Kewiyaɣ paɣzɩ ka-tʋmɩyɛ!

1. Ɛbɛ ɖa-taa tɛmnaa, nɛ ɛbɛ yɔɔ?

ALƖWAATƲ ndʋ ŋnaɣ wɛtʋ ndʋ tɩ-taa ɛjaɖɛ wɛɛ yɔ, pɩlakɩ-ŋ kaɖɛ se ŋtisi se ɛjaɖɛ yɔɔ wɛtʋ kaɣ ñɔɔzʋʋ na? Hɔʋ taa mba ɩɩtasɩɣ ɖama sɔɔlʋʋ ɛzɩ ɖooo lɛ yɔ. Ɛyaa sakɩyɛ wɛɛ nɛ palakɩ puuyaɣ lakasɩ, pɛkɛ piɖeni men-ɖeke tɩnaa, nɛ palakɩ kañatʋ nɛ pɩkɩlɩɣ. Pɩwɛ ɛyaa sakɩyɛ kaɖɛ se pataa liu ñʋndɩnaa. Ɛlɛ wɛtʋ kɩdɛkɛdɩtʋ ndʋ, tɩpɩzɩɣ tiyele nɛ ña-taa tɛ se ɛjaɖɛ yɔɔ wɛtʋ kaɣ wɛʋ ɖeu nɛ pɩkɩlɩ. Ɛbɛ yɔɔ? Mbʋ pʋyɔɔ yɔ, ɛyaa lakasɩ wɛɛ nɛ sɩlakɩ nɔɔ kʋɖʋmaɣ ɖeyi ɖeyi nɛ tɔm ndʋ Bibl taa natʋ yɔɔdaa pɩlɩɩnɩ “kɛdɛzaɣ kɩyakɩŋ” yɔɔ yɔ. (2 Tim. 3:1-5) Ɛyʋ weyi ɛwɛnɩ laŋɩyɛ kɩbanɖɛ yɔ, ɛɛpɩzɩɣ nɛ ɛpɩtɩ se natʋ ndʋ tiɖiɣni labʋ. Nɛ ɛzɩma natʋ ndʋ tiɖiɣni labʋ yɔ, pɩwɩlɩɣ se Krɩstʋ Yesu pɩsɩ Ɛsɔ Kewiyaɣ Wiyaʋ. Ɛlɛ natʋ sakɩyɛ ndʋ titukuuni Ɛsɔ Kewiyaɣ yɔ, tɩ-taa kʋɖʋmtʋ ɖeke lɛ. Ye ɖɩtazɩ natʋ lɛɛtʋ ndʋ tɩlabɩ ɖa-alɩwaatʋ taa yɔ tɩ-taa yɔ, pɩkaɣ cɛyɩsʋʋ ɖe-tisuu.

2. Ɛbɛ ɖɩkaɣ naʋ tɔm ñʋʋ kʋnɛ kɩ-taa, nɛ ɛbɛ yɔɔ? (Yɔɔdɩ takayaɣ huyuu yɔɔ kɩlɛmʋʋ yɔɔ tɔm.)

² Tɔm ñʋʋ kʋnɛ kɩ-taa, ɖɩkaɣ naʋ (1) natʋ ndʋ tɩsɩɣnɩ-ɖʋ se ɖɩna se pasɩ Ɛsɔ Kewiyaɣ Ɛsɔdaa yɔ, (2) natʋ ndɩ ndɩ ndʋ tɩsɩɣnɩ-ɖʋ se ɖɩnɩɩ pɩ-taa se Yesu pɩsɩ Ɛsɔ Kewiyaɣ Wiyaʋ ɛsɔdaa yɔ, nɛ (3) natʋ ndɩ ndɩ ndʋ tɩwɩlɩɣ-ɖʋ ɛzɩma pakaɣ ɖɩzʋʋ Ɛsɔ Kewiyaɣ koyindinaa yɔ. Ɛzɩ tɩla kpɛndʋʋ pɩsaŋ hɔɔlasɩ ndɩ ndɩ nɛ pɩpɩsɩɣ toko yɔ, mbʋ ɖɔɖɔ natʋ ndɩ ndɩ ndʋ tɩ-taa ɖɩkaɣ tazʋʋ yɔ, tɩkaɣ-ɖʋ sɩnʋʋ nɛ ɖɩna alɩwaatʋ ndʋ tɩ-taa ɖɩwɛ Yehowa ɖʋtʋ taa yɔ.

