Natʋ 21:4—«Ɛkaɣ hɩzʋʋ ɛsɩtɛɣlɩm kpeekpe»

«Ɛkaɣ hɩzʋʋ ɛsɩtɛɣlɩm kpeekpe pɛ-ɛsɩndaa, nɛ sɩm ɛɛkaɣ tasʋʋ wɛʋ, kʋñɔwiye nɛ kubusi mabʋ nɛ wɩzasɩ paakaɣ tasʋʋ wɛʋ ɖɔɖɔ. Wondu kɩbɩndʋ mʋwaa.»—Natʋ 21:4, Ɛjaɖɛ kɩfaɖɛ tɔm ɖɛzʋʋ.

«Ɛkaɣ hɩzʋʋ pɛ-ɛsɩndaa ɛsɩtɛɣlɩm kpeekpe, nɛ sɩm ɛɛtasɩɣ wɛʋ; nɛ paatasɩɣ wiu, paatasɩɣ kubusi mabʋ, kʋñɔŋ ɛɛtasɩɣ wɛʋ, mbʋ yɔ ɛjaɖɛ kɩbɩnɖɛ ɖɛwa.»—Natʋ 21:4, TAKAYAƔ KIÐEÐEA, Verbum Bible, 1997.

Natʋ 21:4 tɔbʋʋ nɩʋ

Ɛsɔ labɩ tamaɣ se pɩtasɩna se eyeki nɛ wɩzasɩ nɛ kʋñɔmɩŋ weyi ɩcɛyɩɣ ɛyaa sɔnɔ yɔ ɩsɩɩ tɩnaɣ lɛ, ɛlakɩ ɖɔɖɔ nɛ mbʋ pɩ-cɔlɔ kʋñɔmɩŋ ɛnɩ ɩlɩnaa yɔ pɩsɩɩ tɩnaɣ.

«Ɛkaɣ hɩzʋʋ ɛsɩtɛɣlɩm kpeekpe pɛ-ɛsɩndaa.» Tɔm tʋnɛ tɩñɩkɩɣ niye tamaɣ ŋga Yehowaa tɩŋnɩ nayʋ Izaayii yɔɔ nɛ ɛla yɔ tɩ-yɔɔ; ɛyɔɔdaa se ɛkaɣ «hɩzʋʋ ɛsɩtɛɣlɩm ɛyaa kpeekpe ɛsɩndaa.» (Izaayii 25:8; Natʋ 7:17) Tɔm tʋnɛ tɩwɩlɩɣ se Yehowa maɣzɩɣ ɛyaa mba payɩ pewiɣ mbʋ pʋyɔɔ yɔ pɛ-ɛyʋ kʋsɔɔlʋ nɔɔyʋ sɩba yaa pɛwɛ kʋñɔŋ nakʋyʋ taa yɔ pɔ-yɔɔ siŋŋ.

«Sɩm ɛɛkaɣ tasʋʋ wɛʋ.» Ɛsɔ labɩ tamaɣ se ɛkaɣ ɖɩzʋʋ sɩm nɛ kʋñɔmɩŋ weyi sɩm kɔŋna yɔ. Pɩtasɩ lɛ, ɛkaɣ fezuu sɩɖaa. (1 Kɔrɛntɩ mba 15:21, 22) Mbʋ pɩkaɣ labʋ nɛ ‘ɛɖɩzɩ’ sɩm.—1 Kɔrɛntɩ mba 15:26.

«Kʋñɔwiye nɛ kubusi mabʋ nɛ wɩzasɩ paakaɣ tasʋʋ wɛʋ ɖɔɖɔ.» Ɛsɔ tamaɣ ɛɛwɩlɩɣ se ɛyaa ɩɩkaɣ tasʋʋ nɩʋ wɩzasɩ nasɩyɩ, ɛzɩ nzɩ ɖɩnɩɣ nɛ sɩwɩlɩɣ-ɖʋ se ɖɩcaɣ sʋʋ kaɖɛ naɖɩyɛ taa nɛ pɩsɩɣnɩ-ɖʋ se ɖɩfɛɛ-ɖɩ yɔ. Ɛlɛ tamaɣ ŋga kawɩlɩɣ se wɩzasɩ nzɩ kɩwɛɛkɩmb nɛ ɖa-mantɩtalɩ pilim wɛtʋ yeki nɛ ɖɩnɩɣ ɖa-maɣzɩm taa yaa ɖɔ-tɔnʋʋ taa yɔ sɩɩkaɣ tasʋʋ wɛʋ.—Roma mba 8:21, 22.

