Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
6-12 JUILLET
ÑƖM MBƲ PƖWƐ ƐSƆTƆM TAA YƆ | EJIPITI LƖƲ 6-7
“Ŋkɔŋ naʋ mbʋ mankaɣ labʋ Farawɔɔ yɔ”
(Ejipiti Lɩʋ 6:1) Nɛ Kɩbaɣlʋ tɔ Moyizi se: “Ŋkɔŋ naʋ mbʋ mankaɣ labʋ Farawɔɔ yɔ; nesi ɖoŋ ñɩnzɩ yɔɔ ɛkaɣ-wɛ yebu se pɛɖɛɛ nɛ nesi ɖoŋ ñɩnzɩ nzɩ sɩkaɣ-ɩ cɛyʋʋ se ɛɖɔɔnɩ-wɛ kɩɖɔɔnʋ nɛ palɩɩ ɛ-tɛtʋ taa.”
(Ejipiti Lɩʋ 6:6, 7) “Mbʋ lɛ heyi Izrayɛɛlɩ piya se: ‘Ma Kɩbaɣlʋ, mankaɣ-mɩ lɩzʋʋ tʋma wena Ejipiti mba ɖʋʋ-mɩ yɔ, a-taa. Mankaɣ-mɩ holuu nɛ malɩzɩ yomiye nɖɩ pɔɖɔkɩ-mɩ ɖɩ-taa yɔ, ɖɩ-taa, nɛ mankaɣ mabʋ ɖoŋ nɛ mɔhɔ nɩŋgbaaŋ ɖoŋ pɩŋŋ nɛ moholi-mɩ. 7 Mankaɣ-mɩ mʋyʋsʋʋ nɛ ɩkɛ man-samaɣ nɛ mɛnkɛ mɩ-Ɛsɔ. Ðɩnɛ ɛlɛ ɩkaɣ ɖiɣzinuu se ma Kɩbaɣlʋ, mɛkɛnɩ mɩ-Ɛsɔ, malɩzɩɣnɩ-mɩ Ejipiti mba tʋma taa.”
it-2 309 § 5
Moyizi
Pɩɩpɔzaa se Izrayɛɛlɩ piya ɩla lɛɣzɩtʋ siŋŋ. Kiɖe tɛɛ lɛ siitisaa se Ɛsɔ tiyini Moyizi, ɛlɛ Farawɔɔ kɔm nɛ ɛnazɩ-sɩ siŋŋ nɛ ɛɖʋ-sɩ tʋma ɖoŋ ñɩna lɛ sɩpaɣzɩ miduu. Piiyeba nɛ pitii Moyizi yɔɔɔ nɛ ɛpɩsɩnɩ Yehowa yɔɔ. (Ejl 4:29-31; 5:19-23) Ɛsɔ Kɩlɩm kpazɩ-ɩ ɖoŋ nɛ eheyi-i se alɩwaatʋ talaa se eyele nɛ tamaɣ ŋga ɛɛlabɩ Abraham, Izaakɩ nɛ Yakɔɔb yɔ kala. Tamaɣ ŋga lɛ se ɛyakɩ ɛ-samaɣ ñʋʋ, ewoni-kɛ Lidaʋ Tɛtʋ taa nɛ kapɩsɩ ɛjaɖɛ sɔsɔɖɛ peeɖe nɛ piyele nɛ paa weyi ɛnɩɩ ɛ-hɩɖɛ tɔbʋʋ kpayɩ kpayɩ. (Ejl 6:1-8) Izrayɛɛlɩ piya taawelisini Moyizi. Ɛlɛ kɩjɩkpʋʋ nakʋ ñɩŋgʋ wayɩ lɛ, siluzi sɩ-tɩ nɛ sɩɖʋ-ɩ nesi, piyeba nɛ kɩjɩkpʋʋ hiu ñɩŋgʋ wayɩ lɛ, ɛpɩzɩ nɛ ɛñɔɔzɩ-sɩ ɛzɩ sɔɔjanaa yɔ nɛ eɖiyi-sɩ nɛ sɩpaa “tɔŋ nɛ sɩlɩɩ Ejipiti taa.”—Ejl 13:18.
(Ejipiti Lɩʋ 7:4, 5) Farawɔɔ ɛɛkaɣ-mɩ welisinuu yɔ, mankaɣ nesi sezuu Ejipiti yɔɔ nɛ malɩzɩ mo-wondu, man-samaɣ Izrayɛɛlɩ piya Ejipiti ɛjaɖɛ taa, nɛ mɔhɔ nɩŋgbaaŋ pɩŋŋ. 5 Ejipiti mba, pe-kpeekpe ɛzɩ pɛwɛʋ yɔ, pɩkaɣ-wɛ cɛyʋʋ nɛ peɖiɣzina se mɛkɛnɩ Kɩbaɣlʋ, maasezi nesi pɔ-yɔɔ nɛ malɩzɩ pɛ-tɛ Izrayɛɛlɩ piya lɛ.”
it-2 309 § 3,4
Moyizi
Ejipiti wiyaʋ Farawɔɔ ɛsɩndaa. Lɛɛlɛɛyɔ Moyizi nɛ Aarɔɔnɩ pɛwɛɛ nɛ palakɩ tʋmɩyɛ sɔsɔɖɛ naɖɩyɛ ‘you ŋgʋ ɛsɔnaa wɛɛ palakɩ yɔ kɩ-taa.’ Farawɔɔ tɩŋnɩ ɛ-cɔjɔnaa maajiki laɖaa yɔɔ se ɛwɩlɩ se Ejipiti ɛsɔnaa kpaɖɩ Yehowa ɖoŋ. Payaɣaɣ cɔjɔnaa mba pa-ñʋndɩnaa se Yaanɛɛsɩ nɛ Yambrɛɛsɩ. (2Ti 3:8) Kajalaɣ piti lakasɩ nzɩ Moyizi ha Aarɔɔnɩ nʋmɔʋ nɛ ɛla Farawɔɔ ɛsɩndaa yɔ, sɩwɩlɩ kpayɩ se Ejipiti ɛsɔnaa tɩlɩɩ pʋyʋ Yehowa ɛsɩndaa, paa Farawɔɔ kaayeba nɛ ɛ-laŋɩyɛ tɛzɩ wɛʋ kpɩzɩŋ yɔ. (Ejl 7:8-13) Pʋwayɩ, kɩjɩkpʋʋ naadozo ñɩŋgʋ kɔm Ejipiti mba yɔɔ lɛ, halɩ Farawɔɔ cɔjɔnaa yɔɔdaa se “pɩkɛ Ɛsɔ niye” na. Kɩjɩkpʋʋ ŋgʋ kɩ-taa, Yehowa yeba nɛ mʋya lɩɩ Ejipiti mba yɔɔ nɛ cɔjɔnaa mba, pataapɩzɩ powolo Farawɔɔ cɔlɔ se pakaɖɩnɩ Moyizi mbʋ pʋyɔɔ yɔ mʋya kaalɩ pɔ-yɔɔ siŋŋ.—Ejl 8:16-19; 9:10-12.
Kɩjɩkpɩŋ yeba nɛ nabɛyɛ laŋa hʋʋ nɛ lalaa ñɩna tɛzɩ wɛʋ kpɩzɩŋ. Moyizi nɛ Aarɔɔnɩ paasusini paa kɩjɩkpʋʋ ŋgʋ lɛ kɩ-tɔm. Kɩjɩkpɩŋ kaakɔm ɖeyi ɖeyi ɛzɩ posusuu yɔ nɛ pɩwɩlɩ se Yehowa tiyini Moyizi toovenim. Pɩlabɩ mbʋ lɛ, Yehowa hɩɖɛ sɛɛ nɛ pɔyɔɔdʋʋ ɖɩ-tɔm Ejipiti ɛjaɖɛ taa. Piiyeba nɛ nabɛyɛ sɔɔlɩ hɩɖɛ nɖɩ, ɛlɛ lalaa ñakaɖɩɣnɩ-ɖɩ: Izrayɛɛlɩ piya nɛ Ejipiti mba nabɛyɛ laŋa hʋwa, ɛlɛ Farawɔɔ nɛ ɛ-lɔŋ tasɩyaa ñɩna tɛzɩ wɛʋ kpɩzɩŋ na. (Ejl 9:16; 11:10; 12:29-39) Ejipiti mba kaanɩ pɩ-taa se pɩtɩkɛ kɩwɛɛkɩm nabʋyʋ palabɩ pɛ-ɛsɔnaa nɛ kʋñɔmɩŋ ɛnɩ ɩtalɩɣ-wɛ mbʋ, ɛlɛ Yehowa kaawɛna nɛ ɛhɔŋ pɛ-ɛsɔnaa nɩŋgbaaŋ. Alɩwaatʋ ndʋ tɩ-taa lɛ, Moyizi ɖɔɖɔ “kaakɛ abalʋ sɔsɔ pɩŋŋ Ejipiti tɛtʋ taa Farawɔɔ lɩmɖʋyaa nɛ samaɣ kpeekpe pɛ-ɛsɩndaa.”—Ejl 11:3.
Ðɩñɩnɩ fezuu taa ñɩm
(Ejl 6:3) Weyi ma mawɩlɩ man-tɩ Abraham, Izaakɩ nɛ Yakɔɔb se mɛnkɛ Ɛsɔ Ðoŋ Tɩŋa Tʋ yɔ; ɛlɛ mentiheyi-wɛ se ma-hɩɖɛ lɛ Kɩbaɣlʋ.
it-2 1091 § 4,5
Ðoŋ Tɩŋa Tʋ
Yehowa lakaɣ tamaɣ Abraham se ɛkaɣ lʋlʋʋ Izaakɩ lɛ, ɛlabɩnɩ tʋmɩyɛ hɩɖɛ kɩsɛsɛyɛ Ðoŋ Tɩŋa Tʋ (ʼEl Shad·daiʹ), pɩɩpɔzaa se Abraham ɛwɛɛnɩ tisuu se Yehowa wɛnɩ ɖoŋ se eyele nɛ tamaɣ ŋga kala. Yehowa tasɩ labɩnʋʋ tʋmɩyɛ hɩɖɛ kɩsɛsɛyɛ nɖɩ alɩwaatʋ ndʋ ɛyɔɔdaa se ɛkaɣ wazʋʋ Izaakɩ nɛ Yakɔɔb ɛzɩ ɛɖʋʋ ɛgbɛyɛ nɛ Abraham yɔ.—Kiɖe 17:1; 28:3; 35:11; 48:3.
