Lɩmaɣza wena Yehowa sɔɔlaa se ɛgbɛyɛ ɛwɛɛnɩ mba palabɩ kɩwɛɛkɩm sɔsɔm yɔ pɔ-yɔɔ?

1. Ɛbɛ Yehowa sɔɔlaa se ɛyaa tɩŋa ɩla?

YEHOWA lɩzɩ ɛyaa lɛ, ɛha-wɛ tɩ yɔɔ wɛʋ lɩzʋʋ waɖɛ. Ŋlakɩnɩ kʋjɔʋ ŋgʋ tʋmɩyɛ ɖoŋ ɖoŋ alɩwaatʋ ndʋ ŋkpakɩɣ lɩmaɣza yɔ. Lɩmaɣzɩyɛ nɖɩ ɛyʋ pɩzɩɣ nɛ ɛkpaɣ nɛ ɖɩ-tɔm kɩlɩ cɛyʋʋ yɔ, nɖɩ lɛ se ɛha ɛ-tɩ Yehowa nɛ ɛsʋʋ ɛ-sɛyaa hɔʋ taa. Yehowa sɔɔlaa se paa weyi ɛla mbʋ. Ɛbɛ yɔɔ? Mbʋ pʋyɔɔ yɔ ɛsɔɔlɩ ɛyaa nɛ ɛsɔɔlaa se piɖeni-wɛ. Ɛsɔɔlaa se pɛkɛ ɛ-taabalaa nɛ pacaɣ wezuu tam.—Wp. 30:​19, 20; Gal. 6:​7, 8.

2. Ɛbɛ Yehowa sɔɔlaa se mba palabɩ kɩwɛɛkɩm sɔsɔm nabʋyʋ yɔ pala? (1 Yohanɛɛsɩ 2:1)

² Ɛlɛ, Yehowa ɛɛkpaɣ nɔɔyʋ nɛ ɖoŋ se ɛsɛɛ-ɩ. Ɛhaɣ paa weyi waɖɛ se ɛlɩzɩ mbʋ ɛkaɣ labʋ yɔ. Ye koobu weyi pamɩyɩsɩ-ɩ lɩm yɔ, ɛlabɩ kɩwɛɛkɩm sɔsɔm nabʋyʋ yɔ, ɛbɛ pɩwɛɛ se ɛgbɛyɛ taa ɛzʋtʋyaa ɩla? Ye etikpiɖi ɛ-kɩwɛɛkɩm yɔɔ yɔ, pɩwɛɛ se palɩzɩ-ɩ ɛgbɛyɛ taa. (1 Kɔr. 5:13) Paa mbʋ yɔ, Yehowa sɔɔlaa kpem se ɛyʋ ɛnʋ ekpiɖi nɛ taabalɩyɛ kɩbanɖɛ ɖaɣnɩ wɛʋ ɛ nɛ ɩ pɛ-hɛkʋ taa. Toovenim taa lɛ, lɩmaɣza wena a-yɔɔ ɛhɛyɩ kɩhɛyʋʋ pʋ-ñʋʋ taa yɔ, a-taa naɖɩyɛ lɛ se ekpeɣ kɩwɛɛkɩm laɖaa mba pekpiɖiɣ yɔ pa-kɩwɛɛkɩm. (Kalɩ 1 Yohanɛɛsɩ 2:1.) Yehowa kɛ Ɛsɔ sɔɔlɩm tʋ, nɛ eseɣtiɣ mba palabɩ kɩwɛɛkɩm sɔsɔm nabʋyʋ yɔ se pekpiɖi pa-kɩwɛɛkɩm yɔɔ.—Zak. 1:3; Roma 2:4; Yak. 4:8.

3. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

³ Yehowa sɔɔlaa se ɖa ɖɔɖɔ ɖɩwɛɛnɩ lɩmaɣza wena ɛwɛnɩ kɩwɛɛkɩm yɔɔ yɔ. Ɛsɔɔlaa ɖɔɖɔ se ɖɩwɛɛnɩ lɩmaɣza wena ɛwɛnɩ mba palabɩ kɩwɛɛkɩm sɔsɔm nabʋyʋ yɔ pɔ-yɔɔ yɔ. Tɔm ñʋʋ kʋnɛ kɩ-taa, ɖɩkaɣ naʋ ɛzɩma ɖɩpɩzɩɣ nɛ ɖɩla mbʋ yɔ. Ŋŋkalɩɣ tɔm ñʋʋ kʋnɛ lɛ, ñɩnɩ nɛ ŋna (1) ɛzɩma paacɔnɩ kɩwɛɛkɩm sɔsɔm nabʋyʋ ɖeɖe Kɔrɛntɩ ɛgbɛyɛ taa kajalaɣ pɩnzɩ mɩnʋʋ taa yɔ, (2) lɔŋ weyi apostoloo Pɔɔlɩ tasaa alɩwaatʋ ndʋ kɩwɛɛkɩm laɖʋ nɔɔyʋ kpiɖi ɛ-kɩwɛɛkɩm yɔɔ yɔ, nɛ (3) mbʋ Bibl kɛdaɣ ŋga kawɩlɩɣ pɩlɩɩnɩ lɩmaɣza wena Yehowa wɛnɩ Krɩstʋ ñɩma mba palabɩ kɩwɛɛkɩm sɔsɔm nabʋyʋ yɔ pɔ-yɔɔ yɔ.

ƐZƖMA PAACƆNƖ KƖWƐƐKƖM SƆSƆM NABƲYƲ ÐEÐE KAJALAƔ PƖNZƖ MƖNƲƲ TAA?

4. Ɛbɛ kaalabɩ Kɔrɛntɩ ɛgbɛyɛ taa? (1 Kɔrɛntɩ mba 5:​1, 2)

⁴ Kalɩ 1 Kɔrɛntɩ mba 5:​1, 2. Pɔɔlɩ ɖɔŋaɣ ɛ-Ɛsɔtɔm tiyiyu nʋmɔʋ 3 ñɩŋgʋ lɛ, ɛnɩɩ se nabʋyʋ labɩ ɛgbɛyɛ kɩfaɖɛ nɖɩ ɖɩɩñɔ Kɔrɛntɩ yɔ ɖɩ-taa, nɛ pɩɩkɛnɩ tɔm sɔsɔtʋ kpem. Ɛgbɛyɛ nɖɩ ɖɩ-taa koobu abalɩñɩnʋ nɔɔyʋ sʋwaɣnɩ ɛ-caa halʋ. Halɩ ɛyaa mba pataasɛɣ Yehowa yɔ, paanawa se lakasɩ nzɩ sɩtaawɛɛ ɖeu paa ññɩɩ. Ɛlɛ ɛgbɛyɛ taa koobiya taamaɣzɩɣ se pɩkɛnɩ kɩdɛkɛdɩm nabʋyʋ nɛ pʋtɔma yɔ pakpazaɣ pa-tɩ pʋyɔɔ. Pɩtɩla nabɛyɛ maɣzaɣ se pa-lakasɩ nzɩ sɩwɩlɩɣ se pɛwɛɛ nɛ panaɣ ɛyʋ ɛnʋ ɛ-pʋtɔdɩyɛ ɛzɩ Ɛsɔ naɣʋ ɛyaa mantɩtalɩ pilimwaa pʋtɔdɩyɛ yɔ. Ɛlɛ Yehowa ɛɛhaɣ nʋmɔʋ se ɛyʋ ɛwɛɛ ɛ-ɛgbɛyɛ taa nɛ ɛlakɩ kɩwɛɛkɩm sɔsɔm. Pɩtʋʋ fɛyɩ se koobu ɛnʋ ɛ-lakasɩ kɩdɛkɛdɩsɩ nzɩ siipisi hɩɖɛ kɩbanɖɛ nɖɩ ɛgbɛyɛ kaawɛna yɔ. Nɛ ye peyebi-i ɛgbɛyɛ taa yɔ, ɛpɩzɩɣ nɛ ɛwɛɛnɩ ɖoŋ koobiya mba paɖʋʋ-ɩ nɛ taabalɩyɛ yɔ pɔ-yɔɔ. Ye mbʋ, ɛbɛ Pɔɔlɩ heyi ɛgbɛyɛ se ɖɩla?

5. (a) Ɛbɛ Pɔɔlɩ heyi koobiya se pala? (1 Kɔrɛntɩ mba 5:13) (b) Nɛ pʋ-tɔbʋʋ lɛ suwe? (Cɔnɩ ɖɔɖɔ kɩlɛmʋʋ.)

