɩ ɖɩkɔnɩ-ɩ asɛyʋʋ. Yehowa tɩŋnɩ nayʋ Ananii yɔɔ nɛ eheyi Aazaa se: “Ŋta Siirii wiyaʋ liu nɛ ŋtɩtaa [Yehowa] ñɛ-Ɛsɔ liu yɔ, pʋyɔɔ lɛ Siirii wiyaʋ tɛ sɔɔjanaa lɩ ñe-nesi tɛɛ.” Toovenim taa lɛ, kpaɣnɩ mbʋ nɛ pɩɖɛɛ lɛ, Aazaa wɛ you taa tam. (4 Aw. 16:7, 9; 1 Aw. 15:32) Lɔŋ weyi pɩkpɛlɩkɩɣ-ɖʋ?

14. (a) Ɛzɩma ŋpɩzɩɣ nɛ ŋtaa Yehowa liu? (b) Ɛzɩ 1 Timootee 4:12 yɔɔdʋʋ yɔ, ye ŋlakɩ mbʋ ɛbɛ kaɣ lɩʋ pɩ-taa?

¹⁴ Luzuu ña-tɩ tam nɛ ŋtaɣ Yehowa liu paa ɛzɩmtaa. Alɩwaatʋ ndʋ pamɩyɩsɩ-ŋ lɩm yɔ, ŋwɩlaa se ŋwɛnɩ tisuu sɔsɔm nɛ ŋtaɣ Yehowa liu. Nɛ Yehowa taa labɩ leleŋ nɛ ɛha-ŋ waɖɛ se ŋpɩsɩ ɛ-hɔʋ taa tʋ. Nɛ lɛɛlɛɛyɔ lɛ, pɩwɛɛ se ŋwolo pɩ-yɔɔ nɛ ŋtaɣ Yehowa liu. Pɩpɩzɩɣ nɛ pɩwɛ-ŋ kɛlɛʋ se ŋtaa Yehowa liu alɩwaatʋ ndʋ pɩpɔzʋʋ se ŋkpaɣ lɩmaɣza sɔsɔna ñe-wezuu caɣʋ taa yɔ. Ɛlɛ ɛzɩma ŋkaɣ labʋ alɩwaatʋ lɛɛtʋ taa? Pɩcɛyɩ siŋŋ se ɖɩtaa Yehowa liu alɩwaatʋ ndʋ ɖɩkpakɩɣ lɩmaɣza yɔ, pɩkpɛndɩnɩ alɩwaatʋ ndʋ ɖɩlɩzɩɣ aleɣya wena ɖɩkaɣ labʋ yɔ, tʋmɩyɛ nɖɩ ɖɩkaɣ labʋ yɔ nɛ kaɖʋsɩ nzɩ ɖɩkaɣ ɖʋʋ ɖa-tɩ yɔ. Taataa ña-maɣmaɣ ñɔ-lɔŋsɩnɖɛ liu. Ñɩnɩ Bibl paɣtʋ kila wena asɩɣnɩ-ŋ se ŋkpaɣ lɩmaɣzɩyɛ kɩbanɖɛ yɔ nɛ pʋwayɩ lɛ, ŋɖɔ Bibl paɣtʋ kila ana a-yɔɔ. (Adu. 3:5, 6) Ye ŋlakɩ mbʋ yɔ, Yehowa taa kaɣ labʋ leleŋ nɛ ɛgbɛyɛ taa mba kaɣ-ŋ ñam.—Kalɩ 1 Timootee 4:12.

KPƐLƖKƖ LƆŊ WIYAƲ YOZAFAATƖ CƆLƆ

15. Ɛzɩ pɔyɔɔdʋʋ 4 Awiya 18:1-3; 19:2 taa yɔ, kɩwɛɛkɩm mbʋ Wiyaʋ Yozafaatɩ laba?

¹⁵ Toovenim taa lɛ, ɛzɩ ɖa-tɩŋa payɩ yɔ, ña ɖɔɖɔ ŋtɩtalɩ pilim nɛ nabʋyʋ taa piyiɣdiɣ-ŋ. Ɛlɛ pɩtɩpɔzɩ se pɩɖɩɣ-ŋ nʋmɔʋ nɛ ŋtaala ño-ɖoŋ ɖeɖe Yehowa sɛtʋ taa. Maɣzɩ Wiyaʋ Yozafaatɩ kɩɖaʋ yɔɔ nɛ ŋna. Ɛɛwɛnɩ wɛtʋ kɩbandʋ sakɩyɛ. Ɛɛkɛ pɩɣa evelaɣ lɛ, ɛɛñɩnɩ “ɛ-caa tɛ Ɛsɔ nɛ ɛɖɔ ɛ-paɣtʋ yɔɔ.” Pɩtasɩ lɛ, etiyi awumbiya Yuuda tɛtʋ ndɩ ndɩ taa se pawɩlɩ ɛyaa Yehowa yɔɔ tɔm. (4 Aw. 17:4, 7) Paa Yozafaatɩ kaatɛm ɛ-taa mbʋ yɔ, alɩwaatʋ natʋyʋ ɛkpaɣ lɩmaɣza kɩdɛkɛda naayɛ. Yozafaatɩ kpaɣ lɩmaɣzɩyɛ kɩdɛkɛdɩyɛ nɖɩ lɛ, Yehowa lone taa caɣyʋ nɔɔyʋ tasɩ-ɩ lɔŋ. (Kalɩ 4 Awiya 18:1-3; 19:2.) Lɔŋ weyi kɛdaɣ ŋga kapɩzɩɣ nɛ kɩkpɛlɩkɩ-ŋ?

