Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
© 2023 Watch Tower Bible and Tract Society of Pennsylvania
4-10 MARS
ÑƖM MBƲ PƖWƐ ƐSƆTƆM TAA YƆ | KEƔSI 16-17
«Yehowa, ñɛkɛnɩ kɩbandʋ ndʋ mehikiɣ yɔ ti-hiɖe»
Piya evelisi, ɩpɩzɩɣ nɛ ɩnɩɩ leleŋ mi-wezuu caɣʋ taa
WƐƐNƖ TAABALAA KƖBAMA
11 Kalɩ Keɣa 16:3. Daviid kaasɩm mbʋ pɩpɩzɩɣ nɛ pɩsɩnɩ-ɩ nɛ ehiɣ taabalaa kɩbama yɔ. Ɛkɛ mba pɔsɔɔlɩ Yehowa yɔ pa-taabalʋ, pʋyɔɔ pɩha-ɩ «taa leleŋ sɔsɔŋ.» Ɛyɔɔdaa se pɛkɛ «ɛyaa kiɖeɖema» nɛ pɩwɩlɩɣ se paawɛ kele kele pa-maɣzɩm nɛ pa-lakasɩ taa. Lɩmaɣza ana ɖeyi ɖeyi keɣa maɖʋ nɔɔyʋ ɖɔɖɔ kaawɛnɩ ɛ-taabalaa yɔɔ. Ɛmawa se: «Mɛnkɛ mba payɩ peseɣ-ŋ sɔɔndʋ nɛ mba pɔɖɔŋ ña-paɣtʋ yɔɔ yɔ pa-taabalʋ.» (Keɣ. 119:63) Ɛzɩ ɖɩnaʋ tɔm ñʋʋ ŋgʋ kɩɖɛwa yɔ kɩ-taa yɔ, ña ɖɔɖɔ ŋpɩzɩɣ nɛ ŋhiɣ taabalaa kɩbama mba peseɣ Yehowa sɔɔndʋ nɛ pañaŋɩ-ɩ yɔ pɛ-hɛkʋ taa. Nɛ ŋpɩzɩɣ nɛ ŋwɛɛnɩ taabalaa mba pa-pɩnzɩ wɛ ndɩ ndɩ yɔ.
w14 15/2 29 § 4
«Manaɣ Yehowa keɖeɣa»
Daviid te hendu se: «Yehowa kɛnɩ men-ɖeɖe, mbʋ patayaa nɛ pɛcɛlɩ-m yɔ nɛ mɔn-kɔpʋ. Ŋkandɩyɩɣ ma-ñɩm yɔɔ. Pamaɣzɩ lona kɩbana nɛ pɛcɛlɩ-m.» (Keɣ. 16:5, 6) Daviid taa kaawɛ leleŋ nɛ «[e]-ɖeɖe,» pʋ-tɔbʋʋ se taabalɩyɛ kɩbanɖɛ nɖɩ ɖɩwɛ ɛ nɛ Yehowa pɛ-hɛkʋ taa yɔ nɛ waɖɛ sɔsɔɖɛ nɖɩ ɛwɛna se ɛsɛɛ-ɩ yɔ. Ɛzɩ Daviid yɔ, pɩtɩla ɖɩkatɩɣ takɩm ndɩ ndɩ nɛ ɖɩlakɩ kʋñɔŋ pʋyɔɔ, ɛlɛ ɖihikiɣ ɖɔɖɔ fezuu taa wazasɩ sakɩyɛ! Ye mbʋ, ɖiwolo pɩ-yɔɔ nɛ ɖa-taa lakɩ leleŋ nɛ toovenim Ɛsɔ sɛtʋ ndʋ tɩ-taa ɖɩwɛɛ yɔ nɛ paa ɛzɩmtaa lɛ ɖɩnaɣ Yehowa fezuu taa templo nɛ «taa leleŋ.»
w08 15/2 3 § 2-3
Sɩɩ Yehowa ñɛ-ɛsɩndaa paa ɛzɩmtaa
2 Ða-tɩŋa payɩ ɖɩpɩzɩɣ nɛ ɖɩkpɛlɩkɩ lɔŋ Bibl taa ɛyaa mba ɖɩsɩm-wɛ camɩyɛ yɔ pɔ-cɔlɔ. Pa-taa nabɛyɛ lɛ Abraham, Saara, Moyizi, Ruti, Daviid, Ɛsɩtɛɛrɩ, apostoloo Pɔɔlɩ nɛ ɛyaa lalaa. Paa mbʋ yɔ, Bibl taa ɛyaa mba sakɩyɛ ɩɩsɩŋ pɔ-yɔɔ tɔm yɔ, pa-kɩɖaŋ pɩzɩɣ ɖɔɖɔ nɛ ɩwazɩ-ɖʋ. Ye ɖɩmaɣzɩɣ ɛyaa mba pɔyɔɔdɩ pɔ-tɔm Bibl taa yɔ pa-kɩɖaŋ yɔɔ yɔ, pɩsɩɣnɩ-ɖʋ nɛ ɖɩmaɣzɩnɩ keɣa maɖʋ weyi ɛyɔɔdaa se: «Mansɩɣ Yehowa mɛ-ɛsɩndaa paa ɛzɩmtaa. Pɩɩkaɣ-m ñamsʋʋ wiɖiyi kpa, mbʋ pʋyɔɔ yɔ ɛwɛ me-nesi kɩbanzɩ yɔɔ.» (Keɣ. 16:8) Ɛzɩma ɖɩpɩzɩɣ nɛ ɖɩnɩɩ tɔm ndʋ tɩ-taa?
3 Ðoŋ ɖoŋ lɛ, sɔɔja ɖɔkʋʋ laɣɖɛ nɛ e-nesi kɩbanzɩ nɛ ɛɖɔkʋʋ kpayʋʋ nɛ ɛ-nɩmɩyɛ nɛ pʋyɔɔ lɛ nabʋyʋ eehuuzuu e-nesi kɩbanzɩ hɔɔlʋʋ yɔɔ. Ɛlɛ ye ɛ-taabalʋ nɔɔyʋ ɛsɩŋ e-nesi kɩbanzɩ hɔɔlʋʋ yɔɔ nɛ ɛlakɩ you yɔ, ɛlɛ huuzuu hɔɔlʋʋ ŋgʋ kɩ-yɔɔ. Ye ɖɩmaɣzɩɣ Yehowa yɔɔ nɛ ɖɩlakɩ ɛ-sɔɔlɩm yɔ, ɛkandɩyɩɣ ɖɔ-yɔɔ. Ye mbʋ, iyele nɛ ɖɩna ɛzɩma Bibl taa kɩɖaŋ ndɩ ndɩ taa tazʋʋ pɩzɩɣ nɛ pɩcɛyɩsɩ ɖe-tisuu nɛ pɩsɩnɩ-ɖʋ nɛ ɖɩsɩɩ «Yehowa ɖɛ-ɛsɩndaa paa ɛzɩmtaa» yɔ.
Fezuu taa ñɩm
it-2 697
Ɛsɩyɛ piye
Ye palabɩnɩ tʋmɩyɛ Ebree tɔm pee ʼi·shohnʹ (Wp 32:10; Adu 7:2) nɛ ʽaʹyin (ɛsɩyɛ) ɖama cɔlɔ yɔ, piye piye lɛ pʋ-tɔbʋʋ lɛ se «ɛsɩyɛ abalʋ cikpelu;» mbʋ ɖɔɖɔ Kʋñɔwiye 2:18 taa, palabɩnɩ tʋmɩyɛ tɔm piye bath (pɛlɛ) se pɔyɔɔdɩ «ɛsɩyɛ pɛlɛ» tɔm nɛ tɔm loyisi nzɩ sɩ-naalɛ sɩ-tɔbʋʋ lɛ se ɛsɩyɛ piye. Palabɩnɩ tʋmɩyɛ tɔm loyisi nzɩ sɩ-naalɛ Keɣa 17:8 taa (ʼi·shohnʹ bath-ʽaʹyin); piye piye lɛ, pʋ-tɔbʋʋ lɛ se «abalʋ cikpelu, ɛsɩyɛ pɛlɛ » («ɛsɩyɛ piye,» nwt). Pɩwɩlɩɣ kpayɩ kpayɩ se pacaɣ pɔyɔɔdɩ ɛzɩma nɔɔyʋ pɩzɩɣ nɛ ɛna ɛ-kɩlɛmʋʋ kɩwɛ ññɩɩ lɛlʋ ɛsɩyɛ taa yɔ pɩ-tɔm.
Ye nabʋyʋ etukuni ɛsɩyɛ yɔ, ɖiɖiɣzina lɛɛ lɛɛ kpem; halɩ paa pɩkɛ ñɔyaɣ cikpelaɣ yaa mʋzʋʋ pazɩ ɛsʋnɩ ɛsɩyɛ huyuu nɛ ɛsɩyɛ piye pɛ-hɛkʋ taa yɔ. Ɛsɩyɛ hɔɔlʋʋ ŋgʋ pɩnaɣ (cornée) nɛ kuhuuzuu ɛsɩyɛ piye yɔɔ yɔ, pɩwɛɛ se pɔcɔnɩ ki-ɖeɖe nɛ pakandɩyɩ kɩ-yɔɔ camɩyɛ, mbʋ pʋyɔɔ yɔ ye kɩmʋ heŋ yaa kʋdɔŋ nakʋyʋ ɛkpa-kʋ yɔ, ɛsɩyɛ ɛɛtasɩɣ naʋ camɩyɛ yaa ɖɩpɩzɩɣ nɛ ɖɩyʋlʋmɩ. Bibl labɩnɩ tʋmɩyɛ tɔm loyaɣ «ñɛ-ɛsɩyɛ piye» se kɩwɩlɩ mbʋ pɩwɛɛ se pɔcɔnɩ pi-ɖeɖe nɛ pɩkɩlɩ yɔ. Mbʋ pɩwɛɛ se pɔcɔnɩ Ɛsɔ paɣtʋ ɖeɖe. (Adu 7:2) Wayɩ Wayɩ Paɣtʋ 32:10 yɔɔdɩ ɛzɩma Ɛsɔ cɔnɩ Izrayɛɛlɩ mba yɔɔ ɛzɩ caja yɔ pɩ-tɔm. Mayaɣ ŋga kɔtɔm se ɛkandɩyɩ ɛjaɖɛ nɖɩ ɖɩ-yɔɔ «ɛzɩ ɛ-ɛsɩyɛ piye yɔ.» Daviid tɩmaa se Ɛsɔ ɛcɔnɩ ɛ-yɔɔ nɛ ɛkandɩyɩ ɛ-yɔɔ ɛzɩ pakandɩyʋʋ «ɛsɩyɛ piye» yɔɔ yɔ. (Ke 17:8) Ɛɛsɔɔlaa se Yehowa ɛkʋyɩ kpaka nɛ ɛsɩnɩ-ɩ alɩwaatʋ ndʋ e-koyindinaa kʋyʋʋ ɛ-yɔɔ yɔ. (Kpaɣ-tʋ nɛ ŋmaɣzɩnɩ Zak 2:8; ɖenɖe palabɩnɩ tʋmɩyɛ Ebree tɔm pee ba·vathʹ ʽaʹyin, «ɛsɩyɛ piye» yɔ.)—Cɔnɩ ŒIL.
