Tɔm Hʋyaa
1 Yozuwee sɩm wayɩ lɛ,+ Izrayɛɛlɩ mba* pɔzɩ Yehowa se:+ «Ða-taa anɩ calɩɣ kpaʋ nɛ eyooni Kanaŋ mba?» 2 Yehowa cosi se: «Yuuda kaɣnɩ kpaʋ.+ Ɩna! Manɖʋzʋʋ* ɛjaɖɛ e-nesi taa.» 3 Ðɩnɛ ɛlɛ, Yuuda heyi ɛ-ɖalʋ Siimeyɔɔ se: «Kɔɔ nɛ ŋsɩ-m nɛ ɖɩkpa tɛtʋ ndʋ pɛcɛlɩ-m yɔ tɩ-taa+ nɛ ɖiyooni Kanaŋ mba. Pʋwayɩ lɛ, mankaɣ-ŋ sɩʋ ɖɔɖɔ tɛtʋ ndʋ pɛcɛlɩ-ŋ yɔ tɩ-taa.» Peeɖe Siimeyɔɔ sɩ-ɩ nɛ pakpa.
4 Yuuda abalaa kpawa lɛ, Yehowa ɖʋzɩ Kanaŋ mba nɛ Perizi mba pe-nesi taa,+ nɛ pawa abalaa 10 000 Bezɛkɩ tɛtʋ taa. 5 Pana Adoni-Bezɛkɩ Bezɛkɩ tɛtʋ taa, nɛ poyooni-i peeɖe nɛ pawa Kanaŋ mba+ nɛ Perizi mba.+ 6 Adoni-Bezɛkɩ seɣaɣ lɛ, paɖʋ ɛ-wayɩ nɛ pakpa-ɩ nɛ pɛsɛtɩ e-niwee abalɩñɩna nɛ e-nimbe abalɩñɩna. 7 Nɛ Adoni-Bezɛkɩ yɔɔdɩ se: «Awiya 70 cazɩɣ tɔɔnaɣ man-taabɩlɩ tɛɛ nɛ pɛsɛtɩ a-niwee abalɩñɩna nɛ a-nimbe abalɩñɩna. Mbʋ malaba yɔ, pɩ-kɩmɩyɛ ɖeyi ɖeyi Ɛsɔ kpa-m.» Pʋwayɩ lɛ, powoni-i Yeruzalɛm,+ nɛ peeɖe ɛsɩba.
8 Pɩtasɩ lɛ, Yuuda abalaa yoni Yeruzalɛm+ tɛtʋ nɛ pamʋ-tʋ; paɖɩzɩ-tʋ nɛ laɣɖɛ nɛ pɔsɔbɩ-tʋ miŋ. 9 Pʋwayɩ lɛ, Yuuda abalaa tii nɛ poyooni Kanaŋ ñɩma mba paawɛ pʋŋ egeetiye taa nɛ Negɛɛbʋ nɛ Seefela yɔ.+ 10 Mbʋ Yuuda abalaa woba nɛ poyooni Kanaŋ ñɩma mba paawɛ Ebrɔŋ yɔ (ɖooo lɛ, payaɣaɣ Ebrɔŋ se Kiriyatɩ-Arba), nɛ pawa Sesaayɩ, Ahimaanɩ nɛ Talɩmaayɩ.+
11 Pakʋyɩnɩ peeɖe lɛ, powolo nɛ poyooni mba paawɛ Debir yɔ.+ (Ðooo lɛ, payaɣaɣ Debir se Kiriyatɩ-Sefɛɛrɩ.)+ 12 Nɛ Kalɛɛbɩ+ yɔɔdɩ se: «Abalʋ weyi ɛwakɩ Kiriyatɩ-Sefɛɛrɩ mba nɛ ɛmʋ pɛ-tɛtʋ yɔ, mankaɣ-ɩ cɛlʋʋ mɛn-pɛlɛ Akɩsa nɛ ɛpɩsɩ ɛ-halʋ.»+ 13 Nɛ Kalɛɛbɩ neu Kenaazɩ+ pɩyalʋ Otɩnɩyɛɛlɩ+ mʋ tɛtʋ ndʋ. Nɛ Kalɛɛbɩ cɛlɩ-ɩ ɛ-pɛlɛ Akɩsa nɛ ɛpɩsɩ ɛ-halʋ. 14 Ewokaɣ ɛ-walʋ tɛ lɛ, eseɣti ɛlɛ se ɛpɔzɩ hayɩm nabʋyʋ ɛnʋ caa. Peeɖe pɛlɛ tibini ɛ-kpaŋaɣ yɔɔ.* Kalɛɛbɩ pɔzɩ-ɩ se: «Ɛbɛ ŋñɩnɩɣ?» 15 Pɛlɛ cosi-i se: «Mentendi-ŋ wazɩ-m, mbʋ pʋyɔɔ yɔ ŋha-m kotoŋa nakɛyɛ* hadɛ kiŋ;* tasɩ-m haʋ Gulɔɔtɩ-Mayim.»* Peeɖe Kalɛɛbɩ ha-ɩ Hayo Gulɔɔtɩ nɛ Hadɛ Gulɔɔtɩ.