ƐZƖMA ÐƖPƖZƖƔ ÐƖLA NƐ ÐƖTƖLƖ ALƖWAATƲ NDƲ PASƖ ƐSƆ KEWIYAƔ ƐSƆDAA YƆ?

3. Natʋ tɔm ndʋ tɩwɛ Danɩyɛɛlɩ 7:13, 14 taa yɔ, tiyeki se ɖa-taa ɛtɛmnɩ we?

³ Natʋ ndʋ tɩwɛ Danɩyɛɛlɩ 7:13, 14 taa yɔ, tɩsɩɣnɩ-ɖʋ se ɖa-taa ɛtɛ se Krɩstʋ Yesu kaɣ kɛʋ Ɛsɔ Kewiyaɣ Wiyaʋ weyi ɛmʋnaa yɔ. Ajɛɛ kpeekpe taa ɛyaa kaɣ-ɩ ‘ɖʋʋ lɩm’ nɛ taa leleŋ, nɛ nɔɔyʋ ɛɛkaɣ lɛɣzʋʋ e-lone taa. Danɩyɛɛlɩ takayaɣ taa natʋ tɔm lɛɛtʋ yɔɔdaa se alɩwaatʋ ndʋ payaɣ se wɛɛ lʋbɛ yɔ tɩtɛŋ lɛ, Yesu kaɣ paɣzʋʋ Kewiyitu tɔɔʋ. Ɛzɩ ɖɩpɩzɩɣ nɛ ɖɩtɩlɩ alɩwaatʋ ndʋ Yesu pɩsɩ Wiyaʋ yɔ?

4. Ɛzɩma Danɩyɛɛlɩ 4:7-14 sɩɣnɩ-ɖʋ se ɖɩtɩlɩ pɩnaɣ ŋga Krɩstʋ pɩsɩ Ɛsɔ Kewiyaɣ Wiyaʋ yɔ? (Kalɩ ɖɔɖɔ pɩ-tɛɛ tɔm.)

⁴ Kalɩ Danɩyɛɛlɩ 4:7-14. “Wɛɛ lʋbɛ” kɛ pɩnzɩ 2520. Pɩnzɩ nzɩ, sɩpaɣzɩ pɩnaɣ 607 P.P.Y.; alɩwaatʋ ndʋ Babilɔɔnɩ mba kʋsɩ wiyaʋ kɛdɛzaɣ ñɩnʋ Yehowa kewiyaɣ kpelaɣ yɔɔ Yeruzalɛm. Pɩnzɩ nzɩ sɩsɩ tɩnaɣ pɩnaɣ 1914 taa, nɛ alɩwaatʋ ndʋ Yehowa sɩ Yesu, “weyi ɛtɩnɩ tɔm hʋʋ yɔ” Ɛsɔ Kewiyaɣ Wiyaʋ.b—Ezek. 21:30-32.

5. Hɔɔlɩŋ weyi ɩ-taa “wɛɛ lʋbɛ” natʋ tɔm pɩzɩɣ nɛ tɩwazɩ-ɖʋ yɔ, ɩ-taa nakʋyʋ lɛ ŋgʋ?

⁵ Ɛzɩma natʋ tɔm ndʋ tɩpɩzɩɣ nɛ tɩwazɩ-ɖʋ? Ye ɖɩnɩ “wɛɛ lʋbɛ” natʋ tɔm taa yɔ, piyeki nɛ ɖa-taa tɛ se Yehowa lakɩ ɛ-tamasɩ yɔɔ alɩwaatʋ kɩbandʋ yɔɔ. Yehowa kpaɣ lɩmaɣzɩyɛ se alɩwaatʋ natʋyʋ talɩɣ lɛ, eyeki nɛ Yesu pɩsɩ Wiyaʋ. Nɛ alɩwaatʋ ndʋ tɩtalaa lɛ, Yehowa la mbʋ. Pʋyɔɔ lɛ, ɖɩnawa se ɛkaɣ yebu ɖɔɖɔ nɛ natʋ tɔm lɛɛtʋ ndʋ ɛyɔɔdaa yɔ tɩla tɩ-alɩwaatʋ yɔɔ. Ɛɛɛ, Yehowa kɩyakʋ ‘ɛɛkaɣ caɣʋ wayɩ.’—Hab. 2:3.

