Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
5-11 JUILLET
ÑƖM MBƲ PƖWƐ ƐSƆTƆM TAA YƆ | WAYƖ WAYƖ PAƔTƲ 11-12
“Ɛzɩma Yehowa sɔɔlaa se pɛsɛɛ-ɩ yɔ”
it-1 93 § 7
Kalɩzaɣ
Ɛsɔ sɛʋ nɛ kalɩzaɣ pilim. Kalɩzaɣ sɩŋnɩ ɛyʋ pilim. Ɛlɛ Bibl masɩ nasɩyɩ seɣtiɣ-ɖʋ se ɖɩñɩnɩ Ɛsɔ, ɖɩsɔɔlɩ-ɩ nɛ ɖɩsɛɛ-ɩ nɛ ‘ɖa-laŋɩyɛ pilim nɛ ɖe-ciyam [yaa kalɩzaɣ] pilim.’ (Wp 4:29; 11:13, 18) Pɔyɔɔdɩ Wayɩ Wayɩ Paɣtʋ 6:5 taa se: “Ŋŋsɔɔlɩ Kɩbaɣlʋ ñɛ-Ɛsɔ nɛ ña-laŋɩyɛ pilim nɛ ñe-ciyam [yaa kalɩzaɣ] pilim nɛ ño-ɖoŋ pilim.” Yesu yɔɔdaa se pɩwɛɛ se ɖɩsɛɛ Ɛsɔ nɛ ɖa-kalɩzaɣ pilim nɛ ɖo-ɖoŋ pilim; ɛlɛ ɛtasɩ yɔɔdʋʋ se ɖɩsɛɛ-ɩ nɛ ‘ɖa-maɣzɩm pilim.’ (Mk 12:30; Lk 10:27) Ye mbʋ ɖɩpɩzɩɣ ɖɩpɔzɩ se: ‘Ye kalɩzaɣ ɛsɩŋnɩ ɛyʋ pilim yɔ, ɛbɛ yɔɔ patasɩ yɔɔdʋʋ se ɖɩsɛɛ Ɛsɔ nɛ ɖo-wondu lɛɛtʋ ɛzɩ ɖa-laŋɩyɛ nɛ ɖa-maɣzɩm mbʋ yɔ?’ Ðɩkpaɣ kɩɖaʋ kʋnɛ nɛ ɖɩnɩɩ pɩ-taa: Nɔɔyʋ pɩzɩɣ nɛ ɛpɛdɩ ɛ-tɩ (ɛ-kalɩzaɣ) nɛ ɛpɩsɩ ɛyʋ lɛlʋ yom. Pʋ-tɔbʋʋ lɛ se ɛpɩsɩɣ ɛyʋ ɛnʋ ɛ-ñɩm nɛ ɛlɛ kɛ ɛ-caa. Ɛlɛ ye ɛsɔɔlɩ yem se ɛ-tɔm ɛkɛdɩnɩ ɛ-caa yɔ, ɛpɩzɩɣ nɛ ɛɛlakɩ ɛlɛ sɔɔlɩm nɛ ɛ-laŋɩyɛ pilim. Pɩtɩla ɛɛkaɣ labʋ tʋmɩyɛ nɛ e-ɖoŋ nɛ ɛ-maɣzɩm pilim se pɩsa nɛ ɛ-caa tʋma ɖɛɛnɩ ɛsɩndaa. (Kpaɣ-tʋ nɛ ŋmaɣzɩnɩ Efɛ 6:5; Kol 3:22.) Ye mbʋ pɩtʋʋ fɛyɩ se pɔyɔɔdɩ kalɩzaɣ hɔɔlɩŋ ɛnɩ ɩ-tɔm se pɩsɩnɩ Krɩstʋ tʋ nɛ ɛtaasɔɔ ɩ-yɔɔ, ɛlɛ ɛlabɩnɩ-ɩ tʋmɩyɛ camɩyɛ nɛ ɛsɛɛ Ɛsɔ weyi ɖɩkɛ ɛ-pʋyʋ yɔ, nɛ ɛ-Pɩyalʋ weyi ɛla e-wezuu se pɩya ɖa-ñʋʋ yɔ. Pɩsa nɛ ɖɩsɛɛ Ɛsɔ nɛ kalɩzaɣ pilim lɛ, pɩwɛɛ se ɖɩsɛɛ-ɩ nɛ ɖa-laŋɩyɛ pilim, ɖo-ɖoŋ pilim, ɖa-maɣzɩm pilim nɛ ɖɩtaasɔɔ ɖo-tomnaɣ hɔɔlʋʋ nakʋyʋ yɔɔ.—Kpaɣ-tʋ nɛ ŋmaɣzɩnɩ Mt 5:28-30; Lk 21:34-36; Efɛ 6:6-9; Fil 3:19; Kol 3:23, 24.
it-1 231 § 10
Altaaru
Paaheyi Izrayɛɛlɩ mba se pɔyɔkɩ cɛtɩm Ɛsɔ sɛtʋ altaarunaa, tilima nɛ sɩʋ kpelisi. (Ejl 34:13; Wp 7:5, 6; 12:1-3) Pɩtaapɔzɩ se pama wondu ndʋ tɩnɩɣzɩnɩ cɛtɩm Ɛsɔ sɛtʋ ñɩndʋ yɔ, yaa pañaɣzɩ pe-piya miŋ se paɖʋnɩ ɛsɔnaa hɩɖɛ ɛzɩ Kanaŋ mba lakʋʋ yɔ. (Wp 12:30, 31; 16:21) Pɩtaapɔzɩ se Izrayɛɛlɩ mba ɩwɛɛnɩ altaarunaa sakɩyɛ, ɛlɛ pɩɩwɛɛ se pɛwɛɛnɩ altaaru kʋɖʋmʋʋ ŋgʋ pakaɣ labɩnʋʋ tʋmɩyɛ Ɛsɔ toovenim tʋ sɛtʋ taa yɔ. Nɛ Yehowa pɩɩwɛɛ se ɛlɩzɩ ɖenɖe pama altaaru ŋgʋ yɔ. (Wp 12:2-6, 13, 14, 27; pɩwɛ ndɩ nɛ Babilɔɔnɩ ñɩma mba paama altaarunaa 180 Ɛsɔ weyi payaɣ se Ishtar yɔ.) Paacalɩ-wɛ heyuu se pɛtɛzɩɣ Yɔɔrdaŋ pɔɔ nɛ pɩtɛ lɛ, pama pɛɛ altaaru nakʋyʋ (Wp 27:4-8); nɛ mbʋ Yozuwee labɩ Ebaalɩ Pʋʋ yɔɔ. (Yoz 8:30-32) Pamʋ Lidaʋ Tɛtʋ nɛ patayɩ-tʋ cejewe nɛ pɩtɛ lɛ, Rubɛɛnɩ nɛ Gaadɩ cejewe nɛ Manaasee cejewiye hɔɔlʋʋ pama altaaru nakʋyʋ Yɔɔrdaŋ Pɔɔ cɔlɔ; pɩnaɣaɣ altaaru ŋgʋ camɩyɛ. Piyeba nɛ ɖama kɩɩnɩnʋʋ kɔɔ cejewe ana nɛ cejewe lɛɛna a-hɛkʋ taa, ɛlɛ pɔkɔma nɛ panɩɩ pɩ-taa pʋwayɩ se pataapɩsɩ tisuu yebiyaa, paama altaaru ŋgʋ se pɩkɛnɩ yʋsaɣ ŋga kawɩlɩɣ se pɛwɛ siɣsiɣ Ɛsɔ toovenim tʋ Yehowa ɛsɩndaa yɔ.—Yoz 22:10-34.
Fezuu taa ñɩm
it-1 1037 § 4
Gerizim, Pʋʋ
Izrayɛɛlɩ mba mʋ Ayi tɛtʋ nɛ pɩla pazɩ lɛ, pekpeɣli Gerizim nɛ Ebaalɩ pʋŋ tɛɛ ɛzɩ Moyizi kaaheyuu-wɛ se pala yɔ. Nɛ Yozuwee kaaɖɛnɩ-wɛ nɔɔ. Peeɖe pakalɩ samaɣ ɛsɩndaa wazasɩ nzɩ kakaɣ hiɣu ye kañaŋ Yehowa yɔ, nɛ kɩdɛkɛdɩm mbʋ pɩkaɣ-kɛ talʋʋ ye kekizaa se kaañaŋ Yehowa yɔ. Siimeyɔɔ, Leevi, Yuuda, Isakaarɩ, Yosɛɛfʋ nɛ Bɛnjamɛɛ cejewe taa mba kaasɩŋ Gerizim Pʋʋ ɛsɩndaa. Leevi cejewiye taa mba kaawɛ fɛɛʋ taa nɛ ɛgbɛyɛ ɖʋʋ aɖakaɣ kaawɛ pɔ-cɔlɔ. Cejewe lɛɛna taa mba kaasɩŋ Ebaalɩ Pʋʋ ɛsɩndaa. (Wp 11:29, 30; 27:11-13; Yoz 8:28-35) Pɩwɛ ɛzɩ cejewe wena aasɩŋ Gerizim Pʋʋ ɛsɩndaa yɔ, pakalaɣ a-ɛsɩndaa wazasɩ tɔm nɛ acosuu, nɛ cejewe lɛɛna ñocosaɣ alɩwaatʋ ndʋ pɔcɔŋnaɣ Ebaalɩ Pʋʋ hɔɔlʋʋ taa nɛ pakalɩɣ kɩdɛkɛdɩm mbʋ kaañamtʋ lʋlʋʋ yɔ pɩ-tɔm yɔ. Nabɛyɛ maɣzɩɣ se pɔcɔŋnaɣ Gerizim Pʋʋ hɔɔlʋʋ taa nɛ pakalɩɣ wazasɩ tɔm mbʋ pʋyɔɔ yɔ kɩwɛ kajʋka nɛ tɔɔnasɩ lakɩ kɩ-yɔɔ camɩyɛ, ŋgʋ Ebaalɩ Pʋʋ ñɛkɛ kaaʋ nɛ ñɩtʋ fɛyɩ kɩ-yɔɔ; pɩtasɩ lɛ, tɔɔnasɩ ɩɩlakɩ kɩ-yɔɔ camɩyɛ. Ɛlɛ Bibl ɛɛyɔɔdʋʋ natʋyʋ pɩlɩɩnɩ tɔm ndʋ tɩ-yɔɔ. Paakalɩ Paɣtʋ nɛ nɔɔ kɩkʋyaɣ “Izrayɛɛlɩ kazɩɣa ɛsɩndaa, halaa nɛ piya nɛ agɔma mba paacaɣ pɛ-hɛkʋ taa yɔ,” paawɛ peeɖe. (Yoz 8:35) Samaɣ sɔsɔɔ ŋga kaasɩŋ Pʋŋ ɛnɩ ɩ-tɛɛ, ɛlɛ ka-taa paa weyi pɩzaa nɛ ɛnɩɩ tɔm ndʋ pakalaa yɔ. Pɩwɩlɩɣ se ɛzɩma lone nɖɩ ɖɩɩwɛɛ yɔ, pɩsɩɣaɣnaɣ se tɔm ndʋ pɔyɔɔdʋʋ yɔ titili camɩyɛ nɛ paa weyi ɛnɩɩ.—Kalɩ ÉBAL, (MONT).