16 Nɛ Keni tʋ,+ Moyizi ɛtɩ+ lʋlʋʋ taa mba kʋyɩnɩ paŋ tɛtʋ+ taa nɛ pakpa, pa nɛ Yuuda samaɣ, nɛ powolo Yuuda kañɩmbusuu taa, Arad+ hadɛ kiŋ. Powobi peeɖe nɛ pacaɣ samaɣ taa.+ 17 Ɛlɛ Yuuda nɛ ɛ-ɖalʋ Siimeyɔɔ powolo nɛ poyooni Kanaŋ ñɩma mba paawɛ Zefaatɩ tɛtʋ taa yɔ nɛ paɖɩzɩ-tʋ.+ Pʋyɔɔ paya tɛtʋ ndʋ se Hɔrma.*+ 18 Pʋwayɩ lɛ, Yuuda mʋ Gaazaa+ tɛtʋ nɛ ti-egeetiye, Askelɔɔnɩ+ tɛtʋ nɛ ti-egeetiye nɛ Ekrɔɔnɩ+ tɛtʋ nɛ ti-egeetiye. 19 Yehowa kaawɛ Yuuda cɔlɔ, nɛ pamʋ pʋŋ egeetiye, ɛlɛ patɩpɩzɩ nɛ pɔɖɔɔnɩ mba paawɛ kɛdɛɛŋa taa yɔ, mbʋ pʋyɔɔ yɔ paba kaawɛnɩ ñɩɣtʋ you kɛɛkɛɛnaa.*+ 20 Pɛcɛlɩ Ebrɔŋ tɛtʋ Kalɛɛbɩ, ɛzɩ Moyizi kaalabʋ tamaɣ yɔ,+ nɛ ɛɖɔɔnɩ peeɖe Anakɩ pɩyalaa mba pa-naadozo.+
21 Ɛlɛ Bɛnjamɛɛ mba tɩɖɔɔnɩ Yebuusi ñɩma mba paawɛ Yeruzalɛm yɔ, nɛ Yebuusi mba wɛɛ Bɛnjamɛɛ mba hɛkʋ taa mbʋ Yeruzalɛm halɩ nɛ sɔnɔ.+
22 Alɩwaatʋ ndʋ tɩ-taa lɛ, Yosɛɛfʋ ɖɩɣa+ kpa Betɛɛlɩ wayɩ, nɛ Yehowa kaawɛ pɔ-cɔlɔ.+ 23 Yosɛɛfʋ ɖɩɣa cɔŋaɣ Betɛɛlɩ tɛtʋ (ɖooo lɛ, payaɣaɣ tɛtʋ ndʋ se Luuz),+ 24 nɛ cɔŋɩyaa na abalʋ nɔɔyʋ, ɛlɩnɩ tɛtʋ taa. Nɛ peheyi-i se: «Ðitendi-ŋ, wɩlɩ-ɖʋ ɖenɖe pasʋʋnɩ tɛtʋ taa yɔ, nɛ ɖɩkaɣ naʋ ña-pʋtɔdɩyɛ.»* 25 Peeɖe abalʋ wɩlɩ-wɛ ɖenɖe pasʋʋnɩ tɛtʋ taa yɔ, nɛ paɖɩzɩ tɛtʋ nɛ laɣɖɛ, ɛlɛ peyele abalʋ ɛnʋ nɛ ɛ-hɔʋ tɩŋa nɛ paba ɖɛɛ.+ 26 Nɛ abalʋ ɛnʋ ewolo Hɛɛtɩ mba ɛjaɖɛ taa nɛ ɛma tɛtʋ natʋyʋ peeɖe nɛ ɛyaa-tʋ se Luuz, nɛ mbʋ payaɣ-tʋ halɩ nɛ sɔnɔ.