Mbʋ yebina nɛ Yehowa heyi Moyizi pʋwayɩ se: “Mawɩlɩ man-tɩ Abraham, Izaakɩ nɛ Yakɔɔb se mɛnkɛ Ɛsɔ Ðoŋ Tɩŋa Tʋ [beʼElʹ Shad·daiʹ] . . .; ɛlɛ mentiheyi-wɛ se ma-hɩɖɛ lɛ [Yehowa].” (Ejl 6:3) Ɛlɛ pɩɩwɩlɩɣ se caanaʋ taa cajanaa mba pataatɩlɩ Yehowa hɩɖɛ, mbʋ pʋyɔɔ yɔ palakaɣnɩ-ɖɩ tʋmɩyɛ ɖoŋ ɖoŋ, nɛ mba paacaɣ wezuu pʋcɔ nɛ palʋlɩ-wɛ yɔ palabɩnɩ-ɖɩ tʋmɩyɛ ɖɔɖɔ. (Kiɖe 4:1, 26; 14:22; 27:27; 28:16) Toovenim taa lɛ, Kiɖe Tɛɛ Tɔm takayaɣ ŋga ka-taa pɔyɔɔdɩ caanaʋ taa cajanaa tɔm yɔ ka-taa, pama tɔm loyaɣ Ðoŋ Tɩŋa Tʋ tam 6 ɖeke, ŋgʋ pama Ɛsɔ hɩɖɛ Yehowa tam 172 kiɖe tɛɛ Ebree masɩ taa. Mbʋ caanaʋ taa cajanaa mba paanawa yɔ piyeba nɛ panɩɩ pɩ-taa se Ɛsɔ mʋnɩ toovenim se payaa-ɩ se “Ðoŋ Tɩŋa Tʋ,” ɛlɛ pataapɩzɩ nɛ panɩɩ Ɛsɔ hɩɖɛ Yehowa tɔbʋʋ kpayɩ kpayɩ. Pʋyɔɔ takayaɣ nakɛyɛ (The Illustrated Bible Dictionary Vol. 1, p. 572) yɔɔdaa se: “Natʋ tɔm ndʋ caanaʋ taa cajanaa nɩwa yɔ, pɩnzɩ sakɩyɛ wayɩ tɩkaɣ labʋ, pɩɩwɛɛ se pɛwɛnɩ tisuu se Ɛnʋ, Yahve, ɛkɛ Ɛsɔ (ʼel) weyi ɛwɛnɩ ɖoŋ se eyele nɛ tɩla yɔ (papɩzɩɣ palɩzɩ tɔm piye sadday tɔbʋʋ ɖɔɖɔ se ɖoŋ). Ɛzɩma ɛlɩzɩ ɛ-tɩ nɛ ɛwɩlɩ cɔkɔyɛ cɔlɔ yɔ, pɩlabɩ nɔɔ kʋɖʋmaɣ camɩyɛ nɛ ɛ-hɩɖɛ Yahve tɔbʋʋ nɩʋ. Pɩkɛ piti lakasɩ nzɩ sɩ-taa ɛlɩzɩ e-ɖoŋ nɛ ɛwɩlɩ nɛ ɛwɩlɩ ɖɔɖɔ Ɛsɔ weyi ɛkɛnaa yɔ.”—J. D. Douglas manɩ-kɛ, 1980.
(Ejipiti Lɩʋ 7:1) Kɩbaɣlʋ tɔm Moyizi se: “Na, manpɩsɩɣ-ŋ Ɛsɔ Farawɔɔ cɔlɔ nɛ Aarɔɔnɩ, ña-ɖalʋ, kaɣ kɛʋ ña-nayʋ.
it-2 308 § 6
Moyizi
Paa Moyizi kaawɛ fɛyɛ yɔ, patɩmʋ tʋmɩyɛ ɛ-cɔlɔ. Moyizi wɩlaa se ɛwɛ fɛyɛ, nɛ ɛcaɣaɣ kizuu tʋmɩyɛ nɖɩ paɖʋ-ɩ yɔ lɛ, ɛtɔ se ɛnʋ ɛɛpɩzɩɣ yɔɔdʋʋ camɩyɛ. Pɩwɩlɩɣ se Moyizi lɛɣzaa. Ɛtɩtasɩ wɛʋ ɛzɩ ɛzɩma ɛɛwɛɛ pɩlakɩ pɩnzɩ 40, alɩwaatʋ ndʋ ɛ-maɣmaɣ ɛɛkpaɣ lɩmaɣzɩyɛ se ɛyakɩ Izrayɛɛlɩ piya ñʋʋ yɔ. Ewobi pɩ-yɔɔ nɛ eheyiɣ Yehowa se ɛɛpɩzɩɣ nɛ ɛla ɛ-tʋmɩyɛ nɛ halɩ ɛpɔzɩ Yehowa se ɛñɩnɩ nɔɔyʋ nɛ ɛlɛɣzɩ-ɩ. Paa piiyeba nɛ Ɛsɔ kɔ pana yɔ, ɛtaalɔ Moyizi, ɛlɛ ɛpɔzɩ ɛ-ɖalʋ Aarɔɔnɩ se ɛtɩŋɩ-ɩ nɛ ɛyɔɔdʋʋ e-lone taa. Ye mbʋ, ɛzɩma Moyizi kaawɛ Ɛsɔ lone taa yɔ pʋyɔɔ lɛ, ɛɛkɛ “Ɛsɔ” Aarɔɔnɩ weyi ɛyɔɔdaɣ e-lone taa yɔ. Kediɣzaɣ ŋga pa nɛ Izrayɛɛlɩ sɔsaa paalaba yɔ ka-taa, nɛ alɩwaatʋ ndʋ powobi Farawɔɔ ɛsɩndaa yɔ, Ɛsɔ heyaɣ tɔm Moyizi nɛ ɛlɛ ñɛɖɛzɩɣ-tʋ Aarɔɔnɩ se eheyi-tʋ Farawɔɔ (Farawɔɔ ɛnʋ ɛɛlɛɣzɩnɩ Farawɔɔ weyi ɛɛwɛ alɩwaatʋ ndʋ Moyizi kaawɛnɩ pɩnzɩ 40 nɛ ese yɔ e-lone taa). (Ejl 2:23; 4:10-17) Pʋwayɩ Yehowa ya Aarɔɔnɩ se Moyizi tɛ “nayʋ.” Moyizi kɛ Ɛsɔ tɛ nayʋ, pʋyɔɔ lɛ Ɛsɔ wɩlaɣnɩ-ɩ mbʋ ɛla nɛ tɔm ndʋ ɛyɔɔdɩ yɔ. Ye mbʋ, paya Aarɔɔnɩ se Moyizi nayʋ mbʋ pʋyɔɔ yɔ, Moyizi heyaɣni-i tɔm ndʋ ɛyɔɔdɩ yɔ. Pɩtasɩ lɛ, pɔtɔm se Moyizi kaawɛɛ “ɛzɩ Ɛsɔ yɔ Farawɔɔ cɔlɔ.” Nɛ pʋ-tɔbʋʋ lɛ se Ɛsɔ hanɩ Moyizi waɖɛ se ɛwɛɛnɩ ɖoŋ Farawɔɔ yɔɔ. Ye mbʋ, pɩfɛyɩ se sɔɔndʋ ɛkpa-ɩ nɛ Ejipiti wiyaʋ.—Ejl 7:1, 2.
Bibl kalʋʋ
(Ejipiti Lɩʋ 6:1-15) Nɛ Kɩbaɣlʋ tɔ Moyizi se: “Ŋkɔŋ naʋ mbʋ mankaɣ labʋ Farawɔɔ yɔ; nesi ɖoŋ ñɩnzɩ yɔɔ ɛkaɣ-wɛ yebu se pɛɖɛɛ nɛ nesi ɖoŋ ñɩnzɩ nzɩ sɩkaɣ-ɩ cɛyʋʋ se ɛɖɔɔnɩ-wɛ kɩɖɔɔnʋ nɛ palɩɩ ɛ-tɛtʋ taa.” 2 Ɛsɔ yaa Moyizi nɛ eheyi-i se: “Ma Kɩbaɣlʋ, 3 weyi ma mawɩlɩ man-tɩ Abraham, Izaakɩ nɛ Yakɔɔb se mɛnkɛ Ɛsɔ Ðoŋ Tɩŋa Tʋ yɔ; ɛlɛ mentiheyi-wɛ se ma-hɩɖɛ lɛ Kɩbaɣlʋ. 4 Nɛ ma nɛ wɛ ɖɩɖʋ ɛgbɛyɛ se mɛncɛlɩɣ-wɛ Kanaŋ tɛtʋ, tɛtʋ ndʋ pɔɖɔŋ tɩ-taa yɔ, ndʋ tɩ-taa pɛkɛ agɔma yɔ. 5 Manɩ Izrayɛɛlɩ piya mɔla, mbʋ yɔ Ejipiti mba wɩlɩɣ-sɩ kʋñɔŋ nɛ mɔntɔzɩ mɛ-ɛgbɛyɛ yɔɔ. 6 Mbʋ lɛ heyi Izrayɛɛlɩ piya se: ‘Ma Kɩbaɣlʋ, mankaɣ-mɩ lɩzʋʋ tʋma wena Ejipiti mba ɖʋʋ-mɩ yɔ, a-taa. Mankaɣ-mɩ holuu nɛ malɩzɩ yomiye nɖɩ pɔɖɔkɩ-mɩ ɖɩ-taa yɔ, ɖɩ-taa, nɛ mankaɣ mabʋ ɖoŋ nɛ mɔhɔ nɩŋgbaaŋ ɖoŋ pɩŋŋ nɛ moholi-mɩ. 7 Mankaɣ-mɩ mʋyʋsʋʋ nɛ ɩkɛ man-samaɣ nɛ mɛnkɛ mɩ-Ɛsɔ. Ðɩnɛ ɛlɛ ɩkaɣ ɖiɣzinuu se ma Kɩbaɣlʋ, mɛkɛnɩ mɩ-Ɛsɔ, malɩzɩɣnɩ-mɩ Ejipiti mba tʋma taa. 8 Pʋwayɩ lɛ, mankaɣ-mɩ sʋzʋʋ ɛjaɖɛ nɖɩ monɖuwaa se mɛncɛlɩɣ Abraham, Izaakɩ nɛ Yakɔɔb yɔ, nɛ mankaɣ-mɩ ɖɩ cɛlʋʋ se mɩtɩnɩ-ɖɩ. Ma Kɩbaɣlʋ!’” 9 Moyizi kɛdɩ tɔm kpeekpe Izrayɛɛlɩ piya, nɛ sikizi, sitiwelisi, mbʋ yɔ, pɩnɩ-sɩ nɛ tʋmɩyɛ ɖoŋ ñɩnɖɛ labʋ. 10 Kɩbaɣlʋ yɔɔdɩnɩ Moyizi nɛ eheyi-i se: 11 “Wolo nɛ ŋyɔɔdɩnɩ Ejipiti wiyaʋ Farawɔɔ se eyele Izrayɛɛlɩ piya lɩɩ ɛ-tɛtʋ taa.” 12 Moyizi cosi Kɩbaɣlʋ ɛsɩndaa nɛ ɛyɔɔdɩ se: “Izrayɛɛlɩ piya tiwelisini-m yɔ, ɛzɩma Farawɔɔ kaɣ-m welisinuu, ma weyi yɔɔdʋʋ caɣ-m kaɖɛ yɔ!” 13 Kɩbaɣlʋ yɔɔdɩnɩ Moyizi nɛ Aarɔɔnɩ se powolo pana Ejipiti wiyaʋ Farawɔɔ nɛ palɩzɩ Izrayɛɛlɩ piya Ejipiti. 14 Pɔ-hɔŋ taa sɔsaa kɔyɔ: Izrayɛɛlɩ pɩyalʋ kɔɔnɔɔ tʋ Rubɛɛnɩ piya: Enɔɔkɩ nɛ Paluu, Ɛsɩrɔɔnɩ nɛ Karɩmii: Rubɛɛnɩ cejewiye kɛlɛ. 15 Siimeyɔɔ piya: Yemuwɛɛlɩ, Yamiini, Ohaadɩ, Yakiini nɛ Zohaarɩ nɛ Sawuuli, halʋ Kanaŋ tʋ piya: Siimeyɔɔ cejewiye kɛlɛ.
