TƆM KƖKPƐLƖKƖTƲ 19
Ɛzɩ Yehowa Aseɣɖe Tɩnaa kɛ toovenim Krɩstʋ mba na?
Yehowa Aseɣɖe Tɩnaa taa tɛma se pɛkɛ toovenim Krɩstʋ mba. Ɛbɛ yɔɔ? Yele nɛ ɖɩtazɩ ɖe-tisuu tigiɖe, hɩɖɛ nɖɩ ɖɩwɛ ɖɔ-yɔɔ yɔ nɛ sɔɔlɩm mbʋ ɖɩwɛnɩ ɖama yɔɔ yɔ pɩ-taa nɛ ɖɩna.
1. Ɛbɛ kɛnɩ Yehowa Aseɣɖe Tɩnaa tisuu tigiɖe?
Yesu yɔɔdaa se: «Ñɔ-tɔm kɛ toovenim.» (Yohanɛɛsɩ 17:17) Ɛzɩ Yesu yɔ, Yehowa Aseɣɖe Tɩnaa tisuu tigiɖe lɛ Ɛsɔtɔm, nɛ tɔm ndʋ palakɩnɩ tʋmɩyɛ paa ɛzɩmtaa. Yele nɛ ɖɩtazɩ ɖa-alɩwaatʋ taa Yehowa Aseɣɖe Tɩnaa yɔɔ tɔm taa pazɩ nɛ ɖɩna. Pɩnzɩ 1800 waa tɛŋaɣ lɛ, ɛyaa nabɛyɛ cabɩ kpeɣlaɣ nɛ patazɩɣ Bibl taa camɩyɛ. Tɔm ndʋ pɛkpɛlɩkaɣ Bibl taa yɔ, ndʋ kaakɛnɩ pe-tisuu tigiɖe paa tɩwɛ ndɩ nɛ tɔm ndʋ coocinaa wɩlɩɣ yɔ. Pʋwayɩ lɛ, papaɣzɩ susuu ɛyaa lalaa Bibl taa toovenim tɔm ndʋ.a
2. Ɛbɛ yɔɔ ɖiyeba nɛ payaɣ-ɖʋ se Yehowa Aseɣɖe Tɩnaa?
Yehowa yaɣ ɛ-sɛyaa se ɛ-tɛ «aseɣɖe tɩnaa» mbʋ pʋyɔɔ yɔ pasɩɣnɩ ɛyaa se patɩlɩ ɛ-yɔɔ toovenim tɔm. (Ebree mba 11:4–12:1) Kɩɖaʋ nakʋyʋ yɔ: Ɛsɔ kaaheyi ɛ-samaɣ caanaʋ taa se: «Ɩkɛ ma-aseɣɖe tɩnaa.» (Kalɩ Izaayii 43:10.) Paya Yesu se «Aseɣɖe Tʋ Siɣsiɣ Tʋ.» (Natʋ 1:5) Pʋyɔɔ ɖiyeba nɛ papaɣzɩ-ɖʋ yaʋ se Yehowa Aseɣɖe Tɩnaa pɩnaɣ 1931 taa. Ða-taa wɛ leleŋ siŋŋ se hɩɖɛ nɖɩ ɖɩwɛ ɖɔ-yɔɔ.
3. Ɛzɩma Yehowa Aseɣɖe Tɩnaa maɣzɩɣnɩ Yesu sɔɔlɩm?
