Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
3-9 AOÛT
ÑƖM MBƲ PƖWƐ ƐSƆTƆM TAA YƆ | EJIPITI LƖƲ 13-14
“Ɩɖɔkɩ mɩ-tɩ camɩyɛ! Ɩkɔŋ naʋ sɔnɔ mbʋ [Yehowa] lakɩ se ɛya mɩ-ñʋʋ yɔ”
(Ejipiti Lɩʋ 14:13, 14) Moyizi cosi samaɣ se: “Itaase sɔɔndʋ, ɩɖɔkɩ mɩ-tɩ camɩyɛ! Ɩkɔŋ naʋ sɔnɔ mbʋ Kɩbaɣlʋ lakɩ se ɛya mɩ-ñʋʋ yɔ! Mbʋ yɔ, Ejipiti mba, mba ɩnaɣ-wɛ sɔnɔ yɔ, ɩɩkaɣ-wɛ tasʋʋ naʋ wiɖiyi. 14 Kɩbaɣlʋ kaɣ lʋbʋ mɩ-yɔɔ, nɛ mɩ yɔ, ɩɩkaɣ labʋ pʋyʋ.”
w13 1/2 4
Moyizi kɛ abalʋ weyi ɛɛwɛnɩ tisuu yɔ
Moyizi taatɩlɩ se Yehowa kaɣ tayʋʋ Teŋgu Kɩsɛɛmʋʋ taa nɛ Izrayɛɛlɩ piya pɩzɩ nɛ sɩtɛzɩ-kʋ. Ɛlɛ ɛ-taa kaatɛma se Ɛsɔ kaɣ labʋ nabʋyʋ nɛ ɛkandɩyɩ ɛ-samaɣ yɔɔ. Nɛ ɛɛsɔɔlaa se Izrayɛɛlɩ piya taa ɛtɛ mbʋ ɖɔɖɔ. Ðɩkalɩɣ se: “Moyizi cosi samaɣ se: ‘Itaase sɔɔndʋ, ɩɖɔkɩ mɩ-tɩ camɩyɛ! Ɩkɔŋ naʋ sɔnɔ mbʋ Kɩbaɣlʋ lakɩ se ɛya mɩ-ñʋʋ yɔ!’” (Ejipiti Lɩʋ 14:13) Moyizi kaapɩzaa nɛ ɛkpazɩ Izrayɛɛlɩ piya tisuu ɖoŋ na? Ɛɛɛ, mbʋ pʋyɔɔ yɔ Bibl yɔɔdaɣ Moyizi nɛ Izrayɛɛlɩ piya pɔ-tɔm lɛ, kɩtɔm se: “Tisuu yɔɔ pɛtɛzɩ Teŋgu Kɩsɛɛmʋʋ ɛzɩ tɛtʋ ndʋ tɩwɩlɩ waɣwaɣ yɔ tɩ-yɔɔ.” (Ebree mba 11:29) Moyizi tisuu wazɩ ɛ-maɣmaɣ nɛ mba payɩ pewelisini-i yɔ.
(Ejipiti Lɩʋ 14:21, 22) “Nɛ Moyizi sezi nesi pɔɔ yɔɔ lɛ, ɖoo pilim, Kɩbaɣlʋ pɩsɩnɩ lɩm kiŋgiɖe nɛ helim ɖoŋ mbʋ mbʋ pɩlɩɣaɣnɩ wɩsɩ ɖɩlɩyɛ taa nɛ pɩfɛtɩɣ nɛ pɩwɛ miŋ yɔ, nɛ pɔɔ taa wɩlɩ waɣwaɣ. Lɩm faɣ hɔɔlɩŋ naalɛ; 22 nɛ Izrayɛɛlɩ piya tɛzɩ pɔɔ, nɩŋgbanzɩ waɣɖɛ, lɩm kʋyaa pɩsɩŋ ɛzɩ koloŋa yɔ, pa-nɩwaŋ yɔɔ nɛ pa-nɩmɩyɛ yɔɔ.”
Paa Ɛsɔ ɛkɛ Ðoŋ Tɩŋa Tʋ yɔ, ɛmaɣzɩɣ lalaa yɔɔ
13 Kalɩ Ejipiti Lɩʋ 14:19-22. Maɣzɩ se ŋwɛ peeɖe. Farawɔɔ sɔɔjanaa nɛ Teŋgu Kɩsɛɛmʋʋ pɛ-hɛkʋ taa. Nɛ Ɛsɔ la maamaaci lakasɩ nasɩyɩ. Mɩndʋ ndʋ tɩɩwɛ mɩ-ɛsɩndaa yɔ, tɩwɛɛ nɛ tɩpɩsɩɣnɩ wayɩ nɛ cɩkpɛndʋʋ paɣzɩ yuu Ejipiti ñɩma yɔɔ. Ɛlɛ pɩtɩŋnɩ Yehowa piti lakasɩ yɔɔ lɛ, ña nɛ Izrayɛɛlɩ samaɣ ɩwɛ ñalɩmɩyɛ taa! Pʋwayɩ lɛ, ŋnaɣ Moyizi kpazɩ e-nesi teŋgu yɔɔ nɛ helim sɔsɔm nabʋyʋ lɩɩnɩ wɩsɩ ɖɩlɩyɛ taa nɛ pɩfaɣ lɩm nabʋlɛ, nɛ pɩha-mɩ nʋmɔʋ se ɩpɩzɩ ɩɖɔ nɛ ɩtɛzɩ kidiiliŋ lɛɛkʋ yɔɔ. Ña nɛ ñɔ-hɔʋ nɛ ña-kpɩna, nɛ samaɣ kpeekpe ɩwɛɛ nɛ ɩɖɔŋ camɩyɛ cɔlɩɩɩ nɛ ɩtɛzɩɣ teŋgu. Pɩlabɩ piti kpem se ahɔya fɛyɩ tataa ɛlɛ pɩwɩlɩ camɩyɛ nɛ pɩwɛɛ kɛlɛʋ se ɩɖɔ nɛ ɩtɛzɩ. Halɩ piyeba nɛ ajamaa mba paapɩzɩɣ ɖɔm lɔŋ yɔ papɩzɩ nɛ pamaa kidiiliŋ lɛɛkʋ yɔɔ cɩŋgɩlɩm.
(Ejipiti Lɩʋ 14:26-28) Kɩbaɣlʋ heyi Moyizi se: “Sezi nesi pɔɔ yɔɔ nɛ lɩm pɩsɩ Ejipiti mba yɔɔ, pɛ-kɛɛkɛɛnaa nɛ pɛ-tɛ sɔɔjanaa yɔɔ.” 27 Moyizi sezi nesi pɔɔ yɔɔ lɛ, kapɩsɩ ke-ɖeɖe, tanaŋ tɛɛ wɩsɩ hɔwa lɛ, Ejipiti mba mɔtɩnɩ lɩm nɛ Kɩbaɣlʋ mɩyɩsɩ-wɛ pɔɔ hɛkʋ taa. 28 Lɩm wadɩ nɛ pihuuzi Farawɔɔ tɛ sɔɔjanaa kpeekpe yɔɔ, ɛ-kɛɛkɛɛnaa nɛ ɛ-tɛ yoyaa yɔɔ, mba paaɖʋ pɔɔ taa yɔ; pɩtɩkazɩ pa-taa paa kʋɖʋm.
w09 15/3 7 § 2-3
Taasɔɔ Yehowa yɔɔ
Alɩwaatʋ ndʋ Ejipiti mba wɛɛ nɛ palʋkɩnɩ po-you kɛɛkɛɛnaa mba lɩm wɛ nɛ pɩyɔkʋʋ yɔ lɛ, Izrayɛɛlɩ piya ñaatɛm talʋʋ teŋgu kidiiliŋ lɛɛkʋ yɔɔ. Moyizi kpazɩ e-nesi Teŋgu Kɩsɛɛmʋʋ yɔɔ. Nɛ Yehowa yele nɛ lɩm mbʋ pɩɩtayɩ nabʋlɛ yɔ, pɩɖaɣnɩ kpɛndʋʋ. Lɩm mbʋ pɩwadɩ Farawɔɔ nɛ ɛ-sɔɔjanaa pɔ-yɔɔ. Pi-yuŋ kaatalɩ tɔɔnɩwaa miiliyɔɔwaa sakɩyɛ. Pa-tɩŋa pasɩ nɛ Izrayɛɛlɩ hiɣ ñʋʋ yabʋ. (Ejl 14:26-28; Keɣa 135:13-15)
Tɔm ndʋ tɩɩtalɩ ajɛɛ sakɩyɛ taa. (Ejl 15:14-16) Pɩnzɩ sakɩyɛ wayɩ Izrayɛɛlɩ cɔŋɩyaa naalɛ wobi Yeriikoo tɛtʋ taa lɛ, Rahaabɩ heyi-wɛ se: “Ɩkpa-ɖʋ sɔɔndʋ, . . . Ðɩnɩwa se Kɩbaɣlʋ laba nɛ pɔɔ kɩsɛɛmaɣ taa lɩm sɔɔ nɛ ɩtɛzɩ-kɛ, ɩlɩnɩ Ejipiti lɛ.” (Yoz 2:9, 10) Halɩ sɩɩnaa layaa ajɛɛ taa ñɩma taasɔɔ ɛzɩma Yehowa kaayabɩ ɛ-samaɣ ñʋʋ yɔ pɩ-yɔɔ. Ye mbʋ pɩtaapɔzɩ se Izrayɛɛlɩ piya ɩsɔɔ tɔm ndʋ tɩ-yɔɔ.
Ðɩñɩnɩ fezuu taa ñɩm
(Ejipiti Lɩʋ 13:17) Farawɔɔ yebi samaɣ se kɛɖɛɛ lɛ, Ɛsɔ tiyele-kɛ se katɩŋnɩ Filistii mba tɛ ɛjaɖɛ taa nʋmɔʋ, paa kɩwɛ to yɔ. Ɛsɔ maɣzaa se samaɣ naɣ you ŋgʋ kɔkɔŋ you yɔ lɛ, kaakpiɖi nɛ kapɩsɩ Ejipiti.
it-1 1015
Habɩyɛ sɔsɔɖɛ, nʋmɔʋ
Caanaʋ taa, habɛɛ sɔsɔna nɛ nʋmɔŋ sakɩyɛ kaawɛ Palɛstiini nɛ pɩhaɣ ɛyaa waɖɛ se powolo tɛtʋ nɛ ageeta ndɩ ndɩ taa nɛ pala tadɩyɛ. (Kɩg 20:17-19; 21:21, 22; 22:5, 21-23; Yoz 2:22; Th 21:19; 1Sam 6:9, 12; 13:17, 18; Kalɩ ROUTE DU ROI) Habɩyɛ nɖɩ sakɩyɛ maɣzaɣ se nɖɩ kɛnɩnɩ habɩyɛ sɔsɔɖɛ yɔ, ɖɩlɩɣaɣnɩ Ejipiti nɛ ɖiwoki Filistii mba tɛtʋ ndʋ payaɣ se Gaazaa nɛ Askelɔɔnɩ yɔ tɩ-taa. Halɩ ɖɩtalaɣ ɖooo hayo kiŋ tɛtʋ ndʋ payaɣ se Megiidoo yɔ tɩ-taa. Ðɩtalaɣ ɖɔɖɔ Azɔɔrɩ, Galilee Teŋgu hayo kiŋ nɛ pʋwayɩ lɛ, Damaasɩ. Ye ɛyʋ ɛkʋyɩ Ejipiti se ewoki Lidaʋ Tɛtʋ taa yɔ, habɩyɛ nɖɩ ɖɩtɩŋɩɣnɩ Filistii yɔ, nɖɩ wɛnɩ tobi. Ɛlɛ, Yehowa heyi Izrayɛɛlɩ piya nɛ sɔɔlɩm se sɩtɩŋ habɩyɛ lɛɛɖɛ. Yehowa taasɔɔlɩ se sɩkatɩ Filistii mba nɛ paba yooni-sɩ.—Ejl 13:17.
(Ejipiti Lɩʋ 14:2) “Heyi Izrayɛɛlɩ piya se sɩpɩsɩnɩ sɩ-wayɩ nɛ sisiɣ kizinzikiŋ Pihayirɔɔtɩ ɛsɩndaa, Migɩdɔl nɛ lɩm sɔsɔm pɛ-hɛkʋ taa, Baalɩ-Zefonɩ ɛsɩndaa; iisiɣ kizinzikiŋ peeɖe ɛsɩndaa, lɩm sɔsɔm nɔɔ yɔɔ.
it-1 848 § 4, 5
Ejipiti Lɩʋ
Le Teŋgu Kɩsɛɛmʋʋ kaatayɩ nabʋlɛ taa nɛ Izrayɛɛlɩ piya pɩzɩ nɛ sɩtɛzɩ?
