Yehowa wɛ ñɔ-cɔlɔ paa ɛzɩmtaa, pʋyɔɔ lɛ ŋfɛyɩ ñe-ɖeke kpa

1. Nabʋyʋ taa, ɛbɛ yɔɔ pɩpɩzɩɣ nɛ pɩla Yehowa sɛyaa nabɛyɛ ɛzɩ pɛwɛ pe-ɖeke yɔ?

NABƲYƲ taa, pɩlakɩ ɖa-taa sakɩyɛ ɛzɩ pɛwɛ pe-ɖeke yɔ. Nabɛyɛ lɛ, alɩwaatʋ pazɩ yem pɩlakɩ-wɛ mbʋ. Lalaa lɛ, pɩpɩzɩɣ nɛ pɩlakɩ-wɛ mbʋ alɩwaatʋ sakɩyɛ. Halɩ paa ɛyaa ɩcɔ-ɖʋ nɛ pata yɔ, pɩpɩzɩɣ nɛ pɩlabɩ-ɖʋ ɛzɩ ɖɩwɛ ɖe-ɖeke yɔ. Pɩwɛ ɛyaa nabɛyɛ kaɖɛ se pɛwɛɛnɩ taabalaa ɛgbɛyɛ kɩfaɖɛ naɖɩyɛ taa. Ɛyaa lalaa lɛ, pa nɛ pɔ-hɔʋ taa ñɩma pɛkpɛndaɣ nɛ palakɩ tʋma sakɩyɛ, ɛlɛ pʋwayɩ pɔkɔŋ nɛ poposini pɔ-hɔʋ taa ñɩma lɛ, pɩlakɩ-wɛ ɛzɩ pɛwɛ pe-ɖeke yɔ. Ɛyaa lalaa ɖɔɖɔ lɛ, pakpakaɣ alɩwaatʋ nɛ pa nɛ pɛ-ɛyʋ kʋsɔɔlʋ nɔɔyʋ pacakɩ, nɛ alɩwaatʋ ndʋ ɛlɛ sɩkɩ yɔ, ɛtɛɖɩɣ-wɛ siŋŋ. Nɛ Krɩstʋ ñɩma lalaa lɛ, kɔzɩ kɔzɩ mba pamʋ toovenim pitileɖita yɔ, pɩlakɩ-wɛ ɛzɩ pɛwɛ pe-ɖeke yɔ alɩwaatʋ ndʋ pɔ-hɔʋ taa ñɩma nɛ pa-taabalaa kɩbɩma mba paasɛɣ Yehowa yɔ, pɔlɔʋ-wɛ yaa panazɩɣ-wɛ yɔ.

2. Tɔm pɔzʋʋ mbʋ yɔɔ ɖɩkaɣ cosuu?

² Yehowa sɩm ɖɔ-yɔɔ tɔm tɩŋa payɩ nɛ ɛnɩɣ ɖɔ-tɔm taa. Alɩwaatʋ ndʋ pɩlakɩ-ɖʋ ɛzɩ ɖɩwɛ ɖe-ɖeke yɔ, ɛnaɣ nɛ ɛsɔɔlaa se ɛsɩnɩ-ɖʋ nɛ ɖɩwa lɩmaɣza ana. Ɛzɩma Yehowa sɩɣnɩ-ɖʋ? Ɛbɛ ɖɩpɩzɩɣ ɖɩla nɛ ɖɩsɩnɩ ɖa-tɩ? Nɛ ɛzɩma ɖɩpɩzɩɣ nɛ ɖɩsɩnɩ ɖɛ-ɛgbɛyɛ taa ñɩma mba pɩlakɩ-wɛ ɛzɩ pɛwɛ pe-ɖeke yɔ? Iyele nɛ ɖicosi tɔm pɔzʋʋ mbʋ pɩ-yɔɔ.

YEHOWA MAƔZƖƔ ÐƆ-YƆƆ

3. Ɛzɩma Yehowa wɩlaa se ɛmaɣzaɣ Eliya yɔɔ?

