‘Wɛɛ nɛ ŋɖɔŋ toovenim taa’

1. Alɩwaatʋ ndʋ ɖɩyɔɔdʋʋ ɛzɩma pɩɖɔma nɛ ɖɩtɩlɩ «toovenim» yɔ pɩ-tɔm yɔ, ɛzɩma pɩwazɩɣ-ɖʋ?

«ƐZƖMA pɩɖɔma nɛ ŋtɩlɩ toovenim?» Pɩtʋʋ fɛyɩ se ŋtɛm cosuu tɔm pɔzʋʋ mbʋ pɩ-yɔɔ tam sakɩyɛ. Alɩwaatʋ ndʋ ɖɩsɔɔlʋʋ se ɖɩtɩlɩ ɖo-koobu nɔɔyʋ nɛ pɩkɩlɩ yɔ, tɔm ndʋ ɖɩcalɩɣ-ɩ pɔzʋʋ yɔ tɩ-taa natʋyʋ lɛ. Ðɩsɔɔlaa se ɖo-koobiya ɩkɛdɩ-ɖʋ ɛzɩma pɩɖɔma nɛ patɩlɩ Yehowa nɛ pɔsɔɔlɩ-ɩ yɔ; nɛ ɖa-taa lakɩ leleŋ ɖɔɖɔ se ɖɩkɛdɩ-wɛ mbʋ pʋyɔɔ ɖa-taa wɛ leleŋ se ɖɩkɛ Yehowa Aseɣɖe Tʋ yɔ pɩ-tɔm. (Roma 1:11) Alɩwaatʋ ndʋ ɖa nɛ wɛ ɖɩlakɩ kɛdɛsɩ nzɩ yɔ, mbʋ pɩlɩɣ pɩ-taa yɔ lɛ se pɩtɔzʋʋ-ɖʋ se toovenim mʋ ñɩm siŋŋ. Pɩtasɩ lɛ, piyeki se ɖɩtɛ ɖa-taa nɛ pɩkɩlɩ se ‘ɖiwoki pɩ-yɔɔ nɛ ɖɩɖɔŋ toovenim taa,’ pʋ-tɔbʋʋ lɛ se ɖiwoki pɩ-yɔɔ nɛ ɖɩcakɩ wezuu ŋgʋ kiyeki se ɖɔ-tɔm ɛkɛdɩnɩ Yehowa nɛ ɛwazɩ-ɖʋ yɔ.—3 Yoh. 4.

2. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

² Tɔm ñʋʋ kʋnɛ kɩ-taa, ɖɩkaɣ naʋ lɩmaɣza wena a-yɔɔ ɖɩsɔɔlɩ toovenim yɔ a-taa naayɛ. Pʋwayɩ lɛ, ɖɩkaɣ naʋ ɛzɩma ɖɩpɩzɩɣ ɖiwolo pɩ-yɔɔ nɛ ɖɩwɩlɩɣ se ɖɩsɔɔlɩ kʋjɔʋ ŋgʋ yɔ; kʋjɔʋ ŋgʋ kɩmʋ ñɩm. Pɩtʋʋ fɛyɩ se tɔm ndʋ tɩ-taa ɖɩkaɣ tazʋʋ yɔ, tɩkaɣ yebu nɛ ɖɩwɛɛnɩ ɛsɩmɩyɛ nɛ pɩkɩlɩ mbʋ pʋyɔɔ yɔ Yehowa hɔm-ɖʋ nɛ ɛkɔnɩ toovenim taa. (Yoh. 6:44) Tɩkaɣ-ɖʋ sɩnʋʋ ɖɔɖɔ nɛ ɖɩtɛ ɖa-taa nɛ pɩkɩlɩ se ɖɩwɩlɩɣ Bibl taa toovenim tɔm ɛyaa lalaa.

