Koobiya hɔʋ ŋgʋ kɩ-taa nɔɔ kʋɖʋmaɣ wɛɛ yɔ

YEHOWA hɩɖɛ kaawɛ Izrayɛɛlɩ ɛjaɖɛ yɔɔ pɩnzɩ ɛzɩ 1 500 mbʋ yɔ. Pʋwayɩ lɛ, Yehowa “kɛzɩ ɛ-lɩmaɣza nɛ ajɛɛ yɔɔ . . . se ɛlɩzɩ a-taa samaɣ nakɛyɛ nɛ payaa-kɛ nɛ ɛ-hɩɖɛ.” (Tʋma 15:14) Samaɣ ŋga kɔ-yɔɔ Yehowa hɩɖɛ wɛɛ yɔ, kɛkɛ ɛ-aseɣɖe tɩnaa, nɛ paa le ka-taa ñɩma ɩtɩɩwɛ tɛtʋ yɔɔ yɔ, kɛwɛnɩ lɩmaɣza kʋyʋma nɛ kalakɩ tʋmɩyɛ kʋɖʋmɖɩyɛ. Tɔm susuu tʋmɩyɛ nɖɩ Yesu kaaɖʋ ɛ-wayɩ tɩŋɩyaa yɔ, ɖɩ-yɔɔ pɩkaɣ tɩŋnʋʋ nɛ pekpeɣli samaɣ ŋga. Yesu kaayɔɔdaa se: “Pʋyɔɔ lɛ, iwolo nɛ ɩla ajɛɛ tɩŋa taa ɛyaa nɛ papɩsɩ tɔmkpɛlɩkɩyaa, ɩmɩyɩsɩ-wɛ lɩm Caa nɛ Pɩyalʋ nɛ fezuu kiɖeɖeu pa-hɩɖɛ taa, ɩwɩlɩ-wɛ nɛ pɔɖɔ tɔm ndʋ payɩ mawɩlɩ-mɩ yɔ tɩ-yɔɔ.”—Mat. 28:19, 20.

² Ŋkɛ Yesu Krɩstʋ tɔmkpɛlɩkɩyʋ mbʋ pʋyɔɔ yɔ ŋha ña-tɩ Yehowa nɛ pamɩyɩsɩ-ŋ lɩm. Ŋwɛ ɛjaɖɛ kpeekpe yɔɔ Krɩstʋ ñɩma hɔʋ ŋgʋ kɩ-taa nɔɔ kʋɖʋmaɣ wɛɛ yɔ. Kɩ-taa ñɩma iiyeki se ɛzɩma palɩnɩ ajɛɛ ndɩ ndɩ taa, hɔŋ ndɩ ndɩ taa yaa ɛzɩma pa-taa nabɛyɛ wɛnɩ ñɩm nɛ pɩkpaɖɩ lalaa yɔ, pɩtayɩ pɛ-hɛkʋ taa. (Keɣa 132:1) Mbʋ yebina nɛ ŋwɛɛnɩ sɔɔlɩm ño-koobiya Krɩstʋ ñɩma lalaa yɔɔ ɛgbɛyɛ taa. Pɩtʋʋ fɛyɩ se ña nɛ pa-taa nabɛyɛ ɩtɩkpɛndɩ tomnaɣ tɔlɩm, ɛjaɖɛ nɛ ɩtɩla ɖɔɖɔ sukuli kʋɖʋmʋʋ nɛ pʋyɔɔ lɛ, ɖooo lɛ ŋtaapɩzɩɣ se ña nɛ wɛ ɩkpɛndɩ. Ɛlɛ koobiɖe sɔɔlɩm mbʋ pɩwɛ ña nɛ wɛ mɩ-hɛkʋ taa yɔ, pɩwɛ ɖoŋ siŋŋ nɛ pɩkpaɖɩ mɩ-tʋma, mɩ-Ɛsɔ sɛtʋ nɛ mɩ-hɔŋ.—Mark. 10:29, 30; Kol. 3:14; 1 Pɩy. 1:22.

