Wɛɛnɩ tɩ luzuu alɩwaatʋ ndʋ ŋŋsɩŋ tɔm natʋyʋ yɔ

1. Waɖɛ nɖɩ Yehowa ha-ɖʋ, nɛ ɛbɛ yɔɔ?

YEHOWA lɩzɩ-ɖʋ lɛ, ɛha-ɖʋ waɖɛ se ɖɩmaɣzɩ, ɖɩkpɛlɩkɩ tɔm kɩfatʋ, ɖɩwɛɛnɩ tɔm taa nɩʋ lɛɣtʋ nɛ lɔŋsɩnɖɛ. Ɛbɛ yɔɔ ɛlɩzɩ-ɖʋ mbʋ? Ɛsɔɔlaa se ɖɩwɛɛnɩ ‘Ɛsɔ sɩmtʋ’ nɛ ɖɩsɛɛ-ɩ nɛ ɖa-ñʋʋ taa maɣzɩm.—Adu. 2:​1-5; Roma 12:1.

2. (a) Paa ɖɩwɛnɩ waɖɛ se ɖɩkpɛlɩkɩ tɔm sakɩyɛ yɔ, ɛbɛ ɖɩɩpɩzɩɣ nɛ ɖɩla? (Yɔɔb 37:​23, 24) (Cɔnɩ ɖɔɖɔ kɩlɛmʋʋ.) (b) Ye ɖɩwɛnɩ tɩ luzuu nɛ ɖitisi se ɖɩɩsɩŋ tɔm tɩŋa yɔ, ɛzɩma pɩwazɩɣ-ɖʋ?

² Paa ɖɩwɛnɩ waɖɛ se ɖɩkpɛlɩkɩ tɔm sakɩyɛ yɔ, ɖɩɩpɩzɩɣ nɛ ɖɩtɩlɩ tɔm tɩŋa. (Kalɩ Yɔɔb 37:​23, 24.) Iyele nɛ ɖɩna Yɔɔb kɩɖaʋ. Yehowa kaapɔzɩ-ɩ tɔm sakɩyɛ, nɛ tɔm pɔzʋʋ mbʋ pɩsɩnɩ Yɔɔb nɛ eɖiɣzina se ɛɛsɩŋ tɔm tɩŋa. Piyeba nɛ Yɔɔb luzi ɛ-tɩ nɛ ɛlɛɣzɩ ɛ-maɣzɩm. (Yɔɔb 42:​3-6) Ða ɖɔɖɔ, ye ɖɩwɛnɩ tɩ luzuu nɛ ɖitisi se ɖɩɩsɩŋ tɔm tɩŋa yɔ pɩwazɩɣ-ɖʋ. Tɩ luzuu mbʋ, pɩsɩɣnɩ-ɖʋ nɛ ɖɩtaa Yehowa liu se ɛkaɣ-ɖʋ wɩlʋʋ mbʋ ɖeyi ɖeyi pɩpɔzʋʋ se ɖɩtɩlɩ nɛ ɖɩpɩzɩ ɖɩkpaɣ lɩmaɣza kɩbana yɔ.—Adu. 2:6.

3. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

³ Tɔm ñʋʋ kʋnɛ kɩ-taa, ɖɩkaɣ naʋ tɔm ndʋ ɖɩɩsɩŋ yɔ tɩ-taa natʋyʋ nɛ nɩɣzɛ wena pɩpɩzɩɣ piyele nɛ ɖɩwɛɛna yɔ. Ðɩkaɣ naʋ ɖɔɖɔ mbʋ pʋyɔɔ pɩwɛ ɖeu se ɖɩɩsɩŋ tɔm tɩŋa yɔ. Pɩkaɣ yebu nɛ ɖa-taa tɛ nɛ pɩkɩlɩ se Yehowa, «Weyi ɛ-sɩmtʋ talɩ pilim yɔ» eheyiɣ-ɖʋ tɔm ndʋ ɖeyi ɖeyi pɩpɔzʋʋ se ɖɩtɩlɩ yɔ.—Yɔɔb 37:16.

ÐƖƖSƖŊ ALƖWAATƲ NDƲ ƐJAÐƐ KAƔ TƐM YƆ

4. Ɛzɩ Maatiyee 24:36 yɔɔdʋʋ yɔ, tɔm ndʋ ɖɩɩsɩŋ?

