Wɛɛnɩ Yehowa nɛ Yesu pa-maɣzɩm

1-2. (a) Ye pɔtɔm se ɛyʋ ɛsɔɔlɩ Yehowa yɔ, pʋ-tɔbʋʋ lɛ suwe? (b) Ɛzɩma Yesu wɩlaa se ɛsɔɔlɩ Yehowa nɛ ɛ-maɣzɩm pilim?

«SƆƆLƖ ñɛ-Ɛsɔ Yehowa nɛ ña-laŋɩyɛ pilim nɛ ña-kalɩzaɣ pilim nɛ ño-ɖoŋ pilim nɛ ña-maɣzɩm pilim.» (Luka 10:27) Yesu wɩlɩ kpayɩ kpayɩ se Moyizi Paɣtʋ taa lɛ, paɣtʋ ndʋ tɩkpaɖɩna. Ye pɔtɔm se ɖɩsɔɔlɩ Yehowa yɔ, pʋ-tɔbʋʋ lɛ se ɖɩsɔɔlɩ-ɩ nɛ ɖa-laŋɩyɛ, mbʋ pʋyɔɔ yɔ laŋɩyɛ taa mbʋ ɖe-liu wɛɛ yɔ nɛ ɛzɩma pɩlakɩ-ɖʋ yɔ pɩlɩɣna. Pʋ-tɔbʋʋ ɖɔɖɔ lɛ se ɖɩsɔɔlɩ-ɩ nɛ ɖa-kalɩzaɣ pilim nɛ ɖo-ɖoŋ. Ɛlɛ pɩpɔzʋʋ ɖɔɖɔ se ɖɩsɔɔlɩ-ɩ nɛ ɖa-maɣzɩm, pʋ-tɔbʋʋ se ɖɩlabɩnɩ ɖa-maɣzɩm tʋmɩyɛ camɩyɛ. Pɩkɛ toovenim se ɖɩɩpɩzɩɣ nɛ ɖɩnɩɩ Yehowa maɣzɩm tɩŋa taa camɩyɛ kpa. Ɛlɛ ye ɖɩkpɛlɩkaa nɛ ɖɩtɩlɩ «Krɩstʋ maɣzɩm» yɔ, ɖɩpɩzɩɣ nɛ ɖɩnɩɩ Ɛsɔ maɣzɩm taa nɛ pɩkɩlɩ, mbʋ pʋyɔɔ yɔ Yesu kaawɛnɩ ɛ-Caa maɣzɩm.—1 Kɔr. 2:16.

² Yesu kaasɔɔlɩ Yehowa nɛ ɛ-maɣzɩm pilim. Ɛɛsɩm mbʋ Yehowa sɔɔlaa se ɛla yɔ nɛ ɛɛtɛm ɛ-taa se ɛlakɩ-pʋ paa pɩɩwɛɛ se ɛtɔɔ kʋñɔŋ yɔ. Yesu kaakam ñʋʋ nɛ ɛ-Caa sɔɔlɩm labʋ, pʋyɔɔ etiyele se nabʋyʋ ɛɖɩɣ-ɩ nʋmɔʋ se ɛtaatalɩ kaɖʋwa ŋga.

3. (a) Ɛbɛ apostoloo Pɩyɛɛrɩ kpɛlɩkɩ Yesu cɔlɔ? (b) Ɛbɛ Pɩyɛɛrɩ seɣti e-koobiya Krɩstʋ mba se pala? (1 Pɩyɛɛrɩ 4:1)