LƖMAƔZA LƐƔZƲƲ

³ Ye tomnaɣ tɔlɩm ndɩ ndɩ, politiki, tʋma yaa wɛtʋ lɛɛtʋ iiyeba nɛ nabɛyɛ wɛɛnɩ lɩmaɣza kɩdɛkɛda lalaa yɔɔ, nɛ pɩwɛɛ-wɛ kaɖɛ se pɔlɔ lɩmaɣza ana yɔ, pɩwɛɣ ɖeu se pɔtɔzɩ kajalaɣ Krɩstʋ ñɩma mba paakɛ Yuuda mba yɔ, pɔ-yɔɔ. Pɩɩwɛɛ se palʋbɩnɩ lɩmaɣza kɩdɛkɛda wena Yuuda mba kaawɛnɩ ajɛɛ lɛɛna taa ɛyaa yɔɔ yɔ. Alɩwaatʋ ndʋ Yehowa ɖʋ Pɩyɛɛrɩ tʋmɩyɛ se ewolo Roma sɔɔjanaa ñʋʋdʋ Kɔɔrnɛɛyɩ ɖɩɣa taa yɔ, ɛtɩŋnɩ nʋmɔʋ nakʋyʋ yɔɔ nɛ ɛñɔɔzɩ ɛ-lɩmaɣza nɛ sɔɔlɩm se pɩsa nɛ ɛpɩzɩ nɛ ɛla tʋmɩyɛ nɖɩ.—Tʋma, ñʋʋ 10.

⁴ Pɩyɛɛrɩ na natʋ natʋyʋ taa kpɩna naayɛ, wena afɛyɩ kele kele Yuuda mba sɔnzɩ taa yɔ, nɛ peheyiɣ-i se ɛkʋ-yɛ nɛ ɛtɔɔ. Pɩyɛɛrɩ kizaa lɛ, nɔɔ nakɛyɛ lɩɩnɩ ɛsɔdaa kiŋ nɛ keheyi-i se: “Yele yaʋ mbʋ Ɛsɔ pɩsɩ-pʋ kele kele yɔ se mbʋ pipisi-pʋ yɔ.” (Tʋma 10:15) Ɛsɔ maɣmaɣ ɖʋʋ nɔɔ tɔm ndʋ tɩ-taa yɔ, pɩsɩnɩ Pɩyɛɛrɩ nɛ ɛñɔɔzɩ ɛ-lɩmaɣza, nɛ etisi nɛ ɛla tʋmɩyɛ nɖɩ paɖʋ-ɩ yɔ. Paaheyi-i se ewolo weyi ɛtɩkɛ Yuuda tʋ yɔ ɛ-ɖɩɣa taa. Pɩyɛɛrɩ welisini Yehowa nɛ ewolo ɖɩɣa ŋga ka-taa lɛ, eheyi mba paakpeɣli peeɖe yɔ se: “Ɩsɩm camɩyɛ se paɣtʋ ɛɛhaɣ Yuuda tʋ nʋmɔʋ se ɛkpɛndɩ yaa ɛñɔtɩnɩ ɛjaɖɛ lɛɛɖɛ taa tʋ nɔɔyʋ, ɛlɛ Ɛsɔ wɩlɩ-m se pɩtɩmʋna se mayaa nɔɔyʋ se weyi pipisi-i yɔ yaa azuluma tʋ. Pʋyɔɔ mɔnkɔma, toovenim taa lɛ mantɩcɔɔ man-taa kiii alɩwaatʋ ndʋ petiyaa se paya-m yɔ.” (Tʋma 10:28, 29) Pʋwayɩ lɛ, Pɩyɛɛrɩ nanɩ ɛ-ɛsa se Kɔɔrnɛɛyɩ nɛ ɛ-hɔʋ taa mba tɔm kɛdɩnɩ Yehowa.