ƐZƖMA ÐƖLABA NƐ ÐƖNA SE KRƖSTƲ PƖSƖ ƐSƆ KEWIYAƔ WIYAƲ?

6. (a) Ɛbɛ ɖɩnaɣ tɛtʋ yɔɔ nɛ pɩwɩlɩɣ se Krɩstʋ ɖiɣni kewiyitu tɔɔʋ ɛsɔdaa? (b) Natʋ tɔm ndʋ tɩwɛ Natʋ 6:2-8 taa yɔ, ɛzɩma tɩñɩkɩɣ niye mbʋ ɖɩnaɣ yɔ pɩ-yɔɔ?

⁶ Pɩɩkazɩ pazɩ se Yesu ɛtɛ ɛ-Ɛsɔ sɛtʋ tʋmɩyɛ tɛtʋ yɔɔ lɛ, eheyi ɛ-wayɩ tɩŋɩyaa mbʋ pɩkaɣ labʋ ɛjaɖɛ yɔɔ nɛ pɩsɩnɩ-wɛ nɛ pana se ɛpaɣzɩ kewiyitu tɔɔʋ ɛsɔdaa yɔ pɩ-tɔm. Mbʋ eheyi-wɛ se pɩkaɣ labʋ yɔ pɩ-taa nabʋyʋ yɔ: Yoŋ, ñɔɔsɩ, nɛ tɛtʋ ñamsʋʋ. Ɛyɔɔdaa ɖɔɖɔ se kʋdɔmɩŋ sɔsɔŋ kaɣ lɩʋ “lona ndɩ ndɩ taa;” nɛ kʋdɔmɩŋ ɛnɩ ɩ-taa nakʋyʋ lɛ COVID-19 kʋdɔŋ. Lakasɩ nzɩ, sɩkɛ mbʋ Bibl yaɣ se Krɩstʋ wɛʋ alɩwaatʋ “yʋsaɣ” yɔ, pɩ-hɔɔlʋʋ nakʋyʋ. (Mat. 24:3, 7; Luka 21:7, 10, 11) Yesu sɩba nɛ ɛpɩsɩ ɛsɔdaa nɛ pɩcɛzɩ pɩnzɩ 60 yɔɔ lɛ, ɛtasɩ heyuu apostoloo Yohanɛɛsɩ se lakasɩ nzɩ sɩkaɣ labʋ. (Kalɩ Natʋ 6:2-8.) Lakasɩ nzɩ, sɩ-tɩŋa sɩwɛɛ nɛ sɩlakɩ kpaɣnɩ alɩwaatʋ ndʋ Yesu pɩsɩ Wiyaʋ pɩnaɣ 1914 taa yɔ.

7. Ɛbɛ yɔɔ ɛjaɖɛ yɔɔ wɛtʋ wɛɛ nɛ tɩwɛɛkɩɣ kpaɣnɩ alɩwaatʋ ndʋ Yesu pɩsɩ Wiyaʋ yɔ?

⁷ Alɩwaatʋ ndʋ Yesu pɩsɩ Wiyaʋ yɔ, ɛbɛ yɔɔ ɛjaɖɛ yɔɔ wɛtʋ wɛɛ nɛ tɩtɛzɩɣ wɛɛkʋʋ? Natʋ 6:2 heyiɣ-ɖʋ se alɩwaatʋ ndʋ Yesu pɩsɩ Wiyaʋ yɔ, pɩɩwɛɛ se ɛcalɩnɩ you nakʋyʋ labʋ. Anɩ ɛlakɩnɩ you ŋgʋ? Sataŋ nɛ ɛ-aleewaa. Ɛzɩ Natʋ 12 yɔɔdʋʋ yɔ, pawabɩ Sataŋ you ŋgʋ kɩ-taa, nɛ pɔlɔ ɛ nɛ ɛ-aleewa tɛtʋ yɔɔ. Sataŋ taa wɩ siŋŋ, nɛ ɛpaɣzɩ ɛ-pana pɩyʋʋ ɛyaa yɔɔ; nɛ pɩtɛmna se tɛtʋ sʋ kʋñɔŋ taa.—Natʋ 12:7-12.