27 Manaasee tɩmʋ Bɛtɩ-Seyanɩ nɛ tɛtʋ ndʋ tɩɩcɔ-kʋ nɛ tɩta yɔ, Taanakɩ+ nɛ tɛtʋ ndʋ tɩɩcɔ-kʋ nɛ tɩta yɔ, Dɔɔr mba nɛ tɛtʋ ndʋ tɩɩcɔ-kʋ nɛ tɩta yɔ, Ibleyam mba nɛ tɛtʋ ndʋ tɩɩcɔ-kʋ nɛ tɩta yɔ, nɛ Megido mba nɛ tɛtʋ ndʋ tɩɩcɔ-kʋ nɛ tɩta yɔ.+ Kanaŋ mba tɛm pa-taa nɛ pacaɣ egeetiye nɖɩ ɖɩ-taa. 28 Izrayɛɛlɩ mba kɔm nɛ pakpa ɖoŋ lɛ, pakpaɣ Kanaŋ mba nɛ ɖoŋ nɛ palakɩ tʋma,+ ɛlɛ patɩɖɔɔnɩ-wɛ caɣ caɣ.+
29 Nɛ Efrayim ɖɔɖɔ tɩɖɔɔnɩ Kanaŋ ñɩma mba paawɛ Gezɛɛrɩ yɔ. Kanaŋ mba kaawɛ pɛ-hɛkʋ taa mbʋ Gezɛɛrɩ.+
30 Zebulɔɔnɩ tɩɖɔɔnɩ Kitrɔɔnɩ mba nɛ Nahalɔɔlɩ mba.+ Kanaŋ mba kaawɛ pɛ-hɛkʋ taa mbʋ nɛ Zebulɔɔnɩ kpaɣaɣ-wɛ nɛ ɖoŋ nɛ palakɩ tʋma.+
31 Asɛɛrɩ tɩɖɔɔnɩ mba paawɛ Ako yɔ, nɛ mba paawɛ Siidɔɔ,+ Alaab, Akɩziib,+ Helba, Afiik+ nɛ Rehob+ yɔ. 32 Asɛɛrɩ mba kaawɛ Kanaŋ ñɩma mba paawɛ ɛjaɖɛ taa yɔ pɛ-hɛkʋ taa mbʋ, mbʋ pʋyɔɔ yɔ patɩɖɔɔnɩ-wɛ.
33 Naftalii mba tɩɖɔɔnɩ mba paawɛ Bɛtɩ-Semɛɛsɩ nɛ mba paawɛ Bɛtɩ-Anatɩ+ yɔ, ɛlɛ Naftalii mba kaawɛ Kanaŋ ñɩma mba paawɛ ɛjaɖɛ taa yɔ pɛ-hɛkʋ taa mbʋ.+ Naftalii mba kpaɣaɣ mba paawɛ Bɛtɩ-Semɛɛsɩ nɛ Bɛtɩ-Anatɩ yɔ nɛ ɖoŋ nɛ palakɩ tʋma.
34 Amoori mba ñɩɣ Daanɩ mba yɔɔ se pacaɣ pʋŋ egeetiye taa, mbʋ pʋyɔɔ yɔ patɩha Daanɩ mba nʋmɔʋ se petii kɛdɛɛŋa taa.+ 35 Pʋyɔɔ Amoori mba tɛm pa-taa nɛ pacaɣ Herɛsɩ Pʋʋ taa, Ayalɔɔnɩ+ nɛ Saalibim.+ Ɛlɛ Yosɛɛfʋ ɖɩɣa nesi kpa ɖoŋ* lɛ, pakpaɣ Amoori mba nɛ ɖoŋ nɛ palakɩ tʋma. 36 Amoori mba egeetiye kaawɛ kpaɣnɩ Akrabim ɖɩgbayɛ,+ kpaɣnɩ Seela kpaʋ yɔɔ.