Nesi ɖʋʋ mba asɛyʋʋ talɩ-wɛ yɔ pɩnaɣ 2021 taa—Ðitiyele sɩnʋʋ ɖo-koobiya halaa nɛ abalaa

Teokrasɩ pɩnaɣ 2021 taa,a COVID-19 kʋdɔŋ sɔsɔʋ kaayeba nɛ ɛyaa wɛɛ kʋñɔŋ taa ɛjaɖɛ kpeekpe yɔɔ. Ɛzɩ palɩzʋʋ pɩ-taa tɔm ñʋʋ “Opérations de secours mondiales pour faire face à la pandémie” taa yɔ, ɖɩkpaɣ liidiye dɔlaarɩwaab miiliyɔɔwaa sakɩyɛ kʋdɔŋ sɔsɔʋ kʋnɛ kɩ-alɩwaatʋ taa nɛ ɖɩɖʋ Sɩnʋʋ kɔɔmiitewaa mba yɔ, pɛcɛzɩ 950 mbʋ yɔ.

Toovenim taa lɛ, alɩwaatʋ ndʋ kʋdɔŋ sɔsɔʋ ŋgʋ kɩwɛɛ nɛ kɩyɛlɩɣ ɛjaɖɛ kpeekpe yɔɔ lɛ, asɛyɩŋ lɛɛŋ sakɩyɛ wɛɛ nɛ ɩtalɩɣ ɖo-koobiya ɛjaɖɛ kpeekpe yɔɔ. Asɛyɩŋ weyi ɩlaba yɔ, ɩcɛzɩ 200 yɔɔ. Nɔɔɖɛyaa Ɛgbɛyɛ tɛ Ðʋtʋ yɔɔ cɔnɩyaa kɔɔmiite ha nʋmɔʋ se pakpaɣ liidiye dɔlaarɩwaa miiliyɔɔwaa 8 nɛ paɖʋnɩ nesi mba asɛyɩŋ ɛnɩ ɩtalaa yɔ nɛ pɩtasɩnɩ nɖɩ pakpaɣaa nɛ pasɩnɩ koobiya COVID-19 kʋdɔŋ alɩwaatʋ taa yɔ. Asɛyɩŋ naalɛ laba pitileɖita; na ɛzɩma palabɩnɩ ña-haɖɛ tʋmɩyɛ nɛ pasɩnɩ mba ɩtalaa yɔ.

Nyiragongo pʋʋ tɔ miŋ

22 mai 2021 wiye, Nyiragongo pʋʋ ŋgʋ kɩwɛ République Démocratique du Congo ɛjaɖɛ taa yɔ, kɩpaɣzɩ miŋ tɔʋ. Miŋ lɩwa nɛ ɩñaɣ ɖɩsɩ, sukulinaa nɛ ɩwɛɛkɩ lɩm. Ɛlɛ pɩtɩkɛ miŋ ɛnɩ i-ɖeke ɛkɔnɩnɩ ɛyaa kaɖɛ. Miŋ ɛnɩ ɛlɩwa nɛ pɩla kɩyakɩŋ nɩɩyɩ pʋwayɩ lɛ, mʋzʋʋ nakʋyʋ lɩɩ Goma tɛtʋ taa, kɩ-taa nɛ sɔtʋ nɛ kiyele nɛ tɛtʋ ñamsɩ tam hiŋ sakɩyɛ. Nɛ peheyi tɛtʋ ndʋ tɩ-taa ɛyaa hɔɔlʋʋ sɔsɔʋ se pakʋyɩ nɛ pɛlɛɣzɩ tɛtʋ. Ɛyaa kudokiŋ mɩnɩŋ sakɩyɛ kʋyɩ nɛ pa-taa lalaa wolo Ruwandaa ɛjaɖɛ kamaɣ yɔɔ.