8. Ðɩnaɣ se Kewiyaɣ yɔɔ natʋ tɔm wɛɛ nɛ tɩlakɩ lɛ, ɛzɩma pɩwazɩɣ-ɖʋ?

⁸ Ɛzɩma natʋ tɔm ndʋ tɩpɩzɩɣ nɛ tɩwazɩ-ɖʋ? Mbʋ pɩlakɩ ɛjaɖɛ yɔɔ yɔ nɛ ɛzɩma ɛyaa lakasɩ lɛɣzɩ siŋŋ yɔ, pɩsɩɣnɩ-ɖʋ se ɖɩna se Yesu pɩsɩ Wiyaʋ. Ye mbʋ, alɩwaatʋ ndʋ ɖɩnaɣ ɛyaa wɛnɩ piɖeni men-ɖeke lakasɩ nɛ palakɩ kañatʋ yɔ, mbʋ ɛzɩ pɩɩɖʋ-ɖʋ ɖɩwɩzɩyɛ lɛ, pɩwɛɛ se ɖɩtɔzɩ se pa-lakasɩ wɛɛ nɛ siyeki se Bibl taa natʋ tɔm ɛla. Kewiyaɣ pazɩ ka-tʋmɩyɛ! (Keɣa 36:1) Nɛ alɩwaatʋ ndʋ Armaagedɔɔ wɛɣ nɛ kɩñɔtʋʋ lɛ, ɖɩkaɣ naʋ se ɛjaɖɛ yɔɔ kʋñɔmɩŋ wɛɣ nɛ ɩtɛzɩɣ kpaʋ ɖoŋ. (Mark. 13:8; 2 Tim. 3:13) Ðɩwɛnɩ ɛsɩmɩyɛ siŋŋ se ɖa-Caa kʋsɔɔlʋ weyi ɛwɛ ɛsɔdaa yɔ, ɛsɩɣnɩ-ɖʋ se ɖɩnɩɩ mbʋ pʋyɔɔ kʋñɔmɩŋ sakɩyɛ wɛ ɛjaɖɛ yɔɔ yɔ pɩ-taa.

ƐZƖMA PAKAƔ ÐƖZƲƲ ƐSƆ KEWIYAƔ KOYINDINAA?

9. (a) Natʋ tɔm ndʋ tɩwɛ Danɩyɛɛlɩ 2:28, 31-35 taa yɔ, tɔm ndʋ tɩyɔɔdʋʋ ɛjaɖɛ yɔɔ kɛdɛzaɣ kewiyaɣ ɖoŋ ñɩŋga yɔɔ? (b) Nɛ ɛzɩmtaa kapaɣzɩ kewiyitu tɔɔʋ?

⁹ Kalɩ Danɩyɛɛlɩ 2:28, 31-35. Natʋ tɔm ndʋ, tɩwɛɛ nɛ tɩlakɩ sɔnɔ nɛ ɖɩnaɣ. Nabukodonozɔɔrɩ ɖoziye wɩlɩɣ mbʋ pɩkaɣ labʋ “wayɩ wayɩ wɛɛ taa yɔ,” pʋ-tɔbʋʋ se Krɩstʋ paɣzɩɣ kewiyitu tɔɔʋ wayɩ lɛ. Ɛjaɖɛ yɔɔ kɛdɛzaɣ kewiyaɣ ɖoŋ ñɩŋga ŋga kɔ-tɔm Bibl yɔɔdaa yɔ, kɛwɛ Yesu koyindinaa mba pɛwɛ tɛtʋ yɔɔ yɔ pa-taa. Nɛ kewiyaɣ ŋga, kasɩŋnɩ ‘ñɩɣyʋʋ naataŋ nɛ cʋʋ kʋhɔbʋʋ naataŋ.’ Ɛjaɖɛ yɔɔ kewiyaɣ ɖoŋ ñɩŋga ŋga, kɛtɛm paɣzʋʋ kewiyitu tɔɔʋ. Kapaɣzɩ kewiyitu tɔɔʋ Caama You Kajalaɣ ñɩŋgʋ alɩwaatʋ taa, alɩwaatʋ ndʋ Grandɩ Bretaañɩ nɛ Etaazuunii papaɣzɩ kpɛndʋʋ nɛ palakɩ tʋmɩyɛ nɔɔ kʋɖʋmaɣ taa yɔ. Ðoziye nɖɩ ɖɩ-taa Nabukodonozɔɔrɩ na sɩʋ kpeliɣa yɔ, ɖɩyɔɔdɩ ɛjaɖɛ yɔɔ kewiyaɣ ɖoŋ ñɩŋga ŋga kɛ-wɛtʋ naalɛ tɔm; nɛ tɩkaɣ yebu se kɛwɛɛ ndɩ nɛ kewiyisi nzɩ sɩlɛyɩ-kɛ wɛʋ yɔ.