11-17 MARS
ÑƖM MBƲ PƖWƐ ƐSƆTƆM TAA YƆ | KEƔA 18
«Yehowa kɛnɩ . . . weyi eholuu-m yɔ»
w09 1/5 14 § 4-5
Yehowa taa leleŋ kɛnɩ ɖo-ɖoŋ
Bibl kpaɣ Yehowa ɖɔɖɔ nɛ kɩmaɣzɩnɩ wondu ndʋ tɩ-taa wezuu fɛyɩ yɔ. Kɩya-ɩ se «Izrayɛɛlɩ Kaaʋ,» «kaaʋ,» nɛ «tilimiye ɖoŋ ñɩnɖɛ.» (2 Samɩyɛɛlɩ 23:3; Keɣa 18:2; Wayɩ Wayɩ Paɣtʋ 32:4) Nɔɔ kʋɖʋmaɣ ŋga wɛ kɩɖaŋ ɛnɩ ɩ-taa? Paapɩzɩɣ nɛ pɛcɛŋɛsɩ kaaʋ yaa peciɣdi-kʋ, mbʋ ɖɔɖɔ Yehowa kɛnɩ-ɖʋ ɖɩjɔzɩyɛ ɖoŋ ñɩnɖɛ, nɛ nabʋyʋ ɛɛpɩzɩɣ nɛ pɩtalɩ-ɖʋ ɖɩ-taa.
5 Wondu ndʋ tɩ-taa fɛyɩ wezuu nɛ pakpaɣ Yehowa nɛ pamaɣzɩnɩ-tʋ yɔ, ɖɩnaɣ tɩ-kɩɖaŋ sakɩyɛ Keɣsi takayaɣ taa nɛ tɩsɩɣnɩ-ɖʋ se ɖɩtɩlɩ Yehowa wɛtʋ kɩbandʋ hɔɔlɩŋ ndɩ ndɩ. Kɩɖaʋ nakʋyʋ yɔ: Keɣa 84:11 yɔɔdaa se Yehowa kɛnɩ «ɖa-wɩsɩ nɛ ɖa-kpayʋʋ» mbʋ pʋyɔɔ yɔ ɛ-cɔlɔ ñalɩmɩyɛ, wezuu, ɖoŋ nɛ yɔɔ kandɩyʋʋ palɩɣna. Hɔɔlʋʋ lɛɛkʋ taa lɛ, Keɣa 121:5 yɔɔdaa se «Yehowa kɛnɩ kuzotuu ñe-nesi kɩbanzɩ yɔɔ.» Ðɩpɩzɩɣ nɛ ɖɩmɛlɩ kuzotuu taa se wɩsɩ ɛtaañaɣ-ɖʋ, mbʋ ɖɔɖɔ Yehowa yeki se mba pɛsɛɣ-ɩ yɔ pɛmɛlɩ ‘e-nesi’ yaa ‘e-keŋ’ tɛɛ se wɩsɩ nzɩ sɩsɩŋnɩ kʋñɔmɩŋ yɔ sɩtaañaɣ-wɛ.—Izaayii 51:16; Keɣsi 17:8; 36:7.
it-2 1168 § 6
Nɔɔ
Ɛsɔ nɩɣ ɛ-sɛyaa nɔɔ. Mba pɛsɛɣ Ɛsɔ fezuu taa nɛ toovenim taa yɔ, papɩzɩɣ nɛ payaa-ɩ nɛ pataa liu se ɛnɩɣ pɔ-nɔɔ paa kʋnʋŋ ŋgʋ pɔyɔɔdʋʋnɩ-ɩ yɔ. Pɩtasɩ lɛ, paa patɩmɩɣ pe-liu tɛɛ nɛ paayɔɔdʋʋ yɔ, Ɛsɔ weyi ɛsɩm ɛyaa laŋa camɩyɛ yɔ «ɛnɩɣ» nɛ ekemni-wɛ. (Ke 66:19; 86:6; 116:1; 1Sa 1:13; Neh 2:4) Ɛsɔ nɩɣ pɩɖɛmwaa mba payaɣ-ɩ se ɛsɩnɩ-wɛ yɔ pɔ-nɔsɩ. Mba pakaɖɩɣnɩ-ɩ nɛ pañɩnɩɣ se panazɩ ɛ-sɛyaa yɔ, ɛnɩɣ ɖɔɖɔ pɔ-nɔsɩ nɛ ɛsɩm pa-lɩmaɣza.—Kiɖ 21:17; Ke 55:18, 19; 69:33; 94:9-11; Yer 23:25.
Ɛzɩma ŋpɩzɩɣ nɛ ŋlʋbɩnɩ nɩɣzɛ?
2. Maɣzɩ ɛzɩma Yehowa sɩnɩ-ŋ nɛ pɩɖɛɛ yɔ pɩ-yɔɔ. Alɩwaatʋ ndʋ ŋmaɣzɩɣ mbʋ pɩtalɩ-ŋ ñe-wezuu caɣʋ taa nɛ pɩɖɛɛ yɔ pɩ-yɔɔ yɔ, ŋpɩzɩɣ nɛ ŋtɔzɩ kala wena Yehowa sɩnɩ-ŋ nɛ ŋpɩzɩ nɛ ŋɖɔkɩ ña-tɩ a-taa yɔ a-yɔɔ? Alɩwaatʋ ndʋ ɖɩmaɣzɩɣ ɛzɩma Yehowa sɩnɩ-ɖʋ nɛ ɛzɩma ɛsɩnɩ ɛ-sɛyaa nɛ pɩɖɛɛ yɔ pɩ-yɔɔ yɔ, piyeki nɛ ɖihiɣ ɖoŋ kpazʋʋ nɛ ɖɩtaa-ɩ liu nɛ pɩkɩlɩ. (Keɣ.18:17-19) Payaɣ ɛgbɛyɛ taa ɛzʋtʋyʋ nɔɔyʋ se Joshua. Ɛyɔɔdaa se: «Mama adɩma wena malaba nɛ Yehowa cosi a-yɔɔ yɔ nɛ mansɩɩ. Pɩsɩɣnɩ-m nɛ mɔntɔzʋʋ alɩwaatʋ ndʋ mɔnpɔzɩ Yehowa nabʋyʋ ɖeyi ɖeyi nɛ ɛha-m mbʋ pɩpɔzaɣ-m yɔ pɩ-yɔɔ.» Ɛɛɛ, alɩwaatʋ ndʋ ɖɩmaɣzɩɣ ɛzɩma Yehowa tɛm-ɖʋ sɩnʋʋ nɛ pɩɖɛɛ yɔ pɩ-yɔɔ yɔ, ɖihikiɣ ɖoŋ nɛ ɖɩlʋbɩnɩ nɩɣzɛ.
Fezuu taa ñɩm
it-1 437 § 2
Kerebim
Ɛyaa nabɛyɛ maɣzɩɣ se pɛ-wɛtʋ wɛ ɛzɩ sɩʋ kpelisi nzɩ sɩwɛnɩ keŋ nɛ sɩɩnaa layaa sɛɣaɣ-sɩ yɔ; ɛlɛ pɩtɩkɛ toovenim. Caanaʋ taa Yuuda mba sɔnzɩ wɩlaɣ se kerebimwaa mba pɛwɛnɩ ɛyʋ wɛtʋ (ɛlɛ Bibl tɩyɔɔdɩ natʋyʋ tɔm ndʋ tɩ-yɔɔ). Pasakaɣ kerebimwaa camɩyɛ, pawɩlaɣ Ɛsɔ tiyiyaa keɖeɣa, nɛ paalabɩ-wɛ nɛ pɛwɛɛ «ɖeyi ɖeyi» ɛzɩ Yehowa kaaheyuu Moyizi se ɛla yɔ. (Ejl 25:9) Apostoloo Pɔɔlɩ kɛdaa se «kerebimwaa mba paaɖewa yɔ paawɛ aɖakaɣ ñʋʋ yɔɔ nɛ pa-kɩlɛmʋʋ huuzuu ceɣu sulaɣ yɔɔ.» (Ebr 9:5) Kerebimwaa mba, palakɩ tʋmɩyɛ Yehowa ɛsɩndaa: «Mankaɣ-ŋ man-tɩ wɩlʋʋ peeɖe nɛ mɔyɔɔdɩnɩ-ŋ sulaɣ ñʋʋ yɔɔ. Kerebimwaa 2 mba pɛwɛ Aseɣɖe Lɩzʋʋ aɖakaɣ yɔɔ yɔ pɛ-hɛkʋ taa.» (Ejl 25:22; Kɩg 7:89) Pʋyɔɔ pɔtɔŋ se Yehowa caɣ «kerebimwaa ñʋʋ yɔɔ [yaa kerebimwaa hɛkʋ taa].» (1Sa 4:4; 2Sa 6:2; 2Aw 19:15; 1Kr 13:6; Ke 80:1; 99:1; Iza 37:16) Papɩzɩɣ nɛ pɔyɔɔdɩ se Kerebimwaa ‘sɩŋnɩ kɛɛkɛɛ’ ŋgʋ Yehowa saɣ yɔ (1Kr 28:18), nɛ pe-keŋ huuzuu kɩ-yɔɔ nɛ iyeki ɖɔɖɔ se kise lɛɛ lɛɛ. Pʋyɔɔ keɣa nakɛyɛ taa Daviid yɔɔdaɣ ɛzɩma Yehowa kɔm lɛɛ lɛɛ nɛ ɛsɩnɩ-ɩ yɔ pɩ-tɔm lɛ, ɛtɔm se «ɛɛcaɣ kerebim nɔɔyʋ yɔɔ nɛ ɛkɔɔ, ɛkʋyaɣ ɛsɔdaa» halɩ «fezuu nakʋyʋ keŋ yɔɔ.»—2Sa 22:11; Ke 18:10.
18-24 MARS
ÑƖM MBƲ PƖWƐ ƐSƆTƆM TAA YƆ | KEƔSI 19-21
«Ɛsɔdaa susuu Ɛsɔ samtʋ»
w04 1/1 8 § 1-2
Paa mbʋ lɛ pɩcɛlɩ samtʋ Yehowa
YESEE pɩyalʋ Daviid kaakɛ pɩɣa lɛ, eɖiyaɣ kpɩna Bɛtɩlɛhɛm cɔlɔ. Alɩwaatʋ ndʋ ɛcakaɣ e-ɖeke ɖoo taa nɛ efeŋiɣ ɛ-caa kpɩna yɔɔ yɔ, paa pɩɩla ɛzɩma yɔ ɛkpazaɣ ɛ-ɛsa ɖoŋ ɖoŋ ɛsɔdaa nɛ ɛcɔŋnɩ tɩɩnzɩ. Pɩtʋʋ fɛyɩ se alɩwaatʋ ndʋ fezuu kiɖeɖeu ɖiyi-i nɛ ɛma Keɣa 19 ñɩŋga nɛ etee-kɛ yɔ pɩtɔzɩ-ɩ alɩwaatʋ kɩbandʋ ndʋ tɩ-yɔɔ. Ɛmawa se: «Ɛsɔdaa susuu Ɛsɔ samtʋ nɛ kɩyɔɔdʋʋ e-nesi tɛɛ tʋmɩyɛ tɔm. Ɛlɛ panɩ kɩ-taŋ tɛtʋ kpeekpe yɔɔ, nɛ kɩ-tɔm talɩ tɛtʋ kamasɩ kpeekpe yɔɔ.»—Keɣa 19:1, 4.
