MWBR19 04 Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
1ER-7 AVRIL
ÑƖM MBƲ PƖWƐ ƐSƆTƆM TAA YƆ | 1 KƆRƐNTƖ MBA 7-9
“Ɛɖandʋ caɣʋ kɛnɩ haɖɛ”
(1 Kɔrɛntɩ mba 7:32) Toovenim taa lɛ, mɔnsɔɔlaa se ɩtaawɛɛ nɩɣzɛ taa. Abalʋ weyi ɛtɩkpaɣ halʋ yɔ, ɛnɩɣzɩɣ Kɩbaɣlʋ wondu yɔɔ, ɛzɩma ɛpɩzɩɣ ɛla nɛ ɛ-tɔm kɛdɩnɩ Kɩbaɣlʋ yɔ.
w11 15/1 17-18 § 3
Yele nɛ ñɛ-ɛɖandʋ alɩwaatʋ wazɩ-ŋ nɛ pɩkɩlɩ
3 Ðoŋ ɖoŋ lɛ, weyi ɛkɛ ɛɖanɛ yɔ, ɛwɛnɩ alɩwaatʋ nɛ ɛwɛ ɛ-tɩ yɔɔ nɛ pɩkɩlɩ weyi ɛɖɔkɩ nesi yɔ. (1 Kɔr. 7:32-35) Pɩkɛnɩ aɖamɛɛ waɖɛ sɔsɔɖɛ; nɛ papɩzɩɣ nɛ patɩŋnɩ ɖɩ-yɔɔ nɛ pawalɩsɩ pɛ-Ɛsɔ sɛtʋ tʋmɩyɛ, pawɩlɩ sɔɔlɩm ɛyaa lalaa nɛ pɩkɩlɩ nɛ pɔñɔtɩnɩ Yehowa ɖɔɖɔ nɛ pɩkɩlɩ. Pʋyɔɔ lɛ, Koobiya sakɩyɛ kpaɣ lɩmaɣzɩyɛ se pacakɩ ɛɖandʋ alɩwaatʋ natʋyʋ yaa pe-wezuu caɣʋ kpeekpe. Lalaa taaɖʋ pa-taa kiɖe tɛɛ se pacakɩ ɛɖandʋ, ɛlɛ pɛ-wɛtʋ kɔm nɛ tɩlɛɣzɩ lɛ, patɩmnɩ Yehowa nɛ pamaɣzɩ tɩ-yɔɔ nɛ peɖiɣzina se ɛpɩzɩɣ ɛsɩnɩ-wɛ nɛ pacaɣ ɛɖandʋ. Petisi lɛɣzɩtʋ ndʋ tɩkɔm pe-wezuu caɣʋ taa yɔ tɩ-yɔɔ, nɛ paɖʋ pa-taa se pacakɩ ɛɖandʋ.—1 Kɔr. 7:37, 38.
(1 Kɔrɛntɩ mba 7:33, 34) Ɛlɛ abalʋ weyi ɛkpaɣ halʋ yɔ, ɛnɩɣzɩɣ ɛjaɖɛ yɔɔ wondu yɔɔ, ɛzɩma ɛpɩzɩɣ ɛla nɛ ɛ-tɔm kɛdɩnɩ ɛ-halʋ yɔ, 34 nɛ ɛ-taa tayaa. Pɩtasɩ lɛ, halʋ weyi ɛtɩwalɩ yɔ yaa pɛlɛ weyi ɛɛsɩŋ abalʋ yɔ, ɛnɩɣzɩɣ Kɩbaɣlʋ wondu yɔɔ, se pɩsa nɛ ɛkɛ kiɖeɖeu e-tomnaɣ taa nɛ e-fezuu taa. Ɛlɛ halʋ weyi ɛwalaa yɔ, ɛnɩɣzɩɣ ɛjaɖɛ yɔɔ wondu yɔɔ, ɛzɩma ɛpɩzɩɣ ɛla nɛ ɛ-tɔm kɛdɩnɩ ɛ-walʋ yɔ.
w08 15/7 27 § 1
Kɔrɛntɩ mba takayɩsɩ taa lɩmaɣza sɔsɔna
7:33, 34—Mba pɔɖɔkɩ nesi yɔ, panɩɣzɩɣ “ɛjaɖɛ yɔɔ wondu” natʋyʋ yɔɔ. Ɛbɛ tɩkɛnaa? Wezuu caɣʋ taa wondu ndʋ pɩpɔzʋʋ Krɩstʋ ñɩma mba pɔɖɔkɩ nesi yɔ, tɩ-tɔm Pɔɔlɩ yɔɔdaɣ. Wondu ndʋ tɩ-taa natʋyʋ yɔ, tɔɔnaɣ, wondu kususutu nɛ ɖɩzʋyɛ; ɛlɛ ɛjaɖɛ yɔɔ wondu ndʋ Krɩstʋ mba kiziɣ yɔ tɩfɛyɩ pɩ-taa.—1 Yohanɛɛsɩ 2:15-17.