10. (a) Wɛtʋ ndʋ ɖɩnaɣ Aŋglo-Amerika kewiyaɣ taa sɔnɔ nɛ Danɩyɛɛlɩ takayaɣ taa natʋ kaayɔɔdɩ tɩ-tɔm? (b) Pɩpɔzʋʋ se ɖɩkpa ɖa-tɩ nɛ ɖɩtaatɔlɩ kpaca ŋgʋ taa? (Kalɩ aɖakaɣ “Kpa ña-tɩ nɛ cʋʋ!”)

¹⁰ Kajalaɣ lɛ, Aŋglo-Amerika kewiyaɣ wɛ ndɩ nɛ kewiyisi nzɩ sɩlɛyɩ-kɛ wɛʋ yɔ; nɛ pɔyɔɔdɩ sɩ-tɔm natʋ ndʋ tɩ-taa. Kewiyaɣ ŋga, katɩsɩŋnɩ ñɩɣtʋ ndʋ tɩwɛ ɖoŋ ɛzɩ sika nɛ liidiye yɔ, ɛlɛ kasɩŋnɩ ñɩɣyʋʋ ŋgʋ kisidini cʋʋ yɔ. Cʋʋ sɩŋnɩ “ɛyʋtʋ ɖomaɣ” yaa samaɣ taa ɛyaa. (Dan. 2:43) Ɛzɩ ɖɩnaʋ sɔnɔ kpayɩ kpayɩ yɔ, ɛyaa samaɣ wɛnɩ ɖoŋ caca tɔʋ yɔɔ, ɛyʋ wala yɔɔ kandɩyʋʋ agbaa yɔɔ, ɛzɩma ɛyaa sakɩyɛ lɩɣ nɛ pɔɖɔŋ se pakaɖɩnɩ komina yɔ pɩ-yɔɔ, nɛ tʋmlaɖaa agbaa yeba nɛ ɛjaɖɛ yɔɔ kewiyaɣ ŋga kaapɩzɩɣ nɛ kalakɩnɩ ko-ɖoŋ tʋmɩyɛ ɛzɩ kɔsɔɔlʋʋ yɔ.

11. Ɛzɩma Aŋglo-Amerika kewiyaɣ ɖiɣni kewiyitu tɔɔʋ yɔ, piyeki se ɖa-taa ɛtɛ se ɖɩwɛ ɛjaɖɛ tɛm alɩwaatʋ taa. Ɛbɛ yɔɔ?

¹¹ Nabʋlɛ lɛ, Aŋglo-Amerika kewiyaɣ sɩŋnɩ sɩʋ kpelaɣ sɔsɔɔ ŋga ka-nɩŋgbanzɩ, nɛ ŋga kɛnɩ ɛjaɖɛ yɔɔ kɛdɛzaɣ kewiyaɣ ŋga kɔ-tɔm Bibl yɔɔdaa yɔ. Ɛyaa kewiyaɣ nakɛyɛ ɛɛkaɣ tɩŋʋʋ kewiyaɣ ŋga ka-wayɩ. Ɛlɛ Ɛsɔ Kewiyaɣ kaɣ ka nɛ kewiyisi lɛɛsɩ tɩŋa ɖɩzʋʋ Armaagedɔɔ you taa.c—Natʋ 16:13, 14, 16; 19:19, 20.