Izrayɛɛlɩ piya ɖɔm nʋmɔʋ nɛ sɩkɔɔ sɩtalɩ Etaam kañɩmbusuu kamaɣ yɔɔ lɛ, Ɛsɔ heyi Moyizi se eheyi Izrayɛɛlɩ piya se: “Sɩpɩsɩnɩ sɩ-wayɩ nɛ sisiɣ kizinzikiŋ Pihayirɔɔtɩ . . . lɩm sɔsɔm nɔɔ yɔɔ.” Piyeki nɛ Farawɔɔ maɣzɩ se ‘sileba nɛ sɩwɛɛ siyotuu tɛtʋ taa.’ (Ejl 13:20; 14:1-3) Bibl tɔm taa tazɩyaa mba pamaɣzɩɣ se pɩtʋʋ fɛyɩ se el Haj nʋmɔʋ paakpaɣ yɔ, pɔyɔɔdaa se Ebree lakaɣ “pɩsɩnʋʋ” ɛɛwɩlɩɣ yem se papɩsɩnɩ wayɩ, ɛlɛ pɩkɛ nʋmɔʋ lɛɣzʋʋ kiya. Pamaɣzɩɣ se Izrayɛɛlɩ piya kaatɛm talʋʋ Suez teŋgu hayo kiŋ, ɛlɛ sɩpɩsɩ nɛ siwolo Djebel Ataqa pʋʋ wɩsɩ ɖɩlɩyɛ hɔɔlʋʋ taa. Ye sɩtaapɩsɩ mbʋ yɔ, sɩtaapɩzɩ nɛ sihiɣ nʋmɔʋ nakʋyʋ nɛ hayo kiŋ nɛ sɩtɩŋ nɛ sɩtalɩ teŋgu cɔlɔ nɛ sɩtɛzɩ-kʋ; mbʋ pʋyɔɔ yɔ sɩɖɔwa siŋŋ.
Yuuda mba wɩlɩtʋ ndʋ tɩɩtɔyɩ kajalaɣ pɩnzɩ mɩnʋʋ taa yɔ, tɩñɩkɩɣ niye tɔm ndʋ tɩ-yɔɔ. (Kalɩ PIHAHIROTH.) Paa Bibl tɔm taa tazɩyaa sakɩyɛ ɩtɩpɩzɩ nɛ pawɩlɩ ɛzɩma ɖeyi ɖeyi pɩɩɖɔma yɔ, tɔm ndʋ Bibl yɔɔdʋʋ yɔ, ndʋ wɩlɩɣna se mbʋ ɖeyi ɖeyi pɩɩlaba. (Ejl 14:9-16) Pɩtʋʋ fɛyɩ se Izrayɛɛlɩ piya kaatalɩ ɖooo Teŋgu Kɩsɛɛmʋʋ wɩsɩ ɖɩɖʋyɛ hɔɔlʋʋ taa kiŋ pʋcɔ nɛ sɩtɛzɩ-kʋ. Farawɔɔ sɔɔjanaa taapɩzɩɣ se patalɩ peeɖe kɛlɛʋ nɛ pakʋ-sɩ.—Ejl 14:22, 23.
Bibl kalʋʋ
(Ejipiti Lɩʋ 13:1-20) Kɩbaɣlʋ heyi Moyizi se: 2 “Ɩcɛlɩ-m paa kɔɔnɔɔ pɩɣa ŋga palʋlʋʋ Izrayɛɛlɩ piya taa yɔ, ɛyaa taa nɛ kpɩna taa: matɩnɩ pɩtɩŋa.” 3 Nɛ Moyizi heyi samaɣ se: “Ɩtɔzɩ kɩyakʋ kʋnɛ yɔ kɩ-yɔɔ, ŋgʋ ki-wiye ɩlɩ Ejipiti yomiye taa yɔ; mbʋ yɔ Kɩbaɣlʋ lɩzɩ-mɩ peeɖe nɛ e-nee ɖoŋ, se ɩtaatɔɔ kpɔnʋ ŋgʋ kɩñɩŋaa yɔ. 4 Sɔnɔ Abiib fenaɣ taa ‘pʋ-tɔbʋʋ se tɩŋ pee kɩfalɛɛ wɛɛ taa’ ɩlɩɣ. 5 Kɩbaɣlʋ ɛlabɩ-ŋ nɛ ŋsʋʋ Kanaŋ mba, Hiiti mba, Amoori mba, Hiivi mba, nɛ Yebuuzi mba tɛ ɛjaɖɛ taa, nɖɩ eɖuuni ña-caanaa se ɛcɛlɩɣ-ŋ yɔ lɛ, ɛjaɖɛ nɖɩ ɖɩ-taa naalɩm nɛ tʋŋ num pekpeŋ yem yɔ, ŋŋla sɔnzɩ fenaɣ kʋɖʋmaɣ kanɛ yɔ ka-taa. 6 Kɩyakɩŋ lʋbɛ lɛ, ŋkaɣ tɔɔʋ kpɔnʋ kɩtɩñɩŋʋʋ nɛ kɩyakʋ lʋbɛ ŋgʋ wiye lɛ, pɔtɔkɩ kazandʋ se paɖʋ hɩɖɛ Kɩbaɣlʋ. 7 Ɩkaɣ tɔɔʋ kpɔnʋ kɩtɩñɩŋʋʋ kɩyakɩŋ lʋbɛ: pataana pʋyʋ kɩñɩŋʋʋ ñɛ-tɛ nɛ ñɛ-tɛtʋ kamasɩ yɔɔ. 8 Ŋŋkɛdɩ ña-pɩyalʋ kɩyakʋ ŋgʋ ki-wiye se: Mbʋ Kɩbaɣlʋ labɩ-m kɩyakʋ ŋgʋ malɩ Ejipiti yɔ, pʋyɔɔ.” 9 Sɔnzɩ sɩnɛ yɔ sɩkaɣ kɛʋ mayaɣ ñe-nesi yɔɔ nɛ mbʋ pɩtɔzʋʋ-ŋ yɔ, ñɛ-ɛsɩndaa; nɛ Kɩbaɣlʋ paɣtʋ wɛɛ ñɔ-nɔɔ taa tam. Kɩbaɣlʋ lɩzɩ-ŋ Ejipiti nɛ e-nesi ɖoŋ. 10 Ŋŋɖɔ paɣtʋ tɩnɛ yɔ tɩ-yɔɔ alɩwaatʋ ndʋ paɖʋwa se pala sɔnzɩ paa pɩnaɣ ŋga tɩ-taa yɔ. 11 Kɩbaɣlʋ ɛsʋzɩ-ŋ Kanaŋ mba tɛ ɛjaɖɛ taa lɛ, ɛzɩ eɖuunuu ña nɛ ña-caanaa yɔ, nɛ ɛcɛlɩ-ŋ ɖɩ lɛ, 12 ŋŋcɛlɩ Kɩbaɣlʋ kɔɔnɔɔ pɩɣa ŋga kacalɩ lɩʋ ko-ɖoo taa yɔ, nɛ kɔɔnɔɔ pɩɣa ŋga kpɩnɛ calɩɣ lʋlʋʋ yɔ: Kɩbaɣlʋ tɩnɩ kɩbɛŋ. 13 Ŋŋkɛɛ kpaŋaɣ kajalaɣ piye nɛ heu; ye ŋtɩkɛɛ kɔyɔ, ŋŋyɔɔkɩ ɖi-nimaɣ. Piyele ɛyʋ kɔɔnɔɔ piya ña-pɩyalaa taa yɔ, pɩwɛnɩ-ŋ se ŋkɛɛ po-lone taa. 14 Ye cee ña-pɩyalʋ ɛpɔzʋʋ-ŋ se: ‘Sɔnzɩ nzɩ yɔ sɩ-tɔbʋʋ suwe?’ lɛ, ŋŋcosi-i se: “Kɩbaɣlʋ lɩzɩ-ɖʋ nɛ e-ɖoŋ Ejipiti yomiye taa. 15 Farawɔɔ lakaɣ laŋkpɩzɩyɛ nɛ eeyeki-ɖʋ se ɖɩɖɛɛ lɛ, Kɩbaɣlʋ kʋ Ejipiti kajalaɣ piya kpeekpe: ɛyaa nzɩ nɛ kpɩna nzɩ. Mbʋ yebina nɛ malaɣ Kɩbaɣlʋ kajalaɣ pɩɣa kɩbɛʋ, nɛ ŋga kpɩnɛ ɖaɣ lʋlʋʋ yɔ, nɛ mɛnkɛɣ man-pɩyalaa taa kɔɔnɔɔ pɩɣa lone taa. 16 Sɔnzɩ nzɩ sɩkaɣ kɛʋ mayaɣ ñe-nesi yɔɔ, sɩkaɣ tem ñe-kiɖe taa kpɩtaʋ, mbʋ yɔ ɖoŋ Kɩbaɣlʋ lɩzɩnɩ-ɖʋ Ejipiti.” 17 Farawɔɔ yebi samaɣ se kɛɖɛɛ lɛ, Ɛsɔ tiyele-kɛ se katɩŋnɩ Filistii mba tɛ ɛjaɖɛ taa nʋmɔʋ, paa kɩwɛ to yɔ. Ɛsɔ maɣzaa se samaɣ naɣ you ŋgʋ kɔkɔŋ you yɔ lɛ, kaakpiɖi nɛ kapɩsɩ Ejipiti. 18 Ɛsɔ la nɛ samaɣ tɩŋ kɩŋgbala pɔɔ nʋmɔʋ ŋgʋ kɩwɛ kotuukotuu lakʋ taa yɔ; ɛlɛ katɩŋ lakʋ taa nʋmɔʋ ŋgʋ kiwoki kɩtalɩɣ pɔɔ kɩsɛɛmaɣ yɔɔ yɔ. Izrayɛɛlɩ piya paa tɔŋ nɛ sɩlɩɩ Ejipiti taa. 19 Moyizi kpɛndɩnɩ Yosɛɛfʋ mɔɔ, mbʋ yɔ ɛlɛ kaatendi Izrayɛɛlɩ piya pɩŋŋ nɛ ɛtɔ se: “Ɛsɔ kaɣ kɔm mɩ-naʋ; ɩɩkpɛndɩnɩ mɔ-mɔɔ nɛ ɩɖɛnɩ cɩnɛ.” 20 Pakʋyɩ Sukɔɔtɩ nɛ powolo pacaɣ Etaam, lakʋ kamaɣ yɔɔ.
10-16 AOÛT
ÑƖM MBƲ PƖWƐ ƐSƆTƆM TAA YƆ | EJIPITI LƖƲ 15-16
“Ðitee hendu nɛ ɖɩsamnɩ Yehowa”
(Ejipiti Lɩʋ 15:1, 2) Ðɩnɛ ɛlɛ Moyizi nɛ Izrayɛɛlɩ piya petee Kɩbaɣlʋ hendu tʋnɛ yɔ se: “Ðɩyaa Kɩbaɣlʋ keɣa: ɖɩñɔkɩ-ɩ pɩŋŋ, etuzi kpaŋnʋ nɛ ɛ-yɔɔ caɣyʋ nɛ ɛpɛɖɩ pɔɔ taa. 2 Kɩbaɣlʋ kɛnɩ mon-ɖoŋ nɛ man-kpaaŋ, nɛ ɛpɩsɩ ɛ-tɩ ma-ñʋʋ yabɩtʋ. Mɛ-Ɛsɔ lɛ, nɛ mankaɣ-ɩ sam; man-caa tɛ Ɛsɔ lɛ, mankaɣ-ɩ ɖɛyʋʋ!
w95 15/10 11 § 11
Ɛbɛ yɔɔ pɩwɛɛ se ɖise Ɛsɔ toovenim tʋ sɔɔndʋ lɛɛlɛɛyɔ?
11 Yehowa ɖɩzɩ Ejipiti mba sɔɔjanaa lɛ, ɛ-sɛyaa ɖɛyɩ-ɩ nɛ ɛyaa sakɩyɛ tɩlɩ ɛ-hɩɖɛ. (Yozuwee 2:9, 10; 4:23, 24) Ɛ-hɩɖɛ sɛwa nɛ pɩcɛzɩ Ejipiti mba cɛtɩm ɛsɔnaa mba pɛfɛyɩnɩ ɖoŋ nɩɩyɩ nɛ patɩpɩzɩ paya pɛ-sɛyaa ñʋʋ yɔ. Pata pɛ-ɛsɔnaa, ɛyaa mba pasɩkɩ yɔ nɛ sɔɔjanaa liu, ɛlɛ pɩɖʋzɩ-wɛ kɩɖʋzʋʋ. (Keɣa 145:3) Pɩtʋʋ fɛyɩ se ɛzɩma Yehowa tɩŋnɩ e-ɖoŋ yɔɔ nɛ ɛya Izrayɛɛlɩ piya ñʋʋ yɔ, piyeba nɛ sitee hendu nɛ sɩɖɛyɩ sɩ-Ɛsɔ ɖoŋ tɩŋa tʋ!
(Ejipiti Lɩʋ 15:11) Awɛ ɛzɩ ña yɔ [ɛsɔnaa] taa, Kɩbaɣlʋ? Awɛ ɛzɩ ña yɔ, nɛ eɖe pɩŋŋ mbʋ, ŋcaɣ sɔɔndʋ nɛ ŋmʋnɩ samtʋ, nɛ ŋlakɩ nɛ pɩlakɩ leleŋ?
(Ejipiti Lɩʋ 15:18) Kɩbaɣlʋ kaɣ kewiyaɣ tɔɔʋ tam kaahɛzaɣ!
w95 15/10 11-12 § 15-16
Ɛbɛ yɔɔ pɩwɛɛ se ɖise Ɛsɔ toovenim tʋ sɔɔndʋ lɛɛlɛɛyɔ?