³ Yehowa sɔɔlaa se ɛ-sɛyaa tɩŋa ɩwɛɛ taa leleŋ taa. Ɛwɛ ɖa-taa paa weyi lɛ ɛ-cɔlɔ kpam, nɛ alɩwaatʋ ndʋ lɩmaɣza naayɛ yeki nɛ pitiki-ɖʋ yɔɔɔ yɔ, ɛnaɣ. (Keɣa 144:18, 19) Iyele nɛ ɖɩna ɛzɩma Yehowa wɩlaa se ɛmaɣzaɣ nayʋ Eliya yɔɔ yɔ. Abalʋ siɣsiɣ tʋ ɛnʋ, ɛɛcaɣ wezuu Izrayɛɛlɩ mba wezuu caɣʋ taa alɩwaatʋ kaɖɛ ñɩndʋ natʋyʋ taa. Panazaɣ Yehowa sɛyaa siŋŋ, nɛ koyindinaa mba pakaɖaɣnɩ Ɛsɔ nɛ pɛwɛ ɖoŋ siŋŋ yɔ, pañɩnaɣ kpem se pakʋ Eliya. (1 Aw. 19:1, 2) Pɩtasɩ lɛ, Eliya maɣzaɣ se e-ɖeke ɛkɛnɩ nayʋ weyi pɩkazaa nɛ ɛsɛɣ Yehowa alɩwaatʋ ndʋ tɩ-taa yɔ. Nɛ pɩtɩla lɩmaɣza ana, ayeba nɛ pitibi-i yɔɔɔ nɛ pɩkpaɖɩ. (1 Aw. 19:10) Ɛsɔ labɩ nabʋyʋ lɛɛ lɛɛ se ɛsɩnɩ Eliya. Yehowa tiyi tiyiyu nɔɔyʋ se ɛhɛzɩ nayʋ laŋɩyɛ nɛ ɛtɩlɩ se ɛfɛyɩ e-ɖeke. Tiyiyu heyi Eliya se Izrayɛɛlɩ piya lɛɛsɩ sakɩyɛ kaawɛɛ nɛ sɩsɛɣ Yehowa siɣsiɣ.—1 Aw. 19:5, 18.

4. Ɛzɩma Maarkɩ 10:29, 30 wɩlɩɣ se Yehowa maɣzɩɣ ɛ-sɛyaa mba pɔ-hɔʋ taa ñɩma yaa pa-taabalaa yebi-wɛ sɩnʋʋ yɔ pɔ-yɔɔ siŋŋ?

⁴ Yehowa nawa se alɩwaatʋ ndʋ ɖɩlɩzɩɣ se ɖɩsɛɣ-ɩ yɔ, pɩkaɣ pɔzʋʋ se ɖa-taa nabɛyɛ ɩlaa kɩlaŋ sakɩyɛ. Pɩtɩla pɔ-hɔʋ taa ñɩma nɛ pa-taabalaa mba paasɛɣ Yehowa yɔ, peyeki-wɛ sɩnʋʋ. Pɩtɩla, sɔɔndʋ ndʋ Pɩyɛɛrɩ seɣaɣ pʋyɔɔ ɛpɔzɩ Yesu kɩyakʋ nakʋyʋ se: “Ðiyebi pɩtɩŋa payɩ nɛ ɖɩtɩŋ ña-wayɩ; ɛbɛ ɖɩkaɣ hiɣu yɔ?” (Mat. 19:27) Yesu hɛzɩ ɛ-tɔmkpɛlɩkɩyaa laŋa nɛ eheyi-wɛ nɛ nɔɔ kɩbaŋa se pakaɣ wɛnʋʋ fezuu taa hɔʋ sɔsɔʋ nakʋyʋ. (Kalɩ Maarkɩ 10:29, 30.) Nɛ Yehowa weyi ɛkɛ fezuu taa hɔʋ ŋgʋ kɩ-Ñʋʋdʋ yɔ, ɛlabɩ tamaɣ se ɛkaɣ sɩnʋʋ mba pɔsɔɔlʋʋ se pɛsɛɛ-ɩ yɔ. (Keɣa 9A:11) Ye pɩlakɩ-ŋ ɛzɩ ŋwɛ ñe-ɖeke yɔ, ɛbɛ ɖeyi ɖeyi ŋpɩzɩɣ ŋla nɛ pɩsa nɛ Yehowa sɩnɩ-ŋ nɛ ŋlʋbɩnɩ lɩmaɣza ana? Iyele nɛ ɖɩna pɩ-taa nabʋyʋ.

YE PƖLAKƖ-Ŋ ƐZƖ ŊWƐ ÑE-ÐEKE YƆ, ƐBƐ ŊPƖZƖƔ NƐ ŊLA?

5. Ye ŋkaŋ ña-lɩmaɣza ɛzɩma Yehowa wɛɛ nɛ ɛsɩɣnɩ-ŋ yɔ pɩ-yɔɔ yɔ, ɛzɩma pɩwazɩɣ-ŋ?

⁵ Ka ña-lɩmaɣza ɛzɩma Yehowa wɛɛ nɛ ɛsɩɣnɩ-ŋ yɔ pɩ-yɔɔ. (Keɣa 54:23) Ye ŋlabɩ mbʋ yɔ, pɩkaɣ-ŋ sɩnʋʋ nɛ ŋwɛɛnɩ lɩmaɣza kɩbana wɛtʋ ndʋ tɩ-taa ŋwɛɛ yɔ tɩ-yɔɔ. Payaɣ koobu halɩñɩnʋ nɔɔyʋ se Carol,b ɛkɛ ɛɖanɛ nɛ ɛ-hɔʋ taa lɛ, e-ɖeke ɛwɛnɩ toovenim taa. Ɛyɔɔdaa se: “Alɩwaatʋ ndʋ mamaɣzɩɣ ɛzɩma Yehowa sɩnɩ-m nɛ mɔnɖɔkɩ man-tɩ tɩlasɩ nzɩ mankataa yɔ pɩ-yɔɔ lɛ, pɩsɩɣnɩ-m se mana se mɛnfɛyɩ men-ɖeke. Nɛ piyeba nɛ man-taa tɛ se Yehowa kaɣ-m sɩnʋʋ paa ɛzɩmtaa.”