³ Pɩyɛɛrɩ nɛ apostoloowaa lalaa paahiɣ waɖɛ nɛ pa nɛ Yesu pacaɣ nɛ patɩlɩ ɖɔɖɔ ɛ-maɣzɩm. Alɩwaatʋ ndʋ fezuu kiɖeɖeu sɩnɩ Pɩyɛɛrɩ nɛ ɛma ɛ-kajalaɣ takayaɣ yɔ, eseɣti Krɩstʋ mba se pɛwɛɛnɩ maɣzɩm mbʋ Krɩstʋ wɛna yɔ.a (Kalɩ 1 Pɩyɛɛrɩ 4:1.) Kiɖe tɛɛ kʋnʋŋ taa lɛ, tɔm loyaɣ ŋga Pɩyɛɛrɩ labɩnɩ tʋmɩyɛ nɛ pɛɖɛzɩ-kɛ se «ɩwɛɛnɩ» yɔ, kawɩlɩɣ ɛzɩma sɔɔjanaa kpakɩɣ you wondu se pala you yɔ. Ye mbʋ, ye Krɩstʋ mba ɩwɛnɩ Yesu maɣzɩm yɔ, pakaɣ wɛnʋʋ mbʋ payɩ pɩpɔzʋʋ-wɛ yɔ se pɩsa nɛ pakaɖɩnɩ mbʋ piseɣtiɣ-wɛ se pala kɩdɛkɛdɩm yɔ nɛ palʋbɩnɩ ɖɔɖɔ Sataŋ ɛjaɖɛ.—2 Kɔr. 10:​3-5; Efɛz. 6:12.

4. Ɛzɩma tɔm ñʋʋ kʋnɛ kɩpɩzɩɣ kɩsɩnɩ-ɖʋ nɛ ɖɩɖɔ Pɩyɛɛrɩ lɔŋ tasʋʋ yɔɔ?

⁴ Ðɩkaɣ naʋ maɣzɩm mbʋ Yesu kaawɛna yɔ nɛ ɛzɩma ɖɩpɩzɩɣ nɛ ɖɩmaɣzɩnɩ-ɩ yɔ. Ðɩkaɣ kpɛlɩkʋʋ ɛzɩma ɖɩpɩzɩɣ nɛ (1) ɖɩmaɣzɩnɩ Yehowa maɣzɩm, nɛ pɩsɩnɩ-ɖʋ nɛ ɖa nɛ lalaa ɖɩwɛɛnɩ lɩmaɣza kʋɖʋma yɔ, (2) ɖiluuzi ɖa-tɩ nɛ (3) ɖɩtɩŋnɩ adɩma yɔɔ nɛ ɖɩtaa Yehowa liu nɛ ɖɩwɛɛnɩ maɣzɩm mbʋ pɩmʋnaa yɔ.

MAƔZƖNƖ YEHOWA MAƔZƖM

5. Alɩwaatʋ natʋyʋ, Pɩyɛɛrɩ taawɛɛnɩ Yehowa maɣzɩm; ɛzɩma tɩyɛ?

⁵ Iyele nɛ ɖɩna Pɩyɛɛrɩ kɩɖaʋ. Alɩwaatʋ natʋyʋ, ɛtaawɛɛnɩ Yehowa maɣzɩm tɔm natʋyʋ yɔɔ. Yesu heyi ɛ-apostoloowaa se pɩwɛɛ se ewolo Yeruzalɛm nɛ paɖʋzɩ-ɩ Ɛsɔ sɛtʋ ñʋndɩnaa nesi tɛɛ, panazɩ-ɩ nɛ pʋwayɩ lɛ pakʋ-ɩ. (Mat. 16:21) Pɩɩlabɩ Pɩyɛɛrɩ kaɖɛ se etisi se Yehowa kaɣ haʋ nʋmɔʋ se pakʋ Yesu, pʋ-tɔbʋʋ se Mesiya weyi ɛ-tɔm paayɔɔdaa yɔ nɛ weyi Izrayɛɛlɩ kpeekpe taɣaɣ liu yɔ. (Mat. 16:16) Pʋyɔɔ Pɩyɛɛrɩ kɛzɩ Yesu kɩjaʋ nɛ eheyi-i se: «Kɩbaɣlʋ, ñɩnɩ ña-tɩ kɩbandʋ; pɩɩkaɣ-ŋ talʋʋ mbʋ kpa.» (Mat. 16:22) Pɩyɛɛrɩ taawɛɛnɩ Yehowa maɣzɩm tɔm ndʋ tɩ-yɔɔ, pʋyɔɔ ɛ-lɩmaɣza taala nɔɔ kʋɖʋmaɣ nɛ Yesu ñɩna.