2 Yehowa lɩzɩ ɛsɔdaa nɛ kɩwɛ piti kpem; kɩɩyɔɔdʋʋ, tɔm pee naayɛ ɩɩlɩɣ, paanɩɣ kɩ-nɔɔ, paa mbʋ yɔ kɩsaŋ Yehowa paa evemiye nɖɩ nɛ paa ɖoo wena. Paa ɛzɩmtaa lɛ wondu kɩlɩzɩtʋ saŋ Ɛsɔ, nɛ samtʋ ndʋ, mba payɩ pɛwɛ tɛtʋ yɔɔ yɔ panaɣ-tʋ «tɛtʋ kpeekpe yɔɔ.» Ɛlɛ aseɣɖe nɖɩ wondu kɩlɩzɩtʋ lɩzɩɣ yɔ ɖi-ɖeke ɖɩtɩmaɣ. Peseɣtiɣ ɛyaa siɣsiɣ tɩnaa se pɛkpɛndɩ pɔ-nɔsɩ wondu kɩlɩzɩtʋ ndʋ tɩ-yɔɔ nɛ pasa Yehowa nɛ nɔɔ kɩkʋyaɣ. Fezuu kiɖeɖeu ɖiyi keɣa maɖʋ nɔɔyʋ nɛ eheyi Ɛsɔ sɛyaa siɣsiɣ tɩnaa tɔm tʋnɛ: «Yehowa samtʋ nɛ e-ɖoŋ yɔɔ lɛ, ɩcɛlɩ-ɩ mbʋ pɩmʋnaa se pɛcɛlɩ-ɩ yɔ. Ɩcɛlɩ Yehowa samtʋ ndʋ tɩmʋnɩ ɛ-hɩɖɛ yɔ.» (Keɣa 96:7, 8) Ɛyaa mba taabalɩyɛ kɩbanɖɛ wɛ pa nɛ Yehowa pɛ-hɛkʋ taa yɔ pɔsɔɔlɩ kpem se pala mbʋ. Ɛlɛ ɛzɩma papɩzɩɣ nɛ pɛcɛlɩ Ɛsɔ samtʋ?
w04 1/6 11 § 8-10
Wondu kɩlɩzɩtʋ cɛlɩɣ samtʋ Ɛsɔ!
8 Pʋwayɩ lɛ, Daviid kɛdɩ wondu ndʋ Yehowa lɩzaa nɛ tɩwɛ piti yɔ tɩ-taa lɛɛkʋ tɔm. Ɛmawa se: «Esiɣ wɩsɩ kizinziku ɛsɔdaa; sɩwɛ ɛzɩ asɛyʋ walʋ weyi ɛlɩnɩ e-kuduyuu tɛɛ yɔ; sɩmɛyɩɣ ɛzɩ abalʋ ɖoŋ tʋ weyi eseɣ nʋmɔʋ taa yɔ. Sɩlɩɣnɩ ɛsɔdaa kamaɣ yɔɔ, nɛ sɩɖɛɣ nɛ sɩtalɩɣ kamaɣ lɛɛka yɔɔ; nɛ nabʋyʋ fɛyɩ se siisoŋuu-pʋ.»—Keɣa 19:4-6.
9 Ye pakpaɣ wɩsɩ nɛ pamaɣzɩnɩ tɩɩnzɩ yɔ wɩsɩ tɩtalɩ sɩ-taa nasɩyɩ paɣlʋʋ. Paa mbʋ yɔ, wɩsɩ kɩlɩ paɣlʋʋ lona wena awɛ tɛtʋ tɩyɛ nɛ acɔʋ wɩsɩ nɛ ataŋ yɔ. Takayaɣ nakɛyɛ yɔɔdaa se wɩsɩ yuŋ talɩ tɔɔnɩwaa miiliyaarɩwaa sakɩyɛ. Ðoŋ weyi wɩsɩ wɛna wondu lɛɛtʋ yɔɔ yɔ, piyeki se alɩwaatʋ ndʋ tɛtʋ kaacɔʋ wɩsɩ nɛ tɩtaŋ yɔ tiposuuni wɩsɩ nɛ kilomɛtawaa miiliyɔɔwaa 150 paa ɛzɩmtaa. Wɩsɩ ɖoŋ pazɩ yem talɩɣnɩ tɛtʋ yɔɔ, paa mbʋ yɔ piyeki se wezuu ɛwɛɛ tɛtʋ yɔɔ.
10 Keɣa maɖʋ kpaɣ wɩsɩ nɛ ɛmaɣzɩnɩ «abalʋ ɖoŋ tʋ» weyi evemiye taa lɛ eseɣ kpaɣnɩ ɛsɔdaa kamaɣ lɛɛka nɛ ewoki lɛɛka yɔɔ yɔ, nɛ ɖanaɣ lɛ ewoki nɛ ɛsʋʋ «kizinziku» nakʋyʋ tɛɛ yɔ. Ye ŋwɛ tɛtʋ yɔɔ yɔ, alɩwaatʋ ndʋ wɩsɩ kpeŋ kamaɣ lɛɛka yɔɔ yɔ, ŋnawa yɔ ŋtɔŋ se sɩsʋ «kizinziku» nakʋyʋ tɛɛ se sɩhɛzɩ. Tanaŋ tɛɛ lɛ, pɩwɛ ɛzɩ sɩlɩɣ tuda nɛ sɩñɩlɩsɩɣ «ɛzɩ asɛyʋ walʋ weyi ɛlɩnɩ e-kuduyuu tɛɛ yɔ.» Daviid kaakɛ ninɖiɣyu nɛ pʋyɔɔ lɛ ɛsɩm ɛzɩma nikaɣ lakɩ siŋŋ ɖoo taa yɔ. (Kiɖe Tɛɛ Tɔm 31:40) Ɛtɔzaɣ ɛzɩma wɩsɩ yekaɣ nɛ egeetiye nɖɩ ɖɩ-taa ɛwɛɛ yɔ ɖisoŋuu lɛɛ lɛɛ nɛ pisoŋuu ɛ-maɣmaɣ yɔ pɩ-yɔɔ. Pɩnaɣ kpayɩ kpayɩ se wɩsɩ «ɖɔŋ nʋmɔʋ» kpaɣnɩ wɩsɩ ɖɩlɩyɛ taa nɛ piwolo wɩsɩ ɖɩɖʋyɛ taa nɛ pɩɩnɩɣ-sɩ, ɛlɛ ɛzɩ «abalʋ ɖoŋ tʋ» yɔ sɩkʋyʋʋ nɛ sɩɖaɣnɩɣ paɣzʋʋ nʋmɔʋ ɖɔm.
g95 11/8 7 § 3
Anjaʋwaa lɩzɩyʋ weyi ɛ-yɔɔ pakɩlɩ sɔʋ yɔ
Ye ɖɩkpakɩɣ alɩwaatʋ nɛ ɖɩcɔŋnɩ mbʋ pɩwɛ kedeŋa yɔɔ yɔ pɩ-kajʋka yɔ, pɩsɩɣnɩ-ɖʋ nɛ ɖɩtɩlɩ ɖa-Lɩzɩyʋ nɛ pɩkɩlɩ; ɛnʋ labɩnɩ mbʋ payɩ pɩcɔ-ɖʋ nɛ pɩta yɔ. Kɩyakʋ nakʋyʋ Yesu heyi ɛ-tɔmkpɛlɩkɩyaa se pɔcɔnɩ camɩyɛ hɛtʋ ndʋ tɩwɛɛ nɛ tɩpaɣlɩɣ Galilee taa yɔ. Ɛyɔɔdaa se: «Ɩkpɛlɩkɩ lɔŋ hayɩm taa hɛtʋ cɔlɔ, ɩna ɛzɩma tɩpaɣlɩɣ yɔ; tɩɩlakɩ tʋmɩyɛ nɛ tɩɩlʋʋ pɩsaŋ ɖɔɖɔ; ɛlɛ meheyiɣ-mɩ se halɩ Salomɔɔ maɣmaɣ ɛ-samtʋ kpeekpe taa, ɛtɩcanɩ ɛ-tɩ ɛzɩ hɛtʋ ndʋ tɩ-taa kʋɖʋmʋʋ yɔ.» (Maatiyee 6:28, 29) Ñɩtʋ taa hɛɖʋʋ ŋgʋ kɩtɩlɩɩ pʋyʋ yɔ kɩ-kajʋka pɩzɩɣ nɛ kɩtɔzɩ-ɖʋ se Ɛsɔ maɣzɩɣ ɛyaa kɩcɛyɩm yɔɔ.
Fezuu taa ñɩm
it-1 1092
Ebree, II
Ebree kʋnʋŋ taa lɛ, tɔm loyisi nasɩyɩ wɛɛ lɛ ɛzɩma pamaɣ-sɩ yɔ sɩwɛnɩ hɔɔlɩŋ naalɛ; tɔm loyaɣ hɔɔlʋʋ naalɛ ñɩŋgʋ ɛɛyɔɔdʋʋ tɔm kʋɖʋmtʋ ndʋ tɩwɛ kajalaɣ hɔɔlʋʋ taa yɔ, nɛ kɩɩkaɖɩɣnɩ-kʋ ɖɔɖɔ. Ɛlɛ kɩsɔzʋʋ lɩmaɣzɩyɛ kɩfaɖɛ nɛ pɩsɩɣna se panɩɩ tɔm loyaɣ kajalaɣ hɔɔlʋʋ taa nɛ pɩkpaɖɩ. Ðɩnaɣ kɩɖaʋ nakʋyʋ Keɣa 19:7-9 taa.
Yehowa paɣtʋ talɩ pilim,
tɩkpazɩɣ ɖoŋ.
Tɔm ndʋ Yehowa tɔzʋʋ ɛ-samaɣ yɔ tɩmʋnaa se pataa-tʋ liu,
tɩpɩsɩɣ ɛyʋ weyi ɛfɛyɩnɩ lɔŋsɩnɖɛ yɔ lɔŋsɩnɖʋ.
Paɣtʋ ndʋ Yehowa ɖʋʋ yɔ tɩwɛ siɣsiɣ,
tɩlakɩ nɛ laŋɩyɛ nɩɣ leleŋ;
Yehowa paɣtʋ wɛ kele kele,
tɩlakɩ nɛ ɛsa ñɩlɩsɩɣ.
Yehowa sɔɔndʋ seu wɛ kele kele,
pɩwɛɣ tam.
Yehowa tɔm hʋʋ kɛ toovenim,
pɩtɩŋa pɩwɛ siɣsiɣ.
Ðɩnaɣ se paa tɔm loyaɣ ŋga lɛ, kɔ-hɔɔlʋʋ naalɛ ñɩŋgʋ yeki se kajalaɣ hɔɔlʋʋ taa lɩmaɣzɩyɛ taa ɛtʋ kpayɩ kpayɩ. Paa mayaɣ ŋga ka-taa lɛ tɔm loyaɣ wɛnɩ lɩmaɣza naalɛ. Tɔm loyaɣ hɔɔlʋʋ naalɛ ñɩŋgʋ sɩɣnɩ kalɩyʋ se ɛnɩɩ tɔm loyaɣ hɔɔlʋʋ kajalaɣ ñɩŋgʋ taa camɩyɛ. Kɩɖaŋ nɩɩyɩ yɔ: «Tɩkpazɩɣ ɖoŋ» sɩɣnɩ kalɩyʋ se ɛna mbʋ pʋyɔɔ «Yehowa paɣtʋ talɩ pilim» yɔ. «Tɩpɩsɩɣ ɛyʋ weyi ɛfɛyɩnɩ lɔŋsɩnɖɛ yɔ lɔŋsɩnɖʋ» sɩɣnɩ kalɩyʋ se ɛna mbʋ pʋyɔɔ «Tɔm ndʋ Yehowa tɔzʋʋ ɛ-samaɣ yɔ tɩmʋnaa se pataa-tʋ liu» yɔ. Ɛzɩma pɛsɛtɩ tɔm loyisi nzɩ sɩ-taa yɔ piyeki se si-welisuu ɛkɛdɩnɩ ɛyʋ. Piyeki se lɩmaɣza wena awɛ tɔm loyisi taa yɔ acɔlɩ camɩyɛ, nɛ pɩsɩɣna ɖɔɖɔ se ɛzɩma pamaɣ tɔm loyisi yɔ pɩmʋnɩ ɛzɩma pamaɣ koosi yɔ. Lɩmaɣzɩyɛ nɖɩ ɖɩ-yɔɔ pɔtɔŋ se tɔm loyisi nzɩ sɩɩyɔɔdʋʋ tɔm kʋɖʋmtʋ, paa mbʋ sɩɩkaɖɩɣnɩ ɖama, ɛlɛ sɩsɩɣnɩ ɖama.
