Tɩlɩ lone nɖɩ Yesu wɛnɩ Ɛsɔ ɖʋtʋ taa yɔ

“ÐOOO kiɖe tɛɛ lɛ Ɛsɔ lɩzɩ ɛsɔdaa nɛ tataa,” nɛ mbʋ pɩtɩŋa payɩ ɛɛlaba yɔ, “pɩɩwɛ ɖeu pɩdɩɩfɛyɩ.” (Kiɖe 1:1, 31) Yehowa lɩzɩ ɛyaa nɛ ɛha-wɛ lidaʋ kɩbaŋʋ cee wayɩ yɔɔ. Pɔkɔm nɛ pakʋyɩ Yehowa yɔɔ Edɛɛnɩ kaɖaɣ taa lɛ, wezuu caɣʋ kɩbaŋʋ ŋgʋ kɩsɩɩ tɩnaɣ. Ɛlɛ pɩɩwɛɣ mbʋ tam mbʋ pʋyɔɔ yɔ, kaɖʋwa ŋga kɔ-yɔɔ Ɛsɔ lɩzɩ tɛtʋ nɛ ɛyaa yɔ katɩlɛɣzɩ. Ɛsɔ yɔɔdaa se Aɖam sayɩnaa mba pɔɖɔŋ ɛ-paɣtʋ yɔɔ yɔ, pakaɣ hiɣu ñʋʋ yabɩtʋ. Pakaɣ ɖaɣnʋʋ sɩʋ toovenim Ɛsɔ sɛtʋ nɛ Ɛsɔ ɖɩzɩ kɩdɛkɛdʋʋ nɛ ɛkpɛndɩnɩ ɛ-tʋma. (Kiɖe 3:15) Piyeki nɛ pɩtɩŋa pɩɖaɣnɩ “ɖeu pɩdɩɩfɛyɩ.” Yehowa tɩŋɩɣnɩ ɛ-Pɩyalʋ Yesu Krɩstʋ yɔɔ nɛ ɛla mbʋ. (1 Yoh. 3:8) Pʋyɔɔ pɩcɛyaa se ɖɩtɩlɩ lone nɖɩ Yesu wɛnɩ Ɛsɔ ɖʋtʋ taa yɔ.—Tʋma 4:12; Fil. 2:9, 11.

LONE NÐƖ YESU WƐNA?

² Ðɩmaɣzɩɣ lone nɖɩ Yesu wɛnɩ Ɛsɔ ɖʋtʋ taa yɔ ɖɩ-yɔɔ lɛ, ɖɩnaɣ se ɛwɛnɩ tʋma sakɩyɛ. Yesu kɛ ɛyaa Ñʋʋ Yaɖʋ, Cɔjɔ Sɔsɔ, Krɩstʋ ɛgbɛyɛ Ñʋʋdʋ nɛ lɛɛlɛɛyɔ lɛ, Ɛsɔ Kewiyaɣ Wiyaʋ. Ye ɖɩmaɣzɩɣ tʋma ana a-yɔɔ yɔ, pɩsɩɣnɩ-ɖʋ nɛ ɖɩwɛɛnɩ ɛsɩmɩyɛ siŋŋ ɖʋtʋ ndʋ Ɛsɔ laba yɔ tɩ-yɔɔ; nɛ ɖɩsɔɔlɩ ɖɔɖɔ Krɩstʋ Yesu nɛ pɩkɩlɩ. Bibl tazɩ tʋma ana a-taa naayɛ taa.