⁴ Kalɩ Maatiyee 24:36. Ðɩɩsɩŋ alɩwaatʋ ndʋ ɛjaɖɛ ɖɩnɛ ɖɩkaɣ tɛm yɔ. Halɩ, alɩwaatʋ ndʋ Yesu kaawɛ tɛtʋ yɔɔ yɔ ɛtaatɩlɩ «kɩyakʋ ŋgʋ nɛ ñɩɣyʋʋ ŋgʋ.»a Pʋwayɩ eheyi ɛ-apostoloowaa se Yehowa wɛnɩnɩ waɖɛ se ɛlɩzɩ alɩwaatʋ ndʋ ɛsɔɔlaa se nabʋyʋ ɛla yɔ. (Tʋma 1:​6, 7) Yehowa tɛm ɖʋʋ alɩwaatʋ ndʋ ɛjaɖɛ ɖɩnɛ ɖɩkaɣ tɛm yɔ, ɛlɛ ɖɩɩpɩzɩɣ nɛ ɖɩtɩlɩ alɩwaatʋ ndʋ ɖeyi ɖeyi pɩkaɣ labʋ mbʋ yɔ.

5. Ɛzɩma ɖɩɩsɩŋ alɩwaatʋ ndʋ ɛjaɖɛ kaɣ tɛm yɔ pʋyɔɔ lɛ, ɖoŋ weyi pɩpɩzɩɣ nɛ pɩwɛɛnɩ ɖɔ-yɔɔ?

⁵ Ɛzɩ Yesu yɔɔdʋʋ yɔ, ɖɩɩsɩŋ alɩwaatʋ ɛzɩma pɩwɛɛ se ɖɩɖaŋ pʋcɔ nɛ ɛjaɖɛ tɛ yɔ. Pʋyɔɔ lɛ, pɩpɩzɩɣ pɩnɩɩ-ɖʋ nɛ ɖaŋʋʋ yaa pitibi-ɖʋ yɔɔɔ, kɔzɩ kɔzɩ ye ɖɩpaɣzʋʋ ɖaŋʋʋ yɔ pɩlabɩ alɩwaatʋ sakɩyɛ yɔ. Pɩpɩzɩɣ ɖɔɖɔ nɛ pɩlabɩ-ɖʋ kaɖɛ se ɖɩɖɔkɩ ɖa-tɩ alɩwaatʋ ndʋ ɖɔ-hɔʋ taa mba yaa ɛyaa lalaa hoŋuu-ɖʋ yɔ. (2 Pɩy. 3:​3, 4) Pɩpɩzɩɣ nɛ pɩlabɩ-ɖʋ ɛzɩ ye ɖɩsɩm evemiye nɖɩ ɖeyi ɖeyi ɛjaɖɛ kaɣ tɛm yɔ, pɩsɩɣnɩ-ɖʋ nɛ ɖɩwɛɛ suuɖu nɛ pɩkɩlɩ nɛ ɖɩɖɔkɩ ɖa-tɩ alɩwaatʋ ndʋ ɛyaa hoŋuu-ɖʋ yɔ.

6. Ɛbɛ yɔɔ pɩwɛ ɖeu se ɖɩɩsɩŋ kɩyakʋ ŋgʋ ɛjaɖɛ kaɣ tɛm yɔ?

⁶ Toovenim taa lɛ, Yehowa tiheyi-ɖʋ alɩwaatʋ ndʋ tɩ-yɔɔ ɖeyi ɖeyi ɛjaɖɛ kaɣ tɛm yɔ, mbʋ pʋyɔɔ yɔ ɛsɔɔlaa se ɖɩwɩlɩ se ɖɩsɛɣ-ɩ mbʋ pʋyɔɔ yɔ ɖɩsɔɔlɩ-ɩ nɛ ɖɩtaɣ-ɩ liu. Ðɩɩsɛɣ Yehowa se pɩkɔɔ nɛ pɩsɩɩnɩ ɛjaɖɛ tɛm wiye, ɛlɛ ɖɩsɔɔlaa se ɖɩsɛɛ-ɩ tam. Mbʋ ɛzɩ ɖɩɩkam ɖa-lɩmaɣza alɩwaatʋ ndʋ «Yehowa kɩyakʋ» kaɣ kɔm yɔ tɩ-yɔɔ lɛ, pɩwɛɣ ɖeu se ɖɩkam-yɛ mbʋ pɩkaɣ labʋ kɩyakʋ ŋgʋ kɩ-wayɩ yɔ pɩ-yɔɔ. Ye ɖɩlakɩ mbʋ yɔ, pɩsɩɣnɩ-ɖʋ nɛ ɖiwolo pɩ-yɔɔ nɛ ɖɩñɔɔnɩ Yehowa nɛ pɩkɩlɩ, nɛ ɖɩkaɣ labʋ mbʋ ɖɩpɩzɩɣ yɔ nɛ ɖɔ-tɔm kɛdɩnɩ-ɩ.—2 Pɩy. 3:​11, 12.