Ɛyaa mba pakʋyaa yɔ, Yehowa Aseɣɖe Tɩnaa ɛzɩ 5 000 mbʋ kaawɛ pa-taa. Pʋʋ miŋ wɛɛkɩ pa-taa nabɛyɛ ɖɩsɩ, nɛ lalaa lɛ pamɩlɩ pa-ɖɩsɩ taa wondu alɩwaatʋ ndʋ pakʋyaa nɛ pɛlɛɣzɩ tɛtʋ yɔ. Ruwandaa nɛ République Démocratique du Congo ajɛɛ taa Sɩnʋʋ kɔɔmiitewaa cɔnɩ tʋma wena palaba nɛ pasɩnɩ mba asɛyʋʋ talɩ-wɛ yɔ, a-yɔɔ. Kɔŋgoo (Kinsaasaa) ɛgbɛyɛ piliŋa yɔɔdɩ Sɩnʋʋ kɔɔmiite nakʋyʋ tɔm se: “Paa kaɖɛ wɛtʋ kaawɛ tɛtʋ ndʋ tɩ-taa siŋŋ yɔ, pʋcɔ nɛ peheyiɣ ɛyaa se palɩɩ tɩ-taa lɛ, Sɩnʋʋ kɔɔmiite ŋgʋ kɩɩtɛm paɣzʋʋ tayʋʋ tɔɔnasɩ, lɩm, ɖɩhɛnɩyɛ nɛ wondu kususutu.” Paasɩ tɛtʋ natʋyʋ taa ɖo-koobiya mba yɔ, paacɛzɩ 2 000 yɔɔ. Sɩnʋʋ kɔɔmiite siɣ kizinzikiŋ, paha koobiya cache-nez waa nɛ peheyi-wɛ mbʋ pɩwɛɛ se pala nɛ COVID-19 nɛ kahʋyaɣ kʋdɔmɩŋ ɩtaakpa-wɛ yɔ.

Asɛyʋʋ paɣzaa nɛ pɩlakaɣ fenasɩ naadozo mbʋ yɔ lɛ, ɖo-koobiya tayɩ mɔʋ nɛ pɩcɛzɩ tɔɔnɩwaa 6, saamɩla mʋlʋm nɛ pɩcɛzɩ tɔɔnɩwaa 6, num nɛ pɩcɛzɩ tɔɔnɩwaa 3 nɛ lɩm nɛ pɩcɛzɩ tɔɔnɩwaa 3. Pɩsa nɛ pɔtɔsɩ liidiye lɛ, ɛgbɛyɛ piliŋa labɩ ɖʋtʋ se mbʋ ɛzɩ paayabɩ tɔɔnasɩ ajɛɛ lɛɛna taa nɛ pɩmʋ-wɛ liidiye sakɩyɛ lɛ, pɩkɩlɩɣ ɖeu se payabɩ-sɩ pɛ-ɛjaɖɛ taa.

Koobu halɩñɩnʋ nɔɔyʋ kaama ɖɩɣa kɩfalaɣ nakɛyɛ, ɛlɛ pʋʋ miŋ wɛɛkɩ-kɛ. Ɛyɔɔdaa se: “Piitibi-ɖʋ yɔɔɔ nɛ ɖɩnɩɩ siziŋ siŋŋ.” Ɛlɛ paha ɛ-hɔʋ tomnaɣ yɔɔ wondu nɛ pasɩnɩ-kʋ ɖɔɖɔ fezuu taa. Lɛɛlɛɛyɔ ɛyɔɔdaa se: “Halɩ nɛ sɔnɔ ɖɩwɛnɩ mbʋ pɩpɔzʋʋ-ɖʋ yɔ, mbʋ pʋyɔɔ yɔ Yehowa wɛɛ nɛ ɛsɩɣnɩ-ɖʋ. Ðiɖiɣzinaa se Yehowa wɛɛ nɛ eyeki se ɖa-sʋʋtʋ ɛwɛɛ-ɖʋ kɛlɛʋ.”

Liidiye tɔm wɛ kaɖɛ Veneezuyelaa ɛjaɖɛ taa

Pɩlabɩ pɩnzɩ sakɩyɛ yɔ, liidiye tɔm wɛ kaɖɛ Veneezuyelaa ɛjaɖɛ taa. Ðo-koobiya mba pɛwɛ peeɖe yɔ, wezuu caɣʋ wɛ-wɛ kaɖɛ, tɔɔnaɣ tɛɖɩɣ-wɛ nɛ ñam ñam lakasɩ tɔyaa ɖɔɖɔ. Ɛlɛ Yehowa ɛgbɛyɛ tɩlɔ koobiya mba.

