TƆM KƖKPƐLƖKƖTƲ 37
Tɔm ndʋ Bibl wɩlɩɣ tʋmɩyɛ nɛ liidiye pɔ-yɔɔ?
Wiɖiyi tʋmɩyɛ yaa liidiye kʋñɔŋ yeba nɛ ŋwɛɛ nɩɣzɛ taa? Nabʋyʋ taa pɩpɩzɩɣ nɛ pɩwɛɛ kaɖɛ se ɖɩcɔŋnɩ ɖa-kɩcɛyɩm ɖeɖe nɛ ɖɩtɛ ɖɩsɛɛ Yehowa ɛzɩ pɩpɔzʋʋ yɔ. Bibl tasɩɣ-ɖʋ lɔŋ kɩbaŋ weyi ɩpɩzɩɣ nɛ ɩsɩnɩ-ɖʋ yɔ.
1. Tɔm ndʋ Bibl wɩlɩɣ tʋmɩyɛ yɔɔ?
Yehowa sɔɔlaa se ɖa-tʋmɩyɛ ɛha-ɖʋ taa leleŋ. Bibl yɔɔdʋʋ se «nabʋyʋ fɛyɩ ɛyʋ weewee nɛ pɩkɩlɩ se . . . ɛnɩɩ leleŋ ɛ-tʋmɩyɛ ɖoŋ ñɩnɖɛ labʋ taa.» (Eklezɩyasɩtɩ 2:24) Yehowa sɔɔlɩ tʋma ɖoŋ ñɩna labʋ. Ye ɖɩmaɣzɩɣnɩ-ɩ nɛ ɖɩlakɩ tʋmɩyɛ camɩyɛ yɔ, pɩkɛdɩɣnɩ-ɩ nɛ pɩhaɣ ɖa-maɣmaɣ taa leleŋ.
Tʋmɩyɛ labʋ tɔm cɛyaa. Ɛlɛ pɩfɛyɩ se ɖiyele nɛ tʋmɩyɛ mʋ Yehowa sɛtʋ lone. (Yohanɛɛsɩ 6:27) Yehowa labɩ-ɖʋ tamaɣ se ye ɖɩsɩ ɛ-sɛtʋ kajalaɣ lone taa yɔ, ɛcɔŋnɩ ɖo-tomnaɣ yɔɔ kɩcɛyɩm ɖeɖe.
2. Ye pɔtɔm se ɛyʋ ɛwɛɛnɩ lɩmaɣza wena amʋnaa yɔ liidiye yɔɔ yɔ, pʋ-tɔbʋʋ lɛ suwe?
Bibl yɔɔdaa se ‘liidiye kandɩyɩɣ’ ɛyʋ yɔɔ, ɛlɛ kɩtasɩ yɔɔdʋʋ ɖɔɖɔ se liidiye ɖeke ɛɛpɩzɩɣ nɛ ɖɩha-ɖʋ koboyaɣ. (Eklezɩyasɩtɩ 7:12) Pʋyɔɔ kiseɣtiɣ-ɖʋ se ɖɩtaasɔɔlɩ liidiye ɛlɛ ‘ɖe-liu ɛsɩbɩnɩ mbʋ ɖɩwɛnɩ lɛɛlɛɛyɔ yɔ.’ (Kalɩ Ebree mba 13:5.) Ye ɖe-liu ɛsɩkɩnɩ mbʋ ɖɩwɛna yɔ, ɖɩɩwɛɣ nɛ ɖɩnɩɣzɩɣ paa ɛzɩmtaa se mbʋ ɖɩwɛna yɔ pɩtɩɖɔɔ. Ðɩɩtɔkɩ kɩma yem yem. (Aduwa 22:7) Ðɩfɛɣ ɖɔɖɔ kpacanaa mba pa-taa ɛyaa nabɛyɛ tɔlʋʋ yɔ: pɔtɔʋ tɔmbolaa yaa palakɩ liidiye aleɣya lɛɛna, nɛ lalaa ñañɩnɩɣ se papɩsɩ ñɩm tɩnaa lɛɛ lɛɛ.
3. Ɛzɩma ɖɩpɩzɩɣ nɛ ɖɩlabɩnɩ ɖe-liidiye tʋmɩyɛ nɛ pɩwazɩ ɛyaa lalaa?
Yehowa kɛ Ɛsɔ kʋjɔʋ tʋ, nɛ ɖɩmaɣzɩɣnɩ-ɩ alɩwaatʋ ndʋ ‘ɖɩwɛɣ kʋjɔʋ nɛ ɖɩsɔɔlʋʋ tayʋʋ yɔ.’ (1 Timootee 6:18) Ðɩpɩzɩɣ nɛ ɖɩlabɩnɩ ɖe-liidiye tʋmɩyɛ nɛ pɩwazɩ ɛyaa lalaa: ɖɩpɩzɩɣ nɛ ɖɩha haɖɛ nɛ ɖɩsɩnɩ ɛgbɛyɛ, ɖɩpɩzɩɣ nɛ ɖɩsɩnɩ mba pɛwɛ kɩcɛyɩm taa yɔ, kɔzɩ kɔzɩ mba ɖa nɛ wɛ ɖɩka tisuu yɔ. Mbʋ pɩ-tɔm cɛyɩ Yehowa ɛsɩndaa nɛ pɩkpaɖɩ yɔ mbʋ yɔ: lɩmaɣza wena ɖɩwɛna ɖa-kʋjɔʋ ŋgʋ ɖɩlakɩ yɔ kɩ-yɔɔ yɔ, pɩtɩkɛ ɛzɩma kɩɖɔwa yɔ. Ye ɖɩlakɩ kʋjɔŋ nɛ ɖa-laŋɩyɛ faaa yɔ, pɩhaɣ-ɖʋ taa leleŋ nɛ pɩkɛdɩɣnɩ Yehowa ɖɔɖɔ.—Kalɩ Tʋma Labʋ 20:35.