(1 Kɔrɛntɩ mba 7:37, 38) Ɛlɛ ye nɔɔyʋ ɛɖʋ ɛ-laŋɩyɛ taa kpem nɛ ɛfɛyɩnɩ kɩcɛyɩm nabʋyʋ, ɛlɛ ɛwɛnɩ ɖoŋ ɛ-maɣmaɣ ɛ-sɔɔlɩm yɔɔ nɛ ɛkpaɣ lɩmaɣzɩyɛ ɛ-maɣmaɣ ɛ-laŋɩyɛ taa se ɛɛɖɔkʋʋ nesi yɔ, ɛkaɣ labʋ camɩyɛ. Pʋyɔɔ lɛ, weyi ɛɖɔkʋʋ nesi yɔ ɛlakɩ camɩyɛ, ɛlɛ weyi ɛɛɖɔkʋʋ nesi yɔ ɛkaɣ labʋ camɩyɛ nɛ pɩkɩlɩ.
w96 15/10 12-13 § 14
Ɛɖandʋ caɣʋ haɣ ɛyʋ waɖɛ se ɛka ɛ-lɩmaɣza fezuu taa tʋma yɔɔ
14 Ye Krɩstʋ tʋ nɔɔyʋ ɛkɛ ɛɖanɛ nɛ ɛlakɩnɩ tʋmɩyɛ ɛ-waɖɛ nɖɩ nɛ ɛñɩnɩɣnɩ ɛ-maɣmaɣ ɛ-kɛzaɣ yɔ, ɛtɩla “camɩyɛ nɛ pɩkɩlɩ” Krɩstʋ tʋ weyi ɛɖɔkɩ nesi yɔ. Ɛ-maɣmaɣ ɛ-kɛzɛɣa yɔɔ ɛcaɣ ɛɖandʋ, ɛlɛ pɩtɩkɛ “Kewiyaɣ yɔɔ.” (Maatiyee 19:12) Pɩpɔzʋʋ se weyi ɛkɛ ɛɖanɛ yɔ, “ɛnɩɣzɩɣ Kɩbaɣlʋ wondu yɔɔ,” ɛnɩɣzɩɣ ɛzɩma “ɛla nɛ ɛ-tɔm kɛdɩnɩ Kɩbaɣlʋ yɔ” pɩ-yɔɔ, nɛ “[ɛñɔɔnɩ] Kɩbaɣlʋ tam nɛ nabʋyʋ ɛtaakɛzɩ [ɛ]-lɩmaɣza.” Pɩpɔzʋʋ se ɛtɛ ɛ-taa nɛ ɛka ɛ-lɩmaɣza tɩŋa tʋma wena Yehowa nɛ Krɩstʋ Yesu paɖʋwa yɔ a-labʋ yɔɔ. Ye ɛɖanɛ naɖɩyɛ ɛlakɩ mbʋ yɔ, pɩwɩlɩɣ se ɖɩlakɩ “camɩyɛ nɛ pɩkɩlɩ” weyi ɛɖɔkɩ nesi yɔ.
Ðɩñɩnɩ fezuu taa ñɩm
(1 Kɔrɛntɩ mba 7:11) Ɛlɛ ye ɛkʋyaa yɔ, ɛcaɣ mbʋ ɛtaawalɩ yaa ɛ nɛ ɛ-walʋ peceɣ; nɛ walʋ etaayele ɛ-halʋ.
lvs 251
Tɩnaɣ yɔɔ tɔm
Ɛlɛ nabʋyʋ taa, nesi ɖɔkɩyaa pɩzɩɣ pakpaɣ lɩmaɣzɩyɛ se payaɣ ɖama, paa pa-taa nɔɔyʋ ɛtɩla acɛyɛ yɔ. (1 Kɔrɛntɩ 7:11) Papɩzɩɣ pala mbʋ lɩmaɣza anɛ a-yɔɔ:
• Ye abalʋ ekizaa se ɛɛcɔŋnɩ ɛ-hɔʋ yɔɔ yɔ: Ye abalʋ ekizaa se ɛɛcɔŋnɩ ɛ-hɔʋ yɔɔ nɛ kʋkʋ wɛɛ tanɩm taa siŋŋ yɔ, ɛ-halʋ pɩzɩɣ nɛ ɛkpaɣ lɩmaɣza se ɛ nɛ ɛ-walʋ paya ɖama.—1 Timootee 5:8.
