TƆM KƖKPƐLƖKƖTƲ 26
Ɛbɛ yɔɔ kɩdɛkɛdɩm nɛ kʋñɔmɩŋ pɛwɛ ɛjaɖɛ yɔɔ?
Ðoŋ ɖoŋ lɛ kɛgbɛdɩsaɣ nakɛyɛ lakɩ lɛ, ɛyaa pɔzʋʋ pa-tɩ se: «Ɛbɛ yɔɔ pɩlabɩ mbʋ?» Ða-taa wɛ leleŋ siŋŋ se Bibl cosi tɔm pɔzʋʋ mbʋ pɩ-yɔɔ kpayɩ kpayɩ!
1. Ɛzɩma Sataŋ yeba nɛ kɩdɛkɛdɩm wɛɛ ɛjaɖɛ yɔɔ?
Sataŋ Eleeu kaɖɩnɩ Ɛsɔ. Sataŋ ñɩnaɣ se ɛtɔɔ kewiyitu lalaa yɔɔ; pʋyɔɔ etuyi kajalaɣ ɛyaa, Aɖam nɛ Ɛva, nɛ pakaɖɩnɩ Ɛsɔ ɖɔɖɔ. Pɩsa nɛ ɛtalɩ ɛ-kaɖʋwa lɛ, ɛcɛtɩ Ɛva. (Kiɖe Tɛɛ Tɔm 3:1-5) Eyeba nɛ Ɛva maɣzɩ se Yehowa wɛɛ nɛ ɛpɛŋ-wɛ mbʋ pɩwɛ ɖeu yɔ. Tɔm ndʋ tɩwɩlɩɣ se ye ɛyaa ɩɩñaŋ Ɛsɔ yɔ, pɛwɛɣ koboyaɣ taa nɛ pɩkɩlɩ. Eheyi Ɛva se ɛlɛ ɛɛkaɣ sɩbʋ, nɛ cɛtɩm tɔm kajalaɣ ñɩndʋ lɛ. Pʋyɔɔ Bibl yaɣ Sataŋ se «cɛtɩyʋ nɛ cɛtɩm caa.»—Yohanɛɛsɩ 8:44.
2. Ɛbɛ Aɖam nɛ Ɛva palɩzaa se palakɩ?
Yehowa kaaha Aɖam nɛ Ɛva mbʋ payɩ pɩpɔzaɣ-wɛ yɔ. Eheyi-wɛ se papɩzɩɣ nɛ pɔtɔɔ kaɖaɣ taa tɩŋ kpeekpe pee nɛ tɩʋ kʋɖʋmʋʋ ɖeke pee pɩtaapɔzɩ se pɔtɔɔ. (Kiɖe Tɛɛ Tɔm 2:15-17) Ɛlɛ palɩzɩ se pɔtɔkɩ tɩʋ ŋgʋ ekizini-wɛ yɔ ki-piye. Ɛva ‘koyi ki-piye nɛ ɛtɔɔ.’ Nɛ pʋwayɩ lɛ, Aɖam ‘ɖɔɖɔ ñɔtɔɔ.’ (Kiɖe Tɛɛ Tɔm 3:6) Pa-naalɛ patɩña Ɛsɔ. Aɖam nɛ Ɛva paatalɩ pilim nɛ pʋyɔɔ lɛ, pɩɩpɔzaa se pala mbʋ pɩtʋʋzaa yɔ. Paɖʋ pa-taa faɖaɖa nɛ pamaanɩ Ɛsɔ paɣtʋ yɔɔ nɛ pala kɩwɛɛkɩm nɛ pekizi se Ɛsɔ ɛtaatɔɔ kewiyitu pɔ-yɔɔ. Piyeba nɛ pasʋʋ kʋñɔŋ taa siŋŋ.—Kiɖe Tɛɛ Tɔm 3:16-19.
3. Mbʋ Aɖam nɛ Ɛva palaba yɔ, ɛzɩma pitukuuni-ɖʋ?
Aɖam nɛ Ɛva palabɩ kɩwɛɛkɩm lɛ, patɩtasɩ talʋʋ pilim nɛ pʋyɔɔ lɛ, pɛɖɛzɩ wɛtʋ ndʋ pa-sayɩnaa kpeekpe. Bibl yɔɔdɩ Aɖam tɔm se: «Kɩwɛɛkɩm tɩŋnɩ ɛyʋ kʋɖʋm yɔɔ nɛ pɩlɩɩ ɛjaɖɛ yɔɔ nɛ sɩm ñatɩŋnɩ kɩwɛɛkɩm yɔɔ nɛ pɩlɩɩ, nɛ piyele nɛ sɩm wadɩ ɛyaa kpeekpe yɔɔ.»—Roma mba 5:12.
