• Kpazɩ ñɛ-ɛgbɛyɛ taa koobiya halɩñɩma ɖoŋ
    Feŋuu Tilimiye (Kpɛlɩkʋʋ)—2020 | septembre
    • Yesu caɣaa nɛ ɛwɩlɩɣ tɔm. Maarta nɛ Maarɩɩ pacaɣ ɛ-nɩŋgbanzɩ tɛɛ nɛ pewelisiɣni-i. Fotonaa: 1. Koobu nɔɔyʋ nɛ ɛ-halʋ powobi koobu halɩñɩnʋ weyi pɩcamɩ-ɩ yɔ ɛ-tɛ se pekilimi ɛ-yɔɔ. Abalʋ wɛɛ nɛ ɛyɔɔdʋʋnɩ-ɩ, nɛ ɛ-halʋ wɛɛ nɛ ɛlɩzɩɣ wondu ndʋ pɔkɔnɩ-ɩ yɔ. 2. Koobu nɔɔyʋ nɛ ɛ-halʋ powobi koobu halɩñɩnʋ lɛlʋ nɛ ɛ-pɛlɛ pɔ-cɔlɔ se pa nɛ wɛ pala hɔʋ taa Ɛsɔ sɛtʋ. 3. Koobu abalɩñɩnʋ nɔɔyʋ wɛɛ nɛ ɛsɩɣnɩ koobiya halɩñɩma nabɛyɛ naalɛ se pɛlɛɣzɩ pɔ-lɔɔɖɩyɛ pɔbɔɖɛ.

      Ɛzɩ Yesu yɔ, ɖɩpɩzɩɣ nɛ ɖɩwɩlɩ se ɖɩsɔɔlɩ koobiya halɩñɩma mba pɛwɛ siɣsiɣ yɔ (Cɔnɩ tayʋʋ 6-9)f

      6. Ɛzɩ pamaʋ Luka 10:38-42 taa yɔ, ɛzɩma Yesu sɩnɩ Maarta nɛ Maarɩɩ?

      6 Yesu kpakaɣ alɩwaatʋ nɛ ɛ nɛ e-koobiya halɩñɩma pacakɩ, nɛ ɛɛkɛ pa-taabalʋ kɩbanʋ. Maɣzɩ taabalɩyɛ nɖɩ ɖɩɩwɛ ɛ nɛ Maarɩɩ nɛ Maarta pɛ-hɛkʋ taa yɔ ɖɩ-yɔɔ nɛ ŋna. Pɩwɛ ɛzɩ pa-naalɛ paakɛ aɖamɛɛ yɔ. (Kalɩ Luka 10:38-42.) Yesu tɩŋnɩ ɛ-yɔɔdaɣ nɛ ɛ-lakasɩ yɔɔ nɛ eyele nɛ pa-laŋɩyɛ hɛɛ. Pɩɩkɛdɩnɩ Maarɩɩ se Yesu tisaa se ɛnʋ ɛcaɣ ɛ-nɩŋgbanzɩ tɛɛ ɛzɩ tɔmkpɛlɩkɩyʋ yɔ.c Nɛ pɩɩcɛyɩ Maarta mbʋ pʋyɔɔ yɔ Maarɩɩ tɩsɩnɩ-ɩ lɛ, eheyi Yesu tɔm ndʋ tɩɩwɛ ɛ-taa yɔ faaa. Yesu tɩŋnɩ wɛtʋ ndʋ tɩ-yɔɔ nɛ ɛsɩnɩ halaa mba pa-naalɛ fezuu taa. Nɛ ɛwɩlaa se ɛmaɣzɩɣ halaa mba nɛ pɔ-hɔʋ taa tʋ Lazaarɩ yɔɔ mbʋ pʋyɔɔ yɔ, ewokaɣ pɛ-tɛ alɩwaatʋ lɛɛtʋ yɔɔ. (Yoh. 12:1-3) Nɛ pɩtʋʋ fɛyɩ se alɩwaatʋ ndʋ Lazaarɩ kaahɩnɩ kʋdɔŋ siŋŋ yɔ, Maarɩɩ nɛ Maarta paanawa se papɩzɩɣ nɛ pɔpɔzɩ Yesu se ɛsɩnɩ-wɛ.—Yoh. 11:3, 5.