Sɩnɩ ñe-Bibl kpɛlɩkɩyaa nɛ palɩzɩ se pɛsɛɣ Yehowa

1-2. (a) Ɛbɛ yɔɔ pɩwɛ Bibl kpɛlɩkɩyaa nabɛyɛ kaɖɛ se palɩzɩ se pɛsɛɣ Yehowa? (b) Ɛbɛ ɖɩkaɣ naʋ tɔm ñʋʋ kʋnɛ kɩ-taa?

ALƖWAATƲ ndʋ ŋcaɣaɣ pɩsʋʋ Yehowa Aseɣɖe Tʋ yɔ, nabʋyʋ kaayeba nɛ pɩlabɩ-ŋ kaɖɛ na? Pɩtɩla sɔɔndʋ kpaɣaɣ-ŋ se ña-tʋmɩyɛ taa mba, ña-taabalaa yaa ñɔ-hɔʋ taa mba kaɣ-ŋ kaɖɩnʋʋ. Yaa pɩtɩla yɔ, pɩlakaɣ-ŋ ɛzɩ ŋŋkaɣ pɩzʋʋ kpa nɛ ŋcaɣ wezuu nɛ pɩla nɔɔ kʋɖʋmaɣ nɛ Ɛsɔ paɣtʋ yɔ. Ye mbʋ yɔ, ŋpɩzɩɣ nɛ ŋnɩɩ Bibl kpɛlɩkɩyaa mba pɩwɛ-wɛ kaɖɛ se pakpaɣ lɩmaɣzɩyɛ se papɩsɩɣ Yehowa Aseɣɖe Tɩnaa yɔ pɔ-tɔm taa.

² Yesu kaaɖiɣzinaa se wɛtʋ ndʋ tɩpɩzɩɣ nɛ tɩɖɩɣ nɔɔyʋ nʋmɔʋ se ɛtaasɛɛ Yehowa. (Mat. 13:​20-22) Paa mbʋ yɔ, etiyele sɩnʋʋ mba sɔɔndʋ kpaɣaɣ-wɛ se patɩŋ ɛ-wayɩ yɔ. Ɛlɛ ɛwɩlɩ ɛ-tɔmkpɛlɩkɩyaa ɛzɩma pɩwɛɛ se pasɩnɩ ɛyaa mba nɛ (1) patɩlɩ mbʋ pɩɖɩkɩ-wɛ nʋmɔʋ se pataasɛɛ Yehowa yɔ, (2) pɛcɛyɩsɩ sɔɔlɩm mbʋ pɛwɛnɩ Yehowa yɔɔ yɔ, (3) pala lɛɣzɩtʋ nɛ pasɩɩ mbʋ pɩ-tɔm kɩlɩ cɛyʋʋ yɔ kajalaɣ ɖeɖe nɛ (4) palʋbɩnɩ kala wena pakatɩɣ yɔ. Ɛzɩma ɖɩpɩzɩɣ nɛ ɖɩlabɩnɩ tʋmɩyɛ tɔm ndʋ Yesu heyi ɛ-tɔmkpɛlɩkɩyaa yɔ alɩwaatʋ ndʋ ɖɩtɩŋɩɣnɩ Nɩɩ wezuu leleŋ tam! takayaɣ yɔɔ se ɖɩsɩnɩ Bibl kpɛlɩkɩyʋ nɔɔyʋ nɛ ɛsɛɛ Yehowa yɔ?

SƖNƖ ÑE-BIBL KPƐLƖKƖYƲ NƐ ƐTƖLƖ MBƲ PƖÐƖKƖ-Ɩ NƲMƆƲ SE ƐTAASƐƐ YEHOWA YƆ

3. Pɩtɩla, ɛbɛ ɖɩkaɣ Niikoodɛm nʋmɔʋ se ɛtaapɩsɩ Yesu tɔmkpɛlɩkɩyʋ?

³ Niikoodɛm kaakɛ Yuuda mba ñʋʋdʋ nɔɔyʋ; pɩɩlabɩ-ɩ kaɖɛ se ɛlɩzɩ se ɛpɩsɩɣ Yesu tɔmkpɛlɩkɩyʋ. Yesu paɣzɩ ɛ-Ɛsɔ sɛtʋ tʋmɩyɛ nɛ pɩla ɛzɩ fenasɩ 6 mbʋ yɔ lɛ, Niikoodɛm ɖiɣzina se Yesu kɛnɩ Mesiya. (Yoh. 3:​1, 2) Paa mbʋ yɔ, Niikoodɛm lɩzaa se ɛkatɩɣ Yesu mɛsaɣ tɛɛ, mbʋ pʋyɔɔ yɔ eseɣaɣ «Yuuda mba sɔɔndʋ.» (Yoh. 7:13; 12:42) Pɩtɩla sɔɔndʋ kpaɣaɣ-ɩ se ye ɛlɩzaa se ɛpɩsɩɣ Yesu tɔmkpɛlɩkɩyʋ yɔ, elesiɣ wala sakɩyɛ.a

4. Ɛzɩma Yesu sɩnɩ Niikoodɛm nɛ ɛtɩlɩ mbʋ Ɛsɔ sɔɔlaa se ɛla yɔ?

