Yesu fema

Yesu sɩm wayɩ lɛ, abalʋ ñɩm tʋ weyi payaɣ se Yosɛɛfʋ yɔ, ewolo nɛ ɛpɔzɩ Pilaatɩ se ɛha-ɩ nʋmɔʋ nɛ etisi Yesu tomnaɣ sizika yɔɔ. Yosɛɛfʋ ñɔɔzɩ Yesu tomnaɣ camɩyɛ, ɛtaa-kɛ sɔzɩŋ kɔ nɛ ehuuzi-kɛ pɩsaʋ kɩbaŋʋ nɛ ewoni-kɛ nɛ ɛhɩzɩ pɩlaʋ kɩfalʋʋ nakʋyʋ taa. Pʋwayɩ lɛ, pepilisi kaaʋ sɔsɔʋ nakʋyʋ nɛ paɖɩɣ kɩ-nɔɔ. Cɔjɔnaa sɔsaa wolo nɛ peheyi Pilaatɩ se: “Sɔɔndʋ wɛɛ pɩkpaɣ-ɖʋ se pɩtaakɛdɩ nɛ Yesu tɔmkpɛlɩkɩyaa wolo nɛ palɩzɩ-ɩ pɩlaʋ taa nɛ pɛcɛtɩ se efema.” Peeɖe Pilaatɩ heyi-wɛ se: “Ɩɖɩɣ pɩlaʋ nɔɔ nɛ ifeŋ kɩ-yɔɔ.”

Kɩyakʋ 3 ñɩŋgʋ wiye, halaa nabɛyɛ lɩɩ tɛbɩyɛ tɛɛ nɛ powolo pɩlaʋ yɔɔ. Patalaa lɛ, pana se pokuli kaaʋ sɔsɔʋ ŋgʋ paaɖɩɣ pɩlaʋ nɔɔ yɔ. Pɔcɔnɩ pɩlaʋ taa lɛ, pana Ɛsɔ tiyiyu nɔɔyʋ nɛ eheyi-wɛ se: “Sɔɔndʋ ɛtaakpa-mɩ. Mbʋ pʋyɔɔ yɔ, Yesu fema. Iwolo nɛ iheyi ɛ-tɔmkpɛlɩkɩyaa se pakatɩ-ɩ Galilee.”

Maarɩɩ Magdalaa tʋ se lɛɛ lɛɛ nɛ ewolo Pɩyɛɛrɩ nɛ Yohanɛɛsɩ pɔ-cɔlɔ. Eheyi-wɛ se: “Nɔɔyʋ woba nɛ ɛlɩzɩ Yesu tomnaɣ pɩlaʋ taa!” Pɩyɛɛrɩ nɛ Yohanɛɛsɩ pese nɛ powolo pɩlaʋ yɔɔ. Pɔcɔnɩ kɩ-taa nɛ patɩna nabʋyʋ lɛ, pese nɛ papɩsɩ pa-ɖɩsɩ.

Maarɩɩ pɩsɩ pɩlaʋ nɔɔ lɛ, ɛmaɣnɩ Ɛsɔ tiyiyaa naalɛ pɩlaʋ taa nɛ eheyi-wɛ se: “Maasɩŋ ɖenɖe pakpaɣ man-Kɩbaɣlʋ tomnaɣ nɛ pasɩɩ yɔ.” Peeɖe ɛna abalʋ nɔɔyʋ nɛ ɛmaɣzɩ se ɛkɛ kaɖaɣ ŋga ka-taa pɩlaʋ kaawɛɛ yɔ kɔ-yɔɔ cɔnɩyʋ, nɛ ɛpɔzɩ-ɩ se: “Ðajaa mentendi-ŋ, wɩlɩ-m ɖenɖe ŋkpaɣ-ɩ nɛ ŋsɩɩ yɔ.” Abalʋ ɛnʋ ɛya-ɩ nɛ ɛ-hɩɖɛ se «Maarɩɩ» lɛ, eɖiɣzina se Yesu maɣmaɣ na. Maarɩɩ ma kubuka se: «Wɩlɩyʋ!» nɛ ewolo ekpibi-i nɛ ɛñɔɔnɩ-ɩ. Yesu heyi-i se: “Wolo nɛ ŋheyi mon-koobiya se ŋna-m.” Kpaagbaa mbʋ lɛ, Maarɩɩ se nɛ ewolo tɔmkpɛlɩkɩyaa cɔlɔ nɛ eheyi-wɛ se ɛna Yesu.

Pʋwayɩ, evemiye nɖɩ ɖɩ-taa lɛ, ɛ-tɔmkpɛlɩkɩyaa 2 kaalɩnɩ Yeruzalɛm nɛ powoki Emayuusi. Abalʋ nɔɔyʋ ñɔtɩnɩ-wɛ nʋmɔʋ taa lɛ, ɛpɔzɩ-wɛ se ɛbɛ tɔm pɛwɛɛ nɛ pɔyɔɔdʋʋ? Pocosi-i se: “Ŋtɩnɩɩ kɛ? Pɩlabɩ kɩyakɩŋ 3 yɔ cɔjɔnaa kʋʋ Yesu yɔ. Lɛɛlɛɛyɔ lɛ halaa nabɛyɛ wɛɛ nɛ pɔtɔŋ se efema!” Abalʋ ɛnʋ ɛpɔzɩ-wɛ se: “Iitisiɣ nayaa tɔm yɔɔ kɛ? Pɔtɔm se Yesu kaɣ sɩbʋ nɛ pʋwayɩ lɛ, pefezi-i.” Abalʋ ɛnʋ ewolo pɩ-yɔɔ nɛ ɛlɩzɩɣ-wɛ Masɩ taa. Patalɩ Emayuusi lɛ, Yesu tɔmkpɛlɩkɩyaa heyi abalʋ ɛnʋ se ɛcaɣ pɔ-cɔlɔ. Pɩtalɩ ɖanaɣ tɔɔnaɣ tɔɔʋ alɩwaatʋ lɛ, abalʋ ɛnʋ ɛtɩmɩ kpɔnɔ yɔɔ se pɔtɔɔ; peeɖe peɖiɣzinaa se ñazɩ Yesu na. Kpaagbaa mbʋ lɛ ɛmʋʋ.

Tɔmkpɛlɩkɩyaa mba papɩsɩ kpaagbaa Yeruzalɛm ɖɩɣa ŋga ka-taa apostoloowaa kaakpeɣlaa yɔ, nɛ pɛkɛdɩ-wɛ mbʋ payɩ pɩlaba yɔ. Paawɛ kuduyuu tɛɛ peeɖe lɛ, Yesu lɩɩ pɔ-yɔɔ. Kajalaɣ lɛ, apostoloowaa taatisi se ɛnʋ lɛ. Pʋyɔɔ eheyi-wɛ se: “Ɩcɔnɩ me-nesi nɛ ɩna, itukuni-m. Pamawa se Krɩstʋ kaɣ fem nɛ sɩɖaa taa.”