13-19 JUILLET
ÑƖM MBƲ PƖWƐ ƐSƆTƆM TAA YƆ | EJIPITI LƖƲ 8-9
“Paa cajayɛ tʋ Farawɔɔ ɛtaasɔɔlɩ yɔ, eyeba nɛ Yehowa tamaɣ la”
(Ejipiti Lɩʋ 8:15) Alɩwaatʋ ndʋ Farawɔɔ nawa se kʋñɔŋ ŋgʋ kɩtɛma lɛ, ɛla laŋɩyɛ ɖoŋ nɛ ekizi se eewelisiɣni-wɛ, ɛzɩ Yehowa kaayɔɔdʋʋ ɖeyi ɖeyi yɔ.
it-2 431 § 2
Laŋkpɩzɩyɛ
Yehowa Ɛsɔ ɖʋʋ suuɖu nɛ ɛhaɣ waɖɛ ɛyaa se powolo pɩ-yɔɔ nɛ pacaɣ wezuu paa paamʋnɩ sɩm yɔ. Mbʋ ɖɔɖɔ nabʋyʋ taa ɛɛɖɩzɩɣ ajɛɛ wena a-taa ñɩma mʋnɩ sɩm yɔ kpaagbaa. (Kiɖe 15:16; 2 Pɩy 3:9) Nabɛyɛ yeki nɛ waɖɛ nɖɩ ɖɩwazɩɣ-wɛ, mbʋ pʋyɔɔ yɔ palakɩ lɛɣzɩtʋ se pɩsa nɛ Yehowa na pa-pʋtɔdɩyɛ (Yoz 2:8-14; 6:22, 23; 9:3-15), ɛlɛ lalaa ñalakɩ laŋkpɩzɩyɛ nɛ pɛtɛzɩɣ kaɖɩnʋʋ Yehowa nɛ ɛ-samaɣ. (Wp 2:30-33; Yoz 11:19, 20) Yehowa ɛɛɖaŋɩɣ nɔɔyʋ se ɛla laŋkpɩzɩyɛ, pʋyɔɔ Bibl tɔŋ se ɛɖʋʋ ɛyaa ‘taa laŋkpɩzɩyɛ’ yaa ɛlakɩ “nɛ pa-laŋa sʋʋ kpɩzɩŋ.” Alɩwaatʋ ndʋ ɛ-pana kpaɣ yɔ, ɛlakɩ mbʋ yɔ, piyeki nɛ laŋkpɩzɩyɛ tɩnaa mba patɩlɩ ɛ-hɩɖɛ nɛ pana ɖɔɖɔ ɖoŋ sɔsɔŋ weyi ɛwɛna yɔ. Kpaɣ-tʋ nɛ ŋmaɣzɩnɩ Ejl 4:21; Yoh 12:40; Rom 9:14-18.
(Ejipiti Lɩʋ 8:14, 15) Ahela maɣzɩ ɖɔɖɔ se alɩzɩ pɔtʋ, ɛlɛ falaa. Pɔtʋ ñasɩɣ kpɩna nɛ ɛyaa; 15 Nɛ ahela heyi Farawɔɔ se: “Pɩkɛ Ɛsɔ niye.” Farawɔɔ la laŋkpɩzɩyɛ nɛ etikemsini-wɛ, ɛzɩ Kɩbaɣlʋ kaatɔm yɔ.
(Ejipiti Lɩʋ 9:15-17) Ye ɖooo yɔ maasezi nesi nɛ mama ña nɛ ña-samaɣ nɛ kʋdɔŋ kɩdɛkɛdʋʋ kɔyɔ, ŋŋmʋʋ tataa. 16 Ɛlɛ mɛnfɛ-ŋ se mawɩlɩ mon-ɖoŋ ña-taa, nɛ ma-hɩɖɛ sɛɛ tɛtʋ kpeekpe yɔɔ. 17 Pɩlabɩ we nɛ ŋɖɔkʋʋ man-samaɣ nɛ ŋtɩsɔɔlɩ ke-yebu?
it-2 240 § 4-6
Kɩdɛkɛdɩm
Pɩtasɩ lɛ, Yehowa pɩzɩɣ ɛtɩŋnɩ nʋmɔʋ nakʋyʋ yɔɔ nɛ eyele nɛ kɩdɛkɛdaa ɖʋ nesi nɛ ɛ-tamaɣ la. Paa pakaɖɩɣnɩ Ɛsɔ yɔ, ɛpɩzɩɣ nɛ ɛɖɩɣ-wɛ nʋmɔʋ nɛ pɩsa nɛ ɛ-samaɣ pɩzɩ kɔɖɔkɩ ka-cɩŋgɩlɩm wɛtʋ, halɩ ɛpɩzɩɣ etuyi kɩdɛkɛdɩm laɖaa mba nɛ pala mbʋ piyeki nɛ paa weyi ɛna kaɣlaa se ɛkɛ Ɛsɔ weyi ɛwɛ siɣsiɣ yɔ. (Rom 3:3-5, 23-26; 8:35-39; Keɣa 75:10) Pɔyɔɔdɩ pɩ-tɔm Aduwa 16:4 taa: “Kɩbaɣlʋ lɩzɩ pɩtɩŋa se pɩwɛnɩ wazaɣ, kañatʋ tʋ wɛna ɖɔɖɔ kɩyakʋ kɩdɛkɛdʋʋ.”
Kɩɖaʋ nakʋyʋ lɛ Farawɔɔ weyi Yehowa kaatɩŋnɩ Moyizi nɛ Aarɔɔnɩ pɔ-yɔɔ nɛ eheyi-i se ɛlɩzɩ Izrayɛɛlɩ piya yomiye taa yɔ. Pɩtɩkɛ Ɛsɔ yebina nɛ Ejipiti wiyaʋ ɛnʋ ɛkɛ kɩdɛkɛdʋʋ, ɛlɛ eyebi-i se ewolo pɩ-yɔɔ nɛ ɛcaɣ wezuu nɛ ɛtɩŋnɩ nʋmɔŋ nɩɩyɩ yɔɔ nɛ eyele nɛ Farawɔɔ maɣmaɣ wɩlɩ se ɛkɛ kɩdɛkɛdʋʋ nɛ ɛmʋnɩ sɩm. Kaɖʋwa ŋga kɔ-yɔɔ Yehowa labɩ mbʋ yɔ, pɔyɔɔdɩ kɔ-tɔm Ejipiti Lɩʋ 9:16 taa: “Ɛlɛ mɛnfɛ-ŋ se mawɩlɩ mon-ɖoŋ ña-taa, nɛ ma-hɩɖɛ sɛɛ tɛtʋ kpeekpe yɔɔ.”
Yehowa lɩzɩ e-ɖoŋ weyi ɩ-wayɩ fɛyɩ yɔ nɛ ɛwɩlɩ kaɣlaa alɩwaatʋ ndʋ ɛkɔnɩ kɩjɩkpɩŋ hiu Ejipiti mba yɔɔ, nɛ kɔzɩ kɔzɩ alɩwaatʋ ndʋ ɛɖɩzɩ Farawɔɔ nɛ ɛ-sɔɔjanaa Teŋgu Kɩsɛɛmʋʋ taa yɔ. (Ejl 7:14–12:30; Keɣsi 77:43-51; 135:15) Pɩnzɩ sakɩyɛ nzɩ sɩtɩŋ pʋwayɩ yɔ sɩ-taa, ajɛɛ wena aacɔ Ejipiti ɛjaɖɛ nɛ ata yɔ, aawɛɛ nɛ ayɔɔdʋʋ mbʋ Yehowa laba yɔ pɩ-tɔm, nɛ piyeba nɛ Yehowa hɩɖɛ sɛɛ nɛ patɩlɩ-ɖɩ tɛtʋ kpeekpe yɔɔ. (Yoz 2:10, 11; 1Sam 4:8) Ye Yehowa ɛɛɖɩzɩ Farawɔɔ kpaagbaa yɔ, ɛtaapɩzɩ nɛ ɛlɩzɩ e-ɖoŋ nɛ ɛwɩlɩ nɛ paa weyi ɛna-ɩ kaɣlaa alɩwaatʋ ndʋ ɛyakaɣ ɛ-samaɣ ñʋʋ yɔ.
Ðɩñɩnɩ fezuu taa ñɩm
(Ejipiti Lɩʋ 8:17) Ye ŋŋyeki man-samaɣ se kɛɖɛɛ kɔyɔ, mɔnkɔŋ tiyinuu fɛɛkɔjɔsɩ ñɔ-yɔɔ, ña-kpalɩsɩyaa yɔɔ, ñɛ-ɛyaa yɔɔ nɛ ña-ɖɩsɩ yɔɔ. Sɩkɔŋ sɔɔtʋʋ Ejipiti mba ɖɩsɩ taa, pɩkpɛndɩnɩ tɛtʋ ndʋ pacaɣ tɩ-yɔɔ yɔ.
it-2 1039
Fɛɛkɔjɔsɩ
Kɩjɩkpʋʋ naanza ñɩŋgʋ ŋgʋ kɩkɔm Ejipiti mba yɔɔ yɔ, ŋgʋ kɛnɩnɩ kajalaɣ ñɩŋgʋ ŋgʋ kititukuni Izrayɛɛlɩ piya nzɩ sɩɩwɛ Gosɛɛnɩ egeetiye taa yɔ; nɛ ŋgʋ lɛ fɛɛkɔjɔsɩ. Ebree tɔm piye nɖɩ pɛɖɛzɩ mbʋ yɔ, palakɩnɩ-ɖɩ tʋmɩyɛ alɩwaatʋ ndʋ pɔyɔɔdʋʋ kɔjɔsɩ ndɩ ndɩ tɔm yɔ. (Ejl 8:21, 22, 24, 29, 31; Keɣsi 77:45; 104:31) Pɛɖɛzɩ tɔm piye ʽA·rovʹ se “fɛɛkɔjɔsɩ” (JB, NW, Ro), “pɔtʋ” (AS, KJ, RS), “kɔjɔsɩ” (AT), nɛ “hasɩ yɔɔ kɔjɔsɩ” (LXX).
