ƐBƐ ÐƖPƖZƖƔ ÐƖLA NƐ PAÐƖYƐ SƖƖ TƖNAƔ

2 | Taañɩnɩ Se Ŋkpa Kɩmɩyɛ

Tɔm ndʋ Bibl wɩlɩɣ yɔ:

“Ɩtaahɛyɩ nɔɔyʋ kɩdɛkɛdɩm kɩdɛkɛdɩm lone taa. . . . Ye pɩsaŋ, nɛ ye pɩlɩɣnɩ mɩ-cɔlɔ na yɔ, mɩ nɛ ɛyaa tɩŋa ɩwɛɛ laŋhɛzɩyɛ taa. Man-kʋsɔɔlaa, mɩ-maɣmaɣ ɩtaakpa kɩmɩyɛ, . . . mbʋ pʋyɔɔ yɔ pamawa se: “‘Matɩnɩ kɩmɩyɛ kpaʋ; makaɣnɩ hɛyʋʋ,’ Yehowa tɔŋna.”—ROMA MBA 12:17-19.

Pʋ-tɔbʋʋ lɛ se:

Ye nɔɔyʋ ɛlabɩ-ɖʋ mbʋ pɩfɛyɩ ɖeu yɔ nɛ pɩwɩzɩ-ɖʋ yɔ, ɖɩwɛnɩ toovenim, ɛlɛ Ɛsɔ tɩsɔɔlɩ se ɖɩkpa ɛyʋ ɛnʋ kɩmɩyɛ. Eseɣtiɣ- ɖʋ se ɖɩɖaŋ ɛnʋ mbʋ pʋyɔɔ yɔ piileɖiɣ lɛ, ɛkaɣ yebu nɛ mulum lakasɩ tɩŋa sɩɩ tɩnaɣ.—Keɣa 36:7, 10.

Mbʋ ŋpɩzɩɣ ŋla yɔ:

Ɛyaa mba patɩtalɩ pilim yɔ, ye pakpaɣ kɩmɩyɛ yɔ, pɩkɔŋnɩ paɖɩyɛ nɛ pɩkpaɖɩ. Pʋyɔɔ lɛ, ye nɔɔyʋ ɛɖʋ-ŋ ɖɩwɩzɩyɛ yaa ɛlabɩ-ŋ mbʋ pɩfɛyɩ ɖeu yɔ, taakpa-ɩ pɩ- kɩmɩyɛ. Ñaɣ pana nɛ ŋɖɔkɩ ña-tɩ nɛ ŋla mbʋ piyeki se laŋhɛzɩyɛ ɛwɛɛ yɔ. Nabʋyʋ taa lɛ, pɩwɛɣ ɖeu nɛ pɩkɩlɩ se ŋsɔɔ tɔm ndʋ tɩ-yɔɔ. (Aduwa 19:11) Nabʋyʋ taa ɖɔɖɔ lɛ, ye ŋnawa se pɩcɛyaa yɔ, ŋpɩzɩɣ nɛ ŋlɩzɩ se ŋwokini tɔm ndʋ ɖoli. Kɩɖaʋ nakʋyʋ yɔ: Ye nɔɔyʋ ɛlabɩ-ŋ kɩdɛkɛdɩm lakasɩ nasɩyɩ yɔ, ŋpɩzɩɣ nɛ ŋlɩzɩ se ŋwokini tɔm ndʋ polisinaa cɔlɔ yaa ñʋndɩnaa lalaa cɔlɔ.

Weyi ɛñɩnɩɣ se ɛkpa kɩmɩyɛ yɔ pɩɖʋzʋʋ ɛ-maɣmaɣ

Ɛbɛ ŋpɩzɩɣ ŋla ye pɩwɛ ɛzɩ nʋmɔʋ nakʋyʋ fɛyɩ se ŋtɩŋnɩ kɩ-yɔɔ nɛ ŋcɔnɩ tɔm natʋyʋ ɖeɖe laŋhɛzɩyɛ taa? Yaa ye ŋtɛm labʋ mbʋ payɩ ŋpɩzɩɣ yɔ se ŋcɔnɩ tɔm ndʋ ti-ɖeɖe laŋhɛzɩyɛ taa ɛlɛ pɩtɩcɔ ɛbɛ ŋpɩzɩɣ ŋla? Taakpa kɩmɩyɛ. Pɩpɩzɩɣ piyele nɛ tɔm tɛzɩ wɛɛkʋʋ kɩwɛɛkʋ. Ɛlɛ ye ŋlɩzaa se ŋŋkpaɣ kɩmɩyɛ yɔ piyeki nɛ paɖɩyɛ sɩɩ tɩnaɣ. Ŋpɩzɩɣ nɛ ŋtaa Ɛsɔ liu se ɛkaɣ tɔm ndʋ ti-ɖeɖe cɔnʋʋ. “Pɛɖɩ ña-tɩ Kɩbaɣlʋ tɛɛ, yele ña-tɩ nɛ ɩ ɛ-maɣmaɣ ɛlabɩna.”—Keɣsi 36:3-5.

