Kroniiki takayaɣ kajalaɣ ñɩŋga

14 Tiirɩ wiyaʋ Hiram+ tiyi ɛyaa Daviid cɔlɔ, etiyini ɖɔɖɔ sɛɛdrɩ tɩʋ kpoŋgbolonaa, pɛɛ kuduyuŋ mayaa,* nɛ kafɩndanaa, se pama-ɩ ɖɩɣa.*+ 2 Nɛ Daviid tɩlɩ se Yehowa pɩsɩ-ɩ wiyaʋ Izrayɛɛlɩ taa nɛ ɛka camɩyɛ,+ mbʋ pʋyɔɔ yɔ Ɛsɔ samaɣ Izrayɛɛlɩ yɔɔ lɛ, Ɛsɔ kpazɩ e-kewiyitu ɖoŋ siŋŋ.+

3 Daviid tasɩ halaa kpaɣʋ+ Yeruzalɛm, nɛ ɛtasɩ lʋlʋʋ abalɩbiya nɛ halɩbiya.+ 4 Piya nzɩ palʋlɩ-ɩ Yeruzalɛm yɔ sɩ-hɩla yɔ:+ Samuwaa, Sobaabɩ, Naataanɩ,+ Salomɔɔ,+ 5 Ibaarɩ, Eliisuwa, Ɛlɩpelɛɛtɩ, 6 Noga, Nefɛɛgɩ, Yafiya, 7 Eliisama, Beeliyadaa nɛ Elifelɛɛtɩ.

8 Filistii mba nɩwa se pata Daviid num nɛ ɛpɩsɩ wiyaʋ Izrayɛɛlɩ kpeekpe yɔɔ lɛ,+ Filistii mba kpeekpe kpa se pañɩnɩ Daviid.+ Daviid nɩ mbʋ lɛ, ɛlɩɩ se eyooni-wɛ. 9 Nɛ Filistii mba kɔɔ nɛ pɛwɛɛ poyouni Refayim Fɛɛʋ*+ taa mba. 10 Daviid pɔzɩ Ɛsɔ se: «Pɩwɛɛ se mankpa Filistii mba wayɩ? Ŋkaɣ-wɛ ɖʋzʋʋ me-nesi tɛɛ?» Peeɖe Yehowa heyi-i se: «Kpa, nɛ pɩtʋʋ fɛyɩ se mankaɣ-wɛ ɖʋzʋʋ ñe-nesi tɛɛ.»+ 11 Nɛ Daviid kpa Baalɩ-Perazim,+ nɛ ɛwabɩ-wɛ peeɖe. Ðɩnɛ ɛlɛ Daviid yɔɔdɩ se: «Ɛsɔ toovenim tʋ tɩŋnɩ me-nesi yɔɔ nɛ ɛyɔkɩ nɛ ɛsʋʋ mon-koyindinaa taa, ɛzɩ lɩm yɔkʋʋ koloŋa yɔ.» Pʋyɔɔ paya lone nɖɩ se Baalɩ-Perazim.* 12 Filistii mba yele pɛ-ɛsɔnaa peeɖe, nɛ Daviid ha nɔɔ nɛ pañaɣzɩ-wɛ miŋ.+

13 Pʋwayɩ lɛ, Filistii mba ɖaɣnɩ wobu nɛ poyooni fɛɛʋ* taa mba.+ 14 Daviid ɖaɣnɩ pɔzʋʋ Ɛsɔ, ɛlɛ Ɛsɔ toovenim tʋ cosi-i se: «Taakpa nɛ ŋkatɩ-wɛ nɛ pɛ-ɛsɩndaa. Ɛlɛ cɔɔnɩ pa-wayɩ kiŋ, nɛ ŋwolo ŋyooni-wɛ cɔka wena payaɣ se baka yɔ a-ɛsɩndaa.+ 15 Nɛ alɩwaatʋ ndʋ ŋnɩɣ ɖɔnɛ taŋ cɔka wena payaɣ se baka yɔ a-ñʋŋ yɔɔ lɛ, ŋpaɣzɩ-wɛ yonuu, mbʋ pʋyɔɔ yɔ Ɛsɔ toovenim tʋ tɛm ɖɛʋ ñɔ-nɔɔ se ɛkʋ Filistii mba sɔɔjanaa.»+ 16 Nɛ Daviid la ɖeyi ɖeyi ɛzɩ Ɛsɔ toovenim tʋ ɖʋʋ-ɩ paɣtʋ yɔ,+ nɛ pakʋ Filistii mba sɔɔjanaa kpaɣnɩ Gabawɔɔ nɛ piwolo pɩtalɩ Gezɛɛrɩ.+ 17 Nɛ Daviid hɩɖɛ sɛɛ ajɛɛ kpeekpe taa, nɛ Yehowa yele nɛ ajɛɛ kpeekpe seɣ-i sɔɔndʋ.+