⁵ Sɔɔlɩ Taarɩsɩ tʋ kaakɛ Farɩsɩ tʋ weyi ɛlabɩ sukuli sɔsɔʋ yɔ, nɛ pɩɩpɔzaa se eluzi ɛ-tɩ nɛ mba ɛtaapɩzɩɣ se etisi nɛ ɛ nɛ wɛ pɛkpɛndɩ ɖooo lɛ yɔ, pala tʋmɩyɛ nɔɔ kʋɖʋmaɣ taa. Halɩ pɩɩwɛɛ se etisi nɛ ɛyaa mba, patasɩ-ɩ lɔŋ. (Tʋma 4:13; Gal. 1:13-20; Fil. 3:4-11) Ðɩmaɣzɩ ɖɔɖɔ nɛ ɖɩna ɛzɩma Sɛrɩjiyuusi Pɔɔlusi, Diyonisiyuusi, Damarisi, Fileemɔɔ, Onezim nɛ lalaa paañaɣ pana nɛ pɛlɛɣzɩ pa-lɩmaɣza alɩwaatʋ ndʋ petisaa nɛ pamʋ tɔm kɩbandʋ nɛ papɩsɩ Yesu Krɩstʋ tɔmkpɛlɩkɩyaa yɔ.—Tʋma 13:6-12; 17:22, 33, 34; Filem. 8-20.

ÐƖCƐYƖSƖ NƆƆ KƲÐƲMAƔ ŊGA KƐWƐ ÐƐ-HƐKƲ TAA ƐJAÐƐ KPEEKPE YƆƆ YƆ

⁶ Pɩtʋʋ fɛyɩ se sɔɔlɩm mbʋ ɛgbɛyɛ taa koobiya halaa nɛ abalaa pɛwɛna yɔ, mbʋ tuyini-ŋ nɛ ŋñɔtɩnɩ Yehowa nɛ ɛ-ɛgbɛyɛ. Ŋpɩzaa nɛ ŋna pɔ-yɔɔ yʋsaɣ sɔsɔɔ ŋga keyeki se patɩlɩ Yesu Krɩstʋ tɔmkpɛlɩkɩyaa toovenim mba yɔ; Yesu yɔɔdaɣ yʋsaɣ ŋga kɔ-tɔm lɛ, ɛtɔm se: “Manɖʋʋ-mɩ paɣtʋ kɩfatʋ, se ɩsɔɔlɩ ɖama; ɛzɩ mɔnsɔɔlʋʋ-mɩ yɔ, mɩ ɖɔɖɔ ɩsɔɔlɩ ɖama mbʋ. Pʋnɛ piyekina se ɛyaa tɩŋa ɩtɩlɩ se ɩkɛ mɔn-tɔmkpɛlɩkɩyaa—ye sɔɔlɩm ɛwɛ mɩ-hɛkʋ taa yɔ.” (Yoh. 13:34, 35) Nɛ alɩwaatʋ ndʋ ŋtɩlaa se sɔɔlɩm mbʋ pɩwɛ ñɛ-ɛgbɛyɛ taa yɔ, sɔɔlɩm mbʋ pɩwɛnɩ ɖɔɖɔ ɛjaɖɛ kpeekpe yɔɔ koobiya hɛkʋ taa yɔ lɛ, piyeba nɛ ŋsɔɔlɩ Yehowa nɛ ɛ-ɛgbɛyɛ nɛ pɩkɩlɩ. Bibl natʋ tɔm ndʋ tɩyɔɔdaa se, kɛdɛzaɣ kɩyakɩŋ taa lɛ, Yehowa kaɣ kpeɣluu ɛ-samaɣ nɛ kɛwɛɛ laŋhɛzɩyɛ nɛ nɔɔ kʋɖʋmaɣ taa yɔ, tiɖiɣni labʋ ñɛ-ɛsɩndaa.—Mik. 4:1-5.