6. Ɛzɩma Yesu wɩlaa se ɛ-maɣzɩm labɩ nɔɔ kʋɖʋmaɣ nɛ Yehowa maɣzɩm?

⁶ Yesu maɣzɩm kaalabɩ nɔɔ kʋɖʋmaɣ ɖeyi ɖeyi nɛ ɛ-Caa weyi ɛwɛ ɛsɔdaa yɔ ɛ-maɣzɩm. Yesu heyi Pɩyɛɛrɩ se: «Kɛɛ ma-wayɩ, Sataŋ! Ŋkɛ mbʋ pituuluu-m yɔ, mbʋ pʋyɔɔ yɔ ŋfɛyɩnɩ Ɛsɔ lɩmaɣza, ɛlɛ ɛyaa ñɩna ŋwɛna.» (Mat. 16:23) Pɩtɩla, Pɩyɛɛrɩ kaawɛnɩ lɩmaɣza kɩbana, ɛlɛ Yesu kizi ɛ-lɔŋ tasʋʋ. Ðɩpɩzɩɣ nɛ ɖɩkpɛlɩkɩ lɔŋ ɛ-kɩɖaʋ taa. Yesu kaanawa se pɩsa nɛ ɛla Yehowa sɔɔlɩm lɛ, pɩpɔzʋʋ se ɛtɔɔ kʋñɔŋ. Alɩwaatʋ ndʋ, Pɩyɛɛrɩ kaakpɛlɩkɩ lɔŋ kɩbaŋ nɩɩyɩ; ɛnɩ lɛ se pɩcɛyaa se eyele nɛ ɛ-lɩmaɣza la nɔɔ kʋɖʋmaɣ nɛ Ɛsɔ ñɩna.

7. Ɛzɩma Pɩyɛɛrɩ wɩlɩ pʋwayɩ se ɛsɔɔlaa se ɛlɛɣzɩ ɛ-maɣzɩm nɛ pɩla nɔɔ kʋɖʋmaɣ nɛ Yehowa maɣzɩm? (Cɔnɩ kɩlɛmʋʋ.)

⁷ Pʋwayɩ, Pɩyɛɛrɩ wɩlaa se ɛsɔɔlaa se ɛwɛɛnɩ Yehowa maɣzɩm. Alɩwaatʋ talaa se ajɛɛ lɛɛna taa ñɩma mba patɩpɛlɩ-wɛ yɔ papɩsɩ Ɛsɔ samaɣ taa mba. Ɛsɔ kaaɖʋ Pɩyɛɛrɩ tʋmɩyɛ se esusi tɔm Kɔɔrnɛɛyɩ weyi ɛkɛ ajɛɛ lɛɛna taa kajalaɣ tʋ weyi ɛpɩsɩ Krɩstʋ tʋ yɔ. Yuuda mba nɛ ajɛɛ lɛɛna taa mba pataakpɛndɩɣ nɛ palakɩ nabʋyʋ, pʋyɔɔ pɩɩpɔzaa se Pɩyɛɛrɩ ɛlɛɣzɩ ɛ-maɣzɩm nɛ pɩsa nɛ esusi-wɛ tɔm. Alɩwaatʋ ndʋ Pɩyɛɛrɩ ɖiɣzini Ɛsɔ lɩmaɣzɩyɛ tɔm ndʋ tɩ-yɔɔ yɔ, ɛlɛɣzɩ ɛ-lɩmaɣza. Piyeba nɛ alɩwaatʋ ndʋ petiyi-i yɔ, ‘ɛtɩcɔɔ ɛ-taa kiii’ pʋcɔ nɛ ewolo. (Tʋma 10:​28, 29) Esusi tɔm Kɔɔrnɛɛyɩ nɛ ɛ-ɖɩɣa taa mba nɛ peyele nɛ pamɩyɩsɩ-wɛ lɩm.—Tʋma 10:​21-23, 34, 35, 44-48.