• Kɩmakʋ: Ye nabɛyɛ ɩɖɔkɩ nesi nɛ pa-taa nɔɔyʋ makɩ lɛlʋ siŋŋ nɛ ɛlɛ wezuu sʋʋ kaɖɛ taa yɔ, ɛpɩzɩɣ ɛkpaɣ lɩmaɣzɩyɛ se paya ɖama.—Galaatii 5:19-21.
• Ye nɔɔyʋ ɛɖʋ ɛ-taa se ɛwɛɛkɩɣ lɛlʋ nɛ Yehowa pa-taabalɩyɛ taa yɔ: Abalʋ yaa halʋ pɩzɩɣ nɛ ɛñakɩ pana siŋŋ se ɛɖɩɣ nʋmɔʋ ɛ-tɛŋga se kaka ɛtaasɛɛ Yehowa.—Tʋma Labʋ 5:29.
(1 Kɔrɛntɩ mba 7:36) Ɛlɛ ye nɔɔyʋ ɛmaɣzɩɣ se ɛwɛɛ nɛ ɛlakɩ mbʋ pɩtɩtʋʋzɩ yɔ pɩlɩɩnɩ ɛzɩma ɛtɩɖɔkɩ nesi yɔ pʋyɔɔ, nɛ ye ɛɖɛ evebitu yaa pɛlɛtʋ alɩwaatʋ yɔɔ yɔ, ɖɩnɛ ɛlɛ pʋnɛ pɩwɛɛ se ɛla: Ɛla mbʋ ɛsɔɔlaa yɔ; ɛɛlakɩ kɩwɛɛkɩm. Ɛɖɔkɩ nesi.
w00 15/7 31 § 2
Ŋpɩzɩɣ nɛ ŋwɛɛ kele kele ɛjaɖɛ nɖɩ ɖɩ-taa kʋzʋʋ kɩdɛkɛdʋʋ tɔyaa yɔ
Pʋyɔɔ lɛ, pɩtɩmʋna se evebiya nɛ pɛlaa pekpidisi se pɔɖɔkʋʋ nesi alɩwaatʋ ndʋ kʋzʋʋ lɩmaɣza paɣzɩɣ kpaʋ pa-ñʋʋ taa yɔ. Nesi ɖɔkʋʋ pɔzʋʋ se pala ɖuutu. Pɩsa nɛ ɛyʋ pɩzɩ nɛ ɛɖɔ ɖuutu ndʋ tɩ-yɔɔ lɛ, pɩpɔzʋʋ se ɛpɩɩ. (Kiɖe Tɛɛ Tɔm 2:24) Pɩkɩlɩɣ ɖeu se ɛyʋ ɛɖɛɛ ‘e-evebitu yaa ɛ-pɛlɛtʋ helu helu alɩwaatʋ yɔɔ’ pʋcɔ nɛ ɛɖɔkɩ nesi, mbʋ pʋyɔɔ yɔ alɩwaatʋ ndʋ tɩ-taa kʋzʋʋ lɩmaɣza wɛ ɖoŋ nɛ apɩzɩɣ nɛ ayiɣdi ɛyʋ maɣzɩm. (1 Kɔrɛntɩ mba 7:36) Nɛ ye ɛyʋ weyi ɛtɩɖɔkɩ nesi yɔ, ɛɛnaɣ weyi ɛ nɛ ɩ pɔɖɔkɩ nesi ɛgbɛyɛ taa yɔ nɛ pʋyɔɔ lɛ ɛcaɣ kʋzʋʋ kɩdɛkɛdʋʋ wezuu yɔ, pɩkɛnɩ kɩmɛlɛndʋ nɛ kɩdɛkɛdɩm ɖɔɖɔ.