⁷ Mbʋ mbʋ pɩtayɩɣ ɛyaa hɛkʋ taa yɔ, pɩtɔyɩ sɔnɔ; pʋyɔɔ lɛ nɔɔyʋ taapɩzɩɣ se ɛmaɣzɩ se ɛyaa mba palɩnɩ “ajɛɛ kpeekpe nɛ cejewe kpeekpe nɛ samasɩ kpeekpe nɛ kʋnʋmɩŋ kpeekpe taa” yɔ, nɔɔ kʋɖʋmaɣ pɩzɩɣ nɛ kɛwɛɛ pɛ-hɛkʋ taa. (Natʋ 7:9) Maɣzɩ nɛ ŋna tʋkaɣ ŋga kɛwɛ ɛyaa mba palakɩnɩ tʋmɩyɛ ɛjaɖɛ yɔɔ lɛɣtʋ wondu yɔ, nɛ mba pɔɖɔkɩ pɔ-cɔzɔnaa sɔnzɩ yɔ pɛ-hɛkʋ taa yɔ. Maɣzɩ ɖɔɖɔ nɛ ŋna ɛzɩma Ɛsɔ sɛtʋ kɔnɩ paɖɩyɛ ɛyaa mba pɛkpɛndɩ tomnaɣ tɔlɩm nɛ ɛjaɖɛ yɔ, pɛ-hɛkʋ taa yɔ. Ɛzɩma ɛyaa lʋkɩ pa-ajɛɛ yɔɔ yɔ, piyeba nɛ politiki tɔm kɔnɩ tayʋʋ ɛyaa hɛkʋ taa siŋŋ ɖa-alɩwaatʋ tʋnɛ tɩ-taa. Pɩtasɩ lɛ, tʋkaɣ ŋga wɛ ñɩm tɩnaa nɛ kʋñɔndɩnaa pɛ-hɛkʋ taa, nɛ wondu lɛɛtʋ kɔŋnɩ tayʋʋ ɛyaa hɛkʋ taa. Ye ŋmaɣzɩ wɛtʋ ndʋ tɩ-yɔɔ yɔ, ŋnaɣ se ye papɩzaa nɛ pekpeɣli ɛyaa mba patɩkpɛndɩ ɛjaɖɛ, kʋnʋŋ nɛ wɛtʋ nɛ sɔɔlɩm nɛ laŋhɛzɩyɛ wɛɛ pɛ-hɛkʋ taa yɔ, pɩkɛ piti lakasɩ. Nɛ Ɛsɔ Ðoŋ Tɩŋa tʋ ɖeke pɩzɩɣna nɛ ɛlabɩ-sɩ.—Zek. 4:6.

⁸ Ɛlɛ nɔɔ kʋɖʋmaɣ ŋga, kɛwɛ Yehowa sɛyaa hɛkʋ taa toovenim, nɛ kpaɣnɩ alɩwaatʋ ndʋ ŋha ña-tɩ nɛ pamɩyɩsɩ-ŋ lɩm nɛ ŋpɩsɩ Yehowa Aseɣɖe Tʋ yɔ, kɛwɛɛ nɛ kawazɩɣ ña ɖɔɖɔ. Ye mbʋ, pɩkɛnɩ-ŋ sʋʋtʋ se ŋɖʋ nesi nɛ pɛcɛyɩsɩ nɔɔ kʋɖʋmaɣ ŋga. Ŋpɩzɩɣ nɛ ŋla mbʋ ye ŋɖɔŋ tɔm ndʋ apostoloo Pɔɔlɩ yɔɔdɩ Galaatii mba 6:10 taa yɔ tɩ-yɔɔ yɔ. Ɛyɔɔdaa se: “Alɩwaatʋ ndʋ payɩ ɖɩwɛnɩ waɖɛ yɔ, ɖɩla ɛyaa tɩŋa mbʋ pɩwɛ ɖeu yɔ, ɛlɛ kɔzɩ kɔzɩ lɛ mba ɖa nɛ wɛ ɖɩka tisuu yɔ.” Ðɩɖɔŋ ɖɔɖɔ lɔŋ tasʋʋ pʋnɛ pɩ-yɔɔ: “Ɩtaala nabʋyʋ nɛ nɔɔhɔnɖɛ yaa tɩ kpazʋʋ lɩmaɣza, ɛlɛ iluzi mɩ-tɩ nɛ ɩkpaɣ lalaa se pakɩlɩ-mɩ, nɛ ɩtaamaɣzɩ mɩ-maɣmaɣ mɩ-kɛzɛsɩ ɖeke yɔɔ, ɛlɛ ɩmaɣzɩ ɖɔɖɔ lalaa kɛzɛsɩ yɔɔ.” (Fil. 2:3, 4) Ye ɖɩɩkaŋ ɖa-lɩmaɣza mbʋ ɖo-koobiya kɛnɩ tomnaɣ yɔɔ yɔ pɩ-yɔɔ, ɛlɛ ɖɩñakɩ pana se ɖɩwɛɛnɩ Yehowa lɩmaɣza pɔ-yɔɔ yɔ, piyeki nɛ taabalɩyɛ kɩbanɖɛ wɛɛ ɖa nɛ wɛ ɖɛ-hɛkʋ taa, nɛ ɖɩwɛɛ laŋhɛzɩyɛ nɛ koboyaɣ taa.—Efɛz. 4:23, 24.

