Wolo pɩ-yɔɔ nɛ ŋwɩlɩɣ ɛsɩmɩyɛ kɩhɛyʋʋ pʋ-ñʋʋ taa yɔɔ

1-2. (a) Ɛbɛ kɩhɛyʋʋ pʋ-ñʋʋ taa kɛnaa? (b) Nɛ ɛbɛ yɔɔ pɩpɔzɩ-ɖʋ kʋ?

AÐAM kaatalɩ pilim ɛlɛ alɩwaatʋ ndʋ ɛlabɩ kɩwɛɛkɩm yɔ, elesi waɖɛ nɖɩ ɛɛwɛna se ɛcaɣ wezuu tam yɔ. Piyeba ɖɔɖɔ nɛ piya nzɩ ɛkaɣ lʋlʋʋ yɔ, silesi waɖɛ nɖɩ. Aɖam taawɛɛnɩ kawanaɣ nakɛyɛ se ɛla kɩwɛɛkɩm mbʋ. Ɛna faɖaɖa nɛ ɛla kɩwɛɛkɩm. Ɛlɛ Aɖam piya tɩla kɩwɛɛkɩm nabʋyʋ, nɛ sɩtɩñɩɣ ɛ-yɔɔ ɖɔɖɔ se ɛla kɩwɛɛkɩm. (Roma 5:12, 14) Mbʋ Aɖam laba yɔ, piyeba nɛ ɛmʋnɩ sɩm, ɛlɛ ɛzɩ Yehowa pɩzɩɣ ɛla nabʋyʋ nɛ pɩsa nɛ Aɖam piya caɣ wezuu tam? Ɛɛɛ! Aɖam labɩ kɩdɛkɛdɩm nɛ pitileɖi lɛ, Yehowa paɣzɩ wɩlʋʋ ɛzɩma ɛkaɣ holuu Aɖam piya miiliyɔɔwaa sakɩyɛ kɩdɛkɛdɩm nɛ sɩm nesi tɛɛ yɔ. (Kiɖe 3:15) Alɩwaatʋ ndʋ Yehowa ɖʋwa yɔ tɩtalɩɣ lɛ, ɛkaɣ ɛ-Pɩyalʋ tiyuu nɛ ɛsɔdaa “nɛ ɛcɛlɩ e-wezuu se pɩkɛ kɩhɛyʋʋ pʋ-ñʋʋ taa ɛyaa sakɩyɛ yɔɔ.”—Mark. 10:45; Yoh. 6:51.

² Ɛbɛ kɩhɛyʋʋ pʋ-ñʋʋ taa kɛnaa? Krɩstʋ Mba Grɛɛkɩ Masɩ wɩlɩɣ se kɩhɛyʋʋ pʋ-ñʋʋ kɛnɩnɩ mbʋ Yesu hɛyaa se ɛya mbʋ Aɖam lesaa yɔ. (1 Kɔr. 15:22) Ɛbɛ yɔɔ pɩpɔzɩ-ɖʋ kɩhɛyʋʋ pʋ-ñʋʋ taa? Mbʋ pʋyɔɔ yɔ, paɣtʋ ndʋ Yehowa ɖʋ siɣsiɣ wɛtʋ nʋmɔʋ taa nɛ pama-tʋ Moyizi Paɣtʋ taa yɔ, tɩwɩlɩɣ se pɩpɔzʋʋ se pɛhɛyɩ wezuu wezuu lone taa. (Ejl. 21:23, 24) Aɖam lesi wezuu pilim ŋgʋ ɛɛwɛna yɔ. Pɩsa nɛ paña paɣtʋ ndʋ Ɛsɔ kaaɖʋ siɣsiɣ wɛʋ nʋmɔʋ taa yɔ lɛ, Yesu la e-wezuu pilim. (Roma 5:17) Piyeba nɛ ɛpɩsɩ “tam tam wɛʋ Caa” mba payɩ pɛwɛɣnɩ tisuu kɩhɛyʋʋ pʋ-ñʋʋ taa yɔɔ yɔ.—Iza. 9:6; Roma 3:23, 24.

3. Ɛzɩ Yohanɛɛsɩ 14:31 nɛ 15:13 yɔɔdʋʋ yɔ, ɛbɛ yɔɔ Yesu kaasɔɔlɩ faaa se ɛlaa e-wezuu ŋgʋ kɩtalɩ pilim yɔ?

