TƆM KƖKPƐLƖKƖTƲ 44
Ɛzɩ kazandʋ tɩŋa kɛdɩɣnɩ Ɛsɔ?
Yehowa sɔɔlaa se ɖɩnɩɩ wezuu leleŋ nɛ halɩ nabʋyʋ taa ɛsɔɔlaa se ɖɩlakɩ kazandʋ. Ɛlɛ ɛzɩ kazandʋ tɩŋa kɛdɩɣnɩ-ɩ? Ɛzɩma ɖɩpɩzɩɣ nɛ ɖɩwɩlɩ ɖɔ-sɔɔlɩm Yehowa kazandʋ tɔɔʋ hɔɔlʋʋ taa?
1. Ɛbɛ yɔɔ kazandʋ sakɩyɛ ɩɩkɛdɩɣnɩ Yehowa?
Pɩpɩzɩɣ nɛ pɩɖɩɣzɩ-ŋ se kazandʋ sakɩyɛ kaɖɩɣnɩ tɔm ndʋ Masɩ wɩlɩɣ yɔ yaa tɩlɩnɩ sɩɩnaa latʋ taa. Nɔɔ kʋɖʋmaɣ nakɛyɛ wɛ kazandʋ ndʋ nɛ cɛtɩm Ɛsɔ sɛtʋ pɛ-hɛkʋ taa. Pɩtɩla, tɩsandɩɣ feziŋ kɩdɛkɛdɩŋ yaʋ yaa cɛtɩm wɩlɩtʋ ndʋ tɩtɔŋ se ɛyʋ kalɩzaɣ ɛɛsɩkɩ yɔ. Kazandʋ natʋyʋ ɖɔɖɔ sandɩɣ cɛtɩm tisuu yaa ñʋʋ leleŋ tɛ ɛsɔ. (Izaayii 65:11) Yehowa paɣ ɛ-sɛyaa se: «Ɩkɛzɩ mɩ-tɩ nɛ hɔɔlʋʋ nɛ iyele tukunuu azuluma pʋyʋ.»—2 Kɔrɛntɩ mba 6:17.a
2. Suwe Yehowa maɣzɩɣ kazandʋ ndʋ tɩɖʋʋ hɩɖɛ ɛyaa kadadayaɣ yɔ tɩ-yɔɔ?
Yehowa paɣ-ɖʋ se «[ɖɩtaataa] ɛyaa yem liu.» (Kalɩ Yereemii 17:5.) Kazandʋ natʋyʋ ɖʋʋ hɩɖɛ ñʋndɩnaa yaa sɔɔjanaa. Lɛɛtʋ seɣtiɣ ɛyaa se pɛsɛɛ pɛ-ɛjaɖɛ kɩɖaʋ kɛdɛɛka yaa evemiye nɖɩ pɛ-ɛjaɖɛ hiɣ tɩ-yɔɔ wɛʋ waɖɛ yɔ. (1 Yohanɛɛsɩ 5:21) Lɛɛtʋ ɖɔɖɔ seɣtiɣ ɛyaa se paɖʋ nesi politiki agbaa yaa agbaa wena alʋkɩ ɛyaa wala ndɩ ndɩ yɔɔ yɔ. Ye ɖɩɖʋʋ hɩɖɛ kadadayaɣ ɛyʋ nɔɔyʋ yaa ɛgbɛyɛ naɖɩyɛ kɔzɩ kɔzɩ ye ɛgbɛyɛ nɖɩ ɖɩsandɩɣ lɩmaɣza wena akaɖɩɣnɩ Yehowa tamaɣ yɔ, ɛzɩma pɩlakɩ-ɩ?
3. Lakasɩ nzɩ pɩzɩɣ siyele nɛ kazandʋ natʋyʋ ɛɛkɛdɩɣnɩ Ɛsɔ?
Bibl yɔɔdaa se «sʋlʋm ñɔʋ kadadayaɣ, kazandʋ ndʋ tɩ-taa pɛɖɛlɛsɩɣ niye yɔ, [nɛ] ahela labʋ sʋlʋm ñɔʋ taa» pɛkɛ kɩwɛɛkɩm. (1 Pɩyɛɛrɩ 4:3) Kazandʋ natʋyʋ taa peseɣtiɣ ɛyaa se pɔñɔɔ sʋlʋm kadadayaɣ yaa se pacaɣ kʋzʋʋ kɩdɛkɛdʋʋ wezuu. Pɩsa nɛ ɖiwolo pɩ-yɔɔ nɛ ɖɩkɛ Yehowa taabalaa lɛ, pɩwɛɛ se ɖiposi ɖa-tɩ nɛ lakasɩ nzɩ sipisiɣ ɛyʋ yɔ.