12-18 JUILLET
ÑƖM MBƲ PƖWƐ ƐSƆTƆM TAA YƆ | WAYƖ WAYƖ PAƔTƲ 13-15
“Ɛzɩma paɣtʋ wɩlaa se Yehowa maɣzɩɣ kʋñɔndʋ yɔɔ?”
it-1 648 § 5
Hɔɔlʋʋ hiu ñɩŋgʋ haɖɛ
Pɩwɛ ɛzɩ palakaɣ hɔɔlʋʋ hiu ñɩŋgʋ haɖɛ tam nabʋlɛ taa. Palakaɣ hɔɔlʋʋ hiu ñɩŋgʋ haɖɛ naɖɩyɛ paa pɩnaɣ ŋga nɛ palakɩnɩ tʋma lɛɛna wena aatukuuni Leevi mba cɔjɔtʋ tʋmɩyɛ yɔ, paa nabʋyʋ taa ɖɩwazɩɣ Leevi mba ɖɔɖɔ yɔ. Pakpakaɣ hɔɔlʋʋ hiu ñɩŋgʋ haɖɛ nɖɩ nɛ pasɩɣnɩ Izrayɛɛlɩ mba hɔŋ alɩwaatʋ ndʋ ikpeɣliɣ nɛ ɩlakɩ pɩnaɣ taa kazandʋ yɔ. Ye pɩlaba se hɔɔlʋʋ hiu ñɩŋgʋ ŋgʋ, paapɩzɩɣ se patanɩ-kʋ Yeruzalɛm mbʋ pʋyɔɔ yɔ nʋmɔʋ ɖaɣlaa yɔ, papɩzɩɣ nɛ pɛpɛdɩ-kʋ nɛ hɔʋ kpaɣ liidiye nɛ kɩcɔnɩ kɩ-kɩcɛyɩm ɖeɖe alɩwaatʋ ndʋ kiwoki Yeruzalɛm se kɩla kele kele kazandʋ yɔ. (Wp 12:4-7, 11, 17, 18; 14:22-27) Paa Sabaatɩ pɩnzɩ lʋbɛ nzɩ sɩ-taa lɛ, pɩnzɩ naadozo wayɩ nɛ pɩnzɩ loɖo wayɩ lɛ, hɔɔlʋʋ hiu ñɩŋgʋ haɖɛ nɖɩ, paakpakɩɣ-ɖɩ nɛ pɔcɔŋnɩ hɔŋ kɩcɛyɩm ɖeɖe alɩwaatʋ ndʋ palakɩ pɩnaɣ taa kazandʋ yɔ, ɛlɛ pasɩɣ-ɖɩ nɛ hɔɔlʋʋ se ɖɩwazɩ Leevi mba, agɔma, lelaa nɛ solisi paa egeetiye nɖɩ lɛ, ɖɩ-taa.—Wp 14:28, 29; 26:12.
it-2 843 § 4
Sabaatɩ pɩnaɣ
Payaɣ Sabaatɩ pɩnaɣ se “kpeɣu pɩnaɣ [hashshemittah].” (Wp 15:9; 31:10) Pɩnaɣ ŋga ka-taa paahayɩɣ, peyeki tɛtʋ nɛ tɩhɛzɩ. (Ejl 23:11) Payaɣ pɩnaɣ ŋga ɖɔɖɔ se kpeɣu pɩnaɣ mbʋ pʋyɔɔ yɔ, pekpeɣu kɩma. “Pɩkɛ Kɩbaɣlʋ kpeɣu pɩnaɣ”, pɩɖʋʋ-ɩ hɩɖɛ. Nabɛyɛ maɣzɩɣ se ye pɔtɔm se pekpeɣ kɩma yɔ, pɩɩwɩlɩɣ se pɔsɔɔ kɩma yɔɔ, ɛlɛ paañɩkɩɣ weyi ɛtɔɔ kɩmɩyɛ yɔ ɛ-yɔɔ se ɛhɛyɩ, mbʋ pʋyɔɔ yɔ panawa se ɛtɩhayɩ pɩnaɣ ŋga ka-taa; ɛlɛ ye pɩkɛ ɛgɔm yɔ, papɩzɩɣ nɛ pañɩɣ ɛ-yɔɔ se ɛhɛyɩ. Ɛlɛ pɩtɩkɛ mbʋ lalaa maɣzɩɣ. (Wp 15:1-3) Paɣtʋ wɩlɩyaa nabɛyɛ maɣzɩɣ se ye nɔɔyʋ ɛwɛ kɩcɛyɩm nabʋyʋ taa nɛ ɛkɩndɩ liidiye se ɛcɔnɩ pi-ɖeɖe yɔ, papɩzɩɣ nɛ pekpeɣ kɩmɩyɛ nɖɩ, ɛlɛ ye nɔɔyʋ ɛkɩndɩ liidiye se ɛlabɩnɩ tadɩyɛ na yɔ, paakpeɣ-i ɖɩ. Pɔyɔɔdaa se kajalaɣ pɩnzɩ mɩnʋʋ taa, Hillel labɩ ɖʋtʋ natʋyʋ se weyi ɛkɩndɩ lɛlʋ liidiye yɔ, ɛpɩzɩɣ ewoni tɔm tɔm hʋyaa cɔlɔ nɛ pasɩnɩ-ɩ nɛ ɛ-kɩmɩyɛ nɖɩ ɖɩtaasʋʋ lɩm.—The Pentateuch and Haftorahs, ŋga J. Hertz, ma Londres yɔ, 1972, hɔɔlɩŋ. 811, 812.
it-1 794 § 2
Yom
Paɣtʋ ndʋ paɖʋ yom nɛ ɛ-caa yɔ. Izrayɛɛlɩ ɛjaɖɛ taa lɛ, yom weyi ɛkɛ Ebree tʋ yɔ, pɩwɛɛ se wɛtʋ ndʋ tɩ-taa ɛwɛɣ yɔ, tɩwɛɛ ndɩ nɛ wɛtʋ ndʋ tɩ-taa yom weyi ɛkɛ ɛgɔm yaa kʋyʋʋ ɖʋyʋ yɔ ɛwɛɣ yɔ. Yom weyi ɛtɩkɛ Ebree tʋ yɔ, ɛkɛɣ ɛ-caa ñɩm; nɛ ɛpɩsɩɣ ɛ-caa pɩyalʋ ñɩm ye ɛ-caa ɛsɩba yɔ, (Lev 25:44-46) ɛlɛ yom weyi ɛkɛ Ebree tʋ yɔ, peyeki-i pɩnaɣ lʋbɛ ñɩŋga taa yaa ahɛnɛɛ pɩnaɣ taa, paa ahɛnɛɛ pɩnaɣ ɛtalaa nɛ ɛtɩlabɩtɩ pɩnzɩ lʋbɛ yɔ. Ebree tʋ weyi ɛkɛ yom yɔ, pɩwɛɛ se pakpaɣ-ɩ ɛzɩ tʋmlaɖʋ weyi pɛhɛyɩɣ-ɩ yɔ. (Ejl 21:2; Lev 25:10; Wp 15:12) Ye Ebree tʋ nɔɔyʋ ɛpɛdɩ ɛ-tɩ nɛ ɛgɔm nɔɔyʋ, ɛgɔm ɛnʋ ɛ-hɔʋ taa tʋ nɔɔyʋ yaa kʋyʋʋ ɖʋyʋ nɔɔyʋ yɔ, papɩzɩɣ nɛ patasɩ-ɩ pɛdʋʋ paa alɩwaatʋ ndʋ. Nɛ pʋbʋ taa lɛ, ɛ-maɣmaɣ ɛpɩzɩɣ ɛya ɛ-tɩ yaa nɔɔyʋ weyi ɛwɛnɩ waɖɛ nɖɩ yɔ, ɛpɩzɩɣ nɛ ɛyabɩ-ɩ. Liidiye nɖɩ pɩpɔzʋʋ se pɛhɛyɩ yɔ, pɩlɩɣnɩ pɩnzɩ nzɩ pɩkazaa se ahɛnɛɛ pɩnaɣ ɛtalɩ yɔ sɩ-cɔlɔ, yaa pɩnzɩ nzɩ pɩkazɩ-ɩ se ɛla yomiye taa pɔcɔ nɛ e-yomiye pɩnaɣ lʋbɛ ŋga talɩ yɔ sɩ-cɔlɔ. (Lev 25:47-52; Wp 15:12) Alɩwaatʋ ndʋ peyeki Ebree yom nɔɔyʋ yɔ, pɩwɛɛ se ɛ-tʋ ɛlabɩ-ɩ kʋjɔʋ nakʋyʋ nɛ pɩsɩnɩ-ɩ nɛ ɛpaɣzɩ wezuu caɣʋ ɛzɩ ɛyʋ weyi ɛwɛ ɛ-tɩ yɔɔ yɔ. (Wp 15:13-15) Ye yom nɔɔyʋ ɛkpɛndɩnɩ ɛ-halʋ nɛ ɛkɔna yɔ, paayeki-i lɛ ɛkpɛndɩɣnɩ-ɩ nɛ ɛɖɛɛ. Ɛlɛ ye ɛ-tʋ ɛcɛlɩnɩ-ɩ halʋ (pɩwɩlɩɣ se halʋ ɛnʋ ɛkɛ ɛgɔm nɛ ɛfɛyɩnɩ waɖɛ se peyebi-i, alɩwaatʋ ndʋ e-yomiye pɩnaɣ lʋbɛ ñɩŋga talɩɣ yɔ), ɖɩnɛ ɛlɛ halʋ ɛnʋ nɛ e-piya papɩsɩɣ ɛ-tʋ ñɩm. Hɔɔlʋʋ kʋnɛ kɩ-taa lɛ, Ebree yom pɩzɩɣ nɛ ɛkpaɣ lɩmaɣzɩyɛ se ɛcakɩ ɛ-tʋ cɔlɔ. Ðɩnɛ ɛlɛ patʋlʋʋ ɛ-nɩŋgbaaŋ nɛ ɛjɔʋ, nɛ yom wɛɛ ɛ-tʋmɩyɛ taa tam.—Ejl 21:2-6; Wp 15:16, 17.