³ Yesu kɔm tɛtʋ yɔɔ lɛ, ɛlabɩ tʋma sakɩyɛ. Ɛ-tʋma ana awɩlɩɣ se ɛ-yɔɔ pɩtɩŋɩɣna nɛ ɛyaa nɛ Ɛsɔ peceɣ. (Yoh. 14:6) Ɛzɩ ɛyaa Ñʋʋ Yaɖʋ yɔ, Yesu cɛlɩ e-wezuu nɛ ɛlaa kɩlaʋ se ɛya ɛyaa sakɩyɛ ñʋʋ. (Mat. 20:28) Ye mbʋ pɩtasɩna se Yesu ha-ɖʋ kɩɖaʋ kɩbaŋʋ Ɛsɔ paɣtʋ yɔɔ ɖɔm nʋmɔʋ taa lɛ, e-ɖeke ɛ-yɔɔ Ɛsɔ kaɣ tɩŋnʋʋ nɛ kaɖʋwa ŋga ɛwɛnɩ ɛyaa yɔɔ yɔ kala. E-ɖeke ɛ-yɔɔ pɩtɩŋɩɣna nɛ ɖihiɣ Ɛsɔ lootiye. (Tʋma 5:31; 2 Kɔr. 5:18, 19) Yesu sɩbɩ kɩlaʋ sɩm nɛ pefezi-i, nɛ mbʋ hanɩ ɛyaa mba pɔɖɔŋ Ɛsɔ paɣtʋ yɔɔ yɔ waɖɛ se pehiɣ tamtam wazasɩ Ɛsɔ Kewiyaɣ tɛɛ.

⁴ Yesu kɛ Cɔjɔ Sɔsɔ, ye mbʋ ‘ɛnɩɣ ɖɛ-ɛjandʋ taa’ nɛ eyeki se pekpeɣ ɛ-wayɩ tɩŋɩyaa mba pɛwɛ tɛtʋ yɔɔ yɔ pa-kɩwɛɛkɩm. Apostoloo Pɔɔlɩ lɩzɩ pɩ-taa se: “Pɩtɩkɛ cɔjɔ sɔsɔ weyi ɛɛpɩzɩɣ nɛ ɛnɩɩ ɖɛ-ɛjandʋ taa yɔ ɖɩwɛna, ɛlɛ weyi pɩtakɩ-ɩ hɔɔlɩŋ tɩŋa taa ɛzɩ pɩtakʋʋ-ɖʋ yɔ ɛnʋ ɖɩwɛna, ɛlɛ ɛfɛyɩnɩ kɩwɛɛkɩm nabʋyʋ.” Pɔɔlɩ seɣti mba pɛwɛnɩ tisuu Yesu Krɩstʋ yɔɔ yɔ se peyele nɛ ɖʋtʋ ndʋ palaba se pɩtɩŋnɩ Yesu yɔɔ lɛ, pa nɛ Ɛsɔ peceɣ yɔ, tɩwazɩ-wɛ siŋŋ. Ɛyɔɔdaa se: “Ye mbʋ, iyele nɛ ɖɩtɩŋnɩ kaalɛyɩtʋ yɔɔdaɣ yɔɔ nɛ ɖɩñɔtɩnɩ lootiye kewiyaɣ kpelaɣ, nɛ papɩzɩ pana ɖa-pʋtɔdɩyɛ nɛ ɖihiɣ lootiye, nɛ pɩsɩnɩ-ɖʋ alɩwaatʋ kɩbandʋ yɔɔ.”—Ebr. 4:14-16; 1 Yoh. 2:2.

⁵ Yesu kɛ ɖɔɖɔ Krɩstʋ ɛgbɛyɛ Ñʋʋdʋ. Ɛzɩ pɩɩwɛʋ kajalaɣ pɩnzɩ mɩnʋʋ taa ɛ-wayɩ tɩŋɩyaa hɔɔlʋʋ taa yɔ, pɩtɩpɔzɩ se ɖa ɖɔɖɔ ɖɩwɛɛnɩ ñʋʋdʋ weyi ɛkɛ ɛyʋ yɔ. Yesu tɩŋɩɣnɩ fezuu kiɖeɖeu nɛ ɛyaa mba ɛsɩ-wɛ ɛzɩ ninɖiɣyaa yɔ pɔ-yɔɔ nɛ eɖiyiɣ-ɖʋ; ɛyaa mba pakaɣ labʋ akɔnta ɛ nɛ ɛ-Caa ɛzɩma pɔcɔŋnɩ Ɛsɔ wondu yɔɔ yɔ pɩ-yɔɔ. (Ebr. 13:17; 1 Pɩy. 5:2, 3) Yehowa yɔɔdaɣ Yesu tɔm natʋ natʋyʋ taa lɛ, ɛtɔm se: “Ɩna, mɛncɛlɩ-ɩ se ɛkɛ ɛyaa aseɣɖe tʋ, ajɛɛ wiyaʋ nɛ [wɩlɩyʋ].” (Iza. 55:4) Yesu yeba nɛ natʋ tɔm tʋnɛ tɩla alɩwaatʋ ndʋ eheyi ɛ-wayɩ tɩŋɩyaa se: “Itaayele ɖɔɖɔ nɛ payaa-mɩ se ɖiyiyaa, mbʋ pʋyɔɔ yɔ ɩwɛnɩ Ðiyiyu kʋɖʋm, ɛnʋ lɛ Krɩstʋ” yɔ.—Mat. 23:10.