Lɩmaɣza ndɩ ndɩ yɔɔ ɖɩtɔkɩ kʋñɔŋ. Nabʋyʋ taa ɖɩlakɩ kʋñɔŋ mbʋ pʋyɔɔ yɔ ɖɩkpaɣ lɩmaɣzɩyɛ kɩdɛkɛdɩyɛ naɖɩyɛ. Nabʋyʋ taa ɖɔɖɔ lɛ lɩmaɣza kɩdɛkɛda wena lalaa kpaɣaa yɔ, ana yekina nɛ ɖɩlakɩ kʋñɔŋ. Ðɩpɩzɩɣ ɖɔɖɔ nɛ ɖɩla kʋñɔŋ mbʋ pʋyɔɔ yɔ ɖɩwɛ lone kɩdɛkɛdɩyɛ naɖɩyɛ taa.—Kalɩ Eklezɩyasɩtɩ 9:11.
TAZƖ NƐ PILIMI
Tazɩ nɛ ŋna mbʋ pɩwɩlɩɣ se kɩdɛkɛdɩm nɛ kʋñɔmɩŋ weyi ɩ-taa ɖɩwɛ sɔnɔ yɔ ɩtɩlɩɩnɩ Ɛsɔ cɔlɔ yɔ. Tazɩ ɖɔɖɔ nɛ ŋna se ɖɩwɛɣ kʋñɔŋ taa lɛ, lɩmaɣza wena Ɛsɔ wɛnɩ ɖɔ-yɔɔ.
4. Weyi ɛ-cɔlɔ ɖa-kʋñɔmɩŋ lɩɣna yɔ
Ɛyaa sakɩyɛ maɣzɩɣ se Ɛsɔ ɖiyiɣni ɛjaɖɛ. Ɛlɛ pɩkɛ toovenim na? Ɩcɔnɩ VIDEO.
Ɩkalɩ Yakubu 1:13 nɛ 1 Yohanɛɛsɩ 5:19, nɛ pʋwayɩ lɛ ɩtazɩ tɔm tʋnɛ tɩ-taa:
Ɛsɔ cɔlɔ kʋñɔmɩŋ nɛ kɩdɛkɛdɩm palɩɣna?
5. Pee wena Sataŋ kewiyitu tɔɔʋ lʋlaa yɔ
Ɩkalɩ Kiɖe Tɛɛ Tɔm 3:1-6, nɛ pʋwayɩ lɛ ɩtazɩ tɔm tʋnɛ tɩ-taa:
Cɛtɩm tɔm ndʋ Sataŋ yɔɔdaa?—Cɔnɩ kalɩtʋ 4 nɛ 5.
Ɛzɩma Sataŋ wɩlaa se Yehowa wɛɛ nɛ ɛpɛŋ ɛyaa kɩbam nabʋyʋ?
Sataŋ ɛsɩndaa lɛ, pɩcɛyaa se Yehowa eɖiyi ɛyaa pʋcɔ nɛ pehiɣ koboyaɣ na?
Ɩkalɩ Eklezɩyasɩtɩ 8:9, nɛ pʋwayɩ lɛ ɩtazɩ tɔm tʋnɛ tɩ-taa:
Kpaɣnɩ alɩwaatʋ ndʋ Yehowa yebi ɖiyuu ɛjaɖɛ ɖɩnɛ yɔ, ɛbɛ talɩ-ɖɩ?
Aɖam nɛ Ɛva paatalɩ pilim nɛ pɛwɛɛ Paradisuu taa. Ɛlɛ pewelisini Sataŋ nɛ pakaɖɩnɩ Yehowa.
Kaañamtʋ yeba nɛ kɩdɛkɛdɩm, kʋñɔmɩŋ nɛ sɩm posu ɛjaɖɛ yɔɔ.
Yehowa kaɣ yebu nɛ kɩdɛkɛdɩm, kʋñɔmɩŋ nɛ sɩm pɩsɩɩ tɩnaɣ. Ɛyaa kaɣ tasʋʋ talʋʋ pilim nɛ pacaɣ wezuu Paradisuu taa.
6. Yehowa maɣzɩɣ ɖɔ-yɔɔ alɩwaatʋ ndʋ ɖɩlakɩ kʋñɔŋ yɔ
Ɛzɩ Ɛsɔ maɣzɩɣ ɖɔ-yɔɔ alɩwaatʋ ndʋ ɖɩlakɩ kʋñɔŋ yɔ? Na tɔm ndʋ wiyaʋ Daviid nɛ apostoloo Pɩyɛɛrɩ pamawa yɔ. Ɩkalɩ Keɣa 31:7 nɛ 1 Pɩyɛɛrɩ 5:7, nɛ pʋwayɩ lɛ ɩtazɩ tɔm tʋnɛ tɩ-taa:
Ŋtɩlʋʋ se Yehowa naɣ ɖa-kʋñɔmɩŋ nɛ ɛmaɣzɩɣ ɖɔ-yɔɔ yɔ, ɛzɩma pɩlakɩ-ŋ?
