Abɩdɩyasɩ
1 Abɩdɩyasɩ* natʋ:
Tɔm ndʋ Kɩbaɣlʋ Kɩlɩm Yehowa yɔɔdʋʋ Edom yɔɔ yɔ,+ ndʋ yɔ:
«Ðɩnɩ tɔm natʋyʋ, tɩlɩnɩ Yehowa cɔlɔ,
Petiyi nɔɔyʋ ajɛɛ taa:
“Ɩkʋyɩ, ɖɩñɔɔzɩ ɖa-tɩ nɛ ɖiyooni Edom.”»+
2 «Na! Malaba nɛ ŋpɩsɩ mbʋ pɩtɩlɩɩ pʋyʋ yɔ ajɛɛ taa;
Penimi-ŋ kpem.+
3 Ña weyi ŋcaɣ kaaŋ sɔsɔŋ pɔŋ taa yɔ,
Nɛ ŋwɛɛ lone nɖɩ ɖɩkʋyaa yɔ ɖɩ-taa nɛ ŋyɔɔdʋʋ ña-laŋɩyɛ taa se:
“Akaɣ-m tuzuu nɛ ɛpɛɖɩ tataa?” yɔ,
Tɩ kpazʋʋ mbʋ pɩwɛ ña-laŋɩyɛ taa yɔ, pipeɣzi-ŋ.+
4 Paa ŋkpawa nɛ ŋcaɣ ɛsɔdaa* ɛzɩ kpeluu yɔ,
Yaa paa ŋsɩ ña-ɖandʋ tɩɩnzɩ hɛkʋ taa yɔ,
Mankaɣ-ŋ tisuu nɛ peeɖe, Yehowa yɔɔdʋʋna.
5 Ye mɩlaa ɩkɔm ñɛ-tɛ, yaa ye lazɩyaa ɩkɔm ñɛ-tɛ ɖoo taa yɔ,
Pɩtɩkɛ mbʋ pɔsɔɔlaa yɔ pi-ɖeke pamɩlɩɣ yaa we?
Yaa ye viiñi pee koyiyaa ɩkɔm ñɛ-tɛ,
Paakazɩɣ viiñi pee naayɛ nɛ pa-wayɩ se pacazɩ yaa we?+
Ɛlɛ ña lɛ, ño-koyindinaa kaɣ-ŋ ɖɩzʋʋ nɛ pɩɩkazɩɣ nabʋyʋ.*
6 Ñɩnʋʋ mbʋ pañɩnɩ Ezaawuu taa mbʋ yɔ!
Pañɩnɩ ɛ-ñɩm mbʋ ɛmɛsaa yɔ, pi-kpeekpe mbʋ suwe!
7 Powoni-ŋ tɛtʋ kamaɣ yɔɔ.
Ña-taabalaa* tɩŋa peɣzi-ŋ.
Abalaa mba ña nɛ wɛ ɩwɛ laŋhɛzɩyɛ taa yɔ, pawabɩ-ŋ.
Mba ña nɛ wɛ ɩtɔkɩ tɔɔnaɣ yɔ, pakaɣ ñɩbʋ kpaca ñɛ-tɛɛ,
Ɛlɛ ŋŋkaɣ ɖiɣzinuu.»
8 Yehowa yɔɔdʋʋ se: «Evemiye nɖɩ ɖi-wiye,
Ɛzɩ maakaɣ ɖɩzʋʋ lɔŋsɩnɖaa Edom taa?+
Nɛ maakaɣ ɖɩzʋʋ lɛɣtʋ Ezaawuu pʋŋ egeetiye taa?
9 Oo Temaanɩ,+ sɔɔndʋ kaɣ kpaʋ ño-you laɖaa,+
Mbʋ pʋyɔɔ yɔ pakaɣ ɖɩzʋʋ Ezaawuu pʋŋ egeetiye taa mba tɩŋa kʋgʋʋ sɔsɔʋ taa.+
10 Puuyaɣ lakasɩ nzɩ ŋlabɩ ñe-neu Yakɔɔb yɔ sɩ-yɔɔ lɛ,+
Fɛyɛ kaɣ-ŋ kpaʋ,+
Nɛ ŋkaɣ lebu kpaagbaa lebu.+
11 Kɩyakʋ ŋgʋ ŋŋsɩŋnɩ hɔɔlʋʋ yɔ,
Kɩyakʋ ŋgʋ agɔma kpa e-you laɖaa nɛ pɛɖɛnɩ yomiye taa yɔ,+
Alɩwaatʋ ndʋ agbaaɣdaa mba sʋnɩ ɛ-nɔnɔɔ nɛ pɔtɔ piye+ Yeruzalɛm yɔɔ yɔ,
Ŋlaba ɛzɩ pa-taa nɔɔyʋ yɔ.