Kabɩyɛ tɔm piye “fɛɛkɔjɔsɩ” wɩlɩɣ kɔjɔsɩ sɔsɔsɩ nasɩyɩ nzɩ sɩwɛ tindima ndɩ ndɩ taa yɔ. Fɛɛkɔjɔsɩ halɩñɩnzɩ cakɩ kpɩna nɛ ɛyaa tomnasɩ yɔɔ nɛ sɩñɔʋ pa-calɩm. Fɛɛkɔjɔsɩ nzɩ sɩpɩzɩɣ sɩɖɛzɩ kʋdɔmɩŋ nɩɩyɩ kpɩna nɛ ɛyaa. Ye mbʋ fɛɛkɔjɔsɩ kɩjɩkpʋʋ ŋgʋ kiyeba nɛ Ejipiti mba nɛ pa-kpɩna panɩɩ siziŋ nɛ halɩ pa-taa nabɛyɛ sɩ.
(Ejipiti Lɩʋ 8:21-23) Nɛ Farawɔɔ yaa Moyizi nɛ Aarɔɔnɩ nɛ eheyi-wɛ se: “Iwolo ɩlaa mɩ-Ɛsɔ kɩlaʋ cɩnɛ tɛtʋ taa.” 22 Nɛ Moyizi cuuzi se: “Pɩɩpɩzɩɣ pɩla mbʋ: Ðɩlaɣ Kɩbaɣlʋ ɖɛ-Ɛsɔ kpɩna wena Ejipiti mba maɣzɩɣ se a-kʋʋ kɛ kɩwɛɛkɩm yɔ; ye ɖɩkʋʋ kpɩna wena Ejipiti mba luŋuu a-tɛɛ yɔ, pɛ-ɛsɩndaa kɔyɔ, paɖakɩ-ɖʋ pɛɛ. 23 Pɩwɛɛ se ɖɩɖɔ nʋmɔʋ kɩyakɩŋ naadozo nɛ ɖiwolo lakʋ taa nɛ ɖɩlaa Kɩbaɣlʋ ɖɛ-Ɛsɔ kɩlaʋ, ɛzɩ ɛpɔzʋʋ-ɖʋ yɔ.”
w04 15/3 25 § 9
Ejipiti Lɩʋ takayaɣ taa lɩmaɣza sɔsɔna
8:22, 23—Ɛbɛ yɔɔ Moyizi yɔɔdaa se kpɩna wena Izrayɛɛlɩ piya kaɣ kpaɣʋ se palaa kɩlaŋ yɔ, “a-kʋʋ kɛ kɩwɛɛkɩm” Ejipiti mba ɛsɩndaa? Ejipiti mba sɛɣaɣ kpɩna ndɩ ndɩ sakɩyɛ. Ye mbʋ Moyizi yɔɔdʋʋ se Izrayɛɛlɩ piya caɣ laʋ kɩlaŋ Yehowa yɔ, pɩpɩzaɣ se pituyi Farawɔɔ nɛ eyebi-sɩ nɛ siwolo nɛ sɩlaa kɩlaŋ ɛnɩ ɖooo poliŋ.
Bibl kalʋʋ
(Ejipiti lɩʋ 7:26–8:15) Kɩbaɣlʋ tɔ ɖɔɖɔ Moyizi se: “Sʋʋ Farawɔɔ cɔlɔ nɛ ŋheyi-i se: Kɩbaɣlʋ tɔŋ se: Yele man-samaɣ nɛ kala-m kɩlaʋ. 27 Ye ŋkizaa se ŋŋyeki-kɛ yɔ, mankaɣ mabʋ ñɛ-tɛtʋ kamasɩ kpeekpe nɛ sayɛɛ. 28 Sayɛɛ kaɣ huuu pɔɔ taa. Akaɣ lɩʋ nɛ asʋʋ ñe-kewiyaɣ ɖɩɣa taa, ña-ɖɩzʋyɛ, ña-ɖɩhɩnɩyɛ ña-lɩmɖʋyaa tɛ, ñɛ-ɛyaa cɔlɔ, ña-mɩzasɩ taa, ña-tʋŋ ɖɩzʋyɛ. 29 Sayɛɛ kaɣ kpaʋ ña-maɣmaɣ ñɔ-yɔɔ, ña-kpalɩsɩyaa yɔɔ nɛ ñɛ-ɛyaa kpeekpe yɔɔ. 8:1 Kɩbaɣlʋ heyi Moyizi se: Tɔ Aarɔɔnɩ se: “Sezi ñe-nesi nɛ ŋma ɖaʋ pɔsɩ yɔɔ, hɛɛnaa yɔɔ, lemisi yɔɔ nɛ ŋkɔnɩ sayɛɛ Ejipiti tɛtʋ taa.” 2 Aarɔɔnɩ sezi nesi Ejipiti lɩm yɔɔ, nɛ sayɛɛ lɩɩ nɛ awadɩ Ejipiti tɛtʋ yɔɔ. 3 Ahela la ɖɔɖɔ mbʋ nɛ pe-heluu nɛ palɩzɩ sayɛɛ Ejipiti tɛtʋ taa. 4 Farawɔɔ yaa Moyizi nɛ Aarɔɔnɩ nɛ eheyi-wɛ se: “Ɩtɩmnɩ Kɩbaɣlʋ se ɛɖɛnɩ sayɛɛ mɔ-yɔɔ nɛ man-samaɣ yɔɔ, nɛ meyele samaɣ nɛ kalaa Kɩbaɣlʋ kɩlaʋ.” 5 Moyizi cosi Farawɔɔ se: “Ðʋ-m alɩwaatʋ ndʋ maatɩmɩ ñɔ-yɔɔ, nɛ ña-kpalɩsɩyaa yɔɔ, nɛ ña-samaɣ yɔɔ, nɛ sayɛɛ ɖɛɛ ñɔ-yɔɔ nɛ ña-ɖɩɣa yɔɔ, nɛ atii acaɣ pɔɔ taa yeke yɔ.” 6 Ecosi se: “Cee.” Ɛlɛ kitini-i se: “Malakɩ ñɔ-tɔm yɔɔ, nɛ ŋtɩlɩ se nɔɔyʋ fɛyɩ ɛzɩ ɖa-Kɩbaɣlʋ Ɛsɔ yɔ. 7 Nɛ sayɛɛ kaɣ ɖɛʋ ñɔ-yɔɔ nɛ ña-ɖɩɣa yɔɔ, nɛ ña-kpalɩsɩyaa yɔɔ, nɛ ña-samaɣ yɔɔ, akaɣ tibu nɛ acaɣ pɔɔ taa yeke.” 8 Moyizi nɛ Aarɔɔnɩ palɩɩ pɛɖɛɛ Farawɔɔ yɔɔ; nɛ Moyizi ma kubuka nɛ Kɩbaɣlʋ cɔlɔ kiŋ, sayɛɛ wena ɛwɩlɩnɩ kʋñɔŋ Farawɔɔ yɔ, a-tɔm. 9 Kɩbaɣlʋ welisi Moyizi adɩma, nɛ sayɛɛ sɩ ɖɩsɩ taa, tasɩ yɔɔ nɛ hayɩm taa; 10 pokuu-yɛ pakpazɩ huwa nɛ a-sɔŋ ñɛyɩnɩ ɛjaɖɛ. 11 Farawɔɔ nawa se tɛtʋ hɛzaa lɛ, ɛla laŋkpɩzɩyɛ, etiwelisini-wɛ, ɛzɩ Kɩbaɣlʋ kaayɔɔdʋʋ yɔ. 12 Nɛ Kɩbaɣlʋ heyi Moyizi se: “Tɔ Aarɔɔnɩ se: Sezi ña-ɖaʋ nɛ ŋma mʋzʋʋ nɛ pɔtʋ lɩɩ Ejipiti tɛtʋ kpeekpe yɔɔ.” 13 Pala ɖɔɖɔ mbʋ; nɛ Aarɔɔnɩ sezi e-nesi, ɛɖɔkɩ ɖaʋ, nɛ ɛma tataa mʋzʋʋ. Nɛ pɔtʋ lɩɩ ɛyaa nɛ kpɩna pɔ-yɔɔ; tataa mʋzʋʋ kpeekpe pɩsɩ pɔtʋ Ejipiti tɛtʋ kpeekpe taa. 14 Ahela maɣzɩ ɖɔɖɔ se alɩzɩ pɔtʋ, ɛlɛ falaa. Pɔtʋ ñasɩɣ kpɩna nɛ ɛyaa; 15 Nɛ ahela heyi Farawɔɔ se: “Pɩkɛ Ɛsɔ niye.” Farawɔɔ la laŋkpɩzɩyɛ nɛ etikemsini-wɛ, ɛzɩ Kɩbaɣlʋ kaatɔm yɔ.
20-26 JUILLET
ÑƖM MBƲ PƖWƐ ƐSƆTƆM TAA YƆ | EJIPITI LƖƲ 10-11
“Moyizi nɛ Aarɔɔnɩ pawɩlaa se pɛwɛnɩ abalɩtʋ siŋŋ”
(Ejipiti Lɩʋ 10:3-6) Moyizi nɛ Aarɔɔnɩ powolo pana Farawɔɔ nɛ peheyi-i se: “Ebree mba tɛ Kɩbaɣlʋ Ɛsɔ se: Ŋkiziɣ ña-tɩ luzuu mɛn-tɛɛ pɩkɔɔ pɩsɩɩnɩ ɖooye? Yele man-samaɣ nɛ kelizi-m kilizaɣ. 4 Ye ŋlʋkɩ nɛ ŋŋyeki-kɛ yɔ, cee maɣmaɣ mɔnkɔŋnɩ kudoloŋ ñɛ-tɛtʋ taa, 5 Nɛ kɩwadɩ ñɛ-tɛtʋ yɔɔ, pɩfɛyɩ naʋ. Kɩkaɣ tɔɔʋ mbʋ mbʋ pɩkazaa yɔ, mbʋ ɖɔmbɛɛ yeba yɔ; kɩkaɣ tɔɔʋ mɩ-tɩŋ kpeekpe, weyi iɖiɣni paɣlʋʋ hayɩm taa yɔ. 6 Kɩkaɣ suu nɛ ña-ɖɩsɩ, nɛ ña-kpalɩsɩyaa ɖɩzʋyɛ nɛ Ejipiti mba kpeekpe ɖɩsɩ. Ñɔ-cɔzɔnaa nɛ paba cɔzɔnaa tɩna mbʋ kaaʋ, ɖooo pɛwɛʋ ɛjaɖɛ ɖɩnɛ yɔ ɖɩ-taa yɔ.” Nɛ Moyizi ha siɣye nɛ ɛlɩɩ Farawɔɔ tɛ.
