Ðiyele nɛ fezuu taa tɔɔnaɣ wazɩ-ɖʋ camɩyɛ

1, 2. (a) Suwe Yehowa Aseɣɖe Tɩnaa maɣzɩɣ Bibl yɔɔ? (b) Bibl hɔɔlʋʋ ŋgʋ ŋkɩlɩ sɔɔlʋʋ?

ÐA YEHOWA ASEƔÐE TƖNAA lɛ, ɖɩsɔɔlɩ Bibl. Kɩtasɩɣ-ɖʋ lɔŋ kɩbaŋ nɛ kɩsɩɣnɩ-ɖʋ se ɖihiɣ laŋhɛzɩyɛ nɛ lidaʋ. (Roma 15:4) Ðɩnawa se pɩtɩkɛ ɛyaa lɩmaɣza wɛnɩ Bibl taa, ɛlɛ “Ɛsɔ maɣmaɣ tɔm” wɛnɩ kɩ-taa.​—1 Tesalooniiki 2:13.

² Pɩtʋʋ fɛyɩ se ɖa-taa paa weyi lɛ, ɛsɔɔlɩ Bibl hɔɔlɩŋ nɩɩyɩ nɛ pɩkɩlɩ lɛɛŋ. Nabɛyɛ sɔɔlɩ Evaŋgilimwaa, mbʋ pʋyɔɔ yɔ pɛkɛdɩɣ Yesu wezuu caɣʋ tɔm nɛ pɩsɩɣnɩ-wɛ se patɩlɩ Ɛsɔ wɛtʋ kɩbandʋ. (Yohanɛɛsɩ 14:9) Lalaa ñɔsɔɔlɩ Bibl takayɩsɩ nzɩ sɩyɔɔdʋʋ natʋ tɔm yɔ ɛzɩ Natʋ takayaɣ ŋga kɔyɔɔdʋʋ “mbʋ pɩkɔŋ labʋ alɩwaatʋ pazɩ taa yɔ.” (Natʋ 1:1, ABT) Pɩtʋʋ fɛyɩ se ɖa-tɩŋa ɖɩsɔɔlɩ Keɣsi takayaɣ mbʋ pʋyɔɔ yɔ kɛhɛzɩɣ ɖa-laŋa, nɛ Aduwa takayaɣ mbʋ pʋyɔɔ yɔ, keyeki se ɖɩkpɛlɩkɩ lɔŋ sakɩyɛ. Toovenim taa lɛ, Bibl wazɩɣ paa anɩ.

3, 4. (a) Lɩmaɣza wena ɖɩwɛnɩ ɖa-takayɩsɩ yɔɔ? (b) Ɛgbɛyɛ lɩzɩɣ takayɩsɩ nasɩyɩ se sɩwazɩ mba nɛ pɩkɩlɩ?

³ Ðɩsɔɔlɩ Bibl, nɛ pʋyɔɔ lɛ ɖɩsɔɔlɩ ɖɔɖɔ ɛgbɛyɛ takayɩsɩ mbʋ pʋyɔɔ yɔ Bibl yɔɔ patɩŋnaa nɛ pama-sɩ. Ðɩsɔɔlɩ fezuu taa tɔɔnaɣ ŋga kɛwɛ hatʋ cabɩ takayɩsɩ, fenaɣ fenaɣ takayɩsɩ nɛ takayɩsɩ lɛɛsɩ taa yɔ. Ðɩnawa se fezuu taa tɔɔnaɣ ŋga, kalɩnɩ Yehowa cɔlɔ nɛ kasɩɣnɩ-ɖʋ se ɖɩcalɩ ɖa-tɩ fezuu taa nɛ ɖɩcaɣnɩ ɖɛ-ɛza, nɛ ‘ɖɩka camɩyɛ tisuu taa.’​—Tiiti 2:2.

⁴ Pɩtasɩnɩ takayɩsɩ nzɩ ɛgbɛyɛ lɩzɩɣ se pɩwazɩ Yehowa Aseɣɖe Tɩnaa tɩŋa yɔ lɛ, ɖɩlɩzɩɣ ɖɔɖɔ takayɩsɩ lɛɛsɩ se sɩwazɩ ɛyaa tindima naayɛ nɛ pɩkɩlɩ. Palɩzɩɣ takayɩsɩ nasɩyɩ se sɩsɩnɩ piya evelisi, ɛlɛ lɛɛsɩ lɛ palɩzɩɣ-sɩ se sɩsɩnɩ sɩ-lʋlɩyaa. Palɩzɩɣ ɖa-takayɩsɩ lɛɛsɩ nɛ paɖʋʋ lɛɛsɩ ɖɛ-tɛ intɛrnɛɛtɩ lone yɔɔ se pɩsɩnɩ mba patɩkɛ Yehowa Aseɣɖe Tɩnaa yɔ. Ɛzɩma ɖɩwɛnɩ fezuu taa tɔɔnaɣ sakɩyɛ yɔ, pɩwɩlɩɣ se tɔm ndʋ Yehowa kaayɔɔdaa yɔ, tiɖiɣni labʋ. Ɛtɔm se ɛkaɣ “kɩsaʋ nakʋyʋ saʋ ɛyaa kpeekpe.”​—Izaayii 25:6.