12. Tɔm ndʋ ɖɔɖɔ Danɩyɛɛlɩ natʋ tɔm yɔɔdaa nɛ tɩhɛzɩɣ ɖa-laŋa nɛ tɩhaɣ-ɖʋ lidaʋ?

¹² Ɛzɩma natʋ tɔm ndʋ tɩpɩzɩɣ nɛ tɩwazɩ-ɖʋ? Danɩyɛɛlɩ natʋ tɔm sɩɣnɩ-ɖʋ se ɖɩtɩlɩ kpayɩ kpayɩ nɛ pɩkɩlɩ se ɖɩwɛ ɛjaɖɛ tɛm alɩwaatʋ taa. Pɩcɛzɩɣ pɩnzɩ 2500 yɔ, Danɩyɛɛlɩ kaayɔɔdaa se Babilɔɔnɩ kewiyaɣ wayɩ lɛ, ɛjaɖɛ yɔɔ kewiyisi naanza lɛɛsɩ kaɣ wɛnʋʋ ɖoŋ Ɛsɔ samaɣ yɔɔ. Pɩtasɩ lɛ, ɛyɔɔdaa se Aŋglo-Amerika kewiyaɣ kaɣnɩ kɛʋ kewiyisi nzɩ sɩ-taa kɛdɛzaɣ ñɩŋga. Tɔm ndʋ tɩhɛzɩɣ ɖa-laŋa nɛ tɩhaɣ-ɖʋ lidaʋ se pɩkazɩ pazɩ lɛ, Ɛsɔ Kewiyaɣ kaɣ ɖɩzʋʋ ɛyaa kominawaa tɩŋa nɛ kɔtɔɔ kewiyitu tɛtʋ kpeekpe yɔɔ.—Dan. 2:44.

13. (a) Ɛbɛ “wiyaʋ lutozo ñɩnʋ” nɛ “awiya hiu,” mba pɔ-tɔm pɔyɔɔdɩ Natʋ 17:9-12 taa yɔ pasɩŋnaa? (b) Nɛ ɛzɩma natʋ tɔm ndʋ tɩlaba?

¹³ Kalɩ Natʋ 17:9-12. Caama You kajalaɣ ñɩŋgʋ kɔnɩ asɛyʋʋ sɔsɔʋ, nɛ kiyeba nɛ Bibl taa natʋ lɛɛtʋ la. Natʋ ndʋ tɩyɔɔdʋʋ kɛdɛzaɣ kɩyakɩŋ tɔm ɖɔɖɔ. Ɛjaɖɛ yɔɔ ñʋndɩnaa kaasɔɔlaa se pala nɛ laŋhɛzɩyɛ wɛɛ ɛjaɖɛ kpeekpe yɔɔ. Pʋyɔɔ janvier 1920 taa palɩzɩ Ajɛɛ Kɩkpɛndʋʋ Ɛgbɛyɛ nɖɩ payaɣ se SDN yɔ, nɛ pʋwayɩ octobre 1945 taa lɛ pɛlɛɣzɩ-ɖɩ nɛ Ajɛɛ Kɩkpɛndʋʋ Ɛgbɛyɛ nɖɩ payaɣ se ONU yɔ. Ɛgbɛyɛ nɖɩ, paya-ɖɩ se “wiyaʋ lutozo ñɩnʋ.” Ɛlɛ ɖɩtɩkɛ ɛjaɖɛ yɔɔ kewiyaɣ nakɛyɛ. Ði-ɖoŋ lɩɣnɩ kominawaa mba paɖʋʋ-ɖɩ nesi yɔ pɔ-cɔlɔ. Bibl yaɣ kominawaa mba se “awiya hiu.”

14-15. (a) Tɔm ndʋ Natʋ 17:3-5 heyiɣ-ɖʋ pɩlɩɩnɩ “Babilɔɔnɩ Sɔsɔʋ” yɔɔ? (b) Ɛyaa mba paɖʋʋ nesi cɛtɩm Ɛsɔ sɛtʋ agbaa yɔ, ɛbɛ pɛwɛɛ nɛ palakɩ?

¹⁴ Kalɩ Natʋ 17:3-5. Ɛsɔ wɩlɩ natʋ natʋyʋ apostoloo Yohanɛɛsɩ. Nɛ natʋ ndʋ tɩ-taa, ɛna halʋ tɩ pɛdɩyʋ nɔɔyʋ payaɣ-ɩ se “Babilɔɔnɩ Sɔsɔʋ.” Babilɔɔnɩ Sɔsɔʋ sɩŋnɩ ɛjaɖɛ kpeekpe yɔɔ cɛtɩm Ɛsɔ sɛtʋ agbaa. Ɛzɩma natʋ tɔm ndʋ tɩlaba? Pɩlakɩ alɩwaatʋ sakɩyɛ yɔ, cɛtɩm Ɛsɔ sɛtʋ agbaa labɩ nɔɔ nɛ ɛjaɖɛ yɔɔ kominawaa nɛ aɖʋʋ-wɛ nesi. Ɛlɛ pɩkazɩ pazɩ lɛ, Yehowa kaɣ ɖʋʋ kominawaa mba pa-laŋa taa se “pala ɛ-lɩmaɣzɩyɛ yɔɔ.” Ɛbɛ kaɣ lɩʋ pɩ-taa? Kominawaa mba, pʋ-tɔbʋʋ se “awiya hiu” ana, akaɣ kʋyʋʋ cɛtɩm Ɛsɔ sɛtʋ agbaa yɔɔ nɛ aɖɩzɩ-yɛ.—Natʋ 17:1, 2, 16, 17.

