Takayɩsɩ ɖɩzɩyɛ nɖɩ ŋpɩzɩɣ nɛ ŋɖɔkɩ ñe-nesi taa yɔ

«Ðooo lɛ, ɖɩtaamaɣzɩ se wiɖiyi ɖɩkaɣ pɩzʋʋ nɛ ɖɩwɛɛnɩ ɛgbɛyɛ takayɩsɩ pɔrtaabɩlɩwaa yaa taabɩlɛɛtɩwaa yɔɔ.» Itisiɣ tɔm ndʋ tɩ-yɔɔ yaa we? Tɔm ndʋ koobu Geoffrey Jackson kaayɔɔdɩ pɩnaɣ 2020 Nɔɔɖɛyaa ɛgbɛyɛ akɔnta 6 ñɩŋgʋ taa nɛ ɛsazɩnɩ-ɖʋ. Ɛtɔm se: «Ye ɖɩtaawɛɛnɩ application JW Library kʋnɛ kʋdɔŋ sɔsɔʋ alɩwaatʋ tʋnɛ tɩ-taa yɔ, ɛzɩma ɖɩɩlaba? Pɩtʋʋ fɛyɩ se Yehowa kaasɩnɩ-ɖʋ pɩnzɩ sakɩyɛ nɛ ɖɩñɔɔzɩ ɖa-tɩ nɛ ɖɩɖaŋ alɩwaatʋ kaɖɛ ñɩndʋ ɛzɩ tʋnɛ yɔ.»

Ɛzɩma Yehowa kaasɩnɩ-ɖʋ nɛ ɖɩñɔɔzɩ ɖa-tɩ? Tʋmɩyɛ nɖɩ palaba nɛ polu application JW Library, nɛ ɛbɛ pɩɩpɔzaa se pala nɛ application ŋgʋ kiɖe nɛ pɩkɩlɩ?

Kajalaɣ application

Mai 2013 taa, Nɔɔɖɛyaa ɛgbɛyɛ pɔzɩ MEPS Ðʋtʋ yɔɔ tʋmlaɖaa mba pɛwɛ ɖa-tʋmɩyɛ ɖɩlaɖɛ sɔsɔɖɛ taa yɔ se polu application ŋgʋ kɩ-yɔɔ papɩzɩɣ nɛ pasɩɩ Traduction du monde nouveau Bibl yɔ. Paul Willies lakɩ tʋmɩyɛ MEPS Ðʋtʋ yɔɔ, ɛyɔɔdaa se: «Ðooo lɛ, ɖitaalu application nakʋyʋ nɛ kɩsɩɣnɩ-ɖʋ se ɖɩkpaɣ takayɩsɩ pɔrtaabɩlɩwaa yɔɔ. Ɛlɛ ɖiyebi ɖa-tʋma naayɛ nɛ ɖa nɛ koobiya lalaa ɖikpeɣli se ɖɩlɩzɩ application ŋgʋ nɛ mbʋ ɖɩsɩɣ kɩ-yɔɔ yɔ. Ðɩtɩmnɩ Yehowa ɖoŋ ɖoŋ nɛ Yehowa sɩnɩ-ɖʋ nɛ fenasɩ kagbanzɩ wayɩ mbʋ yɔ lɛ, palɩzɩ application ŋgʋ pɩnaɣ taa kediɣzaɣ taa.»

Tʋmɩyɛ kaɖɛ ñɩnɖɛ nɖɩ pɩkazaa yɔ lɛ se, ɖɩla nɛ application ŋgʋ kɩpɩsɩ takayɩsɩ sakɩyɛ ɖɩzɩyɛ kʋnʋmɩŋ sakɩyɛ taa. Kpaɣnɩ janvier 2015 lɛ, ɖɩpɩzaɣ se ɖɩna ɖa-takayɩsɩ application ŋgʋ kɩ-yɔɔ Aŋglɛɛ kʋnʋŋ taa, nɛ fenasɩ loɖo wayɩ mbʋ yɔ lɛ, ɖɩpɩzaɣ se ɖɩkpaɣ ɛgbɛyɛ takayɩsɩ kɩ-yɔɔ kʋnʋmɩŋ lɛɛŋ mɩnɩŋ sakɩyɛ taa.