⁴ Niikoodɛm kaasɩm paɣtʋ, ɛlɛ pɩɩwɛɛ se pasɩnɩ-ɩ nɛ ɛtɩlɩ mbʋ Yehowa kaasɔɔlaa se ɛla yɔ. Ɛzɩma Yesu sɩnɩ-ɩ? Yesu kaatisi faaa nɛ ɛha-ɩ ɛ-alɩwaatʋ, halɩ etisaa nɛ ɛkatɩ-ɩ ɖoo taa. Nɛ Yesu kaaheyi Niikoodɛm mbʋ pɩɩwɛɛ se ɛla nɛ ɛpɩsɩ ɛ-tɔmkpɛlɩkɩyʋ yɔ kpayɩ kpayɩ, mbʋ lɛ se ekpiɖi ɛ-kɩwɛɛkɩm yɔɔ, eyele nɛ pamɩyɩsɩ-ɩ lɩm nɛ ɛwɛɛnɩ tisuu Ɛsɔ Pɩyalʋ yɔɔ.—Yoh. 3:​5, 14-21.

5. Ɛzɩma ɖɩpɩzɩɣ ɖɩsɩnɩ Bibl kpɛlɩkɩyʋ nɔɔyʋ nɛ ɛtɩlɩ mbʋ pɩɖɩkɩ-ɩ nʋmɔʋ se ɛtaasɛɛ Yehowa yɔ?

⁵ Paa Bibl kpɛlɩkɩyʋ nɔɔyʋ ɛsɩm Masɩ camɩyɛ yɔ, pɩpɩzɩɣ nɛ pɩpɔzɩ se ɖɩsɩnɩ-ɩ nɛ ɛtɩlɩ mbʋ pɩɖɩkɩ-ɩ nʋmɔʋ se ɛtaasɛɛ Yehowa yɔ. Pɩtɩla, ɛ-tʋmɩyɛ mʋʋ-ɩ alɩwaatʋ sakɩyɛ yaa ɛ-hɔʋ taa mba kaɖɩɣnɩ-ɩ, pʋyɔɔ ɛɛlɩzɩɣ se ɛsɛɣ Yehowa. Ye mbʋ, kpaɣ alɩwaatʋ nɛ ŋsɩnɩ ñe-Bibl kpɛlɩkɩyʋ. Ŋpɩzɩɣ nɛ ŋyaa-ɩ se ɛkɔɔ ñɛ-tɛ nɛ ña nɛ ɩ ɩtɔɔ tɔɔnaɣ yaa ña nɛ ɩ ɩlɩɩ nɛ ɩyɛlɩ. Ña nɛ ɩ ɩɩlakɩ mbʋ lɛ, pɩtɩla ɛkaɣ-ŋ heyuu ɛ-yɔɔ tɔm nɛ pɩkɩlɩ nɛ pɩkaɣ-ŋ sɩnʋʋ nɛ ŋtɩlɩ kala wena ɛkatɩɣ yɔ. Seɣti ñe-Bibl kpɛlɩkɩyʋ nɛ ɛla lɛɣzɩtʋ ndʋ pɩpɔzʋʋ yɔ. Sɩnɩ-ɩ nɛ ɛnɩɩ pɩ-taa se ɛlakɩ lɛɣzɩtʋ ndʋ se ɛwɩlɩ se ɛsɔɔlɩ Yehowa, ɛlɛ ɛɛlakɩ-tʋ se ɛ-tɔm ɛkɛdɩnɩ-ŋ.

6. Ɛzɩma ŋpɩzɩɣ nɛ ŋsɩnɩ Bibl kpɛlɩkɩyʋ nɔɔyʋ nɛ ɛwɛɛ abalɩtʋ nɛ ɛlɩzɩ se ɛsɛɣ Yehowa? (1 Kɔrɛntɩ mba 16:13)

⁶ Ye Bibl kpɛlɩkɩyʋ nɔɔyʋ taa ɛtɛma se Yehowa kaɣ-ɩ sɩnʋʋ nɛ ɛɖɔ ɛ-paɣtʋ yɔɔ yɔ, pɩkaɣ-ɩ haʋ abalɩtʋ nɛ ɛɖɔ tɔm ndʋ ɛwɛɛ nɛ ɛkpɛlɩkɩɣ yɔ tɩ-yɔɔ. (Kalɩ 1 Kɔrɛntɩ mba 16:13.) Ðɩpɩzɩɣ ɖɩkpaɣ mbʋ ŋlakɩ se ŋsɩnɩ-ɩ yɔ nɛ ɖɩmaɣzɩnɩ sukuli taa wɩlɩyʋ tʋmɩyɛ. Maɣzɩ alɩwaatʋ ndʋ ŋŋwɛ sukuli taa yɔ tɩ-yɔɔ nɛ ŋna. Wɩlɩyʋ weyi ŋŋkɩlɩ sɔɔlʋʋ? Pɩtʋʋ fɛyɩ se wɩlɩyʋ weyi ɛɖʋwaɣ suuɖu nɛ ɛsɩɣnɩ-ŋ se ŋtaa ña-tɩ liu yɔ, ɛ-tɔm ŋŋkɩlɩ sɔɔlʋʋ. Mbʋ ɖɔɖɔ, Bibl taa tɔm wɩlɩyʋ kɩbanʋ ɛɛwɩlɩɣ Bibl kpɛlɩkɩyʋ mbʋ Ɛsɔ sɔɔlaa se ɛla yɔ pi-ɖeke, ɛlɛ ɛsɩɣnɩ-ɩ se ɛ-taa ɛtɛ se Yehowa kaɣ-ɩ sɩnʋʋ nɛ ɛla lɛɣzɩtʋ ndʋ pɩpɔzʋʋ e-wezuu caɣʋ taa yɔ. Ɛzɩma ŋpɩzɩɣ nɛ ŋla mbʋ?