15 Pɩtʋʋ fɛyɩ se ye ɖa nɛ Moyizi ɖiihiɣni ñʋʋ yabʋ yɔ, ɖa ɖɔɖɔ ɖite hendu nɛ ɖɩyɔɔdɩ se: “Awɛ ɛzɩ ña yɔ [ɛsɔnaa] taa, Kɩbaɣlʋ? Awɛ ɛzɩ ña yɔ, nɛ eɖe pɩŋŋ mbʋ, ŋcaɣ sɔɔndʋ nɛ ŋmʋnɩ samtʋ, nɛ ŋlakɩ nɛ pɩlakɩ leleŋ?” (Ejipiti Lɩʋ 15:11) Pɩnzɩ mɩnɩŋ sakɩyɛ wayɩ, ɛyaa sakɩyɛ wobi pɩ-yɔɔ nɛ pawɩlɩɣ se peseɣ Ɛsɔ sɔɔndʋ. Bibl kɛdɛzaɣ takayaɣ taa, apostoloo Yohanɛɛsɩ yɔɔdɩ Ɛsɔ sɛyaa siɣsiɣ ñɩma mba pɛkɛ patam numwaa yɔ pɔ-tɔm se: “Paawɛɛ nɛ peteɣ Ɛsɔ yom Moyizi hendu nɛ Heɣa hendu.” Ŋgee hendu ndʋ petewa? Ndʋ yɔ: “Ña-tʋma paɣlaa nɛ awɛ piti, Yehowa Ɛsɔ, Ðoŋ Tɩŋa Tʋ. Ña-nʋmɔŋ wɛ siɣsiɣ nɛ ɩkɛ toovenim, tamtam Wiyaʋ. Yehowa, toovenim taa lɛ, aakaɣ-ŋ sɔɔndʋ seu nɛ ɛsa ña-hɩɖɛ? Mbʋ pʋyɔɔ yɔ ñe-ɖeke ñɛkɛnɩ siɣsiɣ tʋ!”—Natʋ 15:2-4.
16 Ða-alɩwaatʋ taa ɖɔɖɔ Ɛsɔ sɛyaa mba patɩtasɩ wɛʋ yomiye taa yɔ, pa-taa wɛ leleŋ nɛ pasaŋ Yehowa e-wondu kɩlɩzɩtʋ nɛ ɛ-paɣtʋ pɔ-yɔɔ. Ɛyaa mba palɩnɩ ajɛɛ kpeekpe taa yɔ, palɩ fezuu taa yomiye nɛ kʋzɔɔtʋ ɛjaɖɛ ɖɩnɛ ɖɩ-taa mbʋ pʋyɔɔ yɔ pɛkpɛlɩkɩ Ɛsɔ paɣtʋ siɣsiɣ ñɩndʋ nɛ pɔɖɔŋ tɩ-yɔɔ. Paa pɩnaɣ ŋga ɛyaa kudokiŋ mɩnɩŋ sakɩyɛ lɩɣnɩ kʋzɔɔtʋ ɛjaɖɛ taa nɛ pasʋʋ Yehowa ɛgbɛyɛ nɖɩ ɖɩwɛ kele kele yɔ ɖɩ-taa. Pɩkazɩ pazɩ, Ɛsɔ hʋʋnɩ cɛtɩm Ɛsɔ sɛtʋ agbaa tɔm nɛ ɛɖɩzɩ ɛyaa kɩdɛkɛdaa lɛ, ɛ-samaɣ cakɩ wezuu maatɛŋ ɛjaɖɛ kɩfaɖɛ taa.
(Ejipiti Lɩʋ 15:20, 21) Aarɔɔnɩ neu nayʋ Miriyam kpaɣ suuye ɛjam e-nesi tɛɛ nɛ halaa kpeekpe tɩŋ ɛ-wayɩ pa nɛ soo, nɛ papaɣ. 21 Nɛ Miriyam kalɩɣ-wɛ hendu nɛ petisiɣ se: “Ɩɖɛyɩ Kɩbaɣlʋ: ɛwabɩ camɩyɛ pɩŋŋ; etuzaa ɛpɛɖɩ lɩm sɔsɔm taa kpaŋnʋ nɛ ɛ-yɔɔ caɣyʋ.”
it-1 360 § 6
Minziiki
Ðoŋ ɖoŋ lɛ, samaɣ kaateɣ hendu lɛ, kalakɩnɩ minziiki wondu ndɩ ndɩ tʋmɩyɛ, nɛ nabɛyɛ teɣ lɛ, lalaa cosuu-wɛ, yaa hendu teyu kʋɖʋm teɣni hendu nɛ samaɣ tisiɣ. Ye mbʋ, ɛzɩ Masɩ yɔɔdʋʋ yɔ, peteɣaɣ “hendu nɛ pocosuu ɖama.” (Ejl 15:21; 1 Sam 18:6, 7) Nɛ mbʋ pete hendu nɛ pocosuu ɖama keɣsi nasɩyɩ taa, ɛzɩ Keɣa 135 taa mbʋ yɔ. Hendu teyaa tindima sɔsɔna naalɛ kaateni samtʋ hendu Nehemiya alɩwaatʋ taa. Mbʋ ɖɔɖɔ, paɖaɣnɩ maʋ Yeruzalɛm kolonzi nɛ alɩwaatʋ talɩ se paɖʋzɩ-sɩ Yehowa nesi tɛɛ lɛ, hendu teyaa tindima sɔsɔna naalɛ ɖɔɖɔ kaateni hendu; pɩwɩlɩɣ se peteɣaɣ nɛ pocosuu ɖama ɛzɩ Moyizi nɛ Izrayɛɛlɩ piya paalabʋ yɔ.—Neh 12:31, 38, 40-42; kalɩ CHANT.
it-2 674 § 1
Nayʋ halɩñɩnʋ
Miriyam kɛnɩ halʋ kajalaɣ ñɩnʋ weyi pɔyɔɔdɩ ɛ-tɔm Bibl taa se ɛkɛ nayʋ yɔ. Ɛsɔ tɩŋnɩ ɛ-yɔɔ nɛ eheyi ɛ-samaɣ tɔm natʋyʋ, nɛ pɩtɩla yɔ hendu ndʋ fezuu ɖiyi-i nɛ etee yɔ, tɩ-yɔɔ ɛtɩŋnaa nɛ ɛla mbʋ. (Ejl 15:20, 21) Pʋyɔɔ Bibl yɔɔdaa se ɛ nɛ Aarɔɔnɩ peheyi Moyizi se: “Ɛzɩ [Yehowa] tɩŋnɩ Moyizi yeke koŋ yɔɔ nɛ ɛyɔɔdʋʋ? Ɛzɩ ɛtaatɩŋnɩ ɖɔ-yɔɔ ɖɔɖɔ?” (Kɩg 12:2) Yehowa maɣmaɣ tɩŋnɩ nayʋ Mikee yɔɔ nɛ ɛyɔɔdɩ se ɛlɩzaɣ Izrayɛɛlɩ piya Ejipiti lɛ, ɛnʋ tiyi ‘Moyizi nɛ ɛɖɛɛ-sɩ nɔɔ, ɛ nɛ Aarɔɔnɩ nɛ Miriyam.’ (Mik 6:4) Paa Yehowa kaatɩŋnɩ Miriyam yɔɔ nɛ ɛyɔɔdɩnɩ samaɣ yɔ, waɖɛ nɖɩ ɛɛwɛna yɔ ɖɩtaatalɩ Moyizi ñɩnɖɛ. Ɛkɔm nɛ ɛla mbʋ pataaha-ɩ waɖɛ se ɛla yɔ lɛ, Yehowa hɔ ɛ-nɩŋgbaŋʋʋ.—Kɩg 12:1-15.
Ðɩñɩnɩ fezuu taa ñɩm
(Ejipiti Lɩʋ 16:13) Toovenim ɖɔɖɔ, ɖanaɣ ɖanaa lɛ, wɩtɩlɩwɩsɩ kpa sɩwadɩ maalika yɔɔ, nɛ tɛʋ fema tanaŋ tɛɛ lɛ ɖoluu nakʋyʋ pɔ maalika cɔlɔ kpɛɛɛ pɩcɔɔ pɩta.
w11 1/9 14
Ŋŋsɩm-tʋ?
Pɩtɩla lɩmaɣza wena yɔɔ Yehowa kaatɩŋnɩ wɩtɩlɩwɩsɩ yaa pɩtɛɣsɩ yɔɔ nɛ ɛcalɩ Izrayɛɛlɩ piya kañɩmbusuu taa?
Izrayɛɛlɩ piya lɩnɩ Ejipiti lɛ, Ɛsɔ ha-sɩ pɩtɛɣsɩ sakɩyɛ tam nabʋlɛ nɛ sɩtɔɔ.—Ejipiti Lɩʋ 16:13; Kɩgalʋʋ 11:31.
Pɩtɛɣsɩ kɛ sumasɩ cikpesi nzɩ sɩ-ɖaɣlɩkɩŋ wɛɣ ɛzɩ santimɛtawaa 18 mbʋ yɔ nɛ si-yuŋ wɛɣ ɛzɩ gramme waa 100 mbʋ yɔ. Sɩtɔyɩ Aazii nɛ Erɔɔpɩ wɩsɩ ɖɩɖʋyɛ lona sakɩyɛ taa. Sɩkɛ sumasɩ nzɩ sɩyɛlɩɣ yɔ, nɛ siwoki Afrika nɛ Arabiya kpaɣnɩ décembre nɛ piwolo mars. Sɩɩyɛlɩɣ mbʋ lɛ, sɩtɛzɩɣ Mediteranee teŋgu wɩsɩ ɖɩɖʋyɛ hɔɔlʋʋ taa kiŋ nɛ Sinayii.
Takayaɣ nakɛyɛ (The New Westminster Dictionary of the Bible) yɔɔdaa se pɩtɛɣsɩ “kʋyʋʋ ɛsɔdaa camɩyɛ nɛ siyeki se helim ɛkpaɣ-sɩ nɛ pɩtanɩ ɖenɖe siwoki yɔ; ɛlɛ ye helim ɛlɛɣzɩ nʋmɔʋ yaa ye sumasɩ nzɩ, sɩɖɔm nʋmɔʋ kɩɖaɣlʋʋ nɛ pɩnɩɩ-sɩ yɔ, sɩtɔlʋʋ tataa pɛɛ pɛɛ.” Pʋcɔ nɛ sihiɣ ɖoŋ nɛ siwolo sɩ-nʋmɔʋ ɖɔm yɔɔ lɛ, pɩpɔzʋʋ se sɩcaɣ tataa nɛ sɩhɛzɩ evemiye kʋɖʋmɖɩyɛ yaa avema naalɛ, nɛ alɩwaatʋ ndʋ tɩ-taa sumasɩ kpayaa kpaɣ-sɩ kɛlɛʋ yem. Pɩnzɩ 1900 waa ɖɩbazɩyɛ, Ejipiti ɛjaɖɛ pɛdaɣnɩ ajɛɛ lɛɛna pɩtɛɣsɩ ɛzɩ miiliyɔɔwaa naadozo mbʋ yɔ paa pɩnaɣ ŋga.
Kpaɣnɩ mars nɛ piwolo mai fenasɩ taa pɩtɛɣsɩ tɔyaɣ nɛ Izrayɛɛlɩ piya hikiɣ-sɩ nɛ sɩtɔkɩ. Nɛ tam nabʋlɛ sihiɣ waɖɛ nɖɩ. Paa pɩtɛɣsɩ kaatɔyaɣ Sinayii egeetiye taa alɩwaatʋ ndʋ tɩ-taa yɔ, Yehowa ‘tiyaɣni helim nabʋyʋ nɛ pɩlɩɣnɩ teŋgu nɛ kɩ-wayɩ nɛ pɩkɔŋnɩ’ sumasɩ nzɩ Izrayɛɛlɩ piya maalika taa.—Kɩgalʋʋ 11:31.
(Ejipiti Lɩʋ 16:32-34) Moyizi se: “Kɩbaɣlʋ ɖʋ paɣtʋ ndʋ lɛ yɔ: ɩɖʋ caɖaɣ taa ɖo nɛ ɩsɩɩ mɩ-sayɩnaa nɛ paana tɔɔnaɣ ŋga mancalɩ-mɩ lakʋ taa, malɩzɩ-mɩ Ejipiti lɛ.” 33 Moyizi heyi Aarɔɔnɩ se: “Kpaɣ ɖeɣbiye naɖɩyɛ, suu ɖɩ-taa maana caɖasɩ naalɛ ɖo nɛ ŋsɩɩ Kɩbaɣlʋ ɛsɩndaa nɛ ɩtɔsɩ-kʋ mɩ-sayɩnaa.” 34 Mbʋ Aarɔɔnɩ su ɖeɣbiye taa maana ɖo, ɛzɩ Kɩbaɣlʋ kaaɖʋʋ paɣtʋ Moyizi yɔ nɛ ɛsɩɩ paɣtʋ Aseɣɖe aɖakaɣ cɔlɔ.
w06 15/1 31
Tɔm ndʋ ɖa-takayɩsɩ kalɩyaa pɔzʋʋ yɔ
Izrayɛɛlɩ piya lɩnɩ yomiye taa Ejipiti nɛ pitileɖi lɛ, sɩpaɣzɩ miduu tɔɔnaɣ yɔɔ. Nɛ Yehowa ha-sɩ maana. (Ejipiti Lɩʋ 12:17, 18; 16:1-5) Peeɖe Moyizi heyi Aarɔɔnɩ se: “Kpaɣ ɖeɣbiye naɖɩyɛ, suu ɖɩ-taa maana caɖasɩ naalɛ ɖo nɛ ŋsɩɩ Kɩbaɣlʋ ɛsɩndaa nɛ ɩtɔsɩ-kʋ mɩ-sayɩnaa.” Kɛdaɣ wobi pɩ-yɔɔ se: “Mbʋ Aarɔɔnɩ su ɖeɣbiye taa maana ɖo, ɛzɩ Kɩbaɣlʋ kaaɖʋʋ paɣtʋ Moyizi yɔ nɛ ɛsɩɩ paɣtʋ Aseɣɖe aɖakaɣ cɔlɔ.” (Ejipiti Lɩʋ 16:33, 34) Pɩtʋʋ fɛyɩ se Aarɔɔnɩ kaasu maana ɖeɣbiye taa alɩwaatʋ ndʋ tɩ-taa kpaagbaa; ɛlɛ Moyizi kɔm nɛ ɛma ɛgbɛyɛ aɖakaɣ nɛ ɛsɩɩ ka-taa kpatanaa pʋcɔ nɛ papɩzɩ nɛ pasɩɩ maana aseɣɖe aɖakaɣ cɔlɔ.