Bibl kalʋʋ
(1 Kɔrɛntɩ mba 8:1-13) Nɛ tɔɔnaɣ ŋga pala-kɛ sɩɩnaa yɔɔ yɔ kɔ-hɔɔlʋʋ taa lɛ, ɖɩsɩm mbʋ se ɖa-tɩŋa ɖɩwɛnɩ sɩmtʋ. Sɩmtʋ yeki nɛ ɛyʋ kpazɩɣ ɛ-tɩ, ɛlɛ sɔɔlɩm kpazɩɣ ɖoŋ. 2 Ye nɔɔyʋ ɛmaɣzɩɣ se ɛsɩm nabʋyʋ yɔ, ɛtɩsɩmtɩ-pʋ ɛzɩ pʋpɔzʋʋ se ɛsɩm-pʋ yɔ. 3 Ɛlɛ ye nɔɔyʋ ɛsɔɔlɩ Ɛsɔ yɔ, Ɛsɔ sɩm ɛyʋ ɛnʋ. 4 Piyele nɛ tɔɔnaɣ ŋga pala sɩɩnaa yɔɔ yɔ kɔ-tɔɔʋ hɔɔlʋʋ taa lɛ, ɖɩsɩm mbʋ se sɩʋ kpeliɣa tɩkɛ nabʋyʋ ɛjaɖɛ yɔɔ nɛ Ɛsɔ kʋɖʋm ɖeke wɛna. 5 Mbʋ pʋyɔɔ yɔ, paa mbʋ payaɣ se ɛsɔnaa yɔ pɩwɛɛ kɔyɔ, paa pɩtɩɩkɛ ɛsɔdaa yaa tɛtʋ yɔɔ, ɛzɩ “ɛsɔnaa” sakɩyɛ nɛ “kɩbaɣlaa” sakɩyɛ wɛʋ yɔ, 6 toovenim taa lɛ, ɖɩnawa se Ɛsɔ kʋɖʋm wɛna, Caa, weyi ɛ-cɔlɔ wondu kpeekpe lɩnaa nɛ ɖɩwɛɛ ɛ-yɔɔ yɔ; nɛ Kɩbaɣlʋ kʋɖʋm wɛna, Yesu Krɩstʋ, weyi ɛ-yɔɔ pɩtɩŋnaa nɛ wondu kpeekpe wɛɛ nɛ weyi ɛ-yɔɔ pɩtɩŋnaa nɛ ɖɩwɛɛ yɔ. 7 Paa mbʋ yɔ, pɩtɩkɛ ɖa-tɩŋa ɖɩwɛnɩnɩ sɩmtʋ tʋnɛ. Ɛlɛ nabɛyɛ lɛ, ɛzɩma paañɔnɩ sɩɩnaa ɖooo lɛ yɔ pʋyɔɔ lɛ, pɔtɔkɩ tɔɔnaɣ ŋga ɛzɩ mbʋ pala sɩʋ kpeliɣa yɔɔ yɔ, nɛ pipisiɣ pɛ-ɛhʋyɛ nɖɩ ɖɩwɛnɩ ɛjandʋ yɔ. 8 Ɛlɛ tɔɔnaɣ ɛɛkaɣ-ɖʋ ñɔtɩnʋʋ nɛ Ɛsɔ; ye ɖɩɩtɔkɩ yɔ pɩɩsɩkɩnɩ-ɖʋ, nɛ ye ɖɩtɔkɩ yɔ ɖɩɩwɛɣ weewee nɛ pɩkɩlɩ. 9 Ɛlɛ ɩkpa mɩ-tɩ paa ɛzɩmtaa se waɖɛ nɖɩ ɩwɛna se ɩlɩzɩ yɔ ɖɩtaapɩsɩ pɩyɛ nɖɩ ɖituuluu yɔ mba pɛwɛnɩ ɛjandʋ yɔ hɔɔlʋʋ nakʋyʋ taa. 10 Mbʋ pʋyɔɔ yɔ, ye nɔɔyʋ ɛna ña weyi ŋwɛnɩ sɩmtʋ yɔ ŋɖiɣni tɔɔnaɣ tɔɔʋ sɩʋ kpeliɣa nakɛyɛ templo taa, pɩɩkaɣ seɣtuu ɛnʋ weyi ɛwɛnɩ ɛjandʋ yɔ ɛ-ɛhʋyɛ se ɛtɔɔ tɔɔnaɣ ŋga pala sɩɩnaa yɔɔ yɔ? 11 Ye mbʋ, pɩtɩŋnɩ ña-sɩmtʋ yɔɔ lɛ, ŋwɛɛ nɛ ŋɖʋzʋʋ ɛyʋ weyi ɛwɛnɩ ɛjandʋ yɔ, ño-koobu weyi ɛ-yɔɔ Krɩstʋ sɩba yɔ. 12 Alɩwaatʋ ndʋ ɩlakɩ mi-koobiya kɩwɛɛkɩm mbʋ nɛ ɩɖʋʋ heŋ pɛ-ɛhʋyɛ nɖɩ ɖɩwɛnɩ ɛjandʋ yɔ, Krɩstʋ iɖiɣni labʋ kɩwɛɛkɩm. 13 Pʋyɔɔ lɛ, ye tɔɔnaɣ ɛlakɩ se pituuli mon-koobu yɔ, wiɖiyi maakaɣ tasʋʋ nandʋ tɔɔʋ kpa, se pɩsa nɛ mantaala nɛ pituuli mon-koobu.