6. Ɛzɩma tɔm ndʋ tɩwɛ 1 Pɩyɛɛrɩ 5:9, 10 taa yɔ, tɩpɩzɩɣ nɛ tɩkpazɩ ɖoŋ mba pɩlakɩ-wɛ ɛzɩ pɛwɛ pe-ɖeke yɔ?

⁶ Maɣzɩ ɛzɩma Yehowa wɛɛ nɛ ɛsɩɣnɩ koobiya Krɩstʋ ñɩma mba pɩlakɩ-wɛ ɛzɩ pɛwɛ pe-ɖeke yɔ pɩ-yɔɔ. (Kalɩ 1 Pɩyɛɛrɩ 5:9, 10.) Payaɣ koobu abalɩñɩnʋ nɔɔyʋ se Hiroshi; ɛ-hɔʋ taa lɛ, e-ɖeke ɛɛkɛnɩ Aseɣɖe Tʋ pɩnzɩ sakɩyɛ. Ɛyɔɔdaa se: “Ɛgbɛyɛ taa lɛ, pɩwɛ kɛlɛʋ se ŋna se paa weyi ɛkatɩɣ tɩlasɩ. Ðɩnaɣ se ɖa-tɩŋa ɖɩwɛɛ nɛ ɖɩlakɩ ɖo-ɖoŋ ɖeɖe se ɖɩsɛɛ Yehowa lɛ, pɩpɩzɩɣ nɛ pɩkpazɩ ɖoŋ ɖa-taa mba pɛwɛ toovenim taa pe-ɖeke yɔ.”

7. Ɛzɩma Adɩma sɩɣnɩ-ŋ?

⁷ Wɛɛnɩ fezuu taa ɖʋtʋ kɩbandʋ. Ðʋtʋ ndʋ, tɩ-taa natʋyʋ lɛ se pɩwɛɛ se ŋheyiɣ Yehowa ɛzɩma ɖeyi ɖeyi pɩlakɩ-ŋ yɔ. (1 Pɩy. 5:7) Payaɣ koobu pɩɣa peleɣa nakɛyɛ se Massiel. Alɩwaatʋ ndʋ Massiel kpaɣ lɩmaɣzɩyɛ se ɛsɛɣ Yehowa yɔ, pɩlakaɣ-ɩ ɛzɩ ɛwɛ e-ɖeke yɔ mbʋ pʋyɔɔ yɔ, ɛ-hɔʋ taa ñɩma taasɛɣ Yehowa. Ɛyɔɔdaa se: “Mbʋ pɩkɩlɩ-m sɩnʋʋ nɛ malʋbɩnɩ lɩmaɣza ana yɔ, pɩ-taa nabʋyʋ lɛ se mantɩmaɣnɩ Yehowa siŋŋ. Ɛɛkɛ man-Caa toovenim taa, nɛ mantɩmaɣnɩ-ɩ tam sakɩyɛ paa evemiye nɖɩ nɛ meheyiɣ-i ɛzɩma pɩlakaɣ-m yɔ.”

8. Ɛzɩma Ɛsɔtɔm kalʋʋ nɛ tɩ-yɔɔ maɣzʋʋ sɩɣnɩ-ŋ?

⁸ Kalɩɣ Ɛsɔtɔm ɖoŋ ɖoŋ, nɛ ŋmaɣzɩɣ kɛdɛsɩ nzɩ sɩwɩlɩɣ se Yehowa sɔɔlɩ-ŋ yɔ sɩ-yɔɔ. Payaɣ koobu halɩñɩnʋ nɔɔyʋ se Bianca, pɩpɔzʋʋ se ɛɖɔkɩ ɛ-tɩ alɩwaatʋ ndʋ ɛ-hɔʋ taa ñɩma yɔɔdʋʋ tɔm natʋyʋ se pitibi-i yɔɔɔ yɔ. Ɛyɔɔdaa se: “Alɩwaatʋ ndʋ mankalɩɣ Bibl taa kɛdɛsɩ nɛ Yehowa sɛyaa mba pakatɩ wɛtʋ ndʋ tɩ-taa mɛwɛɛ yɔ tɩ-ɖɔndɩ yɔ pe-wezuu caɣʋ tɔm nɛ mamaɣzɩɣ pɩ-yɔɔ yɔ, pɩsɩɣnɩ-m siŋŋ.” Krɩstʋ ñɩma nabɛyɛ ɖɔkʋʋ masɩ nzɩ sɩhɛzɩɣ ɛyʋ laŋɩyɛ siŋŋ yɔ pa-ñʋʋ taa. Masɩ nzɩ sɩ-taa nasɩyɩ lɛ, Keɣa 26:10 nɛ Izaayii 41:10. Lalaa ñewelisiɣ tɔm ndʋ pakpaɣ tatasɩ yɔɔ yɔ, alɩwaatʋ ndʋ pɔñɔɔzʋʋ kediɣzisi yaa alɩwaatʋ ndʋ pakalɩɣ Bibl pa-tɩ yɔɔ yɔ. Ɛyaa mba pɔyɔɔdaa se palakɩ mbʋ lɛ, pɩsɩɣnɩ-wɛ se pɩtaakɩlɩ-wɛ labʋ ɛzɩ pɛwɛ pe-ɖeke yɔ.