8. Ɛzɩma ɖɩpɩzɩɣ nɛ ɖɩwɩlɩ se ɖa-maɣzɩm labɩ nɔɔ kʋɖʋmaɣ nɛ Yehowa maɣzɩm? (1 Pɩyɛɛrɩ 3:8)

⁸ Pʋwayɩ, Pɩyɛɛrɩ seɣti e-koobiya Krɩstʋ mba se pɛwɛɛnɩ «maɣzɩm kʋɖʋmʋm.» (Kalɩ 1 Pɩyɛɛrɩ 3:8.) Ða nɛ ɖo-koobiya ɖɩpɩzɩɣ nɛ ɖɩwɛɛnɩ maɣzɩm kʋɖʋmʋm ye ɖɩmaɣzɩɣnɩ Yehowa maɣzɩm mbʋ pɩ-tɔm ɖɩkpɛlɩkɩ Bibl taa yɔ. Kɩɖaʋ nakʋyʋ yɔ: Yesu seɣti ɛ-wayɩ tɩŋɩyaa se pasɩɩ Kewiyaɣ kajalaɣ lone taa pe-wezuu caɣʋ taa. (Mat. 6:33) Pʋyɔɔ lɛ, ñɛ-ɛgbɛyɛ taa koobu nɔɔyʋ pɩzɩɣ nɛ ɛkpaɣ lɩmaɣzɩyɛ se ɛlakɩ alɩwaatʋ tɩŋa Ɛsɔ sɛtʋ tʋmɩyɛ naɖɩyɛ. Mbʋ ɛzɩ ɖiiheyi-i se ɛlɩzɩ wezuu ŋgʋ kɩ-caɣʋ wɛɣ-ɩ kɛlɛʋ yɔ lɛ, pɩwɛɣ ɖeu se ɖiheyi-i tɔm kɩbandʋ kaɖʋwa ŋga ɛɖʋ ɛ-tɩ yɔ kɔ-yɔɔ nɛ ɖɩsɩnɩ-ɩ.

WƐƐNƖ TƖ LUZUU

9-10. Ɛzɩma Yesu wɩlaa se ɛwɛnɩ tɩ luzuu siŋŋ?

⁹ Ðoo wena aɖɛwa pʋcɔ nɛ pakʋʋ Yesu yɔ a-taa, ɛkpɛlɩkɩ Pɩyɛɛrɩ nɛ apostoloowaa lalaa lɔŋ pɩlɩɩnɩ tɩ luzuu yɔɔ. Kajalaɣ lɛ, Yesu tiyi Pɩyɛɛrɩ nɛ Yohanɛɛsɩ se powolo nɛ pɔñɔɔzɩ tɔɔnaɣ kɛdɛzaɣ ñɩŋga ŋga ɛ nɛ wɛ pakaɣ tɔɔʋ se pʋcɔ nɛ ɛsɩ yɔ. Pɩtɩla wondu ndʋ pɔñɔɔzaa yɔ tɩ-taa natʋyʋ lɛ ñanaɣ nɛ pɔbɔŋ se pɩsa nɛ pɔkɔ mba powoki tɔɔnaɣ ŋga ka-ɖɩdɔɔyɛ yɔ pa-nɩŋgbanzɩ lɩm. Ɛlɛ akaɣ luzuu ɛ-tɩ nɛ ɛkɔ lalaa nɩŋgbanzɩ lɩm?