Fezuu taa ñɩm
w06 1/4 31
Tɔm ndʋ ɖa-takayɩsɩ kalɩyaa pɔzʋʋ yɔ
Paɣtʋ ndʋ tɩwɛ Ejipiti Lɩʋ 23:19 taa nɛ tɩtɔŋ se ‘pataatɩzɩ mbeɣa nandʋ ko-ɖoo hɩlɩm taa yɔ’, ɛbɛ tɩkpɛlɩkɩɣ-ɖʋ?
Paɣtʋ tʋnɛ, pɔyɔɔdɩ tɩ-tɔm tam nabudozo Bibl taa. Tɩsɩɣnɩ-ɖʋ se ɖɩwɛɛnɩ lɩmaɣza kɩbana Yehowa pʋtɔdɩyɛ naʋ, ɛ-sɔɔlɩm nɛ mbʋ ɛmaɣzɩɣ se pɩtɩtʋʋzɩ yɔ, pɩ-yɔɔ. Tɩñɩkɩɣ niye ɖɔɖɔ ɛzɩma Yehowa paɖɩɣ cɛtɩm Ɛsɔ sɛtʋ yɔ pɩ-yɔɔ.—Ejipiti Lɩʋ 34:26; Wayɩ Wayɩ Paɣtʋ 14:21.
Ye patɩzɩ mbeɣa yaa kpɩnɛ lɛɛɖɛ ko-ɖoo hɩlɩm taa yɔ, pɩkaɖɩɣnɩ ɖʋtʋ ndʋ Yehowa laba pɩlɩɩnɩ wondu ndʋ ɛlɩzaa yɔ tɩ-yɔɔ yɔ. Yehowa ha mbeɣa ɖoo hɩlɩm se ɛcalɩnɩ ɛ-pɩɣa nɛ pɩsɩnɩ-kɛ nɛ kapaɣlɩ. Lɔŋsɩnɖʋ nɔɔyʋ yɔɔdaa se ye nɔɔyʋ ɛtɩzɩ mbeɣa ko-ɖoo maɣmaɣ hɩlɩm taa yɔ, pɩwɩlɩɣ se “enim ɖʋtʋ ndʋ Yehowa laba se taabalɩyɛ ɛwɛɛ lʋlɩyʋ nɛ ɛ-pɩɣa pɛ-hɛkʋ taa yɔ.”
Pɩtasɩ lɛ, nabɛyɛ maɣzaa se patɩzʋʋ mbeɣa ko-ɖoo hɩlɩm taa yɔ, pɩpɩzɩɣ nɛ pɩkɛ sɔnzɩ nasɩyɩ nzɩ sɩɩnaa layaa lakaɣ se tɛʋ ɛnɩɩ yɔ. Ye mbʋ, pʋyɔɔ paaɖʋ Izrayɛɛlɩ mba paɣtʋ se tɩsɩnɩ-wɛ nɛ pataatɔlɩ cɛtɩm Ɛsɔ sɛyaa mba paacɔ-wɛ nɛ pata yɔ pa-kañatʋ lakasɩ taa. Moyizi paɣtʋ kizaɣni Izrayɛɛlɩ mba se pataakpaɣ ajɛɛ ana a-lakasɩ.—Levitiki 20:23.
Kɛdɛzaɣ lɛ, ɖɩnaɣ Yehowa pʋtɔdɩyɛ naʋ ŋgee paɣtʋ tʋnɛ tɩ-taa. Toovenim taa lɛ, paaɖʋ paɣtʋ ɖɔɖɔ se pataala kpɩna kañatʋ nɛ pataamaanɩ paɣtʋ ndʋ paɖʋwa pɩlɩɩnɩ wondu kɩlɩzɩtʋ yɔɔ yɔ tɩ-yɔɔ. Kɩɖaʋ nakʋyʋ yɔ: Paɣtʋ yɔɔdaɣ se pʋcɔ nɛ pakpaɣ kpɩnɛ naɖɩyɛ ɖi-ɖoo cɔlɔ se palaɣ lɛ, pɩwɛɛ se ɖɩcɛzɩ kɩyakɩŋ lʋbɛ yɔɔ. Pɩtɩpɔzɩ se pɛkpɛndɩ kpɩnɛ nɛ ɖɩ-pɩɣa nɛ pakʋ nɛ palaa kɩyakʋ kʋɖʋmʋʋ. Pɩfɛyɩ ɖɔɖɔ se pakpa sumaɣ ŋga kapabɩ ka-yala yɔɔ yaa ke-piya yɔɔ yɔ; nɛ pɩtasɩ lɛ, pɩtɩpɔzɩ se pakpa sumaɣ nakɛyɛ nɛ pɛkpɛndɩnɩ ke-piya yaa pakpaɣ ka-yala ɖɔɖɔ.—Levitiki 22:27, 28; Wayɩ Wayɩ Paɣtʋ 22:6, 7.
Toovenim taa lɛ, pɩtɩkɛ paɣtʋ ndɩ ndɩ ndʋ papɩzɩɣ pamaɣzɩ se tɩwɛ kaɖɛ yɔ ti-ɖeke tɩwɛnɩ Moyizi Paɣtʋ taa. Paɣtʋ ndʋ, tɩ-taa nɛ paɣtʋ kila wena añɩkɩɣ niye Yehowa wɛtʋ kɩbandʋ yɔɔ nɛ asɩɣnɩ-ɖʋ se ɖɩcaɣ wezuu kɩbaŋʋ siŋŋ yɔ.—Keɣa 18:8-12.
19-25 JUILLET
ÑƖM MBƲ PƖWƐ ƐSƆTƆM TAA YƆ | WAYƖ WAYƖ PAƔTƲ 16-18
“Paɣtʋ kila wena asɩɣna se pahʋʋ tɔm siɣsiɣ yɔ”
it-1 410 § 2
Yʋlʋmtʋ
Papɩzɩɣ pala tɔm hʋyaa kʋjɔŋ se pɩsa nɛ pataahʋʋ tɔm camɩyɛ, pʋyɔɔ Paɣtʋ kizaa se pataala mulum kʋjɔŋ yaa pataataa num ɛyaa nɔsɩ, mbʋ pʋyɔɔ yɔ pɩpɩzɩɣ nɛ pɩyʋlʋsɩ tɔm hʋyʋ ɛsa nɛ pɩwɛɛnɩ ɖoŋ ɛzɩma ɛhʋʋ tɔm yɔ pɩ-yɔɔ. “Taamʋ kʋjɔʋ, mbʋ yɔ kʋjɔʋ yʋlʋsʋʋ aseɣɖe tɩnaa mba pana tɔm nɛ pɛ-ɛsa yɔ.” (Ejl 23:8) “Kʋjɔʋ yʋlʋsɩ lɔŋ tɩnaa ɛsa.” (Wp 16:19) Paa tɔm hʋyʋ ɛwɛ lɔŋ nɛ lɛɣtʋ ɛzɩma yɔ, ye mba pasʋ tɔm yɔ palabɩ-ɩ kʋjɔʋ yɔ, pɩpɩzɩɣ nɛ pɩyʋlʋsɩ ɛ-ɛsa, paa ɛsɔɔlaa yaa ɛtɩsɔɔlɩ yɔ. Ɛsɔtɔm yɔɔdaɣ ɛzɩma kʋjɔʋ pɩzɩɣ nɛ kihuuzi ɛyʋ ɛsa yɔɔ nɛ pɩwɛɛnɩ ɖoŋ ɛ-lɩmaɣza yɔɔ yɔ pɩ-tɔm lɛ, tɩtɔm se: “Itaamuli tɔm tɩŋ tɛɛ. Taala ɛjam ɛsɩmɩyɛ yɔɔ nɛ taayele ña-tɩ nɛ sɔsɔ yʋlʋsɩ ñɛ-ɛsa: hʋʋ ñɛ-tɛtʋ taa tʋ tɔm tɩ-nɔsɩ taa.” (Lev 19:15) Ye mbʋ, pɩfɛyɩ se tɔm hʋyʋ nɔɔyʋ ɛkʋ ñɩm tʋ nɔɔyʋ tɔm, mbʋ pʋyɔɔ yɔ ɛlɛ kɛ ñɩm tʋ, se pɩsa nɛ samaɣ sɔɔlɩ-ɩ.—Ejl 23:2, 3.
it-2 415 § 2
Kɩgalʋʋ, Masɩ kalʋʋ
Naalɛ. Ðoŋ ɖoŋ lɛ paañɔɔzʋʋ tɔm natʋyʋ lɛ, palakɩnɩ tʋmɩyɛ akɔnta mayaɣ ‘naalɛ.’ Ye nɔɔ kʋɖʋmaɣ ɛwɛ aseɣɖe tɩnaa naalɛ tɔm taa yɔ, piyeki nɛ petisi pa-aseɣɖe tɔm yɔɔ. Pɩpɔzʋʋ aseɣɖe tɩnaa naalɛ yaa naadozo pʋcɔ nɛ pahʋʋ tɔm natʋyʋ tɔm hʋyaa ɛsɩndaa. Paɣtʋ kiɖe nɖɩ ɖɔɖɔ palakɩnɩ tʋmɩyɛ Krɩstʋ ɛgbɛyɛ taa. (Wp 17:6; 19:15; Mt 18:16; 2Kɔ 13:1; 1Ti 5:19; Ebr 10:28) Ɛsɔ ɖɔm paɣtʋ kiɖe nɖɩ ɖɩ-yɔɔ alɩwaatʋ ndʋ ɛha ɛ-Pɩyalʋ se ɛkɛ ɛjaɖɛ ñʋʋ yaɖʋ yɔ. Yesu yɔɔdaa se: “Pɩtasɩ lɛ, pama mɩ-maɣmaɣ mɩ-Paɣtʋ taa se: ‘Ɛyaa naalɛ aseɣɖe tɔm kɛ toovenim.’ Malɩzɩɣ aseɣɖe ma-maɣmaɣ mɔ-yɔɔ, nɛ Caa weyi etiyi-m yɔ, ɛlɩzɩɣ ɖɔɖɔ aseɣɖe mɔ-yɔɔ.”—Yoh 8:17, 18.