Bibl kalʋʋ
(Ejipiti Lɩʋ 16:1-18) Pakʋyɩ Elim lɛ, Izrayɛɛlɩ piya canɖaʋ talɩ Sinayii lakʋ taa, kɩwɛ Elim nɛ Sinayii pɛ-hɛkʋ taa, fenaɣ naalɛ ŋga, kɩyakʋ hiu nɛ nʋwa ŋgʋ wiye, palɩɣ Ejipiti tɛtʋ taa yɔ. 2 Nɛ Izrayɛɛlɩ piya canɖaʋ kpeekpe midi kɩ-mɔɔŋ tɛɛ nɛ Moyizi nɛ Aarɔɔnɩ lakʋ taa, 3 nɛ Izrayɛɛlɩ piya tɔm-wɛ se: “Ɛbɛ laba nɛ ɖɩtɩsɩ Kɩbaɣlʋ nesi tɛɛ Ejipiti tɛtʋ taa, ɖenɖe ɖɩɩcaɣ nandʋ ɖeɣbee cɔlɔ nɛ ɖɩtɔkɩ tɔɔnaɣ nɛ ɖɩhakɩ yem yɔ? Pɩlabɩ we nɛ ɩkɔnɩ-ɖʋ lakʋ kʋnɛ kɩ-taa nɛ ɩkʋʋ kazɩɣa kanɛ yɔ ñɔɔsɩ?” 4 Kɩbaɣlʋ heyi Moyizi se: “Mankaɣ labʋ nɛ tɔɔnaɣ tii-mɩ nɛ ɛsɔdaa kiŋ ɛzɩ tɛʋ nɩʋ yɔ; ɛyaa kaalɩɣ nɛ pokuu mbʋ pɩtalɩɣ-wɛ kɩyakʋ kɩyakʋ yɔ, nɛ mantakɩ-wɛ nɛ mana se pɔɖɔŋ yaa paaɖɔŋ man-paɣtʋ yɔɔ. 5 Ɛlɛ kɩyakʋ loɖo ñɩŋgʋ wiye paañɔɔzʋʋ mbʋ pokuwa yɔ lɛ, pɩpɩsɩ mbʋ patiikuu kɩyakʋ kɩyakʋ yɔ pɩ-tɛ tam nabʋlɛ.” 6 Moyizi nɛ Aarɔɔnɩ peheyi Izrayɛɛlɩ piya kpeekpe se: “Ðanaɣ lɛ ɩkaɣ tɩlʋʋ se Kɩbaɣlʋ lɩzɩnɩ-mɩ Ejipiti tɛtʋ taa; 7 nɛ tanaŋ tɛɛ lɛ ɩkaɣ nɩʋ Kɩbaɣlʋ yuŋ taŋ. Ɛnɩ imidi mɩ-mɔɔŋ tɛɛ nɛ Kɩbaɣlʋ. Ða yɔ, ɖɩkɛ we nɛ imidiɣ mɩ-mɔɔŋ tɛɛ nɛ ɖʋ?” 8 Ɛlɛ Moyizi se: “Kɩbaɣlʋ kaɣ-mɩ cɛlʋʋ ɖanaɣ kanɛ nandʋ se ɩtɔɔ nɛ, tanaŋ tɛɛ lɛ, tɔɔnaɣ kaɣ-mɩ tɔyɩnʋʋ, mbʋ yɔ ɛnɩ mɩ-mɔɔŋ tɛɛ miduu mbʋ imidini-i yɔ. Ða yɔ ɖɩkɛ we? Pɩtɩkɛ ɖa imidini mɩ-mɔɔŋ tɛɛ, ɛlɛ Kɩbaɣlʋ.” 9 Nɛ Moyizi heyi Aarɔɔnɩ se: “Heyi Izrayɛɛlɩ piya kazɩɣa se: Ɩlɩɩ Kɩbaɣlʋ ɛsɩndaa; ɛnɩ mɩ-mɔɔŋ tɛɛ miduu.” 10 Nɛ Aarɔɔnɩ yɔɔdaɣnɩ Izrayɛɛlɩ piya kasɩɣa lɛ, pekisini lakʋ taa nɛ pana Kɩbaɣlʋ ɖoŋ lɩ mɩndʋ yɔɔ. 11 Ðɩnɛ ɛlɛ Kɩbaɣlʋ yɔɔdɩnɩ Moyizi nɛ eheyi-i se: 12 Manɩ Izrayɛɛlɩ piya mɔŋ tɛɛ miduu. Yɔɔdɩnɩ-wɛ se: Ðanaɣ lɛ ɩkaɣ nandʋ tɔɔʋ nɛ tanaŋ tɛɛ lɛ ɩkaɣ tɔɔnaɣ haɣʋ nɛ ɩkaɣ tɩlʋʋ se mɛkɛnɩ mɩ-Kɩbaɣlʋ Ɛsɔ.” 13 Toovenim ɖɔɖɔ, ɖanaɣ ɖanaa lɛ, wɩtɩlɩwɩsɩ kpa sɩwadɩ maalika yɔɔ, nɛ tɛʋ fema tanaŋ tɛɛ lɛ ɖoluu nakʋyʋ pɔ maalika cɔlɔ kpɛɛɛ pɩcɔɔ pɩta. 14 Ðoluu ŋgʋ kɩkʋyaa lɛ, pana lakʋ taa tataa pʋyʋ nɔɔyʋ ɖululu, pɩ-taa nɛ pee, pɩwɛ ɛzɩ ɖɩyalɩm yɔ, tataa. 15 Izrayɛɛlɩ piya na mbʋ lɛ, sɩpɔzʋʋ ɖama se: “Maana, ‘pʋ-tɔbʋʋ se ɛbɛ lɛ mbʋ yɔ?’”, mbʋ yɔ sitaaɖiɣzina se pɩkɛ we. Moyizi heyi-wɛ se: “Kpɔnʋ ŋgʋ Kɩbaɣlʋ cɛlɩɣ-mɩ se ɩtɔɔ lɛ yɔ. 16 Tɔm ndʋ ɛpakɩnɩ-mɩ lɛ yɔ: Ikuu pɩmaɣnɩ paa weyi lɛ ɛ-tɔɔʋ, ɛzɩ ɛyaa ɖɔ hɔŋ taa ɖɔʋ mbʋ yɔ. Mɩ-taa paa weyi lɛ ekuu nɛ ewoni ɛ nɛ mba paka kizinziku yɔ. 17 Izrayɛɛlɩ piya ña paɣtʋ ndʋ, pokuu, lalaa sakɩyɛ, lalaa ññɩɩ. 18 Pɛkɛdɩ maana ŋgʋ pokuwa yɔ lɛ, weyi eeku maana sakɩyɛ yɔ, ɛtɩkɩlɩ wɛnʋʋ, nɛ weyi eeku pazɩ yɔ, pɩɖɔ-ɩ. Paa weyi lɛ ekuu mbʋ pɩwɛ-ɩ kɛdɛɖaɣ yɔ.
17-23 AOÛT
ÑƖM MBƲ PƖWƐ ƐSƆTƆM TAA YƆ | EJIPITI LƖƲ 17-18
“Mba pasɩm po-ɖoŋ kamaɣ yɔ, pafalɩsɩɣ lalaa nɛ paɖʋʋ-wɛ tʋma”
(Ejipiti Lɩʋ 18:17, 18) Nɛ ɛlɛ se: “Ŋŋlakɩ tʋmɩyɛ kɩbanɖɛ. 18 Ŋwɩsɩɣ ña-tɩ nɛ ŋtɛ ŋwɩɣ samaɣ ŋga kakɩlɩ-ŋ ɖoŋ yɔ, ŋŋpɩzɩɣ ŋlabɩ-ɖɩ ñe-yeke.
w13 1/2 6
Moyizi kɛ abalʋ weyi ɛɛwɛnɩ sɔɔlɩm yɔ
Moyizi wɩlɩ sɔɔlɩm e-koobiya Izrayɛɛlɩ piya. Izrayɛɛlɩ piya kaanawa se Yehowa wɛɛ nɛ ɛtɩŋɩɣnɩ Moyizi yɔɔ nɛ eɖiyiɣ ɛ-samaɣ, pʋyɔɔ siheyaɣ Moyizi kala wena sɩkataɣ yɔ. Ðɩkalɩɣ se: “Samaɣ sɩŋ ɛ-cɔlɔ ɖooo tanaŋ tɛɛ pɩkɔɔ pɩtalɩ ɖanaɣ.” (Ejipiti Lɩʋ 18:13-16) Maɣzɩ nɛ ŋna pana wena Moyizi ñakaɣ nɛ ewelisiɣni Izrayɛɛlɩ piya kpaɣnɩ tanaŋ tɛɛ nɛ piwolo ɖanaɣ yɔ. Izrayɛɛlɩ piya wokaɣ ɛ-cɔlɔ nɛ siheyiɣ-i sɩ-kɩcɛyɩm. Paa mbʋ yɔ, Moyizi taa kaawɛ leleŋ se ɛsɩnɩ samaɣ ŋga ɛsɔɔlaa yɔ.
(Ejipiti Lɩʋ 18:21, 22) Ɛlɛ lɩzɩ samaɣ kpeekpe taa ɛyaa kikpeetaa nɛ mba pañaŋ Ɛsɔ yɔ, ɛyaa toovenim tɩnaa nɛ mba pɛfɛyɩ lɛɣʋ yɔ nɛ ŋkpa-wɛ samaɣ ñʋndɩnaa: ɛyaa kudokiŋ ñʋndɩnaa, ɛyaa mɩnɩŋ ñʋndɩnaa, nɩɩnʋwa ñʋndɩnaa nɛ hiŋ ñʋndɩnaa, 22 mba paahʋʋ samaɣ tɔm paa ɖooye yɔ. Ndʋ ndʋ tɩkɩlaa lɛ, pɔkɔnɩ-ŋ tʋ, ndʋ tɩkɛ cikpetu lɛ pahʋʋ-tʋ; pasɩ ña-tɩ sʋʋtʋ nɛ pasɩnɩ-ŋ tɩ-sɩɣlʋʋ.
w03 1/11 6 § 1
Pɩsa nɛ ɖihiɣ koboyaɣ lɛ, pɩwɛɛ se ɖɩkɛ ɛyaa mba papɩzɩɣ nɛ pataa-wɛ liu yɔ
Pɩwɛɛ se abalaa mba, pawɩlɩ se pɛwɛnɩ wɛtʋ ndʋ tɩkɛdɩɣnɩ Ɛsɔ yɔ, pʋcɔ nɛ pataa-wɛ liu nɛ paha-wɛ wala. Pɩwɛɛ se pawɩlɩ kpayɩ kpayɩ se pɛwɛnɩ Ɛsɔ sɔɔndʋ seu, pɛwɛnɩ ñamtʋ Lɩzɩyʋ yɔɔ nɛ patɩsɔɔlɩ se pala mbʋ pɩɩkɛdɩɣnɩ-ɩ yɔ. Paa weyi ɛsɩm ɛyaa mba se palakɩ mbʋ payɩ papɩzɩɣ yɔ se pɔɖɔ Ɛsɔ paɣtʋ yɔɔ. Papaɖɩɣ mulum kɛzɛɣa, pʋ-tɔbʋʋ lɛ se pɔñɔnɩ wezuu caɣʋ kɩbaŋʋ nɛ paakaɣ yebu se wala wena pɛwɛna yɔ, atuyi-wɛ nɛ pala mbʋ pɩtɩtʋʋzɩ yɔ. Paatɩŋɩɣnɩ wala wena pɛwɛna yɔ a-yɔɔ nɛ pañɩnɩɣ pa-maɣmaɣ, pɔ-hɔŋ taa ñɩma yaa pa-taabalaa kɛzɛsɩ.