w09 15/7 20 § 6
Maɣzɩnɩ Yesu—Susi tɔm nɛ abalɩtʋ
6 Maɣzɩ ɖɔɖɔ kpekpeka ŋga pɩɩpɔzɩ Moyizi se ɛyɔɔdɩnɩ Farawɔɔ, wiyaʋ weyi ɛyaa maɣzaɣ se ɛtɩkɛ ɛsɔnaa lone taa caɣyʋ yem, ɛlɛ ɛ-maɣmaɣ ɛkɛ ɖɔɖɔ ɛsɔ nɛ wɩsɩ ɛsɔ Ra pɩyalʋ yɔ. Pɩtɩla yɔ ɛzɩ Farawɔɔwaa lalaa yɔ, ɛsɛɣaɣ ɛ-maɣmaɣ ɛ-sɩʋ kpelaɣ. Tɔm ndʋ payɩ tɩlɩɣaɣnɩ Farawɔɔ nɔɔ taa yɔ tɩɩkɛ paɣtʋ. Ɛɛwɛnɩ ɖoŋ, ɛɛwɛ cajayɛ nɛ ñʋʋ taa ɖoŋ nɛ pʋyɔɔ lɛ, ɛtaasɔɔlɩ se nɔɔyʋ eheyi-i mbʋ ɛla yɔ. Nɛ cajayɛ tʋ ɛnʋ, ɛ-ɛsɩndaa pɩɩwɛɛ se Moyizi weyi ɛkɛ ninɖiɣyu nɛ ɛwɛɛ hɛɛɛ yɔ, ewolo tam sakɩyɛ, ŋgʋ ɛlɛ taaya-ɩ nɛ ɛtaasɔɔlɩ ɖɔɖɔ se ɛna-ɩ. Nɛ ndʋ Moyizi woba nɛ eheyi-i? Kɩjɩkpɩŋ sɔsɔŋ tɔm. Nɛ ɛbɛ ɛpɔzaɣ? Se paha Farawɔɔ yomaa miiliyɔɔwaa sakɩyɛ waɖɛ nɛ palɩɩ Ejipiti ɛjaɖɛ taa. Pɩtʋʋ fɛyɩ se pɩɩpɔzɩ Moyizi abalɩtʋ kpem.—Kɩg 12:3; Ebr 11:27.
(Ejipiti Lɩʋ 10:24-26) Farawɔɔ yaa Moyizi nɛ Aarɔɔnɩ nɛ eheyi-wɛ se: “Iwolo ɩlaa Kɩbaɣlʋ; ɛlɛ mɩ-kpɩna sɔsɔna nɛ cikpena pacakɩ cɩnɛ, mɩ nɛ mi-piya iwolo.” 25 Moyizi se: “Ña-maɣmaɣ pɩwɛɛ se ŋcɛlɩ-ɖʋ kɩlaʋ kpɩnɛ nɛ kɩlaʋ kpɩnɛ miŋ kɩñaɣzʋʋ nɛ ɖɩlaa Kɩbaɣlʋ ɖɛ-Ɛsɔ. 26 Ða-kpɩna ɖɔɖɔ tɩŋɩɣ-ɖʋ, nɛ paa kpɩnɛ kʋɖʋmɖɩyɛ ɛɛcakɩ cɩnɛ, mbʋ yɔ a-taa ɖɩkaɣ lɩzʋʋ se ɖilizini Kɩbaɣlʋ ɖɛ-Ɛsɔ kilizaɣ; nɛ ɖa-maɣmaɣ yɔ, nɛ ɖa-talʋʋ peeɖe, ɖɩɩkaɣ sɩm kilizaɣ ŋga ɖɩkɔŋ-ɩ lizuu yɔ.”
(Ejipiti Lɩʋ 10:28) Farawɔɔ tɔ Moyizi se: “Lɩɩ cɩnɛ! Ðaŋ ña-tɩ! Taatasɩ kɔm mɛ-ɛsɩndaa kaaʋ, mbʋ yɔ kɩyakʋ ŋgʋ ŋkɔŋ yɔ, pɩkɛɣ ña-sɩm!”
(Ejipiti Lɩʋ 11:4-8) Nɛ Moyizi tɔ se: “Kɩbaɣlʋ se: Ðoo hɛkʋ taa mankaɣ tibu Ejipiti ɛjaɖɛ taa; 5 nɛ paa kɔɔnɔɔ pɩɣa ŋga lɛ, kakaɣ sɩbʋ Ejipiti mba tɛtʋ taa, kpaɣnɩ Farawɔɔ pɩɣa ŋga kakaɣ caɣʋ e-kpelaɣ yɔɔ yɔ, nɛ pɩkpɛndɩnɩ lɩmɖʋyʋ weyi ɛnaŋɩɣ namɩyɛ yɔɔ yɔ ɛ-kɔɔnɔɔ pɩɣa, nɛ piwolo pɩtalɩ kpɩna kɔɔnɔɔ piya kpeekpe. 6 Ðɩnɛ ɛlɛ pakaɣ wiu wɔɔɔ Ejipiti ɛjaɖɛ kpeekpe taa witu ndʋ wiɖiyi patɩnɩta yɔ nɛ paakaɣ-tʋ tasʋʋ nɩʋ wiɖiyi kaaʋ yɔ. 7 Piyele nɛ Izrayɛɛlɩ piya kpeekpe tɛ yɔ, haɣ nakɛyɛ ɛɛkaɣ nɔɔyʋ kpezuu, ɛyʋ yaa kpɩnɛ. Ŋkaɣ ɖiɣzinuu se Kɩbaɣlʋ tʋkʋʋ Izrayɛɛlɩ nɛ Ejipiti pɛ-hɛkʋ taa. 8 Ðɩnɛ ɛlɛ ña-kpalɩsɩyaa panɛ yɔ pe-kpeekpe pakaɣ kɔm nɛ pana-m nɛ poluŋ mɛn-tɛɛ mbʋ yɔ se: ‘Wolo ŋɖɛɛ, ña nɛ samaɣ ŋga katɩŋɩɣ-ŋ yɔ!’ Pʋwayɩ lɛ mɛnɖɛɣ.” Nɛ Moyizi lɩɩ Farawɔɔ tɛ nɛ pana.
it-2 309 § 6
Moyizi
Pɩpɔzʋʋ tisuu nɛ abalɩtʋ pʋcɔ nɛ ɛyʋ pɩzɩ nɛ ɛyɔɔdɩnɩ Farawɔɔ. Yehowa ɖoŋ taa nɛ e-fezuu kiɖeɖeu yɔɔ Moyizi nɛ Aarɔɔnɩ papɩzaa nɛ pala tʋmɩyɛ nɖɩ ɛɖʋ-wɛ yɔ. Maɣzɩ nɛ ŋna ɛzɩma Farawɔɔ weyi ɛkɛ wiyaʋ ɖoŋ tʋ alɩwaatʋ ndʋ tɩ-taa yɔ, e-kewiyaɣ ɖɩɣa taa kaawɛɛ yɔ. Cajayɛ tʋ Farawɔɔ weyi pamaɣzaɣ se ɛkɛ ɛsɔ yɔ, nɛ ɛwɛnɩ ɖoŋ weyi nɔɔyʋ fɛyɩnɩ tɛtʋ yɔɔ yɔ, ɛwɛ e-kewiyaɣ ɖɩɣa taa nɛ ɛ-lɔŋ tasɩyaa, ɛ-sɔɔjanaa ñʋndɩnaa, ɛ-yɔɔ kandɩyaa nɛ e-yomaa pɔcɔɔ-ɩ nɛ pata. Pɩtasɩ lɛ pɛ-Ɛsɔ sɛtʋ ñʋndɩnaa nɛ maajiki laɖaa paawɛ peeɖe nɛ pakaɖɩɣnɩ Moyizi. Abalaa panɛ paacɔ Farawɔɔ, pe-wiyaʋ ɖoŋ tʋ nɛ pata. Ɛyaa panɛ pa-tɩŋa payɩ paawɛ Farawɔɔ nɛ Ejipiti ɛsɔnaa wayɩ alɩwaatʋ ndʋ Moyizi nɛ Aarɔɔnɩ powobi ɛlɛ ɛsɩndaa tam sakɩyɛ yɔ, ɛlɛ Farawɔɔ laŋɩyɛ wɛɛ nɛ pɩkpaɣ ɖoŋ kpaʋ yɔɔ mbʋ pʋyɔɔ yɔ ɛɛtɛm ɛ-taa se eeyeki Ebree mba, mba pɛkɛ e-yomaa kpekpeka tɩnaa yɔ nɛ pɛɖɛɛ. Toovenim taa lɛ, pɔɖɔɔnɩ Moyizi nɛ Aarɔɔnɩ Farawɔɔ ɛsɩndaa alɩwaatʋ ndʋ pɔyɔɔdɩ kɩjɩkpʋʋ lutozo ñɩŋgʋ tɔm yɔ. Nɛ kɩjɩkpʋʋ nakʋ ñɩŋgʋ kɔma lɛ, paɖʋ-wɛ paɣtʋ se ye patasɩ kɔm Farawɔɔ cɔlɔ yɔ pakʋʋ-wɛ.—Ejl 10:11, 28.
Ðɩñɩnɩ fezuu taa ñɩm
(Ejipiti Lɩʋ 10:1, 2) Nɛ Kɩbaɣlʋ tɔ Moyizi se: “Wolo ŋna Farawɔɔ: Maha ɛ nɛ ɛ-lɩmɖʋyaa laŋkpɩzɩyɛ se mawɩlɩ man-kawɩlɩsɩ nzɩ yɔ pɛ-hɛkʋ taa, 2 nɛ ŋŋkɛdɩ ñe-piya nɛ ña-sayɩnaa lɔŋ weyi mɛmɛɖɩnɩ Ejipiti mba nɛ mawɩlɩ-wɛ man-kawɩlɩsɩ yɔ, nɛ ɩɩtɩlɩ se mɛkɛnɩ Kɩbaɣlʋ.”
w95 1/9 11 § 11
Aseɣɖe Tɩnaa kaɖɩɣnɩ cɛtɩm ɛsɔnaa
11 Izrayɛɛlɩ piya kaawɛ Ejipiti lɛ, Yehowa tiyi Moyizi Farawɔɔ cɔlɔ nɛ eheyi-i se: “Wolo ŋna Farawɔɔ: Maha ɛ nɛ ɛ-lɩmɖʋyaa laŋkpɩzɩyɛ se mawɩlɩ man-kawɩlɩsɩ nzɩ yɔ pɛ-hɛkʋ taa, nɛ ŋŋkɛdɩ ñe-piya nɛ ña-sayɩnaa lɔŋ weyi mɛmɛɖɩnɩ Ejipiti mba nɛ mawɩlɩ-wɛ man-kawɩlɩsɩ yɔ, nɛ ɩɩtɩlɩ se mɛkɛnɩ Kɩbaɣlʋ.” (Ejipiti Lɩʋ 10:1, 2) Izrayɛɛlɩ piya nzɩ sɩñam Yehowa yɔ sɩkaɣ kɛdʋʋ si-piya Yehowa tʋma sɔsɔna tɔm. Nɛ si-piya ñɔkɔŋ-tʋ kɛdʋʋ sɩsɩ piya ɖɔɖɔ, nɛ mbʋ pɛwɛɣ labʋ yɔɔ pɩnzɩ nɛ pɩnzɩ. Piyeki nɛ pɛwɛɛ nɛ pɔtɔzʋʋ Yehowa tʋma sɔsɔna yɔɔ. Mbʋ ɖɔɖɔ lʋlɩyaa lakɩ ɖa-alɩwaatʋ taa. Pɛwɛnɩ sʋʋtʋ se palɩzɩ aseɣɖe pe-piya.—Wayɩ Wayɩ Paɣtʋ 6:4-7; Aduwa 22:6.