MBƲ PƲYƆƆ ÐƖSƆƆLƖ TOOVENIM YƆ

3. Lɩmaɣza wena a-yɔɔ ɖɩsɔɔlɩ toovenim yɔ, a-taa sɔsɔɖɛ lɛ nɖɩ?

³ Lɩmaɣza sakɩyɛ yɔɔ ɖɩsɔɔlɩ toovenim. Lɩmaɣza ana a-taa sɔsɔɖɛ lɛ se ɖɩsɔɔlɩ Yehowa Ɛsɔ; ɛ-cɔlɔ toovenim lɩnaa. Pɩtɩŋnɩ ɛ-Tɔm Bibl yɔɔ lɛ, ɖɩkɔm nɛ ɖɩtɩlɩ se ɛnʋ kɛnɩ ɛsɔdaa nɛ tɛtʋ pa-Lɩzɩyʋ nɛ ɛnʋ kpaɖɩnɩ ɖoŋ; nɛ ɖɩkɔm nɛ ɖɩtɩlɩ ɖɔɖɔ se ɛkɛ ɖa-Caa kʋsɔɔlʋ weyi ɛwɛ ɛsɔdaa yɔ nɛ ɛcɔŋnɩ ɖɔ-yɔɔ nɛ sɔɔlɩm. (1 Pɩy. 5:7) Ðɩnawa se ɖɛ-Ɛsɔ kɛ «pʋtɔdɩyɛ nayʋ nɛ hɛndɩyʋ, suuɖu tʋ nɛ pʋtɔdɩyɛ tʋ nɛ tʋtʋyɛ tʋ.» (Ejl. 34:6) Yehowa sɔɔlɩ siɣsiɣ wɛtʋ. (Iza. 61:8) Ɛnaɣ-ɖʋ ɖɩwɛɛ nɛ ɖɩtɔkɩ kʋñɔŋ lɛ, pɩhaɣ-ɩ laŋwɛɛkɩyɛ; nɛ ɛsɔɔlaa, ɛɛɛ ɛɖaŋ kpam se alɩwaatʋ ndʋ ɛɖʋwa yɔ tɩtalɩ nɛ eyele nɛ kʋñɔmɩŋ tɩŋa sɩɩ tɩnaɣ. (Yer. 29:11) Ða ɖɔɖɔ ɖɩɖaŋ alɩwaatʋ kɩbandʋ ndʋ kpam! Lɩmaɣza wena a-yɔɔ ɖɩsɔɔlɩ Yehowa siŋŋ yɔ a-taa naɖɩyɛ lɛ!

4-5. Ɛbɛ yɔɔ apostoloo Pɔɔlɩ kpaɣ ɖe-lidaʋ nɛ ɛmaɣzɩnɩ mɛlɛ kolaɣ?

⁴ Lɩmaɣzɩyɛ lɛɛɖɛ nɖɩ yɔɔ ɖɩsɔɔlɩ toovenim? Toovenim wazɩɣ-ɖʋ siŋŋ. Iyele nɛ ɖɩna kɩɖaʋ nakʋyʋ. Bibl taa toovenim tɔm natʋyʋ lɛ lidaʋ ŋgʋ ɖɩwɛnɩ cee wayɩ yɔɔ yɔ. Apostoloo Pɔɔlɩ tɩŋnɩ kɩɖaʋ nakʋyʋ yɔɔ nɛ ɛwɩlɩ se lidaʋ ŋgʋ kɩmʋ ñɩm. Ɛmawa se: «Ðe-lidaʋ ŋgʋ, kɩwɛ ɛzɩ mɛlɛ kolaɣ ŋga kɔɖɔkʋʋ kalɩzaɣ yɔ, pɩtʋʋ fɛyɩ lidaʋ ŋgʋ kɩ-yɔɔ nɛ kɩkam camɩyɛ.» (Ebr. 6:19) Mɛlɛ kolaɣ sɩɣnɩ mɛlɛ se kɩsɩŋ yiɣ yiɣ, mbʋ ɖɔɖɔ lidaʋ ŋgʋ Bibl haɣ-ɖʋ yɔ kɩpɩzɩɣ kɩsɩnɩ-ɖʋ nɛ ɖa-lɩmaɣza wɛɛ a-ɖeɖe alɩwaatʋ ndʋ ɖɩkatɩɣ kala yɔ.