(Ejipiti Lɩʋ 18:24, 25) Kpaagbaa mbʋ lɛ, Moyizi welisini ɛ-ɛtɩ nɛ ɛla ndʋ payɩ eheyi-i yɔ tɩ-yɔɔ. 25 Moyizi lɩzɩ abalaa mba pamʋnaa yɔ Izrayɛɛlɩ kpeekpe taa nɛ eyele nɛ pɛkɛ samaɣ ñʋndɩnaa, ɛyaa kudokiŋ ñʋndɩnaa, mɩnɩŋ ñʋndɩnaa, nɩɩnʋwawaa ñʋndɩnaa, nɛ hiŋ ñʋndɩnaa.
w02 15/5 25 § 5
Ɛyaa mba pɛwɛ siɣsiɣ yɔ, pañakɩ pana se pɛwɛɛ cɩŋgɩlɩm
Moyizi kaasɩm e-ɖoŋ kamaɣ nɛ ɛɛwɛnɩ tɩ luzuu ɖɔɖɔ. Moyizi ñakaɣ pana nɛ ɛsɩɣnɩ lalaa se pɔcɔnɩ pa-kɩcɛyɩm ɖeɖe nɛ tʋmɩyɛ nɖɩ ɖɩnɩɣaɣ-ɩ siŋŋ. Pʋyɔɔ ɛ-yɩtɩ Yetro tasɩ-ɩ lɔŋ kɩbaŋ nɩɩyɩ. Eheyi-i se ɛlɩzɩ abalaa mba pamʋnaa yɔ nɛ ɛpasɩ ɛ-tʋmɩyɛ yɔɔ nɛ ɛcɛlɩ-wɛ. Moyizi kaasɩm e-ɖoŋ kamaɣ, pʋyɔɔ etisaa nɛ ɛmʋ lɔŋ tasʋʋ mbʋ. (Ejipiti Lɩʋ 18:17-26; Kɩgalʋʋ 12:3) Ɛyʋ weyi ɛsɩm e-ɖoŋ kamaɣ yɔ, etisiɣ faaa nɛ ɛpasɩɣ ɛ-tʋma yɔɔ nɛ ɛɖʋʋ lalaa. Ɛɛmaɣzɩɣ se ye pɛcɛlɩ ɛ-tʋma naayɛ koobiya lalaa mba pamʋnaa yɔ, ɛɛtasɩɣ pɩzʋʋ nɛ ɛcɔnɩ tʋma ana a-yɔɔ camɩyɛ. (Kɩgalʋʋ 11:16, 17, 26-29) Ɛlɛ, ɛsɔɔlaa se ɛsɩnɩ lalaa nɛ pɛɖɛɛnɩ ɛsɩndaa fezuu taa. (1 Timootee 4:15) Pɩtɩkɛ mbʋ pɩwɛɛ se ɖa ɖɔɖɔ ɖɩla yaa we?
Ðɩñɩnɩ fezuu taa ñɩm
(Ejipiti Lɩʋ 17:11-13) Alɩwaatʋ ndʋ Moyizi nesi wɛɣ ɛsɔdaa yɔ, Izrayɛɛlɩ piya wakaɣ, ɛlɛ etiiyeki e-nesi nɛ sitii lɛ, Amalɛɛkɩ mba wakɩna. 12 Pɩnɩ Moyizi nesi lɛ, pakpaɣ pɩyɛ nɛ pasɩɩ ɛ-tɛɛ nɛ ɛcaɣ ɖɩ-yɔɔ. Nɛ Aarɔɔnɩ nɛ Huuri pasɩŋ ɛ-cɔlɔ ceemenje, nɛ peteɣli e-nesi, nɛ piyele nɛ e-nesi wɛɛ ɛsɔdaa mbʋ nɛ wɩsɩ kɔɔ sɩɖʋ. 13 Mbʋ pɩlaba nɛ Yozuwee wa Amalɛɛkɩ nɛ ɛ-samaɣ nɛ laɣɖɛ.
“Ñe-nesi itaatii yɔɔɔ”
14 Alɩwaatʋ ndʋ Izrayɛɛlɩ piya nɛ Amalɛɛkɩ mba poyowaɣ yɔ, Aarɔɔnɩ nɛ Huuri paasɩnɩ Moyizi nɛ e-nesi wɛɛ ɛsɔdaa mbʋ, halɩ you kɔɔ nɛ kɩtɛ. Ða ɖɔɖɔ, ɖɩpɩzɩɣ nɛ ɖɩñɩnɩ nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩsɩnɩ lalaa yɔ. Mba ɖɩpɩzɩɣ nɛ ɖɩsɩna? Ðɩpɩzɩɣ ɖɩsɩnɩ akpadɩyaa, kʋdɔndɩnaa, mba pɔ-hɔʋ taa mba nazɩɣ-wɛ yɔ, mba pɛwɛ pe-ɖeke yɔ, yaa mba pelesi pɛ-ɛyaa kʋsɔɔlaa yɔ. Ðɩpɩzɩɣ ɖɔɖɔ nɛ ɖɩsɩnɩ evebiya nɛ pɛlaa mba pañɩkɩɣ pɔ-yɔɔ se pala lakasɩ kɩdɛkɛdɩsɩ yaa pala sukuli kɩɖaɣlʋʋ, pañɩnɩ ɛjaɖɛ yɔɔ ñɩm kadadayaɣ yaa pala tʋma sɔsɔna nɛ papɩsɩ caa akelewaa yɔ. (1 Tes. 3:1-3; 5:11, 14) Ñɩnɩ nɛ ŋna ɛzɩma ŋpɩzɩɣ nɛ ŋkpazɩ lalaa ɖoŋ siŋŋ Kewiyaɣ Kpaaŋ taa, tɔm susuu taa nɛ alɩwaatʋ ndʋ ɩkpɛndɩɣ se ɩtɔɔ tɔɔnaɣ nakɛyɛ yɔ. Ŋpɩzɩɣ ɖɔɖɔ nɛ ŋkpazɩ-wɛ ɖoŋ alɩwaatʋ ndʋ ña nɛ wɛ ɩyɔɔdʋʋ kaŋgalaafu yɔɔ yɔ.
(Ejipiti Lɩʋ 17:14) Nɛ Yehowa heyi Moyizi se: “Ma tɔm tʋnɛ takayaɣ taa nɛ pɩkɛ mbʋ pɩ-yɔɔ pɔtɔzʋʋ yɔ nɛ ŋtasɩ-tʋ heyuu Yozuwee, ‘Mankaɣ Amalɛɛkɩ hɩzʋʋ caɣ caɣ tɛtʋ kpeekpe yɔɔ nɛ paakaɣ ɛ-yɔɔ tɔzʋʋ wiɖiyi.’”
it-1 395 § 1
Takayɩsɩ nzɩ petisaa se fezuu kiɖeɖeu sɩnɩna nɛ pama-sɩ yɔ
Moyizi ma takayɩsɩ nzɩ yɔ, sɩ-taa tɔm wɩlɩɣ kpayɩ kpayɩ se sɩwɛ takayɩsɩ nzɩ fezuu kiɖeɖeu ɖiyaa nɛ pama yɔ sɩ-taa, nɛ pama-sɩ se pɩsɩnɩ Ɛsɔ samaɣ nɛ kɛsɛɛ-ɩ camɩyɛ. Pɩtɩkɛ Moyizi maɣmaɣ kpaɣnɩ lɩmaɣza se ɛɖɛɣ Izrayɛɛlɩ piya nɔɔ nɛ eɖiyi-sɩ. Toovenim taa lɛ, kiɖe tɛɛ lɛ, eekizi tʋmɩyɛ nɖɩ. (Ejl 3:10, 11; 4:10-14) Ɛlɛ, Ɛsɔ lɩzɩnɩ Moyizi nɛ ɛha-ɩ ɖoŋ nɛ ɛla piti lakasɩ nzɩ siyeba nɛ halɩ Farawɔɔ tɛ Maajiki laɖaa tisi se Ɛsɔ cɔlɔ Moyizi ɖoŋ lɩnaa yɔ. (Ejl 4:1-9; 8:16-19) Ye mbʋ pɩtɩkɛ Moyizi maɣmaɣ kaakpaɣnɩ lɩmaɣza se ɛkɛɣ tɔm yɔɔdɩyʋ nɛ takayɩsɩ mayʋ. Ɛlɛ, Moyizi ñam Yehowa paɣtʋ, pʋyɔɔ fezuu kiɖeɖeu sɩnɩ-ɩ nɛ ɛyɔɔdɩ Ɛsɔtɔm nɛ pʋwayɩ lɛ, ɛma Bibl taa takayɩsɩ nasɩyɩ.—Ejl 17:14.
Bibl kalʋʋ
(Ejipiti Lɩʋ 17:1-16) Mbʋ lɛ Izrayɛɛlɩ kazɩɣa kpeekpe kʋyɩ Sinayii lakʋ taa, ɛzɩ Kɩbaɣlʋ pɔzʋʋ yɔ, nɛ paɖʋ nʋmɔʋ nɛ powolo pasɩŋ Refidim, ɖenɖe lɩm fɛyɩ se samaɣ ɛkʋ kɔ-lɔkɔtʋ yɔ. 2 Samaɣ ŋga koyooni Moyizi mbʋ yɔ se: “Ha-ɖʋ lɩm nɛ ɖɩñɔɔ!” Moyizi cosi-wɛ se: “Pɩlabɩ ɛzɩma nɛ iyouni-m? Pɩlabɩ ɛzɩma nɛ ɩtakɩɣ Kɩbaɣlʋ?” 3 Lɔkɔtʋ ɖɔkɩ samaɣ peeɖe lɛ, kewiini Moyizi nɛ kɔtɔ se: “Ɛbɛ yɔɔ ŋlɩzɩ-ɖʋ Ejipiti? Se ŋkʋ-m lɔkɔtʋ, ma, men-piya nɛ man-kpɩna?” 4 Moyizi miŋ Kɩbaɣlʋ se: “Mala ɛzɩma samaɣ kanɛ yɔ, kɔkɔŋ kayaɣ-m pɛɛ?” 5 Kɩbaɣlʋ cosi Moyizi se: “Ðɛɛ samaɣ nɔɔ, ña nɛ Izrayɛɛlɩ taa sɔsaa nabɛyɛ; kpaɣ ñe-nesi tɛɛ ɖaʋ ŋgʋ ŋŋmabɩnɩ Ejipiti pɔɔ yɔ nɛ ŋwolo! 6 Ma yɔ, mankaɣ sɩŋʋʋ ñɛ-ɛsɩndaa peeɖe Orɛɛbʋ kaaʋ yɔɔ. Ŋmakɩ kaaʋ lɛ, lɩm kaɣ yabɩtʋʋ nɛ ɛyaa kaɣ hiɣu lɩm nɛ pɔñɔɔ.” Moyizi la mbʋ Izrayɛɛlɩ sɔsaa ɛsɩndaa. 7 Payaa peeɖe se Masa nɛ Meriba, Izrayɛɛlɩ piya tɔm caʋ yɔɔ nɛ takʋʋ mbʋ patakɩnɩ Kɩbaɣlʋ yɔ pɩ-yɔɔ, nɛ pɔtɔ se: “Kɩbaɣlʋ wɛ ɖɛ-hɛkʋ taa, yaa ɛfɛyɩ tɛ?” 8 Amalɛɛkɩ lɩɩ eyou Izrayɛɛlɩ mba Refidim fɛɛʋ taa. 9 Ðɩnɛ lɛ Moyizi heyi Yozuwee se: “Tɔzɩ ɛyaa, nɛ cee tanaŋ tɛɛ ŋlɩɩ ŋyoo Amalɛɛkɩ. Ma yɔ, mankaɣ sɩŋʋʋ piyaɣ ñʋʋ taa, ma nɛ Ɛsɔ ɖaʋ me-nesi tɛɛ.” 10 Yozuwee la ɛzɩ Moyizi tɔm se ɛla yɔ nɛ eyoo Amalɛɛkɩ; piyele Moyizi nɛ Aarɔɔnɩ nɛ Uuri pakpa piyaɣ ñʋʋ taa. 11 Moyizi ɛkpazɩ nesi lɛ, Izrayɛɛlɩ wakɩna; nɛ etisi nesi lɛ, Amalɛɛkɩ wakɩna. 12 Pɩkɛdaa lɛ pɩnɩ Moyizi nesi; pakpaɣ pɩyɛ pɔpɔ-ɩ nɛ ɛcaɣ ɖɩ-yɔɔ; Aarɔɔnɩ nɛ Uuri pacaɣ ɛ-cɔlɔ ceemenje nɛ pɔɖɔkɩ e-nesi ɛsɔdaa. Nɛ e-nesi tɩkaa kaaʋ, pɩkɔɔ pɩtalɩ wɩsɩ ɖʋwa. 13 Nɛ Yozuwee wa Amalɛɛkɩ ɛyaa nɛ laɣɖɛ. 14 Kɩbaɣlʋ heyi Moyizi se: “Ma tɔm ndʋ takayaɣ taa nɛ paatɔzʋʋ tɩ-yɔɔ tam nɛ ŋheyi-tʋ Yozuwee nɩŋgbaaŋ taa; mankaɣ mʋʋzʋʋ Amalɛɛkɩ hɩɖɛ tɛtʋ yɔɔ. 15 Nɛ Moyizi ma kɩlaʋ altaaru nɛ ɛyaa-kʋ se Kɩbaɣlʋ Nesi, 16 mbʋ yɔ ɛtɔŋaɣ se: “Kɩbaɣlʋ tɔʋ wɛ e-nesi tɛɛ! Kɩbaɣlʋ you Amalɛɛkɩ pɩnzɩ nɛ pɩnzɩ.”