25-31 MARS
ÑƖM MBƲ PƖWƐ ƐSƆTƆM TAA YƆ | KEƔA 22
Tɔm ndʋ paayɔɔdaa pɩlɩɩnɩ Yesu sɩm yɔɔ yɔ
w11 15/8 15 § 16
Pana Mesiya!
16 Pɩkaɣaɣ wɛʋ ɛzɩ Ɛsɔ lɔ Mesiya yɔ. (Kalɩ Keɣa 22:1.) Maarɩkɩ kɛdaa se: «Wɩsɩ wɛlʋʋ ñɩɣtʋ 3 yɔɔ lɛ, Yesu ma kubuka sɔsɔɔ nakɛyɛ nɛ ɛtɔ se: “Elii, Elii, lamaa sabakɩtanii?” pʋ-tɔbʋʋ se: “Mɛ-Ɛsɔ, mɛ-Ɛsɔ, ɛbɛ yɔɔ ŋlɔ-m?”» (Maarɩkɩ 15:34) Yesu wobi pɩ-yɔɔ nɛ ɛtaɣ liu ɛ-Caa weyi ɛwɛ ɛsɔdaa yɔ. Ɛsɔ yebi kandɩyʋʋ Yesu Krɩstʋ yɔɔ, eyebi-i e-koyindinaa nesi tɛɛ se pɩsa nɛ pɩtakɩ ɛ-cɩŋgɩlɩm wɛtʋ kiya. Ɛzɩma Yesu mabɩ kubuka sɔsɔɔ yɔ piyeba nɛ natʋ tɔm ndʋ tɩwɛ Keɣa 22:1 taa yɔ tɩla.
w11 15/8 15 § 13
Pana Mesiya!
13 Daviid kaayɔɔdɩ natʋ tɔm se pakaɣ hoŋuu Mesiya. (Kalɩ Keɣa 22:7, 8.) Alɩwaatʋ ndʋ Yesu kaawɛ nɛ ɛnɩɣ siziŋ nazɩm sizika yɔɔ yɔ ɛyaa kaahoŋi-i. Maatiyee kɛdaa se: «Nɛ mba pɛɖɛɣaɣ yɔ, patʋʋ-ɩ nɛ pekpiɣyiɣ ñʋŋ nɛ pɔtɔŋ se: “Ña weyi ŋŋtɔm se ŋyɔkʋʋ templo nɛ ŋkpaɣ kɩyakɩŋ 3 nɛ ŋmanɩ-kʋ yɔ, ya ña-maɣmaɣ ña-ñʋʋ lɛ! Ye ŋkɛ Ɛsɔ pɩyalʋ yɔ, tii nazɩm sizika yɔɔ!”» Mbʋ ɖɔɖɔ cɔjɔnaa sɔsaa, takayɩsɩ mayaa, nɛ ɛzʋtʋyaa papaɣzɩ-ɩ woŋuu nɛ pɔtɔŋ se: «Ɛyabɩ lalaa ñʋʋ; ɛɛpɩzɩɣ se ɛya ɛ-maɣmaɣ ɛ-ñʋʋ! Ɛkɛ Izrayɛɛlɩ Wiyaʋ; lɛɛlɛɛyɔ lɛ, etii nazɩm sizika yɔɔ, ɖɩnɛ ɛlɛ ɖɩkaɣ ɛ-yɔɔ tisuu. Ɛta Ɛsɔ liu; ye ɛlɛ ɛsɔɔlɩ-ɩ yɔ, ɛya ɛ-ñʋʋ lɛ; mbʋ pʋyɔɔ yɔ ɛtɔm se: “Mɛnkɛ Ɛsɔ Pɩyalʋ.”» (Mat. 27:39-43) Paa mbʋ yɔ, Yesu ɖɔkɩ ɛ-tɩ pɩtɩŋa payɩ mbʋ yɔ pɩ-taa nɛ ñamtʋ. Ɛkɛ-ɖʋ kɩɖaʋ kɩbaŋʋ kpem!
w11 15/8 15 § 14
Pana Mesiya!
14 Pakaɣ tɔʋ piye Mesiya tokonaa yɔɔ. Keɣa maɖʋ kaamawa se: «Patayɩ ɖama mo-wondu kususutu, nɛ pɔtɔ piye mon-tokonaa yɔɔ.» (Keɣ. 22:18) Mbʋ pɩlaba ɖɔɖɔ, mbʋ pʋyɔɔ yɔ «[Roma sɔɔjanaa kam Yesu] sizika yɔɔ lɛ, pɔtɔ piye nɛ patayɩ ɖama e-tokonaa kɩtɩnaa.»—Mat. 27:35; kalɩ Yohanɛɛsɩ 19:23, 24.
Fezuu taa ñɩm
w06 1/11 29 § 7
Ðɩwɛɛnɩ ñamtʋ ɖɛ-Ɛsɔ sɛtʋ kediɣzisi yɔɔ
7 Ðɩpɩzɩɣ nɛ ɖɩtɩŋnɩ nʋmɔŋ sakɩyɛ yɔɔ nɛ ɖɩwɩlɩ se ɖɩwɛnɩ ñamtʋ ɖe-kediɣzisi yɔɔ. Pɩ-taa nabʋyʋ lɛ se ɖɩwɛɛ alɩwaatʋ ndʋ paateɣ Kewiyaɣ hendu yɔ. Hendu ndʋ tɩ-taa sakɩyɛ kɛ adɩma nɛ pʋyɔɔ lɛ pɩwɛɛ se petee-tʋ nɛ ñamtʋ. Apostoloo Pɔɔlɩ labɩnɩ tʋmɩyɛ Keɣa 22 taa tɔm nɛ ɛyɔɔdɩ Yesu tɔm se: «Mankaɣ susuu mon-koobiya ña-hɩɖɛ; mankaɣ-ŋ teu samtʋ hendu samaɣ hɛkʋ taa». (Ebree mba 2:12) Pʋyɔɔ lɛ, pɩwɛɛ se ɖɩñɩnɩ ɖɩjaɣyɛ nɛ ɖɩcaɣ pʋcɔ nɛ kediɣzaɣ yɔɔ cɔnɩyʋ yɔɔdɩ se ɖɩkʋyɩ nɛ ɖitee hendu; nɛ paateɣ hendu lɛ, ɖɩka ɖa-lɩmaɣza hendu taa tɔm pee tɔbʋʋ nɩʋ yɔɔ. Tɛtɛ nɛ ɖe-hendu teu wɩlɩ se ɖɩwɛnɩ lɩmaɣza wena Keɣa maɖʋ wɛna yɔ. Ɛmawa se: «Mankaɣ sam Yehowa nɛ ma-laŋɩyɛ kpeekpe ɛyaa siɣsiɣ tɩnaa mba pekpeɣlaa yɔ pɛ-hɛkʋ taa nɛ samaɣ taa.» (Keɣa 111:1) Lɩmaɣzɩyɛ kɩbanɖɛ nɖɩ ɖɩ-yɔɔ pɩwɛɛ se ɖɩtalɩ ɖe-kediɣzisi taa lɔŋ nɛ ɖɩcaɣ sɩ-taa nɛ sɩtɛ yɔ lɛ se pɩhaɣ-ɖʋ waɖɛ se ɖitee samtʋ hendu Yehowa.
w03 1/9 20 § 1
Sa Yehowa «samaɣ hɛkʋ taa»
Ɛzɩ pɩɩwɛʋ caanaʋ taa yɔ, sɔnɔ ɖɔɖɔ palabɩ ɖʋtʋ se pɩsa nɛ paa Ɛsɔ sɛyʋ weyi lɛ ɛpɩzɩ nɛ ɛlɩzɩ e-tisuu nɛ ɛwɩlɩ «samaɣ hɛkʋ taa.» Ða-taa paa weyi wɛnɩ waɖɛ se ecosi tɔm ndʋ pɔpɔzʋʋ samaɣ kediɣzisi taa yɔ tɩ-yɔɔ. Ðitaani ɖoŋ kɩbaŋ weyi tɔm cosuu pɩzɩɣ nɛ pɩwɛɛnɩ ɖɔ-yɔɔ yɔ kpa. Kɩɖaʋ nakʋyʋ yɔ: Ye nɔɔyʋ ecosaa nɛ ɛwɩlɩ ɛzɩma ɖɩlʋbɩnɩ kaɖɛ naɖɩyɛ yaa ɖɩtaatɔlɩ ɖɩ-taa yɔ pɩkpazɩɣ koobiya ɖoŋ nɛ pɛtɛ pa-taa se palakɩnɩ tʋmɩyɛ Bibl paɣtʋ kila. Ye nɔɔyʋ ɛlabɩnɩ tʋmɩyɛ Bibl masɩ nzɩ sɩwɛ tayʋʋ taa ɛlɛ patɩma sɩ-taa tɔm tayʋʋ taa ɛ-tɔm cosuu taa yɔ, yaa ye ɛlabɩnɩ tʋmɩyɛ tɔm ndʋ tɩ-yɔɔ ɛlɩwa alɩwaatʋ ndʋ ɛñɔɔzaɣ kediɣzaɣ yɔ, piseɣtiɣ lalaa se pɛwɛɛnɩ kpɛlɩkʋʋ wɛtʋ kɩbandʋ nɛ pɩkɩlɩ.
1er-7 AVRIL
ÑƖM MBƲ PƖWƐ ƐSƆTƆM TAA YƆ | KEƔSI 23-25
«Yehowa kɛnɩ me-Ninɖiɣyu»
w11 1/5 31 § 3
«Yehowa kɛnɩ me-Ninɖiɣyu»
Yehowa ɖiyiɣ e-heŋ. Ninɖiɣyu ɛfɛyɩ yɔ e-heŋ pɩzɩɣ nɛ ile. Mbʋ ɖɔɖɔ ɖe-wezuu caɣʋ taa, pɩpɔzʋʋ se pasɩnɩ-ɖʋ nɛ ɖɩna nʋmɔʋ kɩbaŋʋ ŋgʋ kɩ-taa pɩwɛɛ se ɖɩɖɔ yɔ. (Yereemii 10:23) Daviid lɩzɩ pɩ-taa se Yehowa ɖiyiɣ ɛ-samaɣ nɛ ewokini «kpɩna ñɩtʋ ɖɩdɔɔyɛ taa» nɛ «ɖɩhɛzɩyɛ taa ɖenɖe lɩm tɔyaa yɔ.» Eɖiyiɣ-kɛ «siɣsiɣ wɛtʋ nʋmɔŋ taa.» (Kalɩtʋ 2, 3) Tɔm ndʋ, tiyeki se ɖa-taa ɛtɛ se ɖɩpɩzɩɣ nɛ ɖɩtaa Yehowa liu. Ye ɖɩɖɔŋ tɔm ndʋ Yehowa tɩŋnɩ fezuu kiɖeɖeu yɔɔ nɛ pama Bibl taa yɔ tɩ-yɔɔ yɔ, ɖe-liu kaɣ sɩbɩnʋʋ mbʋ ɖɩwɛna yɔ, ɖɩwɛɣ taa leleŋ taa nɛ pɛɛyɛ taa.
