Ye ɖiluzuu ɖa-tɩ teokrasɩ ɖʋtʋ tɛɛ yɔ, ɖihikiɣ wazasɩ

PƖSA nɛ ɖɩla nɔɔ kʋɖʋmaɣ nɛ ɖɩla Yehowa sɔɔlɩm lɛ, pɩcɛyaa se ɖiluzi ɖa-tɩ Ɛsɔ weyi ɛtɔkɩ Kewiyitu Kɩkɩlɩtʋ yɔ, ɛ-tɛɛ. Pɩwɛɛ se ɖiluzi ɖa-tɩ ɛ-Pɩyalʋ weyi ɛkɛ ɛgbɛyɛ ñʋʋdʋ yɔ ɛ-tɛɛ, nɛ ɖiluzi ɖa-tɩ ɖɔɖɔ sɔsɔtʋ ɖʋtʋ ndʋ Ɛsɔ laba yɔ, tɩ-tɛɛ. Ye ɖiluzuu ɖa-tɩ teokrasɩ ɖʋtʋ tɛɛ mbʋ yɔ, pɩwazɩɣ ɖa-tɩŋa.

² Ðooo Edɛɛnɩ kaɖaɣ taa pɔyɔɔdɩ lɩmaɣzɩyɛ nɖɩ ɖɩ-yɔɔ tɩ luzuu tɔm cɛyaa yɔ, ɖɩ-tɔm. Ðɩnaɣ lɩmaɣzɩyɛ nɖɩ paɣtʋ ndʋ Ɛsɔ ɖʋ Kiɖe Tɛɛ Tɔm 1:28 nɛ 2:16, 17 taa yɔ, tɩ-taa. Pɩɩwɛ se kpɩna iluzi a-tɩ ɛyaa tɛɛ, nɛ Aɖam nɛ Ɛva paba ñoluzi pa-tɩ Ɛsɔ tɛɛ nɛ pala ɛ-sɔɔlɩm. Ye poluzi pa-tɩ Ɛsɔ tɛɛ mbʋ yɔ, piyeki nɛ pehiɣ laŋhɛzɩyɛ nɛ pɩtɩŋa pɩɖɔ cɔlɩɩɩ. Pañɩɣ niye tɩ luzuu tɔm ndʋ tɩ-yɔɔ 1 Kɔrɛntɩ mba 11:3 taa pʋwayɩ. Apostoloo Pɔɔlɩ mawa se: “Mɔnsɔɔlaa se ɩtɩlɩ se paa abalʋ weyi lɛ, ɛ-ñʋʋdʋ lɛ Krɩstʋ; nɛ halʋ ñʋʋdʋ lɛ abalʋ; nɛ Krɩstʋ ñʋʋdʋ lɛ Ɛsɔ.” Pɩwɩlɩɣ se Yehowa ɖeke fɛyɩnɩnɩ ñʋʋdʋ, ɛlɛ ɖʋtʋ ndʋ Ɛsɔ laba yɔ tɩ-taa, paa weyi lɛ ɛwɛnɩ ñʋʋdʋ weyi pɩwɛɛ se eluzi ɛ-tɩ ɛ-tɛɛ yɔ.

³ Sɔnɔ ɛyaa sakɩyɛ iitisiɣ se poluzi pa-tɩ sɔsɔtʋ ɖʋtʋ tɛɛ. Ɛbɛ yɔɔ? Kpaɣnɩ alɩwaatʋ ndʋ Aɖam nɛ Ɛva pakʋyɩ Ɛsɔ yɔɔ Edɛɛnɩ kaɖaɣ taa, nɛ pekizi se paaluzuu pa-tɩ e-kewiyitu tɔɔʋ tɛɛ yɔ, kaañamtʋ lɩmaɣza ana añɔwa. (Kiɖe 3:4, 5) Ɛlɛ pa-lakasɩ nzɩ sitiyele nɛ pɛwɛɛ pa-tɩ yɔɔ. Siyeba nɛ fezuu kɩdɛkɛdʋʋ Sataŋ Eleeu pɩsɩ pa-ñʋʋdʋ. Kajalaɣ kaañamtʋ lakasɩ nzɩ, siyeba nɛ ɛyaa posini Ɛsɔ. (Kol. 1:21) Mbʋ yebina nɛ kañatʋ tʋ wɛɛnɩ ɖoŋ ɛyaa sakɩyɛ yɔɔ sɔnɔ.—1 Yoh. 5:19.

