Yesu wɩlɩ ɛ-tɔmkpɛlɩkɩyaa ɛzɩma patɩmnɩ Ɛsɔ yɔ

Mbʋ payɩ Farɩsɩ mba lakɩ yɔ, palakɩ-pʋ se pawɩlɩ lalaa se pɛkɛ ɛyaa kɩbama. Kɩbam mbʋ payɩ palakɩ yɔ, palakɩ-pʋ se lalaa ɩna. Palakɩ adɩma lona wena a-taa ɛyaa sakɩyɛ cakɩ yɔ se papɩzɩ nɛ pana-wɛ. Farɩsɩ mba kpɛlɩkɩ adɩma wena aɖaɣlaa yɔ nɛ palakɩ-yɛ Sinaagɔɔgɩwaa taa nɛ habɛɛ kɔnanaa taa se lalaa ɩpɩzɩ nɛ pewelisi ndʋ pɔyɔɔdʋʋ pa-adɩma taa yɔ. Pʋyɔɔ pɩɖɩɣzɩ ɛyaa alɩwaatʋ ndʋ Yesu heyi-wɛ se: “Ɩtaala adɩma ɛzɩ Farɩsɩ mba lakʋʋ yɔ. Pamaɣzɩɣ se Ɛsɔ kaɣ-wɛ welisinuu mbʋ pʋyɔɔ yɔ pɔyɔɔdʋʋ tɔm sakɩyɛ, ɛlɛ pɛcɛtɩɣ pa-tɩ kɩcɛtʋ. Adɩma kɛ mɩ nɛ Yehowa mɩ-hɛkʋ taa tɔm. Pɩtɩpɔzɩ se ɩyɔɔdʋʋ tɔm kʋɖʋmtʋ mɩ-adɩma taa paa ɛzɩmtaa. Yehowa ñɩnɩɣ se iheyi-i tɔm ndʋ ɖeyi ɖeyi tɩwɛ mɩ-laŋɩyɛ taa yɔ.

“Ɛzʋnɔ pɩwɛɛ se ɩtɩmɩ: «Ða-Caa ña weyi ŋwɛ ɛsɔdaa yɔ, ña-hɩɖɛ yɔɔ ɛñalɩ. Ñe-Kewiyaɣ ɛkɔɔ. Ñɔ-sɔɔlɩm ɛla tataa ɛzɩ ɛsɔdaa yɔ.»” Yesu heyi-wɛ ɖɔɖɔ se pɩpɔzʋʋ se patɩmnɩ Ɛsɔ se ɛha-wɛ evemiye tɔɔnaɣ, ekpeɣ-wɛ pa-kɩwɛɛkɩm nɛ ɛcɔnɩ pa-kɩcɛyɩm lɛɛbʋ ɖeɖe.

Yesu yɔɔdaa se: “Itaayele tɩmʋʋ kpa. Iwolo pɩ-yɔɔ nɛ ɩpɔzʋʋ mɩ-Caa Yehowa mbʋ pɩwɛ ɖeu yɔ. Paa lʋlɩyʋ weyi ɛhaɣ ɛ-pɩɣa mbʋ pɩwɛ ɖeu yɔ. Ye ña-pɩɣa ɛpɔzɩ-ŋ kpɔnɔ yɔ, ŋcɛlɩɣ-kɛ pɩyɛ na? Ye kɔpɔzɩ-ŋ kpakpayaɣ yɔ, ŋcɛlɩɣ-kɛ ɖʋm na?”

Pʋwayɩ lɛ, Yesu lɩzɩ pɩ-taa se: “Ye ɩsɩm haʋ kʋjɔŋ kɩbaŋ mi-piya yɔ, ɛzɩ mɩ-Caa Yehowa ñaakaɣ-mɩ haʋ fezuu kiɖeɖeu yaa we? Mbʋ pɩwɛɛ se ɩla yɔ mbʋ yɔ: Ɩpɔzɩ-ɩ mbʋ pɩtɛɖɩɣ-mɩ yɔ.” Ŋlakɩnɩ Yesu lɔŋ tasʋʋ pʋnɛ tʋmɩyɛ na? Ɛbɛ ŋpɔzʋʋ Yehowa ña-adɩma taa?