SƖNƖ ÑE-BIBL KPƐLƖKƖYƲ NƐ ƐCƐYƖSƖ SƆƆLƖM MBƲ ƐWƐNƖ YEHOWA YƆƆ YƆ

7. Ɛzɩma Yesu sɩnɩ ɛyaa se pɔsɔɔlɩ Yehowa nɛ pɩkɩlɩ?

⁷ Yesu kaanawa se ye ɛ-tɔmkpɛlɩkɩyaa ɩsɔɔlɩ Ɛsɔ yɔ, piseɣtiɣ-wɛ nɛ pɔɖɔ tɔm ndʋ pɛkpɛlɩkaa yɔ tɩ-yɔɔ. Ðoŋ ɖoŋ lɛ ɛwɩlaɣ ɛ-tɔmkpɛlɩkɩyaa tɔm ndʋ tɩsɩɣnɩ-wɛ se pɔsɔɔlɩ pa-Caa weyi ɛwɛ ɛsɔdaa yɔ nɛ pɩkɩlɩ yɔ. Kɩɖaʋ nakʋyʋ yɔ: Ɛkpaɣ Yehowa nɛ ɛmaɣzɩnɩ abalʋ weyi ɛhaɣ e-piya wondu kɩbandʋ yɔ. (Mat. 7:​9-11) Pɩtɩla, mba pewelisaɣni Yesu yɔ pa-taa nabɛyɛ caanaa taawɩlɩ-wɛ sɔɔlɩm. Maɣzɩ nɛ ŋna ɛzɩma pɩɩlabɩ-wɛ alɩwaatʋ ndʋ Yesu tuu eduuye nɖɩ ɖɩ-taa caja pʋtɔdɩyɛ nayʋ nɔɔyʋ ɖaɣnɩ mʋʋ ɛ-pɩyalʋ weyi ɛlɩ ɖɩɣa nɛ ewolo ɛcaɣ wezuu kɩdɛkɛdʋʋ yɔ. Yesu sɩnɩ ɛyaa nɛ panɩɩ pɩ-taa se Yehowa sɔɔlɩ-wɛ siŋŋ nɛ ɛsɔɔlaa se ɛsɩnɩ-wɛ.—Luka 15:​20-24.

8. Ɛzɩma ŋpɩzɩɣ ŋsɩnɩ ñe-Bibl kpɛlɩkɩyʋ nɛ ɛcɛyɩsɩ sɔɔlɩm mbʋ ɛwɛnɩ Yehowa yɔɔ yɔ?

⁸ Ña ɖɔɖɔ, ye ŋyɔɔdʋʋ Yehowa wɛtʋ kɩbandʋ tɔm ɖoŋ ɖoŋ alɩwaatʋ ndʋ ŋkpɛlɩkɩɣnɩ ñe-Bibl kpɛlɩkɩyʋ yɔ, pɩsɩɣnɩ-ɩ nɛ ɛcɛyɩsɩ sɔɔlɩm mbʋ ɛwɛnɩ Yehowa yɔɔ yɔ. Paa ɛzɩmtaa ɩɩkpɛlɩkɩɣ lɛ, sɩnɩ-ɩ nɛ ɛna ɛzɩma tɔm ndʋ ɛkpɛlɩkɩɣ yɔ tɩwɩlɩɣ se Yehowa sɔɔlɩ-ɖʋ yɔ. Ɩɩyɔɔdʋʋ kɩhɛyʋʋ pʋ-ñʋʋ taa kɩlaʋ tɔm lɛ, sɩnɩ-ɩ nɛ ɛna ɛzɩma kɩlaʋ ŋgʋ kɩwazɩɣ ɛ-maɣmaɣ yɔ. (Roma 5:8; 1 Yoh. 4:10) Ye Bibl kpɛlɩkɩyʋ ɛna ɛzɩma Yehowa sɔɔlɩ-ɩ kpem yɔ, pɩpɩzɩɣ pɩsɩnɩ-ɩ nɛ ɛsɔɔlɩ Yehowa nɛ pɩkɩlɩ.—Gal. 2:20.

9. Ɛbɛ sɩnɩ Michael nɛ ɛlɛɣzɩ e-wezuu caɣʋ?