³ Yesu kaasɔɔlɩ faaa se ɛlaa e-wezuu mbʋ pʋyɔɔ yɔ, ɛɛwɛnɩ sɔɔlɩm sɔsɔm ɛ-Caa weyi ɛwɛ ɛsɔdaa yɔ ɛ-yɔɔ nɛ ɛɛwɛnɩ sɔɔlɩm ɖɔ-yɔɔ ɖɔɖɔ. (Kalɩ Yohanɛɛsɩ 14:31; 15:13.) Sɔɔlɩm mbʋ, piseɣti-i nɛ ɛtɛ ɛ-taa se ɛɖɔkʋʋ ɛ-cɩŋgɩlɩm wɛtʋ nɛ pɩkɔɔ pɩtalɩ tɩnaɣ yɔɔ nɛ ɛla ɛ-Caa sɔɔlɩm. Yesu labɩ mbʋ pɩtɩŋnɩ ɛzɩma ɛɖɔkɩ e-siɣsiɣ wɛtʋ pɩkɔɔ pɩtalɩ ɛ-sɩm wiye yɔ pɩ-yɔɔ. Mbʋ ɛlaba yɔ, piyeki se tamaɣ ŋga Yehowa kaawɛnɩ ɛyaa nɛ tɛtʋ yɔɔ ɖooo kiɖe tɛɛ yɔ kala. Tɔm ñʋʋ kʋnɛ kɩ-taa, ɖɩkaɣ naʋ mbʋ pʋyɔɔ Ɛsɔ ha nʋmɔʋ se Yesu ɛtɔɔ kʋñɔŋ siŋŋ pʋcɔ nɛ ɛsɩ yɔ. Ðɩkaɣ tazʋʋ ɖɔɖɔ Bibl mayʋ nɔɔyʋ kɩɖaʋ taa pazɩ; ɛɛwɩlaa se ɛwɛnɩ ɛsɩmɩyɛ siŋŋ kɩhɛyʋʋ pʋ-ñʋʋ taa yɔɔ. Nɛ kɛdɛzaɣ ɖeɖe lɛ, ɖɩkaɣ naʋ ɛzɩma ɖɩpɩzɩɣ nɛ ɖɩwɩlɩ se ɖɩwɛnɩ ɛsɩmɩyɛ kɩhɛyʋʋ pʋ-ñʋʋ taa yɔɔ yɔ, nɛ ɛzɩma ɖɩpɩzɩɣ nɛ ɖɩwɩlɩ se ɖɩwɛnɩ ɛsɩmɩyɛ kɩlaʋ ŋgʋ Yehowa nɛ Yesu pala ɖɔ-yɔɔ yɔ, kɩ-yɔɔ nɛ pɩkpaɖɩ yɔ.

ƐBƐ YƆƆ PƖƖWƐƐ SE YESU ƐTƆƆ KƲÑƆŊ?

4. Yɔɔdɩ ɛzɩma pɩɖɔma nɛ Yesu sɩ yɔ pɩ-tɔm.

⁴ Maɣzɩ mbʋ pɩlabɩ kɛdɛzaɣ kɩyakʋ wiye pʋcɔ nɛ pakʋʋ Yesu yɔ pɩ-yɔɔ nɛ ŋna. Ɛpɩzaɣ se ɛpɔzɩ tiyiyaa sakɩyɛ se pasɩnɩ-ɩ nɛ palʋ ɛ-yɔɔ, ɛlɛ ɛtɩla mbʋ. Eyeba nɛ Roma sɔɔjanaa kpa-ɩ nɛ pamabɩ-ɩ. (Mat. 26:52-54; Yoh. 18:3; 19:1) Pamabɩ-ɩ nɛ ɛgbazɩyɛ nɖɩ ɖiyeba nɛ ɛmʋ heŋ siŋŋ yɔ. Pʋwayɩ lɛ, peyele nɛ ɛhɔɔlɩ ɖaʋ yuŋ ñɩŋgʋ nakʋyʋ e-siɣye wayɩ ɖenɖe ɛɛmʋ heŋ yɔ. Yesu ñaɣ pana se ɛhɔɔlɩ ɖaʋ ŋgʋ nɛ ewoni ɖenɖe pakaɣ-ɩ kʋʋ yɔ, ɛlɛ ɛhɔɔlɩ-kʋ pazɩ lɛ, Roma sɔɔjanaa pɔzɩ abalʋ lɛlʋ se ɛlɛ ɛmʋ-ɩ. (Mat. 27:32) Yesu talɩ lone nɖɩ ɖɩ-taa pakaɣ-ɩ kʋʋ yɔ lɛ, sɔɔjanaa ka e-nesi nɛ ɛ-naataŋ nɛ sizika ŋga. Yesu tomnaɣ yuŋ yeba nɛ ɖenɖe pakam ñɩma yɔ, peeɖe heŋ tɛzɩɣ walʋʋ kɩwalʋ. Yesu taabalaa wɛ laŋwɛɛkɩyɛ taa nɛ e-ɖoo wɛɛ nɛ ewiliɣ, ɛlɛ Yuuda mba ñʋndɩnaa ñɛwɛɛ nɛ powoŋuu-i. (Luka 23:32-38; Yoh. 19:25) Yesu tɔɔ kʋñɔŋ ñɩɣtʋ sakɩyɛ. Ɛzɩma pakam e-tomnaɣ sizika yɔɔ yɔ, piyeba nɛ ɛ-laŋɩyɛ nɛ ɛ-hʋzɩŋ taalakɩ tʋmɩyɛ camɩyɛ nɛ pɩɩwɛ-ɩ kaɖɛ se efezi. Yesu kaanawa se ɛɖɔkɩ e-siɣsiɣ wɛtʋ; nɛ pʋcɔ nɛ etisiɣ kɛdɛzaɣ fezuu lɛ, ɛtɩmnɩ Yehowa kɛdɛzaɣ ɖeɖe. Pʋwayɩ lɛ ɛsɔ ɛ-ñʋʋ nɛ ɛsɩ. (Mark. 15:37; Luka 23:46; Yoh. 10:17, 18; 19:30) Toovenim taa lɛ, Yesu sɩm mbʋ pɩɩkpaɣ alɩwaatʋ, ɛnɩ siziŋ nɛ pɩɩkɛ fɛyɛ sɩm ɖɔɖɔ!