ÐAMA YƆƆ MAƔZƲƲ

⁹ Apostoloo Pɔɔlɩ tɩŋnɩ kɩɖaʋ nakʋyʋ yɔɔ nɛ ɛwɩlɩ se tayʋʋ fɛyɩ ɛgbɛyɛ taa, ɛlɛ ɖɩ-taa ñɩma maɣzɩɣ ɖama yɔɔ. (1 Kɔr. 12:14-26) Pɩtɩla, ɛjaɖɛ kpeekpe yɔɔ koobiya nabɛyɛ posini-ɖʋ siŋŋ; paa mbʋ yɔ, ɖɩmaɣzɩɣ pɔ-yɔɔ nɛ ɖɩsɔɔlaa se piɖeni-wɛ. Ye ɖo-koobiya nabɛyɛ ɩwɛ nazɩm taa yɔ, ɖa-tɩŋa ɖɩnɩɣzɩɣ pɔ-yɔɔ siŋŋ. Ye nabɛyɛ ɩwɛ tomnaɣ taa kɩcɛyɩm nabʋyʋ taa, asɛyʋʋ nakʋyʋ ɛtalɩ-wɛ yaa you ɛlabɩ ɖenɖe pɛwɛɛ yɔ, ɖa-tɩŋa ɖɩñɩnɩɣ nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩsɩnɩ-wɛ fezuu taa nɛ tomnaɣ yɔɔ yɔ.—2 Kɔr. 1:8-11.

¹⁰ Pɩpɔzʋʋ se ɖa-tɩŋa ɖɩtɩmɩɣ ɖo-koobiya yɔɔ paa evemiye nɖɩ. Pɩtakɩɣ pa-taa nabɛyɛ se pala kɩdɛkɛdɩm. Lalaa lɛ, pɛwɛ kʋñɔmɩŋ nɩɩyɩ taa nɛ pɩtɩla paa weyi ɛsɩm kʋñɔmɩŋ ɛnɩ. Ɛlɛ lalaa ɖɔɖɔ lɛ, pa nɛ mba palakɩ tʋmɩyɛ yɔ, yaa pɔ-hɔʋ taa ñɩma mba patɩkɛ Yehowa sɛyaa yɔ panazɩɣ-wɛ, nɛ sakɩyɛ tɩtɩlɩ mbʋ pɩ-taa pɛwɛɛ yɔ. (Mat. 10:35, 36; 1 Tes. 2:14) Ðɩmaɣzɩɣ pa-tɩŋa pɔ-yɔɔ siŋŋ mbʋ pʋyɔɔ yɔ, ɖɩwɛ ɛjaɖɛ kpeekpe yɔɔ koobiɖe hɔʋ kʋɖʋmʋʋ taa. (1 Pɩy. 5:9) Koobiya nabɛyɛ ɖɔɖɔ lakɩ tʋma sakɩyɛ Yehowa sɛtʋ taa, pɛɖɛɣ nɔɔ tɔm susuu taa nɛ ɛgbɛyɛ taa. Nabɛyɛ ɖɔɖɔ cɔŋnɩ fezuu taa tʋma wena palakɩ ɛjaɖɛ kpeekpe yɔɔ yɔ, a-yɔɔ. Paa ɖɩɩpɩzɩɣ se ɖɩla nabʋyʋ nɛ ɖɩsɩnɩ pa-taa paa weyi yɔ, pɩwɛɛ se ɖɩtɩmɩɣ pa-tɩŋa pɔ-yɔɔ, nɛ ɖɩtɩŋnɩ pɩ-yɔɔ nɛ ɖɩwɩlɩ se ɖɩsɔɔlɩ-wɛ nɛ ɖɩmaɣzɩɣ pɔ-yɔɔ.—Efɛz. 1:16; 1 Tes. 1:2, 3; 5:25.

