Kujuka, 7 décembre
[Kalɩɣ-kɛ] nɛ ŋmaɣzɩɣ ka-taa tɔm yɔɔ wɩsɩ nɛ ɖoo, pɩsa nɛ ŋɖɔ tɔm ndʋ pama ka-taa yɔ tɩ-tɩŋa tɩ-yɔɔ camɩyɛ; mbʋ pʋyɔɔ yɔ, mbʋ kaɣnɩ yebu nɛ pɩɖɔmnɩ-ŋ camɩyɛ nɛ ŋwɛɛ lɛɣtʋ ña-lakasɩ taa.—Yoz. 1:8.
Pɩcɛyaa se koobu halɩñɩnʋ ɛkpɛlɩkɩ lɛɣtʋ ndʋ tɩsɩɣnɩ-ɩ e-wezuu caɣʋ taa paa evemiye nɖɩ yɔ. Lɛɣtʋ ndʋ halɩbɩɣa kpɛlɩkɩɣ ka-pɩjatʋ taa yɔ, tɩkaɣ-kɛ wazʋʋ ke-wezuu kpeekpe. Kpɛlɩkɩ tɔm kalʋʋ nɛ tɔm maʋ camɩyɛ. Ajɛɛ hɔɔlɩŋ nɩɩyɩ taa lɛ, ɛyaa maɣzɩɣ se pɩtɩcɛyɩ se halaa ɩkpɛlɩkɩ tɔm kalʋʋ nɛ tɔm maʋ. Ɛlɛ pɩcɛyaa se Krɩstʋ mba tɩŋa ɩkpɛlɩkɩ tɔm kalʋʋ nɛ tɔm maʋ camɩyɛ. (1 Tim. 4:13) Ye mbʋ, taayele nɛ nabʋyʋ ɖɩɣ-ŋ nʋmɔʋ se ŋtaakpɛlɩkɩ tɔm kalʋʋ nɛ tɔm maʋ camɩyɛ. Ɛzɩma pɩkaɣ-ŋ wazʋʋ? Ye ŋsɩm tɔm kalʋʋ nɛ tɔm maʋ camɩyɛ yɔ, pɩpɩzɩɣ pɩsɩnɩ-ŋ nɛ ŋhiɣ tʋmɩyɛ. Pɩtasɩ lɛ, pɩkaɣ-ŋ wɛʋ kɛlɛʋ se ŋkpɛlɩkɩ Bibl nɛ ŋwɩlɩ kɩ-taa tɔm ɛyaa lalaa. Kɔzɩ kɔzɩ lɛ, ŋkaɣ ñɔtɩnʋʋ Yehowa nɛ pɩkɩlɩ alɩwaatʋ ndʋ ŋkalɩɣ ɛ-Tɔm nɛ ŋmaɣzɩɣ tɩ-yɔɔ yɔ.—1 Tim. 4:15. w23.12 20 § 10-11
Hodo, 8 décembre
Yehowa sɩm holuu ɛyaa mba pɔñɔʋnɩ Ɛsɔ yɔ takɩm taa.—2 Pɩy. 2:9.
Pɔzɩ Yehowa sɛ ɛsɩnɩ-ŋ nɛ ŋkaɖɩnɩ takɩm. Ðɩkɛ ɛyaa mba patɩtalɩ pilim yɔ, nɛ pɩtakɩɣ-ɖʋ se ɖɩla mbʋ pɩfɛyɩ ɖeu yɔ; pʋyɔɔ lɛ pɩpɔzʋʋ se ɖɩlʋ paa ɛzɩmtaa nɛ ɖɩtaatɔlɩ takɩm taa. Sataŋ wɛɛ nɛ ɛlakɩ mbʋ payɩ ɛpɩzɩɣ yɔ se pɩsa nɛ lʋbɩyɛ nɖɩ ɖɩlabɩ-ɖʋ kaɖɛ siŋŋ. Nʋmɔŋ weyi ɩ-yɔɔ ɛtɩŋɩɣna se episi ɖa-maɣzɩm yɔ, ɩ-taa nakʋyʋ lɛ aleɣya wena afɛyɩ kele kele yɔ. Aleɣya ana apɩzɩɣ ayele nɛ lɩmaɣza kɩdɛkɛda sʋʋ ɖa-maɣzɩm taa, nɛ lɩmaɣza kɩdɛkɛda ana apisi ɛyʋ weyi ɖɩkɛnɩ ɖooo ɖa-taa yɔ, nɛ pɩpɩzɩɣ piyele nɛ ɖɩla kɩdɛkɛdɩm sɔsɔm. (Mark. 7:21-23; Yak. 