5. Ɛbɛ ɖɩlaba yɔ, ɖɩpɩzɩɣ nɛ ɖɩtaa liu se Yehowa taa lakɩ leleŋ?

⁵ Pɩtʋʋ fɛyɩ se ɖa-taa sakɩyɛ sɔɔlaa se pehiɣ alɩwaatʋ nɛ pakalɩ Bibl nɛ ɛgbɛyɛ takayɩsɩ nɛ pɩkɩlɩ. Ðɩpɩzɩɣ nɛ ɖɩtaa liu se Yehowa taa leleŋ nɛ pana wena ɖɩñakɩ se ɖɩlabɩnɩ ɖa-alɩwaatʋ tʋmɩyɛ camɩyɛ se pɩsa nɛ ɖɩkalɩɣ nɛ ɖɩkpɛlɩkɩɣ Bibl ɖoŋ ɖoŋ yɔ. (Efɛɛzɩ 5:15, 16) Pɩkɛ toovenim se ɖɩɩpɩzɩɣ nɛ ɖɩkalɩ ɛgbɛyɛ takayɩsɩ tɩŋa ɛzɩ pɩpɔzʋʋ yɔ. Paa mbʋ yɔ, pɩwɛɛ se ɖɩkpa ɖa-tɩ nɛ ɖɩtaatɔlɩ kpaca nakʋyʋ taa. Kpaca ŋgʋ?

6. Ɛbɛ pɩzɩɣ piyele nɛ fezuu taa tɔɔnaɣ nakɛyɛ wazasɩ ɖɛɛ ɖɔ-yɔɔ?

⁶ Ye ɖɩtɩkpa ɖa-tɩ yɔ, ɖɩpɩzɩɣ nɛ ɖɩpaɣzɩ maɣzʋʋ se Bibl hɔɔlɩŋ nɩɩyɩ yaa ɛgbɛyɛ takayɩsɩ nasɩyɩ fɛyɩ-ɖʋ wazaɣ; nɛ ye ɖɩmaɣzɩɣ mbʋ yɔ, pɩpɩzɩɣ piyele nɛ wazasɩ nasɩyɩ ɖɛɛ ɖɔ-yɔɔ. Ɛzɩma ɖɩlakɩ ye pɩlakɩ-ɖʋ ɛzɩ Bibl hɔɔlʋʋ nakʋyʋ eetukuuni-ɖʋ ɖeyi ɖeyi yɔ? Nɛ ye pɩlakɩ-ɖʋ ɛzɩ ɖɩfɛyɩ ɛyaa tindimiye nɖɩ ɖɩ-yɔɔ pama takayaɣ nakɛyɛ yɔ ɖɩ-taa? Ðɩkaɣ takayaɣ ŋga kalʋʋ lɛɛ lɛɛ yem nɛ ɖɩɖɛɛ yaa halɩ ɖikizi se ɖɩɩkalɩɣ-kɛ? Ye ɖɩlabɩ mbʋ yɔ, pɩpɩzɩɣ piyele nɛ lɔŋ tasʋʋ mbʋ pɩwɛ takayaɣ ŋga ka-taa yɔ pɩɖɛɛ ɖɔ-yɔɔ. Ɛbɛ ɖɩpɩzɩɣ ɖɩla nɛ ɖɩtaatɔlɩ kpaca ŋgʋ kɩ-taa? Kɔzɩ kɔzɩ lɛ, pɩwɛɛ se ɖɩtɔzɩ se Yehowa Ɛsɔ cɔlɔ fezuu taa tɔɔnaɣ ŋga kalɩnaa. Yehowa tɩŋnɩ nayʋ Izaayii yɔɔ nɛ ɛyɔɔdɩ se: “Ma [Yehowa] ñɛ-Ɛsɔ weyi ɛwɩlɩɣ-ŋ mbʋ pɩwɛ wazaɣ yɔ.” (Izaayii 48:17) Ñʋʋ kʋnɛ kɩ-taa ɖɩkaɣ tazʋʋ lɔŋ tasʋʋ naadozo taa nɛ ɖɩna ɛzɩma ɖɩla nɛ fezuu taa tɔɔnaɣ ŋga Yehowa haɣ-ɖʋ yɔ ka-tɩŋa kawazɩ-ɖʋ yɔ.

