Galaadɩ sukuli wazɩɣ ɛyaa ɛjaɖɛ kpeekpe yɔɔ

Paa pɩnaɣ ŋga alɩwaatʋ tɩŋa Ɛsɔ sɛtʋ tʋmlaɖaa lɩɣnɩ kedeŋa hɔɔlɩŋ ndɩ ndɩ taa nɛ powoki palakɩ Galaadɩ sukuli, Yehowa Aseɣɖe Tɩnaa sukulinaa ɖɩlaɖɛ nɖɩ payaɣ se Patterson, Niyuu Yɔrɩkɩ tɛtʋ taa yɔ, ɖɩ-taa.a Sukuli ŋgʋ kɩ-taa sukulibiya kpɛlɩkɩɣ ɛzɩma sɩla camɩyɛ tʋma wena paɖʋʋ-sɩ Yehowa ɛgbɛyɛ taa yɔ. Falɩsʋʋ mbʋ sɩmʋʋ yɔ, pɩsɩɣnɩ-sɩ se sɩkpazɩ ɖoŋ agbaa nɛ ɛgbɛyɛ pilinzi ɛjaɖɛ kpeekpe yɔɔ nɛ sɩcɛyɩsɩ camɩyɛ fezuu taa.

Pɩtʋʋ fɛyɩ se Galaadɩ sukuli wazɩɣ ɛyaa ɛjaɖɛ kpeekpe yɔɔ. Ðɩkpaɣ ɛzɩ ɖaŋ 147 ñɩŋgʋ ŋgʋ palabɩ pɩnaɣ 2019 taa mbʋ yɔ, sukulibiya 56 kaawɛnɩ kɩ-taa nɛ sɩlɩnɩ ajɛɛ 29 taa. Alɩwaatʋ tɩŋa Ɛsɔ sɛtʋ tʋmlaɖaa mba pahaɣ waɖɛ se pala sukuli ŋgʋ yɔ, pɛkɛnɩ Betɛɛlɩ tʋmlaɖaa, egeetiye yɔɔ cɔnɩyaa, Ɛsɔtɔm tiyiyaa yaa nʋmɔʋ lɩzɩyaa kiya.

Paa ɖaŋ ŋgʋ lɛ, papaɣzɩɣ-kʋ ñɔɔzʋʋ ɖooo lɔŋ pʋcɔ nɛ sukulibiya kɔɔ nɛ sɩpaɣzɩ sukuli. Tʋmɩyɛ ɖɩlaɖɛ sɔsɔɖɛ taa nʋmɔʋ ɖɔm ñɔɔzʋʋ tʋmɩyɛ yakɩnɩ sukulibiya ɛsɔdaa lɔɔɖɩyɛ sʋʋ tikeenaa. Liidiye 600 000 F CFA mbʋ yɔ, pakpaɣ nɛ payabɩnɩ ɛsɔdaa lɔɔɖɩyɛ sʋʋ tikeenaa ɖaŋ 147 ñɩŋgʋ taa paa sukulibɩɣa ŋga lɛ, kɛ-tɛ wobu nɛ kɔm. Sukulibiya nzɩ sɩlɩnɩ Salomon lɩm hɛkʋ taa tɛtʋ taa yɔ, wobu taa lɛ sɩsʋ ɛsɔdaa lɔɔɖa naanza nɛ pɩsʋʋ taa lɛ, ɛsɔdaa lɔɔɖa naadozo. Sɩɖɔm nʋmɔʋ kilomɛtanaa 35 400 nɛ paa sukulibɩɣa ŋga lɛ, kɛ-tɛ ɛsɔdaa lɔɔɖɩyɛ sʋʋ liidiye kɛ 1 242 000 F CFA mbʋ yɔ. Pɩsa nɛ pataakɩlɩ hɛyʋʋ liidiye sakɩyɛ lɛ, pañɩnɩɣ intɛrnɛɛtɩ yɔɔ tikeenaa mba papasɩ pɔ-yɔɔ yɔ. Halɩ pañɩkɩɣ niye tikee nakʋyʋ yɔɔ nɛ pɩtɛ lɛ, powoki pɩ-yɔɔ nɛ pañɩnɩɣ intɛrnɛɛtɩ yɔɔ kpɩtaŋ sakɩyɛ nɛ halɩ fenasɩ sakɩyɛ se pana se pakaɣ tasʋʋ kɩ-yɔɔ pasʋʋ na. Nʋmɔʋ ɖɔm ñɔɔzʋʋ tʋmɩyɛ lakɩnɩ tʋmɩyɛ ɖɔɖɔ kʋjɔŋ weyi ɛsɔdaa lɔɔɖa agbaa lakɩ yɔ nɛ ɖɩyakɩnɩ tikeenaa.