5. Yesu ɛsɩndaa lɛ, ɛbɛ kaayeba nɛ ɛnɩɩ siziŋ nɛ pɩkpaɖɩ ɛzɩma pakʋ-ɩ yɔ?

⁵ Yesu ɛsɩndaa lɛ, ɛzɩma pakʋ-ɩ yɔ, pɩtɩkɛ mbʋ kɩlɩnɩ yebu nɛ ɛnɩɩ siziŋ. Mbʋ pɔtɔm se ɛlaba pʋcɔ nɛ pakʋ-ɩ yɔ, mbʋ yebina nɛ ɛkɩlɩ siziŋ nɩʋ. Pɛcɛtɩnɩ ɛ-taa se ɛyɔɔdɩ tɔm kɩdɛkɛdɩtʋ Ɛsɔ yɔɔ, pʋ-tɔbʋʋ se ɛfɛyɩnɩ ñamtʋ Ɛsɔ yaa Ɛsɔ hɩɖɛ yɔɔ paa ññɩɩ. (Mat. 26:64-66) Ɛzɩma pɛcɛtɩnɩ ɛ-taa mbʋ yɔ, pɩɩha-ɩ lɩmaɣza siŋŋ nɛ ɛtaɣaɣ liu se ɛ-Caa ɛɛkaɣ yebu nɛ paɖʋ-ɩ fɛyɛ mbʋ. (Mat. 26:38, 39, 42) Ɛbɛ yɔɔ Yehowa ha nʋmɔʋ nɛ ɛ-Pɩyalʋ kʋsɔɔlʋ tɔɔ kʋñɔŋ nɛ ɛsɩ? Iyele nɛ ɖɩna lɩmaɣza naadozo wena a-yɔɔ Yehowa labɩ mbʋ yɔ.

6. Ɛbɛ yɔɔ pɩɩwɛɛ se paka Yesu nazɩm sizika yɔɔ?

⁶ Kajalaɣ lɛ, pɩɩwɛɛ se paka Yesu sizika yɔɔ, nɛ eholi Yuuda mba nɔɔ kɩdɛkɛdaɣ ŋga paalɔ pɔ-yɔɔ yɔ ke-nesi tɛɛ. (Gal. 3:10, 13) Pɔlɔ pɔ-yɔɔ nɔɔ kɩdɛkɛdaɣ mbʋ pʋyɔɔ yɔ, palabɩ tamaɣ se pañaŋ Ɛsɔ Paɣtʋ ɛlɛ patɩñam-tʋ. Pʋyɔɔ lɛ, pɩtasɩna se pamʋnɩ sɩm mbʋ pʋyɔɔ yɔ pɛkɛ Aɖam piya lɛ, pɔlɔ pɔ-yɔɔ ɖɔɖɔ nɔɔ kɩdɛkɛdaɣ ŋga. (Roma 5:12) Paɣtʋ ndʋ Ɛsɔ ɖʋ Izrayɛɛlɩ piya yɔ, tɩtɔŋaɣ se ye nɔɔyʋ ɛlabɩ kɩdɛkɛdɩm mbʋ pɩmʋnɩ sɩm yɔ, pɩwɛɛ se pakʋ-ɩ. Pʋwayɩ lɛ, papɩzɩɣ nɛ popuzi e-tomnaɣ ŋga kasɩba yɔ sizika nakɛyɛ yɔɔ.b (Wp. 21:22, 23; 27:26) Ɛzɩma pakam Yesu sizika yɔɔ yɔ, piholi Yuuda ñɩma nɔɔ kɩdɛkɛdaɣ ŋga paalɔ pɔ-yɔɔ yɔ ke-nesi tɛɛ nɛ ɛ-kɩlaʋ pɩzɩɣ nɛ kɩwazɩ-wɛ paa paalɔ-ɩ yɔ.

