1 | Adɩma «Ɩɖʋzɩ mɩ-nɩɣzɛ kpeekpe e-nesi tɛɛ»
BIBL YƆƆDƲƲ SE: «Ɩɖʋzɩ mɩ-nɩɣzɛ kpeekpe [Ɛsɔ] nesi tɛɛ, mbʋ pʋyɔɔ yɔ ɛcɔŋnɩ mɩ-yɔɔ.»—1 PƖYƐƐRƖ 5:7.
Pʋ-tɔbʋʋ lɛ se
Yehowa Ɛsɔ ñɩnɩɣ se ɖiheyi-i mbʋ payɩ pɩhaɣ-ɖʋ nɩɣzɛ yɔ pɩ-tɔm. (Keɣa 54:23) Kaɖɛ naɖɩyɛ fɛyɩ se ɖɩkɩlɩ paɣlʋʋ yaa ɖɩkɩlɩ ññɩɩ nɛ ɖɩɩpɩzɩɣ ɖɩyɔɔdɩ ɖɩ-tɔm ɖa-adɩma taa. Ye nabʋyʋ tɔm ɛcɛyɩ ɖɛ-ɛsɩndaa yɔ, pɩcɛyɩ ɖɔɖɔ Yehowa ɛsɩndaa. Adɩma wena ɖɩlakɩ-ɩ yɔ, akɛ nʋmɔʋ sɔsɔʋ ŋgʋ kɩsɩɣnɩ-ɖʋ se ɖihiɣ maɣzɩm taa laŋhɛzɩyɛ yɔ.—Filiipi mba 4:6, 7.
Ɛzɩma tɔm tʋnɛ tɩpɩzɩɣ nɛ tɩsɩnɩ-ɖʋ?
Alɩwaatʋ ndʋ ɖɩlʋkɩnɩ ɖa-lɩmaɣza taa kʋdɔŋ nakʋyʋ yɔ, pɩpɩzɩɣ nɛ pɩlabɩ-ɖʋ kpem ɛzɩ ɖɩwɛ ɖe-ɖeke yɔ. Pɩtɩkɛ paa ɛzɩmtaa ɛyaa lalaa nɩɣ mbʋ pɩ-taa ɖɩwɛɛ yɔ pɩ-taa camɩyɛ. (Aduwa 14:10) Ɛlɛ ye ɖikuli ɖa-laŋa nɛ ɖiheyi Ɛsɔ adɩma taa ɛzɩma pɩlakɩ-ɖʋ yɔ, ɖɩkaɣ naʋ se ewelisiɣni-ɖʋ camɩyɛ nɛ ɛnɩɣ ɖɔ-tɔm taa. Yehowa naɣ-ɖʋ, ɛsɩm wɩzasɩ nzɩ ɖɩnɩɣ nɛ kala wena ɖɩkatɩɣ yɔ, nɛ ɛsɔɔlaa se ɖɩtɩmnɩ-ɩ nɛ ɖiheyi-i mbʋ payɩ pɩhaɣ-ɖʋ nɩɣzɛ yɔ pɩ-tɔm.—4 Awiya 6:29, 30.
Ye ɖɩyɔɔdʋʋnɩ Yehowa adɩma taa yɔ, piyeki nɛ ɖa-taa tɛ nɛ pɩkɩlɩ se ɛmaɣzɩɣ ɖɔ-yɔɔ. Pɩpɩzɩɣ nɛ pɩlabɩ-ɖʋ ɛzɩ pɩɩlabʋ keɣa maɖʋ nɔɔyʋ yɔ. Ɛtɩmaa se: «Ŋna man-kʋñɔŋ nɛ ŋtɩlɩ pʋtɔdɩyɛ nɖɩ ɖɩ-taa mɛwɛɛ yɔ.» (Keɣa 30:8) Ye ɖɩnawa se Yehowa sɩm kala wena ɖɩwɛɛ nɛ ɖɩkatɩɣ yɔ, pɩpɩzɩɣ pɩsɩnɩ-ɖʋ kpem nɛ ɖiwolo pɩ-yɔɔ nɛ ɖɩɖɔkʋʋ ɖa-tɩ a-taa. Pɩtasɩna se ɛnaɣ nɩɣzɛ wena a-taa ɖɩwɛɛ yɔ lɛ, ɛlakɩ nabʋyʋ ɖɔɖɔ. Ɛsɩm mbʋ pɩ-taa ɖɩwɛɛ yɔ nɛ pɩkpaɖɩ paa anɩ, nɛ ɛsɩɣnɩ-ɖʋ se ɖihiɣ laŋɩyɛ hɛzʋʋ nɛ ɖoŋ kpazʋʋ Bibl taa.