(Ejipiti Lɩʋ 11:7) Piyele nɛ Izrayɛɛlɩ piya kpeekpe tɛ yɔ, haɣ nakɛyɛ ɛɛkaɣ nɔɔyʋ kpezuu, ɛyʋ yaa kpɩnɛ. Ŋkaɣ ɖiɣzinuu se Kɩbaɣlʋ tʋkʋʋ Izrayɛɛlɩ nɛ Ejipiti pɛ-hɛkʋ taa.
it-1 849 § 5
Ejipiti Lɩʋ
Yehowa tɩŋnɩ piti lakasɩ yɔɔ nɛ eyele nɛ ɛ-hɩɖɛ sɛɛ nɛ ɛlɩzɩ ɖɔɖɔ Izrayɛɛlɩ piya yomiye taa. Palɩ cɩŋgɩlɩm Teŋgu Kɩsɛɛmʋʋ taa lɛ, Moyizi ɖɛɛ Izrayɛɛlɩ piya nɔɔ nɛ peteɣ hendu, e-neu Miriyam weyi ɛkɛ nayʋ halɩñɩnʋ yɔ, ɛkpaɣ suye cikpeɖe nɛ ɛɖɛɛ halaa nɔɔ nɛ papaɣ nɛ pocuuzuu abalaa hendu. (Ejl 15:1, 20, 21) Palɩ po-koyindinaa nesi tɛɛ caɣ caɣ. Izrayɛɛlɩ piya lɩnɩ Ejipiti lɛ, Yehowa tiyele se ɛyʋ nɔɔyʋ yaa kpɩnɛ naɖɩyɛ ɛlabɩ-wɛ kɩdɛkɛdɩm, halɩ haɣ nakɛyɛ tikpezi-wɛ. (Ejl 11:7) Paa Ejipiti Lɩʋ takayaɣ ɛtɩyɔɔdɩ se Farawɔɔ maɣmaɣ tɩŋ ɛ-sɔɔjanaa wayɩ nɛ petii teŋgu taa nɛ pasɩ peeɖe yɔ, Keɣa 135:15 ñɔyɔɔdaa se Yehowa ‘tuzi Farawɔɔ nɛ ɛ-tɛ yoyaa Teŋgu Kɩsɛɛmʋʋ taa.’
Bibl kalʋʋ
(Ejipiti Lɩʋ 10:1-15) Nɛ Kɩbaɣlʋ tɔ Moyizi se: “Wolo ŋna Farawɔɔ: Maha ɛ nɛ ɛ-lɩmɖʋyaa laŋkpɩzɩyɛ se mawɩlɩ man-kawɩlɩsɩ nzɩ yɔ pɛ-hɛkʋ taa, 2 nɛ ŋŋkɛdɩ ñe-piya nɛ ña-sayɩnaa lɔŋ weyi mɛmɛɖɩnɩ Ejipiti mba nɛ mawɩlɩ-wɛ man-kawɩlɩsɩ yɔ, nɛ ɩɩtɩlɩ se mɛkɛnɩ Kɩbaɣlʋ.” 3 Moyizi nɛ Aarɔɔnɩ powolo pana Farawɔɔ nɛ peheyi-i se: “Ebree mba tɛ Kɩbaɣlʋ Ɛsɔ se: Ŋkiziɣ ña-tɩ luzuu mɛn-tɛɛ pɩkɔɔ pɩsɩɩnɩ ɖooye? Yele man-samaɣ nɛ kelizi-m kilizaɣ. 4 Ye ŋlʋkɩ nɛ ŋŋyeki-kɛ yɔ, cee maɣmaɣ mɔnkɔŋnɩ kudoloŋ ñɛ-tɛtʋ taa, 5 Nɛ kɩwadɩ ñɛ-tɛtʋ yɔɔ, pɩfɛyɩ naʋ. Kɩkaɣ tɔɔʋ mbʋ mbʋ pɩkazaa yɔ, mbʋ ɖɔmbɛɛ yeba yɔ; kɩkaɣ tɔɔʋ mɩ-tɩŋ kpeekpe, weyi iɖiɣni paɣlʋʋ hayɩm taa yɔ. 6 Kɩkaɣ suu nɛ ña-ɖɩsɩ, nɛ ña-kpalɩsɩyaa ɖɩzʋyɛ nɛ Ejipiti mba kpeekpe ɖɩsɩ. Ñɔ-cɔzɔnaa nɛ paba cɔzɔnaa tɩna mbʋ kaaʋ, ɖooo pɛwɛʋ ɛjaɖɛ ɖɩnɛ yɔ ɖɩ-taa yɔ.” Nɛ Moyizi ha siɣye nɛ ɛlɩɩ Farawɔɔ tɛ. 7 Farawɔɔ kpalɩsɩyaa wiini pa-caa se: “Ðɩlakɩ kʋñɔŋ kʋnɛ yɔ pɩkɔɔ pɩsɩɩnɩ ɖooye? Yele ɛyaa mba yɔ nɛ pɛɖɛɛ pelizi pɛ-Ɛsɔ. Ŋtɩnɩtɩ pʋ-tɔbʋʋ se Ejipiti pɩsɩɣ njɛyɛ?” 8 Papɩsɩnɩ Moyizi nɛ Aarɔɔnɩ Farawɔɔ cɔlɔ nɛ ɛlɛ heyi-wɛ sɩ: “Ɩpɩzɩɣ iwolo ilizi kilizaɣ Kɩbaɣlʋ mɩ-Ɛsɔ! Ɛlɛ mba kɔŋ wobu?” 9 Moyizi cosi sɩ: “Ðɩkpɛndɩɣnɩ ɖe-evebiya nɛ ɖa-akpadɩyaa, ɖɩkpɛndɩɣnɩ ɖa-pɩyalaa nɛ ɖɛ-pɛlaa, ɖa-kpɩna cikpena nɛ sɔsɔna, mbʋ yɔ pɩkɛ-ɖʋ Kɩbaɣlʋ kazandʋ.” 10 Farawɔɔ kitina se: Kɩbaɣlʋ ɛsɩɩ-mɩ, meyeki se ɩɖɛɛ, mɩ nɛ mi-piya! Ɩna mɩ-lɩmaɣza kɛʋ kɩdɛkɛdɛɛ! 11 Nabʋyʋ fɛyɩ labʋ! Iwolo, mɩ abalaa, nɛ ilizi Kɩbaɣlʋ, mbʋ ɩpɔzʋʋ lɛ lɛ!” Nɛ peeɖe nɖɩ pɔɖɔnɩ-wɛ Farawɔɔ ɛsɩndaa. 12 Ɛlɛ Kɩbaɣlʋ tɔ Moyizi se: “Sezi ñe-nesi Ejipiti tɛtʋ yɔɔ nɛ kudoloŋ kɔɔ kɩwadɩ ɛ-tɛtʋ yɔɔ nɛ kɩtɔɔ ñɩtʋ kpeekpe nɛ mbʋ mbʋ ɖɔmbɛɛ yeba yɔ.” 13 Nɛ Moyizi sezi ɛ-ɖaʋ Ejipiti tɛtʋ yɔɔ nɛ Kɩbaɣlʋ helim lɩɩnɩ wɩsɩ ɖɩlɩyɛ nɛ pɩfɛtɩ ɖoo pilim.Tɛʋ fema lɛ wɩsɩ ɖɩlɩyɛ helim kɔnɩ kudoloŋ. 14 Kudoloŋ wadɩ Ejipiti tɛtʋ kpeekpe yɔɔ; kɩpazɩ kɩwadɩ Ejipiti tɛtʋ tɩŋa yɔɔ wadʋʋ nabʋyʋ, wiɖiyi patɩnatɩ mbʋ nɛ wiɖiyi paatasɩɣ mbʋ naʋ. 15 Kɩpɔ tataa nɛ tɛtʋ yɔɔ la cɩkpɛndʋʋ. Kɩtɔɔ tɛtʋ taa ñɩtʋ kpeekpe nɛ tɩŋ weyi ɖɔmbɛɛ kaafɛwa yɔ, i-pee kpeekpe. Pɩtɩkazɩ hayʋʋ nakʋyʋ tɩŋ yɔɔ yaa hayɩm taa ñɩtʋ natʋyʋ, Ejipiti kpeekpe taa.
27 JUILLET–2 AOÛT
ÑƖM MBƲ PƖWƐ ƐSƆTƆM TAA YƆ | EJIPITI LƖƲ 12
“Paska kazandʋ—Ɛbɛ tɩkpɛlɩkɩɣ Krɩstʋ mba?”
(Ejipiti Lɩʋ 12:5-7) Pɩkaɣ kɛʋ heɣa ŋga keɖe ka-tɩŋa yɔ, abalɩñɩŋga, kɛwɛnɩ pɩnaɣ kʋyʋmaɣ yɔ. Ɩɩkpaɣ heɣa yaa mbeɣa. 6 Ɩɩsɩɩ-kɛ piwolo pɩtalɩ fenaɣ kɩyakʋ hiu nɛ naanza ŋgʋ wiye. Izrayɛɛlɩ cejewe kpeekpe taa. Pakaɣ-kɛ kʋʋ ɖanaɣ wɩsɩ ɖʋʋ lɛ. 7 Paakpaɣ calɩm nɛ pataa nɔnɔsɩ yɔɔ ceemenje, hayo nɛ hadɛ, ɖɩsɩ nzɩ pakaɣ-kɛ tɔɔʋ yɔ sɩ-taa.
w07 1/1 20 § 4
“Taa leleŋ taa ŋwɛɣ”
4 Yesu sɩbɩ pɩnaɣ 33 tɛ Nisaŋ fenaɣ kɩyakʋ 14 ñɩŋgʋ wiye. Izrayɛɛlɩ ɛjaɖɛ taa lɛ, Nisaŋ kɩyakʋ 14 ñɩŋgʋ wiye palakɩ Paska kazandʋ ndʋ tɩkɛ taa leleŋ kazandʋ yɔ. Kɩyakʋ ŋgʋ ki-wiye paa hɔʋ ŋgʋ lɛ, kɩkʋʋ heɣa abalɩñɩŋga ŋga keɖe ka-tɩŋa nɛ kɛwɛnɩ pɩnaɣ kʋɖʋmaɣ yɔ. Pɩsɩɣnɩ Izrayɛɛlɩ piya se sɩtɔzɩ mbʋ pɩɩlabɩ pɩnaɣ 1513 P.P.Y. tɛ Nisaŋ kɩyakʋ 14 ñɩŋgʋ wiye yɔ, pɩ-yɔɔ. Puwiye sɩ-cɔzɔnaa kaata heɣa calɩm pɔ-pɔɔyɩŋ yɔɔ Ejipiti ɛjaɖɛ taa nɛ piyele nɛ Ɛsɔ tiyiyu tɩkʋ pa-kajalaɣ piya alɩwaatʋ ndʋ ɛkʋwaɣ Ejipiti mba kajalaɣ piya yɔ. (Ejipiti Lɩʋ 12:1-14) Paska heɣa kaasɩŋnɩ Yesu. Apostoloo Pɔɔlɩ yɔɔdɩ Yesu yɔɔ se: “Pala Krɩstʋ, ɖɛ-tɛ Paska.” (1 Kɔrɛntɩ mba 5:7) Ɛzɩ Paska heɣa calɩm yɔ, Yesu calɩm yeki se ɛyaa sakɩyɛ ihiɣ ñʋʋ yabʋ.—Yohanɛɛsɩ 3:16, 36.