Yesu kaasɔɔlɩ ɛ-tɔmkpɛlɩkɩyaa siŋŋ nɛ ɛkpakaɣ-wɛ ɛzɩ ɛ-hɔʋ taa mba yɔ. (Kalɩ Maarɩkɩ 3:35.) Mbʋ ɖɔɖɔ Yehowa Aseɣɖe Tɩnaa kɛ ɛjaɖɛ kpeekpe yɔɔ hɔʋ kʋɖʋmʋʋ. Nɛ hɔʋ ŋgʋ kɩ-taa mba kpeekpe kɛ ɖo-koobiya abalɩñɩma yaa halɩñɩma. (Fileemɔɔ 1, 2) Ðɩñaŋ ɖɔɖɔ paɣtʋ tʋnɛ: «Ɩsɔɔlɩ ɛjaɖɛ kpeekpe yɔɔ koobiya.» (1 Pɩyɛɛrɩ 2:17) Yehowa Aseɣɖe Tɩnaa tɩŋɩɣnɩ nʋmɔŋ ndɩ ndɩ yɔɔ nɛ pawɩlɩɣ ɖama sɔɔlɩm. Nʋmɔŋ ɛnɩ ɩ-taa lɛɛkʋ lɛ se ɖɩsɩɣnɩ ɖo-koobiya mba pɛwɛ kɩcɛyɩm taa yɔ paa le patɩɩwɛɛ yɔ.
TAZƖ NƐ PILIMI
Tazɩ nɛ ŋtɩlɩ Yehowa Aseɣɖe Tɩnaa camɩyɛ; nɛ tazɩ nɛ ŋna ɖɔɖɔ mbʋ mbʋ pɩwɩlɩɣ se ɖɩkɛ toovenim Krɩstʋ mba yɔ pɩ-taa lɛɛbʋ.
Bibl kɛnɩ toovenim Krɩstʋ mba tisuu tigiɖe nɛ posusuu lalaa pe-tisuu tɔm.
4. Bibl kɛnɩ ɖe-tisuu tigiɖe
Yehowa kaayɔɔdaa se pakaɣ nɩʋ Bibl taa toovenim tɔm taa kpayɩ kpayɩ. Ɩkalɩ Danɩyɛɛlɩ 12:4, nɛ pʋwayɩ lɛ ɩtazɩ tɔm tʋnɛ tɩ-taa:
Yehowa sɛyaa wɛɣ nɛ pɛkpɛlɩkɩɣ Bibl lɛ, ɛbɛ «kaɣ tɔyʋʋ» pɛ-hɛkʋ taa?
Cɔna nɛ ŋna ɛzɩma Charles Russell nɛ Bibl kpɛlɩkɩyaa lalaa patazaɣ Bibl taa yɔ. Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
Ɛzɩ pawɩlʋʋ video taa yɔ, ɛzɩma tɩyɛ Charles Russell nɛ ɛ-taabalaa pɛkpɛlɩkaɣ Bibl?
Ŋŋsɩm-tʋ?
Nabʋyʋ taa ɖɩlakɩ lɛɣzɩtʋ pɩlɩɩnɩ tisuu mbʋ ɖɩwɛna yɔ pɩ-yɔɔ. Ɛbɛ yɔɔ? Wɩsɩ ñalɩmɩyɛ ñandɩɣ pazɩ pazɩ pɩkɔɔ nɛ pɩtalɩ alɩwaatʋ ndʋ ɖɩnaɣ mbʋ pɩcɔ-ɖʋ nɛ pɩta yɔ kpayɩ kpayɩ yɔ. Mbʋ ɖɔɖɔ Ɛsɔ yeki se ɖɩnɩɩ ɛ-Tɔm taa pazɩ pazɩ. (Kalɩ Aduwa 4:18.) Ye mbʋ paa Bibl taa tɔm ɛɛlɛɣzɩɣ yɔ, ɖɩnɩɣ kɩ-taa nɛ pɩkɩlɩ lɛ, ɖɩlɛɣzɩɣ nɛ pɩla nɔɔ kʋɖʋmaɣ nɛ ɛzɩma ɖɩnɩ Bibl taa tɔm taa yɔ.