LƆŊ TASƲƲ MBƲ PIYEKI SE BIBL KALƲƲ ƐWAZƖ-ÐƲ YƆ

7. Ðɩɩkalɩɣ Bibl lɛ, ɛbɛ yɔɔ pɩcɛyaa se ɖɩtaaka ɖa-lɩmaɣza pʋyʋ kʋɖʋm yɔɔ?

⁷ Ðɩɩkalɩɣ Bibl lɛ, ɖɩtaaka ɖa-lɩmaɣza pʋyʋ kʋɖʋm yɔɔ. Bibl yɔɔdʋʋ kpayɩ kpayɩ se ‘takayaɣ kiɖeɖeɣa kpeekpe lɩnɩ Ɛsɔ cɔlɔ na, nɛ kawazɩɣ.’ (2 Timootee 3:16) Pɩkɛ toovenim se kiɖe tɛɛ lɛ, ɛyaa nabɛyɛ paama Bibl hɔɔlɩŋ nɩɩyɩ. Pʋyɔɔ pɩcɛyaa se ɖɩɩkalɩɣ Bibl lɛ, ɖɩtaaka ɖa-lɩmaɣza pʋyʋ kʋɖʋm ɖeke yɔɔ. Koobu nɔɔyʋ yɔɔdaa se: “Alɩwaatʋ ndʋ mankalɩɣ Bibl yɔ, mɔntɔzʋʋ se ɖɩpɩzɩɣ nɛ ɖɩkpɛlɩkɩ lɔŋ sakɩyɛ Bibl hɔɔlʋʋ nakʋyʋ taa. Piyeki se mañɩnɩ lɔŋ weyi ɩwɛ hɔɔlʋʋ ŋgʋ kɩ-taa nɛ ɩɩnaɣ kaɣlaa yɔ.” Ye mbʋ, pʋcɔ nɛ ɖɩkalɩ Bibl lɛ, pɩcɛyaa se ɖɩtɩmnɩ Yehowa se ɛsɩnɩ-ɖʋ nɛ ɖɩtaaka ɖa-lɩmaɣza pʋyʋ kʋɖʋm ɖeke yɔɔ nɛ ɛha-ɖʋ ɖɔɖɔ lɔŋsɩnɖɛ nɛ ɖɩna lɔŋ weyi ɛsɔɔlaa se ɖɩkpɛlɩkɩ yɔ.​—Ɛsdrasɩ 7:10; kalɩ Yakubu 1:5.

8, 9. (a) Alɩwaatʋ ndʋ ɖɩkalɩɣ Bibl yɔ, tɔm ndʋ pɩwɛɛ se ɖɩpɔzɩ ɖa-tɩ? (b) Wɛtʋ kɩbandʋ ndʋ Bibl pɔzʋʋ ɛzʋtʋyaa se pɛwɛɛna yɔ, ɛbɛ tɩkpɛlɩkɩɣ-ɖʋ Yehowa yɔɔ?

⁸ Ðɩpɔzɩ tɔm. Alɩwaatʋ ndʋ ɖɩkalɩɣ Bibl hɔɔlʋʋ nakʋyʋ yɔ, ɖɩsɩŋ pazɩ nɛ ɖɩpɔzɩ ɖa-tɩ tɔm tʋnɛ: ‘Ɛbɛ tɔm tʋnɛ tɩkpɛlɩkɩɣ-m Yehowa yɔɔ? Ɛzɩma manpɩzɩɣ mankpaɣ-tʋ nɛ malabɩnɩ tʋmɩyɛ me-wezuu caɣʋ taa? Ɛzɩma manpɩzɩɣ mankpaɣ-tʋ nɛ mansɩnɩ lalaa?’ Ye ɖɩmaɣzɩɣ tɔm pɔzʋʋ mbʋ pɩ-yɔɔ kɔyɔ, pɩtʋʋ fɛyɩ se ɖe-Bibl kalʋʋ kaɣ-ɖʋ wazʋʋ nɛ pɩkɩlɩ. Iyele nɛ ɖɩmaɣzɩ wɛtʋ kɩbandʋ ndʋ pɩwɛɛ se ɛgbɛyɛ taa ɛzʋtʋyaa ɩwɛɛna yɔ tɩ-yɔɔ nɛ ɖɩna. (Kalɩ 1 Timootee 3:2-7.) Ye ɖɩtɩkɛ ɛgbɛyɛ taa ɛzʋtʋyʋ yɔ, ɖɩpɩzɩɣ nɛ ɖɩmaɣzɩ se Bibl hɔɔlʋʋ ŋgʋ kɩfɛyɩ-ɖʋ wazaɣ. Ɛlɛ ye ɖicosi tɔm naadozo ndʋ ɖɩpɔzaa nɛ pɩɖɛɛ yɔ tɩ-yɔɔ kɔyɔ, ɖɩkaɣ naʋ se wɛtʋ kɩbandʋ ndʋ Bibl pɔzʋʋ ɛzʋtʋyaa se pɛwɛɛna yɔ, tɩpɩzɩɣ nɛ tɩwazɩ ɖa-tɩŋa hɔɔlɩŋ ndɩ ndɩ taa.