(Ejipiti Lɩʋ 12:12, 13) “Ðoo ana a-taa mankaɣ tɛzʋʋ Ejipiti ɛjaɖɛ, mankaɣ mabʋ paa kɔɔnɔɔ pɩɣa ŋga lɛ, Ejipiti taa, kpaɣnɩ ɛyaa piwolo pɩtalɩ kpɩna. Mankaɣ hʋnʋʋ Ejipiti ɛsɔnaa kpeekpe: Mɛnkɛ Kɩbaɣlʋ. 13 Calɩm kaɣnɩ-mɩ kɛʋ kawɩlaɣ, ɖɩsɩ nzɩ ɩkaɣ sɩ-taa wɛʋ yɔ sɩ-yɔɔ. Manaɣ calɩm lɛ, mɛnɖɛɛ: ɩɩkaɣ naʋ kʋñɔŋ ŋgʋ mankaɣ wɩlʋʋ Ejipiti yɔ.”
it-2 485 § 7
Paska
Paska kazandʋ hɔɔlɩŋ nɩɩyɩ tukuuni Yesu. Hɔɔlɩŋ ɛnɩ ɩ-taa nakʋyʋ lɛ, ɛzɩma Izrayɛɛlɩ piya kaata calɩm sɩ-pɔɔyɩŋ yɔɔ se pɩsa nɛ tiyiyu ɛtaakʋ sɩ-kajalaɣ piya yɔ. Pɔɔlɩ yɔɔdaa se Krɩstʋ ñɩma patam numwaa kɛ ɛgbɛyɛ kajalaɣ piya (Ebr 12:23), nɛ Krɩstʋ yabɩnɩ pa-ñʋʋ pɩtɩŋnɩ ɛ-calɩm yɔɔ. (1Te 1:10; Efɛ 1:7) Pataapɛlɩ Paska heɣa mɔɔyɛ naɖɩyɛ. Paayɔɔdaa ɖɔɖɔ se paakaɣ pɛlʋʋ Yesu mɔɔyɛ naɖɩyɛ, nɛ tɔm ndʋ tɩlabɩ alɩwaatʋ ndʋ Yesu sɩba yɔ. (Keɣa 33:21; Yoh 19:36) Paɣtʋ taa wondu sakɩyɛ kaakɛ mbʋ pɩkɔŋaɣ labʋ “Ɛsɔ Heɣa” Yesu yɔɔ yɔ pɩ-kɩlɛmʋʋ. Nɛ wondu ndʋ tɩ-taa lɛɛtʋ lɛ, Paska kazandʋ ndʋ Yuuda ñɩma labɩ pɩnzɩ sakɩyɛ yɔ.—Ebr 10:1; Yoh 1:29.
(Ejipiti Lɩʋ 12:24-27) Ɩɖɔkɩ paɣtʋ tɔm ndʋ, ña nɛ ñe-piya tam. 25 Ɩsʋ tɛtʋ ndʋ Kɩbaɣlʋ ɖuwaa se ɛkaɣ-mɩ cɛlʋʋ yɔ, tɩ-taa lɛ, ɩɩɖɔkɩ sɔnzɩ nzɩ: 26 nɛ mi-piya ɩpɔzɩ-mɩ se: “Sɔnzɩ nzɩ lɛ mbʋ yɔ?” lɛ, 27 iicosi-sɩ se: “Pɩkɛ Paska kɩlaʋ se paɖʋ hɩɖɛ Kɩbaɣlʋ, weyi ɛɖɛ Izrayɛɛlɩ piya ɖɩsɩ nɔnɔsɩ taa, Ejipiti ɛjaɖɛ taa, ɛma Ejipiti nɛ ɛfɛɛ ɖa-ɖɩsɩ yɔ.” Ðɩnɛ ɛlɛ samaɣ luŋ nɛ kahɩnɩ.
w13 15/12 20 § 13-14
Ɩɩtɔzʋʋ kɩyakʋ ŋgʋ kɩ-yɔɔ
13 Pɩɩpɔzaa se paa caja weyi ɛlʋlʋʋ piya lɛ, ɛkpɛlɩkɩ-sɩ mbʋ pɩɩtalɩ sɩ-cɔzɔnaa nɛ pɩɖɛɛ yɔ pɩ-tɔm. Pɩsɩɣnɩ piya nɛ sɩna se Yehowa pɩzɩɣ nɛ ɛkandɩyɩ ɛ-sɛyaa yɔɔ. Piyeki nɛ piya na se Yehowa tɩkɛ Ɛsɔ nɔɔyʋ yem weyi ɛ-paa fɛyɩnɩ ɛyaa yɔ. Ɛlɛ ɛkɛ Ɛsɔ weyi ɛwɛɛ, nɛ ekeŋni ɛ-samaɣ nɛ ɛlakɩ mbʋ pɩwazɩɣ-kɛ yɔ. Ɛwɩlaa se ɛmaɣzɩɣ ɛ-samaɣ yɔɔ alɩwaatʋ ndʋ ‘ɛmabɩ Ejipiti’ nɛ ɛkandɩyɩ Izrayɛɛlɩ kajalaɣ piya yɔɔ yɔ. Ɛyabɩ Izrayɛɛlɩ kajalaɣ piya ñʋʋ.
14 Lʋlɩyaa mba pɛkɛ Krɩstʋ ñɩma yɔ, paakɛdɩɣ pe-piya Paska kazandʋ tɔm paa pɩnaɣ ŋga. Paa mbʋ yɔ, ŋñakɩ pana nɛ ŋsɩɣnɩ ñe-piya se sɩtɩlɩ se Yehowa kandɩyɩɣ ɛ-samaɣ yɔɔ? Ŋyeki nɛ sɩnaɣ se ña-taa tɛma se Yehowa kandɩyɩɣ ɛ-samaɣ yɔɔ sɔnɔ ɖɔɖɔ? (Keɣa 26:11; Izaayii 12:2) Ŋŋkpɛlɩkɩɣnɩ-sɩ lɛ, tɔm yem ŋkalɩɣ-sɩ takayɩsɩ taa yaa ña nɛ sɩ ɩlakɩ kɛdaɣ nɛ taa leleŋ sɛ pɩsa nɛ ŋtukuni sɩ-laŋa? La mbʋ payɩ ŋpɩzɩɣ yɔ nɛ ŋsɩnɩ nɔ-hɔʋ nɛ kɩkpa ɖoŋ fezuu taa.
Ðɩñɩnɩ fezuu taa ñɩm
(Ejipiti Lɩʋ 12:12) Ðoo ana a-taa mankaɣ tɛzʋʋ Ejipiti ɛjaɖɛ, mankaɣ mabʋ paa kɔɔnɔɔ pɩɣa ŋga lɛ, Ejipiti taa, kpaɣnɩ ɛyaa piwolo pɩtalɩ kpɩna. Mankaɣ hʋnʋʋ Ejipiti ɛsɔnaa kpeekpe: Mɛnkɛ Kɩbaɣlʋ.
it-2 484 § 2
Paska
Ɛsɔ kaatɩŋnɩ kɩjɩkpɩŋ hiu weyi ɛɛkɔnɩ Ejipiti mba yɔɔ yɔ, kɔzɩ kɔzɩ kɩjɩkpʋʋ hiu ñɩŋgʋ ŋgʋ kɩ-taa Ejipiti mba kajalaɣ piya kaasɩba yɔ, ɩ-yɔɔ nɛ ɛhɔ Ejipiti ɛsɔnaa nɩŋgbaaŋ. (Ejl 12:12) Ɛyaʋ kaakɛ kpɩnɛ nɖɩ ɖɩsɩŋnɩ ɛsɔ weyi payaɣ se Ra yɔ. Ye mbʋ ɛzɩma paata paska heɣa calɩm pɔɔyɩŋ yɔɔ yɔ, Ejipiti mba ɛsɩndaa lɛ, pɩwɛ ɛzɩ patʋ pɛ-ɛsɔ ɛnʋ yɔ. Pɩtasɩ lɛ, naaʋ kaasɩŋnɩ ɛsɔ weyi payaɣ se Osiris yɔ, nɛ ɛzɩma paakʋ naŋ kajalaɣ piya yɔ, pɩkɛ ɛsɔ ɛnʋ, ɛ-nɩŋgbaŋʋʋ hɔm. Pakpaɣ Farawɔɔ se ɛkɛ ɛsɔ Ra pɩyalʋ. Ye mbʋ Farawɔɔ kajalaɣ pɩɣa sɩm wɩlɩɣ se ɛsɔ Ra nɛ Farawɔɔ maɣmaɣ pɛfɛyɩnɩ ɖoŋ nɩɩyɩ Yehowa ɛsɩndaa.