«Wondu kɩbɩndʋ mʋwaa.» Kɛdɛzaɣ tɔm loyaɣ kanɛ kawɩlɩɣ lɛɣzɩtʋ sɔsɔtʋ ndʋ tɩkaɣ labʋ ɛyaa wezuu caɣʋ taa yɔ. Takayaɣ nakɛyɛ yɔɔdaa se: «Wezuu caɣʋ kɩfam kaɣ lɛɣzʋʋ wezuu ŋgʋ ɛyaa cakaɣ nɛ pataapɩzɩɣ se pɛfɛɛ sɩm, kʋñɔwiye, wiluu nɛ wɩzasɩ yɔ ki-lone taa.» Ðɩnɛ ɛlɛ ɛyaa kaɣ pɩzʋʋ nɛ panɩɩ wezuu leleŋ tam tɛtʋ yɔɔ, ɛzɩ Ɛsɔ kaaɖʋʋ se pɩwɛɛ kiɖe tɛɛ yɔ.—Kiɖe Tɛɛ Tɔm 1:27, 28.

Tɔm ndʋ tɩcɔ Natʋ 21:4 nɛ tɩta yɔ

Ñʋʋ 21 kiɖe tɛɛ, apostoloo Yohanɛɛsɩ yɔɔdɩ mbʋ ɛna natʋ natʋyʋ taa yɔ pɩ-tɔm. Ɛyɔɔdaa se: «Mana ɛsɔdaa kɩfalʋʋ nakʋyʋ nɛ tɛtʋ kɩfatʋ natʋyʋ.» (Natʋ 21:1) Tɔm ndʋ ɛyɔɔdaa yɔ tɩwɩlɩɣ se lɛɣzɩtʋ sɔsɔtʋ natʋyʋ kaɣnɩ labʋ, nɛ pɔyɔɔdɩ lɛɣzɩtʋ ndʋ tɩ-tɔm Bibl masɩ nasɩyɩ taa ɖɔɖɔ. (Izaayii 65:17; 66:22; 2 Pɩyɛɛrɩ 3:13) Ɛsɔ komina ŋgʋ kɩwɛ ɛsɔdaa yɔ yaa «ɛsɔdaa kɩfalʋʋ» kaɣ lɛɣzʋʋ ɛyaa kominawaa tɩŋa lone taa nɛ kɩtɔɔ kewiyitu «tɛtʋ kɩfatʋ» yɔɔ, pʋ-tɔbʋʋ se ɛyaa kɩfama mba pakaɣ wɛʋ tɛtʋ yɔɔ yɔ pɔ-yɔɔ.—Izaayii 65:21-23.

Ɛbɛ wɩlɩɣ se tɛtʋ yɔɔ wezuu caɣʋ tɔm pɔyɔɔdʋʋ natʋ ndʋ tɩ-taa? Kajalaɣ, Ɛsɔ tamaɣ ŋga kapaɣzɩnɩ tɔm tʋnɛ: «Ɛsɔ kizinziku wɛ ɛyaa cɔlɔ.» (Natʋ 21:3) Ye mbʋ, pɩtɩkɛ ɛsɔdaa tiyiyaa palabɩ tamaɣ ŋga, ɛlɛ ɛyaa mba pɛwɛ tɛtʋ yɔɔ yɔ, mba palabɩ-kɛ. Nabʋlɛ, natʋ ndʋ tɩyɔɔdʋʋ ɛjaɖɛ nɖɩ ɖɩ-taa «sɩm ɛɛkaɣ tasʋʋ wɛʋ» yɔ ɖɩ-tɔm na. (Natʋ 21:4) Sɩm fɛyɩ ɛsɔdaa paa ññɩɩ, ɛlɛ tɛtʋ yɔɔ ɖeke pɩwɛɛ. (Roma mba 5:14) Ye mbʋ, pɩmʋnɩ mbʋ se ɖɩkɔ tɔm ñʋʋ se wɛtʋ ndʋ tɩkaɣ wɛʋ tɛtʋ yɔɔ cee wayɩ yɔ tɩ-tɔm mayaɣ ŋga kɔyɔɔdʋʋ.

Cɔnɩ video cikpeluu kʋnɛ nɛ ŋtɩlɩ Natʋ takayaɣ taa lɩmaɣza sɔsɔna.