it-2 657 § 3
Cɔjɔ
Cɔjɔnaa kaawɛnɩnɩ waɖɛ se pasɩnɩ Izrayɛɛlɩ samaɣ nɛ kanɩɩ Ɛsɔ paɣtʋ taa; nɛ palakaɣ tʋmɩyɛ sɔsɔɖɛ naɖɩyɛ tɔm hʋʋ hɔɔlʋʋ taa. Cɔjɔnaa ɖʋʋ nesi ɖɔɖɔ tɔm hʋyaa nɛ pahʋʋ tɔm tɛtʋ hɔɔlʋʋ ŋgʋ paha-wɛ yɔ kɩ-taa. Paɖʋʋ nesi tɔm hʋyaa nɛ pa nɛ wɛ pacakɩ nɛ pahʋʋ tɔm ndʋ egeetiye taa tɔm hʋyaa ɩɩpɩzɩɣ tɩ-hʋʋ yɔ. (Wp 17:8, 9) Ye pɩlaba se pakʋ nɔɔyʋ ɛlɛ paasɩŋ weyi ɛkʋ-ɩ yɔ, pɔpɔzaɣ cɔjɔnaa se pa nɛ tɛtʋ taa sɔsaa pala tʋmɩyɛ, se pɩsa nɛ pɔcɔnɩ tɔm ndʋ ti-ɖeɖe ɛzɩ pɩpɔzʋʋ yɔ, nɛ ɛyʋ ɛnʋ ɛ-calɩm ɛtaacaɣ tɛtʋ taa mba ñʋʋ taa. (Wp 21:1, 2, 5) Ye abalʋ sʋsɩ tʋ nɔɔyʋ ɛyɔɔdaa se ɛ-halʋ labɩ acɛyɛ mɛsaɣ tɛɛ yɔ, pɩwɛɛ se ewoni halʋ ɛnʋ kediɣzaɣ kizinziku tɛɛ, ɖenɖe cɔjɔ lakɩ sɔnzɩ nzɩ pɩpɔzʋʋ yɔ. Nɛ sɔnzɩ nzɩ sɩ-labʋ taa Yehowa, weyi ɛsɩm toovenim yɔ ɛwɩlɩɣ kaɣlaa ye halʋ ɛcɛtɩ ɛ-walʋ yaa ɛtɩcɛtɩ-ɩ yɔ. (Kɩg 5:11-31) Paa tɔm ndʋ tɩ-taa lɛ, pɩɩwɛɛ se samaɣ taa mba ɩña cɔjɔnaa nɛ tɔm hʋyaa nɛ paña lɩmaɣza wena pakpaɣ yɔ. Ye nɔɔyʋ ekizaa se ɛɛñaŋ yɔ, sɩm pɩtɛŋnɩ-ɩ.—Kɩg 15:30; Wp 17:10-13.
Fezuu taa ñɩm
it-1 852 § 3
Lɩzʋʋ
Moyizi Paɣtʋ tɛɛ lɛ, pʋcɔ nɛ pakʋ nɔɔyʋ tɔm lɛ, pɩɩpɔzaa se palabɩnɩ tʋmɩyɛ aseɣɖe tɩnaa naalɛ tɔm; aseɣɖe tɩnaa pɩzɩɣ nɛ pɛcɛzɩ naalɛ. (Wp 19:15) Aseɣɖe tɩnaa mba, mba calɩɣnɩ weyi ɛ-tɔm sɩba yɔ, kaaŋ yaɣʋ. (Wp 17:7) Palakɩ mbʋ nɛ pɩwɩlɩɣ se pɔsɔɔlɩ Ɛsɔ paɣtʋ yɔɔ ɖɔm nɛ pɔsɔɔlaa se Izrayɛɛlɩ samaɣ ɛwɛɛ kele kele. Piyeki ɖɔɖɔ se mba pɔsɔɔlɩ cɛtɩm aseɣɖe lɩzʋʋ, pabaa fɛyɩnɩ ɛyaa yaa paamaɣzɩɣ camɩyɛ nɛ pʋcɔ nɛ pɔyɔɔdʋʋ yɔ, pakpa pa-tɩ.
26 JUILLET 1er–AOÛT
ÑƖM MBƲ PƖWƐ ƐSƆTƆM TAA YƆ | WAYƖ WAYƖ PAƔTƲ 19-21
“Ɛyʋ wezuu mʋ ñɩm siŋŋ Yehowa ɛsɩndaa”
Maɣzɩnɩ Yehowa siɣsiɣ wɛtʋ nɛ ɛ-pʋtɔdɩyɛ naʋ
4 Pɩɩwɛ kɛlɛʋ se ɛyʋ ewolo ɖɩjɔzɩyɛ tɛtʋ loɖo ndʋ tɩ-taa. Yehowa ha paɣtʋ Izrayɛɛlɩ piya se paa Yɔɔrdaŋ pɔɔ hɔɔlʋʋ ŋgʋ kɩ-taa lɛ, palɩzɩ ɖɩjɔzɩyɛ tɛtʋ naadozo. Ɛbɛ yɔɔ? Piyeki nɛ weyi eseɣ se ɛmɛlɩ ɖɩjɔzɩyɛ tɛtʋ taa yɔ pɩtaalabɩ-ɩ kaɖɛ. (Kɩg. 35:11-14) Pɔñɔɔzaɣ habɛɛ wena awokini ɖɩjɔzɩyɛ tɛtʋ taa yɔ se awɛɛ camɩyɛ paa ɛzɩmtaa. (Wp. 19:3) Yuuda ñɩma sɔnzɩ wɩlɩɣ se pesikaɣ kpenzalasɩ nzɩ sɩwɩlɩɣ ɖɩjɔzɩyɛ tɛtʋ taa nʋmɔʋ yɔ. Ɛzɩma ɖɩjɔzɩyɛ tɛtʋ taa wobu kaawɛ kɛlɛʋ yɔ, pɩsɩɣnɩ weyi pɩyʋtɩnɩ-ɩ nɛ ɛkʋ ɛyʋ yɔ se etaahiɣ kawanaɣ nakɛyɛ nɛ ewolo sɩɩnaa layaa ɛjaɖɛ taa nɛ pʋwayɩ ɛnʋ ɖɔɖɔ ɛpaɣzɩ sɩɩnaa laʋ.
Maɣzɩnɩ Yehowa siɣsiɣ wɛtʋ nɛ ɛ-pʋtɔdɩyɛ naʋ
9 Kaɖʋwa ŋga kɔ-yɔɔ pama ɖɩjɔzɩyɛ tɛtʋ yɔ lɛ se pɩkandɩyɩ Izrayɛɛlɩ piya yɔɔ nɛ sɩtaakpɛdɩ calɩm ɖulum. (Wp. 19:10) Yehowa sɔɔlɩ wezuu nɛ ɛpaɖɩɣ “nesi nzɩ sɩkpɛdɩɣ calɩm ɖulum yɔ.” (Adu. 6:16, 17) Ɛsɔ wɛ siɣsiɣ nɛ ɛwɛɛ kele kele, pʋyɔɔ ɛɛkaɣ sɔʋ calɩm mbʋ pɛkpɛdɩ ɖulum yɔ pɩ-yɔɔ. Pɩkɛ toovenim se weyi pɩyʋtɩnɩ-ɩ nɛ ɛkʋ ɛyʋ yɔ panaɣ ɛ-pʋtɔdɩyɛ. Paa mbʋ yɔ pɩwɛɛ se ɛñɔtɩnɩ sɔsaa nɛ eheyi-wɛ mbʋ pɩtalɩ-ɩ yɔ nɛ ye patazaa nɛ pana se pɩyʋtɩnɩ-ɩ kɩyʋtɩnʋʋ yɔ, ɖɩnɛ lɛ ɛpɩzɩɣ nɛ ɛɖʋ hʋyʋʋ ɖɩjɔzɩyɛ tɛtʋ taa pɩkɔɔ pɩtalɩ cɔjɔ sɔsɔ sɩm wiye. Pɩwɩlɩɣ se ye cɔjɔ sɔsɔ ɛtɩsɩ yɔ, peeɖe ɛkaɣ caɣʋ e-wezuu caɣʋ kɩyakɩŋ kpeekpe. Ye picoɖi ɛyʋ nɛ ɛkʋ lɛlʋ yɔ, Izrayɛɛlɩ piya kaanawa se mbʋ pɩlɩɣ pɩ-taa yɔ, pɩtaakɛ aleɣya tɔm nɛ pɩsɩnɩ-sɩ nɛ sɩna se wezuu kɛ pʋyʋ kiɖeɖeu Yehowa ɛsɩndaa. Pɩɩwɛɛ se sɩcɔnɩ sɩ-tɩ yɔɔ camɩyɛ nɛ sɩ-lakasɩ yaa sɩ-kaakendu natʋyʋ ɛtaakɔnɩ kaɖɛ si-koobu nɔɔyʋ wezuu yɔɔ, nɛ ye sɩlakɩ mbʋ yɔ sɩwɩlɩɣ se sɩñaŋ Wezuu Hayʋ.
it-2 892 § 5
Calɩm
Ɛsɔ ha ɛyʋ wezuu se ɛnɩɩ ki-leleŋ. Nɛ ye nɔɔyʋ ɛlɩzɩ wezuu ŋgʋ yɔ, Ɛsɔ kaɣ-ɩ hʋnʋʋ tɔm. Pʋyɔɔ, alɩwaatʋ ndʋ Kayɩnɩ kʋ e-neu yɔ, Yehowa heyi se: “Ñe-neu calɩm makɩ kubusi tataa nɛ pɩkpaɣ mɔn-cɔlɔ!” (Kiɖe 4:10) Halɩ paa nɔɔyʋ ɛpaɖɩɣ e-koobu nɛ ɛñɩnɩɣ ɛ-sɩm yaa ɛlɩzɩ cɛtɩm aseɣɖe ɛ-yɔɔ nɛ pɩɖʋ ɛlɛ wezuu kaɖɛ taa yɔ, pakaɣ-ɩ tɔm hʋnʋʋ e-koobu ɛnʋ ɛ-calɩm yɔɔ.—Lev. 19:16; Wp. 19:18-21; 1 Yoh. 3:15.
