Yehowa sɩnɩ-ɖʋ nɛ ɖɩla lɛɣzɩtʋ nɛ ɖihiɣ taa leleŋ ɖenɖe payɩ powoni-ɖʋ yɔ

Mats nɛ Ann-Catrin Kassholm powobi Galaadɩ sukuli pɩnaɣ 1979 taa. Nɛ pʋwayɩ petiyini-wɛ ajɛɛ ndɩ ndɩ taa. Petiyini-wɛ Iraŋ, Sayiiri, Tanzaani, Moorisi, Ugandaa nɛ Miyamaarɩ. Paawɛ Galaadɩ sukuli taa lɛ, sukuli ŋgʋ kɩ-taa wɩlɩyʋ weyi payaɣ se Jack Redford yɔ ɛtasɩ-wɛ lɔŋ se petisi lɛɣzɩtʋ ndʋ tɩkɔŋ pe-wezuu caɣʋ taa yɔ nɛ pehiɣ taa leleŋ ɖenɖe petiyiɣni-wɛ yɔ. Paalɛɣzɩ-wɛ lona tam sakɩyɛ nɛ lɔŋ tasʋʋ mbʋ, pɩsɩnɩ-wɛ lona ana a-taa. Iyele nɛ pɛkɛdɩ-ɖʋ nɛ ɖɩnɩɩ.

Mats nɛ Ann-Catrin ɖitendi-mɩ, iheyi-ɖʋ nɛ ɖɩnɩɩ: Ɛzɩma pɩɖɔma nɛ ɩlɩɩ toovenim yɔɔ?

Mats: Man-caa kaawɛ Pɔlɔɔñɩ ɛjaɖɛ taa alɩwaatʋ ndʋ palakaɣ Caama you 2 ñɩŋgʋ yɔ, nɛ ɛna Katooliki cooci taa mba tɛ pɩ-tɛɛ nɛ pɩ-yɔɔ lakasɩ sakɩyɛ. Paa mbʋ yɔ, ɖoŋ ɖoŋ lɛ ɛyɔɔdaɣ se: «Manawa se toovenim Ɛsɔ sɛtʋ ɛgbɛyɛ naɖɩyɛ wɛɛ.» Alɩwaatʋ wɛɛ nɛ tɩɖɛɣ lɛ, menɖiɣzina se ɛɛwɛnɩ toovenim. Maayabɩ takayɩsɩ sakɩyɛ nɛ mankalɩ-sɩ, pɩɩkɛ takayɩsɩ nzɩ ɛyaa kalaa pɛtɛ nɛ paɖaɣnɩɣ pɛdʋʋ yɔ. Sɩ-taa nakɛyɛ kaawɛnɩ tɔlɩm pʋlɔɔ nɛ pama kɔ-yɔɔ se La vérité qui conduit à la vie éternelle. Tɔm ñʋʋ ŋgʋ kɩɩhɔm ma-lɩmaɣza kpem, nɛ mankalɩ ka-tɩŋa kɩyakʋ ŋgʋ mayabɩ-kɛ yɔ kɩ-tɛ ɖoo taa. Mɛntɛm takayaɣ ŋga kalʋʋ lɛ, menɖiɣzina se malɩ toovenim yɔɔ.

Kpaɣnɩ avril 1972 nɛ pɩɖɛɛ lɛ, mankalɩ Yehowa Aseɣɖe Tɩnaa takayɩsɩ sakɩyɛ nɛ malɩɩ tɔm ndʋ mɔnpɔzaɣ man-tɩ pɩlɩɩnɩ Bibl yɔɔ yɔ tɩ-yɔɔ cosuu yɔɔ. Pɩɩlabɩ-m ɛzɩ pɩɩlabʋ Yesu eduuye taa tadɩyɛ laɖʋ weyi ɛlɩ kijiɣa kʋɖʋmaɣ ŋga kamʋ ñɩm siŋŋ yɔ kɔ-yɔɔ nɛ ewolo nɛ ɛpɛdɩ mbʋ payɩ ɛɛwɛna yɔ nɛ ɛyabɩ-kɛ yɔ. Meyebi kaɖʋwa ŋga maawɛna se mowoki sukuli kɩtɛzʋʋ taa nɛ manpɩsɩ ɖɔkɔtɔ sɔsɔ yɔ se pɩsa nɛ manpɩzɩ nɛ mɛnsɛɛ Yehowa. (Mat. 13:​45, 46) Pɩtalɩ 10 décembre 1972 wiye lɛ, maha man-tɩ nɛ pamɩyɩsɩ-m lɩm.