⁵ Kalɩ 1 Kɔrɛntɩ mba 5:13. Fezuu ɖiyi Pɔɔlɩ nɛ ɛma se pɩwɛɛ se palɩzɩ kɩwɛɛkɩm laɖʋ weyi etikpiɖi ɛ-kɩwɛɛkɩm yɔɔ yɔ ɛgbɛyɛ taa. Lɩmaɣza wena pɩɩwɛɛ se ɛgbɛyɛ taa koobiya ɩwɛɛnɩ ɛ-yɔɔ? Pɔɔlɩ heyi-wɛ se ‘peyele taabalɩyɛ ɖʋʋ’ nɛ ɛyʋ ɛnʋ. Pʋ-tɔbʋʋ lɛ suwe? Pɔɔlɩ lɩzɩ pɩ-taa se paɣtʋ ndʋ tɩwɩlɩɣ ɖɔɖɔ se ‘halɩ pa nɛ ɛyʋ ɛnʋ pataatɔɔ.’ (1 Kɔr. 5:11) Ye ña nɛ nɔɔyʋ ɩkpɛndɩɣ nɛ ɩtɔkɩ tɔɔnaɣ yɔ, ña nɛ ɩ ɩyɔɔdʋʋ nɛ piyeki nɛ ña nɛ ɩ ɩɖʋ taabalɩyɛ kɛlɛʋ yem. Ye mbʋ, pɩnaɣ kpayɩ kpayɩ se tɔm ndʋ Pɔɔlɩ yɔɔdaa yɔ, tɩwɩlɩɣ se pɩtɩpɔzɩ se ɛgbɛyɛ taa koobiya ɩkpakɩɣ alɩwaatʋ nɛ pa nɛ ɛyʋ ɛnʋ pacakɩ. Ye pɔɖɔm lɔŋ tasʋʋ mbʋ pɩ-yɔɔ yɔ, pɩkandɩyɩɣ ɛgbɛyɛ yɔɔ nɛ ɛyʋ ɛnʋ ɛ-lakasɩ kɩdɛkɛdɩsɩ ɩɩɖɛɣ koobiya. (1 Kɔr. 5:​5-7) Pɩtasɩ lɛ, ye paaɖʋʋ taabalɩyɛ nɛ ɛyʋ ɛnʋ yɔ, pɩkaɣ yebu nɛ ɛna se eposini Yehowa siŋŋ, nɛ pɩpɩzɩɣ piyele nɛ fɛyɛ kpa-ɩ nɛ piseɣti-i nɛ ekpiɖi ɛ-kɩwɛɛkɩm yɔɔ.

6. (a) Koobiya mʋ Pɔɔlɩ takayaɣ lɛ, ɛzɩma palaba? (b) Nɛ ɛbɛ kɩwɛɛkɩm laɖʋ ñalaba?

⁶ Pɔɔlɩ tɛm tiyinuu ɛ-takayaɣ Kɔrɛntɩ koobiya lɛ, ɛpaɣzɩ maɣzʋʋ se ɛzɩ pakaɣ ɖɔm ka-taa tɔm yɔɔ yaa paaɖɔŋ. Ɛlɛ Titii heyi Pɔɔlɩ tɔm natʋyʋ nɛ tiyele nɛ ɛ-taa la leleŋ siŋŋ. Tɔm ndʋ lɛ se ɛgbɛyɛ taa koobiya ɖɔm Pɔɔlɩ lɔŋ tasʋʋ yɔɔ nɛ palɩzɩ kɩwɛɛkɩm laɖʋ ɛnʋ ɛgbɛyɛ taa. (2 Kɔr. 7:​6, 7) Pɩtasɩ lɛ, Pɔɔlɩ tiyini takayaɣ nɛ pɩla fenasɩ pazɩ lɛ, kɩwɛɛkɩm laɖʋ ɛnʋ ekpiɖi ɛ-kɩwɛɛkɩm yɔɔ. Eyebi ɛ-lakasɩ nɛ ɛ-wɛtʋ kɩdɛkɛdɩtʋ nɛ ɛpaɣzɩ ɖɔm Yehowa paɣtʋ kila yɔɔ. (2 Kɔr. 7:​8-11) Ɛbɛ Pɔɔlɩ heyi koobiya se pala pʋwayɩ?

LƖMAƔZA WENA PƖƖWƐƐ SE KOOBIYA ƖWƐƐNƖ KƖWƐƐKƖM LAÐƲ WEYI EKPIÐAA YƆ Ɛ-YƆƆ?