Kpaɣnɩ alɩwaatʋ ndʋ lɛ, ɖo-koobiya ñaɣ pana nɛ pala tʋmɩyɛ nɛ application ŋgʋ kiɖe hɔɔlɩŋ sakɩyɛ taa nɛ pɩkɩlɩ. Paɖʋ application ŋgʋ kɩ-yɔɔ videowaa, ɛgbɛyɛ takayɩsɩ tɩŋa, minziiki nɛ videowaa mba ɖɩlakɩnɩ tʋmɩyɛ kediɣzisi taa yɔ. Paɖʋ ɖɔɖɔ Guide de Recherche kɩ-yɔɔ se kɩsɩnɩ-ɖʋ nɛ ɖɩtazɩ Bibl masɩ taa kɛlɛʋ.

Takayɩsɩ ɖɩzɩyɛ ñɔɔzʋʋ

Paa evemiye nɖɩ lɛ, patʋlʋʋ JW library pɔrtaabɩlɩwaa nɛ taabɩlɛɛtɩwaa mba pɔ-yɔɔ yɔ, pɛcɛzɩ miiliyɔɔwaa 8, nɛ paa fenaɣ ŋga lɛ, pɩcɛzɩ miiliyɔɔwaa 15. Ɛbɛ pɩwɛɛ se pala nɛ application ŋgʋ kɩpɩzɩ nɛ kɩla tʋmɩyɛ camɩyɛ pɔrtaabɩlɩwaa nɛ taabɩlɛɛtɩwaa yɔɔ? Koobu Willies lɩzɩ pɩ-taa se: «Application ŋgʋ kɩ-yɔɔ tʋmɩyɛ labʋ ɛɛtɛŋ kaaʋ. Ðɩwɛɛ nɛ ɖɩlakɩ tʋmɩyɛ pɩ-yɔɔ tam se kɩpɩzɩ nɛ kɩla tʋmɩyɛ camɩyɛ. Pɩsa nɛ pɔrtaabɩlɩwaa nɛ taabɩlɛɛtɩwaa la tʋmɩyɛ camɩyɛ lɛ, mba palakɩ-wɛ yɔ palakɩ tʋmɩyɛ ɖoŋ ɖoŋ pɔ-yɔɔ. Mbʋ yebina ɖa ɖɔɖɔ ɖɩlakɩ tʋmɩyɛ application JW Library yɔɔ ɖoŋ ɖoŋ se pɩsa nɛ kɩla tʋmɩyɛ camɩyɛ. Pɩwɛɛ ɖɔɖɔ se ɖɩñaɣ pana nɛ ɖɩñɔɔzɩ application ŋgʋ nɛ pɩkɩlɩ mbʋ pʋyɔɔ yɔ, takayɩsɩ nɛ videowaa mba pasɩɣ kɩ-yɔɔ yɔ, pɛwɛɛ pɔɖɔʋ.» Ye ɖɩkalɩ kʋnʋmɩŋ tɩŋa yɔ, ɖɩnaɣ se takayɩsɩ nzɩ sɩwɛɛ yɔ, sɩtalɩ ɛzɩ 200 000 mbʋ yɔ, nɛ tɔm ndʋ pakpaɣaa tatasɩ yɔɔ nɛ videowaa yɔɔ yɔ, tɩcɛzɩ 600 000!

Pɩwɛɛ se paya ordinatɛɛrɩ yɔɔ wondu sakɩyɛ pʋcɔ nɛ papɩzɩɣ pɔñɔɔzʋʋ application JW library ŋgʋ tam. Pɩwɛɛ ɖɔɖɔ se paya ordinatɛɛrɩ yɔɔ ɖʋtʋ sakɩyɛ. Paa pɩnaɣ ŋga lɛ, pakpakɩɣ liidiye dɔlaarɩwaa 1 500 (yaa 873 200 F CFA mbʋ yɔ) nɛ payakɩnɩ ordinatɛɛrɩwaa yɔɔ application kʋɖʋmʋʋ. Pɩtasɩ lɛ, paa pɩnaɣ ŋga, pakpakɩɣ liidiye ɛzɩ dɔlaarɩwaa 10 000 (yaa 5 821 466 F CFA mbʋ yɔ) nɛ payakɩnɩ MEPS Ðʋtʋ nɛ pasɩɩ mba palakɩ pɔrtaabɩlɩwaa yɔ pɔ-cɔlɔ se application JW Library ɛla tʋmɩyɛ camɩyɛ ordinatɛɛrɩwaa kɩfama, taabɩlɛɛtɩwaa kɩfama nɛ pɔrtaabɩlɩwaa kɩfama yɔɔ.