(Ejipiti Lɩʋ 12:14-16) Ɩɩtɔzʋʋ kɩyakʋ ŋgʋ kɩ-yɔɔ. Ɩɩpɩsɩ-kʋ Kɩbaɣlʋ nʋmɔʋ kiɖeɖeu wobu kɩyakʋ. Pɩkɛ tamtam paɣtʋ: ɩɩtɔkɩ pɩ-tɛ kazandʋ pɩnzɩ nɛ pɩnzɩ. 15 Kɩyakɩŋ lʋbɛ lɛ, ɩkaɣ tɔɔʋ kpɔnʋ kɩtɩñɩŋʋʋ: kajalaɣ kɩyakʋ wiye, kpɔnʋ kɩñɩŋʋʋ ɛɛkaɣ tasʋʋ wɛʋ mɩ-ɖɩsɩ taa; weyi ɛtɔɔ kpɔnʋ kɩñɩŋʋʋ kajalaɣ kɩyakʋ wiye nɛ piwolo pɩtalɩ kɩyakʋ lʋbɛ ŋgʋ wiye lɛ, pakaɣ-ɩ lɩzʋʋ Izrayɛɛlɩ taa. 16 Kɔɔnɔɔ kɩyakʋ kaɣ kɛʋ kiɖeɖeu, nɛ ahɛnɛɛ kɩyakʋ, nɛ kɩyakʋ lʋbɛ ŋgʋ kɛ ɖɔɖɔ kazandʋ kiɖeɖetu. Paakaɣ labʋ tʋmɩyɛ naɖɩyɛ kaakɩŋ ɛnɩ ɩ-taa, ye pɩtɩkɛ mɩzaɣ nɔɔ tʋmɩyɛ yeke yɔ.
it-1 207 § 1
Kigbeɣliŋ
Alɩwaatʋ ndʋ palakɩ “kediɣzisi kiɖeɖesi” yɔ, samaɣ ɛɛlakɩ tʋmɩyɛ ɖoŋ ñɩnɖɛ naɖɩyɛ. Kɩɖaʋ nakʋyʋ yɔ: Kpɔnɔ kɩtɩñɩŋʋʋ kazandʋ tɛ kajalaɣ kɩyakʋ nɛ kɩyakʋ lʋbɛ ñɩŋgʋ kɛ kediɣzisi kiɖeɖesi kɩyakɩŋ nɛ Yehowa yɔɔdaa se “paakaɣ labʋ tʋmɩyɛ naɖɩyɛ kɩyakɩŋ ɛnɩ ɩ-taa, ye pɩtɩkɛ mɩzaɣ nɔɔ tʋmɩyɛ yeke yɔ.” (Ejl 12:15, 16) Paa mbʋ yɔ, “kediɣzisi kiɖeɖesi” alɩwaatʋ taa, cɔjɔnaa laɣ kɩlaŋ Yehowa (Lev 23:37, 38), ɛlɛ paamaɣnɩ paɣtʋ ndʋ paɖʋwa se pataala tʋmɩyɛ yɔ tɩ-yɔɔ. Alɩwaatʋ ndʋ tɩtaakɛ feendu alɩwaatʋ, ɛlɛ pɩɩkɛ alɩwaatʋ ndʋ tɩ-taa samaɣ lakaɣ mbʋ pɩwazaɣ-kɛ siŋŋ fezuu taa yɔ. Sabaatɩ kɩyakʋ wiye samaɣ kpeɣlaɣ nɛ kɛsɛɣ Ɛsɔ nɛ kɛkpɛlɩkɩɣ ɛ-tɔm. Pakalɩɣ Ɛsɔtɔm nɛ palɩzɩɣ tɩ-taa samaɣ ɛsɩndaa nɛ pɩkpazɩɣ-kɛ ɖoŋ. Pʋwayɩ palakaɣ mbʋ ɖɔɖɔ Sinaagɔɔgɩwaa taa. (Tʋm 15:21) Ye mbʋ, paa samaɣ ɛtaalakɩ tʋma sabaatɩ kɩyakʋ wiye nɛ “kediɣzisi kiɖeɖesi” alɩwaatʋ taa yɔ, kakpakaɣ ka-alɩwaatʋ nɛ kalakɩ adɩma nɛ kamaɣzɩɣ ɖɔɖɔ Lɩzɩyʋ nɛ ɛ-tamaɣ pɔ-yɔɔ.—Kalɩ ɖɔɖɔ ASSEMBLEE.
Bibl kalʋʋ
(Ejipiti Lɩʋ 12:1-20) Ejipiti ɛjaɖɛ taa Kɩbaɣlʋ heyi Moyizi nɛ ɛ-ɖalʋ Aarɔɔnɩ se: 2 “Fenaɣ kanɛ yɔ kakaɣ-mɩ kɛʋ kajalaɣ fenaɣ, kakaɣ-mɩ kɛʋ pɩnaɣ taa kajalaɣ fenaɣ. 3 Iiheyi mbʋ Izrayɛɛlɩ cejewe kpeekpe: fenaɣ ŋga ka-kɩyakʋ hiu ŋgʋ wiye lɛ, pakpaɣ heɣa hɔʋ hɔʋ, ɖɩɣa ɖɩɣa. 4 Ye ɖɩɣa taa mba ɩtɩɖɔɔ nɛ paatɛŋ heɣa kʋyʋmaɣ kɔyɔ, payaa pɔ-cɔlɔ ɖɩɣa taa mba, ɛzɩ pɩpɔzʋʋ se ɛyaa ɩɖɔɔ ɖɔʋ mbʋ nɛ pɛtɛ heɣa ŋga yɔ. Ɩɩlɩzɩ heɣa ŋga paa weyi ɛɛpɩzɩ nɛ ɛtɔɔ yɔ. 5 Pɩkaɣ kɛʋ heɣa ŋga keɖe ka-tɩŋa yɔ, abalɩñɩŋga, kɛwɛnɩ pɩnaɣ kʋyʋmaɣ yɔ. Ɩɩkpaɣ heɣa yaa mbeɣa. 6 Ɩɩsɩɩ-kɛ piwolo pɩtalɩ fenaɣ kɩyakʋ hiu nɛ naanza ŋgʋ wiye. Izrayɛɛlɩ cejewe kpeekpe taa. Pakaɣ-kɛ kʋʋ ɖanaɣ wɩsɩ ɖʋʋ lɛ. 7 Paakpaɣ calɩm nɛ pataa nɔnɔsɩ yɔɔ ceemenje, hayo nɛ hadɛ, ɖɩsɩ nzɩ pakaɣ-kɛ tɔɔʋ yɔ sɩ-taa. 8 Paatɔɔ ka-nandʋ ɖoo ana, pɔhɔbɩ-tʋ kɩhɔbʋ miŋ taa, pɩ nɛ kpɔnʋ kɩtɩñɩŋʋʋ, nɛ ñɩtʋ ñaŋ ndʋ. 9 Ɩɩkaɣ tɔɔʋ celiɣa ŋga katɩpɩɩ yɔ, yaa patɩzɩ-kɛ kɩtɩzʋ yɔ; pakaɣ hɔbʋ pɩtɩŋa miŋ taa, pɩkpɛndɩnɩ ñʋʋ, acaa nɛ lotu. 10 Ɩɩkaɣ kazʋʋ pʋyʋ se tɛʋ efe; mbʋ pɩkazɩɣ se tɛʋ efe yɔ, ɩɩñaɣzɩ-pʋ miŋ. 11 Ɩɩtɔɔ ɛzʋnɔ: tambaɖɛ tɩnaɣ taa, naataŋgbala naataŋ tɛɛ, ɖaʋ nesi tɛɛ, ɩɩtɔɔ lɛɛ lɛɛ: pɩkɛ Kɩbaɣlʋ Paska. 12 Ðoo ana a-taa mankaɣ tɛzʋʋ Ejipiti ɛjaɖɛ, mankaɣ mabʋ paa kɔɔnɔɔ pɩɣa ŋga lɛ, Ejipiti taa, kpaɣnɩ ɛyaa piwolo pɩtalɩ kpɩna. Mankaɣ hʋnʋʋ Ejipiti ɛsɔnaa kpeekpe: Mɛnkɛ Kɩbaɣlʋ. 13 Calɩm kaɣnɩ-mɩ kɛʋ kawɩlaɣ, ɖɩsɩ nzɩ ɩkaɣ sɩ-taa wɛʋ yɔ sɩ-yɔɔ. Manaɣ calɩm lɛ, mɛnɖɛɛ: ɩɩkaɣ naʋ kʋñɔŋ ŋgʋ mankaɣ wɩlʋʋ Ejipiti yɔ. 14 Ɩɩtɔzʋʋ kɩyakʋ ŋgʋ kɩ-yɔɔ. Ɩɩpɩsɩ-kʋ Kɩbaɣlʋ nʋmɔʋ kiɖeɖeu wobu kɩyakʋ. Pɩkɛ tamtam paɣtʋ: ɩɩtɔkɩ pɩ-tɛ kazandʋ pɩnzɩ nɛ pɩnzɩ. 15 Kɩyakɩŋ lʋbɛ lɛ, ɩkaɣ tɔɔʋ kpɔnʋ kɩtɩñɩŋʋʋ: kajalaɣ kɩyakʋ wiye, kpɔnʋ kɩñɩŋʋʋ ɛɛkaɣ tasʋʋ wɛʋ mɩ-ɖɩsɩ taa; weyi ɛtɔɔ kpɔnʋ kɩñɩŋʋʋ kajalaɣ kɩyakʋ wiye nɛ piwolo pɩtalɩ kɩyakʋ lʋbɛ ŋgʋ wiye lɛ, pakaɣ-ɩ lɩzʋʋ Izrayɛɛlɩ taa. 16 Kɔɔnɔɔ kɩyakʋ kaɣ kɛʋ kiɖeɖeu, nɛ ahɛnɛɛ kɩyakʋ, nɛ kɩyakʋ lʋbɛ ŋgʋ kɛ ɖɔɖɔ kazandʋ kiɖeɖetu. Paakaɣ labʋ tʋmɩyɛ naɖɩyɛ kaakɩŋ ɛnɩ ɩ-taa, ye pɩtɩkɛ mɩzaɣ nɔɔ tʋmɩyɛ yeke yɔ. 17 Ɩɩña kpɔnʋ kɩtɩñɩŋʋʋ kazandʋ, mbʋ yɔ kɩyakʋ ŋgʋ ki-wiye malɩzɩ mi-wondu Ejipiti; ɩɩɖɔkɩ kɩyakʋ ŋgʋ pɩnzɩ nɛ pɩnzɩ. 18 Kɔɔnɔɔ fenaɣ kɩyakʋ hiu nɛ naanza ŋgʋ wiye nɛ piwolo pɩtalɩ kɩyakʋ nɛɛlɛ nɛ kʋyʋmʋʋ wiye, ɩɩtɔɔ kpɔnʋ kɩtɩñɩŋʋʋ. 19 Kɩyakɩŋ lʋbɛ, pataana kpɔnʋ kɩñɩŋʋʋ mɩ-ɖɩsɩ taa, mbʋ yɔ weyi ɛtɔɔ kpɔnʋ kɩñɩŋʋʋ kɔyɔ, palɩzɩɣ-ɩ Izrayɛɛlɩ taa, paa pɩkɛ ɛgɔm yaa mɩ-taa nɔɔyʋ yɔ. 20 Ɩɩkaɣ tɔɔʋ kpɔnʋ kɩñɩŋʋʋ; paa le ɩwɛɛ kɔyɔ, ɩkaɣ tɔɔʋ kpɔnʋ kɩtɩñɩŋʋʋ; paa le ɩwɛɛ kɔyɔ, ɩkaɣ tɔɔʋ kpɔnʋ kɩtɩñɩŋʋʋ yeke.