¹¹ Wezuu caɣʋ wɛ kaɖɛ kɛdɛzaɣ kɩyakɩŋ ɛnɛ ɩ-taa, pʋyɔɔ lɛ pɩwɛɛ se Yehowa sɛyaa ɩñɔɔzɩ pa-tɩ nɛ pasɩɣnɩ ɖama. Nabʋyʋ taa, tɛtʋ ñamsʋʋ, lɩm wadʋʋ yaa kɛgbɛdɩsaɣ lɛɛka nakɛyɛ pɩzɩɣ nɛ kala nɛ pɩpɔzɩ se pala ɖʋtʋ camɩyɛ nɛ pasɩnɩ koobiya mba payɩ pasʋ kaɖɛ taa yɔ. Kajalaɣ pɩnzɩ mɩnʋʋ taa Krɩstʋ ñɩma ha-ɖʋ kɩɖaʋ kɩbaŋʋ hɔɔlʋʋ kʋnɛ kɩ-taa. Tɔmkpɛlɩkɩyaa mba paawɛ Antɩyɔɔsɩ yɔ, palabɩnɩ tʋmɩyɛ Yesu lɔŋ tasʋʋ nɛ petiyini tomnaɣ yɔɔ wondu ndɩ ndɩ po-koobiya mba pɛwɛ Yuudee yɔ. (Tʋma 11:27-30; 20:35) Pʋwayɩ, apostoloo Pɔɔlɩ seɣti Kɔrɛntɩ koobiya se paɖʋ nesi sɩnʋʋ ɖʋtʋ ndʋ palaba se pasɩnɩ mba pɛwɛ kɩcɛyɩm taa yɔ. (2 Kɔr. 9:1-15) Ða-alɩwaatʋ tʋnɛ tɩ-taa, ye asɛyʋʋ nakʋyʋ ɛtalɩ ɖo-koobiya nabɛyɛ nɛ pɩpɔzʋʋ se pasɩnɩ-wɛ tomnaɣ yɔɔ yɔ, ɛgbɛyɛ nɛ koobiya ndɩ ndɩ kʋyʋʋ kpaka nɛ paɖʋ-wɛ nesi.

PALƖZƖ-ÐƲ NƐ HƆƆLƲƲ SE ÐƖLA YEHOWA SƆƆLƖM

¹² Ðɩwɛ ɛjaɖɛ kpeekpe yɔɔ koobiya hɔʋ ŋgʋ kɩ-taa nɔɔ kʋɖʋmaɣ wɛɛ yɔ, nɛ hɔʋ ŋgʋ kɩlabɩ ɖʋtʋ se kɩla Yehowa sɔɔlɩm. Sɔnɔ lɛ, ɛ-sɔɔlɩm lɛ se posusi Kewiyaɣ tɔm kɩbandʋ tɛtʋ kpeekpe yɔɔ nɛ pɩkɛnɩ aseɣɖe ajɛɛ kpeekpe. (Mat. 24:14) Yehowa sɔɔlaa se ɖɩɩlakɩ tʋmɩyɛ nɖɩ lɛ, ɖɩñaɣ pana ɖɔɖɔ nɛ ɖe-wezuu caɣʋ la nɔɔ kʋɖʋmaɣ nɛ ɛ-paɣtʋ. (1 Pɩy. 1:14-16) Pɩwɛɛ se ɖitisi faaa nɛ ɖiluzi ɖa-tɩ ɖama tɛɛ nɛ ɖɩla tʋmɩyɛ nɛ tɔm kɩbandʋ susuu ɖɛɛnɩ ɛsɩndaa. (Efɛz. 5:21) Lɛɛlɛɛyɔ kpem pɩcɛyaa se ɖɩsɩɩ Ɛsɔ Kewiyaɣ kajalaɣ lone taa ɖe-wezuu caɣʋ taa, nɛ ɖɩtaañɩnɩ ɖa-maɣmaɣ ɖɛ-kɛzɛɣa. (Mat. 6:33) Ye ɖɩwɛnɩ lɩmaɣzɩyɛ nɖɩ nɛ ɖɩkpɛndɩɣ nɛ ɖisusuu tɔm kɩbandʋ yɔ, ɖihikiɣ koboyaɣ nɛ laŋɩyɛ hɛzʋʋ sɔnɔ sɔnɔ, nɛ tamtam wazasɩ cee wayɩ.