¹⁰ Yesu taaɖaŋ se nɔɔyʋ ɛla tʋmɩyɛ nɖɩ, ɛlɛ ɛ-maɣmaɣ ɛlabɩnɩ-ɖɩ nɛ ɛwɩlɩ se ɛwɛnɩ tɩ luzuu siŋŋ. Pɩɩɖɩɣzɩ apostoloowaa kpem se Yesu wɛɛ nɛ ɛlakɩ tʋmɩyɛ nɖɩ pɩɩwɛɛ se lɩmɖʋyaa ɩla yɔ. Yesu hɔzɩ e-tokonaa kɩtɩnaa nɛ ɛsɩɩ hɔɔlʋʋ, ɛkpaɣ pɔbɔʋ nɛ ɛta ɛ-tɩnaɣ taa nɛ ɛɖʋ lɩm ñanaɣ taa nɛ ɛpaɣzɩ ɛ-tɔmkpɛlɩkɩyaa nɩŋgbanzɩ kɔʋ. (Yoh. 13:​4, 5) Pɩtɩla pɩkpaɣ alɩwaatʋ pʋcɔ nɛ ɛkɔ apostoloowaa 12 mba pa-tɩŋa pa-nɩŋgbanzɩ lɩm. Paa mbʋ yɔ Yesu labɩ tʋmɩyɛ nɖɩ ɖɩ-tɩŋa. Halɩ ɛkɔ ɖɔɖɔ Yudaasɩ weyi ɛkaɣaɣ lɩʋ ɛ-wayɩ yɔ ɛ-nɩŋgbanzɩ lɩm. Pʋwayɩ lɛ, Yesu lɩzɩ-wɛ tɔm taa nɛ suuɖu; ɛyɔɔdaa se: «Ɩnɩ mbʋ malabɩ-mɩ yɔ pʋ-tɔbʋʋ na? Ɩyaɣ-m se “Wɩlɩyʋ” nɛ “Kɩbaɣlʋ,” nɛ ɩwɛnɩ toovenim, mbʋ pʋyɔɔ yɔ mbʋ mɛnkɛwa. Ye mbʋ, ye ma weyi mɛnkɛ Kɩbaɣlʋ nɛ Wɩlɩyʋ yɔ mɔnkɔ mɩ-nɩŋgbanzɩ lɩm yɔ, mɩ ɖɔɖɔ pɩwɛɛ se ɩkɔ ɖama nɩŋgbanzɩ lɩm.»—Yoh. 13:​12-14.

11. Ɛzɩma Pɩyɛɛrɩ wɩlaa se ɛkpɛlɩkɩ tɩ luzuu? (1 Pɩyɛɛrɩ 5:5) (Cɔnɩ ɖɔɖɔ kɩlɛmʋʋ.)

¹¹ Pɩyɛɛrɩ kpɛlɩkɩ tɩ luzuu Yesu cɔlɔ. Yesu pɩsɩ ɛsɔdaa lɛ, Pɩyɛɛrɩ la maamaaci lakasɩ nasɩyɩ. Ɛwa abalʋ nɔɔyʋ, ɛɛkɛ kaakalaɣ nɛ mbʋ palʋlɩ-ɩ. (Tʋma 1:​8, 9; 3:​2, 6-8) Piyeba nɛ samaɣ sɔsɔɔ nakɛyɛ kpeɣli Pɩyɛɛrɩ cɔlɔ. (Tʋma 3:11) Paa Pɩyɛɛrɩ ɛpaɣlɩ sɔnzɩ nzɩ sɩ-taa ɛyaa sɔɔlɩ lona sɔsɔna nɛ hɩɖɛ ɖʋʋ yɔ, etiyele nɛ pɛcɛlɩ-ɩ samtʋ. Ɛlɛ eluzi ɛ-tɩ nɛ ɛcɛlɩ samtʋ Yehowa nɛ Yesu. Ɛyɔɔdaa se: «[Yesu] hɩɖɛ taa, nɛ tisuu mbʋ ɖɩwɛnɩ ɛ-hɩɖɛ yɔɔ yɔ, pʋyɔɔ abalʋ weyi ɩnaɣ nɛ ɩsɩmɩ-ɩ yɔ, ɛkpa ɖoŋ.» (Tʋma 3:​12-16) Alɩwaatʋ ndʋ Pɩyɛɛrɩ ma Krɩstʋ mba takayaɣ se ɛwɩlɩ-wɛ se pɩcɛyaa se pɛwɛɛnɩ tɩ luzuu yɔ, ɛlabɩnɩ tʋmɩyɛ tɔm pee naayɛ. Tɔm pee ana atɔzʋʋ-ɖʋ alɩwaatʋ ndʋ Yesu tam pɔbɔʋ ɛ-tɩnaɣ taa nɛ ɛkɔ ɛ-apostoloowaa nɩŋgbanzɩ lɩm yɔ tɩ-yɔɔ.—Kalɩ 1 Pɩyɛɛrɩ 5:5.

