Ezekɩyɛɛlɩ

4 «Nɛ ña yɔ, ɛyʋ pɩyalʋ, kpaɣ filiki nakʋyʋ nɛ ŋsɩɩ-kʋ ñɛ-ɛsɩndaa. Lɩzɩ kɩ-yɔɔ tɛtʋ natʋyʋ: Yeruzalɛm. 2 Ñɛyɩ-kʋ,+ ma tɛtʋ ñɛyʋʋ koloŋa nɛ pɩcɔɔ-kʋ nɛ pɩta,+ siɣ you wondu nɛ pɩcɔɔ-kʋ nɛ pɩta,+ siɣ kizinzikiŋ weyi ɩ-tɛɛ sɔɔjanaa cakɩ yɔ nɛ pɩcɔɔ-kʋ nɛ pɩta, nɛ ŋsiɣ you wondu ndʋ pɔyɔkʋʋnɩ kolonzi yɔ nɛ pɩcɔɔ-kʋ nɛ pɩta.+ 3 Kpaɣ ñɩɣyʋʋ tɛlɛm ŋgʋ kɩ-yɔɔ poɖoŋuu yɔ nɛ ŋsɩɩ-kʋ ɛzɩ ñɩɣtʋ koloŋa yɔ ña nɛ tɛtʋ mɩ-hɛkʋ taa. Pʋwayɩ lɛ, ŋpam-kʋ nɛ ɛsa, nɛ tɩkaɣ kɛʋ tɛtʋ ndʋ pɛñɛyɩ-tʋ yɔ; ñakaɣnɩ-tʋ ñɛyʋʋ. Pɩkɛ yʋsaɣ Izrayɛɛlɩ ɖɩɣa.+

4 «Pʋwayɩ lɛ, pɩwɛɛ se ŋhɩnɩ ña-nɩmɩyɛ hʋyʋʋ yɔɔ nɛ Izrayɛɛlɩ ɖɩɣa kɩwɛɛkɩm wɛɛ ñɔ-yɔɔ.*+ Kɩyakɩŋ ɛzɩma ŋhɩnɩɣ ña-hʋyʋʋ yɔɔ yɔ, mbʋ ɖɔɖɔ ŋkaɣ kpaɣʋ pa-kɩwɛɛkɩm. 5 Nɛ mankaɣ-ŋ pɔzʋʋ se ŋla mbʋ kɩyakɩŋ 390 nɛ pɩmʋnɩ pa-kɩwɛɛkɩm pɩnzɩ,+ nɛ ŋkaɣ kpaɣʋ Izrayɛɛlɩ ɖɩɣa kɩwɛɛkɩm. 6 Nɛ pɩwɛɛ se ŋtɛ kɩyakɩŋ ɛnɩ ɩ-tɩŋa.

«Pʋwayɩ lɛ, ŋkaɣ hɩnʋʋ nabʋlɛ ɖeɖe, ña-nɩwaŋ hʋyʋʋ yɔɔ, nɛ ŋkaɣ kpaɣʋ Yuuda ɖɩɣa kɩwɛɛkɩm+ kɩyakɩŋ 40. Kɩyakʋ kʋɖʋmʋʋ sɩŋnɩ pɩnaɣ kʋɖʋmaɣ, kɩyakʋ kʋɖʋmʋʋ sɩŋnɩ pɩnaɣ kʋɖʋmaɣ: paɣtʋ ndʋ manɖʋ-ŋ. 7 Nɛ ŋkaɣ pam ñɛ-ɛsa nɛ Yeruzalɛm ŋgʋ ŋñɛyɩ-kʋ yɔ,+ ña-nɩŋgbɛɛŋa ɛwɛɛ kpɛɖɛ; nɛ pɩwɛɛ se ŋyɔɔdɩ natʋ tɔm kɩ-yɔɔ.

8 «Na! Mankaɣ-ŋ hɔkʋʋ nimee se ŋtaapɩzɩ nɛ ŋkɛzɩ ña-tɩ kpaɣnɩ ña-hʋyʋʋ kʋɖʋmʋʋ yɔɔ nɛ ŋwolo lɛɛkʋ yɔɔ nɛ pɩkɔɔ pɩtalɩ alɩwaatʋ ndʋ ŋtɛm kɩyakɩŋ weyi ŋñɛyɩɣnɩ tɛtʋ yɔ.