Pɩlabɩ pɩnaɣ lɛ, ma-lʋlɩyaa nɛ me-neu abalɩñɩnʋ pamʋ toovenim nɛ pamɩyɩsɩ-wɛ lɩm. Manpɩsɩ paa ɖooye nʋmɔʋ lɩzɩyʋ juillet 1973 taa. Paa ɖooye nʋmɔʋ lɩzɩyʋ nɔɔyʋ kaawɛ ɖɛ-ɛgbɛyɛ taa nɛ payaɣ-ɩ se Ann-Catrin, eeɖewa nɛ ɛɛsɔɔlɩ Yehowa siŋŋ. Ðɩɩsɔɔlɩ ɖama nɛ ɖɩɖɔkɩ nesi pɩnaɣ 1975 taa nɛ ɖɩcaɣ Strömsund tɛtʋ taa pɩnzɩ 4. Tɩkɛ Suyɛɛdɩ ɛjaɖɛ taa tɛtʋ ndʋ tɩɩwɛ kajʋka yɔ nɛ tɩ-taa ɛyaa kaasɔɔlaa se pɛkpɛlɩkɩ Bibl taa tɔm.

Ann-Catrin: Man-caa kpɛlɩkɩ toovenim alɩwaatʋ ndʋ ɛɛwɛ sukuli kɩtɛzʋʋ taa Stockholm tɛtʋ taa yɔ. Alɩwaatʋ ndʋ lɛ, maawɛnɩ fenasɩ 3. Ɛlɛ pɛkpɛndaɣnɩ-m nɛ powokini kediɣzisi nɛ palɩɣ tɔm susuu. Pɩtaakɛdɩnɩ mon-ɖoo nɛ ɛñɩnaɣ se ɛwɩlɩ se Yehowa Aseɣɖe Tɩnaa ɩɩwɩlɩɣ toovenim. Ɛlɛ ɛtɩpɩzɩ; piyeba nɛ alɩwaatʋ natʋyʋ wayɩ lɛ, ɛha ɛ-tɩ nɛ pamɩyɩsɩ-ɩ lɩm. Mɔnkɔma nɛ mɛwɛɛnɩ pɩnzɩ 13 lɛ, maha man-tɩ nɛ pamɩyɩsɩ-m lɩm, nɛ mantalɩ pɩnzɩ 16 lɛ manpaɣzɩ nʋmɔʋ lɩzʋʋ tʋmɩyɛ. Pɩpɔzaɣ tɔm susuyaa Umeå tɛtʋ taa nɛ pɩkɩlɩ, pʋyɔɔ mowobi peeɖe se manɖʋ nesi alɩwaatʋ natʋyʋ. Pʋwayɩ, manpɩsɩ nʋmɔʋ lɩzɩyʋ kiya tɛtʋ ndʋ tɩ-taa.

Ma nɛ Mats ɖɩɖɔkɩ nesi lɛ, ɖɩsɩnɩ ɛyaa sakɩyɛ nɛ pɛkpɛlɩkɩ toovenim. Pa-taa nɔɔyʋ lɛ halɩbɩɣa nakɛyɛ, payaɣ-kɛ se Maivor. Eekizi hola aleɣya naayɛ labʋ se pɩsa nɛ ɛpɩzɩ ɛsɛɛ Yehowa nɛ pɩkɩlɩ. Nɛ ɛ nɛ me-neu halɩñɩnʋ paakpɛndaa nɛ palakɩ nʋmɔʋ lɩzʋʋ tʋmɩyɛ ɖoŋkʋɖʋm. Powobi Galaadɩ sukuli pɩnaɣ 1984 taa, nɛ pɛkɛ Ɛsɔtɔm tiyiyaa Ekʋwatɛɛrɩ ɛjaɖɛ taa.

Lona ndɩ ndɩ wena a-taa ɩlabɩ Ɛsɔtɔm tiyiyu tʋmɩyɛ yɔ, ɛbɛ sɩnɩ-mɩ nɛ iwolo pɩ-yɔɔ nɛ ihikiɣ taa leleŋ?