⁵ Hɔɔlʋʋ ŋgʋ kɩ-taa lɛ, Pɔɔlɩ kaawɛɛ nɛ ɛyɔɔdʋʋ lidaʋ ŋgʋ Krɩstʋ mba patam numwaa wɛna se pakaɣ kpaʋ ɛsɔdaa yɔ kɩ-tɔm, nɛ lidaʋ ŋgʋ kɩmʋ ñɩm pɛ-ɛsɩndaa. Ɛlɛ tɔm ndʋ ɛyɔɔdaa yɔ, titukuuni ɖɔɖɔ Krɩstʋ ñɩma mba paɖaŋ kpam se pakaɣ caɣʋ wezuu paradisuu taa tɛtʋ yɔɔ tam yɔ. (Yoh. 3:16) Pɩtʋʋ fɛyɩ se ɖɩkpɛlɩkaa nɛ ɖɩtɩlɩ se ɖɩwɛnɩ lidaʋ se ɖɩkaɣ caɣʋ wezuu maatɛŋ lɛ, piyeba nɛ ɖe-wezuu caɣʋ wɛɛnɩ tɔbʋʋ nɩʋ.

6-7. Yvonne kpɛlɩkaa nɛ ɛtɩlɩ toovenim tɔm ndʋ titukuuni cee wayɩ yɔ lɛ, ɛzɩma pɩwazɩ-ɩ?

⁶ Iyele nɛ ɖɩna koobu halɩñɩnʋ nɔɔyʋ kɩɖaʋ; payaɣ-ɩ se Yvonne. Ɛ-lʋlɩyaa taakɛ Yehowa Aseɣɖe Tɩnaa. Ɛɛkɛ pɩɣa lɛ eseɣaɣ sɩm sɔɔndʋ. Ɛtɔzʋʋ se ɛɛkalɩ tɔm natʋyʋ nɛ ɛɛsɔʋ tɩ-yɔɔ kpa. Ndʋ yɔ: «Wiɖiyi ɖoo kaɣ yuu nɛ tɛʋ eefeŋ-ɖʋ.» Yvonne yɔɔdaa se: «Tɔm ndʋ tiitukuni-m siŋŋ nɛ tiiyeba nɛ mantiɖoo ɖoo ana. Maawɛɛ nɛ mamaɣzɩɣ cee wayɩ yɔɔ. Mamaɣzaɣ man-taa se: “Pɩtʋʋ fɛyɩ se nabʋyʋ yɔɔ ɛyʋ wɛ wezuu.” Mɔnpɔzaɣ man-tɩ ɖɔɖɔ se: “Ɛbɛ yɔɔ mɛwɛ wezuu?” Mantaasɔɔlɩ se mansɩ!»

⁷ Pʋwayɩ, Yvonne kɔm nɛ ɛkɛ pɩɣa peleɣa lɛ ɛkatɩ Yehowa Aseɣɖe Tɩnaa. Ɛkɛdaa se: «Manpaɣzɩ wɛnʋʋ lidaʋ se mankaɣ caɣʋ wezuu maatɛŋ paradisuu taa tɛtʋ yɔɔ.» Ðo-koobu halɩñɩnʋ ɛnʋ ɛtɩlɩ toovenim lɛ, ɛzɩma pɩwazɩ-ɩ? Ɛtasɩ yɔɔdʋʋ se: «Lɛɛlɛɛyɔ maatasɩɣ caɣʋ nɛ mɛ-ɛsa ɖoo taa, sɔɔndʋ ɛɛkpaɣ-m nɛ sɩm nɛ maanɩɣzɩɣ cee yɔɔ.» Pɩnaɣ kpayɩ kpayɩ se Yvonne sɔɔlɩ Bibl taa toovenim tɔm, nɛ ɛ-taa wɛ leleŋ siŋŋ nɛ eheyiɣ ɛyaa lalaa lidaʋ ŋgʋ ɛwɛnɩ cee wayɩ yɔɔ yɔ kɩ-tɔm.—1 Tim. 4:16.

8-9. (a) Abalʋ weyi ɛ-tɔm Yesu yɔɔdɩ e-eduuye naɖɩyɛ taa yɔ ɛlɩ ñɩm nabʋyʋ yɔɔ lɛ, ɛzɩma ɛwɩlaa se pɩmʋ ñɩm siŋŋ ɛ-ɛsɩndaa? (b) Ɛzɩma tɩyɛ toovenim mʋ ñɩm ñɛ-ɛsɩndaa?