16. Lɔŋ weyi Rajeev kɩɖaʋ kpɛlɩkɩɣ-ŋ?

¹⁶ Tisi nɛ ŋmʋ lɔŋ tasʋʋ nɛ ŋɖɔ pɩ-yɔɔ. Pɩtɩla ɛzɩ piya evelisi sakɩyɛ yɔ, pɩwɛ-ŋ kaɖɛ se ŋsɩɩ Yehowa sɛtʋ kajalaɣ lone taa ñe-wezuu caɣʋ taa. Pitaatibi-ŋ yɔɔɔ. Payaɣ koobu pɩɣa evelaɣ nakɛyɛ se Rajeev. Maɣzɩ ɛ-kɩɖaʋ yɔɔ nɛ ŋna. Ɛyɔɔdaɣ alɩwaatʋ ndʋ ɛɛkɛ pɩɣa evelaɣ yɔ tɩ-tɔm lɛ, ɛtɔm se: “Alɩwaatʋ natʋyʋ mantaatɩlɩ mbʋ mɔnsɔɔlaa se malabɩnɩ me-wezuu yɔ. Ɛzɩ piya evelisi sakɩyɛ yɔ, maasɔɔlɩ hola aleɣya nɛ aleɣya lɛɛna labʋ nɛ pɩkɩlɩ kediɣzisi wobu yaa tɔm susuu.” Ɛbɛ sɩnɩ Rajeev? Ɛgbɛyɛ taa ɛzʋtʋyʋ nɔɔyʋ wɩlaa se ɛmaɣzɩɣ ɛ-yɔɔ nɛ ɛtasɩ-ɩ lɔŋ nɩɩyɩ. Rajeev yɔɔdaa se: “Ɛtɩŋnɩ paɣtʋ kiɖe nɖɩ ɖɩwɛ 1 Timootee 4:8 taa yɔ ɖɩ-yɔɔ nɛ ɛsɩnɩ-m nɛ mɔncɔlɩ ma-lɩmaɣza.” Rajeev luzi ɛ-tɩ nɛ ɛɖɔ lɔŋ tasʋʋ mbʋ pɩ-yɔɔ nɛ ɛmaɣzɩ mbʋ pɩ-tɔm kɩlɩ cɛyʋʋ e-wezuu caɣʋ taa yɔ pɩ-yɔɔ. Ɛyɔɔdaa se: “Mankpaɣ lɩmaɣzɩyɛ se mansɩɣ fezuu taa kaɖʋsɩ kajalaɣ lone taa.” Ɛbɛ lɩ pɩ-taa? Rajeev yɔɔdaa se: “Patasɩ-m lɔŋ ɛnɩ nɛ pɩla pɩnzɩ pazɩ lɛ, paha-m waɖɛ se manpɩsɩ ɛgbɛyɛ taa tʋmlaɖʋ.”

YELE NƐ ÑA-CAA WEYI ƐWƐ ƐSƆDAA YƆ Ɛ-TAA LABƖ-Ŋ NƐ LELEŊ.

17. Lɩmaɣza wena ɛyaa sɔsaa wɛnɩ piya evelisi nzɩ sɩsɛɣ Yehowa yɔ sɩ-yɔɔ?

¹⁷ Piya evelisi, ɛyaa sɔsaa taa wɛnɩ-mɩ nɛ leleŋ siŋŋ mbʋ pʋyɔɔ yɔ mɩ nɛ wɛ ‘ɩkpɛndaa’ nɛ ɩsɛɣ Yehowa. (Sof 3:9) Pɔsɔɔlɩ ɛzɩma ɩlakɩ tʋmɩyɛ nɖɩ paɖʋʋ-mɩ yɔ nɛ kpekpeka yɔ. Mɩ-tɔm kɛdɩnɩ-wɛ siŋŋ.—1 Yoh. 2:14.

18. Ɛzɩ Aduwa 27:11 wɩlʋʋ yɔ, lɩmaɣza wena Yehowa wɛnɩ piya evelisi nzɩ sɩsɛɣ-ɩ yɔ sɩ-yɔɔ?

¹⁸ Piya evelisi, ɩtaasɔɔ kaaʋ se Yehowa sɔɔlɩ-mɩ nɛ ɛtaɣ-mɩ liu. Ɛlabɩ tamaɣ se kɛdɛzaɣ kɩyakɩŋ taa piya evelisi canɖaʋ nakʋyʋ kaɣ-ɩ haʋ sɩ-tɩ faaa. (Keɣa 110:1-3; nwt) Ɛnawa se ɩsɔɔlɩ-ɩ nɛ ɩsɔɔlaa se ɩla mbʋ payɩ ɩpɩzɩɣ yɔ nɛ ɩsɛɛ-ɩ. Ye mbʋ wɛɛnɩ suuɖu lalaa nɛ ña-maɣmaɣ ña-tɩ yɔɔ. Alɩwaatʋ ndʋ piyiɣdiɣ-ŋ yɔ, tisi nɛ ŋmʋ falɩsʋʋ nɛ lɔŋ sɩɣzʋʋ, kpaɣ-pʋ ɛzɩ mbʋ pɩlɩnɩ Yehowa cɔlɔ yɔ. (Ebr. 12:6) Ñaɣ pana nɛ ŋla tʋma wena paɖʋʋ-ŋ yɔ camɩyɛ. Nɛ kɔzɩ kɔzɩ lɛ, mbʋ payɩ ŋlakɩ yɔ pɩ-taa, yele nɛ ña-Caa weyi ɛwɛ ɛsɔdaa yɔ ɛ-taa labɩ-ŋ nɛ leleŋ.—Kalɩ Aduwa 27:11.