24-30 AOÛT
ÑƖM MBƲ PƖWƐ ƐSƆTƆM TAA YƆ | EJIPITI LƖƲ 19-20
“Ɛzɩma Paɣtʋ Hiu tukuuni-ŋ yɔ”
(Ejipiti Lɩʋ 20:3-7) Taawɛɛnɩ ɛsɔnaa nabɛyɛ mɛ-ɛsɩndaa. 4 Taasaɣ ña-tɩ sɩʋ kpeliɣa, yaa mbʋ pɩwɛ ɛsɔdaa nɛ tataa nɛ mbʋ pɩwɛ lɩm tɛɛ yɔ pɩ-lɛzʋʋ nakʋyʋ kaaʋ. 5 Taaluŋ pɩ-tɛɛ nɛ taalizi-pʋ kilizaɣ nakɛyɛ, mbʋ pʋyɔɔ yɔ mɛnkɛ Kɩbaɣlʋ ñɛ-Ɛsɔ, Ɛsɔ weyi ɛwɛ sʋsɩ yɔ, nɛ mɔhɔŋ piya nɩŋgbaaŋ sɩ-caanaa kɩwɛɛkɩm yɔɔ, nɛ mba paanaɣ-m nɛ ɛsɩyɛ yɔ pa-sayɩnaa sayɩnaa, 6 Ɛlɛ menkpeɣu ɛyaa ɛgbɔŋ mba pɔsɔɔlʋʋ-m nɛ pɔɖɔŋ man-paɣtʋ yɔɔ yɔ. 7 Taaɖuuni ña-Kɩbaɣlʋ Ɛsɔ hɩɖɛ yem falaa, mbʋ yɔ Kɩbaɣlʋ eeyeki weyi ɛyaɣ ɛ-hɩɖɛ cɛtɩm taa yɔ ɛ-nɩŋgbaaŋ hɔm.
w89 15/11 6 § 1
Ɛzɩma tɩyɛ Paɣtʋ Hiu tukuuni-ŋ?
Paɣtʋ naanza kajalaɣ ñɩndʋ ñɩkɩɣ niye mbʋ mbʋ pɩwɛɛ se ɖɩla Yehowa yɔ pɩ-yɔɔ. Kajalaɣ paɣtʋ wɩlɩɣ se ɛkɛ Ɛsɔ weyi pɩpɔzʋʋ se paa ɛzɩmtaa lɛ pɛsɛɛ e-ɖeke yɔ. (Maatiyee 4:10) Naalɛ ñɩndʋ wɩlɩɣ se pɩtɩpɔzɩ se ɛ-sɛyʋ nɔɔyʋ ɛlabɩnɩ tʋmɩyɛ sɩʋ kpelisi. (1 Yohanɛɛsɩ 5:21) Tozo ñɩndʋ wɩlɩɣ se pɩcɛyaa se palabɩnɩ Ɛsɔ hɩɖɛ tʋmɩyɛ nɛ ñamtʋ paa ɛzɩmtaa. (Yohanɛɛsɩ 17:26; Roma mba 10:13) Naanza ñɩndʋ wɩlɩɣ se pɩwɛɛ se ɖɩsɛɛ-ɩ nɛ ɖe-ciyam pilim. Pɩsɩɣnɩ-ɖʋ nɛ ‘ɖɩñɔɔzɩ hɛzʋʋ nabʋyʋ nɛ ɖɩsɩɩ Ɛsɔ’ se pɩsa nɛ ɖɩtaala mbʋ pɩtʋʋzɩ ɖa-maɣmaɣ ɖɛ-ɛsɩndaa yɔ.—Ebree mba 4:9, 10.
(Ejipiti Lɩʋ 20:8-11) Tɔzɩ nɛ ŋpɩsɩ Kɩbaɣlʋ kɩyakʋ kiɖeɖeu. 9 Ŋŋla tʋmɩyɛ kɩyakɩŋ loɖo nɛ ŋla ña-tʋma kpeekpe; 10 kɩyakʋ lʋbɛ ñɩŋgʋ kɛ ña-Kɩbaɣlʋ Ɛsɔ kɩyakʋ kɩhɛzʋʋ, Sabaatɩ; taala tʋmɩyɛ naɖɩyɛ, ña nɛ ña-pɩyalʋ nɛ ñɛ-pɛlɛ, ño-yom, abalʋ yaa halʋ, ña-kpaŋaɣ nɛ ɛgɔm weyi ɛwɛ ña-ɖɩɣa taa yɔ. 11 Kɩyakɩŋ loɖo Kɩbaɣlʋ lɩzɩnɩ Ɛsɔ nɛ tɛtʋ nɛ lɩm nɛ mbʋ mbʋ pɩwɛ pɩ-taa yɔ, pi-kpeekpe, nɛ ɛhɛzɩ kɩyakʋ lʋbɛ ŋgʋ wiye; mbʋ yebina nɛ Kɩbaɣlʋ wazɩ Sabaatɩ yɔɔ nɛ ɛpɩsɩ kɩyakʋ ŋgʋ kiɖeɖeu.
(Ejipiti Lɩʋ 20:12-17) Ña ña-caa nɛ ño-ɖoo nɛ ŋcaɣ pɩɖɔɔ tɛtʋ ndʋ Kɩbaɣlʋ, ñɛ-Ɛsɔ, kaɣ-ŋ haʋ yɔ, tɩ-yɔɔ. 13 Taakʋ ɛyʋ 14 Taala acɛyɛ 15 Taamɩlɩ 16 Taacɛtɩ tɔm ña-taabalʋ yɔɔ. 17 Ñe-liu tɛɛ ɛtaakɔtɩnɩ ña-taabalʋ ɖɩɣa. Ñe-liu tɛɛ ɛtaakɔtɩnɩ ɛ-halʋ, e-yom, abalʋ yaa halʋ, ɛ-nɔ, ɛ-kpaŋaɣ, nɛ mbʋ mbʋ ɛtɩna yɔ.”
w89 15/11 6 § 2-3
Ɛzɩma tɩyɛ Paɣtʋ Hiu tukuuni-ŋ?
Paɣtʋ kagbanzɩ ñɩndʋ: Pɩpɔzʋʋ se piya ɩña sɩ-lʋlɩyaa nɛ pɩsa nɛ nɔɔ kʋɖʋmaɣ wɛɛ hɔʋ taa nɛ sihiɣ ɖɔɖɔ Yehowa wazasɩ. Nɛ pɔsɔzɩ tɔm kɩbandʋ tʋnɛ: “Mbʋ kɛnɩ kajalaɣ paɣtʋ ndʋ tɩ-taa wɛ lidaʋ tɔm tʋnɛ yɔ.” Ye ŋñaŋ ña-lʋlɩyaa yɔ, pɩtasɩna se “pɩɖɔŋnɩ-ŋ camɩyɛ” lɛ, piyeki nɛ “ŋcaɣ tɛtʋ yɔɔ nɛ pileɖi.” (Efɛɛzɩ mba 6:1-3) Sɔnɔ ɖɩwɛ ɛjaɖɛ ɖɩnɛ ɖɩ-tɛ kɛdɛzaɣ kɩyakɩŋ taa, nɛ pʋyɔɔ lɛ ye piya ɩñaŋ sɩ-lʋlɩyaa yɔ, pɩpɩzɩɣ pɩha-sɩ waɖɛ nɛ sɩcaɣ wezuu tamtam.—2 Timootee 3:1; Yohanɛɛsɩ 11:26.
Ye ɖɩsɔɔlɩ ɛyaa lalaa yɔ, ɖɩɩkaɣ labʋ mbʋ pɩpɩzɩɣ nɛ pɩkɔnɩ-wɛ kaɖɛ yɔ. Pʋyɔɔ lɛ, ɖiseɣ kɩdɛkɛdɩm pʋnɛ: Ɛyaa kʋʋ (Paɣtʋ loɖo ñɩndʋ), acɛyɛ (Paɣtʋ lʋbɛ ñɩndʋ), mɩlɩm (Paɣtʋ lutozo ñɩndʋ), cɛtɩm tɔm yɔɔdʋʋ lalaa yɔɔ (Paɣtʋ nakʋ ñɩndʋ). (1 Yohanɛɛsɩ 3:10-12; Ebree mba 13:4; Efɛɛzɩ mba 4:28; Maatiyee 5:37; Aduwa 6:16-19) Ɛlɛ ɛbɛ pɩwɛɛ se pituyi-ɖʋ nɛ ɖise kɩdɛkɛdɩm mbʋ? Paɣtʋ hiu ñɩndʋ ndʋ tɩtɔŋ se ɖe-liu tɛɛ ɛtaakɔtɩnɩ lalaa ñɩm yɔ, tɩwɩlɩɣ se pɩcɛyaa se paa ɛzɩmtaa lɛ, ɖa-lɩmaɣza ɩwɛɛ kele kele.—Aduwa 21:2.
Ðɩñɩnɩ fezuu taa ñɩm
(Ejipiti Lɩʋ 19:5, 6) Lɛɛlɛɛyɔ, ye ɩñaŋ mɔ-nɔɔ nɛ ɩɖɔkʋʋ mɛ-ɛgbɛyɛ yɔ, ɩkaɣ kɛʋ man-samaɣ ɛyaa kpeekpe taa; matɩnɩ tɛtʋ kpeekpe. 6 Ɩkaɣ-m kɛʋ cɔjɔtʋ kewiyaɣ nɛ ɛjaɖɛ kiɖeɖee. Tɔm ndʋ ŋŋheyi Izrayɛɛlɩ piya lɛ lɛ.”
it-2 658 § 5, 6
Cɔjɔtʋ
Krɩstʋ ñɩma cɔjɔtʋ. Yehowa labɩ tamaɣ Izrayɛɛlɩ piya se ye sɩɖɔkɩ ɛgbɛyɛ nɖɩ ɛ nɛ sɩ paɖʋwa yɔ camɩyɛ yɔ, sɩkaɣ kɛnʋʋ “cɔjɔtʋ kewiyaɣ nɛ ɛjaɖɛ kiɖeɖee.” (Ejl 19:6) Ɛlɛ Aarɔɔnɩ liɖe taa cɔjɔtʋ kaɣ sɩʋ tɩnaɣ alɩwaatʋ ndʋ cɔjɔtʋ sɔsɔtʋ ndʋ tɩɩsɩŋnaa yɔ tɩkɔŋ yɔ. (Ebr 8:4, 5) Ye mbʋ, tɩwɛɣ mbʋ pɩkɔɔ pɩsɩɩnɩ alɩwaatʋ ndʋ Paɣtʋ ɛgbɛyɛ sɩɣ tɩnaɣ nɛ ɛgbɛyɛ kɩfaɖɛ paɣzɩ tʋmɩyɛ yɔ. (Ebr 7:11-14; 8:6, 7, 13) Kiɖe tɛɛ lɛ, Izrayɛɛlɩ piya ɖeke Yehowa kaaha waɖɛ se sɩkɛ cɔjɔnaa e-Kewiyaɣ taa, ɛlɛ pʋwayɩ lɛ ɛkɔm nɛ ɛha waɖɛ nɖɩ ɖɔɖɔ sɩɩnaa layaa mba papɩsɩ Krɩstʋ mba yɔ.—Tʋm 10:34, 35; 15:14; Rom 10:21.
Yuuda mba nabɛyɛ cabɩ yem kaatisini Yesu yɔɔ. Ye mbʋ, Yuuda ɛjaɖɛ tɩpɩsɩ cɔjɔtʋ kewiyaɣ nɛ ɛjaɖɛ kiɖeɖee. (Rom 11:7, 20) Izrayɛɛlɩ piya kaañamtʋ yɔɔ lɛ, Yehowa kaatɩŋnɩ nayʋ Ozee yɔɔ nɛ eheyi-sɩ se: “Mɛ-ɛyaa samaɣ leki ka-kɩɩsɩmtʋ yɔɔ. Mbʋ pʋyɔɔ yɔ ŋlɔ sɩmtʋ, mankaɣ-ŋ tuzuu nɛ mɔlɔ se ŋtaala cɔjɔtʋ tʋmɩyɛ; nɛ mbʋ pʋyɔɔ yɔ ŋsɔ ñɛ-Ɛsɔ paɣtʋ yɔɔ, nɛ ma ɖɔɖɔ mankaɣ sɔʋ ñe-piya yɔɔ.” (Ozee 4:6) Pʋyɔɔ Yesu kaaheyi Yuuda Ɛsɔ sɛtʋ ñʋndɩnaa se: “Pakaɣ mʋʋ Ɛsɔ Kewiyaɣ mi-nesi tɛɛ nɛ pɛcɛlɩ-kɛ ɛjaɖɛ nɖɩ ɖɩlʋlʋʋ ke-pee yɔ.” (Mt 21:43) Paa mbʋ yɔ alɩwaatʋ ndʋ Yesu kaawɛ tɛtʋ yɔɔ yɔ, ɛɛwɛ Moyizi paɣtʋ tɛɛ; nɛ ɛnawa se alɩwaatʋ ndʋ tɩ-taa lɛ Aarɔɔnɩ liɖe taa cɔjɔtʋ lakaɣnɩ tʋmɩyɛ. Pʋyɔɔ eeheyi canasɩ nzɩ ɛɛwawa yɔ se siwolo nɛ sɩwɩlɩ sɩ-tɩ cɔjɔnaa.—Mt 8:4; Mk 1:44; Lk 17:14.