9. Ɛzɩma kediɣzisi wobu wazɩɣ-ŋ?

⁹ Ñaɣ pana nɛ ŋwoki kediɣzisi ɖoŋ ɖoŋ. Tɔm ndʋ ŋkaɣ welisuu kediɣzisi taa yɔ, tɩkaɣ-ŋ kpazʋʋ ɖoŋ nɛ ŋpɩzɩɣ ɖɔɖɔ nɛ ŋñaɣ pana nɛ ŋtɩlɩ ño-koobiya. (Ebr. 10:24, 25) Massiel weyi ɛ-tɔm ɖɩyɔɔdaa nɛ pɩɖɛɛ yɔ, ɛtɔm se: “Paa maawɛ fɛyɛ siŋŋ yɔ, maatɛm man-taa se mowoki kediɣzisi tɩŋa nɛ maatɛm man-taa ɖɔɖɔ se moncosuu tɔm sɩ-taa. Pɩɩsɩnɩ-m nɛ mana se mɛwɛnɩ lone ɛgbɛyɛ taa.”

10. Ɛbɛ yɔɔ pɩcɛyaa se ɖɩɖʋ taabalɩyɛ nɛ Krɩstʋ ñɩma mba pɛwɛ siɣsiɣ yɔ?

¹⁰ Ðʋ taabalɩyɛ nɛ Krɩstʋ ñɩma mba pɛwɛ siɣsiɣ yɔ. Ðʋ taabalɩyɛ nɛ ɛgbɛyɛ taa ñɩma mba pɔ-cɔlɔ ŋpɩzɩɣ nɛ ŋkpɛlɩkɩ lɔŋ yɔ, paa pa-pɩnzɩ yaa pɔ-sɔnzɩ ɩwɛ ndɩ nɛ ña-ñɩnzɩ yɔ. Bibl tɔzʋʋ-ɖʋ se “akpadɩyaa wɛnɩ lɔŋsɩmtʋ.” (Yɔɔb 12:12) Akpadɩyaa ɖɔɖɔ pɩzɩɣ nɛ pɛkpɛlɩkɩ lɔŋ piya evelisi nzɩ sɩwɛ siɣsiɣ yɔ sɩ-cɔlɔ. Yonataanɩ kaakɩlɩ Daviid nɛ pɩnzɩ sakɩyɛ, ɛlɛ pɩtɩɖɩɣ-wɛ nʋmɔʋ se pɛkɛ taabalaa kɩbama. (1 Sam. 18:1) Daviid nɛ Yonataanɩ pasɩnɩ ɖama nɛ pɛsɛɛ Yehowa, paa paakatɩ tɩlasɩ sɔsɔsɩ yɔ. (1 Sam. 23:16-18) Payaɣ koobu halɩñɩnʋ nɔɔyʋ se Irina, e-ɖeke ɛkɛnɩ Aseɣɖe Tʋ ɛ-hɔʋ taa. Ɛyɔɔdaa se: “Toovenim taa lɛ, ɖo-koobiya pɩzɩɣ nɛ papɩsɩ ɖa-lʋlɩyaa yaa ɖɔ-hɔʋ taa mba fezuu taa. Yehowa pɩzɩɣ ɛtɩŋnɩ pɔ-yɔɔ nɛ ɛcɔnɩ ɖa-kɩcɛyɩm ɖeɖe.”

11. Ɛbɛ pɩpɔzʋʋ se ŋla nɛ taabalɩyɛ kɩbanɖɛ wɛɛ ña nɛ lalaa mɩ-hɛkʋ taa?