TAZƖ NƐ PILIMI
Tazɩ nɛ ŋna wazasɩ nzɩ ɛyʋ pɩzɩɣ nɛ ehiɣ, ye ɛwɛnɩ lɩmaɣza kɩbana tʋmɩyɛ yɔɔ nɛ e-liu ɛsɩkɩnɩ mbʋ ɛwɛna yɔ.
4. Tɩŋnɩ ɛzɩma ŋlakɩ tʋmɩyɛ yɔ pɩ-yɔɔ nɛ ŋɖʋ Yehowa hɩɖɛ
Pɩwɛɛ se ɖiyele nɛ taabalɩyɛ nɖɩ ɖɩwɛ ɖa nɛ Yehowa ɖɛ-hɛkʋ taa yɔ ɖɩwɛɛnɩ ɖoŋ ɖa-tʋmɩyɛ labʋ yɔɔ. Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
Ɛzɩ ɖɩnaʋ video taa yɔ, ŋɖiɣzinaa se wɛtʋ ndʋ Jason kaawɛnɩ ɛ-tʋmɩyɛ taa?
Ɛbɛ ɛlaba nɛ ɛpɩzɩ nɛ ɛsɩɩ tʋmɩyɛ ɖi-lone taa?
Ɩkalɩ Koloosi mba 3:23, 24; nɛ pʋwayɩ lɛ ɩtazɩ tɔm tʋnɛ tɩ-taa:
Wɛtʋ ndʋ ɖɩwɛnɩ ɖa-tʋmɩyɛ yɔɔ yɔ tɩ-tɔm cɛyaa. Ɛbɛ yɔɔ?
Tʋmɩyɛ labʋ tɔm cɛyaa. Ɛlɛ pɩfɛyɩ se ɖiyele nɛ pɩmʋ Yehowa sɛtʋ lone.
5. Ye ɖe-liu ɛsɩbɩnɩ mbʋ ɖɩwɛna yɔ, pɩwazɩɣ-ɖʋ
Ɛyaa sakɩyɛ sɔɔlaa se pekpeɣli ñɩm sakɩyɛ ɛzɩ po-ɖoŋ haʋ-wɛ nʋmɔʋ yɔ. Ɛlɛ Bibl tasɩɣ-ɖʋ lɔŋ weyi yɔ, ɩwɛ ndɩ. Ɩkalɩ 1 Timootee 6:6-8, nɛ pʋwayɩ lɛ ɩtazɩ tɔm tʋnɛ tɩ-taa:
Ɛbɛ Bibl seɣtiɣ-ɖʋ se ɖɩla?
Paa mbʋ ɖɩwɛna yɔ pɩtɩɖɔɔ yɔ, ɖɩpɩzɩɣ nɛ ɖɩwɛɛ koboyaɣ taa. Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
Paa hɔŋ ɩnɛ ɩfɛyɩnɩ liidiye sakɩyɛ yɔ, ɛbɛ yeba nɛ ɩwɛɛ koboyaɣ taa?
Ye ɛyʋ nɔɔyʋ ɛtɛm wɛnʋʋ liidiye sakɩyɛ ɛlɛ ɛñɩnɩɣ se ɛtasɩ wɛnʋʋ nɛ pɩkpaɖɩ yɔ, ɛbɛ pɩzɩɣ nɛ pɩtalɩ-ɩ? Yesu tɩŋnɩ kɩɖaʋ nakʋyʋ yɔɔ nɛ ɛwɩlɩ se pɩkɔŋnɩ ɛyʋ kaɖɛ. Ɩkalɩ Luka 12:15-21, nɛ pʋwayɩ lɛ ɩtazɩ tɔm tʋnɛ tɩ-taa:
Kɩɖaʋ ŋgʋ Yesu kpaɣaa yɔ, lɔŋ weyi kɩkpɛlɩkɩ-ŋ? —Cɔnɩ kalɩtʋ 15.
Ɩkalɩ masɩ sɩnɛ nɛ ɩkpaɣ-sɩ nɛ ɩmaɣzɩnɩ ɖama: Aduwa 10:22 nɛ 1 Timootee 6:10. Pʋwayɩ lɛ, ɩtazɩ tɔm tʋnɛ tɩ-taa:
Ŋmaɣzɩɣ se ɛbɛ tɔm kɩlɩ cɛyʋʋ? Ðɩɖʋ taabalɩyɛ nɛ Yehowa yaa ɖɩwɛɛnɩ liidiye sakɩyɛ? Ɛbɛ yɔɔ?