(Ejipiti Lɩʋ 20:4, 5) Taasaɣ ña-tɩ sɩʋ kpeliɣa, yaa mbʋ pɩwɛ ɛsɔdaa nɛ tataa nɛ mbʋ pɩwɛ lɩm tɛɛ yɔ pɩ-lɛzʋʋ nakʋyʋ kaaʋ. 5 Taaluŋ pɩ-tɛɛ nɛ taalizi-pʋ kilizaɣ nakɛyɛ, mbʋ pʋyɔɔ yɔ mɛnkɛ Kɩbaɣlʋ ñɛ-Ɛsɔ, Ɛsɔ weyi ɛwɛ sʋsɩ yɔ, nɛ mɔhɔŋ piya nɩŋgbaaŋ sɩ-caanaa kɩwɛɛkɩm yɔɔ, nɛ mba paanaɣ-m nɛ ɛsɩyɛ yɔ pa-sayɩnaa sayɩnaa.
w04 15/3 27 § 1
Ejipiti Lɩʋ takayaɣ taa lɩmaɣza sɔsɔna
20:5—Ɛzɩma tɩyɛ Yehowa hɔŋ “piya nɩŋgbaaŋ sɩ-caanaa kɩwɛɛkɩm yɔɔ” nɛ halɩ piwolo pɩtalɩ pa-sayɩnaa sayɩnaa? Paa pɩɣa ŋga kapaɣlɩɣ lɛ, pahʋʋnɩ-kɛ tɔm pɩlɩɩnɩ ka-maɣmaɣ ka-lakasɩ nɛ kɛ-wɛtʋ yɔɔ. Ɛlɛ Izrayɛɛlɩ piya paɣzɩ sɛʋ sɩɩnaa lɛ, pɩlʋlɩ pee kɩdɛkɛda pa-maɣmaɣ nɛ pa-sayɩnaa pʋwayɩ ɖɔɖɔ. Halɩ Izrayɛɛlɩ piya nzɩ sɩɩwɛ siɣsiɣ yɔ, lalaa kaañamtʋ lakasɩ yɔɔ lɛ, pɩɩwɛ-sɩ kaɖɛ se sɩɖɔkɩ sɩ-cɩŋgɩlɩm wɛtʋ kpam.
Bibl kalʋʋ
(Ejipiti Lɩʋ 19:1-19) Izrayɛɛlɩ mba lɩ Ejipiti nɛ fenasɩ naadozo wayɩ lɛ, patalɩ kɩyakʋ kʋnɛ yɔ Sinayii lakʋ taa. 2 Pakʋyɩ Refidim lɛ, patalɩ Sinayii lakʋ taa nɛ pɛfɛdɩ peeɖe nɖɩ, nɛ Izrayɛɛlɩ siɣ ɛ-maalika pʋʋ cɔlɔ. 3 Moyizi kpa Ɛsɔ cɔlɔ nɛ Kɩbaɣlʋ yaa-ɩ pʋʋ taa nɛ eheyi-i se: “Ŋŋheyi Yakɔɔb ɖɩɣa nɛ Izrayɛɛlɩ piya se: 4 Mɩ-maɣmaɣ ɩna mbʋ malabɩ Ejipiti mba yɔ, mankpaɣ-mɩ kpaɣʋ mbʋ ɛzɩ kpeluu keŋ yɔɔ yɔ, nɛ mɔnkɔnɩ mɔn-cɔlɔ yɔ. 5 Lɛɛlɛɛyɔ, ye ɩñaŋ mɔ-nɔɔ nɛ ɩɖɔkʋʋ mɛ-ɛgbɛyɛ yɔ, ɩkaɣ kɛʋ man-samaɣ ɛyaa kpeekpe taa; matɩnɩ tɛtʋ kpeekpe. 6 Ɩkaɣ-m kɛʋ cɔjɔtʋ kewiyaɣ nɛ ɛjaɖɛ kiɖeɖee. Tɔm ndʋ ŋŋheyi Izrayɛɛlɩ piya lɛ lɛ.” 7 Moyizi kɔɔ nɛ ɛyaa samaɣ taa sɔsaa nɛ ɛkɛdɩ-wɛ tɔm kpeekpe, ndʋ Kɩbaɣlʋ pazɩ-ɩ yɔ. 8 Samaɣ kpeekpe kpɛndɩ kocosi se: “Kɩbaɣlʋ tɔm ndʋ yɔ, ndʋ lɛ, ɖɩkaɣ labʋ ti-kpeekpe tɩ-yɔɔ.” Moyizi pɩsɩnɩ Kɩbaɣlʋ cɔlɔ ndʋ samaɣ cosaa yɔ. 9 Kɩbaɣlʋ kitini-i se: “Mankaɣ kɔm ñɔ-yɔɔ, mɩndʋ kɩkpɛɛdɩtʋ taa, nɛ mɔyɔɔdɩnɩ-ŋ nɛ samaɣ nɩɩ lɛ, kata-ŋ liu tam.” Mbʋ lɛ Moyizi heyi samaɣ tɔm Kɩbaɣlʋ, 10 nɛ ɛlɛ cosi-i se: “Wolo samaɣ cɔlɔ nɛ ŋñɔɔzɩ-kɛ nɛ kalɩɩ kele kele sɔnɔ nɛ cee; pɔcɔtɩ po-tokonaa 11 nɛ pɛtɛ pa-tɩ ñɔɔzʋʋ nɛ paɖaŋ tozo wiye. Tozo wiye lɛ, Kɩbaɣlʋ kɔŋ tibu Sinayii pʋʋ yɔɔ samaɣ kpeekpe ɛsɩndaa. 12 Ŋŋsɩɩ samaɣ kamaɣ pʋʋ cɔlɔ kpɛɛɛ, nɛ ŋtɔ se: Ɩɖaŋ mɩ-tɩ, ɩtaakpa pʋʋ taa, nɛ itaatukuni kɩ-kamasɩ; paa weyi etukuni pʋʋ kɔyɔ, ɛkaɣ sɩbʋ sɩm. 13 Nesi ɛɛkaɣ-ɩ tukunuu, ɛlɛ pakaɣ-ɩ ɖabʋ pɛɛ yaa ñɩma pakaɣ-ɩ yaɣʋ nɛ patʋlɩ-ɩ pɔŋ: paa ɛkɛ kpɩnɛ, paa ɛkɛ ɛyʋ yɔ, ɛɛkaɣ wɛʋ. Nɔndɔʋ ɛpaɣzɩ yaʋ lɛ, pakpa pʋʋ.” 14 Nɛ Moyizi tii pʋʋ, samaɣ cɔlɔ nɛ ɛñɔɔzɩ-kɛ kele kele, pɔcɔtɩ po-tokonaa lɛ, 15 eheyi-wɛ se: “Ɩñɔɔzɩ mɩ-tɩ nɛ ɩɖaŋ tozo wiye; itaawolo mɩ-halaa cɔlɔ.” 16 Kɩyakʋ tozo ŋgʋ talaa nɛ wɩsɩ lɩwa lɛ, panɩɣ pɩnazɩɣ pʋʋ taa, panaɣ pɩñɩlɩsɩɣ, mɩndʋ sɔsɔtʋ natʋyʋ huuzi pʋʋ yɔɔ, nɔndɔʋ yaɣ nɛ pɩkpaɣ ɖoŋ kpaʋ yɔɔ; nɛ samaɣ ŋga kaawɛ maalika taa yɔ, keseliɣ. 17 Nɛ Moyizi lɩzɩ-wɛ maalika taa se pakatɩnɩ Ɛsɔ, nɛ pasɩŋ pʋʋ liu tɛɛ. 18 Sinayii pʋʋ kpeekpe ñɛyɩ ñɔsɩ, mbʋ yɔ Kɩbaɣlʋ tibi kɩ-yɔɔ miŋ taa nɛ ñɔsɩ lɩnɩ kɩ-taa ɛzɩ momoɖe taa yɔ nɛ sɩkpaɣ tiɣ tiɣ. Nɛ pʋʋ kpeekpe seli ɖoŋ pɩŋŋ. 19 Ɛgandɩyɛ yaɣ nɛ pɩkpaɣ ɖoŋ kpaʋ yɔɔ. Moyizi yɔɔdaɣ nɛ Ɛsɔ cosuu-i ɛzɩ tɛʋ nazʋʋ yɔ.
31 AOÛT–6 SEPTEMBRE
ÑƖM MBƲ PƖWƐ ƐSƆTƆM TAA YƆ | EJIPITI LƖƲ 21-22
“Wɩlɩ se ŋwɛnɩ Yehowa lɩmaɣza wezuu yɔɔ”
(Ejipiti Lɩʋ 21:20) Weyi ɛmabɩ e-yom abalʋ yaa pɛlɛ nɛ ɛsɩ e-nesi tɛɛ kɔyɔ, pakaɣ-ɩ kɩmɩyɛ kpaʋ.
it-1 553 § 1
Mabʋtʋ
Ye Ebree tʋ nɔɔyʋ ɛwɛnɩ yom abalɩñɩnʋ yaa halɩñɩnʋ yɔ, ɛwɛnɩ waɖɛ se ɛmabɩ-ɩ ye ɛlɛ ɛɛñaŋɩ-ɩ yɔ. Ɛlɛ ye ɛmabɩ-ɩ nɛ ɛsɩ yɔ, pɔhɔŋ ɛ-nɩŋgbaŋʋʋ. Ɛlɛ ye ɛmabɩ yom nɛ pɩla kɩyakʋ kʋɖʋmʋʋ yaa kɩyakɩŋ naalɛ pʋcɔ nɛ ɛlɛ sɩ yɔ, pɩpɩzɩɣ nɛ pɩwɩlɩ se pɩtɩkɛ mabʋtʋ ndʋ tiyebina nɛ ɛsɩ. Ɛwɛnɩ waɖɛ se ɛhɔ yom nɩŋgbaŋʋʋ, mbʋ pʋyɔɔ yɔ, ɛlɛ kɛ “e-liidiye pʋyʋ.” Pɩtʋʋ fɛyɩ se pɩɩkɛdɩɣnɩ nɔɔyʋ se ɛwɛɛkɩ mbʋ pɩkɛ ɛ-ñɩm sɔsɔm yɔ nɛ pɩɖʋzɩ-ɩ. Pɩtasɩ lɛ, ye kɩyakʋ kʋɖʋmʋʋ yaa kɩyakɩŋ cabɩ ɩɖɛwa pʋcɔ nɛ yom sɩ yɔ, paapɩzɩɣ nɛ pɔyɔɔdɩ kpayɩ se mabʋtʋ ndʋ tɩ-cɔlɔ ɛ-sɩm lɩnaa, pɩpɩzɩɣ nɛ pɩlɩɩnɩ nabʋyʋ cɔlɔ ɖɔɖɔ. Ye mbʋ, ye kɩyakʋ kʋɖʋmʋʋ yaa kɩyakɩŋ naalɛ ɩɖɛwa pʋcɔ nɛ yom sɩ yɔ, paahɔŋ ɛ-tʋ nɩŋgbaŋʋʋ.—Ejl 21:20, 21.
(Ejipiti Lɩʋ 21:22, 23) Ye abalaa iyou nɛ potuzi halʋ hoɣa tʋ nɛ e-hoɣa lɩɩ, ɛlɛ ɛtɩsɩ yɔ, pɩwɛnɩ weyi etuzi-i yɔ se ɛhɛyɩ mbʋ halʋ walʋ ɖʋwa se ɛhɛyɩ yɔ, ɛtɩŋɩɣnɩ tɔm hʋyʋ yɔɔ nɛ ɛhɛyɩ. 23 Ɛlɛ ye ɛsɩba yɔ, ŋhɛyɩɣ wezuu yɔɔ wezuu.
Ŋwɛnɩ ñamtʋ wezuu yɔɔ ɛzɩ Ɛsɔ yɔ?
16 Paa ɛyʋ weyi lɛ, e-wezuu mʋ ñɩm Yehowa ɛsɩndaa. Halɩ pɩɣa ŋga kɛwɛ ko-ɖoo lotu taa yɔ, ke-wezuu mʋ ñɩm Yehowa ɛsɩndaa. Moyizi paɣtʋ tɛɛ lɛ, ye nɔɔyʋ etuzi halʋ hoɣa tʋ nɔɔyʋ nɛ halʋ ɛnʋ ɛ-maɣmaɣ yaa ɛ-pɩɣa ŋga kɛwɛ e-lotu taa yɔ kasɩ yɔ, Yehowa kpaɣ ɛyʋ ɛnʋ kɩmɩyɛ calɩm mbʋ ɛkpɛdaa yɔ pɩ-yɔɔ. Pɩwɩlɩɣ se paa ɛyʋ ɛnʋ ɛɛtaana pʋcɔ nɛ ɛla mbʋ yɔ, ɛkʋ ɛyʋ nɛ pɩpɔzʋʋ se pɛhɛyɩ ‘wezuu wezuu lone taa.’ (Ejipiti Lɩʋ 21:22, 23; nwt) Ɛsɔ ɛsɩndaa lɛ, pɩɣa ŋga kɛwɛ ko-ɖoo lotu taa yɔ, ke-wezuu wɛ ɖɔɖɔ ɛzɩ ɛyʋ weyi pɛtɛmɩ-ɩ lʋlʋʋ yɔ, e-wezuu. Ye mbʋ, ŋmaɣzɩɣ se lɩmaɣzɩyɛ nɖɩ Yehowa wɛnɩ hosi lɩzʋʋ yɔɔ? Ŋmaɣzɩɣ se ɛnaɣ palɩzɩɣ hosi nɛ pakʋʋ piya miiliyɔɔwaa sakɩyɛ ɛjaɖɛ yɔɔ lɛ, ɛzɩma pɩlakɩ-ɩ?