Fezuu taa ñɩm
it-2 1106 § 1
Kʋjɔŋ, Tɔm hʋʋ
Tɔm ɖɩhʋyɛ kaawɛ tɛtʋ nɔnɔɔ taa. (Wp 16:18; 21:19; 22:15, 24; 25:7; Ruti 4:1) Tɔm pee “Nɔnɔɔ taa” tɔbʋʋ lɛ se lone nɖɩ pɔñɔɔzɩ tɛtʋ taa nɛ ɖɩñɔtɩnɩ tɛtʋ nɔɔnɔɔ kpam yɔ. Samaɣ kpeɣlaɣ tɛtʋ nɔnɔsɩ taa nɛ pakalɩɣ-kɛ paɣtʋ nɛ peheyiɣ-kɛ mbʋ kala yɔ. (Neh 8:1-3) Nɔnɔsɩ taa peeɖe lɛ, pɩɩwɛ kɛlɛʋ se pehiɣ aseɣɖe tɩnaa, tɔm ndɩ ndɩ yɔɔ; ɛzɩ tɔm natʋyʋ wɛʋ ɛyaa naalɛ hɛkʋ taa yaa ñɩm nabʋyʋ pɛdʋʋ tɔm mbʋ yɔ, mbʋ pʋyɔɔ yɔ, paa evemiye nɖɩ lɛ, ɛyaa sakɩyɛ sʋwaɣ nɛ palɩɣ. Pɩtasɩ lɛ, ɛzɩma pahʋʋ tɔm ɛyaa ɛsɩndaa tɛtʋ nɔnɔɔ taa yɔ, piyekaɣ se tɔm hʋyaa ɩkpaɣ lɩmaɣza camɩyɛ nɛ pahʋʋ tɔm siɣsiɣ. Pɩtʋʋ fɛyɩ se paañɩnɩ tɔm hʋyaa lone kɩbanɖɛ naɖɩyɛ tɛtʋ nɔnɔɔ cɔlɔ se pɩsa nɛ pala pa-tʋmɩyɛ camɩyɛ. (Yɔɔb 29:7) Samɩyɛɛlɩ cɔwaɣ nɛ ewoki Betɛɛlɩ, Gilgaalɩ nɛ Mizpaa nɛ “ɛhʋʋ Izrayɛɛlɩ tɔm tɛtʋ ndʋ” tɩ-taa, halɩ pɩkpɛndɩnɩ Ramaa ɖenɖe ɛ-maɣmaɣ ɛ-ɖɩɣa kaawɛɛ yɔ.—1 Sam 7:16, 17.
2-8 AOÛT
ÑƖM MBƲ PƖWƐ ƐSƆTƆM TAA YƆ | WAYƖ WAYƖ PAƔTƲ 22-23
“Ɛzɩma Paɣtʋ wɩlɩɣ se Yehowa maɣzɩɣ kpɩna yɔɔ?”
it-2 868 § 2
Sʋʋtʋ
Caanaʋ taa lɛ, kpɩna pasʋkaɣ sʋʋtʋ ɖoŋ ɖoŋ. Nɛ paaheyi Izrayɛɛlɩ mba se ye pana weyi ɛpaɖɩɣ-wɛ yɔ ɛ-kpaŋaɣ tɔlaa nɛ ka-sʋʋtʋ wɛɛ kɔ-yɔɔ yɔ, pɩtɩpɔzɩ se pala ɛzɩ patɩna-kɛ yɔ nɛ pɛɖɛɛ. Pɩwɛɛ se pasɩnɩ-kɛ nɛ ‘pɛhɛɖɩ kɔ-yɔɔ sʋʋtʋ.’ (Ejl 23:5) Wondu ndʋ kpɩnɛ naɖɩyɛ pɩzɩɣ nɛ ɖɩsɩɣlɩ yɔ, ndʋ payaɣ se sʋʋtʋ ɛzɩ sʋʋtʋ ndʋ ‘kpaŋasɩ naalɛ sɩɣlɩɣ yɔ.’—2 Aw 5:17.
it-1 635 § 2
Wayɩ Wayɩ Paɣtʋ
Wayɩ Wayɩ Paɣtʋ takayaɣ taa, pɔyɔɔdɩ ɛzɩma pɔcɔnɩ kpɩna yɔɔ camɩyɛ nɛ sɔɔlɩm yɔ pɩ-tɔm. Paapaɣ Izrayɛɛlɩ mba se pataakpaɣ sumaɣ nakɛyɛ ye kɛwɛ ka-ɖandʋ taa yɔ, mbʋ pʋyɔɔ yɔ kɛwɛɛ nɛ kakandɩyɩ ke-piya yɔɔ. Papɩzɩɣ pakpaɣ sumasɩ, ɛlɛ pɩwɛɛ se peyele ɖoyo. Pɩhaɣ ɖoyo waɖɛ se ɛtasɩ yala lɛɛna ɖʋʋ. (Wp 22:6, 7) Pɩtɩpɔzɩ se haɖʋ ɛkpɛndɩ kpaŋaɣ nɛ nɔ se pahayɩ. Ye ɛlabɩ mbʋ yɔ pɩcamɩɣ kpɩnɛ nɖɩ ɖɩfɛyɩ ɖoŋ yɔ. (22:10) Pɩfɛyɩ se pɔhɔkɩ nɔ weyi ɛɖɔŋ mɩla pee yɔɔ yɔ ɛ-nɔɔ, se pɩsa nɛ ñɔɔsɩ ɛtaakʋ-ɩ alɩwaatʋ ndʋ ɛwɛɛ nɛ ɛlakɩ tʋmɩyɛ nɛ e-ɖoŋ yɔ.—Wp 25:4.
w03 15/10 32 § 1-2
“Mɩ nɛ mba pɛfɛyɩnɩ tisuu yɔ ɩtaakpɛndɩ”
ƐZƖ ɖɩnaʋ cɩnɛ yɔ, aɖaaɖaa nɛ nɔ pɛwɛɛ nɛ palakɩ kʋñɔŋ nɛ paapɩzɩɣ tʋmɩyɛ labʋ. Ðaʋ ŋgʋ pakpaɣ nɛ patamnɩ-wɛ yɔ, ŋgʋ yebina nɛ kpɩna ana atɔkɩ kʋñɔŋ. Kpɩna wena a-paɣlɩka nɛ a-ɖoŋ wɛ kɩmaŋ yɔ, ana pɩwɛɛ se patamnɩ ɖama. Ɛsɔ sɔɔlaa se kpɩna ɩwɛɛ camɩyɛ nɛ apɩzɩ ala tʋmɩyɛ camɩyɛ, pʋyɔɔ eheyi Izrayɛɛlɩ mba se: “Pɩfɛyɩ se ŋkpɛndɩ nɔ abalɩñɩnʋ nɛ kpaŋaɣ nɛ ŋhayɩna.” (Wayɩ Wayɩ Paɣtʋ 22:10) Papɩzɩɣ palabɩnɩ paɣtʋ kiɖe nɖɩ ɖɔɖɔ tʋmɩyɛ nɔ nɛ aɖaaɖaa pɔ-hɔɔlʋʋ taa.
Ðoŋ ɖoŋ lɛ, haɖʋ ɛɛɖʋ kʋñɔŋ ŋgʋ ɛ-kpɩna. Ɛlɛ ye ɛfɛyɩnɩ naŋ naalɛ yɔ, ɛpɩzɩɣ ɛkpɛndɩ kpɩna wena ɛwɛna yɔ a-taa naalɛ. Nɛ pɩwɛ ɛzɩ lɩmaɣzɩyɛ nɖɩ pɩnzɩ 1 800 waa taa haɖʋ weyi paha ɛ-kɩɖaʋ yɔ, ɛɛkpaɣ yɔ. Kpɩna ana a-kɩkʋyɩŋ nɛ a-yuŋ tɩta, pʋyɔɔ lɛ kpɩnɛ nɖɩ ɖɩfɛyɩ ɖoŋ yɔ ɖɩwɩɣnɩ nɖɩ ɖɩwɛ ɖoŋ yɔ ɖɩ-wayɩ tɩŋʋʋ nɛ nɖɩ ɖɩwɛ ɖoŋ yɔ, ɖɩɖɩ ñasɩɣlɩɣ sʋʋtʋ ndʋ tɩkɩlɩ ɖɔʋ yɔ.
Fezuu taa ñɩm
it-1 629 § 1
Kɩmɩyɛ, kɩmtɔɔyʋ
Ye pɔtɔm se nɔɔyʋ tɔɔ kɩmɩyɛ yɔ, pɩwɩlɩɣ se ɛmʋ nabʋyʋ nɛ pɩpɔzʋʋ se ɛpɩsɩnɩ-pʋ yaa ɛhɛyɩ pi-lone taa. Caanaʋ taa Izrayɛɛlɩ taa lɛ, ɛyaa tɔkaɣ kɩma ye pasʋ liidiye kʋñɔŋ taa yɔ. Izrayɛɛlɩ tʋ nɔɔyʋ ɛtɔɔ kɩmɩyɛ naɖɩyɛ yɔ, pɩkɛnɩ-ɩ kʋñɔŋ tɔm; mbʋ pʋyɔɔ yɔ ɛpɩsɩɣ weyi ɛkɩndɩ-ɩ liidiye yɔ ɛ-lɩmɖʋyʋ. (Adu 22:7) Pʋyɔɔ paɖʋ samaɣ taa ɛyaa paɣtʋ se pɛwɛɛnɩ kʋjɔʋ labʋ lɩmaɣza nɛ pataakɛ piɖeni men-ɖeke tɩnaa alɩwaatʋ ndʋ pakɩndɩɣ nabʋyʋ po-koobiya mba pɛwɛ kɩcɛyɩm taa yɔ. Pɩtɩpɔzɩ se patɩŋnɩ po-koobiya kʋñɔndʋtʋ yɔɔ nɛ pacazɩ pa-tɩ ñɩm, pɩtɩŋnɩ ɛzɩma peheyiɣ-wɛ se pɛhɛyɩnɩ kɛzɛɣa yɔ pɩ-yɔɔ. (Ejl 22:24; Wp 15:7, 8; Keɣa 36:26; 111:5) Ɛlɛ mba pɛkɛ agɔma yɔ, pɩɩwɛɛ se paba ɩhɛyɩ pɩkpɛndɩnɩ kɛzɛɣa. (Wp 23:20) Yuuda mba tɔm taa tazɩyaa nabɛyɛ maɣzɩɣ se mba pakɩndɩɣ liidiye se palabɩnɩ tadɩyɛ yɔ, mba tɔm ndʋ titukuuna, pɩtɩkɛ mba pɛwɛ kʋñɔŋ taa nɛ pakɩndɩɣ liidiye yɔ. Mba pɛkɛ agɔma Izrayɛɛlɩ tɛtʋ taa yɔ paacakɩ tam. Ðoŋ ɖoŋ lɛ, pɛkɛ tadɩyɛ laɖaa nɛ ɛyʋ pɩzɩɣ ɛmaɣzɩ se pɩmʋnaa se pɛhɛyɩ pɩkpɛndɩnɩ kɛzɛɣa; mbʋ pʋyɔɔ yɔ, kɔzɩ kɔzɩ lɛ pa-maɣmaɣ pakɩndɩɣ ɛyaa lɛ, pɔsɔɔlaa se pɛhɛyɩ-wɛ nɛ pɩkpɛndɩnɩ kɛzɛɣa.