TAZƖ NƐ PILIMI
Tazɩ nɛ ŋna mbʋ ɖɩpɩzɩɣ ɖɩla nɛ ɖɩkpaɣ lɩmaɣza kɩbana kazandʋ tɔɔʋ hɔɔlʋʋ taa nɛ ɖɔ-tɔm kɛdɩnɩ Yehowa yɔ.
4. Se kazandʋ ndʋ tɩɩkɛdɩɣnɩ Yehowa yɔ
Ɩkalɩ Efɛɛzɩ mba 5:10, nɛ pʋwayɩ lɛ ɩtazɩ tɔm tʋnɛ tɩ-taa:
Ɛbɛ taa pɩwɛɛ se ŋtazɩ pʋcɔ nɛ ŋkpaɣ lɩmaɣzɩyɛ se ŋtɔkɩ kazandʋ natʋyʋ yaa ŋŋtɔkɩ-tʋ?
Kazandʋ ndɩ ndɩ ndʋ ɛyaa sakɩyɛ tɔkɩ mi-egeetiye taa?
Ŋmaɣzɩɣ se kazandʋ ndʋ tɩkɛdɩɣnɩ Yehowa?
Kɩɖaʋ nakʋyʋ yɔ: Wiɖiyi ŋtɛm ña-tɩ pɔzʋʋ se Ɛsɔ maɣzɩɣ suwe lʋlʋʋ kazandʋ yɔɔ? Bibl taa, Yehowa sɛyʋ nɔɔyʋ tɩtɔɔ ɛ-lʋlʋʋ kazandʋ, ɛlɛ kɩyɔɔdɩ ɛyaa naalɛ tɔm se pɔtɔɔ pa-lʋlʋʋ kazandʋ; nɛ ɛyaa mba patɩkɛ Yehowa sɛyaa. Ɩkalɩ Kiɖe Tɛɛ Tɔm 40:20-22 nɛ Maatiyee 14:6-10, nɛ pʋwayɩ lɛ ɩtazɩ tɔm tʋnɛ tɩ-taa:
Nɔɔ kʋɖʋmaɣ ŋga wɛ lʋlʋʋ kazandʋ ndʋ tɩ-naalɛ tɩ-hɛkʋ taa?
Ɛzɩma Bibl kɛdɛsɩ sɩnɛ sɩsɩɣnɩ-ɖʋ se ɖɩtɩlɩ lɩmaɣza wena Yehowa wɛnɩ lʋlʋʋ kazandʋ yɔɔ yɔ?
Ɛlɛ ŋpɩzɩɣ nɛ ŋpɔzɩ ña-tɩ se: «Yehowa ɛsɩndaa lɛ ɛzɩ pɩkɛ kɩwɛɛkɩm toovenim se mɔntɔɔ lʋlʋʋ kazandʋ yaa kazandʋ lɛɛtʋ ndʋ tɩkaɖɩɣnɩ Masɩ yɔ?» Ɩkalɩ Ejipiti Lɩʋ 32:1-8, nɛ ɩcɔnɩ VIDEO. Pʋwayɩ lɛ, ɩtazɩ tɔm tʋnɛ tɩ-taa.
Ɛbɛ yɔɔ pɩwɛɛ se ɖɩñɩnɩ nɛ ɖɩna se kazandʋ natʋyʋ kɛdɩɣnɩ Yehowa yaa tɩɩkɛdɩɣnɩ-ɩ?
Ɛzɩma ɖɩpɩzɩɣ nɛ ɖɩla mbʋ?
Ɛzɩma ɖɩpɩzɩɣ nɛ ɖɩtɩlɩ se kazandʋ natʋyʋ kɛdɩɣnɩ Ɛsɔ yaa tɩɩkɛdɩɣnɩ-ɩ?
Tɩlabɩ nɔɔ kʋɖʋmaɣ nɛ wɩlɩtʋ ndʋ tɩkaɖɩɣnɩ Bibl yɔ? Pɩsa nɛ ŋtɩlɩ lɛ, ñɩnɩ ɖenɖe kazandʋ ndʋ tɩlɩnaa yɔ.