⁶ Yesu wɛnɩ lɩmaɣza kɩbana ɖɔ-yɔɔ nɛ ɛsɔɔlɩ faaa se ɛsɩnɩ-ɖʋ, pʋyɔɔ lɛ ɛyaɣ-ɖʋ nɛ ɛtɔŋ se: “Ɩkɔɔ mɔn-cɔlɔ, mɩ mba payɩ ɩlakɩ kʋñɔŋ nɛ sʋʋtʋ nɩ-mɩ yɔ, nɛ mankaɣ hɛzʋʋ mɩ-laŋa. Ɩkpaɣ man-sʋʋtʋ ɖaʋ nɛ ɩhɔɔlɩ nɛ ɩkpɛlɩkɩ mɔn-cɔlɔ, mbʋ pʋyɔɔ yɔ mɛnkɛ laŋɩyɛ hɛɛɛ tʋ nɛ moluzuu man-tɩ, nɛ ɩkaɣ hiɣu laŋɩyɛ hɛzʋʋ. Mbʋ pʋyɔɔ yɔ man-sʋʋtʋ ɖaʋ fɛyɩ yuŋ, nɛ man-sʋʋtʋ wɛ hʋnjaŋ.” (Mat. 11:28-30) Ɛzɩma Yesu ɖiyiɣ Krɩstʋ ɛgbɛyɛ nɛ hɛɛɛ wɛtʋ nɛ ɛhaɣ-ɖʋ laŋɩyɛ hɛzʋʋ yɔ, pɩwɩlaa se ɛnʋ kɛnɩnɩ “ninɖiɣyu kɩbanʋ” nɛ ɛmaɣzɩɣnɩ ɛ-Caa Yehowa weyi ɛwɛ ɛsɔdaa yɔ.—Yoh. 10:11; Iza. 40:11.