Mbʋ pɩlabɩ e-wezuu caɣʋ taa toovenim taa yɔ—ADRIÁN

Ɛwabɩ kɩmɩyɛ kpaʋ lɩmaɣza wena ɛɛwɛna yɔ

Adrián kaakɛ pɩɣa evelaɣ lɛ, paɖɩyɛ yeba nɛ ɛlakɩ puuyaɣ lakasɩ nɛ ɛñɩnɩɣ se ɛkpa kɩmɩyɛ mba payɩ paaca-ɩ tɔm yɔ. Ɛyɔɔdaa se: “Ðoŋ ɖoŋ lɛ malakaɣnɩ tʋmɩyɛ hɔzɩŋ nɛ nabʋyʋ taa mamʋwaɣ heŋ siŋŋ nɛ calɩm kpeŋ mɔ-yɔɔ, nɛ ɛyaa ɖɛɣaɣ nɛ peyeki-m habɩyɛ yɔɔ mbʋ pʋyɔɔ pamaɣzaɣ se mansɩba.”

Adrián paɣzɩ Bibl kpɛlɩkʋʋ alɩwaatʋ ndʋ ɛɛwɛnɩ pɩnzɩ 16 yɔ. Ɛtasɩ yɔɔdʋʋ se: “Mɛwɛɛ nɛ mɛnɖɛɣnɩ ɛsɩndaa Bibl kpɛlɩkʋʋ taa lɛ, mana se pɩpɔzʋʋ se mɛlɛɣzɩ mɛ-wɛtʋ.” Pɩɩwɛɛ se ɛlɔ paɖɩyɛ lɩmaɣza nɛ eyele puuyaɣ lakasɩ nzɩ ɛlakaɣ yɔ. Kɔzɩ kɔzɩ lɛ, tɔm ndʋ ɛkpɛlɩkɩ Roma mba 12:17-19 taa ɖenɖe pɔtɔm se ɖɩtaakpa kɩmɩyɛ yɔ tɩsɩnɩ-ɩ siŋŋ. Ɛyɔɔdaa se: “Mɔnkɔm nɛ mentisi se Yehowa kaɣ tɩŋnʋʋ nʋmɔʋ ŋgʋ ɛsɔɔlaa yɔ kɩ-yɔɔ nɛ eyele nɛ mulum lakasɩ sɩɩ tɩnaɣ alɩwaatʋ ndʋ ɛsɔɔlaa yɔ tɩ-yɔɔ. Pazɩ pazɩ lɛ, mɔnkɔm nɛ meyele puuyaɣ lakasɩ nzɩ malakaɣ yɔ.”

Ðanaɣ nakɛyɛ lɛ, Adrián koyindinaa mba poyowaɣni-i yɔ pa-taa lɛlʋ kpa-ɩ se ɛmakɩ-ɩ. Peeɖe pa-ñʋʋdʋ yɔɔdɩnɩ nɔɔ kʋkʋyaɣ se: “Lʋ ña-tɩ yɔɔ!” Adrián yɔɔdaa se: “Pɩlakaɣ-m kpem ɛzɩ mankaɖɩnɩ-ɩ yɔ.” Mbʋ ɛzɩ Adrián kaakaɖɩnɩ-ɩ lɛ, ɛlabɩ adɩma naayɛ pazɩ nɛ ɛkpaɣ nʋmɔʋ nɛ ɛɖɛɛ.

Adrián tasɩ yɔɔdʋʋ se: “Tɛʋ fema lɛ mankatɩ pa-ñʋʋdʋ maɣmaɣ nɛ e-ɖeke ɛɖɔŋaɣna. Mana-ɩ lɛ mamʋ pana siŋŋ nɛ mañɩnaɣ se mankpa-ɩ kɩmɩyɛ, ɛlɛ mantasɩ Yehowa tɩmnʋʋ me-liu tɛɛ nɛ mentendi-i se ɛsɩnɩ-m nɛ mɔnɖɔkɩ man-tɩ. Mamaɣzaɣ se ɛnʋ ɖɔɖɔ ɛmʋʋ pana, ɛlɛ pɩɖɩɣzɩ-m se ɛɖɔma nɛ ɛñɔtɩnɩ-m nɛ eheyi-m se: ‘Kpaɣ nɛ ŋkpeɣ-m mbʋ pɩlabɩ ɖeɖe wayɩ ɖanaɣ yɔɔ yɔ pɩ-yɔɔ. Toovenim taa lɛ, mɔnsɔɔlaa se mɛwɛɛ ɛzɩ ña yɔ. Mɔnsɔɔlaa se mɛnkpɛlɩkɩ Bibl.’ Man-taa kaalabɩ leleŋ kpem se manpɩzaa nɛ mɔnɖɔkɩ man-pana! Piyeba nɛ ɖɩkpɛndɩ nɛ ɖɩpaɣzɩ Bibl kpɛlɩkʋʋ.”