Pɔrtaabɩlɩwaa nɛ taabɩlɛɛtɩwaa yɔɔ takayɩsɩ kpaɣʋ yeba nɛ pɔtɔsɩ liidiye

JW Library yeba nɛ pɔtɔsɩ liidiye sakɩyɛ, mbʋ pʋyɔɔ papasɩ takayɩsɩ lɩzʋʋ, takayɩsɩ kpɛndʋʋ nɛ takayɩsɩ tiyinuu agbaa taa. Ðɩkpaɣ ɛzɩ takayaɣ ŋga payaɣ se Ðɩtazɩ Masɩ taa paa evemiye nɖɩ yɔ, pɩnaɣ 2013 taa palɩzɩ takayaɣ ŋga ɛzɩ miiliyɔɔwaa 12 mbʋ yɔ. Ɛlɛ pɩnaɣ 2020 taa lɛ, palɩzɩ-kɛ miiliyɔɔwaa 5 ɖeke ŋgʋ tɔm susuyaa ɛzɩ 700 000 mbʋ yɔ kalɩnɩ-kɛ tʋmɩyɛ ɛjaɖɛ kpeekpe yɔɔ. Ɛzɩ ɛbɛ yɔɔ pɩlɛɣzaa? Koobiya sakɩyɛ kalɩɣ evemiye mayaɣ JW Library yɔɔ pɔrtaabɩlɩwaa yɔɔ nɛ taabɩlɛɛtɩwaa yɔɔ.a

«Toovenim taa lɛ, kɩwɛ ɖeu kpem»

JW Library sɩnɩ koobiya ɖɔɖɔ hɔɔlɩŋ sakɩyɛ taa. Geneviève wɛ Kanadaa ɛjaɖɛ taa, ɛyɔɔdɩ ɛzɩma JW Library sɩnɩ-ɩ nɛ ɛkpɛlɩkɩɣ Bibl ɖoŋ ɖoŋ yɔ pɩ-tɔm. Ɛtɔm se: «Ye pɩɩwɛɛ se menkpeɣli takayɩsɩ tɩŋa pʋcɔ nɛ manpaɣzɩ Bibl kpɛlɩkɩɣ yɔ, mantɩsa se manpɩzaɣ se mɛnkpɛlɩkɩ Bibl paa tanaŋ ŋgʋ. Ɛlɛ pɩtɩŋnɩ application JW Library yɔɔ lɛ, mankpakɩɣ taabɩlɛɛtɩ lɛ, pɩtɩŋa pɩwɛ pɩ-yɔɔ. Mɛnkpɛlɩkɩɣ Bibl ɖoŋ ɖoŋ mbʋ lɛ, pɩkpazɩɣ men-tisuu ɖoŋ nɛ mɔñɔtʋʋnɩ Yehowa nɛ pɩkɩlɩɣ.»

Application kʋnɛ kɩsɩnɩ-ɖʋ kɔzɩ kɔzɩ COVID-19 kʋdɔŋ sɔsɔʋ alɩwaatʋ taa. Charlyn wɛ Etaazuunii ɛjaɖɛ taa. Ɛtɔm se: «Ɛzɩma COVID-19 kʋdɔŋ wɛ ɛjaɖɛ kpeekpe yɔɔ yɔ pʋyɔɔ lɛ, pɩcɛzɩ pɩnaɣ yɔɔ mantɩtasɩ naʋ ɖɛ-ɛgbɛyɛ takayɩsɩ maɣmaɣ nzɩ palɩzaa yɔ. Ɛlɛ JW Library sɩnɩ-ɖʋ nɛ ɖɩwɛɛnɩ mbʋ pɩpɔzʋʋ-ɖʋ se ɖɩcɛyɩsɩnɩ ɖe-tisuu yɔ, nɛ mɛnsɛɣ Yehowa ɛzɩma ɛɖʋ sɔɔlɩm nɛ ɛla ɖʋtʋ ndʋ yɔ pɩ-yɔɔ.»

Ɛyaa sakɩyɛ maɣzɩɣ ɛzɩ Faye yɔ, ɛwɛ Filipiini ɛjaɖɛ taa. Ɛyɔɔdaa se: «Application ŋgʋ kɩsɩɣnɩ-m nɛ mɔñɔtʋʋnɩ Yehowa. Mankʋyʋʋ tanaŋ tɛɛ lɛ, kɩ-yɔɔ mancalɩɣ wobu nɛ mankalɩɣ tɔm. Mewelisiɣ tatasɩ kɩ-yɔɔ alɩwaatʋ ndʋ malakɩ man-tʋma yɔ. Kɩ-yɔɔ mɔñɔɔzʋʋ kediɣzisi. Kɩ-yɔɔ mɛnkpɛlɩkɩɣ Bibl man-tɩ yɔɔ. Mɛwɛɣnɩ alɩwaatʋ lɛ, mɔncɔŋnɩ videowaa kɩ-yɔɔ. Mankalɩɣ tɔm yaa Bibl alɩwaatʋ ndʋ manɖaŋ caŋa nakɛyɛ taa se pɩtalɩnɩ-m yɔ. Toovenim taa lɛ, kɩwɛ ɖeu kpem.»

