Ɛbɛ ŋpɩzɩɣ ŋla nɛ ñɔ-yɔɔdaɣ kɛdɩnɩ Yehowa?

Yehowa lɩzɩ-ɖʋ lɛ, ɛlabɩ-ɖʋ kʋjɔʋ kɩbaŋʋ nakʋyʋ. Kʋjɔʋ ŋgʋ lɛ yɔɔdaɣ. Ɛzɩma ɖɩlakɩnɩ tʋmɩyɛ kʋjɔʋ ŋgʋ yɔ pɩ-tɔm cɛyɩ ɛ-ɛsɩndaa yaa we? Pɩtʋʋ fɛyɩ se pɩ-tɔm cɛyɩ ɛ-ɛsɩndaa siŋŋ! (Kalɩ Yakubu 1:26.) Ye mbʋ, ɛzɩma ɖɩpɩzɩɣ nɛ ɖɩlabɩnɩ yɔɔdaɣ kʋjɔʋ tʋmɩyɛ camɩyɛ nɛ pɩkɛdɩnɩ Yehowa?

1. Ɛzɩma pɩwɛɛ se ɖɩlabɩnɩ yɔɔdaɣ kʋjɔʋ tʋmɩyɛ?

Bibl yɔɔdʋʋ se: «Iwolo pɩ-yɔɔ nɛ iseɣti ɖama nɛ ɩkpazɩ ɖama ɖoŋ.» (1 Tesalooniiki mba 5:11) Ŋsɩm nabɛyɛ nɛ pɩpɔzʋʋ se pakpazɩ-wɛ ɖoŋ na? Ɛbɛ ŋpɩzɩɣ ŋla nɛ ŋkpazɩ-wɛ ɖoŋ? Yele nɛ patɩlɩ se ŋmaɣzɩɣ pɔ-yɔɔ. Pɩtɩla ŋpɩzɩɣ nɛ ŋheyi-wɛ pɛ-wɛtʋ ndʋ tɩkɛdɩnɩ-ŋ yɔ tɩ-tɔm. Ŋsɩm mayaɣ nakɛyɛ nɛ kapɩzɩɣ nɛ kɛhɛzɩ nɔɔyʋ laŋɩyɛ na? Pɩtɩla ŋsɩm masɩ nzɩ sɩ-taa sakɩyɛ. Pɩtasɩ lɛ, tɔm ndʋ ŋyɔɔdʋʋ yɔ, tɩ-tɔm cɛyaa; ɛlɛ taasɔɔ se ɛzɩma ŋyɔɔdʋʋ-tʋ yɔ, pɩ-tɔm cɛyaa ɖɔɖɔ. Ye mbʋ paa ɛzɩmtaa lɛ, ñaɣ pana nɛ ŋyɔɔdɩ tɔm kɩbandʋ nɛ nɔɔ kɩbaŋa.—Aduwa 15:1.

2. Tɔm ndʋ pɩfɛyɩ se ɖɩyɔɔdɩ?

Bibl yɔɔdaa se: «Tɔm kɩɖazɩtʋ natʋyʋ ɛtaalɩɩnɩ mɩ-nɔɔ taa.» (Kalɩ Efɛɛzɩ mba 4:29.) Pʋ-tɔbʋʋ lɛ se pɩfɛyɩ se ɖɩyɔɔdɩ tɔm kɩdɛkɛdɩtʋ yaa kañatʋ tɔm ndʋ tɩpɩzɩɣ nɛ tɩɖʋ nɔɔyʋ ɖɩwɩzɩyɛ yɔ. Pɩfɛyɩ ɖɔɖɔ se ɖɩyɔɔdʋʋ tɔm kɩdɛkɛdɩtʋ yaa kɔlɔmɔtʋ tɔm lalaa yɔɔ.—Kalɩ Aduwa 16:28.

3. Ɛbɛ pɩzɩɣ nɛ pɩsɩnɩ-ɖʋ nɛ ɖɩyɔɔdʋʋ tɔm ndʋ tɩkpazɩɣ lalaa ɖoŋ yɔ?