7. Tɔm ndʋ ɖɩsɩma?

⁷ Pɩwɛɣ ɖeu se ɖɩka ɖa-lɩmaɣza tɔm ndʋ ɖɩsɩma yɔ tɩ-yɔɔ. Ðɩsɩma se kɛdɛzaɣ kɩyakɩŋ paɣzɩ pɩnaɣ 1914 taa. Pɩtɩkɛ natʋ tɔm ndʋ tɩwɩlɩɣ se kɛdɛzaɣ kɩyakɩŋ paɣzɩ pɩnaɣ 1914 taa yɔ ti-ɖeke Yehowa wɩlɩ-ɖʋ. Ɛlɛ eheyi-ɖʋ ɖɔɖɔ mbʋ pɩkaɣ labʋ ɛjaɖɛ yɔɔ kpaɣnɩ alɩwaatʋ ndʋ tɩ-taa yɔ. Piyeba nɛ ɖa-taa tɛ se «Yehowa kɩyakʋ sɔsɔʋ ñɔtaa.» (Sof. 1:14) Ðɩsɩm ɖɔɖɔ tʋmɩyɛ nɖɩ Yehowa sɔɔlaa se ɖɩla yɔ. Ɛsɔɔlaa se ɖisusi ɛyaa sakɩyɛ «Kewiyaɣ tɔm kɩbandʋ.» (Mat. 24:14) Pɛwɛɛ nɛ posusuu tɔm ndʋ ajɛɛ ɛzɩ 240 taa mbʋ yɔ nɛ kʋnʋmɩŋ weyi ɩcɛzɩ 1000 mbʋ yɔ yɔ ɩ-taa. Pɩtɩcɛyɩ se ɖɩtɩlɩ ɛjaɖɛ tɛm ‘kɩyakʋ nɛ ñɩɣyʋʋ’ pʋcɔ nɛ ɖɩwɛɛ kpeekpe tɔm susuu taa.

ÐƖƖSƖŊ MBƲ ÐEYI ÐEYI YEHOWA LAKƖ YƆ

8. Ɛbɛ tɔm loyaɣ ‘Ɛsɔ toovenim tʋ tʋma’ wɩlɩɣ? (Eklezɩyasɩtɩ 11:5)

⁸ Pɩtɩkɛ paa ɛzɩmtaa ɖɩsɩm «Ɛsɔ toovenim tʋ . . . tʋma.» (Kalɩ Eklezɩyasɩtɩ 11:5.) Tɔm loyaɣ ‘Ɛsɔ toovenim tʋ tʋma’ wɩlɩɣ mbʋ Yehowa lakɩ yaa mbʋ ɛhaɣ nʋmɔʋ se pɩla se pɩsa nɛ ɛ-sɔɔlɩm la yɔ. Ðɩɩpɩzɩɣ nɛ ɖɩtɩlɩ mbʋ pʋyɔɔ ɖeyi ɖeyi Yehowa haɣ nʋmɔʋ se nabʋyʋ ɛla yɔ yaa mbʋ ɖeyi ɖeyi ɛkaɣ labʋ se ɛsɩnɩ-ɖʋ yɔ. (Keɣ. 37:5) Pɩwɛ kaɖɛ kpem se ɖɩnɩɩ tɔm ndʋ tɩ-taa ɛzɩ pɩwɛʋ kaɖɛ se ɖɩtɩlɩ ɛzɩma pɩɣa paɣlɩɣ ko-ɖoo lotu taa yɔ, nɛ halɩ nɛ sɔnɔ ñɩnɩyaa maɣmaɣ ɩɩnɩɣ tɔm ndʋ tɩ-taa ɖeyi ɖeyi.

