Ŋtɔzʋʋ?

Feŋuu Tilimiye takayɩsɩ nzɩ sɩlɩ pɩnaɣ kanɛ yɔ, ŋkalɩ-sɩ camɩyɛ na? Ye ŋkalɩ-sɩ camɩyɛ yɔ, maɣzɩ nɛ ŋna se ŋpɩzɩɣ nɛ ŋcosi tɔm pɔzʋʋ pʋnɛ pɩ-yɔɔ:

Ye ɖɩkpakɩɣ alɩwaatʋ nɛ ɖɩyɔɔdʋʋnɩ Yehowa, ɖiwelisiɣni-i nɛ ɖɩmaɣzɩɣ ɛ-yɔɔ yɔ, ɛzɩma pɩkaɣ-ɖʋ wazʋʋ?

Pɩkaɣ-ɖʋ sɩnʋʋ nɛ ɖɩkpaɣ lɩmaɣza kɩbana, ɖɩpɩsɩ wɩlɩyaa kɩbama nɛ pɩkɩlɩ, ɖe-tisuu kpa ɖoŋ nɛ pɩkɩlɩ, nɛ ɖɩsɔɔlɩ Yehowa nɛ pɩkɩlɩ.—w22.01, h. 30-31.

Ye ɖɩtaɣ liu Yehowa nɛ e-lone taa caɣyaa yɔ, ɛzɩma pɩkaɣ-ɖʋ sɩnʋʋ?

Lɛɛlɛɛyɔ pɩwɛɛ se ɖɩkpɛlɩkɩ ɛzɩma ɖɩtaa liu Yehowa se mbʋ ɛlakɩ yɔ pɩtʋʋzaa, nɛ pɩfɛyɩ se ɖɩpɩtɩ nʋmɔʋ ŋgʋ ɛgbɛyɛ taa ɛzʋtʋyaa wɩlɩɣ-ɖʋ yɔ nɛ lɩmaɣza wena pakpakɩɣ yɔ a-yɔɔ. Kʋñɔŋ sɔsɔʋ alɩwaatʋ taa, pɩkaɣ-ɖʋ wɛʋ kɛlɛʋ se ɖɩña paa patasɩ-ɖʋ lɔŋ nɛ pɩlakɩ-ɖʋ ɛzɩ lɔŋ ɛnɩ ɩ-taa nɩʋ wɛ kaɖɛ yaa ɩ-yɔɔ ɖɔm wɛ kaɖɛ yɔ.—w22.02, h. 4-6.

Suwe tiyiyu ñɩnaɣ yɔɔdʋʋ alɩwaatʋ ndʋ eheyi Zakarii «pɩyɛ [yaa pʋlɔŋ nimaɣ] [ŋga kɛwɛ Yuuda egeetiye ñʋʋdʋ] Zorobabɛɛlɩ nesi tɛɛ» yɔ kɔ-tɔm yɔ? (Zak. 4:8-10)

Natʋ tɔm ndʋ, tɩwɩlaɣ Ɛsɔ samaɣ se templo ŋgʋ peɖiɣni maʋ yɔ paa kɩtɩpaɣlɩ yɔ, pakaɣ-kʋ tɛzʋʋ maʋ nɛ kɩkaɣ wɛʋ ɖeyi ɖeyi ɛzɩ Ɛsɔ sɔɔlʋʋ yɔ.—w22.03, h. 16-17.

Ɛzɩma ɖɩpɩzɩɣ nɛ ɖɩkɛ «kɩɖaʋ . . . yɔɔdaɣ taa»? (1 Tim. 4:12)

Ðɩyɔɔdʋʋnɩ nɔɔ kɩbaŋa nɛ ñamtʋ tɔm susuu taa, ɖiteɣ hendu nɛ ɖa-laŋɩyɛ pilim, ɖicosuu tɔm ɖoŋ ɖoŋ kediɣzisi taa, nɛ ɖɩyɔɔdʋʋ toovenim nɛ tɔm ndʋ tɩkpazɩɣ lalaa ɖoŋ yɔ, nɛ ɖikiziɣ yɔɔdʋʋ tɔm ndʋ tɩɖʋʋ ɖɩwɩzɩyɛ yɔ.—w22.04, h. 6-9.

Wɛtʋ ndʋ pana tɛtɛgbɩna naanza (kewiyisi) wena a-tɔm pɔyɔɔdɩ Danɩyɛɛlɩ takayaɣ ñʋʋ 7 taa yɔ, ɛbɛ yɔɔ Natʋ 13:1, 2 taa lɛ, tɛtɛgbɩnɛ kʋɖʋmɖɩyɛ yɔɔ pana wɛtʋ ndʋ tɩ-tɩŋa?

Tɛtɛgbɩnɛ nɖɩ ɖɩ-tɔm pɔyɔɔdɩ Natʋ 13 taa yɔ, ɖɩɩpɩzɩɣ nɛ ɖɩsɩŋnɩ komina kʋɖʋmʋʋ nakʋyʋ ɛzɩ Roma mbʋ yɔ. Ɛlɛ ɖɩsɩŋnɩ kominawaa mba payɩ pɔtɔɔ kewiyitu ɛyaa yɔɔ nɛ pɩkɔɔ pɩtalɩnɩ sɔnɔ yɔ.—w22.05, h. 9.