⁹ Iyele nɛ ɖɩna Michael kɩɖaʋ, ɛwɛ Ɛndoneezii ɛjaɖɛ taa. Ɛkpɛlɩkɩ toovenim alɩwaatʋ ndʋ ɛɛkɛ pɩɣa yɔ, ɛlɛ ɛtɩha ɛ-tɩ nɛ pamɩyɩsɩ-ɩ lɩm. Ɛɛwɛnɩ pɩnzɩ 18 lɛ, ewolo ɛjaɖɛ lɛɛɖɛ taa se ɛpɩsɩ titan sayʋ. Pʋwayɩ lɛ ɛpɩsɩ Ɛndoneezii ɛjaɖɛ taa nɛ ɛɖɔkɩ nesi, ɛlɛ eyele ɛ-hɔʋ peeɖe nɛ ɛɖaɣnɩ ɖɛʋ ɛjaɖɛ lɛɛɖɛ taa se ɛla tʋmɩyɛ. Alɩwaatʋ natʋyʋ wayɩ lɛ, ɛ-halʋ nɛ ɛ-pɛlɛ papaɣzɩ Bibl kpɛlɩkʋʋ nɛ pɛwɛɛ nɛ pɛɖɛɣnɩ ɛsɩndaa fezuu taa. Michael ɖoo sɩba lɛ, ɛkpaɣ lɩmaɣzɩyɛ se ɛpɩsɩɣ ɖɩɣa nɛ ɛcɔnɩ ɛ-caa yɔɔ, nɛ etisi se pɛkpɛlɩkɩnɩ-ɩ Bibl. Paawɛɛ nɛ pɛkpɛlɩkɩɣ Nɩɩ wezuu leleŋ tam! takayaɣ tɔm kɩkpɛlɩkɩtʋ 27 tɛ hɔɔlʋʋ «Tazɩ nɛ pilimi» lɛ, tɔm ndʋ pɛkpɛlɩkaa yɔ titukuni Michael siŋŋ. Ɛmaɣzɩ laŋwɛɛkɩyɛ nɖɩ ɖɩ-taa Yehowa kaawɛɛ alɩwaatʋ ndʋ ɛ-pɩyalʋ nɩɣaɣ siziŋ yɔ ɖɩ-yɔɔ lɛ, ɛpaɣzɩ wiu. Piyeba nɛ ɛwɛɛnɩ ɛsɩmɩyɛ siŋŋ kɩhɛyʋʋ pʋ-ñʋʋ taa kɩlaʋ yɔɔ nɛ piseɣti-i nɛ ɛlɛɣzɩ e-wezuu caɣʋ nɛ eyele nɛ pamɩyɩsɩ-ɩ lɩm.

SƖNƖ ÑE-BIBL KPƐLƖKƖYƲ NƐ ƐSƖƖ MBƲ PƖ-TƆM KƖLƖ CƐYƲƲ YƆ KAJALAƔ ÐEÐE

10. Ɛzɩma Yesu sɩnɩ ɛ-tɔmkpɛlɩkɩyaa kajalaɣ mba nɛ pasɩɩ mbʋ pɩ-tɔm kɩlɩ cɛyʋʋ yɔ kajalaɣ ɖeɖe? (Luka 5:​5-11) (Cɔnɩ ɖɔɖɔ kɩlɛmʋʋ.)

¹⁰ Pitileɖi pʋcɔ nɛ Yesu tɔmkpɛlɩkɩyaa kajalaɣ mba ɖiɣzina se ɛnʋ kɛnɩ Mesiya, ɛlɛ pɩɩpɔzaa se pasɩnɩ-wɛ nɛ pasɩɩ mbʋ pɩ-tɔm kɩlɩ cɛyʋʋ yɔ kajalaɣ ɖeɖe. Pɩyɛɛrɩ nɛ Andree paatɛm paɣzʋʋ Yesu wayɩ tɩŋʋʋ nɛ pɩla alɩwaatʋ natʋyʋ pʋcɔ nɛ Yesu yaa-wɛ se patɩŋ ɛ-wayɩ alɩwaatʋ tɩŋa. (Mat. 4:​18, 19) Pa nɛ Yakubu nɛ Yohanɛɛsɩ paakɛ kpakpasɩ kpayaa nɛ pa-tʋmɩyɛ nɖɩ ɖɩɖɔŋaɣnɩ-wɛ camɩyɛ. (Mark. 1:​16-20) Alɩwaatʋ ndʋ Pɩyɛɛrɩ nɛ Andree ‘peyebi pe-piyiŋ’ se patɩŋ Yesu wayɩ yɔ, pɩtɩla yɔ pamaɣzɩ mbʋ papɩzɩɣ nɛ pala nɛ pɔcɔnɩ pɔ-hɔŋ kɩcɛyɩm ɖeɖe yɔ pɩ-yɔɔ. Ɛbɛ seɣti-wɛ se pasɩɩ mbʋ pɩ-tɔm kɩlɩ cɛyʋʋ yɔ kajalaɣ ɖeɖe? Luka takayaɣ kɛdaa se Yesu labɩ maamaaci lakasɩ nasɩyɩ nɛ nzɩ yebina nɛ lidaʋ ŋgʋ pɛwɛna se Yehowa pɩzɩɣ nɛ ɛcɔnɩ pa-kɩcɛyɩm ɖeɖe yɔ kɩkpa ɖoŋ.—Kalɩ Luka 5:​5-11.

11. Tɔm ndʋ ɖɩpɩzɩɣ nɛ ɖɩkɛdɩ ɖe-Bibl kpɛlɩkɩyʋ nɛ ɖɩkpazɩ e-tisuu ɖoŋ?

¹¹ Ðɩɩpɩzɩɣ nɛ ɖɩla maamaaci lakasɩ ɛzɩ Yesu yɔ, ɛlɛ ɖɩpɩzɩɣ nɛ ɖɩkɛdɩ lalaa ɛzɩma Yehowa sɩɣnɩ mba pasɩɣ ɛ-tʋmɩyɛ kajalaɣ ɖeɖe pe-wezuu caɣʋ taa yɔ. Ŋtɔzʋʋ ɛzɩma Yehowa sɩnɩ-ŋ alɩwaatʋ ndʋ ŋpaɣzɩ kediɣzisi wobu yɔ? Pʋtɔma pɩɩpɔzaa se ŋwolo nɛ ŋna ña-tʋmɩyɛ ñʋʋdʋ nɛ ŋheyi-i mbʋ pʋyɔɔ ŋŋpɩzɩɣ nɛ ŋtasɩ labʋ tʋmɩyɛ nɛ pɩcɛzɩ tʋmɩyɛ alɩwaatʋ yɔɔ ye pɩɩhaɣ-ŋ nʋmɔʋ se ŋwolo kediɣzisi yɔ. Kɛdɩ ñe-Bibl kpɛlɩkɩyʋ ɛzɩma Yehowa sɩnɩ-ŋ alɩwaatʋ ndʋ ŋlɩzaa se ŋsɩɣ ɛ-tʋmɩyɛ kajalaɣ ɖeɖe ñe-wezuu caɣʋ taa nɛ ɛzɩma pɩkpazɩ ñe-tisuu ɖoŋ yɔ pɩ-tɔm.