9-15 AOÛT
ÑƖM MBƲ PƖWƐ ƐSƆTƆM TAA YƆ | WAYƖ WAYƖ PAƔTƲ 24-26
“Ɛzɩma Moyizi paɣtʋ wɩlɩɣ se Yehowa maɣzɩɣ halaa yɔɔ?”
it-1 874 § 4
Halaa
Halɩ paɣtʋ ndʋ paaɖʋ sɔɔjanaa yɔ tɩwazaɣ halʋ nɛ ɛ-walʋ mbʋ pʋyɔɔ yɔ, abalʋ kpakɩɣ halʋ lɛ, pahaɣ-ɩ waɖɛ se etaawolo you pɩnaɣ kʋɖʋmaɣ. Piyeki nɛ panɩɩ leleŋ waɖɛ nɖɩ pɛwɛna se palʋlɩ pɩɣa yɔ ɖɩ-yɔɔ. Pɩɣa ŋga, kɛhɛzɩɣ ko-ɖoo laŋɩyɛ alɩwaatʋ ndʋ ɛ-walʋ fɛyɩ yɔ, yaa ye pɩlaba se ɛlɛ sɩbɩ you taa yɔ.—Wp 20:7; 24:5.
it-1 994 § 3
Cazʋʋ
Ðʋtʋ ndʋ Yehowa labɩ kʋñɔndɩnaa hɔɔlʋʋ taa yɔ, tiseɣtaɣ ɛyaa se pɛkɛ kʋjɔʋ tɩnaa, pamaɣzɩɣ lalaa yɔɔ nɛ pataa liu Yehowa wazasɩ; nɛ pɩtɩpɔzɩ se pɛkɛ feendu tɩnaa. Tɔm tʋnɛ tɩñɩkɩɣ niye tɔm ndʋ Daviid yɔɔdaa yɔ tɩ-yɔɔ se: “Mantɩna pɔlɔ ɛyʋ siɣsiɣ tʋ, yaa e-piya sʋlʋmʋʋ tɔɔnaɣ.” (Keɣa 36:25) Ye pañakɩ pana nɛ pɔɖɔŋ ɖʋtʋ ndʋ Yehowa laba se pɩsa nɛ pehiɣ tɔɔnaɣ yɔ, tɩ-yɔɔ yɔ, piyeki nɛ ñɔɔsɩ ɛɛkaɣ pa-taa nɔɔyʋ wɩʋ, halɩ pɩkpɛndɩnɩ kʋñɔndɩnaa yaa pe-piya paakaɣ tɔɔnaɣ sʋlʋmʋʋ.
w11 1/3 23
Ŋŋsɩm-tʋ?
Caanaʋ taa Izrayɛɛlɩ ɛjaɖɛ taa, ye abalʋ nɔɔyʋ ɛsɩba nɛ ɛfɛyɩnɩ abalɩbɩɣa yɔ, e-neu kpakɩɣ lelu nɛ ɛha ɛ-ɖalʋ liɖe se pɩsa nɛ sɩɖʋ hɩɖɛ etaale. (Kiɖe 38:8) Pʋwayɩ lɛ, pɔsɔzɩ-tʋ Moyizi Paɣtʋ taa, nɛ mbʋ payaɣ se lelu malɩnʋʋ. (Wp 25:5, 6) Mbʋ Bowaazɩ laba nɛ pama pɩ-tɔm Ruti takayaɣ taa yɔ, pɩwɩlɩɣ se paha waɖɛ nɖɩ abalaa lalaa mba pɛwɛ sɩɖʋ hɔʋ taa yɔ, ye e-newaa yaa ɛ-ɖalaa ɩsɩba yɔ.—Ruti 1:3, 4; 2:19, 20; 4:1-6.
Ðʋtʋ ndʋ paalaba se ye walʋ ɛsɩba yɔ, neu ɛkpaɣ ɛ-cʋyʋ yɔ, tɩɩwɛ Yesu alɩwaatʋ taa, pʋyɔɔ Saduki mba yɔɔdɩ pɩ-tɔm Maarkɩ 12:20-22 taa. Caanaʋ taa tɔm mayʋ, Yuuda tʋ Flavius Josèphe yɔɔdaa se, ɖʋtʋ ndʋ tɩsɩɣna se hɔʋ hɩɖɛ etaale, hɔʋ taa ñɩm ɩcaɣ hɔʋ taa nɛ pɩtasɩ ɖɔɖɔ lɛ, pɩkandɩyɩɣ lelu yɔɔ. Alɩwaatʋ ndʋ tɩ-taa lɛ, halʋ taawɛɛnɩ waɖɛ se ɛtɔɔ ɛ-walʋ ñɩm ɛlɛ sɩm wayɩ. Ɛlɛ ye ɛwalɩ ɛ-walʋ hɔʋ taa tʋ nɔɔyʋ, ɛ-walʋ sɩm wayɩ nɛ ɛlʋlɩ pɩɣa yɔ, ŋga kpakɩɣnɩ ka-caa ñɩm.
Fezuu taa ñɩm
it-1 657 § 5
Nesi cɛbʋ
Nesi cɛbʋ takayaɣ. Pɩfɛyɩ se ɖɩkɔ tɔm ñʋʋ se paɣtʋ ndʋ paɖʋ nesi cɛbʋ yɔɔ Moyizi Paɣtʋ taa yɔ, tiyekaɣ se pɩwɛɛ kɛlɛʋ Izrayɛɛlɩ abalʋ nɔɔyʋ se ekizi ɛ-halʋ. Pʋcɔ nɛ ɛla mbʋ lɛ, pɩwɛɛ se ɛkpɛzɩ nɩŋgbanzɩ nasɩyɩ. Pɩcɛyaa se ɛma ɛ-halʋ takayaɣ nakɛyɛ. Pɩwɛɛ se “ɛma takayaɣ se ɛɖɔɔnɩ-ɩ” nɛ “ɛɖʋzɩ e-nesi tɛɛ nɛ ɛɖɔɔnɩ-ɩ ɛ-ɖɩɣa taa.” (Wp 24:1) Paa Masɩ ɛtɩyɔɔdɩ ɖeyi ɖeyi ɛzɩma palakaɣ yɔ, pɩwɛ ɛzɩ abalaa nabɛyɛ mba pamʋnaa yɔ, pɔcɔŋnaɣ tɔm ndʋ ti-ɖeɖe kajalaɣ ɖeɖe se pɩsa nɛ pɔñɔɔzɩ tɔm nɛ peceɣ. Alɩwaatʋ ndʋ abalʋ kpakɩɣ se ɛmanɩ takayaɣ ŋga yɔ, tɩsɩɣnɩ-ɩ se ɛhʋʋ ɛ-taa nɛ ɛna se ɛkpaɣʋ lɩmaɣzɩyɛ se ekiziɣ ɛ-halʋ yɔ, pɩkɛ lɩmaɣzɩyɛ kɩbanɖɛ na. Pɩɩpɔzaa se pana mbʋ pʋyɔɔ ekiziɣ ɛ-halʋ yɔ, nɛ ɛla mbʋ payɩ pɩpɔzʋʋ yɔ pʋcɔ nɛ ekizi ɛ-halʋ. Pɩnaɣ se palabɩ ɖʋtʋ ndʋ se pɩsa nɛ ɛyaa paɖɩ nesi cɛbʋ. Ðʋtʋ ndʋ tɩsɩɣaɣnaɣ ɖɔɖɔ se pakandɩyɩ halaa yɔɔ. Masɩ tɩyɔɔdɩ mbʋ mbʋ pɩɩwɛɛ se pama nesi cɛbʋ takayaɣ taa yɔ pɩ-tɔm.
16-22 AOÛT
ÑƖM MBƲ PƖWƐ ƐSƆTƆM TAA YƆ YƆ | WAYƖ WAYƖ PAƔTƲ 27-28
“Wazasɩ kpeekpe sɩnɛ yɔ sɩkaɣ tibu ñɔ-yɔɔ, nɛ sɩsʋ-ŋ”
w10 15/12 19 § 18
Hiɣ wazasɩ pɩtɩŋnɩ fezuu taa wiyaʋ weyi Ɛsɔ lɩzaa yɔ ɛ-yɔɔ!
18 Ye pɔtɔm se ɖiwelisi yɔ, pɩwɩlɩɣ se ɖiyele nɛ Bibl taa tɔm nɛ fezuu taa tɔɔnasɩ lɛɛsɩ nzɩ Yehowa haɣ-ɖʋ yɔ sitii ɖa-laŋa taa. (Mt 24:45) Pɩwɩlɩɣ ɖɔɖɔ se ɖɩña Ɛsɔ nɛ ɛ-Pɩyalʋ. Yesu yɔɔdaa se: “Pɩtɩkɛ mba payaɣ-m se: ‘Kɩbaɣlʋ, Kɩbaɣlʋ’ yɔ, pa-tɩŋa pakaɣnɩ sʋʋ ɛsɔdaa Kewiyaɣ taa, ɛlɛ weyi ɛlakɩ man-Caa weyi ɛwɛ ɛsɔdaa yɔ ɛ-sɔɔlɩm yɔ, e-ɖeke ɛkaɣnɩ sʋʋ.” (Mt 7:21) Ye ɖiwelisiɣni Ɛsɔ yɔ, pɩwɩlɩɣ se ɖiluzuu ɖa-tɩ ɖʋtʋ ndʋ ɛlaba nɛ “ɛha ɛyaa se pɛkɛ kʋjɔŋ” Krɩstʋ ɛgbɛyɛ taa yɔ tɩ-tɛɛ.—Efɛ 4:8.
w01 15/9 10 § 2
Yehowa wazasɩ kaɣ-ŋ sʋʋ na?