Mats: Paapɔzɩ-ɖʋ tam sakɩyɛ se ɖɩkʋyɩ nɛ ɖiwolo lona ndɩ ndɩ taa. Ɛlɛ mbʋ pɩsɩnɩ-ɖʋ yɔ pɩ-taa nabʋyʋ lɛ se paa ɛzɩmtaa lɛ, ɖɩñakaɣ pana se ɖɩmaɣzɩnɩ Yesu wɛtʋ kɩbandʋ, kɔzɩ kɔzɩ lɛ ɛ-tɩ luzuu. (Kol. 2:​6, 7) Kɩɖaʋ nakʋyʋ yɔ: Ðɩtaaɖaŋɩɣ se lona wena a-taa ɖiwoki yɔ a-taa koobiya ɩla lɛɣzɩtʋ nɛ pɩmʋnɩ ɖɛ-wɛtʋ, ɛlɛ ɖɩñakaɣ pana se ɖɩlɛɣzɩ ɖɛ-wɛtʋ nɛ pɩmʋnɩ pa-ñɩndʋ. Ðɩɩsɔɔlaa se ɖɩkpɛlɩkɩ pɔ-sɔnzɩ nɛ ɖɩñakaɣ pana se ɖɩnɩɩ ɛzɩma pamaɣzɩɣ yɔ pɩ-taa. Alɩwaatʋ ndʋ ɖɩmaɣzaɣnɩ Yesu yɔ, pɩɩwɛ-ɖʋ kɛlɛʋ se ɖɩla lɛɣzɩtʋ nɛ ɖihiɣ taa leleŋ ɖa-tʋmɩyɛ taa.—Keɣ. 1:​2, 3.

Ann-Catrin: Pɛkpɛzɩɣ tɩʋ nakʋyʋ nɛ paɖaɣnɩ-kʋ sɔʋ lɛ, pɩsa nɛ kɩyɛzɩ lɛ pɩpɔzʋʋ-kʋ ɖɔɖɔ wɩsɩ ñalɩmɩyɛ. Yehowa wɩlaa se ɛkɛ «ɖa-wɩsɩ» paa ɛzɩmtaa. (Keɣ. 84:11) Ɛha-ɖʋ koobiya sakɩyɛ mba pɔsɔɔlɩ-ɖʋ yɔ. Kɩɖaʋ nakʋyʋ yɔ: Alɩwaatʋ ndʋ ɖɩɩwɛ Iraŋ ɛjaɖɛ taa Teeraŋ tɛtʋ taa yɔ, ɛgbɛyɛ cikpeɖe nɖɩ ɖɩ-taa ɖɩɩwɛɛ yɔ ɖɩ-taa koobiya kaawɛ kʋjɔʋ kpem nɛ pamʋwaɣ ɛyaa ɛgɔndʋ camɩyɛ, pɩɩtɔzɩ-ɖʋ ɛyaa mba pɔyɔɔdɩ pɔ-tɔm Bibl taa se pamʋwaɣ ɛyaa ɛgɔndʋ yɔ pa-taa nabɛyɛ yɔɔ. Ðɩɩsɔɔlaa se ɖɩcaɣ Iraŋ ɛlɛ, pɩtalɩ juillet 1980 taa lɛ komina ɖɩɣ Yehowa Aseɣɖe Tɩnaa tʋmɩyɛ nʋmɔʋ ɛjaɖɛ nɖɩ ɖɩ-taa nɛ kɩma-ɖʋ takayaɣ nɛ kiheyi-ɖʋ se kɩha-ɖʋ kɩyakɩŋ 2 se ɖɩlɩɩ ɛjaɖɛ nɖɩ ɖɩ-taa. Pɩlabɩ mbʋ lɛ, ɛgbɛyɛ heyi-ɖʋ se ɖiwolo Sayiiri ɛjaɖɛ taa (lɛɛlɛɛyɔ nɖɩ payaɣ se Kɔŋgo), ɖɩwɛ Afrika taa.

Mancalɩ nɩʋ se powokini-ɖʋ Afrika lɛ, mewii mbʋ pʋyɔɔ yɔ tɔm ndʋ maanɩ Afrika yɔɔ yɔ tiyeba nɛ sɔɔndʋ kpaɣ-m. Maanɩwa se ɖʋmaa nɛ kʋdɔmɩŋ ndɩ ndɩ wɛ peeɖe. Ɛlɛ ɖa-taabalaa kɩbama nabɛyɛ kaacaɣ peeɖe pɩnzɩ sakɩyɛ; peheyi-ɖʋ se: «Sɔɔndʋ ɛtaakpa-mɩ, itiwolo peeɖe wiɖiyi nɛ ɛna ɛlɛ ɖɩnawa se lone nɖɩ ɖɩkaɣ-mɩ kɛdɩnʋʋ.» Nɛ paawɛnɩ toovenim. Peeɖe koobiya sɔɔlɩ ɛyaa kpem. Ɛlɛ ɖɩlabɩ pɩnzɩ 6 peeɖe lɛ, paɖɩɣ ɖɛ-Ɛsɔ sɛtʋ tʋmɩyɛ nʋmɔʋ ɛjaɖɛ nɖɩ ɖɩ-taa nɛ pɩɩwɛ se ɖɩkʋyɩ Sayiiri; lɛɛlɛɛyɔ lɛ mohoŋ man-tɩ mbʋ pʋyɔɔ yɔ menɖiɣzinaa se mɛwɛɛ nɛ mantɩmɩɣnɩ Yehowa se: «Mentendi-ŋ, yele nɛ ɖɩcaɣ Afrika.»