⁹ “Ɛbɛ tɔm tʋnɛ tɩkpɛlɩkɩɣ-m Yehowa yɔɔ?” Tɩkpɛlɩkɩɣ-ɖʋ se Yehowa ñɩnɩɣ se mba pɔcɔŋnɩ ɛgbɛyɛ yɔɔ yɔ pɛwɛɛnɩ wɛtʋ kɩbandʋ. Ɛsɔɔlaa se paha kɩɖaʋ kɩbaŋʋ, nɛ ɛkaɣ-wɛ pɔzʋʋ akɔnta ɛzɩma pɔcɔŋnɩ ɛgbɛyɛ yɔɔ yɔ, pɩ-yɔɔ. Ɛgbɛyɛ wɛ ñɩm ɛ-ɛzɩdaa mbʋ pʋyɔɔ yɔ, ɛyabɩ-ɖɩ nɛ “ɛ-pɩyalʋ maɣmaɣ calɩm.” (Tʋma Labʋ 20:28) Yehowa sɔɔlaa se ɛgbɛyɛ taa ɛzʋtʋyaa ɩcɔnɩ ɖɔ-yɔɔ nɛ pakandɩyɩ ɖɔ-yɔɔ. (Izaayii 32:1, 2) Ye mbʋ, wɛtʋ kɩbandʋ ndʋ Bibl pɔzʋʋ ɛzʋtʋyaa se pɛwɛɛna yɔ, tɩwɩlɩɣ se Yehowa maɣzɩɣ ɖɔ-yɔɔ siŋŋ.

10, 11. (a) Wɛtʋ kɩbandʋ ndʋ Bibl pɔzʋʋ ɛzʋtʋyaa se pɛwɛɛna yɔ, ɛzɩma ɖɩpɩzɩɣ ɖɩkpaɣ-tʋ nɛ ɖɩlabɩnɩ-tʋ tʋmɩyɛ ɖe-wezuu caɣʋ taa? (b) Ɛzɩma ɖɩpɩzɩɣ ɖɩkpaɣ-tʋ nɛ ɖɩsɩnɩ ɛyaa lalaa?

¹⁰ “Ɛzɩma manpɩzɩɣ mankpaɣ tɔm ndʋ nɛ malabɩnɩ tʋmɩyɛ me-wezuu caɣʋ taa?” Pʋpɔzʋʋ se ɛgbɛyɛ taa ɛzʋtʋyaa iwiliɣ pa-taa ɖoŋ ɖoŋ nɛ pana se pɛkpɛndɩ pɛwɛnɩ fezuu taa wɛtʋ kɩbandʋ ndʋ Bibl pɔzʋʋ-wɛ se pɛwɛɛna yɔ, nɛ pañaɣ pana nɛ powobini ɛzɩdaa hɔɔlɩŋ weyi ɩ-taa pʋpɔzʋʋ yɔ. Pʋpɔzʋʋ ɖɔɖɔ se koobu “weyi e-liu” wɛɛ se ɛpɩsɩɣ ɛgbɛyɛ taa ɛzʋtʋyʋ yɔ, ɛñaɣ pana nɛ ɛwɛɛnɩ wɛtʋ kɩbandʋ ndʋ. (1 Timootee 3:1) Toovenim taa lɛ, pɩwɛɛ se paa Krɩstʋ tʋ weyi lɛ, ɛkpɛlɩkɩ nɛ ɛtɩlɩ wɛtʋ kɩbandʋ ndʋ, mbʋ pʋyɔɔ yɔ Krɩstʋ mba tɩŋa Yehowa sɔɔlaa se pɛwɛɛnɩ-tʋ. Pɩwɛɛ se ɖa-tɩŋa ɖɩwɛɛ lɔŋ nɛ ɖɩkɛ mba panɩɣ tɔm taa yɔ. (Filiipu 4:5; 1 Pɩyɛɛrɩ 4:7) Alɩwaatʋ ndʋ ɛzʋtʋyaa ñakɩ pana se pɛkɛ “wondu nʋmɔʋ kɩbaŋʋ wɩlɩyaa” yɔ, pɩsɩɣnɩ-ɖʋ nɛ ɖɩmaɣzɩnɩ “pe-tisuu.”​—1 Pɩyɛɛrɩ 5:3; Ebree 13:7.