Ðoŋ ɖoŋ lɛ, tɔm ndʋ ɖɩyɔɔdʋʋ yɔ, tɩsɩɣnɩ lalaa se patɩlɩ mbʋ pɩwɛ ɖa-laŋɩyɛ taa yɔ yaa mbʋ pʋyɔɔ ɖɩmaɣzɩɣ yɔ. (Luka 6:45) Pʋyɔɔ lɛ, pɩwɛɛ se ɖɩñaɣ pana nɛ ɖɩkaŋ ɖa-lɩmaɣza ‘mbʋ payɩ pɩwɛ siɣsiɣ yɔ, mbʋ pɩwɛ kele kele yɔ, mbʋ payɩ pɩmʋnaa se pɔsɔɔlɩ-pʋ yɔ nɛ mbʋ payɩ pɩmʋnɩ samtʋ yɔ’ pɩ-yɔɔ. (Filiipi mba 4:8) Pɩsa nɛ ɖɩla mbʋ lɛ, pɩpɔzʋʋ se ɖɩlɩzɩ aleɣya wena ɖɩlakɩ yɔ nɛ ɖa-taabalaa nɛ lɔŋsɩnɖɛ. (Aduwa 13:20) Ye ɖɩkpakɩɣ alɩwaatʋ nɛ ɖɩmaɣzɩɣ pʋcɔ nɛ ɖɩyɔɔdʋʋ yaa ɖɩkpakɩɣ alɩwaatʋ nɛ ɖɩmaɣzɩɣ ɖoŋ weyi ɖɔ-tɔm pee pɩzɩɣ nɛ awɛɛnɩ lalaa yɔɔ yɔ pɩ-yɔɔ yɔ, pɩsɩɣnɩ-ɖʋ. Bibl yɔɔdaa se: «Tɔm ndʋ ɛyʋ ɛɛmaɣzɩɣ pʋcɔ nɛ ɛyɔɔdʋʋ-tʋ yɔ, tɩwɛ ɛzɩ pɔsɔkʋʋ ɛyʋ sɩsɩ yɔ, ɛlɛ lɔŋsɩnɖʋ nzʋlʋmɩyɛ waɣ kɩwaʋ.»—Aduwa 12:18.

TAZƖ NƐ PILIMI

4. Maɣzɩɣ tɔm ndʋ ŋyɔɔdʋʋ yɔ, ɛzɩma ŋyɔɔdʋʋ-tʋ yɔ nɛ alɩwaatʋ ndʋ ŋyɔɔdʋʋ-tʋ yɔ pɩ-yɔɔ camɩyɛ

Ða-tɩŋa payɩ picoɖuu-ɖʋ nabʋyʋ taa nɛ ɖɩyɔɔdʋʋ tɔm ndʋ tɩtɩmʋna yɔ nɛ pʋwayɩ lɛ ɖikpiɖiɣ. (Yakubu 3:2) Ɩkalɩ Galaatii mba 5:22, 23; nɛ pʋwayɩ lɛ ɩtazɩ tɔm tʋnɛ tɩ-taa:

• Wɛtʋ kɩbandʋ tʋnɛ tɩ-taa lɛ, ndʋ ŋpɩzɩɣ nɛ ŋtɩmnɩ Ɛsɔ se ɛsɩnɩ-ŋ nɛ ŋwɛɛnɩ-tʋ nɛ pɩsa nɛ ŋtɩlɩ yɔɔdʋʋ camɩyɛ? Ɛzɩma wɛtʋ ndʋ tɩpɩzɩɣ nɛ tɩsɩnɩ-ŋ?

Ɩkalɩ 1 Kɔrɛntɩ mba 15:33, nɛ pʋwayɩ lɛ ɩtazɩ tɔm tʋnɛ tɩ-taa:

• Ña-taabalaa nɛ aleɣya wena ŋlakɩ yɔ, papɩzɩɣ nɛ pɛwɛɛnɩ ɖoŋ ñɔ-yɔɔdaɣ yɔɔ. Ðoŋ weyi?

Ɩkalɩ Eklezɩyasɩtɩ 3:1, 7; nɛ pʋwayɩ lɛ ɩtazɩ tɔm tʋnɛ tɩ-taa:

• Wɛtʋ ndʋ taa pɩpɔzʋʋ se ɖisu tamɩyɛ yaa ɖiyele nɛ pʋwayɩ lɛ ɖɩñɩnɩ alɩwaatʋ ndʋ tɩmʋnaa yɔ nɛ ɖɩyɔɔdɩ?

5. Yɔɔdʋʋ tɔm kɩbandʋ lalaa yɔɔ

VIDEO: Yɔɔdɩ tɔm ndʋ «tɩkpazɩɣ ɛyʋ ɖoŋ» yɔ (4:07)

• Koobu abalɩñɩnʋ weyi pɔyɔɔdɩ ɛ-tɔm video taa yɔ, ɛbɛ ɛkɔma nɛ eɖiɣzina?

• Ɛbɛ ɛlaba nɛ pɩsɩnɩ-ɩ nɛ ɛlɛɣzɩ?