7. Lɩmaɣzɩyɛ naalɛ ñɩnɖɛ nɖɩ yɔɔ Ɛsɔ ha nʋmɔʋ se ɛ-Pɩyalʋ ɛtɔɔ kʋñɔŋ?

⁷ Iyele nɛ ɖɩna lɩmaɣzɩyɛ naalɛ ñɩnɖɛ nɖɩ ɖɩ-yɔɔ Ɛsɔ ha nʋmɔʋ se ɛ-Pɩyalʋ ɛtɔɔ kʋñɔŋ yɔ. Ɛɛwɛɛ nɛ ɛfalɩsɩɣ Yesu se ɛpɩzɩ nɛ ɛla Cɔjɔ Kɩlɩm tʋmɩyɛ nɛ ɛsɩndaa. Yesu na ɛzɩma pɩwɛ kaɖɛ siŋŋ se ɛyʋ ɛña Ɛsɔ alɩwaatʋ ndʋ ɛwɛɣ takɩm sɔsɔm nabʋyʋ taa yɔ. Ɛɛwɛ kaɖɛ sɔsɔɖɛ taa siŋŋ nɛ ɛtɩmnɩ “kubusi sɔsɔsɩ nɛ ɛsɩtɛɣlɩm” nɛ ɛpɔzɩ se pasɩnɩ-ɩ. Yesu nɩ siziŋ siŋŋ nɛ pʋyɔɔ lɛ, ɛnɩɣ ɖa-kɩcɛyɩm taa nɛ ‘ɛpɩzɩɣ nɛ ɛsɩnɩ-ɖʋ alɩwaatʋ ndʋ piɖiɣni-ɖʋ takʋʋ yɔ.’ Ðɩwɛnɩ ɛsɩmɩyɛ siŋŋ se Yehowa ha-ɖʋ Cɔjɔ Kɩlɩm weyi ɛwɛnɩ pʋtɔdɩyɛ naʋ nɛ weyi ɛpɩzɩɣ nɛ ɛnɩɩ ɖɛ-ɛjandʋ taa yɔ.—Ebr. 2:17, 18; 4:14-16; 5:7-10.

8. Lɩmaɣzɩyɛ naadozo ñɩnɖɛ nɖɩ yɔɔ Ɛsɔ ha nʋmɔʋ se pɩtakɩ Yesu siŋŋ?

⁸ Nabudozo lɛ, Yehowa ha nʋmɔʋ se Yesu ɛtɔɔ kʋñɔŋ siŋŋ nɛ pɩsa nɛ ecosi tɔm kɩcɛyɩtʋ tʋnɛ tɩ-yɔɔ: Ɛzɩ ɛyaa pɩzɩɣ nɛ pawɩlɩ se pɔñɔnɩ Ɛsɔ halɩ pɩkpɛndɩnɩ alɩwaatʋ ndʋ pɩtakɩɣ-wɛ siŋŋ yɔ tɩ-taa? Sataŋ cosi tɔm ndʋ tɩ-yɔɔ se aayɩ! Ɛyɔɔdaa se ɛyaa sɔɔlaa se Ɛsɔ ɛha-wɛ nabʋyʋ nɛ pi-ɖeke pʋyɔɔ pɛsɛɣ-ɩ. Nɛ ɛmaɣzɩɣ se ɛzɩ Aɖam yɔ, mba ɖɔɖɔ patɩsɔɔlɩ Yehowa. (Yɔɔb 1:9-11; 2:4, 5) Yehowa taa kaatɛma se ɛ-Pɩyalʋ Yesu kaɣ ɖɔkʋʋ e-siɣsiɣ wɛtʋ, pʋyɔɔ ɛha nʋmɔʋ se pɩtakɩ-ɩ nɛ pɩtalɩ tɩnaɣ yɔɔ ɖenɖe ɛyʋ pɩzɩɣ nɛ ɛɖɔkɩ ɛ-tɩ yɔ. Yesu ɖɔkɩ ɛ-cɩŋgɩlɩm wɛtʋ nɛ ɛwɩlɩ se Sataŋ kɛ cɛtɩyʋ.