w11 1/5 31 § 4
«Yehowa kɛnɩ me-Ninɖiɣyu»
Yehowa kandɩyɩɣ e-heŋ yɔɔ. Ninɖiɣyu ɛfɛyɩ yɔ, sɔɔndʋ kpaɣ e-heŋ; mbʋ pʋyɔɔ yɔ nɔɔyʋ fɛyɩ se ɛsɩnɩ-ɩ. Yehowa heyiɣ ɛ-samaɣ taa mba se pɩtɩpɔzɩ se sɔɔndʋ ɛkpa-wɛ, halɩ pɩkpɛndɩnɩ alɩwaatʋ ndʋ pɔɖɔŋ «cɩkpɛndʋʋ sɔsɔʋ fɛɛʋ taa yɔ,» pʋ-tɔbʋʋ se alɩwaatʋ ndʋ pɩlakɩ-wɛ ɛzɩ patɩtasɩ wɛnʋʋ lidaʋ yɔ. (Kalɩtʋ 4) Yehowa feŋiɣ pɔ-yɔɔ, ɛsɔɔlɩ kpem se ɛsɩnɩ-wɛ. Ɛpɩzɩɣ nɛ ɛha ɛ-sɛyaa lɔŋsɩnɖɛ nɛ ɖoŋ weyi pɩpɔzʋʋ-wɛ se pɩsa nɛ palʋbɩnɩ kala yɔ.—Filiipi mba 4:13; Yakubu 1:2-5.
w11 1/5 31 § 5
«Yehowa kɛnɩ me-Ninɖiɣyu»
Yehowa calɩɣ e-heŋ. Heŋ cɔŋnɩ weyi eɖiyiɣ-i yɔ ɛ-ɛsɩndaa se ɛñɩnɩ-ɩ tɔɔnaɣ. Ða ɖɔɖɔ pɩpɔzʋʋ-ɖʋ fezuu taa wondu nɛ Ɛsɔ ɖeke pɩzɩɣna nɛ ɛsɩnɩ-ɖʋ nɛ ɖɩwɛɛnɩ-tʋ. (Maatiyee 5:3) Nɛ ɖɩwɛnɩ ɛsɩmɩyɛ se Yehowa kɛ kʋjɔʋ laɖʋ, nɛ ɛñɔɔzʋʋ ɛ-lɩmɖʋyaa tɔɔnasɩ sakɩyɛ nɛ ɛsɩɣ-wɛ taabɩlɩ yɔɔ. (Kalɩtʋ 5) Bibl nɛ Bibl kpɛlɩkʋʋ takayɩsɩ kɛ fezuu taa tɔɔnaɣ ŋga ɛhaɣ-ɖʋ yɔ, nɛ kasɩɣnɩ-ɖʋ se ɖɩtɩlɩ mbʋ pʋyɔɔ ɖɩwɛ wezuu yɔ nɛ kasɩɣnɩ-ɖʋ ɖɔɖɔ se ɖɩtɩlɩ kaɖʋwa ŋga Ɛsɔ wɛnɩ ɖɔ-yɔɔ yɔ.
Fezuu taa ñɩm
w11 15/2 24 § 1-3
Sɔɔlɩ siɣsiɣ wɛtʋ nɛ ña-laŋɩyɛ pilim
YEHOWA tɩŋɩɣnɩ ɛ-Tɔm Bibl nɛ e-fezuu kiɖeɖeu yɔɔ nɛ eɖiyiɣ ɛ-samaɣ «siɣsiɣ wɛtʋ nʋmɔŋ taa.» (Keɣ. 23:3) Ɛlɛ ɖɩtɩtalɩ pilim nɛ pʋyɔɔ lɛ, ɖɩpɩzɩɣ nɛ ɖɩlɩɩ nʋmɔʋ ŋgʋ kɩ-taa. Ye pɩlabɩ mbʋ yɔ, pɩpɔzʋʋ se ɛyʋ ɛñaɣ pana siŋŋ pʋcɔ nɛ ɛɖaɣnɩ paɣzʋʋ labʋ mbʋ pɩwɛ siɣsiɣ yɔ. Ɛbɛ kaɣ-ɖʋ sɩnʋʋ nɛ ɖɩla mbʋ? Ɛzɩ Yesu yɔ, pɩwɛɛ se ɖɩsɔɔlɩ labʋ mbʋ pɩwɛ siɣsiɣ yɔ.—Kalɩ Keɣa 45:7.
2 Ɛbɛ ɖɩpɩzɩɣ nɛ ɖɩkpaɣ «siɣsiɣ wɛtʋ nʋmɔŋ» nɛ ɖɩmaɣzɩna? Papɩzɩɣ nɛ pakpaɣ-ɩ nɛ pamaɣzɩnɩ nʋmɔŋ weyi ɩwɛ kpɩyɩsɔɔ yɔ; nɛ paɣtʋ ndʋ Yehowa ɖʋ siɣsiɣ wɛtʋ nʋmɔʋ taa yɔ ndʋ kɛnɩ «nʋmɔŋ» ɛnɩ ɩ-kamasɩ. Ebree nɛ Grɛɛkɩ kʋnʋmɩŋ taa lɛ, «siɣsiɣ wɛtʋ» sɩŋnɩ mbʋ «pɩtʋʋzaa» yɔ, nɛ pɩwɩlɩɣ se ɛyʋ ɛñɔɔnɩ paɣtʋ ndʋ titukuuni wezuu kɩbaŋʋ caɣʋ yɔ. Yehowa kɛnɩ «siɣsiɣ wɛtʋ ɖɩjaɣyɛ,» pʋyɔɔ lɛ ɛ-sɛyaa taa wɛ leleŋ se peyele nɛ ɛwɩlɩ-wɛ wezuu kɩbaŋʋ caɣʋ «siɣsiɣ wɛtʋ nʋmɔŋ» nɛ patɩŋ ɩ-taa.—Yer. 50:7.
3 Ye ɖɩñakɩ pana nɛ ɖa-laŋɩyɛ pilim se ɖiyele nɛ ɖe-wezuu caɣʋ la nɔɔ kʋɖʋmaɣ nɛ Yehowa paɣtʋ siɣsiɣ ñɩndʋ yɔ, pɩkaɣ yebu nɛ ɖɔ-tɔm kɛdɩnɩ-ɩ. (Wp. 32:4) Pɩsa nɛ ɖɩla mbʋ lɛ, pɩwɛɛ se ɖɩkpɛlɩkɩ Bibl nɛ ɖɩtɩlɩ Yehowa tɔm. Ðiwoki pɩ-yɔɔ nɛ ɖɩkpɛlɩkɩɣ ɛ-tɔm nɛ pɩkɩlɩɣ nɛ ɖɩñɔtʋʋnɩ-ɩ paa evemiye nɖɩ nɛ pɩkɩlɩɣ lɛ, ɖɩkaɣ sɔɔlʋʋ e-siɣsiɣ wɛtʋ nɛ pɩkɩlɩ. (Yak. 4:8) Pɩtasɩ lɛ, pɩwɛɛ se ɖitisi nɛ ɖɩɖɔ lɔŋ weyi Ɛsɔ tasɩɣ-ɖʋ Bibl taa yɔ ɩ-yɔɔ alɩwaatʋ ndʋ pɩpɔzʋʋ se ɖɩkpaɣ lɩmaɣza kɩcɛyɩyɛ ɖe-wezuu caɣʋ taa yɔ.
8-14 AVRIL
ÑƖM MBƲ PƖWƐ ƐSƆTƆM TAA YƆ | KEƔSI 26-28
Ɛzɩma Daviid kpazɩ ɛ-cɩŋgɩlɩm wɛtʋ ɖoŋ yɔ
w04 1/12 14 § 8-9
Ðɔ cɩŋgɩlɩm wɛtʋ nʋmɔʋ taa
8 Daviid tɩmaa se: «Oo Yehowa, wili-m nɛ ŋtakɩ-m; la nɛ ma-lɩmaɣza cukaŋ ñɩna [yaa man-kataŋgayɩsɩ] nɛ ma-laŋɩyɛ wɛɛ kele kele.» (Keɣa 26:2) Kataŋgayɩsɩ wɛ ɖooo ɛyʋ taa. Kataŋgayɩsɩ sɩŋnɩ ɛyʋ lɩmaɣza cukaŋ ñɩna nɛ ɛzɩma pɩlakɩ-ɩ yɔ. Piyele nɛ laŋɩyɛ ñasɩŋnɩ mbʋ ɛyʋ kɛnɩ ɖooo ɛ-taa yɔ, pʋ-tɔbʋʋ se mbʋ pituyuu-i nɛ ɛlakɩ nabʋyʋ, ɛzɩma pɩlakɩ-ɩ yɔ, nɛ ɛ-maɣzɩm. Ye mbʋ, alɩwaatʋ ndʋ Daviid tɩmnɩ Yehowa nɛ ɛpɔzɩ-ɩ se ewili-i yɔ, ɛɛwɛɛ nɛ ɛpɔzʋʋ-ɩ se ɛñɩnɩ nɛ ɛtazɩ ɛ-lɩmaɣza cukaŋ ñɩna nɛ ɛzɩma pɩlakɩ-ɩ yɔ pɩ-taa.
9 Daviid tendi Yehowa se eyele nɛ ɛ-kataŋgayɩsɩ nɛ ɛ-laŋɩyɛ pɛwɛɛ kele kele. Ɛzɩma Yehowa yeki se ɛyʋ weyi ɖɩkɛnɩ ɖooo ɖa-taa yɔ ɛwɛɛ kele kele? Daviid te hendu se: «Mankaɣ sam Yehowa, ɛnʋ weyi ɛtasɩ-m lɔŋ yɔ. Ma-lɩmaɣza cukaŋ ñɩna [yaa man-kataŋgayɩsɩ] sɩɣzɩɣ-m lɔŋ nɛ pɩkpɛndɩnɩ ɖoo taa.» (Keɣa 16:7) Pʋ-tɔbʋʋ lɛ suwe? Pʋ-tɔbʋʋ lɛ se Ɛsɔ lɔŋ tasʋʋ talaɣ ɛyʋ weyi Daviid kɛnɩ ɖooo ɛ-taa yɔ nɛ ɩcakɩ peeɖe nɛ ɩñɔɔzʋʋ ɛ-lɩmaɣza cukaŋ ñɩna nɛ ɛzɩma pɩlakɩ-ɩ yɔ. Pɩpɩzɩɣ ɖɔɖɔ nɛ pɩla mbʋ ɖɔ-hɔɔlʋʋ taa ye ɖɩlakɩnɩ tʋmɩyɛ lɔŋ tasʋʋ mbʋ Ɛsɔ tɩŋɩɣnɩ ɛ-Tɔm, e-lone taa caɣyaa, nɛ ɛ-ɛgbɛyɛ yɔɔ nɛ ɛtasɩɣ-ɖʋ yɔ, nɛ ye ɖiyeki se lɔŋ tasʋʋ mbʋ pɩcaɣ ɖooo ɖa-taa yɔ. Ye ɖɩtɩmɩɣnɩ Yehowa se eyele nɛ ɖɩwɛɛ kele kele yɔ, pɩkaɣ-ɖʋ sɩnʋʋ nɛ ɖɩɖɔkɩ ɖa-cɩŋgɩlɩm wɛtʋ.
w04 1/12 15 § 12-13
Ðɔ cɩŋgɩlɩm wɛtʋ nʋmɔʋ taa
12 Daviid yɔɔdaɣ mbʋ pɩɩsɩnɩ-ɩ ɖɔɖɔ nɛ ɛkpazɩ ɖoŋ ɛ-cɩŋgɩlɩm wɛtʋ yɔ pɩ-tɔm lɛ ɛyɔɔdaa se: «Maaɖʋʋ taabalɩyɛ nɛ cɛtɩyaa, nɛ menseɣ mba pɛmɛsɩɣ mbʋ pɛkɛnaa yɔ. Manpaɖɩɣ ɛyaa kɩdɛkɛdaa ɛgbaɣdɩyɛ, nɛ menkizaa se maaɖʋʋ taabalɩyɛ nɛ kañatʋ tɩnaa.» (Keɣa 26:4, 5) Tobi lɛ, Daviid kizaa se ɛɛcakɩ kañatʋ tɩnaa cɔlɔ. Ɛtaasɔɔlɩ se ɛɖʋ taabalɩyɛ kɩdɛkɛdɩyɛ.
