Yesu kɛdaa se: “Ɛyʋ ñɩm tʋ nɔɔyʋ lɛ mbʋ: Esuwaɣ ñɩɣlɩm tokonaa nɛ ɛtɔkɩ leleŋ leleŋ kɩyakɩŋ tɩŋa. Kʋñɔndʋ nɔɔyʋ wɛɛ ɖɔɖɔ mbʋ, payaɣ-ɩ se Lazaarɩ. Ɛhɩnaɣ ñɩm tʋ ɛnʋ ɛ-nɔnɔɔ taa, ɛ-yɔɔ nɛ kɩjɩkpɩŋ. Ɛsɔɔlɩ pɩŋŋ se ɛtɔɔ tɔɔnaɣ ɖula wena atɔlaɣ ñɩm tʋ taabɩlɩ tɛɛ yɔ, nɛ patɩcɛlɩɣ-ɩ; ɛlɛ hasɩ kɔŋ sineziɣ ɛ-kɩjɩkpɩŋ taa.”—Luka 16:19-21.

Lɩmaɣza wena ñɩm tɩnaa panɛ paawɛnɩ ɛyaa lalaa mba paawɛ ɛzɩ kʋñɔndɩnaa yɔ, pɔ-yɔɔ? Peniŋaɣ-wɛ nɛ payaɣ-wɛ se ʽam haʼarèts yaa mʋzʋʋ taa ɛyaa. Nɛ pamaɣzɩɣ se paasɩŋ Moyizi Paɣtʋ nɛ pɩtɩmʋna se pawɩlɩ-wɛ tʋ. (Yohanɛɛsɩ 7:49) Kʋñɔndɩnaa mba pɛ-wɛtʋ tʋnɛ tɩ-yɔɔ pamaɣzɩnɩ-wɛ nɛ ‘kʋñɔndʋ Lazaarɩ’ weyi “ɛsɔɔlɩ pɩŋŋ se ɛtɔɔ tɔɔnaɣ ɖula wena atɔlaɣ ñɩm tʋ taabɩlɩ tɛɛ yɔ.” Ɛzɩ Lazaarɩ weyi ɛ-yɔɔ nɛ kɩjɩkpɩŋ yɔ, mba pataakɛ Farɩsɩ ñɩma yɔ, ñamtʋ taawɛɛ pɔ-yɔɔ nɛ fezuu taa lɛ, pɛwɛ ɛzɩ kʋdɔndɩnaa yɔ.