9. Kala wena ɖɩpɩzɩɣ nɛ ɖɩkatɩ alɩwaatʋ ndʋ ɖɩɩsɩŋ ɛzɩma ɖeyi ɖeyi Yehowa kaɣ-ɖʋ sɩnʋʋ yɔ?

⁹ Alɩwaatʋ ndʋ ɖɩɩsɩŋ ɛzɩma ɖeyi ɖeyi Yehowa kaɣ-ɖʋ sɩnʋʋ yɔ, pɩpɩzɩɣ nɛ pɩwɛɛ-ɖʋ kaɖɛ se ɖɩkpaɣ lɩmaɣza naayɛ. Pɩpɩzɩɣ nɛ pɩwɛɛ-ɖʋ kaɖɛ se ɖɩlaa kɩlaŋ nɛ ɖɩpɩzɩ ɖɩwalɩsɩ ɖɛ-Ɛsɔ sɛtʋ tʋmɩyɛ. Kɩlaŋ ɛnɩ ɩ-taa nɩɩyɩ lɛ se ɖɩcaɣ wezuu kɛlɛʋ yaa ɖɩkʋyɩ nɛ ɖiwolo ɖenɖe pɩpɔzʋʋ Kewiyaɣ tɔm susuyaa nɛ pɩkɩlɩ yɔ. Ye ɖɩtɩtalɩ fezuu taa kaɖʋsɩ nasɩyɩ, yaa pɩlakɩ-ɖʋ ɛzɩ ɖɔ-tɔm susuu tʋmɩyɛ ɛɛlʋlʋʋ pee, yaa ɖɩkatɩ kala naayɛ teokrasɩ tʋmɩyɛ naɖɩyɛ taa yɔ, ɖɩpɩzɩɣ nɛ ɖɩpɔzɩ ɖa-tɩ se ɛzɩ ɖɔ-tɔm kɛdɩnɩ Yehowa.

10. Ɛzɩma ɖɩɩsɩŋ mbʋ Yehowa kaɣ labʋ yɔ, pɩsɩɣnɩ-ɖʋ se ɖɩwɛɛnɩ wɛtʋ kɩbandʋ ndʋ?

¹⁰ Ɛzɩma ɖɩɩsɩŋ mbʋ ɖeyi ɖeyi Yehowa kaɣ labʋ yɔ pʋyɔɔ lɛ, pɩsɩɣnɩ-ɖʋ se ɖɩwɛɛnɩ wɛtʋ kɩbandʋ ɛzɩ tɩ luzuu mbʋ yɔ. Pɩsɩɣnɩ-ɖʋ nɛ ɖɩnɩɩ pɩ-taa se Yehowa lɩmaɣza kɩlɩ ɖa-ñɩna nɛ ɛ-nʋmɔŋ kɩlɩ ɖa-nʋmɔŋ. (Iza. 55:​8, 9) Pɩsɩɣnɩ-ɖʋ ɖɔɖɔ nɛ ɖɩtaa Yehowa liu kiya se ɛkaɣ-ɖʋ sɩnʋʋ nɛ piɖeni-ɖʋ. Alɩwaatʋ ndʋ ɖisusuu tɔm yaa ɖɩlakɩ teokrasɩ tʋmɩyɛ naɖɩyɛ nɛ pɩlʋlɩ pee kɩbana yɔ, ɖɩcɛlɩɣ Yehowa samtʋ. (Keɣ. 127:1; 1 Kɔr. 3:7) Ye nabʋyʋ ɛtɩɖɔ camɩyɛ ɛzɩ ɖɩɩmaɣzʋʋ yɔ, pɩwɛɛ se ɖɩtɔzɩ se Yehowa naɣ pɩtɩŋa. (Iza. 26:12) Pɩwɛɛ se ɖɩla ɖe-ɖeɖe, nɛ ɖiwolo pɩ-yɔɔ nɛ ɖɩtaɣ Yehowa liu se ɛkaɣ labʋ e-ɖeɖe. Ða-taa tɛma se Yehowa kaɣ-ɖʋ wɩlʋʋ nʋmɔʋ ŋgʋ pɩpɔzʋʋ-ɖʋ yɔ, paa ɛtɩtɩŋnɩ maamaaci nʋmɔʋ nakʋyʋ yɔɔ ɛzɩ ɛɛlabʋ nabʋyʋ taa caanaʋ taa yɔ.—Tʋma 16:​6-10.

11. Tɔm kɩcɛyɩtʋ ndʋ ɖɩsɩma?

¹¹ Ðɩsɩma se paa ɛzɩmtaa lɛ Yehowa sɔɔlɩ-ɖʋ, ɛwɛ siɣsiɣ nɛ ɛwɛ lɔŋ. Ðɩsɩma ɖɔɖɔ se mbʋ ɖɩlakɩ Yehowa nɛ ɖo-koobiya yɔ pɩmʋ ñɩm ɛ-ɛsɩndaa siŋŋ. Pɩtasɩ lɛ, ɖɩsɩma se paa ɛzɩmtaa lɛ Yehowa wazɩɣ mba pɔñɔnɩ-ɩ yɔ.—Ebr. 11:6.