Wazasɩ nzɩ ihiɣ Yehowa sɛtʋ taa?

Mats: Wazaɣ nakɛyɛ lɛ se ɖɩɖʋ taabalɩyɛ nɛ Ɛsɔtɔm tiyiyaa sakɩyɛ nɛ paalɩnɩ ajɛɛ ndɩ ndɩ taa. Pɩtasɩ lɛ, lona naayɛ taa lɛ ɖa-naalɛ ɖa-taa paa anɩ kaawɛnɩ Bibl kpɛlɩkɩyaa ɛzɩ 20 mbʋ yɔ nɛ pɩhaɣaɣ-ɖʋ taa leleŋ siŋŋ. Afrika koobiya sɔɔlɩ ɛyaa kpem nɛ pɔsɔɔlɩ ɖɔɖɔ ɛgɔndʋ mʋʋ nɛ maakaɣ pɩ-yɔɔ sɔʋ kpa. Alɩwaatʋ ndʋ ɖikilimaɣ agbaa yɔɔ Tanzaani ɛjaɖɛ taa yɔ, koobiya sakɩyɛ mʋ-ɖʋ ɛgɔndʋ nɛ halɩ pɩcɛzɩ po-ɖoŋ kamaɣ. Ðiwoki pɛ-tɛ lɛ, ɖɩsʋʋ ɖɔ-lɔɔɖɩyɛ taa pa-ɖɩsɩ cɔlɔ kpam. (2 Kɔr. 8:3) Paa evemiye nɖɩ ɖɩtɛŋ lɛ, ma nɛ ma-halʋ ɖɩcakaɣ nɛ ɖɩkɛdɩɣ ɖama mbʋ pɩlabɩ evemiye taa yɔ, nɛ ɖɩtɛŋ lɛ ɖɩsɛɛ Yehowa se ɛlabaɣ lɛ se ɛwɛ ɖɔ-cɔlɔ. Alɩwaatʋ ndʋ, tɩ-tɔm kaacɛyɩ ɖɛ-ɛsɩndaa kpem nɛ ɖɩyaɣaɣ-tʋ se kɛdaɣ alɩwaatʋ.

Ann-Catrin: Ma lɛ, mbʋ pɩkɩlɩ-m haʋ taa leleŋ yɔ lɛ se mansɩm koobiya sakɩyɛ mba palɩnɩ kedeŋa hɔɔlɩŋ ndɩ ndɩ taa yɔ. Ðɩkpɛlɩkɩ kʋnʋmɩŋ kɩfaŋ, ɩ-taa nɩɩyɩ yɔ Farsi kʋnʋŋ, Fransɩɩ kʋnʋŋ, Lugandaa kʋnʋŋ nɛ Siwahilii kʋnʋŋ. Nɛ ɖɩkpɛlɩkɩ sɔnzɩ ndɩ ndɩ yɔɔ tɔm. Ðɩsɩnɩ koobiya sakɩyɛ nɛ pɛɖɛɛnɩ ɛsɩndaa fezuu taa, ɖihiɣ taabalaa kɩbama sakɩyɛ nɛ ɖa nɛ wɛ ɖɩkpɛndaa nɛ ɖɩsɛɛ Yehowa «nɔɔ kʋɖʋmaɣ taa.»—Sof. 3:9.

Ðɩna ɖɔɖɔ Yehowa wondu kɩlɩzɩtʋ ndɩ ndɩ sakɩyɛ, tɩwɛ piti nɛ tɩwɛ kajʋka kpem. Alɩwaatʋ ndʋ payɩ petiyiɣni-ɖʋ lone kɩfaɖɛ naɖɩyɛ taa yɔ, pɩlakaɣ-ɖʋ ɛzɩ ɖɩwɛɛ nɛ ɖɩɖɔŋ nʋmɔʋ nakʋyʋ nɛ Yehowa kɛnɩ ɖa-nʋmɔʋ wɩlɩyʋ yɔ. Ɛkpɛlɩkɩ-ɖʋ lɔŋ sakɩyɛ nɛ ɖɩtaapɩzɩɣ kpa se ɖɩkpɛlɩkɩ lɔŋ ɩnɩ ɖa-maɣmaɣ ɖo-ɖoŋ taa.