5. Ðɩcakɩ wezuu nɛ pɩlakɩ nɔɔ kʋɖʋmaɣ nɛ ɖa-hɩɖɛ
Ɛbɛ yɔɔ ɖiyeba nɛ payaɣ-ɖʋ se Yehowa Aseɣɖe Tɩnaa? Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
Ɛbɛ yɔɔ hɩɖɛ Yehowa Aseɣɖe Tɩnaa kɛ hɩɖɛ nɖɩ ɖɩmʋnaa yɔ?
Ɛbɛ yɔɔ Yehowa lɩzɩ ɛyaa se pɛkɛ ɛ-aseɣɖe tɩnaa? Peyeki se ɛyaa ɩtɩlɩ se ɛnʋ lɛ Ɛsɔ toovenim tʋ mbʋ pʋyɔɔ yɔ, ɛyaa yɔɔdʋʋ cɛtɩm tɔm sakɩyɛ ɛ-yɔɔ. Yele nɛ ɖɩtazɩ cɛtɩm tɔm ndʋ tɩ-taa naalɛ taa.
Ɛsɔ sɛtʋ agbaa naayɛ wɩlɩɣ ɛyaa se Ɛsɔ sɔɔlaa se palabɩnɩ tʋmɩyɛ sɩʋ kpelisi pɛ-Ɛsɔ sɛtʋ taa. Ɩkalɩ Levitiki 26:1, nɛ pʋwayɩ lɛ ɩtazɩ tɔm tʋnɛ tɩ-taa:
Toovenim taa lɛ, tɔm ndʋ Bibl wɩlɩɣ pɩlɩɩnɩ sɩʋ kpelisi yɔɔ? Yehowa maɣzɩɣ suwe sɩʋ kpelisi yɔɔ?
Ɛsɔ sɛtʋ agbaa naayɛ maɣzɩɣ se Yesu kɛnɩ Ɛsɔ. Ɩkalɩ Yohanɛɛsɩ 20:17, nɛ pʋwayɩ lɛ ɩtazɩ tɔm tʋnɛ tɩ-taa:
Toovenim taa lɛ, ɛzɩ Bibl wɩlɩɣ se Yesu kɛnɩ Ɛsɔ? Ɛzɩ Ɛsɔ payaɣ ɖɔɖɔ se Yesu?
Ŋtɩlʋʋ se Yehowa lɩzɩ ɛ-aseɣɖe tɩnaa se posusi ɛ nɛ ɛ-Pɩyalʋ pɔ-yɔɔ toovenim tɔm yɔ, ɛzɩma pɩlakɩ-ŋ?
6. Ðɩsɔɔlɩ ɖama
Bibl kpaɣ Krɩstʋ mba nɛ kɩmaɣzɩnɩ ɛyʋ tomnaɣ hɔɔlɩŋ ndɩ ndɩ. Ɩkalɩ 1 Kɔrɛntɩ mba 12:25, 26; nɛ pʋwayɩ lɛ ɩtazɩ tɔm tʋnɛ tɩ-taa:
Ɛbɛ toovenim Krɩstʋ mba lakɩ alɩwaatʋ ndʋ po-koobiya lakɩ kʋñɔŋ yɔ?
Ña-naʋ taa yɔ, ɛzɩma Yehowa Aseɣɖe Tɩnaa wɩlɩɣ ɖama sɔɔlɩm?
Ye Yehowa Aseɣɖe Tɩnaa mba pɛwɛ kedeŋa hɔɔlʋʋ nakʋyʋ taa yɔ palakɩ kʋñɔŋ yɔ, po-koobiya kʋyʋʋ kpaka nɛ paɖʋ-wɛ nesi. Pɩsa nɛ ɩna kɩɖaʋ nakʋyʋ lɛ, ɩcɔnɩ VIDEO. Nɛ pʋwayɩ lɛ, ɩtazɩ tɔm tʋnɛ tɩ-taa.
Sɩnʋʋ ɖʋtʋ ndʋ Yehowa Aseɣɖe Tɩnaa laba yɔ, ɛzɩma tɩwɩlɩɣ se sɔɔlɩm wɛ pɛ-hɛkʋ taa?
