TƆM KƖKPƐLƖKƖTƲ 12
Ɛbɛ pɩzɩɣ pɩsɩnɩ-ŋ nɛ ŋwolo ñe-Bibl kpɛlɩkʋʋ yɔɔ?
Bibl kpɛlɩkʋʋ wɛ ɛzɩ nʋmɔʋ kɩbaŋʋ nakʋyʋ ɖɔm yɔ. Ɛlɛ ŋpɩzɩɣ nɛ ŋkatɩ kala nʋmɔʋ ŋgʋ kɩ-ɖɔm taa. Nabʋyʋ taa ŋpɩzɩɣ nɛ ŋpɔzɩ ña-tɩ se ɛzɩ ŋkaɣ pɩzʋʋ nɛ ŋwolo ñe-Bibl kpɛlɩkʋʋ yɔɔ? Ɛbɛ yɔɔ pɩcɛyaa se ŋñaɣ pana nɛ ŋwolo pɩ-yɔɔ? Paa ŋkatɩɣ kala yɔ, ɛbɛ kaɣ-ŋ sɩnʋʋ se ŋwolo pɩ-yɔɔ?
1. Ɛbɛ yɔɔ Bibl kpɛlɩkʋʋ tɔm cɛyaa?
«Ɛsɔ tɔm wɛ wezuu nɛ tɩwɛɛ ɖoŋ pɩŋŋ.» (Ebree mba 4:12) Bibl tɔm cɛyaa mbʋ pʋyɔɔ yɔ, kɩsɩɣnɩ-ŋ se ŋtɩlɩ Ɛsɔ nɛ lɩmaɣza wena ɛwɛnɩ ñɔ-yɔɔ yɔ. Kɩsɩɣnɩ-ŋ se ŋwɛɛnɩ tɩlɩtʋ, lɔŋsɩnɖɛ nɛ lidaʋ. Kɔzɩ kɔzɩ lɛ, Bibl sɩɣnɩ-ŋ se ŋkɛ Yehowa taabalʋ. Alɩwaatʋ ndʋ ŋkpɛlɩkɩɣ Bibl yɔ, ŋyeki se ɖoŋ weyi kɩwɛna yɔ, ɩlɛɣzɩ ñe-wezuu caɣʋ.
2. Ɛbɛ yɔɔ pɩcɛyaa se Bibl taa toovenim tɔm ɩmʋ ñɩm ñɛ-ɛsɩndaa?
Bibl taa toovenim tɔm wɛ ɛzɩ ñɩm sɔsɔm nabʋyʋ yɔ. Pʋyɔɔ Bibl seɣtiɣ-ɖʋ nɛ kɩtɔŋ se: «Ya toovenim nɛ taapɛdɩ-pʋ kpa.» (Aduwa 23:23) Ye ɖɩmaɣzɩɣ ɛzɩma Bibl taa toovenim mʋ ñɩm pɩdɩɩfɛyɩ yɔ pɩ-yɔɔ yɔ, ɖɩñakɩ pana nɛ ɖɩkpɛlɩkɩɣ-kʋ paa ɖɩkatɩɣ kala yɔ.—Kalɩ Aduwa 2:4, 5.
3. Ɛzɩma Yehowa pɩzɩɣ nɛ ɛsɩnɩ-ŋ nɛ ŋwolo kpɛlɩkʋʋ yɔɔ?
Yehowa kɛnɩ ña-Lɩzɩyʋ nɛ ña-Taabalʋ, ɛsɔɔlaa se ɛsɩnɩ-ŋ nɛ ŋsɩmɩ-ɩ. Ɛpɩzɩɣ nɛ ɛsɩnɩ-ŋ ‘nɛ ŋsɔɔlɩ nɛ ŋtɛ ŋwɛɛnɩ ɖoŋ se ŋla mbʋ payɩ ɛsɔɔlaa yɔ.’ (Kalɩ Filiipi mba 2:13.) Ye alɩwaatʋ natʋyʋ taa ŋfɛyɩnɩ ɖoŋ weyi pɩpɔzʋʋ se pɩsa nɛ ŋkpɛlɩkɩ yaa ŋlabɩnɩ tʋmɩyɛ tɔm ndʋ ŋkpɛlɩkaa yɔ, ɛpɩzɩɣ nɛ ɛsɩnɩ-ŋ. Ye ŋfɛyɩnɩ ɖoŋ weyi pɩpɔzʋʋ se ŋwɛɛna nɛ pɩsa nɛ ŋlʋbɩnɩ kala wena ŋkatɩɣ yɔ, ɛpɩzɩɣ nɛ ɛha-ŋ ɖoŋ ɛnɩ. Tɩmnɩ Yehowa ɖoŋ ɖoŋ se ɛsɩnɩ-ŋ nɛ ŋwolo pɩ-yɔɔ nɛ ŋkpɛlɩkɩ Bibl.—1 Tesalooniiki mba 5:17.