Kala wena ɩkataa, nɛ ɛbɛ sɩnɩ-mɩ nɛ ɩlʋbɩnɩ-yɛ?

Mats: Nabʋyʋ taa ɖɩhɩnaɣ kʋdɔŋ, nɛ halɩ pɔtʋ kʋdɔŋ kpaɣaɣ-ɖʋ. Nɛ paalabɩ Ann-Catrin tʋmɩyɛ tam sakɩyɛ. Ðɩnɩɣzaɣ ɖɔɖɔ ɖa-lʋlɩyaa yɔɔ mbʋ pʋyɔɔ yɔ pakpadɩyaa, ɛlɛ ɖa-taa kaawɛ leleŋ se ɖe-newaa kaawɛɛ nɛ pɔcɔŋnɩ pɔ-yɔɔ. Pɔcɔŋnaɣ pɔ-yɔɔ camɩyɛ nɛ suuɖu nɛ sɔɔlɩm nɛ taa leleŋ. (1 Tim. 5:4) Ɛlɛ nabʋyʋ taa, pɩlakaɣ-ɖʋ ɛzɩ ye ɖɩɩwɛ pɔ-cɔlɔ nɛ ɖɩsɩɣnɩ-wɛ yɔ pɩɩkɩlɩ ɖeu yɔ, piyekaɣ nɛ ɖɩkʋʋ ɖa-tɩ tɔm.

Ann-Catrin: Pɩnaɣ 1983 taa, koleeraa kʋdɔŋ kaakpa-m, alɩwaatʋ ndʋ lɛ, ɖɩɩwɛ Sayiiri ɛjaɖɛ taa. Peeɖe ɖɔkɔtɔ heyi Mats se: «Kpaɣ ña-halʋ sɔnɔ ɖeke nɛ ŋlɩɩ ɛjaɖɛ ɖɩnɛ ɖɩ-taa.» Tɛʋ fema lɛ, ɖɩsʋʋ ɛsɔdaa lɔɔɖɩyɛ nɖɩ ɖɩkpakɩɣ wondu yɔ nɛ ɖɩpɩsɩ Suyɛɛdɩ ɛjaɖɛ taa mbʋ pʋyɔɔ yɔ lɔɔɖɩyɛ nɖɩ ɖi-ɖeke ɖɩɩwɛna.

Mats: Ðiiwi siŋŋ mbʋ pʋyɔɔ yɔ ɖɩmaɣzaɣ se ɖɛ-Ɛsɔtɔm tiyiyu tʋmɩyɛ sɩ tɩnaɣ kɛlɛ mbʋ yɔ. Ɛlɛ Ann-Catrin yɔɔ kɔma nɛ pɩcɛ ŋgʋ ɖɔkɔtɔ kaaheyi-ɖʋ se ɛ-yɔɔ ɛɛkaɣ cɛbʋ. Nɛ pɩlabɩ pɩnaɣ lɛ ɖɩpɩsɩ Sayiiri ɛjaɖɛ taa. Ðɩpɩsaa lɛ ɖɩcaɣ ɛgbɛyɛ cikpeɖe naɖɩyɛ taa Lubumbasii tɛtʋ taa, Siwahilii kʋnʋŋ pɔyɔɔdaɣ ɛgbɛyɛ nɖɩ ɖɩ-taa.