9 «Nɛ pɩwɛɛ se ŋkpaɣ blee, orjɩ, sona, lantiiyinaa,* mɩsɩ nɛ blee lɛɛkʋ* nɛ ŋɖʋ ñanaɣ nakɛyɛ taa nɛ ŋla ña-tɩ kpɔnɔ. Ŋkaɣ-kʋ tɔɔʋ kɩyakɩŋ weyi ŋhɩnɩɣ ña-hʋyʋʋ yɔɔ yɔ, kɩyakɩŋ 390.+ 10 Ŋkaɣ maɣzʋʋ tɔɔnaɣ siklinaa 20* paa evemiye nɖɩ nɛ ŋtɔɔ. Alɩwaatʋ natʋyʋ yɔɔ ɖeyi ɖeyi pɩwɛɛ se ŋtɔkɩ-kɛ.

11 «Nɛ ŋkaɣ maɣzʋʋ lɩm pʋcɔ nɛ ŋñɔɔ, pɩwɛɛ se pɩkɛ hiini hɔɔlʋʋ 6 ñɩŋgʋ.* Alɩwaatʋ natʋyʋ yɔɔ ɖeyi ɖeyi pɩwɛɛ se ŋñɔʋ-pʋ.

12 «Ŋkaɣ kpɔnɔ ŋgʋ tɔɔʋ ɛzɩ ŋtɔkʋʋ orjɩ kpɔnɔ kulukulu ñɩŋgʋ yɔ; ŋkaɣ-kʋ hɔbʋ pɛ-ɛsɩndaa, nɛ ɛyaa pɩndʋ ndʋ tɩwɩlaa yɔ ŋkaɣ kpaɣʋ nɛ ŋɖʋnɩ miŋ.» 13 Yehowa wolo pɩ-yɔɔ nɛ ɛyɔɔdɩ se: «Mbʋ Izrayɛɛlɩ mba kaɣ tɔɔʋ pɔ-kpɔnɔ ŋgʋ kɩfɛyɩ kele kele yɔ, ajɛɛ wena a-taa mankaɣ-wɛ mɩzʋʋ yɔ.»+

14 Nɛ mɔyɔɔdɩ se: «Pɩtaala mbʋ, Kɩbaɣlʋ Kɩlɩm Yehowa! Kpaɣnɩ ɖooo me-evebitu taa nɛ pɩkɔɔ nɛ pɩtalɩ sɔnɔ, mantɩtɔɔ kpɩnɛ nɖɩ pana-ɖɩ ɖɩsɩba yɔ yaa kpɩnɛ nɖɩ pɩcɩyɩ-ɖɩ yɔ+ nɛ piyele nɛ menpisi man-tɩ,* nɛ nandʋ ndʋ tɩfɛyɩ kele kele yɔ tɩtɩsʋʋ mɔ-nɔɔ taa.»*+

15 Nɛ eheyi-m se: «Pɩwɛ ɖeu, ɛyaa pɩndʋ lone taa lɛ, mankaɣ-ŋ haʋ nʋmɔʋ se ŋlabɩnɩ naŋ pɩndʋ tʋmɩyɛ, nɛ ŋhɔ ñɔ-kpɔnɔ tɩ-yɔɔ.» 16 Pʋwayɩ lɛ, eheyi-m se: «Ɛyʋ pɩyalʋ, meyeki se tɔɔnaɣ ɛtaatasɩ wɛʋ* Yeruzalɛm taa,+ nɛ pakaɣ maɣzʋʋ tɔɔnaɣ* pʋcɔ nɛ pɔtɔɔ,+ nɛ pɔtɔkɩ-kɛ nɛ nɩɣzɛ sɔsɔna; nɛ pakaɣ maɣzʋʋ lɩm pʋcɔ nɛ pɔñɔɔ, nɛ pɔñɔʋ-pʋ nɛ sɔɔndʋ siŋŋ.+ 17 Pɩkaɣ labʋ mbʋ se pɩsa nɛ tɔɔnaɣ* nɛ lɩm kɛdɛɖaɣ yɔɔ lɛ, pɩɖɩɣzɩ-wɛ nɛ pɔcɔŋnɩ ɖama nɛ pɛtɛŋ ɖanzɩ pa-kɩwɛɛkɩm yɔɔ.