7. Palɩzɩ kɩwɛɛkɩm laɖʋ ɛgbɛyɛ taa lɛ, ɛbɛ ɛlaba? (2 Kɔrɛntɩ mba 2:​5-8)

⁷ Kalɩ 2 Kɔrɛntɩ mba 2:​5-8. Pɔɔlɩ yɔɔdaa se ɛzɩma pa-taa sakɩyɛ «hɔm abalʋ ɛnʋ ɛ-nɩŋgbaŋʋʋ yɔ pɩmaɣ mbʋ.» Pʋ-tɔbʋʋ lɛ se lɔŋ sɩɣzʋʋ mbʋ pɩtalɩ pɩ-kaɖʋwa. Kaɖʋwa ŋga? Kaɖʋwa ŋga lɛ se pɩsɩnɩ-ɩ nɛ ekpiɖi ɛ-kɩwɛɛkɩm yɔɔ.—Ebr. 12:11.

8. Ɛbɛ Pɔɔlɩ heyi ɛgbɛyɛ pʋwayɩ se ɖɩla?

⁸ Pʋwayɩ Pɔɔlɩ tasɩ ɛgbɛyɛ lɔŋ se: «Ikpeɣ-i faaa nɛ ɩhɛzɩ ɛ-laŋɩyɛ» nɛ «ɩwɩlɩ-ɩ se ɩsɔɔlɩ-ɩ.» Taasɔɔ se Pɔɔlɩ tɩyɔɔdɩ yem se paha nʋmɔʋ abalʋ ɛnʋ nɛ ɛpɩsɩ ɛgbɛyɛ taa. Ɛlɛ Pɔɔlɩ kaasɔɔlaa se koobiya ɩtɩŋnɩ pɔ-tɔm pee nɛ pa-lakasɩ yɔɔ nɛ peyele nɛ abalʋ ɛnʋ ɛ-taa tɛ se pakpaɣaa nɛ pekpeɣ-i nɛ pɔsɔɔlɩ-ɩ. Ye palabɩ mbʋ yɔ, pawɩlɩɣ kpayɩ kpayɩ se pa-taa labɩ leleŋ se abalʋ ɛnʋ ɛpɩsɩ ɛgbɛyɛ taa.

9. Pɩtɩla ɛbɛ yɔɔ pɩɩlabɩ ɛgbɛyɛ taa koobiya nabɛyɛ kaɖɛ se pakpaɣ nɛ pekpeɣ kɩwɛɛkɩm laɖʋ weyi ekpiɖaa yɔ?

⁹ Ɛzɩ pɩɩlabɩ ɛgbɛyɛ taa koobiya nabɛyɛ kaɖɛ se paɖaɣnɩ mʋʋ kɩwɛɛkɩm laɖʋ weyi ekpiɖaa yɔ pɛ-hɛkʋ taa? Kɛdaɣ ŋga katɩyɔɔdɩ pɩ-tɔm, ɛlɛ pɩtɩla pɩɩlabɩ nabɛyɛ kaɖɛ. Pɩtɩla koobiya nabɛyɛ kaawɛ pana taa mbʋ pʋyɔɔ yɔ ɛ-lakasɩ kɔnɩ tɔm ɛgbɛyɛ taa. Pɩtɩla ɖɔɖɔ yɔ, lalaa kaawɛ laŋwɛɛkɩyɛ taa mbʋ pʋyɔɔ yɔ ɛɖʋ-wɛ fɛyɛ. Mba paañaɣ pana siŋŋ se pɔɖɔ Yehowa paɣtʋ yɔɔ yɔ, pɩtɩla pa-taa nabɛyɛ maɣzaɣ se pɩtɩmʋna se peyele kɩwɛɛkɩm laɖʋ sɔsɔ ɛnʋ nɛ ɛɖaɣnɩ pɩsʋʋ ɛgbɛyɛ taa. (Kpaɣ-tʋ nɛ ŋmaɣzɩnɩ Luka 15:​28-30.) Ɛlɛ, ɛbɛ yɔɔ pɩɩcɛyaa se koobiya ɩwɩlɩ sɔɔlɩm siŋŋ kɩwɛɛkɩm laɖʋ weyi ekpiɖaa yɔ?

10-11. Ye ɛzʋtʋyaa ikizaa se paakpakɩɣ nɛ pekpeɣ kɩwɛɛkɩm laɖʋ weyi ekpiɖaa yɔ, ɛbɛ pɩzɩɣ nɛ pɩla?