¹⁵ Ɛzɩma ɖɩlaba nɛ ɖɩna se “Babilɔɔnɩ Sɔsɔʋ” ɖɩzʋʋ alɩwaatʋ ñɔtaa? Pɩsa nɛ ɖicosi tɔm ndʋ tɩ-yɔɔ lɛ, pɩwɛɣ ɖeu se ɖɩtɔzɩ se mbʋ pɩkandɩyaɣ caanaʋ taa Babilɔɔnɩ tɛtʋ yɔɔ yɔ pɩ-taa nabʋyʋ lɛ Efraatɩ Pɔɔ sɔsɔɔ taa lɩm. Natʋ takayaɣ kpaɣ ɛyaa miiliyɔɔwaa mba patɩnɩɣ Babilɔɔnɩ Sɔsɔʋ yɔɔ yɔ nɛ kamaɣzɩnɩ “lɩm” mbʋ pɩkandɩyɩɣ kɩ-yɔɔ yɔ. (Natʋ 17:15) Ɛlɛ keheyiɣ-ɖʋ ɖɔɖɔ se ‘lɩm mbʋ pɩkaɣ sɔʋ,’ nɛ pɩwɩlɩɣ se ɛjaɖɛ yɔɔ cɛtɩm Ɛsɔ sɛtʋ agbaa kaɣ lesuu ɛyaa mba patɩnɩɣ a-yɔɔ yɔ pa-taa sakɩyɛ. (Natʋ 16:12) Sɔnɔ, natʋ tɔm ndʋ tɩwɛɛ nɛ tɩlakɩ, mbʋ pʋyɔɔ yɔ ɛyaa sakɩyɛ kizi cɛtɩm Ɛsɔ sɛtʋ agbaa nɛ pañɩnɩɣ ɛzɩma pɔcɔnɩ pa-kʋñɔmɩŋ ɖeɖe yɔ ɖoŋlɛɛɖɛ.

16. (a) Natʋ tɔm ndʋ tɩyɔɔdʋʋ alɩwaatʋ ndʋ palɩzɩ ONU nɛ ɛzɩma ɛyaa sakɩyɛ ɩɩtasɩɣ ɖʋʋ nesi cɛtɩm Ɛsɔ sɛtʋ agbaa yɔ, tɩwɩlɩɣ suwe? (b) Nɛ ɛbɛ yɔɔ tɩhɛzɩɣ ɖa-laŋa?