Nʋmɔʋ sɔsɔʋ ŋgʋ yɔɔ ɖɩtɩŋɩɣna nɛ ɖɩwɩlɩɣ se ɖɩtaɣ Ɛsɔ liu se ɛlakɩ mbʋ pɩwɛ siɣsiɣ yɔ?

Ye nɔɔyʋ ɛtʋ-ɖʋ, ɛyʋsɩnɩ-ɖʋ yaa ɛlabɩ-ɖʋ mbʋ pɩfɛyɩ ɖeu yɔ, ɖɩñakɩ pana se ɖɩtaakɔ pana nɛ ɖɩɩcakɩnɩ-ɩ, nɛ ɖɩɖʋzʋʋ tɔm ndʋ Yehowa nesi tɛɛ. Ɛkaɣ hɩzʋʋ kala wena payɩ kɩwɛɛkɩm kɔnaa yɔ.—w22.06, h. 10-11.

Ye pɔpɔzɩ koobu abalɩñɩnʋ nɔɔyʋ se ɛtɩmɩ ɛgbɛyɛ taa kediɣzaɣ nakɛyɛ taa, tɔm ndʋ pɩwɛɛ se tɩwɛɛ ɛ-lɩmaɣza taa?

Adɩma tɩkɛ nʋmɔʋ ŋgʋ kɩ-yɔɔ patɩŋɩɣna se patasɩ lɔŋ ɛgbɛyɛ yaa se posusi tɔm natʋyʋ ɛgbɛyɛ yɔ. Kɔzɩ kɔzɩ kediɣzaɣ ɖɩbazɩyɛ lɛ, pɩtɩcɛyɩ se ɛyɔɔdɩ «tɔm sakɩyɛ.» (Mat. 6:7)—w22.07, h. 24-25.

Ɛzɩma tɩyɛ «mba palabɩ lakasɩ kɩdɛkɛdɩsɩ yɔ» «pefeŋ se pahʋʋnɩ-wɛ tɔm»? (Yoh. 5:29)

Paakaɣ-wɛ tɔm hʋnʋʋ wezuu ŋgʋ pacaɣaa nɛ pɩɖɛɛ yɔ kɩ-yɔɔ. Pakaɣ tazʋʋ pa-lakasɩ nɛ wezuu ŋgʋ pakaɣ caɣʋ pe-femtu wayɩ yɔ kɩ-taa nɛ pana se pamʋnaa yaa patɩmʋna.—w22.09, h. 18.

Kigbeɣluu ŋgʋ palabɩ septembre 1922 taa yɔ kɩ-taa, ɛbɛ koobu Rutherford seɣti tɔm welisiyaa se pala?

Kigbeɣluu ŋgʋ palabɩ Cedar Point, Ohio, Etaazuunii yɔ kɩ-taa ɛyɔɔdaa se: «Wiyaʋ ɖiɣni kewiyitu tɔɔʋ! Mɩkɛnɩnɩ ɛ-tʋmlaɖaa. Ye mbʋ, isusi, isusi, isusi, Wiyaʋ nɛ e-Kewiyaɣ pɔ-tɔm!»—w22.10, h. 3-5.

Izaayii ñʋʋ 30 yɔɔdʋʋ se nʋmɔŋ naadozo weyi ɩ-yɔɔ Ɛsɔ tɩŋɩɣna nɛ ɛsɩɣnɩ-ɖʋ se ɖɩɖɔkɩ ɖa-laŋa?

Ñʋʋ ŋgʋ kɩwɩlɩɣ se (1) ewelisiɣ ɖa-adɩma nɛ ecosuu a-yɔɔ, (2) eɖiyiɣ-ɖʋ, nɛ (3) ɛwazɩɣ-ɖʋ sɔnɔ sɔnɔ nɛ ɛkaɣ-ɖʋ wazʋʋ cee wayɩ.—w22.11, h. 9.

Ɛbɛ yɔɔ ɖɩpɩzɩɣ nɛ ɖɩyɔɔdɩ se Keɣa 36:10, 11, 29 taa tɔm kaalabɩ caanaʋ taa nɛ tɩkaɣ labʋ cee wayɩ ɖɔɖɔ?

Tɔm ndʋ Daviid yɔɔdaa yɔ, tɩwɩlɩɣ wɛtʋ kɩbandʋ ndʋ tɩɩwɛ Izrayɛɛlɩ taa yɔ, pɩ-kɩɖaʋ nakʋyʋ lɛ wɛtʋ kɩbandʋ ndʋ tɩwɛɛ Salomɔɔ kewiyitu tɔɔʋ alɩwaatʋ taa yɔ. Yesu yɔɔdaɣ cee wayɩ paradisuu tɔm lɛ, ɛlabɩnɩ tʋmɩyɛ kalɩtʋ 11 taa tɔm. (Mat. 5:5; Luka 23:43)—w22.12, h. 8-10, 14.