¹⁰ Maɣzɩ nɛ ŋna mbʋ pɩpɩzɩɣ nɛ pɩla ye ɛgbɛyɛ taa ɛzʋtʋyaa ikizaa se kɩwɛɛkɩm laɖʋ weyi ekpiɖaa yɔ ɛtaapɩsɩ ɛgbɛyɛ taa yɔ. Yaa maɣzɩ nɛ ŋna mbʋ pɩpɩzɩɣ nɛ pɩla ye ɛpɩsaa nɛ ɛgbɛyɛ taa koobiya kizi se paawɩlɩɣ-ɩ sɔɔlɩm yɔ. «Laŋwɛɛkɩyɛ sɔsɔɖɛ» pɩzɩɣ ɖiyele nɛ pitibi-i yɔɔɔ. Ɛpɩzɩɣ nɛ elesi lidaʋ kɛlɛʋ yem. Ɛpɩzɩɣ nɛ eyele pana ñaɣʋ se ɛñɔɔzɩ ɛ nɛ Yehowa pa-taabalɩyɛ.

¹¹ Kɔzɩ kɔzɩ lɛ, ye koobiya ikizaa se paakpakɩɣ nɛ pekpeɣ kɩwɛɛkɩm laɖʋ weyi ekpiɖaa yɔ, pɩpɩzɩɣ nɛ pɩkɔnɩ kaɖɛ pa nɛ Yehowa pa-taabalɩyɛ. Ɛbɛ yɔɔ? Mbʋ pʋyɔɔ yɔ paamaɣzɩɣnɩ Yehowa weyi ɛkpakɩɣ nɛ ekpeɣu mba pekpiɖiɣ pa-kɩwɛɛkɩm yɔɔ yɔ, ɛlɛ pɛwɛɛ nɛ pamaɣzɩɣnɩ Sataŋ weyi ɛwɛ kañatʋ nɛ ɛɛnaɣ pʋtɔdɩyɛ yɔ. Halɩ papɩzɩɣ nɛ paha nʋmɔʋ Eleeu se ɛtɩŋnɩ pɔ-yɔɔ nɛ ɛla nɛ ɛyʋ ɛnʋ eyele Yehowa sɛʋ.—2 Kɔr. 2:​10, 11; Efɛz. 4:27.

12. Ɛzɩma Kɔrɛntɩ koobiya pɩzaɣ se pamaɣzɩnɩ Yehowa?

¹² Ye mbʋ, ɛzɩma Kɔrɛntɩ koobiya pɩzaɣ se pamaɣzɩnɩ Yehowa ɛlɛ pataamaɣzɩnɩ Sataŋ? Papɩzaɣ se pamaɣzɩnɩ Yehowa ye pakpakɩɣ nɛ pekpeɣu kɩwɛɛkɩm laɖaa mba pekpiɖiɣ yɔ. Na tɔm ndʋ Bibl mayaa nabɛyɛ yɔɔdɩ Yehowa yɔɔ yɔ. Daviid yɔɔdaa se: ‘Ɛwɛ ɖeu nɛ ɛsɔɔlɩ kpeɣu.’ (Keɣ. 86:5) Mikee mawa se: «Akɛ Ɛsɔ ɛzɩ ña yɔ, nɛ ekpeɣu kɩdɛkɛdɩm nɛ ɛɛkpakɩɣ . . . paɣtʋ yɔɔ maʋ nɛ ɛlakɩnɩ tʋmɩyɛ?» (Mik. 7:18) Nɛ Izaayii yɔɔdaa se:«Kañatʋ tʋ eyele ɛ-nʋmɔʋ, ɛyʋ kɩdɛkɛdʋ eyele ɛ-lɩmaɣza, ɛpɩsɩ Yehowa cɔlɔ, nɛ ɛlɛ kaɣ naʋ ɛ-pʋtɔdɩyɛ, ɛpɩsɩ ɖɛ-Ɛsɔ cɔlɔ, mbʋ pʋyɔɔ yɔ ɛkaɣ kpeɣu pɩdɩɩfɛyɩ.»—Iza. 55:7.

13. Ɛbɛ yɔɔ pɩɩwɛɛ se papɩsɩnɩ kɩwɛɛkɩm laɖʋ weyi ekpiɖaa yɔ ɛgbɛyɛ taa? (Kalɩ aɖakaɣ «Ɛzɩmtaa papɩsɩnɩ abalʋ weyi ɛlabɩ kɩwɛɛkɩm Kɔrɛntɩ yɔ ɛgbɛyɛ taa?»)