12. Ɛzɩma ɖɩpɩzɩɣ nɛ ɖiwolo pɩ-yɔɔ nɛ ɖɩwɩlɩ se ɖɩwɛnɩ tɩ luzuu ɛzɩ Pɩyɛɛrɩ yɔ?

¹² Ðɩpɩzɩɣ nɛ ɖɩmaɣzɩnɩ Pɩyɛɛrɩ kɩɖaʋ nɛ ɖɩwɛɛnɩ tɩ luzuu. Tɔzɩ se pɩtɩkɛ ɖɔ-yɔɔdaɣ ɖeke wɩlɩɣna se ɖɩwɛnɩ tɩ luzuu. Tɔm loyaɣ ŋga Pɩyɛɛrɩ labɩnɩ tʋmɩyɛ nɛ pɛɖɛzɩ-kɛ se «iluzi mɩ-tɩ» yɔ, kawɩlɩɣ se tɩ luzuu tukuuni ɖɔɖɔ lɩmaɣza wena ɖɩwɛnɩ ɖa-tɩ yɔɔ nɛ ɛyaa lalaa yɔɔ yɔ. Pɩtɩkɛ samtʋ ɖɩñɩnɩɣ nɛ ɖɩlakɩ ɛyaa lalaa camɩyɛ lakasɩ ɛlɛ ɖɩlakɩ mbʋ, mbʋ pʋyɔɔ yɔ ɖɩsɔɔlɩ Yehowa nɛ ɛyaa. Ye ɖɩɖʋʋ Yehowa nɛ ɖo-koobiya lɩm nɛ taa leleŋ paa ɛyaa ɩɩnaɣ mbʋ ɖɩlakɩ yɔ, ɖɩwɩlɩɣ se ɖɩwɛnɩ tɩ luzuu siŋŋ.—Mat. 6:​1-4.

WƐƐNƖ «MAƔZƖM MBƲ PƖMƲNAA YƆ»

13. Ye pɔtɔm se ɖɩwɛɛnɩ «maɣzɩm mbʋ pɩmʋnaa yɔ,» pʋ-tɔbʋʋ lɛ suwe?

¹³ Ye pɔtɔm se ɖɩwɛɛnɩ «maɣzɩm mbʋ pɩmʋnaa yɔ,» pʋ-tɔbʋʋ lɛ suwe? (1 Pɩy. 4:7) Krɩstʋ tʋ weyi ɛwɛnɩ maɣzɩm mbʋ pɩmʋnaa yɔ, ɛlakɩ mbʋ ɛpɩzɩɣ yɔ nɛ ɛkpakɩɣ lɩmaɣza wena alakɩ nɔɔ kʋɖʋmaɣ nɛ Yehowa ñɩna yɔ. Ɛnawa se nabʋyʋ tɔm tɩcɛyɩ e-wezuu caɣʋ taa nɛ pɩkɩlɩ ɛ nɛ Yehowa pa-taabalɩyɛ. Ɛɛmaɣzɩɣ se ɛ-tɔm cɛyaa nɛ pɩkɩlɩ lalaa, nɛ ɛnɩɣ pɩ-taa ɖɔɖɔ se ɛɛsɩŋ tɔm tɩŋa. Pɩtasɩ lɛ, ɛñɔtʋʋnɩ Yehowa adɩma taa ɖoŋ ɖoŋ nɛ pɩwɩlɩ se ɛtaɣ-ɩ liu.b