¹¹ “Ɛzɩma manpɩzɩɣ mankpaɣ tɔm ndʋ nɛ mansɩnɩ lalaa?” Ðɩpɩzɩɣ ɖɩtɩŋnɩ wɛtʋ kɩbandʋ ndʋ Bibl pɔzʋʋ ɛzʋtʋyaa se pɛwɛɛna yɔ tɩ-yɔɔ nɛ ɖɩwɩlɩ ɖe-Bibl kpɛlɩkɩyaa tʋkaɣ ŋga kɛwɛ ɛgbɛyɛ taa ɛzʋtʋyaa nɛ coocinaa ñʋndɩnaa pɛ-hɛkʋ taa yɔ. Pɩtasɩ lɛ, alɩwaatʋ ndʋ ɖɩkalɩɣ wɛtʋ kɩbandʋ ndʋ yɔ, pɩtɔzʋʋ-ɖʋ pana wena ɖɛ-ɛgbɛyɛ taa ɛzʋtʋyaa ñakɩ se pɩwazɩ-ɖʋ yɔ a-yɔɔ. Ye ɖɩmaɣzɩɣ ɛzɩma pahaɣ pa-tɩ faaa yɔ pɩ-yɔɔ kɔyɔ, piyeki nɛ ‘ɖɩɖʋ-wɛ hɩɖɛ’ nɛ pɩkɩlɩ. (1 Tesalooniiki 5:12) Nɛ ye ɖɩñaŋ-wɛ nɛ ɖa-laŋɩyɛ pilim kɔyɔ, piyeki nɛ pala pa-tʋmɩyɛ nɛ taa leleŋ.​—Ebree 13:17.

12, 13. (a) Ɛbɛ ɖɩpɩzɩɣ nɛ ɖɩtɩŋnɩ ɛgbɛyɛ takayɩsɩ yɔɔ nɛ ɖɩñɩnɩ? (b) Ha kɩɖaʋ ŋgʋ kɩwɩlɩɣ se ɛgbɛyɛ takayɩsɩ taa ñɩnʋʋ sɩɣnɩ-ɖʋ se ɖɩkpɛlɩkɩ lɔŋ weyi ɩɩnaɣ kaɣlaa yɔ.

¹² Ðɩñɩnɩ ɛgbɛyɛ takayɩsɩ taa. Alɩwaatʋ ndʋ ɖɩkpɛlɩkɩɣ Bibl yɔ, ɖɩpɩzɩɣ ɖɩtɩŋnɩ ɖa-takayɩsɩ yɔɔ nɛ ɖicosi tɔm pɔzʋʋ pʋnɛ pɩ-yɔɔ:

• Ama Bibl hɔɔlʋʋ kʋnɛ?

• Le nɛ ɛzɩmtaa pama-kʋ?

• Wɛtʋ ndʋ taa pama Bibl takayaɣ ŋga?

Ye ɖicosi tɔm ndʋ tɩ-yɔɔ kɔyɔ, pɩpɩzɩɣ pɩsɩnɩ-ɖʋ nɛ ɖɩkpɛlɩkɩ lɔŋ weyi ɩɩnaɣ kaɣlaa yɔ.

