Tɔm Hʋyaa
15 Alɩwaatʋ natʋyʋ wayɩ lɛ, Samsɔɔ wolo se ɛna ɛ-halʋ, pɩɩtʋʋzɩnɩ tɔɔnaɣ ŋga payaɣ se blee yɔ ka-kʋmtʋ alɩwaatʋ taa; ɛɛkpɛndɩnɩ mbeɣa nakɛyɛ. Nɛ ɛyɔɔdɩ se: «Mɔnsɔɔlaa se mansʋʋ ma-halʋ cɔlɔ pɩ-taa kuduyuu* tɛɛ.» Ɛlɛ halʋ caa tɩha-ɩ nʋmɔʋ se ɛsʋʋ kuduyuu tɛɛ. 2 Halʋ caa heyi-i se: «Mamaɣzaa se: “Paa pɩɩla ɛzɩma yɔ ŋpaɖɩɣ-ɩ.”+ Pʋyɔɔ mɛncɛlɩ-ɩ ña-taabalaa mba paawɛ ñɔ-cɔlɔ kazandʋ wiye yɔ pa-taa lɛlʋ.+ E-neu tiɖe nɛ pɩkpaɖɩ-ɩ yaa we? Mentendi-ŋ kpaɣ neu, ɛ-kɔɔ lone taa.» 3 Ɛlɛ Samsɔɔ heyi-wɛ se: «Lɛɛlɛɛyɔ lɛ, ye malabɩ Filistii mba kɩdɛkɛdɩm nabʋyʋ yɔ, paapɩzɩɣ nɛ pakʋ mɔn-tɔm.»
4 Ðɩnɛ ɛlɛ Samsɔɔ ɖɛɛ nɛ ɛkpa sɔŋgɔlɔ hasɩ 300. Pʋwayɩ lɛ, ɛkpaɣ koolonzi,* ɛkpaɣ sɔŋgɔlɔ hasɩ nzɩ naalɛ naalɛ, ɛkɛzɩ-sɩ nɛ sɩha ɖama suŋ nɛ ɛta koolonzi si-suŋ hɛkʋ taa. 5 Nɛ ɛɖʋ koolonzi miŋ nɛ eyele sɔŋgɔlɔ hasɩ Filistii mba hayɩm taa. Tɔɔnaɣ kaawɛ ka-tɩŋ yɔɔ hayɩm mbʋ pɩ-taa. Nɛ ɛñaɣzɩ miŋ pɩtɩŋa payɩ kpaɣnɩ tɔɔnaɣ hɔɔ nɛ piwolo ŋga kɛwɛ tɩŋ yɔɔ yɔ, nɛ pɩkpɛndɩnɩ viiñi hayɩm nɛ oliivi hayɩm.
6 Filistii mba pɔzɩ se: «Alabɩ mbʋ?» Peheyi-wɛ se: «Timina tʋ ɛtɩ Samsɔɔ labɩnɩ mbʋ, mbʋ pʋyɔɔ yɔ Timina tʋ kpaɣ ɛ-halʋ nɛ ɛcɛlɩ ɛ-taabalaa mba paawɛ ɛ-cɔlɔ kazandʋ wiye yɔ pa-taa lɛlʋ.»+ Peeɖe lɛ, Filistii mba wolo nɛ pañaɣzɩ miŋ halʋ nɛ ɛ-caa.+ 7 Ðɩnɛ ɛlɛ Samsɔɔ heyi-wɛ se: «Ye mbʋ ɩlakɩ yɔ, mankaɣ-mɩ kɩmɩyɛ kpaʋ, pɩtɩkɛ mbʋ yɔ mɔ-yɔɔ ɛɛhɛɣ.»+ 8 Nɛ ɛkʋ-wɛ kpem ɖama yɔɔ ɖama yɔɔ, pʋwayɩ lɛ ɛɖɛɛ etii nɛ ɛcaɣ Etam kaaʋ pɔʋ nakʋyʋ taa.