⁸ Bibl taa toovenim tɔm lɛɛtʋ lɛ Ɛsɔ Kewiyaɣ yɔɔ tɔm kɩbandʋ. Yesu kpaɣ Kewiyaɣ ŋga kɔ-yɔɔ tɔm kɩbandʋ nɛ ɛmaɣzɩnɩ ñɩm mbʋ pɛmɛsaa yɔ. Yesu yɔɔdɩ Maatiyee 13:44 taa se: «Ɛsɔdaa Kewiyaɣ wɛ ɛzɩ ñɩm nabʋyʋ, mbʋ pɛmɛsɩ-pʋ hayɩm taa nɛ abalʋ nɔɔyʋ lɩɩ pɩ-yɔɔ nɛ ɛmɛsɩ-pʋ yɔ; nɛ ɛzɩma ɛ-taa kaalabɩ leleŋ yɔ pʋyɔɔ lɛ, ewolo nɛ ɛpɛdɩ mbʋ payɩ ɛwɛna yɔ nɛ ɛya hayɩm mbʋ.» Tɔzɩ se abalʋ ɛnʋ ɛtaawɛɛ nɛ ɛñɩnɩɣ ñɩm mbʋ. Ɛlɛ, alɩwaatʋ ndʋ ɛlɩ pɩ-yɔɔ yɔ, ɛla kɩlaŋ sɔsɔŋ se ɛwɛɛnɩ-pʋ. Toovenim taa lɛ, ɛpɛdɩ mbʋ payɩ ɛɛwɛna yɔ. Ɛbɛ yɔɔ? Mbʋ pʋyɔɔ yɔ, eeɖiɣzinaa se ñɩm mbʋ pɩ-yɔɔ ɛlɩwa yɔ, pɩmʋ ñɩm siŋŋ. Pɩmʋ ñɩm siŋŋ nɛ pɩkpaɖɩ mbʋ payɩ pɩɩpɔzaa se ɛha siɣye yɔ.

⁹ Ña ɖɔɖɔ lɩmaɣza ana ŋwɛnɩ toovenim yɔɔ? Pɩtʋʋ fɛyɩ se lɩmaɣza ana ŋwɛna! Ðɩnawa se mbʋ payɩ ɛjaɖɛ ɖɩnɛ ɖɩwɛna se ɖɩhaɣ-ɖʋ yɔ, paapɩzɩɣ nɛ pakpaɣ pɩ-taa nabʋyʋ nɛ pamaɣzɩnɩ taa leleŋ weyi ɖihikiɣ Yehowa sɛtʋ taa sɔnɔ nɛ lidaʋ ŋgʋ ɖɩwɛna se ɖɩkaɣ caɣʋ wezuu maatɛŋ Ɛsɔ Kewiyaɣ tɛɛ cee wayɩ yɔ. Ðɩwɛnɩ waɖɛ nɛ taabalɩyɛ kɩbanɖɛ wɛɛ ɖa nɛ Yehowa ɖɛ-hɛkʋ taa, nɛ taabalɩyɛ nɖɩ ɖɩmʋ ñɩm siŋŋ nɛ pɩkpaɖɩ kɩlaŋ weyi pɩpɔzʋʋ se ɖɩlaa yɔ. Mbʋ pɩhaɣ-ɖʋ taa leleŋ nɛ pɩkɩlɩ yɔ, mbʋ lɛ se ɖiyele nɛ ‘ɖɔ-tɔm kɛdɩnɩ-ɩ pɩtɩŋa pɩ-taa.’—Kol. 1:10.

10-11. Ɛbɛ seɣti Michael nɛ ɛla lɛɣzɩtʋ sɔsɔtʋ e-wezuu caɣʋ taa?