BIBL MAYƲ WEYI ƐƐWƐNƖ ƐSƖMƖYƐ SIŊŊ KƖHƐYƲƲ PƲ-ÑƲƲ TAA YƆƆ YƆ

9. Kɩɖaʋ ŋgʋ apostoloo Yohanɛɛsɩ ha-ɖʋ?

⁹ Kɩhɛyʋʋ pʋ-ñʋʋ taa wɩlɩtʋ kpazɩ Krɩstʋ ñɩma sakɩyɛ tisuu ɖoŋ. Powobi pɩ-yɔɔ nɛ posusuu tɔm paa pakaɖaɣnɩ-wɛ siŋŋ yɔ; nɛ pɔɖɔkɩ pa-tɩ takɩm tɩŋa taa pe-wezuu caɣʋ kpeekpe taa. Iyele nɛ ɖɩna apostoloo Yohanɛɛsɩ kɩɖaʋ. Ɛɖɔkɩ e-siɣsiɣ wɛtʋ nɛ esusi toovenim tɔm Krɩstʋ nɛ kɩhɛyʋʋ pʋ-ñʋʋ taa yɔɔ nɛ pɩcɛzɩ pɩnzɩ 60 mbʋ yɔ. Ɛ-pɩnzɩ kaañɔtɩnɩ 100, ɛlɛ Roma komina maɣzaɣ se ɛ-tɔm kaawɛ kaɖɛ siŋŋ nɛ pʋyɔɔ lɛ, pakpaɣ-ɩ nɛ powoni yomiye taa lɩm hɛkʋ taa tɛtʋ ndʋ payaɣ se Patɩmoosɩ yɔ tɩ-taa. Kɩdɛkɛdɩm mbʋ ɛlaba? ‘Ɛyɔɔdaɣ Ɛsɔ tɔm nɛ ɛlɩzɩɣ aseɣɖe Yesu yɔɔ.’ (Natʋ 1:9) Yohanɛɛsɩ ha tisuu nɛ laŋɩyɛ ɖɔkʋʋ kɩɖaʋ kɩbaŋʋ siŋŋ!

10. Takayɩsɩ nzɩ Yohanɛɛsɩ mawa yɔ, ɛzɩma sɩwɩlɩɣ se ɛɛwɛnɩ ɛsɩmɩyɛ kɩhɛyʋʋ pʋ-ñʋʋ taa yɔɔ?

¹⁰ Bibl takayɩsɩ nzɩ Yohanɛɛsɩ mawa yɔ sɩ-taa, ɛyɔɔdɩ ɛzɩma ɛɛsɔɔlɩ Yesu siŋŋ yɔ pɩ-tɔm nɛ ɛzɩma ɛɛwɛnɩ ɛsɩmɩyɛ ɛ-kɩlaʋ yɔɔ yɔ pɩ-tɔm. Ɛyɔɔdɩ kɩhɛyʋʋ pʋ-ñʋʋ taa tɔm yaa wazasɩ kɩbanzɩ nzɩ kɩhɛyʋʋ pʋ-ñʋʋ taa kɔŋna yɔ sɩ-tɔm nɛ pɩcɛzɩ tam 100 yɔɔ. Kɩɖaʋ nakʋyʋ yɔ. Yohanɛɛsɩ mawa se: “Ye nɔɔyʋ ɛlabɩ kɩwɛɛkɩm nabʋyʋ yɔ, ɖɩwɛnɩ sɩnɩyʋ nɔɔyʋ Caa cɔlɔ, Yesu Krɩstʋ, weyi ɛkɛ siɣsiɣ tʋ yɔ.” (1 Yoh. 2:1, 2) Takayɩsɩ nzɩ Yohanɛɛsɩ mawa yɔ sɩ-taa ɖɔɖɔ ɛñɩɣ niye se pɩcɛyaa se “palɩzɩ aseɣɖe Yesu yɔɔ.” (Natʋ 19:10) Pɩwɩlɩɣ kpayɩ kpayɩ se Yohanɛɛsɩ kaawɛnɩ ɛsɩmɩyɛ siŋŋ kɩhɛyʋʋ pʋ-ñʋʋ taa yɔɔ. Ɛzɩma ɖa ɖɔɖɔ ɖɩpɩzɩɣ nɛ ɖɩwɩlɩ se ɖɩwɛnɩ ɛsɩmɩyɛ siŋŋ kɩhɛyʋʋ pʋ-ñʋʋ taa yɔɔ?

ƐZƖMA ŊPƖZƖƔ NƐ ŊWƖLƖ SE ŊWƐNƖ ƐSƖMƖYƐ KƖHƐYƲƲ PƲ-ÑƲƲ TAA YƆƆ?

11. Ɛbɛ pɩzɩɣ pɩsɩnɩ-ɖʋ nɛ ɖɩɖɔkɩ ɖa-tɩ takɩm taa?