¹¹ Pɩpɩzɩɣ nɛ pɩwɛ-ŋ kaɖɛ se ŋwɛɛnɩ taabalaa kɩfama, kɔzɩ kɔzɩ ye ŋwɛ fɛyɛ yɔ. Payaɣ koobu halɩñɩnʋ nɔɔyʋ se Ratna nɛ ɛwɛ fɛyɛ. Etisaa nɛ ɛmʋ toovenim, paa pakaɖɩnɩ-ɩ yɔ. Ɛyɔɔdaa se: “Menɖiɣzinaa se pɩpɔzʋʋ se ɛgbɛyɛ taa koobiya ɩsɩnɩ-m.” Pɩpɩzɩɣ nɛ pɩwɛ-ŋ kaɖɛ se ŋheyi ɛyʋ lɛlʋ ɛzɩma pɩlakɩ-ŋ yɔ, ɛlɛ ye ŋlabɩ mbʋ yɔ, piyeki nɛ taabalɩyɛ kɩbanɖɛ wɛɛ mɩ-hɛkʋ taa. Ña-taabalaa sɔɔlaa se pakpazɩ-ŋ ɖoŋ nɛ pasɩnɩ-ŋ, ɛlɛ pɩpɔzʋʋ se ŋyele nɛ patɩlɩ ɛzɩma papɩzɩɣ nɛ pala mbʋ yɔ.

12. Ɛzɩma tɔm susuu tʋmɩyɛ pɩzɩɣ ɖɩsɩnɩ-ŋ nɛ ŋwɛɛnɩ taabalaa kɩbama?

¹² Nʋmɔŋ kɩbaŋ weyi ɩ-yɔɔ ŋpɩzɩɣ ŋtɩŋna nɛ ŋwɛɛnɩ taabalaa yɔ, ɩ-taa nakʋyʋ lɛ se pɩwɛɛ se ña nɛ ño-koobiya Krɩstʋ ñɩma ɩlɩɣ tɔm susuu. Carol weyi ɛ-tɔm ɖɩyɔɔdaa nɛ pɩɖɛɛ yɔ, ɛtɔm se: “Mankpakɩɣ ma-alɩwaatʋ nɛ ma nɛ koobiya halɩñɩma ɖɩlɩɣ nɛ ɖisusuu tɔm nɛ ɖɩlakɩ teokrasɩ tʋma lɛɛna, mbʋ yebina nɛ mɛwɛɛnɩ taabalaa kɩbama sakɩyɛ. Yehowa tɩŋnɩ taabalaa mba pɔ-yɔɔ nɛ ɛsɩnɩ-m pɩnzɩ sakɩyɛ.” Pɩwɛ ɖeu siŋŋ se ɖɩɖʋ taabalɩyɛ nɛ Krɩstʋ ñɩma mba pɛwɛ siɣsiɣ yɔ. Yehowa tɩŋɩɣnɩ taabalaa mba pɔ-yɔɔ nɛ ɛkpazɩ-ŋ ɖoŋ, alɩwaatʋ ndʋ pitiki-ŋ yɔɔɔ yɔ; ɛzɩ alɩwaatʋ ndʋ pɩlakɩ-ŋ ɛzɩ ŋwɛ ñe-ɖeke yɔ tɩ-taa mbʋ yɔ.—Adu. 17:17.

SƖNƖ ƐYAA LALAA NƐ PATƖLƖ SE PƐWƐNƖ LONE ÐƆ-HƆƲ TAA

13. Tʋmɩyɛ nɖɩ ɛgbɛyɛ taa ñɩma tɩŋa wɛna?

¹³ Ɛgbɛyɛ taa ñɩma tɩŋa tʋmɩyɛ pɩkɛnaa se peyele nɛ sɔɔlɩm nɛ laŋhɛzɩyɛ wɛɛ ɖɩ-taa, nɛ pɩkɛ lone nɖɩ ɖɩ-taa nɔɔyʋ ɛɛmaɣzɩɣ se ɛwɛ e-ɖeke yɔ. (Yoh. 13:35) Tɔm ndʋ ɖɩyɔɔdʋʋ nɛ mbʋ ɖɩlakɩ yɔ, pɩpɩzɩɣ nɛ pɩkpazɩ ɖoŋ ɛyaa lalaa siŋŋ. Koobu halɩñɩnʋ nɔɔyʋ yɔɔdaa se: “Alɩwaatʋ ndʋ mamʋ toovenim yɔ, ɛgbɛyɛ pɩsɩ mɔ-hɔʋ. Ye koobiya ɩtaasɩnɩ-m yɔ, mantaapɩzɩ nɛ manpɩsɩ Yehowa Aseɣɖe Tʋ.” Ɛbɛ ŋpɩzɩɣ ŋla nɛ ŋsɩnɩ ɛyaa mba pɔ-hɔʋ taa ñɩma fɛyɩ toovenim taa yɔ nɛ patɩlɩ se pɛwɛnɩ lone ɛgbɛyɛ taa?

14. Ɛbɛ ŋpɩzɩɣ ŋla nɛ ña nɛ ɛyaa kɩfama ɩɖʋ taabalɩyɛ?