2 Ebree kʋnʋŋ taa lakaɣ ŋga pɛɖɛzɩ Wayɩ Wayɩ Paɣtʋ 28:2 taa se “ŋwelisiɣ” yɔ, kɔ-tɔbʋʋ lɛ se ŋwolo pɩ-yɔɔ nɛ ŋwelisiɣ. Pɩtɩpɔzɩ se Yehowa samaɣ ewelisiɣni-i wiɖii wiɖii, ɛlɛ pɩwɛɛ se kewelisiɣni-i ke-wezuu caɣʋ hɔɔlɩŋ kpeekpe taa. Pi-ɖeke pɩ-yɔɔ pɩpɩzɩɣ pɩtɩŋna nɛ Ɛsɔ wazasɩ sʋʋ-kɛ. Ebree tɔm piye nɖɩ pɛɖɛzaa se “sʋʋ” yɔ, ɖɩnɩɣzɩnɩ tɔm piye lɛɛɖɛ nɖɩ ɖitukuuni ɛgbandʋ labʋ yɔ, nɛ ɖoŋ ɖoŋ lɛ, ɖɩwɩlɩɣ “ɛzɩma ɛyʋ wɛɣ nabʋyʋ ɖɔɔnʋʋ yɔɔ se ɛkpa-pʋ” yɔ.
w10 15/9 8 § 4
Yehowa wazasɩ ñɩnʋʋ nɛ laŋɩyɛ pilim
4 Ɛzɩma pɩɩwɛɛ se Izrayɛɛlɩ mba ɩkʋ nɩŋgbaaŋ? Ɛsɔ yɔɔdɩ ɛ-paɣtʋ taa se ɛ-taa wɛɣ leleŋ ye ɛ-samaɣ ɛsɛɣ-ɩ “nɛ amɛya nɛ laŋhʋlʋmɩyɛ” yɔ. (Kalɩ Wayɩ Wayɩ Paɣtʋ 28:45-47.) Pɩfɛyɩ se ɖɩña Yehowa yem se pɔtɔm se ɖɩñamɩ-ɩ. Halɩ kpɩna yaa aleewaa ñaŋ. (Mk 1:27; Yak 3:3) Ye ɖɩñaŋ Ɛsɔ nɛ laŋɩyɛ pilim yɔ, pɩwɩlɩɣ se ɖɩsɔɔlɩ-ɩ. Ɛyʋ ñaŋ Yehowa nɛ taa leleŋ, ye ɛwɛnɩ tisuu se ɛ-paɣtʋ tɩkɛnɩ-ɩ sʋʋtʋ nɛ “ɛhɛyɩɣ mba pañɩnɩɣ-ɩ yɔ.”—Ebr 11:6; 1Yo 5:3.
Fezuu taa ñɩm
it-1 364 § 2
Kamasɩ yʋsaɣ
Yehowa ɖʋ paɣtʋ se pɩfɛyɩ se potuzi nɔɔyʋ tɛtʋ kamasɩ. (Wp 19:14; kalɩ ɖɔɖɔ Adu 22:28) Toovenim taa lɛ, “pɩtɔɔ weyi etuzuu e-koobu kamaɣ yɔ.” (Wp 27:17) Paɖʋʋ hayɩm nɛ pɩlʋlʋʋ mbʋ yɔ, mbʋ tɛtʋ tɩnaa tɔkɩ. Ye mbʋ, ye nɔɔyʋ ewoba nɛ etuzi lɛlʋ tɛtʋ kamasɩ yɔ, pɩwɩlɩɣ se ɛpasɩ mbʋ pɩsɩɣnɩ lɛlʋ se ɛcɔnɩ ɛ-kɩcɛyɩm ɖeɖe yɔ pɩ-yɔɔ. Caanaʋ taa lɛ, lakasɩ nzɩ sɩnɩɣzɩnɩ mɩlɩm. (Yɔɔb 24:2) Ɛlɛ mba paanaɣ ɛyaa pʋtɔdɩyɛ yɔ palakaɣ lakasɩ nzɩ. Ozee alɩwaatʋ taa, pakpaɣ Yuuda awumbiya nɛ pamaɣzɩnɩ mba potuzuu lalaa kamasɩ yɔ.—Ozee 5:10.
23-29 AOÛT
ÑƖM MBƲ PƖWƐ ƐSƆTƆM TAA YƆ | WAYƖ WAYƖ PAƔTƲ 29-30
“Yehowa sɛtʋ tɩkɛ sʋʋtʋ”
w09 1/11 31 § 2
Yehowa ha-ɖʋ waɖɛ se ɖɩlɩzɩ mbʋ ɖɩsɔɔlaa yɔ
Ɛzɩ pɩwɛ-ɖʋ kaɖɛ se ɖɩtɩlɩ mbʋ Yehowa sɔɔlaa yɔ nɛ ɖɩlabɩ-pʋ? Moyizi yɔɔdaa se: “Paɣtʋ ndʋ manɖʋʋ-ŋ sɔnɔ yɔ tɩtɩkɩlɩ-ŋ nɛ tɩfɛyɩ poliŋ.” (Kalɩtʋ 11) Yehowa ɛɛpɔzʋʋ-ɖʋ se ɖɩla mbʋ pɩkɩlɩ-ɖʋ yɔ. Mbʋ ɛpɔzʋʋ-ɖʋ se ɖɩla yɔ, pɩmʋnaa nɛ ɖɩpɩzɩɣ pɩ-labʋ. Pɩfɛyɩ kaɖɛ. Pɩtɩcɛyɩ se ɖɩkpa “ɛsɔdaa” yaa ɖɩtɛzɩ “pɔɔ nɛ ka-wayɩ” pʋcɔ nɛ ɖɩkpɛlɩkɩ mbʋ Ɛsɔ sɔɔlaa se ɖɩla yɔ. (Kalɩtʋ 12, 13) Bibl heyi-ɖʋ kpayɩ kpayɩ ɛzɩma pɩwɛɛ se ɖɩcaɣ wezuu yɔ.—Mikee 6:8.
w09 1/11 31 § 1
Yehowa ha-ɖʋ waɖɛ se ɖɩlɩzɩ mbʋ ɖɩsɔɔlaa yɔ
“SƆƆNDƲ kpaɣaɣ-m se maapɩzɩɣ nɛ mɔnɖɔkɩ men-siɣsiɣ wɛtʋ Yehowa ɛsɩndaa.” Tɔm tʋnɛ koobu halɩñɩnʋ nɔɔyʋ yɔɔdaa. Mbʋ pɩɩtalɩ-ɩ ɛ-pɩjatʋ taa yɔ pʋyɔɔ ɛyɔɔdɩ mbʋ. Ɛlɛ ɛzɩ pɩkɛ toovenim se ɖɩɩpɩzɩɣ nɛ ɖɩla nabʋyʋ nɛ ɖɩlɩɩ wɛtʋ ndʋ tɩ-taa ɖɩwɛɛ yɔ? Aayɩ. Yehowa ha-ɖʋ tɩ yɔɔ wɛʋ lɩzʋʋ waɖɛ; pʋyɔɔ lɛ, ɖa-maɣmaɣ ɖɩpɩzɩɣ nɛ ɖɩlɩzɩ ɛzɩma ɖɩsɔɔlaa se ɖɩcakɩ wezuu yɔ. Yehowa sɔɔlaa se ɖɩlɩzɩ mbʋ pɩwɛ ɖeu yɔ, nɛ ɛ-Tɔm wɩlɩɣ-ɖʋ ɛzɩma ɖɩpɩzɩɣ nɛ ɖɩla mbʋ yɔ. Maɣzɩ tɔm ndʋ Moyizi yɔɔdɩ Wayɩ Wayɩ Paɣtʋ ñʋʋ 30 taa yɔ, tɩ-yɔɔ nɛ ŋna.
w09 1/11 31 § 4
Yehowa ha-ɖʋ waɖɛ se ɖɩlɩzɩ mbʋ ɖɩsɔɔlaa yɔ
Ɛzɩ lɩmaɣzɩyɛ nɖɩ ɖɩkpakɩɣ yɔ, ɖɩ-tɔm cɛyɩ Yehowa ɛsɩndaa? Ɛɛɛ ɖɩ-tɔm cɛyaa. Ɛsɔ fezuu ɖiyi Moyizi nɛ ɛyɔɔdɩ se: “Lɩzɩ wezuu.” (Kalɩtʋ 19) Ye mbʋ, ɛzɩma ɖɩlɩzɩɣ wezuu? Moyizi lɩzɩ pɩ-taa se: ‘Sɔɔlɩ Kɩbaɣlʋ ñɛ-Ɛsɔ nɛ ŋña ɛ-nɔɔ nɛ ŋñɔɔnɩ-ɩ.’ (Kalɩtʋ 20) Ye ɖɩsɔɔlɩ Yehowa yɔ, ɖɩkaɣ sɔɔlʋʋ se ɖiwelisini-i, ɖɩɖɔkɩ ɖe-siɣsiɣ wɛtʋ nɛ ɖɩñɔɔnɩ-ɩ kpam paa ɛbɛ ɛlakɩ yɔ. Ye ɖɩlakɩ mbʋ yɔ, pɩwɩlɩɣ se ɖɩlɩzɩ wezuu, pʋ-tɔbʋʋ se wezuu kɩbaŋʋ caɣʋ lɛɛlɛɛyɔ nɛ wezuu maatɛŋ ɛjaɖɛ kɩfaɖɛ taa.—2 Pɩyɛɛrɩ 3:11-13; 1 Yohanɛɛsɩ 5:3.
Fezuu taa ñɩm
it-2 453 § 3
Nɩŋgbaŋʋʋ
Yehowa tɩŋnɩ ɛ-sɛyaa yɔɔ nɛ ɛyɔɔdɩ se Izrayɛɛlɩ ñɩma mba pa-laŋa wɛ kpɩzɩŋ nɛ paañaŋ yɔ, ‘pa-nɩŋgbaaŋ ɖɩɣaa.’ (Yer 6:10; Tʋm 7:51) Pɩwɛ ɛzɩ nabʋyʋ wɛ pa-nɩŋgbaaŋ taa nɛ pɩɖɩkɩ-wɛ nʋmɔʋ se pataanɩɩ yɔ. Pɛkɛ nɩŋgbaaŋ weyi Yehowa tɩtʋlɩ yɔ mbʋ pʋyɔɔ yɔ, ɛnʋ haɣnɩ ɛyaa mba pañɩnɩɣ-ɩ yɔ nɩŋgbaaŋ se pewelisi, ɛlɛ eyeki se mba paañaŋɩ-ɩ yɔ, pe-fezuu taa nɩŋgbaaŋ ɩɖɩɣ. (Wp 29:4; Rom 11:8) Apostoloo Pɔɔlɩ kaayɔɔdaa se alɩwaatʋ natʋyʋ kaɣ kɔm nɛ tɩ-taa lɛ, mba pɔtɔŋ se pɛkɛ Krɩstʋ mba yɔ, pa-taa nabɛyɛ kaɣ kizuu tisuu. Pakaɣ kizuu toovenim tɔm welisuu nɛ pɔsɔɔlɩ se ‘pasaɣyɩ pa-nɩŋgbaaŋ taa’ nɛ peheyi-wɛ tɔm ndʋ pe-liu wɛɛ yɔ nɛ pewelisiɣni cɛtɩm tɔm. (2Ti 4:3, 4; 1Ti 4:1) Pɩtasɩ ɖɔɖɔ lɛ, nɔɔyʋ nɩŋgbaŋʋʋ taa pɩzɩɣ nɛ ‘pitili’ alɩwaatʋ ndʋ ɛnɩɣ sɔɔndʋ tɔm natʋyʋ kɔzɩ kɔzɩ ye pɩkɛ kʋñɔŋ tɔm natʋyʋ yɔ.—1Sam 3:11; 2Aw 21:12; Yer 19:3.