13 Piyele nɛ ɖa yɔ? Ðikiziɣ taabalɩyɛ ɖʋʋ nɛ ɛyaa cɛtɩyaa mba pɛwɛ teeleewaa, videowaa, fotonaa, intɛrnɛɛtɩ lona, yaa hɔɔlɩŋ lɛɛŋ taa yɔ? Ðiseɣ mba pɛmɛsɩɣ mbʋ pɛkɛnaa yɔ? Lɩmaɣza kɩdɛkɛdaa naayɛ yɔɔ lɛ, ɖo-sukuli taa yaa ɖa-tʋmɩyɛ taa mba nabɛyɛ pɩzɩɣ nɛ paɖʋ-ɖʋ nɛ taabalɩyɛ. Toovenim taa lɛ, pɩkɛdɩɣnɩ-ɖʋ se ɖiyele nɛ taabalɩyɛ cɛyɩsɩ ɖa nɛ mba paaɖɔŋ Ɛsɔ toovenim taa yɔ ɖɛ-hɛkʋ taa? Tisuu yebiyaa pɩzɩɣ nɛ pawɩlɩ pa-lakasɩ taa se pɛkɛ ɛyaa kɩbama, ɛlɛ toovenim taa lɛ pa-kaɖʋwa lɛ se poposini-ɖʋ nɛ Yehowa sɛtʋ. Nɛ ye nabɛyɛ ɩcakɩ pɩ-tɛɛ nɛ pɩ-yɔɔ wezuu ɛgbɛyɛ taa? Paba ɖɔɖɔ pɛmɛsɩɣ mbʋ pɛkɛ toovenim taa. Jayson kɛ ɛgbɛyɛ taa tʋmlaɖʋ lɛɛlɛɛyɔ; alɩwaatʋ ndʋ ɛɛkɛ evebu yɔ ɛɛwɛnɩ taabalaa nabɛyɛ mbʋ. Ɛyɔɔdaa se: «Kɩyakʋ nakʋyʋ pa-taa nɔɔyʋ heyi-m se: “Mbʋ ɖɩlakɩ lɛɛlɛɛyɔ yɔ pɩ-tɔm tɩcɛyɩ, mbʋ pʋyɔɔ yɔ alɩwaatʋ ndʋ ɛjaɖɛ kɩfaɖɛ kɔŋ yɔ ɖɩtɛm sɩbʋ.” Ðɩɩkaɣ naʋ se ɖilesi pʋyʋ nɔɔyʋ. Tɔm ndʋ tiifezini-m. Mantɩsɔɔlɩ se mansɩ alɩwaatʋ ndʋ ɛjaɖɛ kɩfaɖɛ kɔŋ yɔ.» Jayson kpaɣ lɩmaɣzɩyɛ nɛ lɔŋsɩnɖɛ nɛ eyele taabalɩyɛ ɖʋʋ nɛ ɛyaa mba. Pɔɔlɩ tasɩ lɔŋ se: «Itaayele nɛ pepeɣzi-mɩ. Taabalɩyɛ kɩdɛkɛdɩyɛ wɛɛkɩɣ wɛtʋ kɩbandʋ.» (1 Kɔrɛntɩ mba 15:33) Pɩcɛyɩ kpem se ɖise taabalɩyɛ kɩdɛkɛdɩyɛ ɖʋʋ!
w04 1/12 16 § 17-18
Ðɔ cɩŋgɩlɩm wɛtʋ nʋmɔʋ taa
17 Ɛsɔ sɛtʋ kɩɖanɖʋʋ kaakɛnɩ lone nɖɩ ɖɩ-taa pɛsɛɣaɣ Yehowa Izrayɛɛlɩ taa yɔ, nɛ altaaru kaawɛ peeɖe nɛ palaɣ kɩlaŋ kɩ-yɔɔ. Daviid yɔɔdaɣ ɛzɩma ɛ-taa wɛ leleŋ nɛ lone nɖɩ yɔ lɛ, ɛtɩmaa se: «Yehowa, mɔnsɔɔlɩ ɖɩɣa ŋga ka-taa ŋwɛɛ yɔ, lone nɖɩ ɖɩ-taa ña-samtʋ wɛɛ yɔ.»—Keɣa 26:8.
18 Ðɩsɔɔlɩ wobu ɖenɖe ɖikpeɣliɣ se ɖɩkpɛlɩkɩ Yehowa tɔm yɔ? Paa egeetiye nɖɩ ɖɩ-taa lɛ Kewiyaɣ kpaaŋ kɛnɩ lone nɖɩ ɖɩ-taa ɖɩsɛɣ Yehowa yɔ. Nɛ paa ɛzɩmtaa lɛ pɔñɔɔzʋʋ fezuu taa ɖʋtʋ ndʋ tɩsɩɣnɩ-ɖʋ se ɖɩlakɩ mbʋ yɔ. Pɩtasɩ lɛ, ɖɩlakɩ pɩnaɣ taa kigbeɣliŋ sɔsɔŋ, egeetiye kigbeɣliŋ, nɛ ŋgee kigbeɣliŋ. Kediɣzisi nzɩ sɩ-taa ɖɩtazɩɣ Yehowa ‘tɔm kɩtɔzɩtʋ’ taa. Ye ‘ɖɩsɔɔlɩ-tʋ kpem’ yɔ, pɩkaɣ-ɖʋ selituu se ɖiwolo kediɣzisi; nɛ alɩwaatʋ ndʋ ɖɩwɛɣ sɩ-taa yɔ, ɖɩkaɣ welisuu camɩyɛ. (Keɣa 119:167) Pɩhɛzɩɣ ɖa-laŋɩyɛ kpem se ɖa nɛ Ɛsɔ sɛyaa lalaa mba pamaɣzɩɣ ɖɔ-yɔɔ yɔ ɖɩwɛɛ; pasɩɣnɩ-ɖʋ se ɖiwolo pɩ-yɔɔ nɛ ɖɩwɛɛ cɩŋgɩlɩm wɛtʋ nʋmɔʋ taa!—Ebree mba 10:24, 25.
Fezuu taa ñɩm
w06 15/7 28 § 15
Yehowa holuu mba pɛwɛ kʋñɔŋ taa yɔ
15 Keɣa maɖʋ Daviid te hendu se: «Paa man-caa nɛ mon-ɖoo pɔlɔ-m yɔ, Yehowa maɣmaɣ kaɣ-m mʋʋ.» (Keɣa 27:10) Pɩhɛzɩɣ ɛyʋ laŋɩyɛ kpem se ɛtɩlɩ se Yehowa sɔɔlɩm kpaɖɩ paa lʋlɩyʋ weyi lɛ ɛ-sɔɔlɩm! Ye ña-lʋlɩyʋ nɔɔyʋ ekizi-ŋ, ɛlakɩ-ŋ kañatʋ yaa ɛlɔ-ŋ yɔ, pɩpɩzɩɣ piyele nɛ ŋnɩɩ siziŋ; ɛlɛ pɩɩlɛɣzɩɣ nabʋyʋ sɔɔlɩm mbʋ Yehowa wɛnɩ ñɔ-yɔɔ yɔ pɩ-yɔɔ. (Roma mba 8:38, 39) Tɔzɩ se Ɛsɔ hɔŋ mba ɛsɔɔlaa yɔ nɛ ɛkɔŋnɩ ɛ-cɔlɔ. (Yohanɛɛsɩ 3:16; 6:44) Paa ɛbɛ ɛyaa ɛtɩɩlabɩ-ŋ nɛ pɩɖɛɛ yɔ, ña-Caa weyi ɛwɛ ɛsɔdaa yɔ ɛsɔɔlɩ-ŋ siŋŋ!
15-21 AVRIL
ÑƖM MBƲ PƖWƐ ƐSƆTƆM TAA YƆ | KEƔSI 29-31
Nɩŋgbaaŋ hɔm kɛ ɖʋtʋ ndʋ tɩwɩlɩɣ se Ɛsɔ sɔɔlɩ-ɖʋ yɔ
it-1 802 § 3
Ɛsɩndaa
Ye pɔtɔm se nɔɔyʋ ‘mɛsɩ ɛ-ɛsɩndaa yɔ’ pʋ-tɔbʋʋ nɩʋ wɛ ndɩ ndɩ, nɛ pɩlɩɣnɩ mbʋ pɩ-tɔm pɛwɛɛ nɛ pɔyɔɔdʋʋ yɔ pɩ-cɔlɔ. Alɩwaatʋ ndʋ pɔyɔɔdʋʋ se Ɛsɔ Yehowa mɛsɩ ɛ-ɛsɩndaa yɔ ɖoŋ ɖoŋ lɛ pɩwɩlɩɣ se eyebi nɔɔyʋ yaa ɛyaa tindimiye naɖɩyɛ taa mba pʋtɔdɩyɛ naʋ yaa e-ɖoŋ haʋ. Nɛ ɛpɩzɩɣ ɛla mbʋ ye pekizi-i ñam yɔ. Nɛ mbʋ kaatalɩnɩ Izrayɛɛlɩ mba. (Yɔb 34:29; Ke 30:5-8; Iza 54:8; 59:2) Nabʋyʋ taa pɩpɩzɩɣ ɖɔɖɔ nɛ pɩwɩlɩ se ɛɛlakɩ nabʋyʋ se ɛsɩnɩ nɔɔyʋ yaa se ecosi-i, mbʋ pʋyɔɔ yɔ ɛɖaŋ alɩwaatʋ ndʋ ɛ-maɣmaɣ ɛɖʋwa yɔ. (Ke 13:1-3) Alɩwaatʋ ndʋ Daviid tɩmnɩ Yehowa se: «Kɛzɩ ñɛ-ɛsa nɛ ŋyele cɔnʋʋ man-kɩdɛkɛdɩm» yɔ, ɛñɩnaɣ ɛpɔzɩ-ɩ se ɛkpaɣ ɛ-kɩwɛɛkɩm nɛ ekpeɣ-i yaa ɛhɩzɩ-pʋ.—Ke 51:9; kpaɣ-tʋ nɛ ŋmaɣzɩnɩ Ke 10:11.
w07 1/3 19 § 1
Ðaŋ Yehowa nɛ taa leleŋ
Papɩzɩɣ nɛ pakpaɣ ɛzɩma Yehowa nɩŋgbaŋʋʋ hɔm wazɩɣ-ɖʋ yɔ nɛ pamaɣzɩnɩ ɛzɩma tɩʋ piye paɣlɩɣ nɛ ɖɩpɩɣ yɔ. Bibl yɔɔdʋʋ Yehowa nɩŋgbaŋʋʋ hɔm tɔm ɛzʋnɔ: «Mba pɩfalɩsɩ-wɛ yɔ pɩlʋlʋʋ-wɛ siɣsiɣ wɛtʋ laŋhɛzɩyɛ piye.» (Ebree mba 12:11) Pɩpɔzʋʋ alɩwaatʋ pʋcɔ nɛ tɩʋ piye pɩɩ, mbʋ ɖɔɖɔ pɩpɔzʋʋ-ɖʋ alɩwaatʋ pʋcɔ nɛ ɖɩlɛɣzɩ ɖa-maɣzɩm nɛ pɩla nɔɔ kʋɖʋmaɣ nɛ falɩsʋʋ mbʋ Ɛsɔ falɩsɩɣ-ɖʋ yɔ. Kɩɖaʋ nakʋyʋ yɔ: Ye ɖa-lakasɩ nasɩyɩ eyeba nɛ pɩpɔzʋʋ se ɖilesi wala naayɛ ɛgbɛyɛ taa yɔ, ɛzɩma ɖɩsɔɔlɩ faaa se ɖɩɖaŋ Ɛsɔ yɔ pɩkaɣ-ɖʋ sɩnʋʋ nɛ pitaatibi-ɖʋ yɔɔɔ nɛ ɖɩlɔ lidaʋ. Ye ɖɩkatɩ wɛtʋ ndʋ yɔ, tɔm ndʋ fezuu ɖiyi Daviid nɛ ɛma yɔ tɩkpazɩɣ-ɖʋ ɖoŋ. Ɛmawa se: «Ye [Ɛsɔ] taa ɛwɩnɩ nɔɔyʋ yɔ piileɖiɣ, ɛlɛ ɛ-pʋtɔdɩyɛ naʋ ñeleɖiɣ ɛyʋ wezuu kpeekpe. Wiluu pɩzɩɣ nɛ kɩkɔɔ ɖanaɣ yɔɔ; ɛlɛ tanaŋ tɛɛ lɛ, taa leleŋ kubusi wɛɣna.» (Keɣa 30:5) Ye ɖɩwɛ suuɖu nɛ ɖɩɖaŋ nɛ ɖɩɖɔŋ lɔŋ tasʋʋ mbʋ Ɛsɔ tɩŋɩɣnɩ ɛ-Tɔm nɛ ɛ-ɛgbɛyɛ yɔɔ nɛ ɛtasɩɣ-ɖʋ yɔ ɩ-yɔɔ yɔ, alɩwaatʋ ndʋ ɖɩkaɣ mabʋ «taa leleŋ kubusi» yɔ, tɩkaɣ kɔm.