TAZƖ NƐ PILIMI
Tazɩ nɛ ŋna mbʋ pɩpɩzɩɣ nɛ pɩsɩnɩ-ŋ nɛ ŋwolo ñe-Bibl kpɛlɩkʋʋ yɔɔ paa ŋfɛyɩnɩ alɩwaatʋ yaa lalaa ɩkaɖɩɣnɩ-ŋ yɔ. Pʋwayɩ lɛ, ŋkaɣ naʋ ɖɔɖɔ ɛzɩma Yehowa pɩzɩɣ nɛ ɛsɩnɩ-ŋ nɛ ŋwolo kpɛlɩkʋʋ yɔɔ yɔ.
4. Ñe-Bibl kpɛlɩkʋʋ ɛkɛnɩ mbʋ pɩ-tɔm kɩlɩ cɛyʋʋ ñɛ-ɛsɩndaa yɔ
Alɩwaatʋ natʋyʋ taa, pɩɖɔkʋʋnɩ-ɖʋ siŋŋ nɛ pɩlakɩ-ɖʋ ɛzɩ alɩwaatʋ fɛyɩ se ɖɩkpɛlɩkɩ Bibl yɔ. Ɛbɛ pɩzɩɣ nɛ pɩsɩnɩ-ɖʋ wɛtʋ ndʋ tɩ-taa? Ɩkalɩ Filiipi mba 1:10, nɛ pʋwayɩ lɛ ɩtazɩ tɔm tʋnɛ tɩ-taa:
Ña-naʋ taa yɔ, ɛbɛ «tɔm kɩlɩ cɛyʋʋ» wezuu caɣʋ taa?
Ɛbɛ pɩwɛɛ se ŋla nɛ ñe-Bibl kpɛlɩkʋʋ kɛnɩ mbʋ pɩ-tɔm kɩlɩ cɛyʋʋ ñɛ-ɛsɩndaa yɔ?
Ye ŋcalɩ ɖʋʋ kañɩŋa tɔka taa yɔ, ŋŋkaɣ pɩzʋʋ nɛ ŋsuyi kaaŋ nɛ pɩcaɣ pɩ-taa camɩyɛ.
Ye ŋcalɩ ɖʋʋ kaaŋ yɔ, ŋkaɣ pɩzʋʋ nɛ ŋsuyi kañɩŋa nɛ pɩcaɣ pɩ-taa camɩyɛ. Mbʋ ɖɔɖɔ ye ŋsɩ «mbʋ pɩ-tɔm kɩlɩ cɛyʋʋ yɔ» kajalaɣ lone taa ñe-wezuu caɣʋ taa yɔ, ŋkaɣ pɩzʋʋ nɛ ŋlabɩ-pʋ nɛ ŋhiɣ ɖɔɖɔ alɩwaatʋ nɛ ŋla mbʋ pɩkazaa yɔ.
Bibl kpɛlɩkʋʋ sɩɣnɩ-ɖʋ se ɖɩcɔnɩ ɖe-fezuu taa kɩcɛyɩm ɖeɖe, pʋ-tɔbʋʋ lɛ se kɩcɛyɩm mbʋ ɖɩwɛna se ɖɩtɩlɩ Ɛsɔ nɛ ɖɩsɛɛ-ɩ yɔ. Ɩkalɩ Maatiyee 5:3, nɛ pʋwayɩ lɛ ɩtazɩ tɔm tʋnɛ tɩ-taa:
Ye Bibl kpɛlɩkʋʋ ɛkɛnɩ mbʋ pɩ-tɔm kɩlɩ cɛyʋʋ ɖɛ-ɛsɩndaa yɔ, wazasɩ nzɩ ɖihikiɣ?
5. Ðɔkɩ kpam paa pakaɖɩɣnɩ-ŋ yɔ
Nabʋyʋ taa, nabɛyɛ pɩzɩɣ nɛ peseɣti-ŋ se ŋyele Bibl kpɛlɩkʋʋ. Yele ɖɩna mbʋ pɩɩtalɩ Francesco yɔ. Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
Francesco heyi ɛ-taabalaa nɛ ɛ-hɔʋ taa mba mbʋ ɛwɛɛ nɛ ɛkpɛlɩkɩɣ yɔ pɩ-tɔm lɛ, ɛbɛ palaba?
Ɛɖɔkɩ kpam lɛ, wazasɩ nzɩ ehiɣaa?
Ɩkalɩ 2 Timootee 2:24, 25; nɛ pʋwayɩ lɛ ɩtazɩ tɔm tʋnɛ tɩ-taa:
Ñɔ-hɔʋ taa mba nɛ ña-taabalaa maɣzɩɣ suwe tɔm ndʋ ŋwɛɛ nɛ ŋkpɛlɩkɩɣ yɔ tɩ-yɔɔ?