⁴ Ðɩkpɛlɩkɩ toovenim tɔm ndʋ tɩwɛ Ɛsɔtɔm taa yɔ nɛ ɖɩlakɩnɩ-tʋ tʋmɩyɛ, mbʋ yebina nɛ Sataŋ tɩtasɩ wɛnʋʋ ɖoŋ ɖɔ-yɔɔ. Ðɩha ɖa-tɩ Ɛsɔ nɛ pamɩyɩsɩ-ɖʋ lɩm pʋwayɩ nɛ ɖɩwɩlɩ se ɖitisaa se Yehowa ɛkɛ ɖe-Wiyaʋ. Ɛzɩ wiyaʋ Daviid yɔ, ɖɩnawa se Yehowa “kɩlɩ pɩtɩŋa ɛzɩ ñʋʋ yɔ.” (3 Aw. 29:11) Toovenim, ɖiluzuu ɖa-tɩ nɛ ɖɩyɔɔdʋʋ se: “Ɩtɩlɩ se ɛnʋ [Yehowa], ɛkɛnɩ Ɛsɔ, ɛlabɩ ɖa-tɩŋa nɛ ɖɩkɛ ɛ-pʋyʋ, ɖa ɛ-samaɣ, ɛ-kaɖaɣ taa wondu.” (Keɣa 99:3) Ðitisiɣ se Yehowa kɛnɩ ñʋʋdʋ nɛ ɛmʋnaa se paa weyi eluzi ɛ-tɩ ɛ-tɛɛ mbʋ pʋyɔɔ yɔ, ɛnʋ lɩzɩnɩ pɩtɩŋa. (Natʋ 4:11) Ða mba ɖɩkɛ Ɛsɔ sɛyaa yɔ, ɖɩmaɣzɩɣnɩ Yesu weyi eluzuu ɛ-tɩ pilim Ɛsɔ tɛɛ yɔ.

⁵ Ɛbɛ kʋñɔmɩŋ weyi Yesu tɔɔ tɛtʋ yɔɔ yɔ, ɩkpɛlɩkɩ-ɩ? Ebree mba 5:8 cosaa se: “Paa ɛɛkɛ pɩyalʋ yɔ, ɛkpɛlɩkɩ ñamtʋ kʋñɔmɩŋ weyi ɛtɔwaa yɔ ɩ-taa.” Toovenim, Yesu kaaluzi ɛ-tɩ ɛ-Caa weyi ɛwɛ ɛsɔdaa yɔ, ɛ-tɛɛ nɛ ɛɖɔkɩ e-siɣsiɣ wɛtʋ kpam, halɩ pɩkpɛndɩnɩ kaɖɛ alɩwaatʋ taa. Ɛtɩtɩɩlabʋ ɛ-maɣmaɣ ɛ-sɔɔlɩm paa ññɩɩ. Ɛtɩwɩlɩ ɛ-maɣmaɣ ɛ-tɔm, nɛ ɛtɩñɩnɩ ɖɔɖɔ ɛ-maɣmaɣ ɛ-samtʋ. (Yoh. 5:19, 30; 6:38; 7:16-18) Alɩwaatʋ ndʋ esusaɣ tɔm yɔ, ɛlakaɣ ɛ-Caa sɔɔlɩm nɛ taa leleŋ, paa pɩ-labʋ eeyeba nɛ ɛkatɩ takɩm nɛ nazɩm sakɩyɛ yɔ. (Yoh. 15:20) Pɩtʋʋ fɛyɩ, Yesu kaaluzi ɛ-tɩ Ɛsɔ tɛɛ. “Eluzi ɛ-tɩ” halɩ pɩkpɛndɩnɩ alɩwaatʋ ndʋ ɛsɩbɩ “nazɩm sizika yɔɔ” yɔ tɩ-taa. Eluzi ɛ-tɩ Yehowa tɛɛ nɛ ɛ-laŋɩyɛ pilim nɛ pɩlʋlɩ pee kɩbana sakɩyɛ. A-taa naayɛ yɔ: Pɩhaɣ waɖɛ ɛyaa se pehiɣ wezuu maatɛŋ, pɩkpazɩ ɛ-maɣmaɣ lone sɔsɔɖɛ taa, nɛ pɩkɔnɩ ɖɔɖɔ samtʋ ɛ-Caa yɔɔ.—Fil. 2:5-11; Ebr. 5:9.

MBA TƐƐ PƖWƐƐ SE ÐILUZI ÐA-TƖ?