ÐƖƖSƖŊ MBƲ PƖKAƔ LABƲ CEE WAYƖ YƆ

12. Ɛzɩ Yakubu 4:​13, 14 yɔɔdʋʋ yɔ, tɔm ndʋ ɖɩɩsɩŋ?

¹² Kalɩ Yakubu 4:​13, 14. Ðɩɩsɩŋ mbʋ pɩkaɣ-ɖʋ talʋʋ cee wayɩ yɔ. Ɛjaɖɛ kɩdɛkɛdɩyɛ ɖɩnɛ ɖɩ-taa, «alɩwaatʋ nɛ mbʋ ɛyʋ tɩɖʋna yɔ» pɩtalɩɣ ɖa-tɩŋa. (Ekl. 9:11) Pʋyɔɔ lɛ, ɖɩɩsɩŋ se ɖɩkaɣ talʋʋ ɖa-kaɖʋsɩ yaa ɖɩɩtalɩɣ-sɩ, nɛ ɖɩɩsɩŋ ɖɔɖɔ se ɖɩkaɣ wɛʋ wezuu nɛ ɖɩla mbʋ pɩpɔzʋʋ yɔ nɛ ɖɩtalɩ-sɩ yaa ɖɩɩwɛɣ.

13. Ɛzɩma ɖɩɩsɩŋ mbʋ ɖeyi ɖeyi pɩkaɣ labʋ cee wayɩ yɔ pʋyɔɔ lɛ, ɖoŋ weyi pɩpɩzɩɣ nɛ pɩwɛɛnɩ ɖɔ-yɔɔ?

¹³ Pɩpɩzɩɣ nɛ pɩwɛɛ-ɖʋ kaɖɛ se ɖɩɖɔkɩ ɖa-laŋɩyɛ mbʋ pʋyɔɔ yɔ ɖɩɩsɩŋ mbʋ ɖeyi ɖeyi pɩkaɣ labʋ cee wayɩ yɔ. Ɛbɛ yɔɔ ɖɩyɔɔdʋʋ mbʋ? Mbʋ pʋyɔɔ yɔ ye ɖɩnɩɣzɩɣ mbʋ pɩpɩzɩɣ nɛ pɩla cee wayɩ yɔ pɩ-yɔɔ yɔ, pɩpɩzɩɣ piyele nɛ ɖilesi ɖa-taa leleŋ. Ðe-wezuu caɣʋ pɩzɩɣ nɛ pɩlɛɣzɩ tuda yaa nabʋyʋ pɩzɩɣ nɛ pɩla tuda nɛ piyele nɛ ɖɩsʋʋ laŋwɛɛkɩyɛ taa siŋŋ nɛ pisidi ɖa-maɣzɩm taa. Nɛ ye ɖɩɖaŋ nabʋyʋ nɛ pɩɩkɔŋ ɛzɩ ɖɩmaɣzʋʋ yɔ, pɩpɩzɩɣ nɛ pitibi-ɖʋ yɔɔɔ.—Adu. 13:12.

14. Ɛbɛ pɩwɛɛ se ɖɩla nɛ ɖihiɣ koboyaɣ siŋŋ? (Cɔnɩ ɖɔɖɔ kɩlɛmɩŋ.)