Ye pɔtɔm se nɔɔyʋ kpiɖaa siŋŋ yɔ, pʋ-tɔbʋʋ lɛ suwe?
18 Pɩsa nɛ ɛyʋ weyi palɩzɩ-ɩ ɛgbɛyɛ taa yɔ ɛwɩlɩ se ekpiɖi toovenim taa lɛ, pɩpɔzʋʋ se ewoki kediɣzisi ɖoŋ ɖoŋ nɛ ɛɖɔ lɔŋ weyi ɛzʋtʋyaa tasɩ-ɩ se ɛtɩmɩɣ nɛ ɛkalɩɣ Bibl ɖoŋ ɖoŋ yɔ ɩ-yɔɔ. Pɩpɔzʋʋ ɖɔɖɔ se ɛñaɣ pana nɛ ese wɛtʋ ndʋ tiiyeba nɛ ɛtɔlɩ kɩwɛɛkɩm taa yɔ. Ye ɛñaɣ pana siŋŋ nɛ ɛñɔɔzɩ ɛ nɛ Yehowa pa-taabalɩyɛ yɔ, ɛ-taa pɩzɩɣ nɛ pɩtɛ se Yehowa kaɣ-ɩ kpeɣu kiya nɛ ɛgbɛyɛ taa ɛzʋtʋyaa kaɣ-ɩ sɩnʋʋ nɛ ɛɖaɣnɩ pɩsʋʋ ɛgbɛyɛ taa. Toovenim taa lɛ, alɩwaatʋ ndʋ ɛgbɛyɛ taa ɛzʋtʋyaa tazɩɣ se pana se ɛyʋ nɔɔyʋ kpiɖi toovenim taa yaa etikpiɖi yɔ, panawa se paa wɛtʋ ndʋ lɛ tɩwɛ ndɩ nɛ lɛɛtʋ. Pʋyɔɔ lɛ, patazɩɣ paa wɛtʋ ndʋ lɛ tɩ-taa camɩyɛ nɛ paahʋʋ tɔm nɛ kañatʋ.
Fezuu taa ñɩm
w06 15/5 19 § 13
Keɣsi takayaɣ taa lɩmaɣza sɔsɔna
Keɣa 31:23—Ɛyʋ weyi ɛkpazɩɣ ɛ-tɩ yɔ ɛzɩma tɩyɛ pakpaɣ-ɩ kɩmɩyɛ nɛ pɔsɔzɩ pɩ-yɔɔ? Kɩmɩyɛ kpaʋ mbʋ pɩ-tɔm pɔyɔɔdʋʋ cɩnɛ yɔ mbʋ lɛ nɩŋgbaŋʋʋ hɔm. Alɩwaatʋ ndʋ ɛyʋ siɣsiɣ tʋ lakɩ kɩwɛɛkɩm nɛ ɛtɩɖʋna yɔ, Yehowa sɩɣzɩ-ɩ lɔŋ nɛ pɩkɛ ɛ-kɩhɛyʋʋ. Ɛyʋ weyi ɛwɛnɩ tɩ kpazʋʋ yɔ eeyeki labʋ lakasɩ kɩdɛkɛdɩsɩ nɛ pʋyɔɔ lɛ pakpaɣ-ɩ kɩmɩyɛ nɛ pɔsɔzɩ pɩ-yɔɔ, pʋ-tɔbʋʋ se pɔhɔŋ ɛ-nɩŋgbaŋʋʋ siŋŋ.—Aduwa 11:31; 1 Pɩyɛɛrɩ 4:18.
22-28 AVRIL
ÑƖM MBƲ PƖWƐ ƐSƆTƆM TAA YƆ | KEƔSI 32-33
Ye ɖɩlabɩ kɩwɛɛkɩm sɔsɔm nabʋyʋ yɔ, ɛbɛ yɔɔ pɩwɛɛ se ɖiheyi-pʋ?
w93 15/3 9 § 7
Yehowa pʋtɔdɩyɛ naʋ yeki se ɖɩtaalɔ lidaʋ
7 Ye ɖɩmanɩ Yehowa paɣtʋ yɔɔ yɔ, pɩpɩzɩɣ nɛ pɩwɛɛ-ɖʋ kaɖɛ se ɖikuli ɖa-kɩwɛɛkɩm yɔɔ nɛ halɩ se ɖiheyi-pʋ Yehowa. Ye pɩlabɩ mbʋ yɔ ɛbɛ pɩzɩɣ pɩlɩɩ pɩ-taa? Daviid yɔɔdɩ Keɣa 32 taa se: «Alɩwaatʋ ndʋ maasum tamɩyɛ yɔ, mɔ-mɔɔ pʋkaɣ, mbʋ pʋyɔɔ yɔ mɔmɔlaɣ evemiye kpeekpe. Mbʋ pʋyɔɔ yɔ wɩsɩ nɛ ɖoo, ñe-nesi yuŋ kaawɛ mɔ-yɔɔ. Mon-ɖoŋ tɛma ɛzɩ lɩm sɔɔʋ lʋŋɩyɛ taa soŋaɣ alɩwaatʋ taa yɔ.» (Kalɩtʋ 3, 4) Alɩwaatʋ ndʋ Daviid labɩ kɩwɛɛkɩm nɛ ɛwɛɛ nɛ ɛñakɩ pana se ɛmɛsɩ-pʋ yɔ, ɛ-ɛhʋyɛ kaawɛɛ nɛ ɖɩkʋʋ ɛ-tɔm. Siziŋ nɩʋ kaayeba nɛ e-ɖoŋ wɛɛ nɛ pɩpasɩɣ siŋŋ nɛ ɛwɛɛ ɛzɩ tɩʋ ŋgʋ wɩlɩŋ yeba nɛ kɩ-taa lɩm sɔɔ yɔ. Halɩ, pɩtɩla yɔ piiyeba nɛ ɛwɛɛnɩ maɣzɩm taa kʋdɔŋ nɛ ɛhɩnɩ kʋdɔŋ. Paa pɩtɩɩkɛ suwe yɔ, eelesi taa leleŋ weyi ɛɛwɛna yɔ. Ye ɖa-taa nɔɔyʋ ɛwɛ wɛtʋ ndʋ tɩ-ɖɔndɩ taa yɔ ɛbɛ pɩwɛɛ se ɛla?
cl 262 § 8
Ɛsɔ weyi «ɛsɔɔlɩ kpeɣu yɔ»
8 Daviid kpiɖaa lɛ, ɛyɔɔdɩ se:«Pɩtɛmnaa se monkuli man-kɩdɛkɛdɩm yɔɔ nɛ meheyi-ŋ; mantihuuzi man-kɩwɛɛkɩm yɔɔ. . . . Nɛ ŋkpeɣ-m man-kɩwɛɛkɩm, man-kɩdɛkɛdɩm.» (Keɣa 32:5) Ebree tɔm loyaɣ ŋga pɛɖɛzaa se «ŋkpeɣ-m» yɔ, ɖoŋ ɖoŋ lɛ kɔ-tɔbʋʋ lɛ se «ŋkʋsɩ-m» yaa «ŋkpaɣ-m». Palabɩnɩ-ɖɩ tʋmɩyɛ cɩnɛ se pawɩlɩ se pahɩzɩ «wɛɛ nɖɩ nɔɔyʋ ɖɔwa, kɩwɛɛkɩm yaa kɩdɛkɛdɩm mbʋ nɔɔyʋ laba yɔ.» Ye mbʋ, pɩwɩlɩɣ se Yehowa kʋsɩ Daviid kɩwɛɛkɩm nɛ ɛkpaɣ-pʋ nɛ ɛɖɛna. Pɩtʋʋ fɛyɩ se piiyeba nɛ Daviid ɛ-ɛhʋyɛ taatasɩɣ-ɩ kɩlɩɣ cɛyʋʋ. (Keɣa 32:3) Ða ɖɔɖɔ mbʋ, ɖa-taa pɩzɩɣ nɛ pɩtɛ se mba payɩ pɛwɛnɩ tisuu Yesu kɩhɛyʋʋ pʋ-ñʋʋ taa kɩlaʋ yɔɔ nɛ patɩŋɩɣnɩ kɩ-yɔɔ nɛ pañɩnɩɣ se ekpeɣ-wɛ yɔ, ɛkaɣ hɩzʋʋ pa-kɩwɛɛkɩm.—Maatiyee 20:28.
w01 1/6 30 § 1
Kɩwɛɛkɩm yɔɔ kuluu mbʋ piyeki se ɛyʋ yɔɔ ɛcɛ yɔ
Daviid kuli ɛ-kɩwɛɛkɩm yɔɔ nɛ eheyi nɛ pɩtɛ lɛ, pɩtaatasɩɣ-ɩ labʋ ɛzɩ ɛfɛyɩnɩ wazaɣ nakɛyɛ yɔ. Tɔm ndʋ ɛma keɣsi taa nɛ titukuuni kɩwɛɛkɩm yɔɔ kuluu yɔ tɩwɩlɩɣ ɛzɩma pɩɩhɛzɩ ɛ-laŋɩyɛ nɛ ɛzɩma ɛɛtɛm ɛ-taa se ewoki pɩ-yɔɔ nɛ ɛsɛɣ Yehowa siɣsiɣ yɔ. Iyele nɛ ɖɩna kɩɖaʋ nakʋyʋ Keɣa 32 taa. Ðɩkalɩɣ kalɩtʋ 1 taa se: «Koboyaɣ tʋ lɛ weyi pekpeɣ-i ɛ-kɩwɛɛkɩm yɔ, weyi pohuuzi ɛ-kɩdɛkɛdɩm yɔɔ yɔ.» Paa kɩwɛɛkɩm sɔsɔm nabʋyʋ nɔɔyʋ ɛlaba ɛlɛ ekpiɖi siŋŋ yɔ, ɛpɩzɩɣ nɛ ɛɖaɣnɩ hiɣu taa leleŋ. Nʋmɔŋ weyi ɩ-yɔɔ ɛtɩŋɩɣna nɛ ɛwɩlɩ se ekpiɖi siŋŋ yɔ ɩ-taa nakʋyʋ lɛ se ɛzɩ Daviid yɔ, pɩwɛɛ se etisi se ɛlabɩ kɩwɛɛkɩm. (2 Samɩyɛɛlɩ 12:13) Daviid tɩñaɣ pana se ɛlʋ ɛ-tɩ yɔɔ Yehowa ɛsɩndaa yaa se ɛwaana se lalaa cɔlɔ pɩlɩnaa. Ɛyɔɔdɩ kalɩtʋ 5 taa se: «Pɩtɛmnaa se monkuli man-kɩdɛkɛdɩm yɔɔ nɛ meheyi-ŋ; mantihuuzi man-kɩwɛɛkɩm yɔɔ. Mɔyɔɔdaa se: “Mankaɣ kuluu man-kɩwɛɛkɩm yɔɔ nɛ meheyi Yehowa.” Nɛ ŋkpeɣ-m man-kɩwɛɛkɩm, man-kɩdɛkɛdɩm.» Ye nɔɔyʋ ekpiɖi ɛ-kɩwɛɛkɩm yɔɔ toovenim taa yɔ ehikiɣ laŋɩyɛ hɛzʋʋ, nɛ pɩɩtasɩɣ pɔzʋʋ se ɛ-ɛhʋyɛ ɛtasɩ-ɩ cɛyʋʋ kɩwɛɛkɩm mbʋ ɛɛlaba nɛ pɩɖɛɛ yɔ pɩ-yɔɔ.