12. (a) Ɛbɛ yɔɔ pɩpɔzʋʋ se ɖɩyaa koobiya ndɩ ndɩ se pasɩɩ-ɖʋ Bibl kpɛlɩkɩyʋ nɔɔyʋ cɔlɔ? (b) Ɛzɩma ŋpɩzɩɣ nɛ ŋtɩŋnɩ videowaa yɔɔ nɛ ŋwɩlɩ ñe-Bibl kpɛlɩkɩyʋ tɔm camɩyɛ? Ha kɩɖaʋ nakʋyʋ.

¹² Ye Krɩstʋ mba lalaa ɩkɛdɩɣ ñe-Bibl kpɛlɩkɩyʋ ɛzɩma palabɩ lɛɣzɩtʋ nɛ pasɩɩ Yehowa sɛtʋ kajalaɣ ɖeɖe yɔ pɩ-tɔm yɔ, pɩkaɣ-ɩ wazʋʋ ɖɔɖɔ. Pʋyɔɔ lɛ, yaɣ koobiya ndɩ ndɩ se pasɩ-ŋ nɛ iwolo ñe-Bibl kpɛlɩkɩyʋ cɔlɔ. Pɔzɩ-wɛ se pɛkɛdɩ ɛzɩma pɩɖɔma nɛ pamʋ toovenim yɔ nɛ mbʋ palaba nɛ pɩsa nɛ pasɩɩ Yehowa sɛtʋ kajalaɣ ɖeɖe pe-wezuu caɣʋ taa yɔ pɩ-tɔm. Pɩtasɩ lɛ, kpaɣ alɩwaatʋ nɛ ña nɛ ñe-Bibl kpɛlɩkɩyʋ ɩcɔnɩ Nɩɩ wezuu leleŋ tam! takayaɣ taa videowaa mba pɛwɛ hɔɔlʋʋ «Tazɩ nɛ pilimi» nɛ hɔɔlʋʋ «Wondu lɛɛtʋ» taa yɔ. Kɩɖaʋ nakʋyʋ yɔ: Alɩwaatʋ ndʋ ɩkpɛlɩkɩɣ tɔm kɩkpɛlɩkɩtʋ 37 yɔ, ŋpɩzɩɣ nɛ ŋñɩɣ niye paɣtʋ kila wena awɛ video Yehowa kaɣ cɔnʋʋ ɖa-kɩcɛyɩm ɖeɖe taa yɔ a-yɔɔ.

SƖNƖ ÑE-BIBL KPƐLƖKƖYƲ NƐ ƐLƲBƖNƖ KALA WENA ƐKATƖƔ YƆ

13. Ɛzɩma Yesu sɩnɩ ɛ-tɔmkpɛlɩkɩyaa se papɩzɩ palʋbɩnɩ nazɩm?

¹³ Yesu heyi ɛ-wayɩ tɩŋɩyaa tam sakɩyɛ se ɛyaa lalaa kaɣ-wɛ kaɖɩnʋʋ, halɩ pɩkpɛndɩnɩ pɔ-hɔʋ taa mba. (Mat. 5:11; 10:​22, 36) Pɩɩkazɩ pazɩ se Yesu ɛsɩ lɛ, eheyi ɛ-tɔmkpɛlɩkɩyaa se po-koyindinaa pɩzɩɣ nɛ pakʋ-wɛ. (Mat. 24:9; Yoh. 15:20; 16:2) Eseɣti-wɛ se pɛwɛɛ lɛɣtʋ alɩwaatʋ ndʋ palakɩ pɛ-Ɛsɔ sɛtʋ tʋmɩyɛ yɔ. Ɛtasɩ-wɛ lɔŋ se pataakaɖɩnɩ mba pakaɖɩɣnɩ-wɛ yɔ, nɛ pakpa pa-tɩ nɛ ndʋ pɔyɔɔdʋʋ yɔ nɛ mbʋ palakɩ yɔ se pɩsa nɛ powolo pɩ-yɔɔ nɛ posusi tɔm.

14. Ɛzɩma ɖɩpɩzɩɣ nɛ ɖɩsɩnɩ ɖe-Bibl kpɛlɩkɩyʋ nɔɔyʋ nɛ ɛlʋbɩnɩ nazɩm? (2 Timootee 3:12)