Ann-Catrin: Alɩwaatʋ ndʋ ɖɩɩwɛ Lubumbasii yɔ, maahaɣ hoɣa nɛ kɛwɛɛkɩ. Paa ɖɩtaaɖʋ se ɖɩlʋlʋʋ pɩɣa yɔ, pɩɩcɛyɩ-ɖʋ siŋŋ se hoɣa ŋga kɛwɛɛkaa. Ɛlɛ laŋwɛɛkɩyɛ alɩwaatʋ ndʋ tɩ-taa, Yehowa labɩ-ɖʋ kʋjɔʋ nakʋyʋ nɛ ɖɩtaaɖʋna. Ðɩpaɣzɩ Bibl kpɛlɩkɩnʋʋ ɛyaa sakɩyɛ. Tɔm susuyaa 35 kaawɛnɩ ɛgbɛyɛ nɖɩ ɖɩ-taa ɖɩɩwɛɛ yɔ nɛ ɛyaa 40 kɔŋaɣnɩ kediɣzisi. Ɛlɛ pɩlakaɣ ɛzɩ pɩnaɣ mbʋ yɔ lɛ, tɔm susuyaa huu nɛ patalɩ 70 nɛ ɛyaa mba pɔkɔŋaɣ kediɣzisi yɔ pohuu nɛ patalɩ 220. Pɩɩɖɔkɩnɩ-ɖʋ siŋŋ tɔm susuu tʋmɩyɛ taa, nɛ Yehowa wazɩ ɖa-pana ñaɣʋ nɛ pɩɩsɩnɩ-m nɛ mehiɣ laŋɩyɛ hɛzʋʋ. Paa mbʋ yɔ, ɖoŋ ɖoŋ lɛ ɖɩmaɣzɩɣ ɖa-pɩɣa yɔɔ nɛ ɖɩyɔɔdʋʋ kɔ-tɔm. Ɛlɛ ɖɩɖaŋ kpam se ɖɩna ɛzɩma Yehowa kaɣ yebu nɛ laŋwɛɛkɩyɛ nɖɩ ɖɩ-taa ɖɩwɛɛ yɔ ɖɩsɩɩ tɩnaɣ caɣ caɣ paradisuu taa yɔ.

Mats: Pɩkɔm nɛ pɩtalɩ alɩwaatʋ natʋyʋ lɛ, pɩpaɣzɩ nɩʋ Ann-Catrin siŋŋ. Nɛ alɩwaatʋ kʋɖʋmtʋ ndʋ tɩ-taa lɛ, ɖɔkɔtɔnaa wili-m nɛ pana se kansɛɛrɩ kʋdɔŋ kpa men-siɣbɔɖɛ nɛ pɩpɔzɩ se palabɩ-m tʋmɩyɛ. Ɛlɛ lɛɛlɛɛyɔ mɔ-yɔɔ cɛba, nɛ Ann-Catrin ñɛwɛɛ nɛ ɛlakɩ e-ɖoŋ ɖeɖe Yehowa sɛtʋ taa.

Ðɩkɔm nɛ ɖiɖiɣzina se pɩtɩkɛ ɖe-ɖeke ɖɩwɛna nɛ ɖɩkatɩɣ kala. Palabɩ Ruwandaa you pɩnaɣ 1994 taa nɛ pɩtɛ lɛ, ɖiwolo nɛ ɖikilimi ɖa-taabalaa sakɩyɛ yɔɔ kʋyʋ ɖɩɖʋyɛ lona taa. Ðɩna ɛzɩma pɛwɛnɩ tisuu, pɔɖɔkʋʋ pa-laŋa nɛ ɛzɩma pamʋʋ ɛyaa ɛgɔndʋ yɔ lɛ pɩkpɛlɩkɩ-ɖʋ se Yehowa wɛnɩ ɖoŋ se ɛsɩnɩ ɛ-samaɣ paa kaɖɛ nɖɩ lɛ ɖɩ-taa.—Keɣ. 55:22.

Ann-Catrin: Ðɩkatɩ kaɖɛ lɛɛɖɛ alɩwaatʋ ndʋ patʋlaɣ Ugandaa ɛgbɛyɛ piliŋa nɔnɔsɩ pɩnaɣ 2007 taa nɛ ɖiwolo yɔ. Ðʋtʋ tɛma lɛ, ɖa nɛ Ɛsɔtɔm tiyiyaa nɛ Betɛɛlɩ tʋmlaɖaa mba palɩnɩ Nayiroobii tɛtʋ taa Keniya ɛjaɖɛ taa yɔ ɖɩsʋʋ lɔɔɖɩyɛ se ɖikpeŋ, paakpɛndɩ ɛyaa ɛzɩ 25 mbʋ yɔ. Pʋcɔ nɛ ɖɩtalɩ Keniya ɛjaɖɛ kamaɣ yɔɔ lɛ, lɔɔɖɩyɛ naɖɩyɛ kɔɔ nɛ ɖiyooni ɖɔ-lɔɔɖɩyɛ. Pɩlabɩ mbʋ lɛ, ɖɔ-lɔɔɖɩyɛ sayʋ nɛ ɖa-taabalaa 5 sɩ kpaagbaa, koobu halɩñɩnʋ lɛlʋ ñasɩbɩ ɖɔkɔtɔ tɛ pʋwayɩ. Ðɩɖaŋ kpam se ɖɩɖaɣnɩ naʋ ɖa-taabalaa mba paradisuu taa.—Yɔɔb 14:​13-15.