¹¹ Ðɔkɩ ña-tɩ alɩwaatʋ ndʋ pɩtakɩɣ-ŋ se ŋla kɩdɛkɛdɩm yɔ. Ye ɖɩwɛnɩ ɛsɩmɩyɛ siŋŋ kɩhɛyʋʋ pʋ-ñʋʋ taa yɔɔ yɔ, ɖɩɩkaɣ maɣzʋʋ se: ‘Alɩwaatʋ ndʋ pɩtakɩɣ-m yɔ, pɩtɩcɛyɩ se mañaɣ pana siŋŋ nɛ mɔnɖɔkɩ man-tɩ nɛ mantaala kɩwɛɛkɩm. Manpɩzɩɣ nɛ mala kɩwɛɛkɩm nɛ pʋwayɩ lɛ, mɔnpɔzɩ se pakpaɣ nɛ pekpeɣ-m.’ Ɛlɛ, alɩwaatʋ ndʋ pɩtakɩɣ-ɖʋ se ɖɩla mbʋ pɩtɩtʋʋzɩ yɔ, ɖɩkaɣ tɔm se: ‘Aayɩ! Mbʋ payɩ Yehowa nɛ Yesu palabɩ-m yɔ pɩ-yɔɔ lɛ, maakaɣ labʋ kɩwɛɛkɩm pʋnɛ kpa.’ Pʋyɔɔ lɛ, ɖɩpɩzɩɣ nɛ ɖɩpɔzɩ Yehowa se ɛha-ɖʋ ɖoŋ nɛ ɖitendi-i se: ‘Taayele nɛ mɔntɔlɩ takɩm taa.’—Mat. 6:13.

12. Ɛzɩma ɖɩpɩzɩɣ nɛ ɖɩɖɔ lɔŋ tasʋʋ mbʋ pɩwɛ 1 Yohanɛɛsɩ 3:16-18 taa yɔ pɩ-yɔɔ?

¹² Sɔɔlɩ ño-koobiya. Alɩwaatʋ ndʋ ɖɩwɩlɩɣ ɖo-koobiya sɔɔlɩm yɔ, ɖɩwɩlɩɣ ɖɔɖɔ se ɖɩwɛnɩ ɛsɩmɩyɛ kɩhɛyʋʋ pʋ-ñʋʋ taa yɔɔ. Ɛbɛ yɔɔ? Mbʋ pʋyɔɔ yɔ, pɩtɩkɛ ɖe-ɖeke ɖɔ-yɔɔ Yesu cɛlɩ e-wezuu, ɛlɛ ɛcɛlɩ-kʋ ɖɔɖɔ ɖo-koobiya yɔɔ. Yesu kaasɔɔlɩ faaa se ɛsɩ pɔ-yɔɔ, nɛ pɩwɩlɩɣ kpayɩ kpayɩ se ɛsɔɔlɩ-wɛ siŋŋ. (Kalɩ 1 Yohanɛɛsɩ 3:16-18.) Ðɩtɩŋɩɣnɩ wɛtʋ ndʋ ɖɩwɩlɩɣ ɖo-koobiya yɔ tɩ-yɔɔ nɛ ɖɩwɩlɩɣ se ɖɩsɔɔlɩ-wɛ. (Efɛz. 4:29, 31–5:2) Ðɩsɩɣnɩ-wɛ alɩwaatʋ ndʋ pɛwɛɣ kʋdɔŋ taa yaa alɩwaatʋ ndʋ pakatɩɣ kala sɔsɔna naayɛ yɔ, pɩkpɛndɩnɩ alɩwaatʋ ndʋ asɛyʋʋ nakʋyʋ talɩɣ-wɛ yɔ. Ɛlɛ alɩwaatʋ ndʋ ɖo-koobu nɔɔyʋ lakɩ nabʋyʋ yaa ɛyɔɔdʋʋ natʋyʋ nɛ pɩɖʋ-ɖʋ ɖɩwɩzɩyɛ yɔ, ɛbɛ pɩpɔzʋʋ se ɖɩla?

13. Ɛbɛ yɔɔ pɩpɔzʋʋ se ɖikpeɣ?

¹³ Pɩwɛ-ŋ kaɖɛ nabʋyʋ taa se ŋkpeɣ koobu nɔɔyʋ? (Lev. 19:18) Ye ɛɛɛ yɔ, ɖɔ lɔŋ tasʋʋ pʋnɛ pɩ-yɔɔ: “Iwolo pɩ-yɔɔ nɛ mɩ-tɔm ɛtaanɩɩ ɖama nɛ ikpeɣ ɖama faaa paa nɔɔyʋ taa ɛwɛnɩ lɛlʋ yɔ. Ɛzɩ Yehowa kpeɣu-mɩ faaa yɔ, pɩwɛɛ se mɩ ɖɔɖɔ ɩla mbʋ.” (Kol. 3:13) Alɩwaatʋ ndʋ payɩ ɖikpeɣu ɖo-koobu yɔ, ɖɩwɩlɩɣ ɖa-Caa weyi ɛwɛ ɛsɔdaa yɔ se ɖɩwɛnɩ ɛsɩmɩyɛ siŋŋ kɩhɛyʋʋ pʋ-ñʋʋ taa yɔɔ. Ɛzɩma ɖɩpɩzɩɣ ɖiwolo pɩ-yɔɔ nɛ ɖɩwɛɣnɩ ɛsɩmɩyɛ Ɛsɔ kʋjɔʋ ŋgʋ kɩ-yɔɔ nɛ pɩkpaɖɩɣ?