⁶ Ye ɖiluzuu ɖa-tɩ Ɛsɔ tɛɛ nɛ ɖɩlakɩ ɛ-sɔɔlɩm yɔ, ɖɩfɛɣ wɩzasɩ nɛ kʋñɔmɩŋ sakɩyɛ. Kʋñɔmɩŋ nɛ wɩzasɩ nzɩ, sɩkɔŋ mba pekiziɣ se paaluzuu pa-tɩ Yehowa kewiyitu tɔɔʋ tɛɛ yɔ pɔ-yɔɔ. Paa ɛzɩmtaa lɛ, ɖo-koyindu Eleeu ñɩnɩɣ se ɛpʋʋtɩ-ɖʋ. Ðɩpɩzɩɣ nɛ ɖɩlɩɩ kañatʋ tʋ ɛnʋ e-nesi tɛɛ, ye ɖɩkaɖɩɣnɩ-ɩ nɛ ɖiluzuu ɖa-tɩ faaa Yehowa tɛɛ yɔ.—Mat. 6:10, 13; 1 Pɩy. 5:6-9.

⁷ Krɩstʋ ɛgbɛyɛ taa lɛ, ɖitisiɣ faaa nɛ ɖiluzuu ɖa-tɩ Krɩstʋ nɛ “yom siɣsiɣ tʋ nɛ lɔŋsɩnɖʋ” weyi ɛlɩzaa se eɖiyi-ɖʋ yɔ, pɛ-tɛɛ. Tɩ luzuu mbʋ pɩwɛnɩ ɖoŋ ɖɛ-wɛtʋ nɛ lakasɩ nzɩ ɖɩwɛnɩ ɖama yɔɔ yɔ, pɩ-yɔɔ. Ye ɖiluzuu ɖa-tɩ Ɛsɔ tɛɛ, ɛgbɛyɛ taa yɔ, pituyuu-ɖʋ nɛ ɖɩlabɩnɩ tʋmɩyɛ Ɛsɔtɔm ɖɛ-Ɛsɔ sɛtʋ hɔɔlɩŋ kpeekpe taa. Ɛzɩma ɖisusuu tɔm, ɖiwoki kediɣzisi nɛ ɖicosuu tɔm, ɖɩñaŋ ɛzʋtʋyaa nɛ ɖiluzuu ɖa-tɩ ɖʋtʋ ndʋ palabɩ ɛgbɛyɛ taa yɔ tɩ-tɛɛ yɔ, mbʋ wɩlɩɣna se ɖiluzuu ɖa-tɩ Ɛsɔ tɛɛ.—Mat. 24:45-47; 28:19, 20; Ebr. 10:24, 25; 13:7, 17.

⁸ Ɛzɩma ɖiluzuu ɖa-tɩ Ɛsɔ tɛɛ yɔ, mbʋ yekina se laŋhɛzɩyɛ nɛ pɛɛyɛ pɛwɛɛ Krɩstʋ mba ɛgbɛyɛ taa nɛ pɩtɩŋa pɩɖɔ camɩyɛ cɔlɩɩɩ. Mba poluzuu pa-tɩ Ɛsɔ tɛɛ yɔ, pañakɩ pana se pɛwɛɛnɩ Yehowa wɛtʋ. (1 Kɔr. 14:33, 40) Pɩtʋʋ fɛyɩ se mbʋ mbʋ ɖɩna Yehowa ɛgbɛyɛ taa yɔ, piyeba nɛ ɖɩwɛɛnɩ Wiyaʋ Daviid lɩmaɣza. Daviid na tʋkaɣ ŋga kɛwɛ Yehowa sɛyaa nɛ kɩwɛɛkɩm laɖaa pɛ-hɛkʋ taa yɔ lɛ, ɛyɔɔdɩnɩ taa leleŋ se: “Samaɣ ŋga [Yehowa] kɛ kɛ-Ɛsɔ yɔ, kanɩ leleŋ!”—Keɣa 143:15.

⁹ Nesi ɖɔkʋʋ taa nɛ hɔʋ taa ɖʋtʋ taa lɛ, “halʋ ñʋʋdʋ lɛ abalʋ.” Nɛ pɩpɔzʋʋ se abalaa iluzi pa-tɩ Krɩstʋ tɛɛ, nɛ Krɩstʋ ñʋʋdʋ lɛ Ɛsɔ. (1 Kɔr. 11:3) Pɩwɛɛ se halaa iluzi pa-tɩ pa-walaa tɛɛ nɛ piya ñoluzi sɩ-tɩ sɩ-lʋlɩyaa tɛɛ. (Efɛz. 5:22-24; 6:1) Ye paa hɔʋ taa tʋ weyi eluzuu ɛ-tɩ sɔsɔtʋ ɖʋtʋ tɛɛ yɔ, hɔʋ kpeekpe wɛɣ laŋhɛzɩyɛ taa.