14. Alɩwaatʋ natʋyʋ Pɩyɛɛrɩ tɩtaa Yehowa liu, ɛzɩma tɩyɛ?

¹⁴ Ðoo wena aɖɛwa pʋcɔ nɛ pakʋʋ Yesu yɔ a-taa, eheyi ɛ-tɔmkpɛlɩkɩyaa se: «Mɩ-tɩŋa payɩ pɩkaɣ-mɩ tuuluu mɔ-yɔɔ ɖoo anɛ.» Pɩyɛɛrɩ cosi nɛ ɛtɔ se: «Paa ñɔ-yɔɔ lɛ, pituuluu lalaa yɔ, ma lɛ pɩɩkaɣ-m tuuluu kpa!» Ðoo ana, Yesu tasɩ lɔŋ ɛ-tɔmkpɛlɩkɩyaa nabɛyɛ nɛ ɛtɔ se: «Ɩwɛɛ feŋuu yɔɔ nɛ ɩwɛɛ adɩma yɔɔ.» (Mat. 26:​31, 33, 41) Ye Pɩyɛɛrɩ ɛɛɖɔm lɔŋ tasʋʋ mbʋ pɩ-yɔɔ yɔ, pɩtɩla ɛɛlabɩ abalɩtʋ nɛ etisi se ɛkɛ Yesu tɔmkpɛlɩkɩyʋ. Ɛlɛ Pɩyɛɛrɩ yɔɔdaa se ɛɛsɩŋ Yesu, nɛ ekpiɖi pʋwayɩ siŋŋ.—Mat. 26:​69-75.

15. Ɛzɩma Yesu wɩlaa se ɛwɛnɩ maɣzɩm mbʋ pɩmʋnaa yɔ ɖoo wena aɖɛwa pʋcɔ nɛ pakʋʋ-ɩ yɔ a-taa?

¹⁵ Yesu ta Yehowa liu kiya. Paa Yesu kaatalɩ pilim yɔ, ɛtɩmɩ tam sakɩyɛ ɖoo wena aɖɛwa pʋcɔ nɛ pakʋʋ-ɩ yɔ a-taa. Mbʋ hanɩ-ɩ abalɩtʋ nɛ ɛla Yehowa sɔɔlɩm. (Mat. 26:​39, 42, 44; Yoh. 18:​4, 5) Pɩtʋʋ fɛyɩ se ɛzɩma Pɩyɛɛrɩ na Yesu tɩmaɣ ɖoŋ ɖoŋ yɔ, pɩɩwɛnɩ ɖoŋ sɔsɔŋ ɛ-yɔɔ e-wezuu caɣʋ taa.

16. Ɛzɩma Pɩyɛɛrɩ wɩlaa se ɛɛwɛnɩ maɣzɩm mbʋ pɩmʋnaa yɔ? (1 Pɩyɛɛrɩ 4:7)