ƐZƖMA ŊPƖZƖƔ NƐ ŊWƐƐNƖ ƐSƖMƖYƐ KƖHƐYƲƲ PƲ-ÑƲƲ TAA YƆƆ NƐ PƖKPAÐƖ?

14. Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩwɛɛnɩ ɛsɩmɩyɛ kɩhɛyʋʋ pʋ-ñʋʋ taa yɔɔ nɛ pɩkpaɖɩ yɔ ɩ-taa nakʋyʋ lɛ ŋgʋ?

¹⁴ Sɛɛ Yehowa se ɛlabaɣ lɛ kɩhɛyʋʋ pʋ-ñʋʋ taa yɔɔ. Payaɣ koobu halɩñɩnʋ nɔɔyʋ se Joanna, nɛ ɛwɛnɩ pɩnzɩ 83; ɛwɛ Ɛndɩ ɛjaɖɛ taa nɛ ɛyɔɔdaa se: “Mamaɣzɩɣ se paa ɖooye lɛ, pɩwɛɛ se mɔyɔɔdʋʋ kɩhɛyʋʋ pʋ-ñʋʋ taa tɔm ma-adɩma taa nɛ mɛnsɛɛ Yehowa kɩ-yɔɔ se ɛlabaɣ lɛ.” Paa ɖooye alɩwaatʋ ndʋ ŋtɩmɩɣ ñe-ɖeke yɔ, heyi Yehowa mbʋ ŋlaba nɛ pɩtɩtʋʋzɩ yɔ nɛ ŋpɔzɩ-ɩ se ɛkpaɣ nɛ ekpeɣ-ŋ. Toovenim taa lɛ, ye ŋlabɩ kɩwɛɛkɩm sɔsɔm nabʋyʋ yɔ, pɩkaɣ pɔzʋʋ ɖɔɖɔ se ŋpɔzɩ ɛgbɛyɛ taa ɛzʋtʋyaa nɛ pasɩnɩ-ŋ. Pakaɣ-ŋ welisinuu nɛ patɩŋnɩ Ɛsɔtɔm yɔɔ nɛ patasɩ-ŋ lɔŋ nɛ sɔɔlɩm. Pakaɣ kpɛndʋʋ ñɔ-yɔɔ nɛ patɩmɩ nɛ pɔpɔzɩ Yehowa se ɛkpaɣ nɛ ekpeɣ-ŋ nɛ pɩsa nɛ taabalɩyɛ kɩbanɖɛ ɖaɣnɩ wɛʋ ña nɛ ɩ mɩ-hɛkʋ taa.—Yak. 5:14-16.

15. Ɛbɛ yɔɔ pɩwɛɛ se ɖɩkpaɣ alɩwaatʋ nɛ ɖɩkalɩ kɩhɛyʋʋ pʋ-ñʋʋ taa yɔɔ tɔm nɛ ɖɩmaɣzɩ tɩ-yɔɔ?

¹⁵ Maɣzɩ kɩhɛyʋʋ pʋ-ñʋʋ taa yɔɔ. Payaɣ koobu halɩñɩnʋ nɔɔyʋ se Rajamani nɛ ɛwɛnɩ pɩnzɩ 73; ɛyɔɔdaa se: “Alɩwaatʋ ndʋ payɩ mankalɩɣ ɛzɩma Yesu tɔɔ kʋñɔŋ yɔ pɩ-tɔm yɔ, ɛsɩtɛɣlɩm tiki mɛ-ɛsɩndaa.” Ña ɖɔɖɔ, alɩwaatʋ ndʋ ŋmaɣzɩɣ ɛzɩma Ɛsɔ Pɩyalʋ tɔɔ kʋñɔŋ siŋŋ yɔ pɩ-yɔɔ yɔ, pɩpɩzɩɣ nɛ pɩlabɩ-ŋ pʋtɔdɩyɛ. Ɛlɛ alɩwaatʋ ndʋ ŋmaɣzɩɣ kɩlaʋ ŋgʋ Yesu lawa yɔ kɩ-yɔɔ nɛ pɩkpaɖɩɣ yɔ, sɔɔlɩm mbʋ ŋwɛnɩ ɛ nɛ ɛ-Caa pɔ-yɔɔ yɔ, pɩpaɣlɩɣ ɖɔɖɔ nɛ pɩkpaɖɩ. Pɩsa nɛ ŋmaɣzɩ kɩhɛyʋʋ pʋ-ñʋʋ taa yɔɔ lɛ, pɩwɛɣ ɖeu se ŋtazɩ kɩ-taa alɩwaatʋ ndʋ ŋkpɛlɩkɩɣ ña-tɩ yɔɔ yɔ.