¹⁰ Ða-taa sakɩyɛ la kɩlaŋ sɔsɔŋ se pɩsa nɛ pɔ-tɔm kɛdɩnɩ Yehowa. Ða-taa nabɛyɛ ha siɣye ɛjaɖɛ ɖɩnɛ ɖɩ-taa tomnaɣ yɔɔ tʋma sɔsɔna. Lalaa ñeyebi ñɩm ñɩnʋʋ kadadayaɣ. Lalaa lɛ, alɩwaatʋ ndʋ pɛkpɛlɩkɩ Yehowa yɔɔ tɔm yɔ, pɛlɛɣzɩ pe-wezuu caɣʋ kiya. Mbʋ Michael laba. Ɛ-lʋlɩyaa taakɛ Aseɣɖe Tɩnaa. Alɩwaatʋ ndʋ ɛɛkɛ pɩɣa evelaɣ yɔ, pafalɩsɩ-ɩ se ɛtɩlɩ karatee tɔʋ. Ɛyɔɔdaa se: «Mɛ-ɛsɩndaa lɛ, pɩɩcɛyɩ siŋŋ se mañaɣ pana nɛ mɛwɛɛnɩ tomnaɣ taa kpeetaɣ camɩyɛ tam. Nabʋyʋ taa, mamaɣzaɣ se nɔɔyʋ ɛɛpɩzɩɣ nɛ ɛwabɩ-m.» Ɛlɛ, alɩwaatʋ ndʋ Michael paɣzɩ Bibl kpɛlɩkʋʋ yɔ, ɛkɔm nɛ ɛtɩlɩ lɩmaɣza wena Yehowa wɛnɩ puuyaɣ lakasɩ yɔɔ yɔ. (Keɣa 10:5) Michael yɔɔdɩ koobu weyi ɛ nɛ ɛ-halʋ pɛkpɛlɩkɩnɩ-ɩ Bibl yɔ pɔ-tɔm se: «Wiɖiyi patiheyi-m kpa se pɩpɔzʋʋ se meyele karatee tɔʋ; paawobi pɩ-yɔɔ nɛ pawɩlɩɣ-m Bibl taa toovenim tɔm na.»

¹¹ Michael wɛɛ nɛ ɛkpɛlɩkɩɣ Yehowa yɔɔ tɔm nɛ pɩkɩlɩɣ lɛ, ɛkɔɔ nɛ ɛsɔɔlɩ-ɩ ɖɔɖɔ nɛ pɩkɩlɩ. Kɔzɩ kɔzɩ lɛ, ɛzɩma Yehowa nɩɣ ɛ-sɛyaa siziŋ yɔ, pitukuni Michael laŋɩyɛ. Alɩwaatʋ natʋyʋ wayɩ lɛ, Michael ɖiɣzina se pɩpɔzʋʋ se ɛlɛɣzɩ e-wezuu caɣʋ. Ɛyɔɔdaa se: «Maanawa se mbʋ pi-yebu kaɣ-m labʋ kaɖɛ nɛ pɩkɩlɩ yɔ lɛ karatee tɔʋ. Ɛlɛ, maanawa ɖɔɖɔ se ye meyebi katatee tɔʋ yɔ, pɩkaɣ kɛdɩnʋʋ Yehowa, nɛ man-taa kaatɛma se ɛ-sɛtʋ mʋ ñɩm siŋŋ nɛ pɩkpaɖɩ paa kɩlaʋ ŋgʋ.» Michael kaaɖiɣzinaa se toovenim mbʋ ɛtɩlaa yɔ pɩmʋ ñɩm siŋŋ, nɛ mbʋ seɣtini-i nɛ ɛla lɛɣzɩtʋ sɔsɔtʋ e-wezuu caɣʋ taa.—Yak. 1:25.

12-13. Ɛzɩma Bibl taa toovenim tɔm ñandɩ Mayli nʋmɔʋ taa?