Sɔɔlɩm tuyuu toovenim Krɩstʋ mba nɛ pasɩɣnɩ mba pɛwɛ kɩcɛyɩm taa yɔ.
NABƐYƐ YƆƆDƲƲ SE: «Yehowa Aseɣɖe Tɩnaa kɛ Ɛsɔ sɛtʋ ɛgbɛyɛ kɩfaɖɛ naɖɩyɛ.»
Kpaɣnɩ alɩwaatʋ ndʋ Yehowa paɣzɩ ɛ-sɛyaa yaʋ se ɛ-aseɣɖe tɩnaa?
TOBI LƐ
Yehowa Aseɣɖe Tɩnaa kɛ toovenim Krɩstʋ mba. Ðɩkɛ ɛjaɖɛ kpeekpe yɔɔ hɔʋ ŋgʋ kɩsɛɣ Ɛsɔ yɔ. Bibl kɛnɩ ɖe-tisuu tigiɖe nɛ ɖɩsɩɣnɩ ɛyaa se patɩlɩ toovenim Yehowa yɔɔ.
Tɔm taa tazʋʋ
Ɛbɛ yɔɔ ɖiyeba nɛ payaɣ-ɖʋ se Yehowa Aseɣɖe Tɩnaa?
Wɛtʋ ndʋ ɖɩwɛnɩ ɖama yɔɔ?
Ŋmaɣzɩɣ se Yehowa Aseɣɖe Tɩnaa kɛ toovenim Krɩstʋ mba na?
WONDU LƐƐTƲ
Cɔna nɛ ŋtɩlɩ Yehowa Aseɣɖe Tɩnaa nɛ pɩkɩlɩ.
Yehowa Aseɣɖe Tɩnaa—Palɩzɩ Pe-Tisuu Pawɩlɩ, Hɔɔlʋʋ 1: Palɩnɩ Cɩkpɛndʋʋ Taa (1:00:53)
Cɔna nɛ ŋna kɩɖaŋ weyi ɩwɩlɩɣ se Yehowa Aseɣɖe Tɩnaa kuli cɛtɩm wɩlɩtʋ yɔɔ nɛ pawɩlɩ yɔ ɩ-taa lɛɛkʋ.
Pocosi tɔm ndʋ ŋpɩzɩɣ nɛ ŋpɔzɩ ña-tɩ pɩlɩɩnɩ Yehowa Aseɣɖe Tɩnaa yɔɔ yɔ tɩ-yɔɔ. Kalɩ nɛ ŋtɩlɩ-tʋ.
«Tɔm ndʋ ɛyaa pɔzʋʋ ɖoŋ ɖoŋ Yehowa Aseɣɖe Tɩnaa yɔɔ yɔ» (ɖɛ-tɛ intɛrnɛɛtɩ lone hɔɔlʋʋ nakʋyʋ)
Paɖɩyɛ tuyaɣ Stephen nɛ ɛlakɩ añɔndɔm lakasɩ. Kalɩ nɛ ŋna mbʋ ɛkpɛlɩkɩ Yehowa Aseɣɖe Tɩnaa cɔlɔ nɛ pituyi-i nɛ ɛlɛɣzɩ yɔ.
«Ma vie allait de plus en plus mal» (La Tour de Garde, 1er juillet 2015)
a Feŋuu Tilimiye kɛnɩ takayaɣ ŋga ɖɩkɩlɩɣ labɩnʋʋ tʋmɩyɛ yɔ; nɛ Yehowa Aseɣɖe Tɩnaa paɣzɩ lɩzʋʋ takayaɣ ŋga kpaɣnɩ pɩnaɣ 1879 nɛ patɩŋɩɣnɩ kɔ-yɔɔ nɛ posusuu Bibl taa toovenim tɔm.