12 Pɩtɩpɔzɩ se ŋnɩɩ leleŋ ñe-neu asɛyʋʋ kɩyakʋ wiye,+
Pɩtɩpɔzɩ se ŋwɛɛ amɛya taa Yuuda samaɣ yɔɔ ka-ɖɩzʋʋ kɩyakʋ wiye,+
Nɛ pɩtɩpɔzɩ se ŋyɔɔdɩnɩ tɩ kpazʋʋ kpem mbʋ, ka-kʋñɔŋ kɩyakʋ wiye.
13 Pɩtɩpɔzɩ se ŋkɔɔ man-samaɣ nɔnɔɔ taa ka-asɛyʋʋ kɩyakʋ wiye,+
Pɩtɩpɔzɩ se ka-asɛyʋʋ kɩyakʋ wiye lɛ, ña-taa ɛla leleŋ nɛ ka-kʋñɔŋ,
Nɛ pɩtɩpɔzɩ se ka-asɛyʋʋ kɩyakʋ wiye lɛ, ŋsezi ñe-nesi ka-ñɩm yɔɔ.+
14 Pɩtɩpɔzɩ se ŋsɩŋ nʋmayasa taa se ŋkʋʋ ka-taa ñɩma mba patʋlaa yɔ,+
Nɛ pɩtɩpɔzɩ se ŋɖʋzɩ ka-taa ñɩma mba pehiɣ ñʋʋ yabʋ yɔ koyindu nesi taa kʋñɔŋ kɩyakʋ wiye.+
15 Mbʋ pʋyɔɔ yɔ Yehowa kɩyakʋ ŋgʋ kɩkɔŋ ajɛɛ kpeekpe wayɩ yɔ, kɩñɔtaa.+
Ɛzɩ ŋlabʋ yɔ, mbʋ ɖɔɖɔ pakaɣ-ŋ labʋ.+
Mbʋ ŋlabɩ lalaa yɔ, pɩkaɣ pɩsʋʋ ña-maɣmaɣ ña-ñʋʋ taa.
16 Mbʋ pʋyɔɔ yɔ ɛzɩ ɩñɔʋ vɛɛ man-pʋʋ kiɖeɖeu yɔɔ yɔ,
Mbʋ ɖɔɖɔ ajɛɛ kpeekpe kaɣ wɛʋ nɛ añɔʋ man-pana ɛzɩ vɛɛ yɔ tam.+
Akaɣ ñɔʋ nɛ ali,
Nɛ akaɣ wɛʋ ɛzɩ ataawɛɛ wiɖiyi kaaʋ yɔ.
17 Ɛlɛ mba patʋlaa yɔ, pakaɣ wɛʋ Siyɔŋ Pʋʋ yɔɔ,+
Nɛ kɩkaɣ kɛʋ kiɖeɖeu;+
Nɛ Yakɔɔb ɖɩɣa kaɣ mʋʋ ka-ñɩm.+
18 Yakɔɔb ɖɩɣa taa mba kaɣ pɩsʋʋ miŋ,
Yosɛɛfʋ ɖɩɣa taa mba kaɣ pɩsʋʋ miŋ nzʋlʋmɩyɛ,
Nɛ Ezaawuu ɖɩɣa taa mba kaɣ wɛʋ ɛzɩ kesi yɔ;
Pakaɣ-wɛ sɔbʋ miŋ nɛ pañaɣ,
Nɛ Ezaawuu ɖɩɣa taa tʋ nɔɔyʋ ɛɛkaɣ hiɣu ñʋʋ yabʋ,+
Mbʋ pʋyɔɔ yɔ Yehowa maɣmaɣ yɔɔdɩna.
Pakaɣ mʋʋ Efrayim hayɩm nɛ Samaarii hayɩm,+
Nɛ Bɛnjamɛɛ kaɣ mʋʋ Galaadɩ.
20 Koloŋa*+ kanɛ kɛ-ɛyaa mba paawoni yomiye taa yɔ, pʋ-tɔbʋʋ se Izrayɛɛlɩ mba,
Mba kaɣnɩ tɩɣyʋʋ Kanaŋ mba ɛjaɖɛ nɛ piwolo pɩtalɩ ɖooo Sarfaatɩ.+
Nɛ Yeruzalɛm ñɩma mba paawoni yomiye taa yɔ, mba paawɛ Sefaraadɩ yɔ, Negɛɛbʋ tɛtʋ kaɣ pɩsʋʋ pa-ñɩm.+