Ye ɛyʋ ɛñɩnɩɣ se ehiɣ liidiye sakɩyɛ nɛ ɛ-lɩmaɣza wɛɛ pɩ-yɔɔ paa ɛzɩmtaa yɔ, kala wena ɛpɩzɩɣ nɛ ɛkatɩ?
6. Yehowa kaɣ ɖa-kɩcɛyɩm ɖeɖe cɔnʋʋ
Alɩwaatʋ ndʋ ɖɩkatɩɣ kala naayɛ ɖa-tʋmɩyɛ taa yaa ɖɩɩwɛɣnɩ liidiye sakɩyɛ yɔ, pɩpɩzɩɣ pɩsɩnɩ-ɖʋ nɛ ɖɩna se toovenim taa lɛ, ɖɩtaɣ Yehowa liu yaa we. Ɩcɔnɩ VIDEO nɛ ɩna mbʋ ɖɩpɩzɩɣ nɛ ɖɩla alɩwaatʋ ndʋ pɩtakɩɣ ɖe-tisuu hɔɔlɩŋ ɛnɩ ɩ-taa yɔ, nɛ pʋwayɩ lɛ ɩtazɩ tɔm tʋnɛ tɩ-taa.
Kala wena video taa abalʋ ɛnʋ ɛkataa?
Ɛbɛ ɛlaba nɛ pɩsɩnɩ-ɩ nɛ ɛwa kala ana?
Ɩkalɩ Maatiyee 6:25-34, nɛ pʋwayɩ lɛ ɩtazɩ tɔm tʋnɛ tɩ-taa:
Mba pasɩɣ Yehowa sɛtʋ kajalaɣ lone taa yɔ, tamaɣ ŋga ɛlabɩ-wɛ?
NABƐYƐ YƆƆDƲƲ SE: «Pɩpɔzʋʋ se mala tʋmɩyɛ siŋŋ nɛ pɩsa nɛ mɔncɔnɩ mɔ-hɔʋ kɩcɛyɩm ɖeɖe. Pʋyɔɔ maapɩzɩɣ nɛ mowoki ɛgbɛyɛ taa kediɣzisi paa kpɩtaʋ ŋgʋ.»
Mayaɣ ŋga yeba nɛ ña-taa tɛ se ye ŋsɩ Yehowa sɛtʋ kajalaɣ lone taa yɔ, mbʋ wɛnɩ ɖeu paa ɛzɩmtaa nɛ pɩkpaɖɩ?
TOBI LƐ
Tʋmɩyɛ nɛ liidiye pɔ-tɔm cɛyaa, ɛlɛ pɩtɩpɔzɩ se ɖiyele nɛ pɩpɩsɩnɩ-ɖʋ nɛ wayɩ Yehowa sɛtʋ taa.
Tɔm taa tazʋʋ
Ɛbɛ pɩzɩɣ nɛ pɩsɩnɩ-ŋ nɛ ŋwɛɛnɩ lɩmaɣza wena amʋnaa yɔ tʋmɩyɛ yɔɔ?
Ye ñe-liu ɛsɩkɩnɩ mbʋ ŋwɛna yɔ, ɛzɩma pɩpɩzɩɣ nɛ pɩwazɩ-ŋ?
Yehowa yɔɔdaa se ɛcɔŋnɩ ɛ-samaɣ kɩcɛyɩm ɖeɖe. Ɛzɩma ŋpɩzɩɣ nɛ ŋwɩlɩ se ŋtaɣ ɛ-tɔm ndʋ liu?
WONDU LƐƐTƲ
Tazɩ nɛ ŋna se ɛzɩ Bibl yɔɔdʋʋ se liidiye fɛyɩ ɖeu yaa we.
«L’argent est-il la racine de tous les maux?» (Intɛrnɛɛtɩ yɔɔ tɔm ñʋʋ)
Kpɛlɩkɩ nɛ ŋna ɛzɩma ŋpɩzɩɣ nɛ ŋlabɩnɩ liidiye tʋmɩyɛ nɛ pɩkɛdɩnɩ Ɛsɔ yɔ.
Ɛzɩ tɔmbolaa yaa aleɣya lɛɛna wena ayeki se pehiɣ liidiye yɔ, aakɔŋnɩ ɛyʋ kaɖɛ naɖɩyɛ?
«D’après la Bible: Les jeux d’argent» (Réveillez-vous!, mars 2015)
Abalʋ nɔɔyʋ kaakɛ mɩlʋ nɛ ɛtɔwaɣ ɖɔɖɔ tɔmbolaa nɛ ɛlakɩ ɖɔɖɔ aleɣya lɛɛna wena ayeki se pehiɣ liidiye yɔ. Kalɩ nɛ ŋna mbʋ piseɣti-i nɛ ɛlɛɣzɩ e-wezuu caɣʋ yɔ.
«Les courses de chevaux étaient ma passion» (La Tour de Garde, 1er novembre 2011)