Pɩpɔzʋʋ sukulibiya sakɩyɛ visa waa pʋcɔ nɛ sɩsʋʋ Etaazuunii ɛjaɖɛ taa. Tʋmɩyɛ ɖɩlaɖɛ sɔsɔɖɛ taa tʋmɩyɛ nɖɩ ɖɩcɔŋnɩ tɔm hʋʋ yɔɔ yɔ, ɖɩsɩɣnɩ sukulibiya nzɩ nɛ pahaɣ-sɩ visa ŋgʋ pahaɣ sukulibiya yɔ. Liidiye nɖɩ palakɩna visa ŋgʋ paa sukulibɩɣa ŋga yɔ, ɖɩkpɛndɩ ɛzɩ 275 300 F CFA mbʋ yɔ.

Ɛzɩma falɩsʋʋ mbʋ sukulibiya nzɩ sɩmʋʋ yɔ pɩwazɩɣ-sɩ? Hendra Gunawan kɛ ɛzʋtʋyʋ Aazii hadɛ kiŋ wɩsɩ ɖɩlɩyɛ ɛgbɛyɛ naɖɩyɛ taa. Ɛ nɛ koobu nɔɔyʋ nɛ ɛ-halʋ mba, paalabɩ Galaadɩ sukuli yɔ, pɛwɛnɩ ɛgbɛyɛ taa. Ɛyɔɔdaa se: “Kajalaɣ lɛ, paa ɖooye nʋmɔʋ lɩzɩyaa taawɛɛ ɖɛ-ɛgbɛyɛ taa. Ɛlɛ Galaadɩ sukulibiya kɔma lɛ, kpekpeka ŋga paawɛna nɛ tɩ haʋ faaa lɩmaɣza wena paawɛna yɔ, piseɣti koobiya nɛ papaɣzɩ nʋmɔʋ lɩzʋʋ tʋmɩyɛ. Pʋwayɩ halɩ ɖɛ-ɛgbɛyɛ taa koobu halɩñɩnʋ nɔɔyʋ wobi Kewiyaɣ Tɔm Susuyaa Sukuli!”

Sergio Panjaitan nɛ Galaadɩ sukulibiya nasɩyɩ palakɩ tʋmɩyɛ Aazii hadɛ kiŋ wɩsɩ ɖɩlɩyɛ Betɛɛlɩ taa. Ɛyɔɔdaa se: “Falɩsʋʋ mbʋ pamʋwa yɔ pʋyɔɔ lɛ pɩtɩkɛ pe-ɖeke Ɛsɔ wazaa, ɛlɛ ɖa ɖɔɖɔ. Pɛkpɛlɩkɩ tɔm sakɩyɛ! Ɛlɛ paakpakɩɣ ndʋ pɛkpɛlɩkaa yɔ se pɔhɔ lalaa lɩmaɣza nɛ powoni pa-maɣmaɣ pa-tɩ yɔɔ ɛlɛ pawɩlɩɣ-tʋ lalaa faaa. Pʋnɛ pɩkpazɩ-ɖʋ ɖoŋ nɛ ɖa ɖɔɖɔ ɖɩpɩzɩɣ ɖɩkpazɩ lalaa ɖoŋ.”

Le palɩɣ liidiye yɔɔ nɛ palakɩnɩ sukuli kʋnɛ? Palakɩnɩ tʋmɩyɛ haɖɛ nɖɩ ɛyaa lakɩ ɛjaɖɛ kpeekpe yɔɔ se paɖʋnɩ nesi Kewiyaɣ tɔm susuu. Nɛ donate.jw.org yɔɔ pa-taa sakɩyɛ tɩŋɩɣna nɛ palakɩ haɖɛ nɖɩ. Ðɩsɛɣ-mɩ ɛzɩma ɩwɛɛ nɛ ɩɖʋʋ nesi sukuli kʋnɛ nɛ kɩwazɩɣ ɛyaa ɛjaɖɛ kpeekpe yɔɔ yɔ.