⁷ Kɔrɛntɩ mba takayaɣ kajalaɣ ñɩŋga taa, Pɔɔlɩ yɔɔdɩ Yesu Krɩstʋ tʋma hɔɔlʋʋ lɛɛkʋ tɔm nɛ ɛtɔ se: “Pɩwɛɛ se ɛtɔɔ kewiyitu nɛ pɩkɔɔ pɩtalɩ alɩwaatʋ ndʋ Ɛsɔ sɩ koyindinaa kpeekpe ɛ-nɩŋgbanzɩ tɛɛ yɔ. Ɛlɛ alɩwaatʋ ndʋ poluzuu wondu tɩŋa ɛ-tɛɛ yɔ, Pɩyalʋ maɣmaɣ kaɣ ɛ-tɩ luzuu ɖɔɖɔ Weyi eluzi wondu tɩŋa ɛ-tɛɛ yɔ ɛ-tɛɛ, se Ɛsɔ ɛkɛ pɩtɩŋa paa anɩ.” (1 Kɔr. 15:25, 28) Pʋcɔ nɛ Yesu kɔŋ tɛtʋ yɔɔ lɛ, ɛɛkɛ Ɛsɔ “tʋmlaɖʋ” kɩbanʋ, ɛnʋ lɛ kajalaɣ tʋ weyi Ɛsɔ lɩzaa yɔ. (Adu. 8:22-31) Alɩwaatʋ ndʋ petiyi Yesu tɛtʋ yɔɔ yɔ, Ɛsɔ sɔɔlɩm ɖeke ɛlaba. Ɛɖɔkɩ e-siɣsiɣ wɛtʋ, halɩ pɩkpɛndɩnɩ takɩm sɔsɔm taa nɛ ɛla ɛ-Caa sɔɔlɩm pɩkɔɔ pɩtalɩ ɛ-sɩm wiye. (Yoh. 4:34; 15:10) Ɛsɔ Pɩyalʋ ɖɔkɩ e-siɣsiɣ wɛtʋ halɩ ɛkɔɔ nɛ ɛsɩ, pʋyɔɔ Ɛsɔ fezi-i nɛ ɛkpa ɛsɔdaa nɛ ɛha-ɩ waɖɛ se ɛpɩsɩ e-Kewiyaɣ Wiyaʋ. (Tʋma 2:32-36) Pɩwɩlɩɣ se Yesu Krɩstʋ pɩsɩ Ɛsɔ tiyiyaa miiliyaarɩwaa sakɩyɛ ñʋʋdʋ nɛ ɛ nɛ wɛ pakaɣ labʋ nɛ ɛyaa kewiyitu tɔɔʋ sɩɩ tɩnaɣ nɛ pahɩzɩ ɛjaɖɛ yɔɔ kɩdɛkɛdɩm kpeekpe. (Adu. 2:21, 22; 2 Tes. 1:6-9; Natʋ 19:11-21; 20:1-3) Ðɩnɛ ɛlɛ Krɩstʋ weyi ɛkɛ Ɛsɔ Kewiyaɣ Wiyaʋ yɔ, e-ɖeke ɛkaɣnɩ ɖiyuu ɛjaɖɛ kpeekpe.—Natʋ 11:15.

YE PƆTƆM SE ÐƖTƖLƖ LONE NÐƖ YESU WƐNA YƆ, PƲ-TƆBƲƲ LƐ SUWE?

⁸ Yesu Krɩstʋ weyi ɛkɛ ɖa-Kɩɖaʋ yɔ, ɛtalɩ pilim. Paɖʋ-ɩ tʋmɩyɛ se ɛcɔnɩ ɖɔ-yɔɔ. Pɩsa nɛ ɛzɩma ɛcɔŋnɩ ɖɔ-yɔɔ nɛ sɔɔlɩm yɔ pɩkɔnɩ-ɖʋ wazasɩ lɛ, pɩwɛɛ se ɖɩwɛɛ siɣsiɣ Yehowa ɛsɩndaa nɛ ɖɩñɔɔnɩ ɛ-ɛgbɛyɛ nɖɩ ɖɩwɛɛ nɛ ɖiwokini ɛsɩndaa yɔ kpam.

⁹ Kajalaɣ pɩnzɩ mɩnʋʋ taa, Yesu wayɩ tɩŋɩyaa ɩɩsɩm lone nɖɩ Krɩstʋ wɛnɩ Ɛsɔ ɖʋtʋ taa yɔ. Pʋyɔɔ petisaa nɛ pala nɔɔ kʋɖʋmaɣ nɛ poluzi pa-tɩ Krɩstʋ tɛɛ nɛ ɛlɛ ɖiyiɣ-wɛ pɩtɩŋnɩ fezuu kiɖeɖeu yɔɔ. (Tʋma 15:12-21) Apostoloo Pɔɔlɩ yɔɔdaɣ nɔɔ kʋɖʋmaɣ ŋga kɛwɛ ɛgbɛyɛ taa Krɩstʋ ñɩma patam numwaa hɛkʋ taa yɔ kɔ-tɔm lɛ, ɛtɔm se: “Ɛzɩma ɖɩyɔɔdʋʋ toovenim yɔ pʋyɔɔ lɛ, iyele nɛ ɖɩtɩŋnɩ sɔɔlɩm yɔɔ nɛ ɖɩpaɣlɩ pɩtɩŋa pɩ-taa Krɩstʋ weyi ɛkɛ ñʋʋdʋ yɔ ɛ-taa. Ɛ-yɔɔ pɩtɩŋnaa nɛ tomnaɣ tɩŋa kpɛndɩ camɩyɛ nɛ kala nɔɔ kʋɖʋmaɣ pɩtɩŋnɩ paa ɖɩdanɖɛ nɖɩ ɖɩhaɣ-kɛ mbʋ pɩpɔzʋʋ yɔ ɖɩ-yɔɔ. Alɩwaatʋ ndʋ paa piliŋa ŋga lɛ kalakɩ tʋmɩyɛ camɩyɛ yɔ, piyeki se tomnaɣ ɛpaɣlɩ, mbʋ pʋyɔɔ yɔ kamaɣ ka-tɩ sɔɔlɩm taa.”—Efɛz. 4:15, 16.