Tɩɖʋʋ hɩɖɛ kadadayaɣ ɛyaa nabɛyɛ, agbaa naayɛ, kɩɖaʋ kɛdɛɛka yaa ɛjaɖɛ wondu lɛɛtʋ na? Yehowa ɖɩhaɣ samtʋ ndʋ tɩkpaɖaa yɔ nɛ e-ɖeke ɖɩtaɣ liu se ɛkaɣ ñɔɔzʋʋ mbʋ mbʋ payɩ pɩwɛɛkɩ ɛjaɖɛ yɔɔ yɔ.
Palakɩ tɩ-taa lakasɩ nzɩ sɩkaɖɩɣnɩ Bibl paɣtʋ yɔ? Pɩwɛɛ se ɖɩwɛɛ kele kele ɖe-wezuu caɣʋ taa.
5. Sɩnɩ ɛyaa lalaa nɛ paña ñe-tisuu
Ye lalaa ɩñɩkɩɣ ñɔ-yɔɔ se ŋla mbʋ pɩɩkɛdɩɣnɩ Yehowa yɔ, pɩpɩzɩɣ nɛ pɩwɛɛ kaɖɛ se ŋɖɔkɩ kpam. Ðʋ suuɖu nɛ ŋlɩzɩ-wɛ ña-lɩmaɣza taa nɛ nɔɔ kɩbaŋa. Pɩsa nɛ ŋna kɩɖaʋ ŋgʋ kɩpɩzɩɣ nɛ kɩsɩnɩ-ŋ nɛ ŋla mbʋ yɔ lɛ, ɖɩcɔnɩ VIDEO.
Ɩkalɩ Maatiyee 7:12, nɛ pʋwayɩ lɛ ɩtazɩ tɔm tʋnɛ tɩ-taa:
Ɛzɩ Bibl mayaɣ kanɛ kawɩlʋʋ yɔ, ɛzɩ ŋpɩzɩɣ nɛ ŋheyi ñɔ-hɔʋ taa mba se pataatɔɔ kazandʋ natʋyʋ yaa we?
Ɛzɩma ŋpɩzɩɣ nɛ ŋsɩnɩ ñɔ-hɔʋ taa mba nɛ panɩɩ pɩ-taa se paa ŋŋkpɛndɩɣ pɔ-yɔɔ se ña nɛ wɛ ɩtɔɔ kazandʋ natʋyʋ yɔ, ŋsɔɔlɩ-wɛ?
6. Yehowa sɔɔlaa se ɖɩwɛɛ taa leleŋ taa
Yehowa sɔɔlaa se ɖa nɛ ɖɔ-hɔʋ taa mba nɛ ɖa-taabalaa ɖikpeɣliɣ nɛ ɖɩmʋʋ helim nɛ ɖɩnɩɣ leleŋ. Ɩkalɩ Eklezɩyasɩtɩ 8:15, nɛ pʋwayɩ lɛ ɩtazɩ tɔm tʋnɛ tɩ-taa:
Ɛzɩma mayaɣ kanɛ kawɩlɩɣ se Yehowa sɔɔlaa se ɖɩwɛɛ taa leleŋ taa?
Yehowa sɔɔlaa se ɛ-sɛyaa ɩkpɛndɩɣ nɛ peleɣyiɣ nɛ pamʋʋ helim. Ɩcɔnɩ VIDEO nɛ ɩna ɛzɩma tɔm ndʋ tɩkɛ toovenim alɩwaatʋ ndʋ ɖɩlakɩ ajɛɛ kigbeɣliŋ yɔ.
Ɩkalɩ Galaatii mba 6:10, nɛ pʋwayɩ lɛ ɩtazɩ tɔm tʋnɛ tɩ-taa:
Pɩcɛyaa se ɖɩtɔɔ kazandʋ ndʋ ɛyaa tɩŋa tɔkɩ yɔ pʋcɔ nɛ ɖɩla lalaa «mbʋ pɩwɛ ɖeu yɔ?»
Kʋjɔŋ weyi haɣ-ŋ taa leleŋ nɛ pɩkɩlɩ: Weyi ŋlakɩ-ɩ mbʋ pʋyɔɔ yɔ kazandʋ natʋyʋ yɔɔ lɛ pɩcɛyaa se ŋlabɩ-ɩ yɔ, yaa weyi ŋlakɩ-ɩ nɛ ña-laŋɩyɛ faaa yɔ?
