Izaayii
23 Tɔm ndʋ pɔyɔɔdɩ Tiirɩ yɔɔ yɔ:+
Tarɩsiisi mɛlɛnaa+ mɩ, iwii!
Mbʋ pʋyɔɔ yɔ paɖɩzɩ mɛlɛnaa ɖɩzɩŋɩyɛ; paapɩzɩɣ nɛ pasʋʋ ɖɩ-taa.
Kitim+ ɛjaɖɛ taa pokuli tɔm ndʋ tɩ-yɔɔ nɛ peheyi-wɛ.
2 Isu tamɩyɛ, teŋgu nɔɔ tɛtʋ taa mba mɩ.
Siidɔɔ+ tadɩyɛ laɖaa mba pɛtɛzɩɣ teŋgu yɔ posu ña-taa.
3 Patɩŋnɩ lɩm sakɩyɛ yɔɔ nɛ pɛɖɛnɩ Sihɔɔrɩ*+ tɔɔnaɣ pee,*
Niili tɔɔnaɣ ŋga pakʋma yɔ, Tiirɩ kɛzɛɣa,
Pɩkɔnɩ ajɛɛ kɛzɛsɩ.+
4 Fɛyɛ ɛkpa-ŋ, Oo Siidɔɔ; ña, teŋgu nɔɔ tɛtʋ ɖoŋ ñɩndʋ,
Mbʋ pʋyɔɔ yɔ teŋgu yɔɔdaa se:
5 Ɛzɩ alɩwaatʋ ndʋ paanɩ Ejipiti yɔɔ tɔm yɔ,+
Ɛyaa kaɣ wɛʋ wɩzasɩ taa alɩwaatʋ ndʋ panɩɣ Tiirɩ yɔɔ tɔm yɔ.+
6 Ɩtɛzɩ nɛ iwolo Tarɩsiisi!
Iwii, teŋgu nɔɔ tɛtʋ taa mba mɩ!
7 Mɩ-tɛtʋ ndʋ tɩɩwɛ amɛya taa ɖooo lɔŋ, ɖooo tɩ-kajalaɣ alɩwaatʋ taa yɔ ndʋ yɔ?
Tɩ-nɩŋgbanzɩ wokaɣni-tʋ ɖooo poliŋ ajɛɛ taa se tɩcaɣ peeɖe.
8 Akpaɣ lɩmaɣza ana Tiirɩ yɔɔ,
Ɛjaɖɛ nɖɩ ɖɩhaɣ awiya hulasɩ yɔ,
Nɖɩ ɖɩ-tadɩyɛ laɖaa kaakɛ awumbiya yɔ,
Nɖɩ paɖʋ hɩɖɛ ɖi-wondu pɛdɩyaa tɛtʋ kpeekpe yɔɔ yɔ?+
9 Yoyaa tɛ Yehowa maɣmaɣ kpaɣnɩ lɩmaɣza ana,
Se ɛwɛɛkɩɣ ɖɩ-cajayɛ nɖɩ ɖɩɩwɛnɩ ɖi-keɖeɣa kpeekpe yɔɔ yɔ,
Se ɛɖʋ fɛyɛ mba payɩ paɖʋ-wɛ hɩɖɛ tɛtʋ kpeekpe yɔɔ yɔ.+
10 Tɛzɩ ñɛ-ɛjaɖɛ ɛzɩ Niili Pɔɔ yɔ, Oo Tarɩsiisi pɛlɛ.
Mɛlɛnaa kadaɣ* nakɛyɛ tɩtasɩ wɛʋ.+
11 Esezi e-nesi teŋgu yɔɔ;
Ɛñamsɩ kewiyisi.
Yehowa ɖʋ paɣtʋ se paɖɩzɩ Fenisii lona ɖoŋ ñɩna.+
12 Nɛ ɛyɔɔdʋʋ se: «Ŋŋkaɣ tasʋʋ mɛyʋʋ,+
Oo ña weyi panazaa yɔ, Siidɔɔ pɛlɛ weyi ɛtɩtɩlɩ abalʋ yɔ.
Kʋyɩ, tɛzɩ nɛ ŋwolo Kitim.+
Halɩ peeɖe ɖɔɖɔ ŋŋkaɣ hiɣu hɛzɩyɛ.»
13 Ɩna! Kalɩdee mba ɛjaɖɛ.+
Samaɣ kanɛ yɔ—pɩtɩkɛ Asiirii+—
Ŋga yebina nɛ kɩpɩsɩ kañɩmbusuu taa kpɩna lone.
14 Tarɩsiisi mɛlɛnaa mɩ, iwii;
Mbʋ pʋyɔɔ yɔ paɖɩzɩ mi-lone ɖoŋ ñɩnɖɛ.+
15 Kɩyakʋ ŋgʋ ki-wiye lɛ, pakaɣ sɔʋ Tiirɩ yɔɔ pɩnzɩ 70,+ ɛzɩ wiyaʋ kʋɖʋm kɩyakɩŋ* yɔ. Pɩnzɩ 70 tɛŋ lɛ, pɩkaɣ talʋʋ Tiirɩ ɛzɩ pɔyɔɔdʋʋ hayitu laɖʋ hendu taa yɔ:
16 «Kpaɣ cɩmʋʋ, cɔɔ tɛtʋ taa, Oo hayitu laɖʋ weyi pɔsɔ ɛ-yɔɔ yɔ.
17 Pɩnzɩ 70 tɛŋ lɛ, Yehowa kaɣ ɛ-lɩmaɣza kɛzʋʋ nɛ Tiirɩ yɔɔ, nɛ kɩkaɣ ɖaɣnʋʋ mʋʋ kɩ-kɩhɛyʋʋ nɛ kɩlakɩ hayitu nɛ ɛjaɖɛ yɔɔ kewiyisi kpeekpe nzɩ sɩwɛ tɛtʋ yɔɔ yɔ. 18 Ɛlɛ kɩ-kɛzɛɣa nɛ kɩ-kɩhɛyʋʋ pakaɣ pɩsʋʋ pʋyʋ kiɖeɖeu Yehowa ɛsɩndaa. Paakaɣ-pʋ tɔsʋʋ yaa paakaɣ-pʋ kpeɣluu nɛ pasɩɩ, mbʋ pʋyɔɔ yɔ kɩ-kɩhɛyʋʋ kaɣ kɛʋ mba pɛwɛ Yehowa ɛsɩndaa yɔ pa-pʋyʋ, se pɩsa nɛ pɔtɔɔ nɛ pahaɣ nɛ posuu wondu ndʋ tɩwɛ kajʋka yɔ.+