1:14, 15) Alɩwaatʋ ndʋ pɩtakɩɣ-ɖʋ se ɖɩla mbʋ pɩfɛyɩ ɖeu yɔ, pɩsa nɛ ɖɩpɩzɩ ɖɩkaɖɩnɩ-pʋ lɛ, pɩpɔzʋʋ se Yehowa ɛsɩnɩ-ɖʋ. Kɩɖaʋ adɩma wena Yesu wɩlɩ-ɖʋ yɔ a-taa ɛyɔɔdɩ tɔm tʋnɛ ɖɔɖɔ: «Taayele nɛ ɖɩtɔlɩ takɩm taa, ɛlɛ lɩzɩ-ɖʋ kañatʋ tʋ nesi tɛɛ.» (Mat. 6:13) Yehowa sɔɔlaa se ɛsɩnɩ-ɖʋ, ɛlɛ pɩpɔzʋʋ se ɖɩpɔzɩ-ɩ se ɛsɩnɩ-ɖʋ. Ðɩtɩmɩɣnɩ Yehowa se ɛsɩnɩ-ɖʋ nɛ pɩtɛ lɛ, pɩpɔzʋʋ ɖɔɖɔ se ɖɩñaɣ pana nɛ ɖise mbʋ pɩpɩzɩɣ piyele nɛ ɖɩtɔlɩ takɩm taa yɔ. w23.05 6-7 § 15-17
Piya, 9 décembre
Nimiye nɖɩ palʋ-ɖɩ nɛ nimasɩ 3 yɔ, paapɩzɩɣ nɛ pɛcɛbɩ-ɖɩ kɛlɛʋ.—Ekl. 4:12.
Taabalɩyɛ nɖɩ ɖɩwɛ nesi ɖɔkɩyaa nɛ pa-Caa weyi ɛwɛ ɛsɔdaa yɔ pɛ-hɛkʋ taa yɔ, ye ɖɩmʋ ñɩm pɛ-ɛsɩndaa yɔ petisiɣ faaa se pɔɖɔ ɛ-lɔŋ tasʋʋ yɔɔ. Nɛ lɔŋ tasʋʋ mbʋ, pɩsɩɣnɩ-wɛ se pɛfɛɛ yaa palʋbɩnɩ kala wena apɩzɩɣ ayele nɛ pɛ-hɛkʋ taa sɔɔlɩm hɛɛ yɔ. Ɛyaa mba papɩ fezuu taa yɔ, pañakɩ pana ɖɔɖɔ se pamaɣzɩnɩ Yehowa nɛ pɛwɛɛnɩ ɛ-wɛtʋ kɩbandʋ. Tɩ-taa natʋyʋ lɛ camɩyɛ lakasɩ, suuɖu nɛ kpaɣʋ nɛ kpeɣu. (Efɛz. 4:32–5:1) Ye nesi ɖɔkɩyaa ɩlɩzɩɣ wɛtʋ ndʋ nɛ pawɩlɩɣ ɖama yɔ, pɩwɛɣ-wɛ kɛlɛʋ se sɔɔlɩm mbʋ pɩwɛ pɛ-hɛkʋ taa yɔ pɩpaɣlɩ. Payaɣ koobu halɩñɩnʋ nɔɔyʋ se Lena; ɛɖɔkʋʋ nesi yɔ pɩcɛzɩɣ pɩnzɩ 25. Ɛyɔɔdaa se: «Ɛyʋ weyi ɛpɩ fezuu taa yɔ, pɩwɛ kɛlɛʋ se pɔsɔɔlɩ-ɩ nɛ pañamɩ-ɩ.» Iyele nɛ ɖɩna Bibl taa kɩɖaʋ nakʋyʋ. Alɩwaatʋ ndʋ pɩpɔzaɣ se Yehowa ɛlɩzɩ nesi ɖɔkɩyaa nabɛyɛ nɛ pɛkɛ weyi ɛkaɣ kɛʋ Mesiya yɔ ɛ-lʋlɩyaa yɔ, Daviid lʋlʋʋ taa mba kpeekpe hɛkʋ taa lɛ, Yosɛɛfʋ nɛ Maarɩɩ ɛlɩzaa. Ɛbɛ yɔɔ? Mbʋ pʋyɔɔ yɔ, taabalɩyɛ kaawɛ pa-taa paa weyi lɛ nɛ Yehowa pɛ-hɛkʋ taa; nɛ Yehowa kaanawa se pakaɣ-ɩ sɩʋ kajalaɣ lone taa pe-nesi ɖɔkʋʋ taa. w23.05 21 § 3-4