¹⁴ Alɩwaatʋ ndʋ ɖɩɖɔkʋʋ ɖa-laŋɩyɛ kala taa yɔ, ɖɩwɩlɩɣ se paa ɛbɛ ɛtɩɩlakɩ yɔ ɖɩsɛɣ ɖa-Caa weyi ɛwɛ ɛsɔdaa yɔ mbʋ pʋyɔɔ yɔ ɖɩsɔɔlɩ-ɩ, nɛ pɩtɩkɛ piɖeni men-ɖeke lɩmaɣza naayɛ yɔɔ ɖɩsɛɣ-ɩ. Bibl taa kɛdɛsɩ wɩlɩɣ se pɩtɩpɔzɩ se ɖɩɖaŋ se Yehowa ɛkandɩyɩ ɖɔ-yɔɔ kʋñɔmɩŋ weyi payɩ ɖɩkatɩɣ yɔ ɩ-taa, nɛ sɩwɩlɩɣ ɖɔɖɔ se ɛtɩma mbʋ pɩkaɣ labʋ ɖe-wezuu caɣʋ taa yɔ nɛ ɛsɩɩ. Yehowa nawa se ɖɩpɩzɩɣ nɛ ɖɩwɛɛ koboyaɣ taa paa ɖɩɩsɩŋ mbʋ pɩkaɣ-ɖʋ talʋʋ cee wayɩ yɔ pɩtɩŋa yɔ. Ye ɖɩñaŋɩ-ɩ nɛ ɖiyeki nɛ eɖiyiɣ-ɖʋ yɔ, mbʋ kaɣnɩ yebu nɛ ɖihiɣ koboyaɣ. (Yer. 10:23) Ye ɖɩpɩsɩɣnɩ Yehowa yɔɔ se ɛsɩnɩ-ɖʋ alɩwaatʋ ndʋ ɖɩcaɣ kpaɣʋ lɩmaɣza yɔ, pɩwɛ ɛzɩ ɖɩwɛɛ nɛ ɖɩtɔŋ se: «Ye Yehowa ɛsɔɔlaa yɔ, ɖɩkaɣ wɛʋ wezuu nɛ ɖɩla pʋnɛ yaa mbʋ yɔ» yɔ.—Yak. 4:15.

15. Tɔm ndʋ ɖɩsɩm cee wayɩ yɔɔ?

¹⁵ Ðɩɩsɩŋ mbʋ pɩkaɣ labʋ paa evemiye nɖɩ yɔ, ɛlɛ ɖɩsɩma se Yehowa labɩ-ɖʋ tamaɣ se ɛkaɣ-ɖʋ haʋ wezuu maatɛŋ paa pɩtɩɩkɛ ɛsɔdaa yaa tɛtʋ yɔɔ yɔ. Ðɩsɩma se ɛɛpɩzɩɣ nɛ ɛcɛtɩ nɛ nabʋyʋ ɛɛpɩzɩɣ nɛ pɩɖɩɣ-ɩ nʋmɔʋ se ɛtaaɖɔ ɛ-tamasɩ yɔɔ. (Tiiti 1:2) E-ɖeke ɛpɩzɩɣna nɛ ɛyɔɔdɩ «mbʋ pɩkaɣ labʋ yɔ pɩ-tɔm, nɛ ɖooo lɔndaa [ɛyɔɔdʋʋ] mbʋ pɩtɩlabɩta yɔ pɩ-tɔm.» Caanaʋ taa, tɔm ndʋ ɛɛyɔɔdaa se tɩkaɣ labʋ yɔ tɩlaba, nɛ tɔm ndʋ ɛyɔɔdaa se tɩkaɣ labʋ cee wayɩ yɔ tɩkaɣ labʋ ɖɔɖɔ. (Iza. 46:10) Ðɩsɩma se nabʋyʋ ɛɛpɩzɩɣ nɛ pɩɖɩɣ Yehowa nʋmɔʋ se ɛtaasɔɔlɩ-ɖʋ, nɛ ɖa-taa tɛmnɩ tɔm ndʋ. (Roma 8:​35-39) Ɛkaɣ hɛzʋʋ ɖa-laŋɩyɛ nɛ ɛha-ɖʋ lɔŋsɩnɖɛ nɛ ɖoŋ weyi pɩpɔzʋʋ-ɖʋ se pɩsa nɛ ɖɩɖɔkɩ ɖa-laŋɩyɛ pɩtɩŋa pɩ-taa yɔ. Ða-taa pɩzɩɣ nɛ pɩtɛ se Yehowa kaɣ-ɖʋ sɩnʋʋ nɛ ɛwazɩ-ɖʋ.—Yer. 17:​7, 8.

ÐƖƖPƖZƖƔ NƐ ÐƖNƖƖ ƐZƖMA YEHOWA SƖM-ÐƲ YƆ PƖ-TAA KIYA

16. Ɛzɩ Keɣa 139:​1-6 yɔɔdʋʋ yɔ, ɛbɛ Yehowa sɩm ɖɔ-yɔɔ nɛ ɖɩɩpɩzɩɣ nɛ ɖɩnɩɩ pɩ-taa kiya?

