Ezekɩyɛɛlɩ
19 «Pɩwɛɛ se ŋtee kʋñɔwiye hendu Izrayɛɛlɩ ñʋndɩnaa yɔɔ 2 nɛ ŋyɔɔdɩ se:
“Ɛbɛ ño-ɖoo kaakɛnaa? Ɛɛkɛ mʋʋzʋʋ halɩñɩŋgʋ mʋʋzɩŋ hɛkʋ taa.
Ɛhɩnaɣ mʋʋzɩŋ weyi ɩwɛ ɖoŋ yɔ* ɩ-hɛkʋ taa nɛ ɛcɔŋnɩ e-piya yɔɔ.
3 Ɛcɔnɩ ɛ-pɩɣa nakɛyɛ yɔɔ, nɛ kapɩsɩ mʋʋzʋʋ* ŋgʋ kɩwɛ ɖoŋ yɔ.+
Kɩkpɛlɩkɩ ɛzɩma kɩcɩyɩ mbʋ kɩkpaɣ yɔ,
Halɩ kɩtɔɔ ɛyaa.
4 Ajɛɛ nɩ kɩ-tɔm nɛ akpa-kʋ a-kpaca* taa,
Nɛ akpaɣ-kʋ nɛ ñɩma wena a-nɔsɩ kotaa yɔ nɛ awoni-kʋ Ejipiti ɛjaɖɛ taa.+
5 Ðoyo caɣ nɛ ɛɖaŋ nɛ ɛkɔɔ eɖiɣzina se lidaʋ nakʋyʋ fɛyɩ se kɩpɩsɩɣ.
Peeɖe ɛkpaɣ ɛ-pɩɣa lɛɛka nɛ etiyi-kɛ se kapɩsɩ mʋʋzʋʋ* ŋgʋ kɩwɛ ɖoŋ yɔ.
6 Kaka ɖɔɖɔ kɛyɛlaɣ mʋʋzɩŋ hɛkʋ taa nɛ kɔkɔɔ nɛ kapɩsɩ mʋʋzʋʋ* ŋgʋ kɩwɛ ɖoŋ yɔ.
Kɩkpɛlɩkɩ ɛzɩma kɩcɩyɩ mbʋ kɩkpaɣ yɔ, nɛ halɩ kɩtɔɔ ɛyaa.+
7 Kɩcɔwaɣ pe-tilima ɖoŋ ñɩna taa nɛ kɩɖɩzɩ pɛ-tɛtʋ ndɩ ndɩ,
Piyeba nɛ panɩɣ kʋ-mʋdʋʋ taŋ ɛjaɖɛ nɖɩ ɖɩpɩsɩ njɛyɛ yɔ ɖɩ-tɩŋa ɖɩ-taa.+
8 Ageeta wena awɛ pɩ-cɔlɔ kpɛɛɛ yɔ, a-taa ajɛɛ kɔɔ kɩ-wayɩ se alɔ-kʋ piyuu nɛ akpa-kʋ.
Nɛ akpa-kʋ a-kpaca* taa.
9 Nɛ akpa-kʋ nɛ ñɩma wena a-nɔsɩ kotaa yɔ nɛ aɖʋ-kʋ ñɩɣtʋ ɖaŋ nakʋyʋ taa nɛ awoni-kʋ Babilɔɔnɩ wiyaʋ.
Paɖɩɣ-kʋ peeɖe, se pɩsa nɛ pataatasɩ nɩʋ kɩ-nɔɔ taŋ Izrayɛɛlɩ pʋŋ taa.
10 Ño-ɖoo kaawɛ ɛzɩ viiñi yɔ+ ña-calɩm taa,* ŋgʋ pɔsɔ-kʋ lɩm nɔɔ yɔ.
Lɩm sakɩyɛ yɔɔ lɛ, kɩlʋlɩ pee sakɩyɛ nɛ pilinzi su kɩ-yɔɔ.
11 Kɩlɩ pilinzi* nzɩ sɩwɛ ɖoŋ yɔ, pilinzi nzɩ papɩzɩɣ pakpaɣ nɛ palabɩnɩ kewiyitu ɖaŋ weyi ñʋndɩnaa ɖɔkʋʋ yɔ.
Kɩpaɣlaa nɛ kɩkʋyɩ kɩkpaɖɩ tɩŋ lɛɛŋ,
Nɛ pɩnaɣ-kʋ camɩyɛ, mbʋ pʋyɔɔ yɔ kɩkʋyɩ camɩyɛ nɛ kɩ-hatʋ ɖɔwa.
12 Ɛlɛ pɛkpɛzɩ-kʋ nɛ pana+ nɛ pɛpɛɖɩ-kʋ tɛtʋ yɔɔ,
Nɛ wɩsɩ ɖɩlɩyɛ taa helim nabʋyʋ yele nɛ ki-pee wɩlɩ.
Pɛpɛlɩ ki-pilinzi nzɩ sɩwɛ ɖoŋ yɔ nɛ sɩwɩlɩ,+ nɛ miŋ ñaɣ-sɩ.+
13 Lɛɛlɛɛyɔ lɛ, pɔsɔ-kʋ kañɩmbusuu taa,
Ɛjaɖɛ nɖɩ ɖɩ-taa wɩlaa nɛ lɩm fɛyɩ yɔ.+
14 Miŋ ñaɣ ki-pilinzi* nɛ iwolo ɩtalɩ ki-pilinzi nzɩ siɖiɣni yɛzʋʋ yɔ nɛ ki-pee,
Nɛ pɩtɩkazɩ piliŋa ɖoŋ ñɩŋga nakɛyɛ, kewiyitu ɖaʋ nakʋyʋ tɩkazɩ se pɔtɔɔnɩ kewiyitu.+
«“Pɩkɛ kʋñɔwiye hendu, nɛ tɩkaɣ pɩsʋʋ kʋñɔwiye hendu ndʋ tɩtɔyɩ paa le yɔ.”»