JW Library sɩɣnɩ-ɖʋ tɔm susuu taa ɖɔɖɔ. Kɩɖaʋ nakʋyʋ yɔ: Koobu halɩñɩnʋ nɔɔyʋ wɛ Kameruni ɛjaɖɛ taa. Ɛñɩnaɣ se ɛkalɩ mayaɣ nakɛyɛ tɔm susuu taa. Ɛ nɛ koobu halɩñɩnʋ lɛlʋ paakalɩ mayaɣ ŋga tɔm susuu taa pɩlakɩ kpɩtaŋ nɩɩyɩ yɔ. Ŋgʋ ɛɛsɔ mayaɣ ŋga kɔ-yɔɔ. Ɛtɔm se: «Ñʋʋ leleŋ lɛ se mɔntɔzɩ ka-taa tɔm natʋyʋ yɔɔ. Monkuli Bibl JW Library yɔɔ nɛ mañɩnɩ tɔm ndʋ. Kpaagbaa mbʋ lɛ, malɩɩ mayaɣ ŋga kɔ-yɔɔ. Malakɩnɩ JW Library tʋmɩyɛ lɛ, malɩɣ masɩ nzɩ maasɔ sɩ-yɔɔ yɔ, sɩ-yɔɔ.»

Mɩ-sɔɔlɩm haɖɛ nɖɩ ɩtɩŋɩɣnɩ donate.jw.org yɔɔ nɛ ɩlakɩ yɔ, nɖɩ sɩnɩnɩ-ɖʋ nɛ ɖilu application JW Library, ɖɩñɔɔzʋʋ-kʋ se kɩlakɩ tʋmɩyɛ camɩyɛ nɛ pɩkɩlɩ, se pɩsɩnɩ koobiya ɛjaɖɛ kpeekpe yɔɔ. Ðɩsɛɣ-mɩ pɩdɩɩfɛyɩ haɖɛ nɖɩ ɩlakɩ yɔ ɖɩ-yɔɔ.

Mbʋ palabɩ JW Library hɔɔlʋʋ taa yɔ

1. 

   Octobre 2013 taa, palɩzɩ JW Library nɛ kɩ-taa nɛ Traduction du monde nouveau, Bibl ŋgʋ pɔñɔɔzaa yɔ.

2. 

   Janvier 2015 taa, paɖʋ ɛgbɛyɛ takayɩsɩ lɛɛsɩ aŋglɛɛ taa kɩ-yɔɔ nɛ pʋwayɩ paɖʋ-sɩ ɖɔɖɔ kʋnʋmɩŋ lɛɛŋ mɩnɩŋ sakɩyɛ taa

3. 

   Novembre 2015 taa, pɔsɔzɩ mbʋ payʋsʋʋnɩ tɔm yɔ

4. 

   Mai 2016 taa, pɔsɔzɩ kediɣzisi hɔɔlʋʋ

5. 

   Mai 2017 taa, pɔsɔzɩ hɔɔlʋʋ ŋgʋ kɩsɩɣnɩ-ŋ se ŋma tɔm ndʋ ŋsɔɔlaa yɔ.

6. 

   Décembre 2017 taa, pɔsɔzɩ Bible d’étude

7. 

   Mars 2019 taa, pɩwɛ kɛlɛʋ se pakpaɣ tɔm ndʋ tɩwɛ tatasɩ yɔɔ nɛ videowaa taa yɔ, pɔrtaabɩlɩwaa nɛ taabɩlɛɛtɩwaa yɔɔ, nɛ pañɩnɩ ɖɔɖɔ tɔm Guide de recherche taa

8. 

   Janvier 2021 taa, pɔsɔzɩ wondu kɩfatʋ sakɩyɛ se pɩsɩnɩ-ɖʋ nɛ ɖɩlabɩnɩ Nɩɩ wezuu leleŋ tam! takayaɣ tʋmɩyɛ camɩyɛ