¹³ Pɩsa nɛ Kɔrɛntɩ koobiya maɣzɩnɩ Yehowa lɛ, pɩɩwɛɛ se pakpaɣ nɛ pekpeɣ kɩwɛɛkɩm laɖʋ weyi ekpiɖaa yɔ nɛ peyele nɛ ɛ-taa tɛ se pɔsɔɔlɩ-ɩ. Ye pɔɖɔm Pɔɔlɩ lɔŋ tasʋʋ yɔɔ nɛ pakpaɣ nɛ pekpeɣ-i yɔ, ɖɩnɛ ɛlɛ pawɩlɩɣ se ‘pɛwɛnɩ ñamtʋ pɩtɩŋa pɩ-taa.’ (2 Kɔr. 2:9) Toovenim se palɩzʋʋ kɩwɛɛkɩm laɖʋ ɛnʋ ɛgbɛyɛ taa yɔ pɩlabɩ fenasɩ pazɩ na, ɛlɛ ɛzɩma pasɩɣzɩ-ɩ lɔŋ yɔ, piyeba nɛ ekpiɖi ɛ-kɩwɛɛkɩm yɔɔ. Pʋyɔɔ lɛ, pɩtɩcɛyɩ se patasɩ yebu nɛ alɩwaatʋ ɖɛɛ pʋcɔ nɛ papɩsɩnɩ-ɩ ɛgbɛyɛ taa.

ÐƖMAƔZƖNƖ YEHOWA SIƔSIƔ WƐTƲ NƐ Ɛ-PƲTƆDƖYƐ NAƲ

14-15. Lɔŋ weyi ɖɩpɩzɩɣ nɛ ɖɩkpɛlɩkɩ ɛzɩma paacɔnɩ kɩwɛɛkɩm sɔsɔm nabʋyʋ ɖeɖe Kɔrɛntɩ ɛgbɛyɛ taa yɔ pɩ-taa? (2 Pɩyɛɛrɩ 3:9) (Cɔnɩ ɖɔɖɔ kɩlɛmʋʋ.)

¹⁴ Pama Bibl taa ɛzɩma paacɔnɩ kɩwɛɛkɩm sɔsɔm nabʋyʋ ɖeɖe Kɔrɛntɩ ɛgbɛyɛ taa yɔ pɩ-tɔm se «pawɩlɩnɩ-ɖʋ lɔŋ.» (Roma 15:4) Kɛdaɣ ŋga kɛkpɛlɩkɩɣ-ɖʋ se Yehowa ɛɛhaɣ nʋmɔʋ se mba palakɩ kɩwɛɛkɩm sɔsɔm nɛ paakpiɖiɣ yɔ pɛwɛɛ ɛgbɛyɛ taa. Nabɛyɛ pɩzɩɣ nɛ pamaɣzɩ se Yehowa kɛ pʋtɔdɩyɛ nayʋ nɛ pʋyɔɔ lɛ, ɛpɩzɩɣ nɛ ɛha nʋmɔʋ se kɩwɛɛkɩm laɖʋ weyi eekpiɖiɣ yɔ ɛwɛɛ ɛgbɛyɛ taa. Ɛlɛ pɩtɩkɛ mbʋ Yehowa wɩlɩɣna se ɛnaɣ pʋtɔdɩyɛ. Yehowa kɛ pʋtɔdɩyɛ nayʋ, ɛlɛ eehuuzuu ɛsa pɩtɩŋa pɩ-yɔɔ; nɛ ɛ-paɣtʋ ɛɛlɛɣzɩɣ. (Yud. 4) Ye Yehowa ɛha nʋmɔʋ kɩwɛɛkɩm laɖaa mba paakpiɖiɣ yɔ se pɛwɛɛ ɛgbɛyɛ taa yɔ, toovenim taa lɛ pɩtɩkɛnɩ pʋtɔdɩyɛ naʋ, mbʋ pʋyɔɔ yɔ pɩpɩzɩɣ nɛ pɩkɔnɩ ɛgbɛyɛ kaɖɛ.—Adu. 13:20; 1 Kɔr. 15:33.