¹⁶ Kalɩ Keɣa 139:​1-6. Ða-Lɩzɩyʋ sɩm ɖɔ-yɔɔ tɔm tɩŋa. Ɛsɩm mbʋ pʋyɔɔ ɖɩmaɣzɩɣ tɔm natʋyʋ yɔɔ yɔ nɛ ɛsɩm ɛzɩma pɩlakɩ-ɖʋ yɔ nɛ mbʋ pʋyɔɔ pɩlakɩ-ɖʋ mbʋ yɔ. Ɛsɩm tɔm ndʋ ɖɩyɔɔdʋʋ yɔ nɛ tɔm ndʋ tɩwɛ ɖa-laŋɩyɛ taa yɔ. Ɛsɩm ɖɔɖɔ mbʋ payɩ ɖɩlakɩ yɔ nɛ mbʋ pʋyɔɔ ɖɩlakɩ-pʋ yɔ. Wiyaʋ Daviid yɔɔdaa se paa ɛzɩmtaa lɛ Yehowa ɖaŋ kpam se ɛsɩnɩ-ɖʋ nɛ ɛpɩzɩɣ nɛ ɛla mbʋ. Ŋtɩlʋʋ se kedeŋa kpeekpe Kɩbaɣlʋ, Ɛsɔ ɖoŋ tɩŋa tʋ weyi ɛlɩzɩ ɛsɔdaa nɛ tɛtʋ yɔ ɛmaɣzɩɣ ñɔ-yɔɔ pɩdɩɩfɛyɩ yɔ, ɛzɩma pɩlakɩ-ŋ? Daviid yɔɔdaa se: «Ŋsɩmɩ-m sɩm mbʋ yɔ, pɩwɛ-m piti kpem. Maapɩzɩɣ nɛ manɩɩ pɩ-taa.»—Keɣ. 139:​6, pɩ-tɛɛ tɔm.

17. Ɛbɛ yɔɔ pɩpɩzɩɣ nɛ pɩlabɩ-ɖʋ kaɖɛ se ɖitisi se Yehowa sɩm-ɖʋ camɩyɛ?

¹⁷ Pɩtɩla hɔʋ ŋgʋ kɩ-taa ɖɩlɩnaa yɔ, ɖɔ-sɔnzɩ yaa tisuu mbʋ ɖɩɩwɛna pʋcɔ nɛ ɖɩtɩlɩɣ toovenim yɔ pɩpɩzɩɣ piyele nɛ pɩwɛɛ-ɖʋ kaɖɛ se ɖɩna se Yehowa kɛ Caja sɔɔlɩm tʋ nɛ ɖɔ-tɔm kɛdɩnɩ-ɩ. Yaa pɩpɩzɩɣ nɛ pɩlabɩ-ɖʋ ɛzɩ kɩwɛɛkɩm mbʋ ɖɩlaba nɛ pɩɖɛɛ yɔ pɩkɩlɩ paɣlʋʋ nɛ Yehowa ɛɛkaɣ sɔɔlʋʋ kpa se ɛtɩlɩ-ɖʋ yɔ, nɛ kɩwɛɛkɩm mbʋ pɩpɩzɩɣ piyele ɖɔɖɔ nɛ ɖɩmaɣzɩɣ se eposini-ɖʋ kpem. Halɩ alɩwaatʋ natʋyʋ pɩɩlabɩ Wiyaʋ Daviid mbʋ. (Keɣ. 38:​18, 21) Yaa ye nɔɔyʋ ɛwɛɛ nɛ ɛñakɩ pana siŋŋ se ɛlɛɣzɩ e-wezuu caɣʋ nɛ ɛla mbʋ Yehowa sɔɔlaa yɔ, ɛpɩzɩɣ nɛ ɛpɔzɩ ɛ-tɩ se: «Ye Ɛsɔ ɛnɩɣ mɔn-tɔm taa toovenim taa yɔ, ɛbɛ yɔɔ ɛsɔɔlaa se meyele wezuu caɣʋ mbʋ pɩmalɩnɩ-m yɔ?»

18. Ɛbɛ yɔɔ pɩcɛyaa se ɖa-taa ɛtɛ se Yehowa sɩm-ɖʋ nɛ pɩkpaɖɩ ɖa-maɣmaɣ? (Cɔnɩ ɖɔɖɔ kɩlɛmɩŋ.)