Ɛzɩ masɩ sɩnɛ sɩwɩlʋʋ yɔ, ye nɔɔyʋ taa ɛfɛyɩ leleŋ mbʋ pʋyɔɔ yɔ ŋwɛɛ nɛ ŋkpɛlɩkɩɣ Bibl yɔ, ɛbɛ pɩwɛɛ se ŋla? Ɛbɛ yɔɔ?
6. Ñɔɔnɩ Yehowa nɛ ɛsɩnɩ-ŋ
Ðɩwɛɣ nɛ ɖɩñɔtʋʋnɩ Yehowa lɛ, ɖɩsɔɔlʋʋ se ɖɔ-tɔm ɛkɛdɩnɩ-ɩ nɛ pɩkɩlɩ. Paa mbʋ yɔ, pɩpɩzɩɣ nɛ pɩlabɩ-ɖʋ kaɖɛ se ɖɩla lɛɣzɩtʋ ndʋ pɩpɔzʋʋ yɔ. Ye pɩlakɩ-ŋ mbʋ yɔ, taayele nɛ pitibi-ŋ yɔɔɔ. Yehowa kaɣ-ŋ sɩnʋʋ. Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
Lɛɣzɩtʋ ndʋ Jim laba se pɩsa nɛ ɛ-tɔm kɛdɩnɩ Yehowa?
Ɛbɛ tukuni-ŋ ɛ-kɩɖaʋ kʋnɛ kɩ-taa?
Ɩkalɩ Ebree mba 11:6, nɛ pʋwayɩ lɛ ɩtazɩ tɔm tʋnɛ tɩ-taa:
Ɛbɛ Yehowa kaɣ labʋ ɛyaa «mba pañɩnɩɣ-ɩ siŋŋ yɔ,» pʋ-tɔbʋʋ se mba pañakɩ pana se patɩlɩ-ɩ nɛ pɔ-tɔm kɛdɩnɩ-ɩ yɔ?
Ɛbɛ pɩkpɛlɩkɩɣ-ŋ pɩlɩɩnɩ ɛzɩma pɩlakɩ Yehowa alɩwaatʋ ndʋ ŋñakɩ pana se ŋkpɛlɩkɩ Bibl yɔ pɩ-yɔɔ?
NƆƆYƲ PƖZƖƔ NƐ ƐPƆZƖ-Ŋ SE: «Ɛbɛ yɔɔ ŋwɛɛ nɛ ŋkpɛlɩkɩɣ Bibl?»
Ɛzɩma ŋkaɣ-ɩ cosuu?
TOBI LƐ
Paa pɩfɛyɩ kɛlɛʋ paa ɛzɩmtaa yɔ, Bibl kpɛlɩkʋʋ sɩɣnɩ-ŋ nɛ ŋnɩɩ wezuu leleŋ tam. Wolo pɩ-yɔɔ nɛ ŋñɔɔnɩ Yehowa nɛ ɛkaɣ-ŋ wazʋʋ.
Tɔm taa tazʋʋ
Ɛbɛ yɔɔ Bibl taa toovenim tɔm mʋ ñɩm ñɛ-ɛsɩndaa?
Ɛbɛ pɩzɩɣ nɛ pɩsɩnɩ-ŋ nɛ «ŋtɩlɩ mbʋ pɩ-tɔm kɩlɩ cɛyʋʋ yɔ»?
Ɛbɛ yɔɔ pɩwɛɛ se ŋpɔzɩ Yehowa se ɛsɩnɩ-ŋ nɛ ŋwolo Bibl kpɛlɩkʋʋ yɔɔ?
WONDU LƐƐTƲ
Kalɩ nɛ ŋna nʋmɔŋ naanza weyi ɩsɩnɩ ɛyaa sakɩyɛ se palabɩnɩ pa-alɩwaatʋ tʋmɩyɛ nɛ lɔŋsɩnɖɛ yɔ.
«Comment bien gérer son temps» (Réveillez-vous!, février 2014)
Cɔna nɛ ŋna ɛzɩma Yehowa sɩnɩ halʋ nɔɔyʋ alɩwaatʋ ndʋ ɛ-walʋ taanɩɣ mbʋ pɩ-yɔɔ ɛɛwɛɛ nɛ ɛñakɩ pana se ɛ-tɔm ɛkɛdɩnɩ Ɛsɔ yɔ pɩ-taa yɔ.
Cɔna nɛ ŋna ɛzɩma halʋ nɔɔyʋ ɖɔkɩ kpam nɛ pɩsɩnɩ ɛ-walʋ yɔ.
Nabʋyʋ taa nabɛyɛ yɔɔdʋʋ se Yehowa Aseɣɖe Tɩnaa kɔŋnɩ tayʋʋ hɔŋ taa. Ɛlɛ toovenim na?
«Yehowa Aseɣɖe Tɩnaa yɔkʋʋ hɔŋ kɩyɔkʋ yaa pasɩɣnɩ-ɩ se ɩkpa ɖoŋ?» (Intɛrnɛɛtɩ yɔɔ tɔm ñʋʋ)