¹⁴ Ðɩpɩzɩɣ nɛ ɖɩsɩnɩ Bibl kpɛlɩkɩyʋ nɛ ɛtɩlɩ tɔm ndʋ ɛ-tʋmɩyɛ taa mba, ɛ-taabalaa nɛ ɛ-hɔʋ taa mba papɩzɩɣ nɛ pɔyɔɔdɩ yaa mbʋ papɩzɩɣ nɛ pala se pakaɖɩnɩ-ɩ nɛ ɛtaakpɛlɩkɩ Bibl yɔ. (Kalɩ 2 Timootee 3:12.) Ɛ-tʋmɩyɛ taa taabalaa nabɛyɛ pɩzɩɣ nɛ pohoŋi-i wezuu kɩfalʋʋ ŋgʋ ɛcakɩ yɔ kɩ-yɔɔ. Ɛyaa lalaa, pɩkpɛndɩnɩ ɛ-hɔʋ taa mba, pɩzɩɣ nɛ pakaɖɩnɩ tɔm ndʋ ɛwɛɛ nɛ ɛkpɛlɩkɩɣ Bibl taa yɔ. Ye ɖɩsɩnɩ ɖe-Bibl kpɛlɩkɩyaa lɔŋ se pakaɖɩnɩ nazɩm yɔ, pɩwɛɣ-wɛ kɛlɛʋ se pakaɖɩnɩ-pʋ alɩwaatʋ ndʋ pɩkɔŋ yɔ.

15. Ɛbɛ pɩzɩɣ pɩsɩnɩ Bibl kpɛlɩkɩyʋ nɔɔyʋ alɩwaatʋ ndʋ ɛ-hɔʋ taa mba kaɖɩɣnɩ-ɩ yɔ?

¹⁵ Ye ñe-Bibl kpɛlɩkɩyʋ nɔɔyʋ hɔʋ taa mba ɩkaɖɩɣnɩ-ɩ yɔ, sɩnɩ-ɩ nɛ ɛmaɣzɩ mbʋ pʋyɔɔ pakaɖɩɣnɩ-ɩ yɔ pɩ-yɔɔ. Pɩtɩla yɔ pamaɣzɩɣ se Yehowa Aseɣɖe Tɩnaa wɛɛ nɛ pepeɣziɣ-i yaa patɩkɛ ɛyaa kɩbama. Halɩ Yesu hɔʋ taa mba nabɛyɛ taa taawɛɛ leleŋ nɛ mbʋ ɛlakaɣ yɔ. (Mark. 3:21; Yoh. 7:5) Sɩnɩ ñe-Bibl kpɛlɩkɩyʋ nɛ ɛwɛɛ suuɖu nɛ ɛyɔɔdɩnɩ ɛ-hɔʋ taa mba nɛ ɛyaa lalaa nɛ nɔɔ kɩbaŋa.

16. Ɛzɩma ɖɩpɩzɩɣ ɖɩsɩnɩ ɖe-Bibl kpɛlɩkɩyʋ nɔɔyʋ nɛ eheyi ɛ-hɔʋ taa mba e-tisuu tɔm nɛ nɔɔ kɩbaŋa?

¹⁶ Halɩ alɩwaatʋ ndʋ Bibl kpɛlɩkɩyʋ nɔɔyʋ hɔʋ taa mba wɩlɩɣ se toovenim tɔm kɛdɩnɩ-wɛ yɔ, pɩfɛyɩ se Bibl kpɛlɩkɩyʋ ɛnʋ eheyi-wɛ tɔm sakɩyɛ alɩwaatʋ kʋɖʋmtʋ taa. Ye eheyiɣ-wɛ tɔm sakɩyɛ alɩwaatʋ kʋɖʋmtʋ taa yɔ, tɔm ndʋ eheyiɣ-wɛ yɔ tiyeki nɛ pitibi-wɛ yɔɔɔ nɛ paatasɩɣ sɔɔlʋʋ se pa nɛ ɩ pala kɛdaɣ pɩlɩɩnɩ e-tisuu yɔɔ. Ye mbʋ, seɣti ñe-Bibl kpɛlɩkɩyʋ se ɛtɩŋnɩ nʋmɔʋ ŋgʋ kɩwɛ kɛlɛʋ yɔ kɩ-yɔɔ nɛ eheyi e-tisuu tɔm ɛ-hɔʋ taa mba. Ðɩnɛ ɛlɛ pakaɣ sɔɔlʋʋ se ɛ nɛ wɛ patasɩ labʋ kɛdaɣ pʋwayɩ. (Kol. 4:6) Pɩtɩla ɛpɩzɩɣ nɛ eseɣti-wɛ se powolo jw.org yɔɔ. Pɩkaɣ-wɛ sɩnʋʋ nɛ pa-maɣmaɣ pɛkpɛlɩkɩ nɛ patɩlɩ Yehowa Aseɣɖe Tɩnaa alɩwaatʋ ndʋ pɔsɔɔlaa yɔ tɩ-yɔɔ nɛ tɔm ndʋ pɔsɔɔlaa se patɩlɩ pɔ-yɔɔ yɔ.

17. Ɛzɩma ŋpɩzɩɣ nɛ ŋfalɩsɩ Bibl kpɛlɩkɩyʋ nɔɔyʋ nɛ ɛpɩzɩ nɛ ɛlɩzɩ ɛyaa mbʋ pɩ-yɔɔ etisiɣ yɔ pɩ-taa? (Cɔnɩ ɖɔɖɔ kɩlɛmʋʋ.)