16. Alɩwaatʋ ndʋ ɖɩwɩlɩɣ lalaa kɩhɛyʋʋ pʋ-ñʋʋ taa yɔɔ tɔm yɔ, ɛzɩma pɩwazɩɣ-ɖʋ? (Cɔnɩ takayaɣ huyuu yɔɔ kɩlɛmʋʋ.)

¹⁶ Wɩlɩ lalaa kɩhɛyʋʋ pʋ-ñʋʋ taa yɔɔ tɔm. Alɩwaatʋ ndʋ payɩ ɖiheyiɣ lalaa kɩhɛyʋʋ pʋ-ñʋʋ taa yɔɔ tɔm yɔ, ɖɩwɛɣnɩ ɛsɩmɩyɛ kɩ-yɔɔ nɛ pɩkpaɖɩ. Ðɩwɛnɩ wondu kɩbandʋ natʋyʋ ndʋ tɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ lalaa mbʋ pʋyɔɔ Yesu sɩbɩ ɖɔ-yɔɔ yɔ. Ðɩpɩzɩɣ nɛ ɖɩlabɩnɩ tʋmɩyɛ hatʋ cabɩ takayaɣ Laŋhɛzɩyɛ tɔm ndʋ tɩlɩnɩ Ɛsɔ cɔlɔ yɔ! tɛ tɔm kɩkpɛlɩkɩtʋ 4. Tɔm kɩkpɛlɩkɩtʋ ndʋ tɩ-ñʋʋ yɔ: “Anɩ pʋdʋ Yesu Krɩstʋ kɛnaa?” Yaa ɖɩpɩzɩɣ nɛ ɖɩlabɩnɩ tʋmɩyɛ takayaɣ Tɔm ndʋ Bibl wɩlɩɣ? tɛ ñʋʋ 5. Ñʋʋ ŋgʋ kɩtɔŋ se: “Yesu kɩlaʋ sɩm—Ɛsɔ kʋjɔʋ ŋgʋ kɩkpaɖaa yɔ.” Nɛ paa pɩnaɣ ŋga ɖɩwɩlɩɣ ɖɛ-ɛsɩmɩyɛ kɩhɛyʋʋ pʋ-ñʋʋ taa yɔɔ nɛ pɩkpaɖɩɣ alɩwaatʋ ndʋ ɖiwoki Yesu sɩm yɔɔ tɔzʋʋ sɔnzɩ taa nɛ ɖɩyaɣ ɛyaa lalaa nɛ kpekpeka se pɛkpɛndɩ ɖɔ-yɔɔ yɔ. Yehowa ha-ɖʋ waɖɛ sɔsɔɖɛ se ɖɩwɩlɩ lalaa ɛ-Pɩyalʋ yɔɔ tɔm!

17. Ɛbɛ yɔɔ kɩhɛyʋʋ pʋ-ñʋʋ taa kɛ kʋjɔʋ ŋgʋ Ɛsɔ labɩ ɛyaa nɛ kɩkpaɖaa yɔ?

¹⁷ Pɩtʋʋ fɛyɩ se ɖɩwɛnɩ lɩmaɣza kɩbana wena a-yɔɔ pɩwɛɛ se ɖɩwɛɣnɩ ɛsɩmɩyɛ siŋŋ kɩhɛyʋʋ pʋ-ñʋʋ taa yɔɔ yɔ. Kɩhɛyʋʋ pʋ-ñʋʋ taa yɔɔ lɛ, taabalɩyɛ kɩbanɖɛ pɩzɩɣ nɛ ɖɩwɛɛ ɖa nɛ Yehowa ɖɛ-hɛkʋ taa paa ɖɩtɩtalɩ pilim yɔ. Kɩhɛyʋʋ pʋ-ñʋʋ taa yɔɔ lɛ, pakaɣ wɛɛkʋʋ Eleeu tʋma cɩɖɩ cɩɖɩ. (1 Yoh. 3:8) Kɩhɛyʋʋ pʋ-ñʋʋ taa yɔɔ lɛ, tamaɣ ŋga Yehowa kaawɛnɩ tɛtʋ yɔɔ ɖooo kiɖe tɛɛ yɔ, kakaɣ labʋ. Tɛtʋ kpeekpe kaɣ pɩsʋʋ paradisuu. Ɛyaa mba payɩ ŋkaɣ katʋʋ yɔ, pakaɣ sɔɔlʋʋ Yehowa nɛ pɛsɛɛ-ɩ. Ye mbʋ, iyele nɛ paa ɖooye lɛ, ɖɩñɩnɩ nʋmɔŋ weyi ɩ-yɔɔ ɖɩtɩŋna nɛ ɖɩwɩlɩ ɖɛ-ɛsɩmɩyɛ kɩhɛyʋʋ pʋ-ñʋʋ taa yɔɔ yɔ; kʋjɔŋ weyi Ɛsɔ labɩ ɛyaa yɔ ɩ-taa lɛ, ŋgʋ kpaɖɩna!