Fezuu taa ñɩm
w06 15/5 20 § 1
Keɣsi takayaɣ taa lɩmaɣza sɔsɔna
Keɣa 33:6—Ɛbɛ Yehowa nɔɔ taa «fezuu» kɛnaa? Fezuu ŋgʋ lɛ ɖoŋ weyi Ɛsɔ lakɩnɩ tʋmɩyɛ yɔ, yaa fezuu kiɖeɖeu; ŋgʋ ɛlabɩnɩ tʋmɩyɛ nɛ ɛlɩzɩ ɛsɔdaa. (Kiɖe Tɛɛ Tɔm 1:1, 2) Payaɣ-kʋ se ɛ-nɔɔ taa fezuu mbʋ pʋyɔɔ yɔ pɩkɛ ɖoŋ weyi ɛpɩzɩɣ nɛ ɛlabɩnɩ tʋmɩyɛ nɛ ɛla mbʋ ɛsɔɔlaa yɔ ɖooo poliŋ taa.
29 AVRIL–5 MAI
ÑƖM MBƲ PƖWƐ ƐSƆTƆM TAA YƆ | KEƔSI 34-35
‘Sa Yehowa alɩwaatʋ kpeekpe’
w07 1/3 22 § 11
Ðɩkpɛndɩ nɛ ɖɩsa Yehowa hɩɖɛ
11 «Mankaɣ sam Yehowa alɩwaatʋ kpeekpe; ɛ-samtʋ kaɣ wɛʋ mo-ndomee yɔɔ paa ɛzɩmtaa.» (Keɣa 34:1) Alɩwaatʋ ndʋ papaɖaɣ Daviid nɛ ese nɛ ɛwɛɛ kɩjaʋ yɔ, pɩtʋʋ fɛyɩ se pɩpɔzaɣ-ɩ tomnaɣ yɔɔ wondu, ɛlɛ Keɣa 34:1 taa tɔm wɩlɩɣ se kɩcɛyɩm mbʋ pɩtaawɛɛnɩ ɖoŋ ɛzɩma ɛɛtɛm ɛ-taa se ɛsaŋ Yehowa yɔ pɩ-yɔɔ. Ɛkɛ-ɖʋ kɩɖaʋ kɩbaŋʋ kpem alɩwaatʋ ndʋ ɖɩkatɩɣ kala yɔ. Paa ɖɩwɛ sukuli taa, tʋmɩyɛ taa, koobiya Krɩstʋ mba hɛkʋ taa, yaa tɔm susuu taa yɔ, mbʋ pɩmʋnaa se pɩ-tɔm ɛkɩlɩ cɛyʋʋ ɖɛ-ɛsɩndaa yɔ mbʋ yɔ: ɖɩsa Yehowa. Maɣzɩ pazɩ nɛ ŋna, ɖɩwɛnɩ lɩmaɣza sakɩyɛ wena a-yɔɔ pɩwɛɛ se ɖɩla mbʋ yɔ! Kɩɖaʋ nakʋyʋ yɔ: Ðɩpɩzɩɣ nɛ ɖɩkpaɣ alɩwaatʋ nɛ ɖɩmaɣzɩ wondu sakɩyɛ ndʋ Yehowa lɩzaa nɛ tɩhaɣ-ɖʋ taa leleŋ yɔ tɩ-yɔɔ. Ðɩpɩzɩɣ ɖɔɖɔ nɛ ɖɩmaɣzɩ mbʋ payɩ ɛtɩŋnɩ ɛ-ɛgbɛyɛ hɔɔlʋʋ ŋgʋ kɩwɛ tɛtʋ yɔɔ nɛ ɛla yɔ pɩ-yɔɔ. Paa ɛyaa siɣsiɣ tɩnaa ɩtɩtalɩ pilim yɔ Yehowa tɩŋnɩ pɔ-yɔɔ nɛ ɛla tʋma sɔsɔna ɖa-alɩwaatʋ tʋnɛ tɩ-taa. Ɛyaa mba pakpakɩɣ-wɛ ɛjaɖɛ yɔɔ cɩnɛ se pɛkɛ ɛsɔnaa yɔ, ye pakpaɣ pa-tʋma nɛ pamaɣzɩnɩ Ɛsɔ ñɩna yɔ, atɩlɩɩ pʋyʋ. Pɩtʋʋ fɛyɩ se ŋtisiɣ Daviid tɔm tʋnɛ tɩ-yɔɔ. Ɛmawa se: «Oo Yehowa, ɛsɔnaa taa lɛ, nɔɔyʋ fɛyɩ ɛzɩ ña yɔ, tʋma naayɛ fɛyɩ ɛzɩ ña-ñɩna yɔ.»—Keɣa 86:8.
w07 1/3 22 § 13
Ðɩkpɛndɩ nɛ ɖɩsa Yehowa hɩɖɛ
13 «Yehowa yɔɔ lɛ, mankaɣ kʋndʋʋ; hɛɛɛ tɩnaa kaɣ nɩʋ nɛ pɛwɛɛ laŋhʋlʋmɩyɛ taa.» (Keɣa 34:2) Mayaɣ kanɛ kaawɩlɩɣ se Daviid kpazaɣ ɛ-tɩ mbʋ ɛpɩzaa nɛ ɛla yɔ pɩ-yɔɔ. Kɩɖaʋ nakʋyʋ yɔ: Ɛtɩkpazɩ ɛ-tɩ wiɖiyi se ɛpɩzaa nɛ epeɣzi Gaatɩ wiyaʋ. Eeɖiɣzinaa se Yehowa kandɩyɩnɩ ɛ-yɔɔ alɩwaatʋ ndʋ ɛɛwɛ Gaatɩ yɔ, nɛ Yehowa sɩnɩnɩ-ɩ nɛ ɛlɩɩ pɩ-taa. (Aduwa 21:1) Ye mbʋ, Daviid kʋndaɣ Yehowa yɔɔ, pɩtɩkɛ ɛ-tɩ yɔɔ. Mbʋ kaahɔmnɩ ɛyaa hɛɛɛ tɩnaa nɛ pɩkɔŋnɩ Yehowa cɔlɔ. Yesu ɖɔɖɔ kaasaŋaɣ Yehowa hɩɖɛ, nɛ mbʋ kaayebina nɛ mba poluzuu pa-tɩ nɛ paasɔɔlaa se pawɩlɩ-wɛ tɔm yɔ pɔkɔɔ Ɛsɔ cɔlɔ. Sɔnɔ ɖɔɖɔ, ɛyaa hɛɛɛ tɩnaa mba palɩnɩ ajɛɛ kpeekpe taa yɔ, pɛwɛɛ nɛ pɔkɔŋ Krɩstʋ mba patam numwaa ɛgbɛyɛ nɖɩ ɖɩwɛ ɛjaɖɛ kpeekpe yɔɔ nɛ Yesu kɛ ɖɩ-ñʋʋdʋ yɔ ɖɩ-taa. (Koloosi mba 1:18) Alɩwaatʋ ndʋ ɛyaa hɛɛɛ tɩnaa nɩɣ Ɛsɔ sɛyaa saŋ Ɛsɔ hɩɖɛ nɛ tɩ luzuu yɔ, pitukuuni pa-laŋɩyɛ. Nɛ fezuu kiɖeɖeu sɩɣnɩ-wɛ nɛ panɩɩ tɔm ndʋ tɩwɛ Bibl taa yɔ tɩ-tɔbʋʋ lɛ, pitukuuni-wɛ ɖɔɖɔ.—Yohanɛɛsɩ 6:44; Tʋma Labʋ 16:14.
w07 1/3 23 § 15
Ðɩkpɛndɩ nɛ ɖɩsa Yehowa hɩɖɛ
15 «Mɔnpɔzɩ Yehowa tɔm nɛ ecosi-m. Eholi-m mɔn-sɔɔndʋ kpeekpe taa.» (Keɣa 34:4) Ɛzɩma Yehowa holi Daviid yɔ piitukuni-i siŋŋ. Pʋyɔɔ ewobi pɩ-yɔɔ nɛ ɛyɔɔdɩ se: «Ɛjam ɛnɛ ɛya Yehowa, nɛ ɛlɛ welisi. Ɛyabɩ ɛ-ñʋʋ ɛ-kʋñɔmɩŋ kpeekpe taa.» (Keɣa 34:6) Alɩwaatʋ ndʋ ɖa nɛ koobiya Krɩstʋ mba ɖikpeɣliɣ yɔ, ɖɩwɛnɩ wala sakɩyɛ se ɖɩkɛdɩ ɛzɩma Yehowa sɩnɩ-ɖʋ nɛ ɖɩɖɔkɩ ɖa-laŋɩyɛ kala taa yɔ pɩ-tɔm. Kɛdɛsɩ nzɩ sɩkpazɩɣ ɖo-koobiya Krɩstʋ mba tisuu ɖoŋ, ɖɔɖɔ ɛzɩ Daviid tɔm pee kaakpazʋʋ mba paɖʋwaɣ-ɩ nesi yɔ pe-tisuu ɖoŋ yɔ. Daviid hɔɔlʋʋ taa lɛ, ɛ-taabalaa mba pataɣaɣ «[Yehowa] liu yɔ pɛ-ɛsɩndaa ñɩlɩsɩɣ; pataapɩzɩɣ se paɖʋ-wɛ fɛyɛ.» (Keɣa 34:5) Paa paawɛɛ nɛ peseɣ se poposini Wiyaʋ Sɔɔlɩ yɔ, fɛyɛ taakpaɣ-wɛ. Pa-taa kaatɛma se Ɛsɔ kaawɛɛ nɛ ɛsɩɣnɩ Daviid, nɛ pɛ-ɛsɩndaa ñɩlɩsaɣ. Mbʋ ɖɔɖɔ, ɛyaa kɩfama mba toovenim kɛdɩnɩ-wɛ yɔ nɛ toovenim Krɩstʋ ñɩma mba peleɖi toovenim taa yɔ, pataɣ Yehowa liu se ɛsɩnɩ-wɛ. Yehowa sɩnɩ pa-maɣmaɣ nɛ pana, pʋyɔɔ pɛ-ɛsɩndaa ñɩlɩsɩɣ nɛ pɩwɩlɩɣ se pɛtɛm pa-taa se powoki pɩ-yɔɔ nɛ pɔɖɔkɩ pe-siɣsiɣ wɛtʋ.
Fezuu taa ñɩm
w06 15/5 20 § 2
Keɣsi takayaɣ taa lɩmaɣza sɔsɔna
Keɣa 35:19—Daviid pɔzʋʋ Yehowa se etaayele nɛ mba papaɖɩɣ-ɩ yɔ poɖozuu pɛ-ɛsa yɔ, pʋ-tɔbʋʋ lɛ suwe? Ye Daviid koyindinaa iɖozi ɛsa yɔ pɩwɩlɩɣ se pa-taa wɛ leleŋ se Daviid tɔlɩ kpacanaa mba pañɩbɩ-ɩ yɔ pa-taa. Daviid tɩmaɣ se pɩtaala mbʋ.