7. Ɛsɔ kaɣ yebu nɛ ɛyaa kʋñɔmɩŋ kpeekpe sɩɩ tɩnaɣ
Ɩkalɩ Izaayii 65:17 nɛ Natʋ 21:3, 4; nɛ pʋwayɩ lɛ ɩtazɩ tɔm tʋnɛ tɩ-taa:
Yehowa kaɣ hɩzʋʋ asɛyɩŋ weyi lakasɩ kɩdɛkɛdɩsɩ kɔnɩ ɛyaa yɔɔ yɔ i-kpeekpe. Ɛzɩma tɔm ndʋ tɩhɛzɩɣ ɖa-laŋa?
Ŋŋsɩm-tʋ?
Alɩwaatʋ ndʋ Sataŋ yɔɔdɩ kajalaɣ cɛtɩm tɔm yɔ, ɛlabɩ kɔlɔmɔtʋ Yehowa yɔɔ. Pʋ-tɔbʋʋ lɛ se episi Yehowa hɩɖɛ, mbʋ pʋyɔɔ yɔ ɛyɔɔdaa se Yehowa tɩkɛ Ðiyiyu siɣsiɣ tʋ nɛ sɔɔlɩm tʋ. Pɩkazɩ pazɩ Yehowa yeki nɛ ɛyaa kʋñɔmɩŋ sɩɩ tɩnaɣ lɛ, ɛñalɩɣ ɛ-hɩɖɛ yɔɔ. Pʋ-tɔbʋʋ ɖɔɖɔ lɛ se ɛkaɣ wɩlʋʋ se e-kewiyitu tɔɔʋ kpaɖɩnɩ ɖeu. Yehowa hɩɖɛ yɔɔ ñalʋʋ tɔm kɩlɩnɩ cɛyʋʋ kedeŋa kpeekpe yɔɔ. —Maatiyee 6:9, 10.
NABƐYƐ YƆƆDƲƲ SE: «Ɛsɔ kaaɖʋna se ɖɩla kʋñɔŋ.»
Suwe ŋpɩzɩɣ nɛ ŋcosi-wɛ?
TOBI LƐ
Sataŋ Eleeu nɛ ɛyaa naalɛ mba Ɛsɔ calɩ lɩzʋʋ yɔ, pɔ-cɔlɔ kɩdɛkɛdɩm mbʋ pɩwɛ ɛjaɖɛ yɔɔ yɔ pɩlɩnaa! Ðɩlakɩ kʋñɔmɩŋ lɛ Yehowa maɣzɩɣ ɖɔ-yɔɔ siŋŋ nɛ pɩkazɩ pazɩ lɛ, eyeki nɛ kʋñɔmɩŋ sɩɩ tɩnaɣ.
Tɔm taa tazʋʋ
Cɛtɩm tɔm ndʋ Sataŋ Eleeu heyi Ɛva?
Ɛzɩma Aɖam nɛ Ɛva pa-kaañamtʋ lakasɩ tukuuni ɖa-tɩŋa?
Ɛzɩma ɖɩlaba nɛ ɖɩna se alɩwaatʋ ndʋ ɖɩlakɩ kʋñɔmɩŋ yɔ, Yehowa maɣzɩɣ ɖɔ-yɔɔ?
WONDU LƐƐTƲ
Kalɩ nɛ ŋna ɛzɩma Bibl lɩzɩɣ kɩwɛɛkɩm tɔbʋʋ yɔ.
Tasɩ tɔm lɛɛtʋ kpɛlɩkʋʋ pɩlɩɩnɩ tɔm ndʋ Sataŋ Eleeu yɔɔdɩ Edɛɛnɩ kaɖaɣ taa yɔ tɩ-yɔɔ.
«Pourquoi Dieu permet-il les souffrances?» (La Tour de Garde, 1er janvier 2014)
Kaɖɛ tɔm ndʋ ɛyaa pɔzʋʋ pa-tɩ yɔ, na ɛzɩma pocosi tɩ-yɔɔ nɛ pɩhɛzɩɣ laŋa siŋŋ yɔ.
«Pourquoi la Shoah a-t-elle eu lieu? Pourquoi Dieu n’a-t-il rien fait?» (Intɛrnɛɛtɩ yɔɔ tɔm ñʋʋ)
Cɔna nɛ ŋna tɔm ndʋ abalʋ nɔɔyʋ kpɛlɩkaa pɩlɩɩnɩ kʋñɔmɩŋ weyi ɛnaɣ yɔ ɩ-yɔɔ yɔ.