¹² Pɩsa nɛ Bibl ñɩɣ niye ɛzɩma toovenim mʋ ñɩm yɔ pɩ-yɔɔ lɛ, kɩkpaɣ toovenim mbʋ nɛ kɩmaɣzɩnɩ kanɖʋ ŋgʋ kɩñandɩɣ cɩkpɛndʋʋ taa yɔ. (Keɣa 118:105; Efɛz. 5:8) Mayli lɩnɩ Azɛrbayiijaŋ. Ɛwɛnɩ ɛsɩmɩyɛ siŋŋ ɛzɩma Ɛsɔtɔm ñandɩ ɛ-nʋmɔʋ taa yɔ pɩ-yɔɔ. Hɔʋ ŋgʋ kɩ-taa ɛcaɣaa nɛ ɛpaɣlɩ yɔ kɩ-taa mba taawɛɛ Ɛsɔ sɛtʋ ɛgbɛyɛ kʋɖʋmɖɩyɛ taa. Ɛ-caa kaakɛ Malʋʋ nɛ e-ɖoo ñaakɛ Yuuda tʋ. Ɛyɔɔdaa se: «Wiɖiyi mantɩpɩtɩ se Ɛsɔ wɛɛ, paa mbʋ yɔ mɔnpɔzaɣ man-tɩ tɔm sakɩyɛ. Mɔnpɔzaɣ man-tɩ se: “Ɛbɛ yɔɔ Ɛsɔ lɩzɩ ɛyaa, nɛ ɛbɛ yɔɔ pɩpɔzʋʋ se ɛyʋ ɛtɔɔ kʋñɔŋ e-wezuu caɣʋ kpeekpe nɛ pʋwayɩ lɛ, patasɩ-ɩ wɩlʋʋ kʋñɔŋ miŋ taa tam.” Ɛyaa yɔɔdʋʋ se mbʋ payɩ pɩlakɩ yɔ pɩkɛ Ɛsɔ sɔɔlɩm pʋyɔɔ lɛ, mɔnpɔzaɣ man-tɩ ɖɔɖɔ se: “Ɛzɩ Ɛsɔ ɖʋʋnɩ mbʋ pɩtalɩɣ ɛyaa yɔ nɛ pʋwayɩ ɛnaɣ-wɛ pɔtɔkɩ kʋñɔŋ lɛ, ɛ-taa lakɩ leleŋ na?”»

¹³ Mayli kaawobi pɩ-yɔɔ nɛ ɛñɩnɩɣ se ehiɣ tɔm ndʋ ɛpɔzaɣ ɛ-tɩ yɔ tɩ-yɔɔ cosuu. Alɩwaatʋ wɛɛ nɛ tɩɖɛɣ lɛ, etisi nɛ pɛkpɛlɩkɩnɩ-ɩ Bibl nɛ ɛkɔɔ toovenim taa. Ɛyɔɔdaa se: «Bibl taa tɔm cɔlɩ camɩyɛ nɛ papɩzɩɣ nɛ pataa-tʋ liu, nɛ tɩsɩnɩ-m nɛ mehiɣ taa leleŋ nɛ pɩkɩlɩ. Mana ɛzɩma Ɛsɔtɔm lɩzɩ tɔm taa camɩyɛ yɔ lɛ, piyele nɛ mehiɣ laŋhɛzɩyɛ.» Ɛzɩ Mayli yɔ, ɖa-tɩŋa ɖɩsaŋ Yehowa, ɛnʋ kɛnɩ ‘Weyi ɛya-ɖʋ nɛ cɩkpɛndʋʋ tɛɛ nɛ ɛkɔnɩ-ɖʋ ɛ-ñalɩmɩyɛ sɔsɔɖɛ taa yɔ.’—1 Pɩy. 2:9.

14. Ɛzɩma ɖɩpɩzɩɣ ɖɩla nɛ ɖɩsɔɔlɩ toovenim nɛ pɩkɩlɩ? (Kalɩ ɖɔɖɔ aɖakaɣ «Wondu lɛɛtʋ ndʋ ɖɩpɩzɩɣ nɛ ɖɩkpaɣ Bibl taa toovenim tɔm nɛ ɖɩmaɣzɩna yɔ.»)

¹⁴ Kɩɖaŋ weyi ɩwɩlɩɣ se toovenim mʋ ñɩm yɔ, ɩ-taa nɩɩyɩ pazɩ tɔm ɖɩyɔɔdaa. Pɩtʋʋ fɛyɩ se ŋpɩzɩɣ nɛ ŋmaɣzɩ ɛyaa lalaa sakɩyɛ kɩɖaŋ yɔɔ. Pɩɩwɛɣ ɖeu se ŋla ɖʋtʋ nɛ alɩwaatʋ ndʋ ŋkpɛlɩkɩɣ ña-tɩ yɔɔ yɔ, ŋñɩnɩ nɛ ŋna lɩmaɣza lɛɛna wena a-yɔɔ pɩpɔzʋʋ se ɖɩsɔɔlɩ toovenim yɔ? Ðɩwɛɣ nɛ ɖɩsɔɔlʋʋ toovenim nɛ pɩkɩlɩɣ lɛ, ɖɩkaɣ ñɩnʋʋ nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ se ɖɩsɔɔlɩ-pʋ yɔ nɛ pɩkɩlɩ.