9 Pʋwayɩ lɛ, Filistii mba ɖɛɛ pakpa nɛ pesiɣ pe-kizinzikiŋ Yuuda nɛ pɛwɛɛ pɔɖɔŋ nɛ pɔcɔʋ Lehi taa.+ 10 Peeɖe Yuuda abalaa pɔzɩ-wɛ se: «Ɛbɛ yɔɔ ɩkpa ɖa-wayɩ?» Nɛ pocosi se: «Ðɩkɔm se ɖɩkpa* Samsɔɔ nɛ ɖɩlabɩ-ɩ ɖeyi ɖeyi ɛzɩ ɛlabʋ-ɖʋ yɔ.» 11 Pʋyɔɔ lɛ, Yuuda abalaa 3 000 ɖɛɛ petii Etam kaaʋ pɔʋ nɔɔ nɛ pɔpɔzɩ Samsɔɔ se: «Ŋtɩna se Filistii mba ɖiɣnini kewiyitu tɔɔʋ ɖɔ-yɔɔ?+ Ye mbʋ, ɛbɛ yɔɔ ŋlabɩ-ɖʋ mbʋ?» Ecosi-wɛ se: «Malabɩ-wɛ ɛzɩ palabʋ-m yɔ.» 12 Ɛlɛ peheyi-i se: «Ðɩkɔma se ɖɩkpa-ŋ* nɛ ɖɩɖʋzɩ Filistii mba nesi taa.» Nɛ Samsɔɔ heyi-wɛ se: «Iɖuuni-m se mɩ-maɣmaɣ ɩɩkaɣ-m labʋ kɩdɛkɛdɩm nabʋyʋ.» 13 Peheyi-i se: «Aayɩ, ɖɩhɔkʋʋ-ŋ yem nɛ ɖɩɖʋzɩ pe-nesi taa, ɛlɛ ɖɩɩkaɣ-ŋ kʋʋ.»
Ðɩnɛ ɛlɛ, pɔhɔkɩ-ɩ nɛ nimee kɩfana 2 nɛ palɩzɩ-ɩ nɛ kaaʋ pɔʋ taa. 14 Ɛtalɩ Lehi nɛ Filistii mba na-ɩ lɛ, papaɣzɩ kou wabɩtʋ kogoye. Peeɖe Yehowa fezuu kpazɩ-ɩ ɖoŋ,+ nɛ nimee wena paahɔkɩnɩ e-nesi yɔ, apɩsɩ ɛzɩ pɩsatʋ ndʋ miŋ ko-tʋ yɔ, nɛ hɔkʋtʋ ndʋ paahɔkɩnɩ e-nesi yɔ tɩcɛ e-nesi yɔɔ.+ 15 Peeɖe lɛ, ɛna kpaŋaɣ abalɩñɩŋga nakɛyɛ tamaɣ mɔɔyɛ nɖɩ ɖɩ nɛ ɖɩ-lɛŋ yɔ; esezi nɛ ɛkpaɣ-ɖɩ nɛ ɛkʋnɩ abalaa 1 000.+ 16 Nɛ Samsɔɔ yɔɔdɩ se:
«Kpaŋaɣ tamaɣ mɔɔyɛ mankpazɩnɩ huuye kʋɖʋmɖɩyɛ, huwa 2!
Kpaŋaɣ tamaɣ mɔɔyɛ mankʋnɩ abalaa 1 000.»+
17 Ɛtɛm yɔɔdʋʋ lɛ, ɛlɔ tamaɣ mɔɔyɛ nɖɩ, nɛ ɛyaa lone nɖɩ se Ramaatɩ-Lehi.*+ 18 Pʋwayɩ lɛ, lɔkɔtʋ ɖɛɛ-ɩ kpem, nɛ ɛyaa Yehowa nɛ eheyi-i se: «Ñahanɩ ñʋʋ yabɩtʋ sɔsɔtʋ tʋnɛ ña-lɩmɖʋyʋ. Ɛlɛ lɛɛlɛɛyɔ, ŋyeki-m se mansɩ lɔkɔtʋ nɛ manɖʋ kɩdɩbɛlɩŋ ɛnɛ i-nesi taa?» 19 Ðɩnɛ ɛlɛ, Ɛsɔ yele nɛ lone naɖɩyɛ, nɖɩ ɖɩ-taa tɛtʋ kaaɖʋ tokom Lehi yɔ ɖɩfaɣ nɛ lɩm lɩɩnɩ ɖɩ-taa.+ Ɛñɔ-pʋ lɛ, e-fezuu* pɩsɩ nɛ ɛɖaɣnɩ kpaʋ ɖoŋ. Pʋyɔɔ ɛya lone nɖɩ se Ɛn-Hakore,* ɖɩwɛ Lehi halɩ nɛ sɔnɔ.
20 Nɛ ɛhʋʋ tɔm Izrayɛɛlɩ pɩnzɩ 20,+ Filistii mba alɩwaatʋ taa.