¹⁰ Pɩpɔzʋʋ se walʋ ɛmaɣzɩnɩ Krɩstʋ nɛ ɛlabɩnɩ e-ɖoŋ tʋmɩyɛ nɛ sɔɔlɩm. (Efɛz. 5:25-29) Ye ɛɛɖɛlɛsɩɣ niye ɛzɩma ɛlakɩnɩ e-ɖoŋ tʋmɩyɛ yɔ pɩ-taa, nɛ ye ɛɛlakɩ ɖɔɖɔ kaakendu yɔ, ɛ-halʋ nɛ e-piya poluzuu pa-tɩ ɛ-tɛɛ nɛ taa leleŋ. Pɩwɛɛ se ɛ-halʋ ɛkɛnɩ-ɩ sɩnɩyʋ yaa nesi ɖʋyʋ. (Kiɖe 2:18) Ye halʋ ɛñaŋ ɛ-walʋ nɛ ɛɖʋʋ suuɖu nɛ ɛsɩɣnɩ-ɩ yɔ, ɛ-tɔm kɛdɩɣnɩ-ɩ nɛ pɩɖʋ hɩɖɛ ɖɔɖɔ Ɛsɔ. (1 Pɩy. 3:1-4) Ye abalʋ nɛ ɛ-halʋ palakɩnɩ tʋmɩyɛ Bibl lɔŋ tasʋʋ mbʋ pitukuuni sɔsɔtʋ ɖʋtʋ yɔ, pahaɣ pe-piya kɩɖaʋ kɩbaŋʋ ŋgʋ kɩsɩɣnɩ-sɩ nɛ siluzi sɩ-tɩ Ɛsɔ tɛɛ yɔ.

¹¹ Ye ɖɩñaŋ “ñʋndɩnaa sɔsaa” yɔ, pʋbʋ lɛ ɖɩwɩlɩɣ ɖɔɖɔ se ɖiluzuu ɖa-tɩ Ɛsɔ tɛɛ. Ñʋndɩnaa sɔsaa mba, “Ɛsɔ hanɩ-wɛ nʋmɔʋ se pɛwɛɛ lona ndɩ ndɩ wena a-ɖoŋ wɛnɩ tɩnaɣ yɔ a-taa.” (Roma 13:1-7) Krɩstʋ ñɩma ñaŋ pɛ-ɛjaɖɛ taa paɣtʋ nɛ pɛhɛyɩɣ lambuu. Pɛcɛlɩɣ “Sezaarɩ mbʋ pɩkɛ Sezaarɩ pʋyʋ yɔ”, nɛ pɛcɛlɩɣ ɖɔɖɔ “Ɛsɔ mbʋ pɩkɛ Ɛsɔ pʋyʋ yɔ.” (Mat. 22:21) Pɩtasɩ lɛ, ɖʋtʋ ndʋ palakɩ se posusi tɔm camɩyɛ ɖe-egeetiye kpeekpe taa yɔ, tɩlabɩ nɔɔ kʋɖʋmaɣ nɛ ñʋndɩnaa paɣtʋ ndʋ tɩkandɩyɩɣ ɛyaa yɔɔ yɔ. Ye ɖɩñaŋ ñʋndɩnaa paɣtʋ ndʋ tɩɩkaɖɩɣnɩ Yehowa ñɩndʋ yɔ, pʋbʋ lɛ ɖɩwɩlɩɣ se ɖiluzuu ɖa-tɩ ñʋndɩnaa mba paɣtʋ ha-wɛ nʋmɔʋ se pɛwɛɛ yɔ pɛ-tɛɛ. Piyeki nɛ pɩha-ɖʋ nʋmɔʋ se ɖɩkpaɣ ɖo-ɖoŋ nɛ ɖɩlabɩnɩ tɔm kɩbandʋ susuu tʋmɩyɛ faaa.—Mark. 13:10; Tʋma 5:29.

¹² Ye pɔtɔm se ɖiluzi ɖa-tɩ teokrasɩ ɖʋtʋ tɛɛ yɔ, pitukuuni ɖe-wezuu caɣʋ hɔɔlɩŋ kpeekpe. Ðe-fezuu taa ɛsa sɩɣnɩ-ɖʋ se ɖɩcɔna nɛ ɖɩna alɩwaatʋ ndʋ ɛyaa kpeekpe kaɣ luzuu pa-tɩ Yehowa Ɛsɔ tɛɛ yɔ. (1 Kɔr. 15:27, 28) Mba payɩ pakaɣ tisuu Yehowa kewiyitu kɩkɩlɩtʋ tɔɔʋ yɔɔ nɛ poluzi pa-tɩ ɛ-tɛɛ nɛ taa leleŋ yɔ, pɩkaɣ-wɛ kɛnʋʋ wazaɣ sɔsɔɔ nɛ lootiye tamtam!