Heŋ weyi maamʋ kɛgbɛdɩsaɣ ŋga ka-taa yɔ ɩkɔma nɛ ɩwaa. Ɛlɛ ma nɛ Mats ɖɩtɔzʋʋ mbʋ pɩɩlaba yɔ pɩ-yɔɔ lɛ, sɔɔndʋ kpaɣ-ɖʋ siŋŋ. Mbʋ ɖɔɖɔ pɩlakaɣ ɛyaa mba ɖa nɛ wɛ ɖɩɩwɛ lɔɔɖɩyɛ taa yɔ pa-taa nabɛyɛ. Ma lɛ, mahɩnɩɣ ɖoo taa lɛ, monɖozuu nɛ mañaŋ nɛ menfeŋ; menfeŋ lɛ maapɩzɩɣ fezuu. Piyekaɣ nɛ sɔɔndʋ kpaɣ-m. Pɩlakɩ mbʋ lɛ, ɖɩtɩmɩɣnɩ Yehowa nɛ ɖɩkalɩɣ masɩ nzɩ ɖɩkɩlɩ sɔɔlʋʋ nɛ sɩhɛzɩɣ ɖa-laŋa yɔ, pɩɩsɩnɩ-ɖʋ nɛ ɖɩlʋbɩnɩ kaɖɛ nɖɩ. Ðiiwoba ɖɔɖɔ nɛ ɖɩna ɖɔkɔtɔ weyi ɛcɔŋnɩ kaɖɛ nɖɩ ɖi-ɖeɖe yɔ nɛ pɩɩsɩnɩ-ɖʋ kpem. Lɛɛlɛɛyɔ lɛ sɔɔndʋ ɛɛkɩlɩɣ-ɖʋ tasʋʋ kpaʋ, nɛ ɖɩwɛɛ nɛ ɖɩtɩmɩɣnɩ Yehowa se ɛsɩnɩ-ɖʋ nɛ ɖɩhɛzɩ ɛyaa mba pɛwɛɛ nɛ pakatɩɣ kaɖɛ nɖɩ yɔ pa-laŋa.

Ɩyɔɔdaɣ ɛzɩma ɩpɩzaa nɛ ɩlʋbɩnɩ kala wena ɩkataa yɔ pɩ-tɔm lɛ, ɩtɔm se Yehowa ɖɔkɩ-mɩ «ɛzɩ yala yɔ.» Pʋ-tɔbʋʋ lɛ suwe?

Mats: Siwahilii kʋnʋŋ taa eduuye naɖɩyɛ tɔŋ se: «Paaɖɔkɩ-ɖʋ ɛzɩ yala yɔ.» Eduuye nɖɩ, ɖɩ-taa ɖɩlɩzɩnɩ tɔm loyaɣ ŋga. Ɛzɩ ɛyʋ nɔɔyʋ ɖɔkʋʋ yala camɩyɛ se ataayɔkɩ yɔ, mbʋ Yehowa ɖɔkɩ-ɖʋ nɛ sɔɔlɩm nɛ ɛcɔnɩ ɖɔ-yɔɔ lona wena a-taa payɩ powoni-ɖʋ yɔ a-taa. Paa ɛzɩmtaa taa lɛ ɖɩɩwɛnɩ mbʋ pɩpɔzʋʋ-ɖʋ yɔ nɛ pɩcɛzɩ. Nʋmɔŋ weyi ɩ-yɔɔ Yehowa tɩŋnaa nɛ ɛwɩlɩ-ɖʋ sɔɔlɩm nɛ ɛsɩnɩ-ɖʋ yɔ ɩ-taa nakʋyʋ lɛ ɛzɩma Nɔɔɖɛyaa ɛgbɛyɛ wɩlaa se ɖɩmaɣzɩɣ ɖɔ-yɔɔ yɔ.

