7. (a) Asɩŋnɩ viiñi “hayɩm tʋ”, “viiñi”, nɛ “pilinzi”? (b) Tɔm pɔzʋʋ mbʋ yɔɔ pɩwɛɛ se ɖicosi?

⁷ Kalɩ Yohanɛɛsɩ 15:1-5, 8. Yʋsɩ se Yesu heyi apostoloowaa se: “Man-Caa hɩɖɛ sɛʋ kɛlɛ se: Ɩla tʋmɩyɛ kɩbanɖɛ sakɩyɛ, ɖɩnɛ ɛlɛ ɩkɛɣ mɔn-tɔm mʋyaa.” Yesu kpaɣ Yehowa nɛ ɛmaɣzɩnɩ “tɩmʋʋ tʋ” yaa viiñi hayɩm tʋ, ɛkpaɣ ɛ-maɣmaɣ nɛ ɛmaɣzɩnɩ “tɩmʋʋ siŋŋ” yaa viiñi tɩʋ kɩbaŋʋ nɛ ɛkpaɣ ɛ-tɔm mʋyaa nɛ ɛmaɣzɩna “pilinzi.”b Ye mbʋ ɛbɛ kɛnɩ piye nɖɩ pɩwɛɛ se Krɩstʋ wayɩ tɩŋɩyaa ɩlʋlɩ yɔ? Yesu tɩyɔɔdɩ kpayɩ mbʋ piye nɖɩ ɖɩkɛnaa yɔ eduuye ɖɩnɛ ɖɩ-taa, ɛlɛ tɔm ndʋ ɛyɔɔdaa yɔ, tɩsɩɣnɩ-ɖʋ se ɖɩtɩlɩ mbʋ pɩ-tɔm ɛcaɣaɣ yɔɔdʋʋ yɔ.

8. (a) Kɩɖaʋ kʋnɛ kɩ-taa, ɛbɛ yɔɔ ɖɩɩpɩzɩɣ nɛ ɖɩkpaɣ piye lʋlʋʋ nɛ ɖɩmaɣzɩnɩ tɔm mʋyaa kɩfama labʋ? (b) Mbʋ payɩ Yehowa pɔzʋʋ-ɖʋ se ɖɩla yɔ, ɛ-wɛtʋ kɩbandʋ ndʋ pɩwɩlɩɣ-ɖʋ?

⁸ Yesu ñɩnaɣ ɛ-Caa tɔm yɔɔdʋʋ lɛ, ɛtɔm se: “Ye mɔ-yɔɔ piliŋa nakɛyɛ ɛɛlʋlʋʋ pee kɔyɔ, ɛkaɣ-kɛ sɛtʋʋ.” Tɔm tʋnɛ tɩ-tɔbʋʋ lɛ se Yehowa ɛsɩndaa lɛ, ɖɩkɛ ɛ-sɛyaa ye ɖɩlʋlʋʋ pee yɔ. (Mat. 13:23; 21:43) Ɛlɛ kɩɖaʋ kʋnɛ kɩ-taa piye nɖɩ pɩwɛɛ se paa krɩstʋ tʋ weyi ɛlʋlɩ yɔ, ɖɩtɩsɩŋnɩ ɛyaa mba ɖɩsɩnɩ-wɛ nɛ papɩsɩ tɔm mʋyaa kɩfama yɔ. (Mat. 28:19) Ye pɩɩkɛ mbʋ yɔ, Aseɣɖe Tɩnaa siɣsiɣ ñɩma mba pɛwɛ ageeta wena a-taa ɛyaa ɩɩmʋʋ-wɛ camɩyɛ nɛ pɛfɛyɩnɩ kpɛlɩkɩyaa yɔ, paba ñaasɩŋnɩ pilinzi nzɩ sɩɩlʋlʋʋ pee yɔ. Ɛbɛ yɔɔ? Mbʋ pʋyɔɔ yɔ ɖɩɩpɩzɩɣ nɛ ɖɩkpa nɔɔyʋ nɛ ɖoŋ se ɛpɩsɩ tɔm mʋyʋ. Ye ɖɩlabɩ mbʋ yɔ, pɩwɛɣ ɛzɩ Yehowa weyi ɛkɛ sɔɔlɩm tɛ Ɛsɔ yɔ, ɛhɔŋ ɛ-sɛyaa nɩŋgbaaŋ mbʋ pɩ-yɔɔ yɔ patɩpɩzɩ nɛ pala mbʋ pɩcɛzɩ po-ɖoŋ kamaɣ yɔɔ yɔ. Mbʋ payɩ Yehowa pɔzʋʋ-ɖʋ yɔ, ɛnawa se ɖɩpɩzɩɣ pɩ-labʋ.—Wp. 30:11-14.

9. (a) Tʋmɩyɛ nɖɩ labʋ yeki se ɖɩlʋlɩ piye? (b) Kɩɖaʋ ŋgʋ tɔm ɖɩkaɣ yɔɔdʋʋ lɛɛlɛɛyɔ, nɛ ɛbɛ yɔɔ?

⁹ Ye mbʋ ɛbɛ kɛnɩ piye nɖɩ pɩwɛɛ se ɖa-taa paa anɩ ɛlʋlɩ yɔ? Tobi lɛ, piye nɖɩ ɖɩkɛɣnɩ tʋmɩyɛ nɖɩ ɖa-taa paa anɩ pɩzɩɣ nɛ ɛla yɔ. Tʋmɩyɛ nɖɩ labʋ sɩŋnɩ “piye lʋlʋʋ”? Tʋmɩyɛ nɖɩ lɛ, Ɛsɔ Kewiyaɣ tɔm kɩbandʋ susuu.c (Mat. 24:14) Ðomaɣ ɖuyu kɩɖaʋ ŋgʋ Yesu kpaɣaa yɔ, kɩwɩlɩɣ se tɔm tʋnɛ tɩkɛ toovenim. Ye mbʋ iyele nɛ ɖɩyɔɔdɩ kɩɖaʋ naalɛ ñɩŋgʋ ŋgʋ kɩ-tɔm.