¹³ Ða mba ɖɩkɛ Yehowa Aseɣɖe Tɩnaa yɔ, ɖɩwɛ ndɩ nɛ ɛyaa lalaa, palɩzɩ-ɖʋ nɛ hɔɔlʋʋ se ɖɩkɛ kele kele samaɣ nɛ ɖɩla ɖɛ-Ɛsɔ tʋmɩyɛ nɛ kpekpeka. (Tiiti 2:14) Yehowa sɛtʋ yebina nɛ ɖɩwɛɛ ndɩ. Pɩtasɩna se ɖa nɛ ɖo-koobiya ɖɩkpɛndɩɣ nɛ ɖɩlakɩ tʋmɩyɛ tɛtʋ kpeekpe yɔɔ lɛ, ɖɩyɔɔdʋʋ kʋnʋŋ kʋɖʋmʋʋ ŋgʋ kɩkɛ toovenim kʋnʋŋ yɔ, nɛ ɖa-lakasɩ ɖɔɖɔ lakɩ nɔɔ kʋɖʋmaɣ nɛ toovenim tɔm ndʋ ɖɩyɔɔdʋʋ yɔ. Yehowa tɩŋnɩ nayʋ Sofoniya yɔɔ nɛ ɛyɔɔdɩ pɩ-tɔm se: “Mankaɣ ɛyaa haʋ ndomee kele kele, nɛ pe-kpeekpe payaa [Yehowa] hɩɖɛ nɛ pɛkpɛndɩ palabɩ-ɩ tʋmɩyɛ.”—Sof. 3:9.

¹⁴ Pʋwayɩ lɛ, Yehowa fezuu sɩnɩ Sofoniya nɛ ɛyɔɔdɩ ɛjaɖɛ kpeekpe yɔɔ koobiya hɔʋ ŋgʋ kɩwɛ ɖa-alɩwaatʋ tʋnɛ tɩ-taa yɔ, kɩ-tɔm se: “Paakaɣ labʋ kɩdɛkɛdɩm, nɛ paakaɣ cɛtʋʋ; nɛ paakaɣ pɔ-nɔɔ taa naʋ nzʋlʋmɩyɛ nɖɩ ɖɩwɛ ñaŋ yɔ, mbʋ pʋyɔɔ yɔ pakaɣ tɔɔʋ nɛ pahɩnɩ fɛɛɛ, nɛ nɔɔyʋ ɛɛkaɣ-wɛ ñazʋʋ.” (Sof. 3:13) Ðɩnɩ toovenim tɔm ndʋ tɩwɛ Yehowa Tɔm taa yɔ tɩ-taa, nɛ ɖɩlɛɣzɩ ɖa-lɩmaɣza nɛ ala nɔɔ kʋɖʋmaɣ nɛ tɔm ndʋ, nɛ ɖɩcakɩ ɖɔɖɔ wezuu ŋgʋ kɩlakɩ nɔɔ kʋɖʋmaɣ nɛ Yehowa paɣtʋ yɔ, mbʋ yebina nɛ ɖɩlakɩ tʋmɩyɛ nɔɔ kʋɖʋmaɣ taa. Mba pɛwɛnɩ tomnaɣ yɔɔ lɩmaɣza yɔ, pɩlakɩ-wɛ ɛzɩ nɔɔyʋ ɛɛpɩzɩɣ nɛ ɛla tʋmɩyɛ nɖɩ ɖɩlakɩ yɔ. Toovenim, ɖɩkɛ samaɣ ŋga kɛwɛ ŋgee yɔ, Ɛsɔ samaɣ ŋga kaɖʋʋ-ɩ hɩɖɛ tɛtʋ kpeekpe yɔɔ yɔ.—Mik. 2:12.