30 AOÛT–5 SEPTEMBRE
ÑƖM MBƲ PƖWƐ ƐSƆTƆM TAA YƆ | WAYƖ WAYƖ PAƔTƲ 31-32
“Hendu ndʋ fezuu kiɖeɖeu sɩnaa nɛ pama yɔ tɩ-taa kɩɖaŋ kpɛlɩkɩɣ-ɖʋ lɔŋ kɩbaŋ”
“Ha-m laŋɩyɛ kʋɖʋmɖɩyɛ nɛ maña ña-hɩɖɛ!”
8 Pɩɩkazɩ pazɩ se Izrayɛɛlɩ mba ɩsʋʋ Lidaʋ Tɛtʋ taa lɛ, Yehowa kpɛlɩkɩ Moyizi hendu natʋyʋ taa tɔm pee. (Wp. 31:19) Nɛ pɩɩwɛɛ se Moyizi ɛwɩlɩ hendu ndʋ samaɣ. (Kalɩ Wayɩ Wayɩ Paɣtʋ 32:2, 3.) Ye ɖɩmaɣzɩɣ kalɩtʋ 2 nɛ 3 yɔɔ yɔ, ɖɩnaɣ kpayɩ kpayɩ se Yehowa tɩsɔɔlɩ se pɛmɛsɩ ɛ-hɩɖɛ yaa pamaɣzɩ se ɖɩkɩlɩ kele kele nɛ pɩtɩpɔzɩ se payaa-ɖɩ. Ɛsɔɔlaa se paa anɩ ɛtɩlɩ ɛ-hɩɖɛ! Pɩɩkɛnɩ waɖɛ sɔsɔɖɛ samaɣ se kanɩɩ tɔm ndʋ Moyizi wɩlaɣ-kɛ Yehowa nɛ ɛ-hɩɖɛ sɔsɔɖɛ pɔ-yɔɔ yɔ! Tɔm ndʋ Moyizi wɩlɩ-kɛ yɔ, tɩkpazɩ ke-tisuu ɖoŋ nɛ tiseɣti-kɛ ɛzɩ tɛʋ yɔɔyʋʋ pazɩ pazɩ nɛ kɩsɩɣnɩ mbʋ pɩñɔʋnɩ tɛtɛɛ yɔ se pɩpaɣlɩ yɔ. Ɛzɩma ɖa-taa pɩzɩɣ nɛ pɩtɛ se ɖɔ-tɔm wɩlʋʋ wɛ mbʋ ɖɔɖɔ?
9 Alɩwaatʋ ndʋ ɖɩwɛɣ kpaɣ ɖɩɣa nɛ ŋwolo ɖɩɣa, yaa samaɣ taa tɔm susuu taa yɔ, ɖɩpɩzɩɣ nɛ ɖɩtɩŋnɩ ɖe-Bibl yɔɔ nɛ ɖɩwɩlɩ ɛyaa Ɛsɔ hɩɖɛ, Yehowa. Ðɩpɩzɩɣ nɛ ɖɩha-wɛ takayɩsɩ kɩbanzɩ, ɖɩwɩlɩ-wɛ videowaa kɩbama nɛ ɖɛ-tɛ intɛrnɛɛtɩ lone yɔɔ wondu ndʋ tɩɖʋʋ Yehowa hɩɖɛ yɔ. Paa ɖɩwɛ tʋmɩyɛ taa, sukuli taa yaa ɖɩwɛɛ nɛ ɖiwoki ɖoli yɔ, ɖɩpɩzɩɣ nɛ ɖɩñɩnɩ nʋmɔŋ weyi ɩ-yɔɔ pɩwɛɛ se ɖɩtɩŋna nɛ ɖɩyɔɔdɩ ɖɛ-Ɛsɔ kʋsɔɔlʋ nɛ mbʋ ɛkɛnaa yɔ pɩ-tɔm yɔ. Alɩwaatʋ ndʋ ɖiheyiɣ mba ɖɩkatɩɣ yɔ kaɖʋwa kɩbaŋa ŋga Yehowa wɛnɩ ɛyaa nɛ tɛtʋ yɔɔ yɔ kɔ-tɔm yɔ, ɖɩwɛɛ nɛ ɖɩhaɣ-wɛ waɖɛ se patɩlɩ Yehowa yɔɔ tɔm ndʋ pɩtɩla wiɖiyi patɩnɩta yɔ. Alɩwaatʋ ndʋ ɖɩwɛɣ nɛ ɖiheyiɣ lalaa ɖa-Caa kʋsɔɔlʋ yɔɔ toovenim tɔm yɔ, ɖɩwɛɛ nɛ ɖɩɖʋʋ nesi se Yehowa hɩɖɛ yɔɔ ɛñalɩ. Ðɩwɛɛ nɛ ɖɩsɩɣnɩ ɛyaa se pana se paawɩlɩ-wɛ cɛtɩm tɔm sakɩyɛ ɛ-yɔɔ. Tɔm ndʋ ɖɩtɩŋɩɣnɩ Bibl yɔɔ nɛ ɖɩwɩlɩɣ ɛyaa yɔ, ndʋ pɩzɩɣna nɛ tɩhɛzɩ pa-laŋa nɛ pɩkpaɖɩ.—Iza. 65:13, 14.
w09 1/5 14 § 4
Kɩɖaŋ weyi palabɩnɩ tʋmɩyɛ Bibl taa yɔ, ŋnɩɣ ɩ-taa?
Bibl kpaɣ ɖɔɖɔ Yehowa nɛ kɩmaɣzɩnɩ wondu ndʋ tiifeziɣ yɔ. Pɔyɔɔdɩ Ɛ-tɔm se ɛkɛ “Izrayɛɛlɩ tɛ Kaaʋ”, “Kaaʋ” nɛ “Tilimiye ɖoŋ ñɩnɖɛ.” (2 Samɩyɛɛlɩ 23:3; Keɣa 17:3; Wayɩ Wayɩ Paɣtʋ 32:4) Ɛbɛ yɔɔ pakpaɣ Yehowa nɛ pamaɣzɩnɩ wondu ndʋ? Kaaʋ sɔsɔʋ nakʋyʋ ɛwɛ ɖoli yɔ, kɩkaŋ camɩyɛ nɛ paapɩzɩɣ nɛ peciɣdi-kʋ; mbʋ ɖɔɖɔ ɖɛ-Ɛsɔ Yehowa kɛnɩ-ɖʋ pɛɛyɛ lone nɖɩ ɖiiciɣdiɣ yɔ.
w01 1/10 9 § 7
Maɣzɩnɩ Yehowa alɩwaatʋ ndʋ ŋfalɩsɩɣ ñe-piya yɔ
7 Maɣzɩ sɔɔlɩm mbʋ Yehowa wɩlɩ Izrayɛɛlɩ mba yɔ, pɩ-yɔɔ nɛ ŋna. Moyizi kpaɣ kɩɖaʋ kɩbaŋʋ nakʋyʋ nɛ ɛwɩlɩ ɛzɩma Yehowa sɔɔlɩ Izrayɛɛlɩ samaɣ yɔ. Ɛyɔɔdaa se: ‘Ɛzɩ kpeluu ɖaŋʋʋ kɩ-ɖandʋ yɔɔ nɛ kɩfɛtɩɣ ki-piya yɔɔ keŋ yɔ, mbʋ ɖɔɖɔ Kɩbaɣlʋ kpaɣ-ɩ e-keŋ yɔɔ. Kɩbaɣlʋ yeke koŋ kaakɛnɩ [Yakɔɔb] wiyaʋ.’ (Wayɩ Wayɩ Paɣtʋ 32:9, 11, 12) Pɩsa nɛ kpeluu kpɛlɩkɩ ki-piya ɛzɩma sɩkʋyɩ ɛsɔdaa yɔ lɛ, ‘kiciɣdiɣ ɖandʋ’, nɛ kɩwɛɛ ki-keŋ mabʋ yɔɔ se kiseɣti piya nɛ sɩkʋyɩ ɛsɔdaa. Ðoŋ ɖoŋ lɛ, ɖandʋ wɛɣ nabʋyʋ yɔɔ ɛsɔdaa. Pɩɣa nakɛyɛ ñɩtɩɣ nɛ kalɩɩ ɖandʋ taa lɛ, ɖoyo ɖɔɖɔ kʋyʋʋ ɛsɔdaa nɛ ɛwɛɛ nɛ ɛcɔŋnɩ-kɛ se ye kɔtɔlʋʋ lɛ, etii kɛ-tɛɛ kpaagbaa nɛ ɛkpaɣ-kɛ e-keŋ yɔɔ. Mbʋ ɖɔɖɔ Yehowa cɔŋnɩ Izrayɛɛlɩ samaɣ yɔɔ nɛ sɔɔlɩm. Ɛha-kɛ Moyizi Paɣtʋ. (Keɣa 77:5-7) Ɛsɔ cɔŋnaɣ ɛ-samaɣ yɔɔ camɩyɛ nɛ efeŋiɣ kɔ-yɔɔ se ɛsɩnɩ-kɛ kaɖɛ alɩwaatʋ taa.
Fezuu taa ñɩm
w04 15/9 27 § 12
Wayɩ Wayɩ Paɣtʋ takayaɣ taa lɩmaɣza sɔsɔna
31:12. Pɩwɛɛ se piya ɩcaɣ sɔsaa cɔlɔ, ɛgbɛyɛ taa kediɣzisi alɩwaatʋ taa. Sɩñaɣ pana nɛ siwelisi nɛ sɩkpɛlɩkɩ tɔm.