Tɔm Hʋyaa
12 Pʋwayɩ lɛ, Efrayim abalaa kpeɣli ɖama, nɛ pɛtɛzɩ nɛ powolo Zafɔɔnɩ* nɛ pɔpɔzɩ Yɛftee se: «Ɛbɛ yɔɔ ŋtɩyaa-ɖʋ se ɖɩsɩ-ŋ alɩwaatʋ ndʋ ŋtɛzaɣ se ŋyooni Amooni mba yɔ?+ Ðɩkaɣ ñaɣzʋʋ ña-ɖɩɣa miŋ nɛ pɩkpɛndɩnɩ-ŋ.» 2 Ɛlɛ Yɛftee cosi-wɛ se: «Ma nɛ man-samaɣ ɖɩɩwɛɛ nɛ ɖɩlʋkɩnɩ Amooni mba siŋŋ. Nɛ mayaa-mɩ se ɩsɩnɩ-ɖʋ, ɛlɛ ɩtɩya ɖa-ñʋʋ pe-nesi taa. 3 Nɛ alɩwaatʋ ndʋ manawa se ɩɩkaɣ ma-ñʋʋ yabʋ lɛ, mankpaɣ lɩmaɣzɩyɛ se manɖʋʋ me-wezuu kaɖɛ taa* nɛ mowolo nɛ moyooni Amooni mba,+ nɛ Yehowa ɖʋzɩ-wɛ me-nesi taa. Ye mbʋ, ɛbɛ yɔɔ ɩkɔm sɔnɔ se iyooni-m?»
4 Ðɩnɛ ɛlɛ Yɛftee kpeɣli Galaadɩ+ abalaa kpeekpe nɛ poyooni Efrayim; Galaadɩ abalaa wa Efrayim ñɩma mba paayɔɔdaa se: «Mɩ Galaadɩ mba, ɩkɛ kʋyʋʋ ɖʋyaa yem, mba palɩnɩ Efrayim nɛ pacaɣ Efrayim nɛ Manaasee taa yɔ.» 5 Galaadɩ mba ɖɛɛ Efrayim mba nɔɔ nɛ pamʋ Yɔɔrdaŋ pɔɔ ɖɩdɛzɩyɛ.*+ Nɛ Efrayim ñɩma mba peseɣaɣ se patʋlɩ yɔ pa-taa nɔɔyʋ talɩɣ lɛ, eheyiɣ Galaadɩ abalaa se: «Ɩha-m nʋmɔʋ nɛ mɛntɛzɩ»; ɖɩnɛ ɛlɛ paba pɔzaɣ pa-taa paa weyi se: «Ŋkɛ Efrayim tʋ na?» Ye ecosaa se: «Aayɩ!» kɔyɔ, 6 peheyaɣ-i se: «Ðitendi-ŋ, yɔɔdɩ se Sibolɛɛtɩ.» Ɛlɛ, ɛlɛ ñɔyɔɔdaɣ se: «Zibolɛɛtɩ,» mbʋ pʋyɔɔ yɔ ɛtaapɩzɩɣ se ɛyaa tɔm piye nɖɩ ɛzɩ pɩpɔzʋʋ yɔ. Ðɩnɛ ɛlɛ, pakpaɣaɣ-ɩ nɛ pakʋʋ Yɔɔrdaŋ pɔɔ ɖɩdɛzɩyɛ peeɖe. Mbʋ pɩlaba nɛ Efrayim mba 42 000 sɩ alɩwaatʋ ndʋ.
7 Yɛftee hʋ tɔm Izrayɛɛlɩ pɩnzɩ 6; pʋwayɩ lɛ, Galaadɩ tʋ Yɛftee sɩ nɛ pepimi-i ɛ-tɛtʋ taa Galaadɩ.
8 Ɛ-wayɩ lɛ, Bɛtɩlɛhɛm tʋ Ibizaanɩ hʋnɩ tɔm Izrayɛɛlɩ.+ 9 Ɛɛwɛnɩ abalɩbiya 30 nɛ halɩbiya 30. Eyebi ɛ-pɛlaa nɛ pawalɩ abalaa mba pataakɛ e-cejewiye taa mba yɔ, nɛ ɛkpaɣ ɖɔɖɔ pɛlaa 30 mba pataakɛ e-cejewiye taa mba yɔ nɛ ɛkɔnɩ ɛ-pɩyalaa. Ɛhʋ tɔm Izrayɛɛlɩ pɩnzɩ lʋbɛ. 10 Pʋwayɩ lɛ, Ibizaanɩ sɩ nɛ pepimi-i Bɛtɩlɛhɛm.
11 Ɛ-wayɩ lɛ, Zebulɔɔnɩ tʋ Elɔɔnɩ hʋnɩ tɔm Izrayɛɛlɩ; ɛhʋ tɔm Izrayɛɛlɩ pɩnzɩ 10. 12 Pʋwayɩ lɛ, Zebulɔɔnɩ tʋ Elɔɔnɩ sɩ nɛ pepimi-i Ayalɔɔnɩ, Zebulɔɔnɩ egeetiye taa.
13 Ɛ-wayɩ lɛ, Piratɔɔnɩ tʋ Hilɛɛlɩ pɩyalʋ Abɩdɔɔnɩ hʋnɩ tɔm Izrayɛɛlɩ. 14 Ɛɛwɛnɩ abalɩbiya 40 nɛ sayɩnaa* 30, pacakaɣ kpaŋasɩ 70. Ɛhʋ tɔm Izrayɛɛlɩ pɩnzɩ lutozo. 15 Pʋwayɩ lɛ, Piratɔɔnɩ tʋ Hilɛɛlɩ pɩyalʋ Abɩdɔɔnɩ sɩ nɛ pepimi-i Piratɔɔnɩ, Efrayim egeetiye taa, Amalɛɛkɩ mba+ pʋʋ taa.