¹⁷ Ŋpɩzɩɣ ŋtɩŋnɩ jw.org hɔɔlʋʋ «Tɔm ndʋ ɛyaa pɔzʋʋ ɖoŋ ɖoŋ yɔ» kɩ-yɔɔ nɛ ŋsɩnɩ ñe-Bibl kpɛlɩkɩyʋ nɛ ɛñɔɔzɩ tɔm ndʋ ɛ-hɔʋ taa mba yaa ɛ-tʋmɩyɛ taa taabalaa pɩzɩɣ nɛ pɔpɔzɩ-ɩ yɔ tɩ-yɔɔ cosuu. (2 Tim. 2:​24, 25) Ɩtɛŋ Nɩɩ wezuu leleŋ tam! takayaɣ taa paa tɔm kɩkpɛlɩkɩtʋ ndʋ lɛ, ɩtazɩ hɔɔlʋʋ «Nabɛyɛ yɔɔdʋʋ se» taa. Seɣti ñe-Bibl kpɛlɩkɩyʋ nɛ ɛtɩŋnɩ ɛ-maɣmaɣ ɛ-tɔm pee yɔɔ nɛ ɛñɔɔzɩ ɛzɩma ɛpɩzɩɣ nɛ ɛlɩzɩ ɛyaa mbʋ pɩ-yɔɔ etisiɣ yɔ pɩ-taa yɔ. Ye pɩpɔzʋʋ yɔ, sɩnɩ-ɩ nɛ ɛtɩlɩ nʋmɔʋ kɩbaŋʋ ŋgʋ kɩ-yɔɔ ɛpɩzɩɣ nɛ ɛtɩŋna nɛ ɛlɩzɩ mbʋ pɩ-yɔɔ etisiɣ yɔ pɩ-taa yɔ. Ye ɩlakɩ mbʋ yɔ, pɩkaɣ-ɩ sɩnʋʋ nɛ ɛlʋ e-tisuu yɔɔ camɩyɛ.

18. Ɛzɩma ŋpɩzɩɣ ŋseɣti Bibl kpɛlɩkɩyʋ nɔɔyʋ nɛ ɛpɩsɩ tɔm susuyu? (Maatiyee 10:27)

¹⁸ Yesu seɣti ɛ-wayɩ tɩŋɩyaa se posusi ɛyaa tɔm kɩbandʋ. (Kalɩ Maatiyee 10:27.) Ye Bibl kpɛlɩkɩyʋ nɔɔyʋ ɛpaɣzɩ e-tisuu tɔm yɔɔdʋʋ lɔŋ yɔ, ɛkaɣ kpɛlɩkʋʋ ɛzɩma ɛtaa Yehowa liu yɔ lɛɛ lɛɛ. Ɛzɩma ŋpɩzɩɣ nɛ ŋsɩnɩ ñe-Bibl kpɛlɩkɩyʋ nɛ ɛɖʋ ɛ-tɩ kaɖʋwa ŋga? Ye posusi ɛgbɛyɛ taa se pakaɣ labʋ ŋgee tɔm susuu nabʋyʋ yɔ, seɣti ñe-Bibl kpɛlɩkɩyʋ nɛ ɛmaɣzɩ mbʋ ɛpɩzɩɣ ɛla nɛ ɛpɩsɩ tɔm susuyu yɔ pɩ-yɔɔ. Heyi-i se ɖoŋ ɖoŋ lɛ, ye ɛyʋ ɛpaɣzɩ tɔm susuu ŋgee tɔm susuu alɩwaatʋ taa yɔ, pɩwɛɣ-ɩ kɛlɛʋ nɛ pɩkɩlɩ. Kaɖʋwa lɛɛka ŋga ɛpɩzɩɣ nɛ ɛɖʋ ɛ-tɩ yɔ lɛ se ɛpaɣzɩ tʋmɩyɛ labʋ kpɩtaʋ hɛkʋ taa kediɣzisi taa. Ɛɛñakɩ pana se ɛtalɩ kaɖʋwa ŋga lɛ, ɛkaɣ tɩlʋʋ ɛzɩma ɛpɩzɩɣ ɛlɩzɩ mbʋ pɩ-yɔɔ etisiɣ yɔ pɩ-taa camɩyɛ yɔ.

WƖLƖ ÑE-BIBL KPƐLƖKƖYƲ SE ŊTAƔ-Ɩ LIU

19. (a) Ɛzɩma Yesu kaawɩlaa se ɛtaɣ ɛ-tɔmkpɛlɩkɩyaa liu? (b) Ɛzɩma ɖɩpɩzɩɣ nɛ ɖɩmaɣzɩnɩ-ɩ?

¹⁹ Pʋcɔ nɛ Yesu kpaɣ ɛsɔdaa lɛ, eheyi ɛ-wayɩ tɩŋɩyaa se pa nɛ ɩ pakaɣ wɛʋ ɛsɔdaa. Pataanɩɩ pɩ-taa se Yesu ñɩnaɣ yɔɔdʋʋ se pakaɣ kpaʋ ɛsɔdaa. Paa Yesu wayɩ tɩŋɩyaa ɩtaanɩɩ tɔm tɩŋa taa yɔ, ɛ-taa kaatɛma se pɔsɔɔlaa se pɔ-tɔm ɛkɛdɩnɩ Yehowa. (Yoh. 14:​1-5, 8) Ɛɛnawa se pɩpɔzʋʋ-wɛ alɩwaatʋ pʋcɔ nɛ panɩɩ tɔm natʋyʋ taa, ɛzɩ ɛsɔdaa kpaʋ lidaʋ tɔm mbʋ yɔ. (Yoh. 16:12) Ða ɖɔɖɔ ɖɩpɩzɩɣ nɛ ɖɩwɩlɩ ɖe-Bibl kpɛlɩkɩyʋ se ɖɩnawa se ɛsɔɔlaa se ɛ-tɔm ɛkɛdɩnɩ Yehowa.