Yehowa Aseɣɖe Tɩnaa sakɩyɛ ñɩnɩɣ alɩwaatʋ natʋyʋ nɛ pa nɛ pe-piya pɔtɔkɩ kazandʋ nɛ halɩ palakɩ-sɩ kʋjɔŋ alɩwaatʋ ndʋ sɩtɩɖʋna yɔ. Ye ŋwɛnɩ piya yɔ, ɛbɛ nɛ ɛbɛ ŋpɩzɩɣ nɛ ŋlabɩ-sɩ nɛ pɩha-sɩ taa leleŋ?
NABƐYƐ YƆƆDƲƲ SE: «Ðenɖe kazandʋ natʋyʋ lɩnaa yɔ pɩ-tɔm tɩcɛyɩ. Mbʋ pɩ-tɔm cɛyaa yɔ lɛ se pɩhaɣ waɖɛ hɔʋ taa mba nɛ taabalaa se pekpeɣli nɛ pamʋ helim.»
Ŋmaɣzɩɣ suwe?
TOBI LƐ
Yehowa sɔɔlaa se ɖa nɛ ɖɔ-hɔʋ taa mba nɛ ɖa-taabalaa ɖɩmʋʋ helim nɛ ɖɩnɩɣ leleŋ. Ɛlɛ ɛsɔɔlaa ɖɔɖɔ se ɖise kazandʋ ndʋ tɩɩkɛdɩɣnɩ-ɩ yɔ.
Tɔm taa tazʋʋ
Tɔm ndʋ ɖɩpɩzɩɣ nɛ ɖɩpɔzɩ ɖa-tɩ nɛ ɖɩtɩlɩ se kazandʋ natʋyʋ kɛdɩɣnɩ Yehowa yaa tɩɩkɛdɩɣnɩ-ɩ?
Ɛzɩma ɖɩpɩzɩɣ nɛ ɖɩsɩnɩ ɖɔ-hɔʋ taa mba nɛ ɖa-taabalaa nɛ panɩɩ lɩmaɣza wena ɖɩkpaɣ kazandʋ hɔɔlʋʋ taa yɔ a-taa?
Ɛzɩma ɖɩlaba nɛ ɖɩna se Yehowa sɔɔlaa se ɖɩwɛɛ taa leleŋ taa nɛ ɛsɔɔlaa ɖɔɖɔ se ɖɩmʋʋ helim?
WONDU LƐƐTƲ
Kalɩ nɛ ŋna kazandʋ ndʋ Krɩstʋ mba ɩɩtɔkɩ yɔ tɩ-taa natʋyʋ.
«Pourquoi les Témoins de Jéhovah ne célèbrent-ils pas certaines fêtes?» (Intɛrnɛɛtɩ yɔɔ tɔm ñʋʋ)
Kalɩ nɛ ŋna lɩmaɣza naanza wena awɩlɩɣ se lʋlʋʋ kazandʋ ɛɛkɛdɩɣnɩ Ɛsɔ yɔ.
«Ɛbɛ yɔɔ Yehowa Aseɣɖe Tɩnaa ɩɩtɔkɩ lʋlʋʋ kazandʋ?» (Intɛrnɛɛtɩ yɔɔ tɔm ñʋʋ)
Cɔna nɛ ŋna ɛzɩma piya nzɩ sɩsɔɔlɩ Yehowa yɔ sɩpɩzɩɣ sɩla nɛ sɩ-tɔm kɛdɩnɩ Yehowa kazandʋ alɩwaatʋ taa yɔ.
Krɩstʋ mba miiliyɔɔwaa sakɩyɛ lɩzaa se paatɔkɩ kisimasɩ kazandʋ. Pamaɣzɩɣ suwe lɩmaɣzɩyɛ nɖɩ pakpaɣaa yɔ ɖɩ-yɔɔ?
«Ils ont trouvé mieux» (La Tour de Garde, 1er décembre 2012)
a Kalɩ Tɩnaɣ yɔɔ tɔm 5 nɛ ŋna mbʋ ŋpɩzɩɣ nɛ ŋla kazandʋ natʋyʋ hɔɔlʋʋ taa yɔ.