Ann-Catrin: Mɔyɔɔdʋʋ ɛzɩma Yehowa sɩnɩ-ɖʋ nɛ sɔɔlɩm yɔ pɩ-kɩɖaʋ nakʋyʋ tɔm. Kɩyakʋ nakʋyʋ paya-m kaŋgalaafu yɔɔ nɛ peheyi-m se pɩwɩɣ man-caa siŋŋ nɛ ɛwɛ ɖɔkɔtɔ tɛ; ɛɛwɛ Suyɛɛdɩ ɛjaɖɛ taa. Alɩwaatʋ ndʋ lɛ pɔtʋ kʋdɔŋ kaakpa Mats nɛ ɛ-yɔɔ kaacɛba pitileɖita, pʋyɔɔ lɛ ɖɩtaapɩzɩɣ se ɖihiɣ liidiye nɛ ɖiwolo nɛ ɖɩna-ɩ. Peeɖe ɖɩkpaɣ lɩmaɣzɩyɛ se ɖɩpɛdɩɣ ɖɔ-lɔɔɖɩyɛ. Ɛlɛ pɩkɛdaa lɛ, ɛyaa 2 tasɩ-ɖʋ yaʋ kaŋgalaafu yɔɔ. Kajalaɣ lɛ, koobu nɔɔyʋ nɛ ɛ-halʋ payanɩ-ɖʋ nɛ peheyi-ɖʋ se panɩ wɛtʋ ndʋ tɩ-taa ɖɩwɛɛ yɔ tɩ-tɔm nɛ pɔsɔɔlaa se pɛhɛyɩ ɖa-taa kʋɖʋm yɔɔ liidiye nɖɩ pɩpɔzʋʋ-ɖʋ se ɖiwolo Suyɛɛdɩ yɔ. Nabʋlɛ ɖeɖe lɛ, koobu halɩñɩnʋ akpadɩyʋ nɔɔyʋ yaa-ɖʋ nɛ eheyi-ɖʋ se ɛnʋ kaacɔ liidiye naɖɩyɛ se ye nɔɔyʋ ɛwɛ kɩcɛyɩm taa yɔ ɛɛkpaɣ-ɖɩ nɛ ɛsɩnɩ-ɩ. Mbʋ pɩlaba nɛ cɛcɛsɩ pazɩ taa lɛ, Yehowa sɩnɩ-ɖʋ nɛ ɖihiɣ liidiye nɖɩ pɩpɔzaɣ-ɖʋ yɔ.—Ebr. 13:6.

Ɛbɛ ɩkpɛlɩkɩ pɩnzɩ 50 nzɩ ɩlabɩ alɩwaatʋ tɩŋa Ɛsɔ sɛtʋ tʋmɩyɛ taa yɔ sɩ-taa?

Ann-Catrin: Mɛnkpɛlɩkaa se ‘ɖo-ɖoŋ kaɣ lɩnʋʋ ɛzɩma ɖɩcakɩ ɖiɣ ɖiɣ nɛ ɖɩtaɣ liu yɔ pɩ-cɔlɔ.’ Alɩwaatʋ ndʋ ɖɩtaɣ Yehowa liu yɔ ɛlakɩ you ɖo-lone taa. (Iza. 30:15; 2 Kro. 20:​15, 17) Ðɩsɛ Yehowa ɛzɩ ɖo-ɖoŋ pɔzʋʋ yɔ lona wena a-taa payɩ powoni-ɖʋ yɔ, piyeba nɛ ɖihiɣ wazasɩ nzɩ ɖɩtaapɩzɩɣ se ɖihiɣ ye ɖɩtaasɛɣ-ɩ yɔ.

Mats: Lɔŋ sɔsɔŋ weyi mɛnkpɛlɩkaa yɔ, ɩnɩ lɛ se pɩwɛɛ se mantaa Yehowa liu paa wɛtʋ ndʋ lɛ tɩ-taa nɛ ɛkaɣ labʋ mbʋ pɩwazɩɣ-m yɔ. (Keɣ. 37:5) Ɛlabɩ tamaɣ se ɛsɩɣnɩ-m, nɛ ɛɖɔm ɛ-tamaɣ ŋga kɔ-yɔɔ. Lɛɛlɛɛyɔ ɖɩwɛ Miyamaarɩ Betɛɛlɩ taa nɛ ɛkpɛndɩ eɖiɣni-ɖʋ sɩnʋʋ.

Ðɩtaɣ liu se Yehowa kaɣ wɩlʋʋ evebiya nɛ pɛlaa mba pɔsɔɔlaa se pawalɩsɩ pɛ-Ɛsɔ sɛtʋ tʋmɩyɛ yɔ sɔɔlɩm siɣsiɣ ñɩmbʋ ɛzɩ ɛwɩlʋʋ-ɖʋ yɔ. Ye peyeba se Yehowa ɛsɩnɩ-wɛ nɛ pehiɣ taa leleŋ lɛɣzɩtʋ ndʋ pakatɩɣ tʋma wena payɩ paɖʋʋ-wɛ yɔ a-taa yɔ, ɖa-taa tɛma se ɛkaɣ-wɛ wɩlʋʋ sɔɔlɩm siɣsiɣ ñɩmbʋ.