20. Ɛzɩma Malaawii koobu halɩñɩnʋ nɔɔyʋ wɩlaa se ɛtaɣ e-Bibl kpɛlɩkɩyʋ liu?

²⁰ Ða-taa tɛma se ɖe-Bibl kpɛlɩkɩyaa sɔɔlaa se pala mbʋ pɩwɛ ɖeu yɔ. Iyele nɛ ɖɩna koobu halɩñɩnʋ Chifundo kɩɖaʋ, ɛwɛ Malaawii ɛjaɖɛ taa. Ɛ nɛ halʋ nɔɔyʋ papaɣzɩ Nɩɩ wezuu leleŋ tam! takayaɣ kpɛlɩkʋʋ. Payaɣ halʋ ɛnʋ se Alinafe nɛ ewokaɣ Katooliki cooci. Pɛtɛm tɔm kɩkpɛlɩkɩtʋ 14 lɛ, Chifundo pɔzɩ halʋ ɛnʋ se suwe ɛmaɣzɩɣ kɩlɛmɩŋ weyi ɛyaa lakɩnɩ tʋmɩyɛ Ɛsɔ sɛtʋ taa yɔ ɩ-yɔɔ. Pɩɩwɩzɩ Alinafe nɛ ecosi se paa weyi lɛ ɛwɛnɩ waɖɛ se ɛlɩzɩ ɛzɩma ɛsɛɣ Ɛsɔ yɔ. Chifundo maɣzaɣ se pɩtɩla piileɖiɣ lɛ Alinafe kaɣ yebu Bibl kpɛlɩkʋʋ. Ɛlɛ ɛɖʋ suuɖu nɛ ewolo pɩ-yɔɔ nɛ ɛkpɛlɩkɩɣnɩ Alinafe Bibl, nɛ ɛ-taa kaatɛma se pʋwayɩ Alinafe kaɣ nɩʋ pɩ-taa se pɩfɛyɩ ɖeu se palabɩnɩ tʋmɩyɛ kɩlɛmɩŋ Ɛsɔ sɛtʋ taa. Fenasɩ nasɩyɩ wayɩ pɛkpɛlɩkaɣ tɔm kɩkpɛlɩkɩtʋ 34 lɛ, Chifundo pɔzɩ Alinafe tɔm pɔzʋʋ mbʋ pɩwɛ tɔm kɩkpɛlɩkɩtʋ ndʋ tɩ-taa yɔ. Ɛpɔzɩ-ɩ se: «Kpaɣnɩ alɩwaatʋ ndʋ ŋpaɣzɩ kpɛlɩkʋʋ Bibl nɛ ŋwɛɛ nɛ ŋtɩlɩɣ Ɛsɔ toovenim tʋ Yehowa yɔ, wazasɩ nzɩ ŋhiɣaa?» Chifundo kɛdɩ tɔm ndʋ Alinafe cosaa yɔ. Ɛyɔɔdaa se: «Ɛyɔɔdɩ lɩmaɣza kɩbana sakɩyɛ tɔm, nɛ a-taa naɖɩyɛ lɛ se Yehowa Aseɣɖe Tɩnaa ɩɩlakɩ mbʋ Bibl yɔɔdʋʋ se pɩfɛyɩ ɖeu yɔ.» Pitileɖi lɛ, Alinafe yele labɩnʋʋ kɩlɛmɩŋ tʋmɩyɛ nɛ ɛha ɛ-tɩ nɛ pamɩyɩsɩ-ɩ lɩm.

21. Ɛzɩma ɖɩpɩzɩɣ nɛ ɖɩsɩnɩ ɖe-Bibl kpɛlɩkɩyʋ nɛ ɛlɩzɩ se ɛsɛɣ Yehowa?

²¹ Pɩkɛ toovenim se Yehowa kɛnɩ «weyi ɛlakɩ nɛ pɩpaɣlɩɣ yɔ», ɛlɛ ɖa ɖɔɖɔ ɖɩpɩzɩɣ nɛ ɖɩsɩnɩ ɖe-Bibl kpɛlɩkɩyʋ nɛ ɛɖɛɛnɩ ɛsɩndaa. (1 Kɔr. 3:7) Pɩtasɩna se ɖɩwɩlɩɣ-ɩ mbʋ Ɛsɔ sɔɔlaa se ɛla yɔ lɛ, ɖɩsɩɣnɩ-ɩ ɖɔɖɔ se ɛcɛyɩsɩ sɔɔlɩm mbʋ ɛwɛnɩ Yehowa yɔɔ yɔ. Nɛ ɖiseɣtiɣ-i se ɛsɩɩ Yehowa sɛtʋ kajalaɣ ɖeɖe e-wezuu caɣʋ taa nɛ pɩwɩlɩ se ɛsɔɔlɩ-ɩ. Pɩtasɩ lɛ, ɖɩwɩlɩɣ-ɩ ɛzɩma ɛtaa Yehowa liu alɩwaatʋ ndʋ ɛkatɩɣ kala yɔ. Ye ɖiyeba nɛ ɖe-Bibl kpɛlɩkɩyʋ ɖiɣzina se ɖɩtaɣ-ɩ liu yɔ, pɩkaɣ-ɩ sɩnʋʋ nɛ ɛ-taa tɛ se ɛnʋ ɖɔɖɔ ɛpɩzɩɣ nɛ ɛɖɔ Yehowa paɣtʋ yɔɔ nɛ ɛlɩzɩ se ɛsɛɣ-ɩ.