¹⁵ Pɩtasɩ lɛ, kɛdaɣ ŋga kɛkpɛlɩkɩɣ-ɖʋ se Yehowa tɩsɔɔlɩ se paɖɩzɩ nɔɔyʋ. Ɛsɔɔlaa se ɛya ɛyaa kpeekpe ñʋʋ. Ɛnaɣ mba pɛlɛɣzɩɣ pa-maɣzɩm nɛ pa-lakasɩ nɛ pɔsɔɔlɩ se pɔñɔɔzɩ pa nɛ ɩ pa-taabalɩyɛ yɔ pa-pʋtɔdɩyɛ. (Ezek. 33:11; kalɩ 2 Pɩyɛɛrɩ 3:9.) Pʋyɔɔ alɩwaatʋ ndʋ Kɔrɛntɩ ɛgbɛyɛ taa kɩwɛɛkɩm laɖʋ ɛnʋ ekpiɖaa nɛ ɛlɛɣzɩ ɛ-lakasɩ yɔ, Yehowa tɩŋnɩ Pɔɔlɩ yɔɔ nɛ eheyi ɛgbɛyɛ taa koobiya se pɩwɛɛ se pakpaɣ nɛ pekpeɣ-i nɛ paɖaɣnɩ-ɩ mʋʋ.

16. Ŋmaɣzɩɣ ɛzɩma pɔcɔnɩ kɩwɛɛkɩm sɔsɔm nabʋyʋ ɖeɖe Kɔrɛntɩ ɛgbɛyɛ taa yɔ pɩ-yɔɔ lɛ, ɛzɩma pɩlakɩ-ŋ?

¹⁶ Ðɩtazɩ ɛzɩma pɔcɔnɩ kɩwɛɛkɩm sɔsɔm nabʋyʋ ɖeɖe Kɔrɛntɩ ɛgbɛyɛ taa yɔ pɩ-taa lɛ, pɩsɩnɩ-ɖʋ nɛ ɖɩna se Yehowa kɛ sɔɔlɩm tʋ, ɛsɔɔlɩ toovenim nɛ ɛwɛ siɣsiɣ. (Keɣ. 33:5) Piiseɣtiɣ-ŋ se ŋsa ɖɛ-Ɛsɔ nɛ pɩkɩlɩ yaa we? Ða-tɩŋa payɩ ɖɩkɛ kɩwɛɛkɩm laɖaa, nɛ pɩpɔzʋʋ-ɖʋ ɛ-kpaɣʋ nɛ kpeɣu. Pɩpɔzʋʋ se ɖa-taa paa anɩ ɛlɩzɩ ɛ-ɛsɩmɩyɛ nɛ ɛwɩlɩ Yehowa kɩhɛyʋʋ pʋ-ñʋʋ taa kɩlaʋ yɔɔ, mbʋ pʋyɔɔ yɔ ŋgʋ yekina se ekpeɣ-ɖʋ ɖa-kɩwɛɛkɩm. Pɩkpazɩɣ-ɖʋ ɖoŋ nɛ pɩhɛzɩɣ ɖa-laŋa siŋŋ se Yehowa sɔɔlɩ ɛ-sɛyaa pɩdɩɩfɛyɩ nɛ ɛsɔɔlaa se piɖeni-wɛ.

17. Tɔm ndʋ yɔɔ ɖɩkaɣ cosuu tɔm ñʋŋ weyi ɩkɔŋ yɔ ɩ-taa?

¹⁷ Nɛ sɔnɔ yɔ, ɛzɩma pɔcɔŋnɩ kɩwɛɛkɩm sɔsɔm nabʋyʋ ɖeɖe ɛgbɛyɛ taa? Ɛzɩma ɛgbɛyɛ taa ɛzʋtʋyaa pɩzɩɣ nɛ pamaɣzɩnɩ Yehowa sɔɔlɩm nɛ pasɩnɩ kɩwɛɛkɩm laɖʋ nɛ ekpiɖi ɛ-kɩwɛɛkɩm yɔɔ? Ɛzɩma pɩwɛɛ se ɛgbɛyɛ taa koobiya ɩla alɩwaatʋ ndʋ ɛgbɛyɛ taa ɛzʋtʋyaa kpakɩɣ lɩmaɣzɩyɛ se palɩzɩɣ nɔɔyʋ ɛgbɛyɛ taa yaa papɩsɩɣnɩ-ɩ ɛgbɛyɛ taa yɔ? Ðɩkaɣ cosuu tɔm ndʋ tɩ-yɔɔ tɔm ñʋŋ weyi ɩkɔŋ yɔ ɩ-taa.