¹⁶ Ɛzɩma natʋ tɔm ndʋ tɩpɩzɩɣ nɛ tɩwazɩ-ɖʋ? Ɛzɩma palɩzɩ Ajɛɛ Kɩkpɛndʋʋ Ɛgbɛyɛ nɖɩ payaɣ se ONU yɔ, nɛ ɛzɩma ɛyaa sakɩyɛ ɩɩtasɩɣ ɖʋʋ nesi cɛtɩm Ɛsɔ sɛtʋ agbaa yɔ, pɩwɩlɩɣ se ɖɩwɛ kɛdɛzaɣ kɩyakɩŋ taa. Paa ɛyaa sakɩyɛ ɩɩtasɩɣ ɖʋʋ nesi Babilɔɔnɩ Sɔsɔʋ yɔ, pɩtɩkɛ mbʋ kaɣnɩ ɖɩzʋʋ cɛtɩm Ɛsɔ sɛtʋ agbaa. Ɛzɩ ɖɩnaʋ nɛ pɩɖɛɛ yɔ, Yehowa kaɣ ɖʋʋ “awiya hiu” laŋa taa, pʋ-tɔbʋʋ se kominawaa mba paɖʋʋ nesi ONU yɔ, se “pala ɛ-lɩmaɣzɩyɛ yɔɔ.” Kominawaa mba, pakaɣ ɖɩzʋʋ Babilɔɔnɩ Sɔsɔʋ tuda, nɛ pɩkaɣ ɖɩɣzʋʋ ɛjaɖɛ kpeekpe.d (Natʋ 18:8-10) Babilɔɔnɩ Sɔsɔʋ ɖɩzʋʋ kaɣ ñamsʋʋ ɛjaɖɛ kpeekpe nɛ pɩpɩzɩɣ nɛ pɩkɔnɩ kʋñɔmɩŋ; ɛlɛ lɩmaɣza naalɛ yɔɔ lɛ, Ɛsɔ samaɣ taa kaɣ labʋ leleŋ. Cɛtɩm Ɛsɔ sɛtʋ kɛ Yehowa koyindu nɛ tɩɩkaɣ tasʋʋ wɛʋ kaaʋ; nɛ pɩkazɩ pazɩ lɛ, pakaɣ ɖa-ñʋʋ yabʋ ɛjaɖɛ kɩdɛkɛdɩyɛ ɖɩnɛ ɖɩ-taa!—Luka 21:28.

WƐƐNƖ TISUU SE YEHOWA KAƔ KANDƖYƲƲ Ɛ-SAMAƔ YƆƆ CEE WAYƖ

17-18. (a) Ɛzɩma ɖɩpɩzɩɣ nɛ ɖiwolo pɩ-yɔɔ nɛ ɖɩcɛyɩsɩɣ ɖe-tisuu? (b) Ɛbɛ taa ɖɩkaɣ tazʋʋ tɔm ñʋʋ ŋgʋ kɩkɔŋ yɔ kɩ-taa?

¹⁷ Danɩyɛɛlɩ yɔɔdaa se toovenim “sɩmtʋ kaɣ tɔyʋʋ.” Nɛ toovenim taa lɛ, tɩtɔyaa! Sɔnɔ, natʋ ndʋ tɩyɔɔdʋʋ ɖa-alɩwaatʋ tɔm yɔ, ɖɩnɩɣ tɩ-taa. (Dan. 12:4, 9, 10) Natʋ tɔm ndʋ tɩkɛ toovenim, mbʋ yebina nɛ ɖɩwɛɛnɩ ñamtʋ Yehowa nɛ ɛ-Tɔm yɔɔ nɛ pɩkɩlɩ. (Iza. 46:10; 55:11) Ye mbʋ, wolo pɩ-yɔɔ nɛ ŋkpɛlɩkɩɣ Bibl nɛ ŋsɩɣnɩ lalaa se pañaɣ pana nɛ taabalɩyɛ kɩbanɖɛ wɛɛ pa nɛ Yehowa pɛ-hɛkʋ taa. Ye ŋlakɩ mbʋ yɔ, ŋcɛyɩsɩɣ ñe-tisuu. Yehowa kaɣ kandɩyʋʋ mba pataɣ-ɩ liu kiya yɔ pɔ-yɔɔ, nɛ ɛkaɣ-wɛ “haʋ laŋhɛzɩyɛ” nɖɩ ɖɩwɛɣ tam yɔ.—Iza. 26:3.

¹⁸ Tɔm ñʋʋ ŋgʋ kɩkɔŋ yɔ kɩ-taa, ɖɩkaɣ tazʋʋ natʋ tɔm ndʋ titukuuni Krɩstʋ ɛgbɛyɛ kɛdɛzaɣ alɩwaatʋ taa yɔ tɩ-taa. Ɛzɩ ɖɩkɔŋʋʋ kpɛlɩkʋʋ yɔ, natʋ tɔm ndʋ tɩwɩlɩɣ ɖɔɖɔ se ɖɩwɛ kɛdɛzaɣ kɩyakɩŋ taa. Ðɩkaɣ naʋ mbʋ pɩtasɩɣ wɩlʋʋ kpayɩ kpayɩ se Yesu, weyi ɛkɛ ɖe-Wiyaʋ lɛɛlɛɛyɔ yɔ, ɛwɛɛ nɛ eɖiyiɣ ɛ-wayɩ tɩŋɩyaa siɣsiɣ tɩnaa yɔ.