¹⁸ Ðɩpɩzɩɣ ɖɩñaɣ pana nɛ ɖa-taa tɛ se Yehowa sɩm-ɖʋ nɛ pɩkpaɖɩ ɖa-maɣmaɣ, nɛ kɩbam mbʋ ɛnaɣ ɖɔ-yɔɔ yɔ ɖa ɖɩɩnaɣ-pʋ. Paa mbʋ yɔ Yehowa naɣ ɖɛ-ɛjandʋ, ɛlɛ ɛnaɣ ɖɔɖɔ pana wena ɖɩñakɩ se ɖɩkɛ ɛyʋ kɩbanʋ yɔ, nɛ ɛsɔɔlɩ-ɖʋ pʋyɔɔ. (Roma 7:15) Alɩwaatʋ ndʋ ɖiɖiɣziɣna se paa ɛzɩmtaa lɛ Yehowa naɣ ɛyʋ weyi ɖɩpɩzɩɣ nɛ ɖɩkɛ yɔ, pɩhaɣ-ɖʋ ɖoŋ weyi pɩpɔzʋʋ-ɖʋ yɔ se ɖɩsɛɛ-ɩ nɛ siɣsiɣ wɛtʋ nɛ ɖɩwɛɛ taa leleŋ taa.

19. Tɔm ndʋ ɖɩsɩm Yehowa yɔɔ nɛ ɖɩɩpɩtɩɣ tɩ-yɔɔ?

¹⁹ Ðɩsɩma se Yehowa kɛ sɔɔlɩm. Ðɩɩpɩtɩɣ tɔm ndʋ tɩ-yɔɔ paa ññɩɩ. (1 Yoh. 4:8) Ðɩsɩma ɖɔɖɔ se paɣtʋ ndʋ payɩ ɛɖʋ-ɖʋ yɔ sɔɔlɩm tuyini-i nɛ ɛɖʋ-ɖʋ tʋ, nɛ paa ɛzɩmtaa lɛ ɛsɔɔlaa se piɖeni-ɖʋ siŋŋ. Pɩtasɩ lɛ, ɖɩsɩma se Yehowa sɔɔlaa se ɖihiɣ wezuu maatɛŋ. Ɛhɛyɩ kɩhɛyʋʋ pʋ-ñʋʋ taa se pɩsa nɛ ɖihiɣ-kʋ. Kɩhɛyʋʋ pʋ-ñʋʋ taa kʋjɔʋ sɩɣnɩ-ɖʋ se ɖa-taa ɛtɛ se paa picoɖuu-ɖʋ yɔ, ɖɩpɩzɩɣ nɛ ɖɩsɛɛ Yehowa ɛzɩ ɛsɔɔlʋʋ yɔ. (Roma 7:​24, 25) Nɛ ɖɩsɩma se «Ɛsɔ kɩlɩ ɖa-laŋa nɛ ɛsɩm pɩtɩŋa.» (1 Yoh. 3:​19, 20) Yehowa sɩm ɖɔ-yɔɔ tɔm tɩŋa, nɛ ɛ-taa tɛma se ɖɩpɩzɩɣ nɛ ɖɩla ɛ-sɔɔlɩm.

20. Ɛbɛ kaɣ-ɖʋ sɩnʋʋ nɛ ɖɩtaanɩɣzɩ kadadayaɣ tɔm ndʋ ɖɩɩsɩŋ yɔ tɩ-yɔɔ?

²⁰ Yehowa heyi-ɖʋ tɔm ndʋ payɩ pɩpɔzʋʋ se ɖɩtɩlɩ yɔ. Ye ɖiluzi ɖa-tɩ nɛ ɖitisi tɔm ndʋ tɩ-yɔɔ yɔ, ɖɩɩkaɣ nɩɣzʋʋ mbʋ pɩ-yɔɔ ɖɩfɛyɩnɩ ɖoŋ yɔ pɩ-yɔɔ, ɛlɛ ɖɩkaɣ kam ɖa-lɩmaɣza mbʋ pɩ-tɔm cɛyɩ siŋŋ yɔ pɩ-yɔɔ. Ye ɖɩlakɩ mbʋ yɔ, ɖɩwɩlɩɣ se ɖɩtaɣ Yehowa liu kiya, ɛnʋ weyi «ɛ-sɩmtʋ talɩ pilim yɔ.» (Yɔɔb 36:4) Paa ɖɩɩnɩɣ tɔm natʋyʋ taa lɛɛlɛɛyɔ yɔ, ɖɩnawa se Yehowa kaɣ wobu pɩ-yɔɔ nɛ ɛwɩlɩɣ-ɖʋ tɔm kɩfatʋ tam tam. Ðɩɖaŋ alɩwaatʋ ndʋ kpam, mbʋ pʋyɔɔ yɔ ɖɩɩkaɣ yebu kpɛlɩkʋʋ tɔm kɩfatʋ ɖɛ-Ɛsɔ Sɔsɔ yɔɔ kpa.—Ekl. 3:11.