ƐZƖMA ÐƖWƖLƖƔ SE ÐƖSƆƆLƖ TOOVENIM YƆ

15. Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ se ɖɩsɔɔlɩ toovenim yɔ ɩ-taa nakʋyʋ lɛ ŋgʋ?

¹⁵ Ye ɖɩkpɛlɩkɩɣ Bibl nɛ Bibl kpɛlɩkʋʋ takayɩsɩ ɖoŋ ɖoŋ yɔ, ɖɩwɩlɩɣ se ɖɩsɔɔlɩ toovenim. Toovenim taa lɛ, ɖɩwɛʋ toovenim taa yɔ paa pileɖaa yaa pitileɖi yɔ, paa ɛzɩmtaa lɛ tɔm sakɩyɛ wɛɛ se ɖɩtasɩɣ kpɛlɩkʋʋ. Kajalaɣ Feŋuu Tilimiye nɖɩ palɩzaa yɔ ɖɩyɔɔdaa se: «Toovenim tɔm wɛ ɛzɩ hɛɖʋʋ cikpeluu ŋgʋ kɩñɔ ñɩtʋ hɛkʋ taa yɔ. Ñɩtʋ sɔsɔtʋ ndʋ tɩpaɣlɩ fɛlɛ fɛlɛ yɔ, yaa cɛtɩm wɩlɩtʋ, cɔ-kʋ nɛ pɩta nɛ tɩcaɣ kɩ-yɔɔ huuzuu. Pʋcɔ nɛ ɛyʋ pɩzɩ nɛ ɛlɩɩ hɛɖʋʋ ŋgʋ kɩ-yɔɔ lɛ, pɩwɛɛ se ɛtɩlɩ ñɩnʋʋ. . . . Ye ŋsɔɔlaa se ŋwɛɛnɩ-kʋ yɔ, pɩwɛɛ se ŋluzi ña-tɩ. Ñe-liu ɛtaasɩbɩnɩ hɛɖʋʋ kʋɖʋmʋʋ yaa toovenim tɔm kʋɖʋmtʋ ɖeke. . . . Kpaɣ hɛtʋ sakɩyɛ, nɛ ŋtasɩ ñɩnʋʋ hɛtʋ sakɩyɛ nɛ ŋsɔzɩ.» Tɔm kpɛlɩkʋʋ fɛyɩ kɛlɛʋ, ɛlɛ pɩcɛyaa se ɖɩñaɣ pana nɛ ɖɩkpɛlɩkɩ-tʋ.

16. Tɔm kpɛlɩkʋʋ nʋmɔʋ ŋgʋ ŋnawa se kɩlakɩ tʋmɩyɛ camɩyɛ? (Aduwa 2:4-6)

¹⁶ Pɩtɩkɛ ɖa-tɩŋa ɖɩsɔɔlɩnɩ tɔm kalʋʋ nɛ tɔm kpɛlɩkʋʋ. Ɛlɛ, Yehowa seɣtiɣ-ɖʋ se ɖiwolo pɩ-yɔɔ nɛ ‘ɖɩñɩnɩɣ’ nɛ pɩsa nɛ ɖɩnɩɩ toovenim taa camɩyɛ nɛ pɩkɩlɩ. (Kalɩ Aduwa 2:4-6.) Ye ɖɩñakɩ pana nɛ ɖɩlakɩ mbʋ yɔ, pɩwazɩɣ-ɖʋ paa ɛzɩmtaa. Corey yɔɔdaa se ɛnʋ kalɩɣ Bibl lɛ, ɛkaŋ ɛ-lɩmaɣza paa mayaɣ ŋga lɛ kɔ-yɔɔ. Ɛlɩzɩ pɩ-taa se: «Mankalɩɣ paa pɩ-tɛɛ tɔm ndʋ lɛ, nɛ mankalɩɣ ɖɔɖɔ masɩ nzɩ payɩ sɩyɔɔdʋʋ tɔm kʋɖʋmtʋ ndʋ yɔ nɛ mañɩnɩɣ masɩ nzɩ sɩ-yɔɔ tɔm lɛɛtʋ ɛgbɛyɛ takayɩsɩ taa. . . . Tɔm kpɛlɩkʋʋ nʋmɔʋ ŋgʋ kɩsɩɣnɩ-m nɛ mantɩlɩɣ tɔm sakɩyɛ!» Paa pɩtɩɩkɛ tɔm kpɛlɩkʋʋ nʋmɔʋ kʋnɛ yaa paa tɔm kpɛlɩkʋʋ nʋmɔʋ lɛɛkʋ ɖɩlakɩnɩ tʋmɩyɛ yɔ, ye ɖɩkpakɩɣ ɖa-alɩwaatʋ nɛ ɖɩñakɩ pana nɛ ɖɩkpɛlɩkɩɣ toovenim yɔ, ɖɩwɩlɩɣ se pɩmʋ ñɩm ɖɛ-ɛsɩndaa.—Keɣa 1:1-3.