¹³ Iyele nɛ ɖɩtazɩ Ezekɩyɛɛlɩ 14:13, 14 taa. Ðɩkalɩɣ peeɖe se: “Ye ɛjaɖɛ naɖɩyɛ ɛlabɩ kɩwɛɛkɩm nɛ ɖɩkʋyɩ mɔ-yɔɔ kɔyɔ, nɛ ye mensezi me-nesi ɖɩ-yɔɔ nɛ mɛnpɛlɩ kpɔnʋ ɖaʋ nɛ ye mentiyiɣni-ɖɩ ñɔɔsɩ nɛ mankʋʋ ɛyʋ nɛ kpɩnɛ; nɛ ɛyaa naadozo panɛ yɔ pɛwɛɛ ɛjaɖɛ nɖɩ ɖɩ-hɛkʋ taa, Noa, Danɩyɛɛlɩ nɛ Yɔb, pakaɣ pa-ñʋŋ yabʋ pe-siɣsiɣ wɛtʋ yɔɔ, Kɩbaɣlʋ tɔŋ na.” Ye ɖɩñɩnɩ ɖa-takayɩsɩ taa kɔyɔ, ɖɩnaɣ se pama tɔm ndʋ pɩnaɣ 612 P.P.Y. Alɩwaatʋ ndʋ tɩ-taa lɛ, Noa nɛ Yɔb paatɛm sɩbʋ pɩlakɩ pɩnzɩ mɩnɩŋ sakɩyɛ; paa mbʋ yɔ Yehowa tɩsɔɔ pe-siɣsiɣ wɛtʋ yɔɔ. Ɛlɛ Danɩyɛɛlɩ ñaawɛ wezuu. Nɛ pʋtɔma yɔ ɛɛwɛnɩ pɩnzɩ 20 mbʋ yɔ alɩwaatʋ ndʋ Yehowa yɔɔdaa se ɛɛwɛ siɣsiɣ ɛzɩ Noa nɛ Yɔb yɔ. Ɛbɛ pɩkpɛlɩkɩɣ-ɖʋ? Yehowa naɣ ɛ-sɛyaa siɣsiɣ tɩnaa cɩŋgɩlɩm wɛtʋ nɛ pɩlakɩ-ɩ leleŋ; ɛnaɣ ɖɔɖɔ piya evelisi cɩŋgɩlɩm wɛtʋ.​—Keɣa 148:12-14.

ÐIYELE NƐ ƐGBƐYƐ TAKAYƖSƖ TƖŊA WAZƖ-ÐƲ

14. (a) Palɩzɩ takayɩsɩ nasɩyɩ se sɩwazɩ piya evelisi we? (b) Nɛ ɛzɩma sɩpɩzɩɣ nɛ sɩwazɩ ɖa-tɩŋa? (Cɔnɩ kiɖe tɛɛ kɩlɛmʋʋ.)

¹⁴ Ðɩnawa se Bibl hɔɔlɩŋ tɩŋa pɩzɩɣ nɛ ɩwazɩ-ɖʋ. Mbʋ ɖɔɖɔ ɛgbɛyɛ takayɩsɩ tɩŋa kalʋʋ pɩzɩɣ nɛ pɩwazɩ-ɖʋ. Ðɩkpaɣ kɩɖaŋ nɩɩyɩ. Takayɩsɩ nzɩ palɩzɩɣ se pɩwazɩ piya evelisi yɔ. Pɩnzɩ nzɩ sɩɖɛwa yɔ sɩ-taa, palɩzɩ takayɩsɩ sakɩyɛ se pɩsɩnɩ piya evelisi.^[1] Palɩzɩ sɩ-taa nasɩyɩ se pɩsɩnɩ piya evelisi nɛ sɩkaɖɩnɩ sɩ-taabalaa sukuli taa yaa sɩwa kala wena sɩkatɩɣ yɔ. Ɛzɩma takayɩsɩ nzɩ sɩ-kalʋʋ pɩzɩɣ nɛ pɩwazɩ ɖa-tɩŋa? Piyeki se ɖɩtɩlɩ kala wena piya evelisi katɩɣ yɔ nɛ ɖɩpɩzɩ ɖɩsɩnɩ-sɩ nɛ ɖɩkpazɩ-sɩ ɖoŋ camɩyɛ.

15. Ɛbɛ yɔɔ pɩwɛɛ se Krɩstʋ ñɩma mba patɩtasɩ kɛʋ piya evelisi yɔ, pakalɩɣ piya evelisi takayɩsɩ?

¹⁵ Kala wena pɔyɔɔdʋʋ a-tɔm takayɩsɩ nzɩ sɩ-taa yɔ, pɩtɩkɛ piya evelisi yeke atukuuna. Pɩpɔzʋʋ se ɖa-tɩŋa ɖɩlʋ ɖe-tisuu yɔɔ, ɖɩɖɔkɩ ɖa-tɩ, ɖɩkaɖɩnɩ mba pacaɣ-ɖʋ tɔm yɔ, nɛ ɖise taabalɩyɛ nɛ aleɣya kɩdɛkɛda. Takayɩsɩ nzɩ palɩzaa se pɩwazɩ piya evelisi yɔ, sɩ-taa pama kala ana nɛ tɔm lɛɛtʋ. Pɩwɛɛ se Krɩstʋ ñɩma mba patɩtasɩ kɛʋ piya evelisi yɔ, pamaɣzɩ se pɛcɛzɩ piya evelisi takayɩsɩ kalʋʋ yɔɔ? Aayɩ. Paa pama takayɩsɩ nzɩ se sɩsɩnɩ piya evelisi yɔ, Bibl paɣtʋ kila wena awɛ sɩ-taa yɔ, aalɛɣzɩɣ nɛ apɩzɩɣ awazɩ ɖa-tɩŋa.