Ɩkalɩ Eklezɩyasɩtɩ 7:16, nɛ pʋwayɩ lɛ ɩtazɩ tɔm tʋnɛ tɩ-taa:

• Ye pɩtakɩɣ-ɖʋ se ɖɩyɔɔdɩ tɔm kɩdɛkɛdɩtʋ nɔɔyʋ yɔɔ yɔ, ɛbɛ yɔɔ pɩwɛɛ se ɖɩtɔzɩ?

Ɩkalɩ Eklezɩyasɩtɩ 7:21, 22; nɛ pʋwayɩ lɛ ɩtazɩ tɔm tʋnɛ tɩ-taa:

• Ye nɔɔyʋ ɛyɔɔdɩ tɔm kɩdɛkɛdɩtʋ ñɔ-yɔɔ yɔ, ɛzɩma masɩ sɩnɛ sɩkaɣ-ŋ sɩnʋʋ se ŋtaakɔ pana?

6. Yɔɔdɩnɩ ñɔ-hɔʋ taa mba nɛ nɔɔ kɩbaŋa

VIDEO: Sɔɔlɩm nɛ ñamtʋ yeki nɛ nɔɔ kʋɖʋmaɣ wɛɣ hɔŋ taa (3:08)

• Ɛbɛ pɩzɩɣ pɩsɩnɩ-ŋ nɛ ŋyɔɔdɩnɩ ñɔ-hɔʋ taa mba nɛ nɔɔ kɩbaŋa?

Ɩkalɩ Efɛɛzɩ mba 4:31, 32; nɛ pʋwayɩ lɛ ɩtazɩ tɔm tʋnɛ tɩ-taa:

• Tɔm ndʋ ɖɩpɩzɩɣ nɛ ɖɩyɔɔdɩ nɛ pɩkpazɩ ɖɔ-hɔʋ taa mba ?

Yehowa kaalɩzɩ sɔɔlɩm mbʋ ɛwɛnɩ ɛ-Pɩyalʋ yɔɔ yɔ nɛ ɛwɩlɩ. Ɩkalɩ Maatiyee 17:5, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛzɩma ŋpɩzɩɣ nɛ ŋmaɣzɩnɩ Yehowa alɩwaatʋ ndʋ ŋyɔɔdʋʋnɩ ñɔ-hɔʋ taa mba yɔ?

TOBI LƐ

Tɔm ndʋ ɖɩyɔɔdʋʋ yɔ tɩpɩzɩɣ nɛ tɩkpazɩ lalaa ɖoŋ yaa piyele nɛ pitibi-wɛ yɔɔɔ. Pɩcɛyaa se ɖɩmaɣzɩ tɔm ndʋ ɖɩyɔɔdʋʋ yɔ, alɩwaatʋ ndʋ ɖɩyɔɔdʋʋ-tʋ yɔ nɛ ɛzɩma ɖɩyɔɔdʋʋ-tʋ yɔ pɩ-yɔɔ.

Tɔm taa tazʋʋ

• Nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋyɔɔdɩ tɔm ndʋ tɩkpazɩɣ lalaa ɖoŋ yɔ?

• Tɔm ndʋ ŋtɩsɔɔlɩ se ŋyɔɔdɩ?

• Ɛbɛ pɩzɩɣ pɩsɩnɩ-ɖʋ nɛ paa ɛzɩmtaa lɛ, ɖɩyɔɔdʋʋnɩ lalaa nɛ nɔɔ kɩbaŋa?

WONDU LƐƐTƲ

Ɛbɛ pɩzɩɣ pɩsɩnɩ-ɖʋ nɛ ɖɩyɔɔdʋʋ tɔm ndʋ tɩkpazɩɣ lalaa ɖoŋ yɔ?

Wɛɛnɩ lɔŋsɩnɖʋ nzʋlʋmɩyɛ (8:04)

Kalɩ nɛ ŋna mbʋ pɩpɩzɩɣ nɛ pɩsɩnɩ-ŋ nɛ ŋse tɔm kɩdɛkɛdɩtʋ yɔɔdʋʋ yɔ.

«Est-ce vraiment mal d’être grossier?» (Intɛrnɛɛtɩ yɔɔ tɔm ñʋʋ)

Cɔna nɛ ŋna mbʋ pɩpɩzɩɣ nɛ pɩsɩnɩ-ŋ nɛ ŋtaatɔlɩ kɔlɔmɔtʋ kpaca taa yɔ.

Ɛzɩma manpɩzɩɣ mala nɛ mense ɛyaa tɔm yɔɔdʋʋ? (2:36)

Kalɩ nɛ ŋna ɛzɩma Yehowa sɩnɩ abalʋ nɔɔyʋ nɛ eyele yɔɔdʋʋ tɔm kɩdɛkɛdɩtʋ yɔ.

«J’ai sérieusement réfléchi à ce que je faisais de ma vie» (La Tour de Garde, 1^er août 2013)