¹⁴ Ñaɣ pana nɛ ŋɖʋ taabalɩyɛ nɛ ɛyaa kɩfama. Ye ɖɩmʋʋ ɛyaa kɩfama camɩyɛ ɛgbɛyɛ taa yɔ, piyeki nɛ ɖa nɛ wɛ ɖɩpaɣzɩ taabalɩyɛ ɖʋʋ. (Roma 15:7) Ɛlɛ pɩtasɩna se ɖɩsɛɣ-wɛ nɛ nɔɔ kɩbaŋa lɛ, ɖɩsɔɔlaa se ɖɩla nabʋyʋ ɖɔɖɔ. Ðɩsɔɔlaa se alɩwaatʋ kaaɖɛɣ lɛ, ɖa nɛ wɛ ɖɛ-hɛkʋ taa taabalɩyɛ ɛcɛyɩsɩ. Pʋyɔɔ lɛ, lakɩ ɛyaa kɩfama camɩyɛ lakasɩ nɛ ŋwɩlɩ se ŋmaɣzɩɣ pɔ-yɔɔ siŋŋ. Ñaɣ pana nɛ ŋtɩlɩ tɩlasɩ nzɩ pɛwɛɛ nɛ pakatɩɣ yɔ, ɛlɛ taapɔzɩ-wɛ tɔm ndʋ tɩcɛyɩɣ-wɛ yɔ. Pɩpɩzɩɣ nɛ pɩwɛɛ pa-taa nabɛyɛ kaɖɛ se pɔyɔɔdɩ ɛzɩma pɩlakɩ-wɛ yɔ, pʋyɔɔ lɛ kpa ña-tɩ nɛ taañɩɣ pɔ-yɔɔ se pɔyɔɔdɩ. Ɛlɛ pɔzɩ-wɛ tɔm nɛ nɔɔ kɩbaŋa nɛ lɛɣtʋ nɛ pɩsa nɛ peheyi-ŋ ɛzɩma pɩlakɩ-wɛ yɔ, nɛ ŋɖʋ suuɖu nɛ ŋwelisi tɔm ndʋ pocosuu yɔ. Ŋpɩzɩɣ nɛ ŋpɔzɩ-wɛ nɛ ŋna se ɛzɩma palaba nɛ patɩlɩ toovenim?

15. Krɩstʋ ñɩma mba papɩ fezuu taa yɔ, ɛzɩma papɩzɩɣ nɛ pasɩnɩ ɛyaa lalaa ɛgbɛyɛ taa?

¹⁵ Ye Krɩstʋ ñɩma mba papɩ fezuu taa yɔ, kɔzɩ kɔzɩ ɛgbɛyɛ taa ɛzʋtʋyaa ɩwɩlɩɣ se pamaɣzɩɣ ɛgbɛyɛ taa ñɩma yɔɔ yɔ, ɛgbɛyɛ taa ñɩma tɩŋa kaɣ ɖɛnʋʋ ɛsɩndaa fezuu taa. Payaɣ koobu nɔɔyʋ se Melissa nɛ e-ɖoo sɩnɩnɩ-ɩ nɛ ɛpaɣlɩ toovenim taa. Ɛyɔɔdaa se: “Mɛwɛnɩ ɛsɩmɩyɛ siŋŋ koobiya abalɩñɩma mba paawɛ ɛzɩ man-caanaa yɔ pɔ-yɔɔ, pakpakaɣ alɩwaatʋ nɛ ma nɛ wɛ ɖɩcakɩ, nɛ pawɩlaɣ se pamaɣzɩɣ mɔ-yɔɔ pɩnzɩ sakɩyɛ. Alɩwaatʋ ndʋ payɩ mɔnsɔɔlaa se mɔyɔɔdɩ yɔ, nɔɔyʋ wɛɛ se ewelisiɣni-m.” Payaɣ koobu pɩɣa evelaɣ nakɛyɛ se Mauricio. Alɩwaatʋ ndʋ weyi ɛkpɛlɩkɩnɩ Mauricio Bibl yɔ ekizi toovenim yɔ, pɩlakaɣ-ɩ ɛzɩ ɛwɛ e-ɖeke yɔ. Ɛyɔɔdaa se: “Ɛzʋtʋyaa wɩlaa se pamaɣzɩɣ mɔ-yɔɔ, nɛ pɩsɩnɩ-m siŋŋ. Pɔyɔɔdaɣnɩ-m ɖoŋ ɖoŋ. Ma nɛ wɛ ɖɩkpɛndaɣ nɛ ɖisusuu tɔm, pɛkɛdaɣ-m ñɩm mbʋ pɩ-yɔɔ palɩ pa-tɩ yɔɔ Bibl kpɛlɩkʋʋ alɩwaatʋ taa yɔ pɩ-tɔm, nɛ halɩ ma nɛ wɛ ɖɩkpɛndaɣ nɛ ɖɩlakɩ hola aleɣya.” Melissa nɛ Mauricio pa-naalɛ pɛwɛ alɩwaatʋ tɩŋa Ɛsɔ sɛtʋ tʋmɩyɛ taa.

16-17. Ɛbɛ ɖeyi ɖeyi ɖɩpɩzɩɣ ɖɩtasɩ labʋ nɛ ɖɩsɩnɩ ɛyaa lalaa?