17. Ye pɔtɔm se ɖɩcaɣ wezuu nɛ pɩla nɔɔ kʋɖʋmaɣ nɛ toovenim yɔ, pʋ-tɔbʋʋ lɛ suwe? (Yakubu 1:25)

¹⁷ Toovenim taa lɛ, ɖɩnawa se toovenim kpɛlɩkʋʋ ɖeke tɩmaɣ. Pɩsa nɛ toovenim wazɩ-ɖʋ camɩyɛ lɛ, pɩpɔzʋʋ se ɖɩcaɣ wezuu nɛ pɩla nɔɔ kʋɖʋmaɣ nɛ toovenim mbʋ, pʋ-tɔbʋʋ lɛ se pɩwɛɛ se ɖɩɖɔ tɔm ndʋ ɖɩkpɛlɩkɩɣ yɔ tɩ-yɔɔ ɖe-wezuu caɣʋ taa. Pi-ɖeke pɩkaɣnɩ yebu nɛ toovenim ha-ɖʋ koboyaɣ siŋŋ. (Kalɩ Yakubu 1:25.) Ɛzɩma ɖɩpɩzɩɣ ɖɩla nɛ ɖɩna se ɖɩwɛɛ nɛ ɖɩcakɩ wezuu nɛ pɩlakɩ nɔɔ kʋɖʋmaɣ nɛ toovenim? Koobu abalɩñɩnʋ nɔɔyʋ tasɩ lɔŋ se pɩwɛɣ ɖeu se ɖɩtazɩɣ ɖa-taa nɛ ɖɩnaɣ hɔɔlɩŋ weyi ɩ-taa ɖɩwɛɛ nɛ ɖɩlakɩ camɩyɛ yɔ nɛ hɔɔlɩŋ weyi ɩ-taa pɩpɔzʋʋ se ɖɩñaɣ pana nɛ pɩkɩlɩ yɔ. Apostoloo Pɔɔlɩ yɔɔdaa se: «Ðiwobini ɛsɩndaa nɛ ɖɩtalɩ ɖenɖe yɔ, iyele nɛ ɖiwolo pɩ-yɔɔ nɛ ɖɩɖɔ ɖɔnɛ nɖɩ ɖɩtʋʋzaa yɔ nʋmɔʋ kʋɖʋmʋʋ ŋgʋ kɩ-taa.»—Fil. 3:16.

18. Ɛbɛ yɔɔ ɖɩlakɩ ɖo-ɖoŋ ɖeɖe se pɩsa nɛ ‘ɖɩwɛɛ nɛ ɖɩɖɔŋ toovenim taa’?

¹⁸ Maɣzɩ pazɩ nɛ ŋna wazasɩ nzɩ ɖihikiɣ, ye ɖɩlabɩ ɖo-ɖoŋ ɖeɖe nɛ ‘ɖɩwɛɛ nɛ ɖɩɖɔŋ toovenim taa’ yɔ. Pɩtasɩna se ɖa-maɣmaɣ ɖe-wezuu caɣʋ wɛɣ ɖeu nɛ pɩkɩlɩ lɛ, ɖiyeki ɖɔɖɔ nɛ Yehowa nɛ ɖo-koobiya Krɩstʋ mba taa la leleŋ. (Adu. 27:11; 3 Yoh. 4) Lɩmaɣza kɩbana ana a-yɔɔ lɛ, pɩpɔzʋʋ se ɖɩsɔɔlɩ toovenim nɛ ɖɩcaɣ wezuu nɛ pɩla nɔɔ kʋɖʋmaɣ nɛ toovenim mbʋ!