¹⁶ Alɩwaatʋ wɛɛ nɛ tɩɖɛɣ lɛ, Pɩyɛɛrɩ kpɛlɩkɩ ɛzɩma pɩwɛɛ se ɛtɩŋnɩ adɩma yɔɔ nɛ ɛwɩlɩ se ɛtaɣ Yehowa liu yɔ. Pefezi Yesu lɛ, eheyi Pɩyɛɛrɩ nɛ apostoloowaa lalaa se pakaɣ mʋʋ fezuu kiɖeɖeu nɛ kɩsɩnɩ-wɛ nɛ posusi tɔm kɩbandʋ. Ɛlɛ Yesu heyi-wɛ se pacaɣ Yeruzalɛm pɩkɔɔ nɛ pɩsɩɩnɩ alɩwaatʋ ndʋ pamʋ-kʋ yɔ. (Luka 24:49; Tʋma 1:​4, 5) Alɩwaatʋ ndʋ Pɩyɛɛrɩ ɖaŋaɣ yɔ, ɛbɛ ɛlakaɣ? Pɩyɛɛrɩ nɛ Krɩstʋ mba lalaa ‘paawɛ adɩma yɔɔ.’ (Tʋma 1:​13, 14) Kajalaɣ takayaɣ ŋga Pɩyɛɛrɩ ma pʋwayɩ yɔ ka-taa, eseɣti e-koobiya Krɩstʋ mba se pɛwɛɛnɩ maɣzɩm mbʋ pɩmʋnaa yɔ, nɛ patɩŋnɩ adɩma yɔɔ nɛ pawɩlɩ se pataɣ Yehowa liu. (Kalɩ 1 Pɩyɛɛrɩ 4:7.) Pɩyɛɛrɩ kpɛlɩkɩ ɛzɩma ɛtaa Yehowa liu yɔ. Nɛ ɛsɩnɩ koobiya nɛ ɛkpazɩ-wɛ ɖoŋ.—Gal. 2:9.

17. Paa ɖɩwɛ niye hɔɔlɩŋ sakɩyɛ taa yɔ, ɛbɛ pɩwɛɛ se ɖiwolo pɩ-yɔɔ nɛ ɖɩlakɩ? (Cɔnɩ ɖɔɖɔ kɩlɛmʋʋ.)

¹⁷ Pɩsa nɛ ɖɩwɛɛnɩ maɣzɩm mbʋ pɩmʋnaa yɔ lɛ, pɩwɛɛ se ɖɩtɩmɩɣnɩ Yehowa ɖoŋ ɖoŋ. Ðiɖiɣzinaa se pɩcɛyaa se ɖiwolo pɩ-yɔɔ nɛ ɖɩtɩmɩɣnɩ Yehowa se ɛsɩnɩ-ɖʋ paa ɖɩwɛ niye hɔɔlɩŋ sakɩyɛ taa yɔ. Pʋyɔɔ lɛ, ɖɩtɩmɩɣnɩ Yehowa se ɛsɩnɩ-ɖʋ kɔzɩ kɔzɩ alɩwaatʋ ndʋ ɖɩcaɣ kpaɣʋ lɩmaɣzɩyɛ sɔsɔɖɛ naɖɩyɛ yɔ, nɛ ɖa-taa tɛma se ɛnʋ sɩmnɩ mbʋ pɩwazɩɣ-ɖʋ nɛ pɩkɩlɩ yɔ.

18. Ɛzɩma ɖɩpɩzɩɣ nɛ ɖɩwɛɛnɩ Yehowa maɣzɩm nɛ pɩkɩlɩ?

¹⁸ Ðɩwɛnɩ ɛsɩmɩyɛ siŋŋ se Yehowa lɩzɩ-ɖʋ lɛ, ɛha-ɖʋ waɖɛ se ɖɩmaɣzɩnɩ ɛ-wɛtʋ kɩbandʋ. (Kiɖe 1:26) Pɩkɛ toovenim se ɖɩɩpɩzɩɣ nɛ ɖɩmaɣzɩnɩ Yehowa kiya. (Iza. 55:9) Paa mbʋ yɔ, ɛzɩ Pɩyɛɛrɩ yɔ ɖɩpɩzɩɣ ɖɩkpɛlɩkɩ nɛ ɖɩwɛɛnɩ Yehowa maɣzɩm nɛ pɩkɩlɩ. Pɩsa nɛ ɖɩla mbʋ lɛ, pɩwɛɛ se ɖɩmaɣzɩnɩ Yehowa maɣzɩm, ɖɩwɛɛnɩ tɩ luzuu nɛ ɖɩwɛɛnɩ maɣzɩm mbʋ pɩmʋnaa yɔ.