¹⁶ La nabʋyʋ ɖeyi ɖeyi nɛ ŋsɩnɩ ɛyaa lalaa. (Gal. 6:10) Leo kɛ Ɛsɔtɔm tiyiyu ɛjaɖɛ naɖɩyɛ taa, nɛ peeɖe posini ɖenɖe ɛ-hɔʋ taa ñɩma wɛɛ yɔ siŋŋ. Ɛyɔɔdaa se: “Ðoŋ ɖoŋ lɛ, mbʋ pɩpɔzʋʋ ɛyʋ yɔ mbʋ lɛ se palabɩ-ɩ camɩyɛ lakasɩ nasɩyɩ pazɩ alɩwaatʋ kɩbandʋ yɔɔ. Mɔntɔzʋʋ se kɩyakʋ nakʋyʋ mansaɣaɣ mɔ-lɔɔɖɩyɛ nɛ kɛgbɛdɩsaɣ nakɛyɛ talɩ-m. Pʋwayɩ manpɩzaa nɛ mantalɩ ɖɩɣa, ɛlɛ pɩɩha-m nɩɣzɛ siŋŋ. Pɩkɛdaa lɛ, koobu nɔɔyʋ nɛ ɛ-halʋ paya-m pɛ-tɛ se ɖɩkpɛndɩ nɛ ɖɩtɔɔ tɔɔnaɣ. Maatɔzʋʋ mbʋ ɖɩtɔɔ puwiye yɔ pɩ-yɔɔ, ɛlɛ mɔntɔzʋʋ se paawelisini-m camɩyɛ. Ma nɛ wɛ ɖɩkpaɣ alɩwaatʋ nɛ ɖɩcaɣ nɛ pɩtɛ lɛ, piyeba nɛ ma-laŋɩyɛ hɛɛ siŋŋ!”

¹⁷ Ða-tɩŋa ɖɩsɔɔlɩ teokrasɩ ɖʋtʋ ndɩ ndɩ ɛzɩ kigbeɣliŋ mbʋ yɔ, mbʋ pʋyɔɔ yɔ ɖa nɛ ɛyaa lalaa ɖɩkpakɩɣ alɩwaatʋ nɛ ɖɩcakɩ nɛ ɖɩlakɩ kɛdaɣ, tɔm ndʋ ɖiwelisaa yɔ tɩ-yɔɔ. Ɛlɛ, Carol weyi ɛ-tɔm ɖɩyɔɔdaa nɛ pɩɖɛɛ yɔ ɛtɔm se: “Pɩlakɩ-m ɛzɩ mɛwɛ men-ɖeke yɔ, kɔzɩ kɔzɩ alɩwaatʋ ndʋ mɛwɛɣ kigbeɣliŋ taa yɔ.” Ɛbɛ yɔɔ? Ɛyɔɔdaa se: “Paa koobiya mɩnɩŋ sakɩyɛ yaa halɩ kudokiŋ sakɩyɛ ɩcɔ-m nɛ pata yɔ, ɖoŋ ɖoŋ lɛ pa nɛ pɔ-hɔŋ taa ñɩma pɛkpɛndɩɣ nɛ pacakɩ. Manaɣ-wɛ mbʋ lɛ, pɩlakɩ-m ɛzɩ mɛwɛ men-ɖeke yɔ nɛ pɩkɩlɩɣ.” Nɔɔyʋ lɛ, alɩwaatʋ ndʋ elesiɣ ɛ-tɛŋga yɔ, pɩwɛ-ɩ kaɖɛ se ewolo kajalaɣ kigbeɣluu ŋgʋ palakɩ pʋwayɩ yɔ. Ŋsɩm ɛyʋ nɔɔyʋ se ɛwɛ wɛtʋ ndʋ tɩ-taa? Pɩɩwɛɣ ɖeu se teokrasɩ ɖʋtʋ ndʋ tɩwɛnɩ ɛsɩndaa yɔ tɩ-taa, ŋyaa-ɩ nɛ ɛ nɛ ñɔ-hɔʋ ɩkpɛndɩ nɛ ɩcaɣ?