16. Ɛbɛ ɖɔɖɔ ɛgbɛyɛ takayɩsɩ sɩɣnɩ piya evelisi se sɩla?

¹⁶ Takayɩsɩ nzɩ ɛgbɛyɛ lɩzaa se sɩsɩnɩ piya evelisi nɛ sɩlʋbɩnɩ kala yɔ, sɩsɩɣnɩ-sɩ ɖɔɖɔ se sɩpɩɩ fezuu taa nɛ sɩñɔtɩnɩ Yehowa nɛ pɩkɩlɩ. (Kalɩ Eklesɩyastɩ 12:1, 13.) Nɛ hɔɔlʋʋ ŋgʋ kɩ-taa ɖɔɖɔ lɛ, sɩwazɩɣ mba patɩtasɩ kɛʋ piya evelisi yɔ. Kɩɖaʋ nakʋyʋ lɛ avril 2009 tɛ Réveillez-vous! taa tɔm ñʋʋ “Les jeunes s’interrogent: Comment trouver du plaisir à lire la Bible?” Tɔm ñʋʋ ŋgʋ kɩ-taa, patasɩ lɔŋ sakɩyɛ nɛ halɩ aɖakaɣ nakɛyɛ wɛ kɩ-taa nɛ ɛyʋ pɩzɩɣ nɛ ɛsɛtɩ-kɛ nɛ ɛɖʋ e-Bibl taa nɛ ɛlabɩnɩ-kɛ tʋmɩyɛ ɛɛkpɛlɩkɩɣ Bibl lɛ. Ñʋʋ ŋgʋ kɩpɩzɩɣ nɛ kɩwazɩ ɖɔɖɔ mba patɩkɛ piya evelisi yɔ? Ðoyo nɔɔyʋ wɛnɩ pɩnzɩ 24. Ɛyɔɔdaa se: “Tam lɛ, pɩwɛ-m kaɖɛ se mankalɩ Bibl. Mankpaɣ Réveillez-vous! ŋgʋ kɩ-taa lɔŋ tasʋʋ nɛ malabɩnɩ tʋmɩyɛ. Mɛnsɛtɩ takayaɣ hɔɔlʋʋ ŋgʋ nɛ manɖʋ men-Bibl taa nɛ malakɩnɩ-kʋ tʋmɩyɛ. Nɛ lɛɛlɛɛyɔ lɛ, manɖaŋɩɣ kpam se alɩwaatʋ ndʋ mankalɩɣ Bibl yɔ tɩtalɩ lɔŋ.” Ɛtasɩ yɔɔdʋʋ se pɩsɩnɩ-ɩ nɛ ɛna nɔɔ kʋɖʋmaɣ ŋga kɛwɛ Bibl takayɩsɩ ndɩ ndɩ hɛkʋ taa yɔ, nɛ wiɖiyi Bibl kalʋʋ tɩha-ɩ taa leleŋ ɛzɩ lɛɛlɛɛyɔ.

17, 18. Ɛzɩma tɩyɛ takayɩsɩ nzɩ palɩzɩɣ se pɩsɩnɩ mba patɩkɛ Yehowa Aseɣɖe Tɩnaa yɔ, sɩpɩzɩɣ nɛ sɩwazɩ-ɖʋ? Ha kɩɖaʋ nakʋyʋ.