Teokrasɩ pɩnaɣ ŋga kɛɖɛwa yɔ ka-taa yɔ, pakpaɣ liidiye nɖɩ nɛ payabɩnɩ tɔɔnasɩ nɛ fɔɔfɔɔnaa nɛ petiyini koobiya mba pɛwɛ kɩcɛyɩm taa yɔ, ɖɩcɛzɩ dɔlaarɩ miiliyɔɔ kʋɖʋmʋʋ nɛ hɔɔlʋʋ. Veneezuyelaa ɛgbɛyɛ piliŋa yɔɔdaa se: “Pɩfɛyɩ kɛlɛʋ se paa fenaɣ ŋga lɛ, pakpaɣ tɔɔnasɩ tɔɔnɩwaa 130 nɛ petiyini Venezuyeelaa ɛjaɖɛ kpeekpe taa, nɛ pʋwayɩ lɛ patayɩ-sɩ koobiya mba pɛwɛ kɛdɛɖaɣ taa yɔ.” Pɩsa nɛ tɔɔnaɣ ɛtaawɛɛkɩ lɔŋ lɛ, ɖoŋ ɖoŋ lɛ, koobiya tiyiɣni tɔɔnasɩ nzɩ sɩpɩzɩɣ sɩcaɣ nɛ pileɖi yɔ. Ɛgbɛyɛ piliŋa sɔzaa se: “Ðɩyakɩ tɔɔnasɩ sakɩyɛ alɩwaatʋ ndʋ sɩtɔyaa nɛ sɩfɛyɩ liidiye yɔ. Pʋwayɩ lɛ, ɖɩtɩŋnɩ nʋmɔʋ ŋgʋ kɩfɛyɩ liidiye yɔ kɩ-yɔɔ nɛ ɖitiyini tɔɔnasɩ nzɩ.”

Leonel kɛ Veneezuyelaa sɩnʋʋ Kɔɔmiite taa tʋ nɔɔyʋ, ɛsɔɔlɩ ɛ-tʋmɩyɛ nɖɩ siŋŋ. Ɛtɔm se: “Sɩnʋʋ tʋmɩyɛ wɛ ŋgee kpem. Waɖɛ ɖɩnɛ ɖɩsɩnɩ-m nɛ mankpa ɖoŋ alɩwaatʋ ndʋ COVID-19 kʋdɔŋ kʋ ma-halʋ kʋsɔɔlʋ yɔ. Mɛ-ɛsɩyɛ sɛnɩ tʋmɩyɛ nɛ mansɩɣnɩ koobiya mba pɛwɛ kɩcɛyɩm taa yɔ. Mana ɛzɩma Yehowa ɖɔm tamaɣ ŋga ɛlaba se ɛɛkaɣ yebu ɛ-samaɣ yɔ kɔ-yɔɔ yɔ.”

Pasɩnɩ koobu nɔɔyʋ, ɛ-maɣmaɣ ɛɛlabɩ tʋmɩyɛ sɩnʋʋ kɔɔmiite taa nɛ pɩɖɛɛ. Ɛtɔm se: “Lɛɛlɛɛyɔ lɛ ma pɩtalɩnaa se pasɩna. Pɩtɩkɛ tomnaɣ yɔɔ ɖeke pasɩnɩ-ɖʋ. Koobiya sɩnɩ ɖɔɖɔ ma nɛ ma-halʋ se ɖɩcaɣ ɖiɣɖiɣ. Pɔcɔnɩ ɖe-ɖeɖe, pɛhɛzɩ ɖa-laŋa nɛ pakpazɩ-ɖʋ ɖoŋ.”

Asɛyɩŋ nɩɩyɩ tuduu-ɖʋ ɛlɛ lɛɛŋ lɛ, peheyiɣ-ɖʋ ɩ-tɔm pʋcɔ nɛ ɩla. Ɛlɛ pɩtɩŋnɩ haɖɛ nɖɩ ɩlakɩ nɛ ɩɖʋʋnɩ nesi ɛjaɖɛ kpeekpe yɔɔ tɔm susuu tʋmɩyɛ yɔ ɖɩ-yɔɔ lɛ, ɖoŋ ɖoŋ lɛ, Yehowa ɛgbɛyɛ hikiɣ tɔɔnasɩ sakɩyɛ nɛ ɖitiyiɣni ɖenɖe kɩcɛyɩm wɛɛ yɔ lɛɛ lɛɛ. Nʋmɔŋ weyi ɩ-yɔɔ ɩpɩzɩɣ ɩtɩŋna nɛ ɩla haɖɛ yɔ, pɔyɔɔdɩ ɩ-taa nɩɩyɩ tɔm donate.jw.org yɔɔ. Ðɩsɛɣ-mɩ pɩdɩɩfɛyɩ haɖɛ nɖɩ ɩlakɩ yɔ ɖɩ-yɔɔ.