¹⁰ Alɩwaatʋ ndʋ ɛgbɛyɛ taa ñɩma tɩŋa lakɩ tʋmɩyɛ nɔɔ kʋɖʋmaɣ taa nɛ petisiɣ se Yesu eɖiyi-wɛ yɔ, piyeki nɛ ɛgbɛyɛ ɖɛɛnɩ ɛsɩndaa, nɛ sɔɔlɩm mbʋ pɩkɛ “nɔɔ kʋɖʋmaɣ tomiye nɖɩ ɖɩtalɩ pilim yɔ,” pɩwɛɛ koobiya hɛkʋ taa.—Yoh. 10:16; Kol. 3:14; 1 Kɔr. 12:14-26.

¹¹ Lɛɣzɩtʋ ndʋ tɩwɛɛ nɛ tɩlakɩ ɛjaɖɛ yɔɔ ɛzɩ Bibl natʋ tɔm kaayɔɔdʋʋ yɔ, tɩwɩlɩɣ kpayɩ kpayɩ se pɩnaɣ 1914 taa pasɩ Yesu Krɩstʋ Wiyaʋ. Nɛ ɛtɔkɩ lɛɛlɛɛyɔ kewiyitu e-koyindinaa hɛkʋ taa. (Keɣsi 2:1-12; 109:1, 2) Wazaɣ ŋga mba pɛwɛ tɛtʋ yɔɔ yɔ pakaɣ hiɣu? Pɩkazɩ pazɩ, Yesu kaɣ wɩlʋʋ se ɛkɛ awiya taa Wiyaʋ nɛ kɩbaɣlaa taa Kɩbaɣlʋ nɛ ɛhʋʋnɩ e-koyindinaa tɔm. (Natʋ 11:15; 12:10; 19:16) Nɛ pʋwayɩ lɛ, tamaɣ ŋga Ɛsɔ kaalabɩ alɩwaatʋ ndʋ pakʋyɩ ɛ-yɔɔ yɔ, kala nɛ pɩwazɩ mba pɛwɛ Krɩstʋ nɩwaŋ yɔɔ yɔ, pʋ-tɔbʋʋ se pehiɣ Ɛsɔ lootiye. (Mat. 25:34) Taa leleŋ siŋŋ pɩkɛnɩ-ɖʋ se ɖɩsɩm lone nɖɩ Krɩstʋ wɛnɩ Ɛsɔ ɖʋtʋ taa yɔ! Tɛtɛ pɩla mbʋ nɛ ɖiwolo pɩ-yɔɔ nɛ ɖiluzuu ɖa-tɩ nɛ ɖɩla nɔɔ kʋɖʋmaɣ nɛ ɖɩtɛzɩ tɔm susuu tʋmɩyɛ nɖɩ Krɩstʋ wɛɛ nɛ eɖiyiɣ ɛjaɖɛ kpeekpe yɔɔ kɛdɛzaɣ kɩyakɩŋ ɛnɛ ɩ-taa yɔ.