(Ejipiti Lɩʋ 21:28, 29) Ye naaʋ nakʋyʋ ɛyɔkɩ abalʋ yaa halʋ hɩŋ nɛ ɛsɩ yɔ, paɖakɩ-kʋ pɛɛ nɛ paatɔkɩ kɩ-nandʋ; nɛ paakaɣ labʋ naaʋ tʋ pʋyʋ. 29 Ɛlɛ ye ɖooo lɔŋ naaʋ ɛɛpaɣzɩ ɛyaa yɔkʋʋ hɩŋ nɛ peheyi kɩ-tʋ nɛ etike kɩ-cɔlɔ yɔ, naaʋ ŋgʋ, ye kɩkʋ abalʋ yaa halʋ nɔɔyʋ yɔ, paɖakɩ-kʋ pɛɛ nɛ pakʋ ɖɔɖɔ kɩ-tʋ.
w10 15/4 29 § 4
Yehowa sɔɔlaa se ŋwɛɛ “alaafɩya”
Paaɖʋ paɣtʋ ɖɔɖɔ nɛ titukuuni kpɩna wena akʋʋ ɛyaa yɔ. Ye nɔ nɔɔyʋ ɛyɔkɩ ɛyʋ nɛ ɛkʋ-ɩ yɔ, pɩwɛɛ se weyi ɛtɩnɩ nɔ yɔ, ɛkʋ nɔ ɛnʋ nɛ ɛtaatasɩ nɔɔyʋ kʋʋ. Ɛkʋʋ nɔ ɛnʋ lɛ, ɛɛpɩzɩɣ nɛ ɛtɔɔ ɛ-nandʋ yaa ɛpɛdɩ-tʋ, ye mbʋ pɩɖʋzʋʋ-ɩ siŋŋ. Ɛlɛ kpaɣ se nɔ nɔɔyʋ yɔkɩ ɛyʋ nɔɔyʋ nɛ peheyi ɛ-tʋ, ɛlɛ ɛlɛ tɩkpa-ɩ nɛ ɛɖɩɣ-ɩ. Ye nɔ ɛnʋ ɛkɔma nɛ ɛkʋ nɔɔyʋ pʋwayɩ yɔ, pakʋʋ nɔ nɛ pakʋ ɖɔɖɔ ɛ-tʋ. Paɣtʋ ndʋ tɩsɩɣaɣnɩ paa weyi se ɛcɔnɩ ɛ-kpɩna ɖeɖe camɩyɛ.—Ejl 21:28, 29.
Ðɩñɩnɩ fezuu taa ñɩm
(Ejipiti Lɩʋ 21:5, 6) Ye yom ɛtɔm se: “Mɔnsɔɔlɩ man-tʋ, ma-halʋ nɛ men-piya, maalɩɣ se mɛwɛɛ man-tɩ yɔɔ” kɔyɔ, 6 Ɛ-tʋ kaawoni-i Ɛsɔ cɔlɔ, ɛkaɣ-ɩ sɩnzʋʋ nɔnɔɔ taa yaa tɛya cɔlɔ nɛ ɛtʋlɩ ɛ-nɩŋgbaaŋ nɛ ɛcɔʋ, nɛ yom wɛɛ ɛ-tʋmɩyɛ taa tam.
w10 15/1 4 § 4-5
Ɛbɛ yɔɔ ŋha ña-tɩ Yehowa?
4 Pɩcɛyɩ siŋŋ se ɖɩha ɖa-tɩ Yehowa. Pɩcɛzɩ ɛgbɛyɛ naɖɩyɛ ɖʋʋ yem. Ɛlɛ ye ɖɩha ɖa-tɩ Yehowa, ɛzɩma pɩwazɩɣ-ɖʋ? Yele nɛ ɖɩkpaɣ wɛtʋ ndʋ nɛ ɖɩmaɣzɩnɩ ɛzɩma ɛyaa ɖʋʋ ɛgbɛyɛ yɔ, nɛ wazasɩ nzɩ pehikiɣ yɔ. Kɩɖaʋ nakʋyʋ yɔ taabalɩyɛ ɖʋʋ. Pʋcɔ nɛ ŋwɛɛnɩ taabalʋ kɩbanʋ lɛ, pɩwɛɛ se ŋñaɣ pana nɛ ña-maɣmaɣ ŋkɛ taabalʋ kɩbanʋ. Pɩkɛ ɛgbɛyɛ ɖʋʋ mbʋ pʋyɔɔ yɔ pɩpɔzʋʋ se ŋmaɣzɩɣ ña-taabalʋ yɔɔ. Mba Bibl yɔɔdaa se taabalɩyɛ kɩbanɖɛ kaawɛ pɛ-hɛkʋ taa yɔ, pa-taa nabɛyɛ lɛ, Daviid nɛ Yonataanɩ. Halɩ poɖuuni ɖama pa-taabalɩyɛ nɖɩ ɖɩ-taa. (Kalɩ 1 Samɩyɛɛlɩ 17:57; 18:1, 3) Pa-taabalɩyɛ nɖɩ, ɖɩtɩtɔyɩ sɔnɔ, ɛlɛ ye taabalaa ɩmaɣzɩɣ ɖama yɔɔ nɛ pekeŋni ɖama yɔ, pɩɖɔŋnɩ-wɛ camɩyɛ.—Adu 17:17; 18:24.
5 Paɣtʋ ndʋ Yehowa ha Izrayɛɛlɩ piya yɔ, tɩ-taa natʋyʋ yɔɔdʋʋ taabalɩyɛ naɖɩyɛ tɔm; nɛ ɖɩwazɩɣ mba paɖʋ-ɖɩ yɔ, ye poɖuuni ɖama yɔ. Ye yom nɔɔyʋ ɛsɔɔlɩ ɛ-tʋ nɛ ɛsɔɔlɩ se ɛkɛ e-yom e-wezuu caɣʋ kpeekpe nɛ ehiɣ wazasɩ yɔ, ɛ nɛ ɛ-tʋ paɖʋʋ ɛgbɛyɛ. Paɣtʋ yɔɔdaa se: “Ye yom ɛtɔm se: ‘Mɔnsɔɔlɩ man-tʋ, ma-halʋ nɛ men-piya, maalɩɣ se mɛwɛɛ man-tɩ yɔɔ’ kɔyɔ, ɛ-tʋ kaawoni-i Ɛsɔ cɔlɔ, ɛkaɣ-ɩ sɩnzʋʋ nɔnɔɔ taa yaa tɛya cɔlɔ nɛ ɛtʋlɩ ɛ-nɩŋgbaaŋ nɛ ɛcɔʋ, nɛ yom wɛɛ ɛ-tʋmɩyɛ taa tam.”—Ejl 21:5, 6.
(Ejipiti Lɩʋ 21:14) Ye nɔɔyʋ ɛkʋ ɛ-taabalʋ faɖaɖa yɔ, paa ɛwɛ man-kɩlaʋ altaaru cɔlɔ yɔ, pakpa-ɩ nɛ pakʋ-ɩ.
it-1 545
Hɩŋ
Pɩtɩla tɔm ndʋ tɩwɛ Ejipiti Lɩʋ 21:14 taa yɔ, tɩ-tɔbʋʋ lɛ se pɩpɔzʋʋ se pakʋ cɔjɔ ye ɛkʋ ɛyʋ yɔ, yaa se altaaru hɩŋ ɖɔkʋʋ eehuuzuu weyi ɛkʋ ɛyʋ faɖaɖa yɔ ɛ-yɔɔ.—Kpaɣ-tʋ nɛ ŋmaɣzɩnɩ 1Aw 2:28-34.
Bibl kalʋʋ
(Ejipiti Lɩʋ 21:1-21) Paɣtʋ ndʋ ŋkaɣ-wɛ ɖʋʋ lɛ yɔ: 2 Ye ŋyabɩ Ebree tʋ yom kɔyɔ, pɩnzɩ loɖo ɛkaɣ-ŋ labʋ tʋmɩyɛ; pɩnaɣ lʋbɛ ŋga taa lɛ, ɛlɩɣ nɛ ɛwɛɛ ɛ-tɩ yɔɔ falaa. 3 Ye ɛɛsʋ ɛ-ñʋʋ yeke yɔ, ɛlɩɣ ɖɔɖɔ ɛ-ñʋʋ yeke; ye ɛɛwɛnɩ halʋ yɔ, ɛ nɛ ɛ-halʋ pɛkpɛndɩɣ palɩɩ. 4 Ye ɛ-tʋ ɛca-ɩ halʋ nɛ ɛlʋlɩ evebiya nɛ pɛlaa kɔyɔ, ɛ-tʋ tɩnɩ ɛ-halʋ nɛ e-piya; ɛnʋ yɔ, ɛlɩɣ e-yeke koŋ. 5 Ye yom ɛtɔm se: “Mɔnsɔɔlɩ man-tʋ, ma-halʋ nɛ men-piya, maalɩɣ se mɛwɛɛ man-tɩ yɔɔ” kɔyɔ, 6 Ɛ-tʋ kaawoni-i Ɛsɔ cɔlɔ, ɛkaɣ-ɩ sɩnzʋʋ nɔnɔɔ taa yaa tɛya cɔlɔ nɛ ɛtʋlɩ ɛ-nɩŋgbaaŋ nɛ ɛcɔʋ, nɛ yom wɛɛ ɛ-tʋmɩyɛ taa tam. 7 Ye nɔɔyʋ ɛpɛdɩ ɛ-pɛlɛ nɛ ɛkɛ yom kɔyɔ, ɛɛkaɣ lɩʋ ɛzɩ yomaa abalaa lɩʋ yɔ. 8 Ye etiɖeni ɛ-tʋ weyi ɛcaɣaɣ se ɛsɩɩ-ɩ ɛ-tɩ yɔ yɔ, ɛ-tʋ ɛnʋ ɛɛla nɛ paɖaɣnɩ-ɩ yabʋ; ɛlɛ ɛɛpɩzɩɣ ɛpɛdɩ-ɩ nɛ agbaaɣdaa mba, mbʋ yɔ emuli-i. 9 Ye ɛcɛlɩɣ-ɩ ɛ-pɩyalʋ yɔ, ɛkaɣ-ɩ labʋ ɛzɩ pɛlaa paɣtʋ pɔzʋʋ yɔ. 10 Ye ɛ-maɣmaɣ ɛkpakɩɣ halʋ lɛlʋ yɔ, ɛɛkaɣ pɩzʋʋ nɛ ɛpasɩ kajalaɣ tʋ tɔɔnaɣ nɛ ɛ-pɩsaŋ, nɛ halʋ nɛ ɛ-walʋ pa-tʋmɩyɛ. 11 Ye ɛpɛŋɩ-ɩ pɩ-nabudozo yɔ, halʋ ɛnʋ ɛkaɣ pɩzʋʋ nɛ ɛɖɛɛ yem falaa, ɛɛhɛyɩɣ liidiye. 12 Weyi ɛmabɩ ɛyʋ nɛ ɛyʋ ɛnʋ ɛsɩ kɔyɔ, ɛnʋ ɖɔɖɔ ɛkaɣ sɩbʋ. 13 Ye patɩñɩbɩ-ɩ kpaca, ɛlɛ Ɛsɔ ɛɖʋzɩnɩ-ɩ e-nesi tɛɛ kɔyɔ, mankaɣ-ŋ wɩlʋʋ lone nɖɩ pɩwɛnɩ-ɩ se ese ɛmɛlɩ ɖɩ-taa yɔ. 14 Ye nɔɔyʋ ɛkʋ ɛ-taabalʋ faɖaɖa yɔ, paa ɛwɛ man-kɩlaʋ altaaru cɔlɔ yɔ, pakpa-ɩ nɛ pakʋ-ɩ. 15 Weyi ɛmabɩ ɛ-caa yaa e-ɖoo kɔyɔ, ɛsɩ. 16 Weyi ɛmɩlɩ ɛyʋ yaa ɛpɛdɩ-ɩ, yaa pana-ɩ e-nesi tɛɛ kɔyɔ, pɩwɛɛ se ɛsɩ. 17 Weyi ɛlɔ ɛ-caa yaa e-ɖoo yɔɔ nɔɔ kɔyɔ, ɛsɩ. 18 Ye abalaa iyowa, nɛ lɛlʋ yaɣ ɛ-taabalʋ pɩyɛ yaa ŋgulumiye, nɛ ɛlɛ tɩsɩ, ɛlɛ pɩwɩ-ɩ nɛ ɛhɩnɩ kaɖʋ yɔɔ kɔyɔ, 19 weyi ɛmabɩ-ɩ ŋgulumee yɔ, ɛlɩ pɩ-taa, ye ɛmabɩ weyi yɔ ɛkʋyʋʋ nɛ ɛpɩzɩɣ ɖɔm nɛ ɛlɩɣ awayɩ kɔyɔ, paa ɛɖɔŋnɩ ɖaʋ kɔyɔ. Pɩtɛ lɛ pɩwɛɛ se ɛhɛyɩ-ɩ se ɛkamɩ-ɩ ɖɩɣa nɛ ɛlabɩ-ɩ kɔyɛ nɛ ɛ-yɔɔ kɔɔ pɩcɛ kpataa. 20 Weyi ɛmabɩ e-yom abalʋ yaa pɛlɛ nɛ ɛsɩ e-nesi tɛɛ kɔyɔ, pakaɣ-ɩ kɩmɩyɛ kpaʋ. 21 Ɛlɛ ye ɛwɛnɩ ɛ-ɛsa kɩyakʋ kʋyʋmʋʋ yaa naalɛ yɔ, paakaɣ-ɩ kɩmɩyɛ kpaʋ, mbʋ yɔ ɛkɛ e-liidiye pʋyʋ.