18. Alɩwaatʋ ndʋ ɖɩmʋʋ ɛyaa ɛgɔndʋ yɔ, ɛzɩma ɖɩpɩzɩɣ nɛ ɖɩlabɩnɩ tʋmɩyɛ tɔm ndʋ tɩwɛ 2 Kɔrɛntɩ mba 6:11-13 taa yɔ?

¹⁸ Kpakɩɣ alɩwaatʋ nɛ ña nɛ ɛyaa lalaa ɩcakɩ. Ñaɣ pana nɛ ŋkpakɩɣ alɩwaatʋ nɛ ña nɛ koobiya ndɩ ndɩ ɩcakɩ, kɔzɩ kɔzɩ mba pɩtɩla, pɩlakɩ-wɛ ɛzɩ pɛwɛ pe-ɖeke yɔ. Ðɩsɔɔlaa se “ɖikuli ɖa-laŋɩyɛ wamm,” ɖɩsɔɔlaa se ɖɩla mbʋ, kɔzɩ kɔzɩ koobiya mba pɔ-hɔɔlʋʋ taa. (Kalɩ 2 Kɔrɛntɩ mba 6:11-13.) Melissa weyi ɛ-tɔm ɖɩyɔɔdaa nɛ pɩɖɛɛ yɔ, ɛtɔm se: “Ða-taa lakaɣ leleŋ siŋŋ paa ɛzɩmtaa, alɩwaatʋ ndʋ ɖo-koobiya yaɣ-ɖʋ se ɖiwolo pɛ-tɛ nɛ ɖa nɛ wɛ nɛ pɔ-hɔŋ taa ñɩma ɖɩkpɛndɩ nɛ ɖɩcaɣ, yaa alɩwaatʋ ndʋ payaɣ-ɖʋ se ɖɩkpɛndɩ nɛ ɖɩɖɔ nʋmɔʋ yɔ.” Ɛyʋ nɔɔyʋ wɛ ñɛ-ɛgbɛyɛ taa se ŋpɩzɩɣ nɛ ŋmʋ-ɩ ɛgɔndʋ na?

19. Kɔzɩ kɔzɩ alɩwaatʋ ndʋ yɔɔ koobiya Krɩstʋ ñɩma pɩzɩɣ nɛ pɔsɔɔlɩ se ɖa nɛ wɛ ɖɩkpaɣ alɩwaatʋ nɛ ɖɩcaɣ?

¹⁹ Ðo-koobiya Krɩstʋ ñɩma pɩzɩɣ nɛ pɔsɔɔlɩ se ɖa nɛ wɛ ɖɩkpaɣ alɩwaatʋ nɛ ɖɩcaɣ, kɔzɩ kɔzɩ alɩwaatʋ natʋyʋ yɔɔ. Pɩpɩzɩɣ nɛ pɩwɛɛ nabɛyɛ kaɖɛ siŋŋ se pɛwɛɛ pɔ-hɔʋ taa ñɩma mba patɩkɛ Yehowa Aseɣɖe Tɩnaa yɔ pɛ-hɛkʋ taa alɩwaatʋ ndʋ paba tɔkɩ kazandʋ yɔ. Ɛyaa lalaa lɛ, papɩzɩɣ nɛ panɩɩ siziŋ siŋŋ avema naayɛ, ɛzɩ pɩnaɣ taa evemiye nɖɩ ɖɩtɔzʋʋ-wɛ pɛ-ɛyʋ kʋsɔɔlʋ nɔɔyʋ sɩm yɔɔ yɔ. Ye ɖɩkpakɩɣ alɩwaatʋ nɛ ɖa nɛ koobiya mba ɖɩcakɩ yɔ, ɖɩwɩlɩɣ-wɛ se ‘ɖɩmaɣzɩɣ pa-kɩcɛyɩm yɔɔ siŋŋ.’—Fil. 2:20.

20. Tɔm ndʋ Yesu yɔɔdaa nɛ pama-tʋ Maatiyee 12:48-50 taa yɔ, ɛzɩma tɩpɩzɩɣ nɛ tɩsɩnɩ-ɖʋ alɩwaatʋ ndʋ pɩlakɩ-ɖʋ ɛzɩ ɖɩwɛ ɖe-ɖeke yɔ?

²⁰ Lɩmaɣza sakɩyɛ yɔɔ lɛ, pɩpɩzɩɣ nɛ pɩlakɩ Krɩstʋ tʋ nɔɔyʋ alɩwaatʋ natʋyʋ taa ɛzɩ ɛwɛ e-ɖeke yɔ. Paa mbʋ yɔ, pɩwɛɛ se ɖɩtɔzɩ se Yehowa sɩm ɛzɩma pɩlakɩ-ɖʋ yɔ camɩyɛ. Ðoŋ ɖoŋ lɛ, ɛtɩŋɩɣnɩ ɖo-koobiya Krɩstʋ ñɩma yɔɔ nɛ ɛhaɣ-ɖʋ mbʋ pɩpɔzʋʋ-ɖʋ yɔ. (Kalɩ Maatiyee 12:48-50.) Ye ɖɩlakɩ ɖo-ɖoŋ ɖeɖe se ɖɩsɩnɩ ɖo-koobiya Krɩstʋ ñɩma yɔ, ɖɩwɩlɩɣ Yehowa se ɖɩwɛnɩ ɛsɩmɩyɛ ɖʋtʋ ndʋ ɛlabɩnɩ sɔɔlɩm yɔ tɩ-yɔɔ. Paa ɛzɩma pɩtɩɩlakɩ-ɖʋ nabʋyʋ taa yɔ, ɖɩfɛyɩ ɖe-ɖeke kpa mbʋ pʋyɔɔ yɔ, Yehowa wɛ ɖɔ-cɔlɔ paa ɛzɩmtaa.