¹⁷ Takayɩsɩ nzɩ palɩzɩɣ se pɩsɩnɩ mba patɩkɛ Yehowa Aseɣɖe Tɩnaa yɔ. Kpaɣnɩ pɩnaɣ 2008 lɛ, ɛgbɛyɛ paɣzɩ lɩzʋʋ Feŋuu Tilimiye nɖɩ ɖɩkpɛlɩkɩɣ agbaa taa yɔ. Mba pɛtɛm kɛʋ Yehowa Aseɣɖe Tɩnaa yɔ, pɔ-yɔɔ palɩzɩ-ɖɩ. Ɛlɛ suwe ɖɩmaɣzɩɣ fenaɣ fenaɣ takayɩsɩ nzɩ palɩzɩɣ se pɩwazɩ ɖo-kooka taa mba yɔ sɩ-yɔɔ? Ye ɖɩkalɩɣ-sɩ, pɩpɩzɩɣ nɛ pɩwazɩ-ɖʋ? Iyele nɛ ɖɩna kɩɖaʋ nakʋyʋ. Maɣzɩ se ŋya nɔɔyʋ se ɛkɔɔ Kewiyaɣ Kpaaŋ taa nɛ ewelisi samaɣ taa tɔm yɔɔdʋʋ nabʋyʋ nɛ etisi nɛ ɛkɔɔ. Pɩtʋʋ fɛyɩ se ña-taa labɩ leleŋ siŋŋ. Pʋtɔma yɔ, tɔm yɔɔdɩyʋ wɛɛ nɛ ɛyɔɔdʋʋ tɔm lɛ, ŋwɛɛ nɛ ŋmaɣzɩɣ ɛgɔm ɛnʋ ɛ-yɔɔ. Nɛ ŋpɔzʋʋ ña-tɩ se ɛzɩma tɔm ndʋ titukuuni-i nɛ ɛzɩma tɩpɩzɩɣ nɛ tɩlɛɣzɩ e-wezuu caɣʋ. Piyeba nɛ samaɣ taa tɔm ndʋ titukuni-ŋ nɛ halɩ ŋwɛɛnɩ ɛsɩmɩyɛ tɩ-yɔɔ nɛ pɩkɩlɩ.

¹⁸ Mbʋ ɖɔɖɔ alɩwaatʋ ndʋ ɖɩkalɩɣ takayɩsɩ nzɩ palɩzaa se pɩsɩnɩ mba patɩkɛ Yehowa Aseɣɖe Tɩnaa yɔ, pɩpɩzɩɣ nɛ pitukuni-ɖʋ. Feŋuu Tilimiye nɖɩ palɩzaa se ɖɩlabɩnɩ tʋmɩyɛ tɔm susuu taa yɔ, ɖɩ-taa tɔm wɛ kɛlɛʋ nɛ mba patɩkɛ Yehowa Aseɣɖe Tɩnaa yɔ, papɩzɩɣ nɛ panɩɩ tɩ-taa. Mbʋ ɖɔɖɔ tɔm ñʋŋ weyi paɖʋ jw.org yɔɔ yɔ, ɩ-taa nɩʋ wɛ kɛlɛʋ. Ɩ-taa nɩɩyɩ yɔ: “Questions bibliques” nɛ “Tɔm ndʋ ɛyaa pɔzʋʋ ɖoŋ ɖoŋ ɖɔ-yɔɔ yɔ.” Ye ɖɩkalɩɣ tɔm ndʋ yɔ, piyeki nɛ ɖɩnɩɩ toovenim tɔm ndʋ ɖɩɩtɛm sɩm yɔ tɩ-taa camɩyɛ nɛ ɖɩsɔɔlɩ-tʋ nɛ pɩkɩlɩ. Pɩtasɩ lɛ, ɖɩkpɛlɩkɩɣ nʋmɔŋ kɩfaŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩlɩzɩ ɖe-tisuu taa camɩyɛ alɩwaatʋ ndʋ ɖisusuu tɔm yɔ. Mbʋ ɖɔɖɔ Réveillez-vous! sɩɣnɩ-ɖʋ se ɖɩwɛɛnɩ tisuu siŋŋ se Ɛsɔ wɛɛ; kɩsɩɣnɩ-ɖʋ ɖɔɖɔ se ɖɩna ɛzɩma ɖɩlʋ ɖe-tisuu yɔɔ yɔ.​—Kalɩ 1 Pɩyɛɛrɩ 3:15.

19. Ɛzɩma ɖɩpɩzɩɣ nɛ ɖɩwɩlɩ ɖɛ-ɛsɩmɩyɛ fezuu taa wondu ndʋ Yehowa haɣ-ɖʋ yɔ tɩ-yɔɔ?

¹⁹ Pɩnaɣ kpayɩ kpayɩ se Yehowa ha-ɖʋ “fezuu taa wondu” sakɩyɛ se pɩsɩnɩ-ɖʋ nɛ ɖɩcɔnɩ ɖe-fezuu taa kɩcɛyɩm ɖeɖe. (Maatiyee 5:3, nwt) Tɛtɛ pɩla mbʋ nɛ ɖɩlabɩnɩ tʋmɩyɛ fezuu taa wondu ndʋ tɩ-tɩŋa. Ye ɖɩlakɩ mbʋ yɔ, ɖɩwɩlɩɣ ɖɛ-ɛsɩmɩyɛ Yehowa weyi ɛwɩlɩɣ-ɖʋ se pɩwazɩ-ɖʋ yɔ.​—Izaayii 48:17.