8-14 AVRIL
ÑƖM MBƲ PƖWƐ ƐSƆTƆM TAA YƆ | 1 KƆRƐNTƖ MBA 10-13
“Yehowa wɛ siɣsiɣ”
(1 Kɔrɛntɩ mba 10:13) Takɩm nabʋyʋ tɩkɔɔ mɩ-yɔɔ nɛ pɩtɩkɛ mbʋ pɩtalɩɣ ɛyaa yɔ. Ɛlɛ Ɛsɔ wɛ siɣsiɣ, nɛ ɛɛkaɣ yebu se pɩtakɩ-mɩ nɛ pɩcɛzɩ mbʋ ɩpɩzɩɣ nɛ ɩkaɖɩna yɔ, ɛlɛ alɩwaatʋ ndʋ takɩm kɔŋ yɔ, ɛkaɣ-mɩ wɩlʋʋ nʋmɔʋ ŋgʋ kɩ-yɔɔ pɩwɛɛ se ɩtɩŋna yɔ nɛ ɩpɩzɩ ɩɖɔkɩ mɩ-laŋɩyɛ pɩ-taa.
Tɔm ndʋ ɖa-takayɩsɩ kalɩyaa pɔzʋʋ yɔ
Apostoloo Pɔɔlɩ mawa se Yehowa “ɛɛkaɣ haʋ nʋmɔʋ se pɩcɛzɩ-mɩ nɛ pɩɖɛɛ mi-ɖoŋ yɔɔ.” (1 Kɔr. 10:13) Ɛzɩ ɛ-tɔm tʋnɛ tɩwɩlɩɣ se Yehowa sɩm kala wena akaɣ ɖɔ-yɔɔ kɔm yɔ nɛ ɛlɩzɩɣ wena pɩwɛɛ se atalɩ-ɖʋ yɔ mbʋ pʋyɔɔ yɔ ɛnawa se ɖɩpɩzɩɣ nɛ ɖɩɖɔkɩ ɖa-tɩ a-taa?
▪ Yele nɛ ɖɩtazɩ tɔm ndʋ tɩ-taa nɛ ɖɩna. Alɩwaatʋ ndʋ koobu nɔɔyʋ pɩyalʋ kʋ ɛ-tɩ yɔ, ɛpɔzaa se: ‘Ɛzɩ Yehowa lɩzɩnɩ kaɖɛ nɖɩ pɩwɛɛ se ma nɛ ma-halʋ ɖɩkatɩ yɔ, mbʋ pʋyɔɔ yɔ ɛnawa se ɖɩpɩzɩɣ nɛ ɖɩɖɔkɩ ɖa-tɩ yaa we? Ɛnawa se ye ɖa-pɩyalʋ ɛkʋ ɛ-tɩ yɔ, ɖɩpɩzɩɣ nɛ ɖɩɖɔkɩ ɖa-tɩ yaa we?’ Ɛlɛ ɛzɩ toovenim taa lɛ, ɛzɩ Yehowa maɣzɩɣ kala wena akaɣ-ɖʋ talʋʋ yɔ a-yɔɔ nɛ eyeki se wena ɖɩpɩzɩɣ nɛ ɖɩɖɔkɩ ɖa-tɩ a-taa yɔ, atalɩ-ɖʋ?
Ye ɖɩɖaɣnɩ maɣzʋʋ tɔm ndʋ Pɔɔlɩ ma 1 Kɔrɛntɩ 10:13 taa yɔ tɩ-yɔɔ yɔ, ɖɩnɩɣ pɩ-taa se: Bibl ɛɛwɩlɩɣ se Yehowa maɣzɩɣ kala wena akaɣ-ɖʋ talʋʋ yɔ a-yɔɔ nɛ eyeki se wena ɖɩpɩzɩɣ nɛ ɖɩɖɔkɩ ɖa-tɩ a-taa yɔ atalɩ-ɖʋ. Yele nɛ ɖɩtazɩ lɩmaɣza naanza wena a-yɔɔ ɖɩpɩzɩɣ ɖɩyɔɔdɩ mbʋ yɔ a-taa.
Kajalaɣ lɛ, Yehowa ha ɖa-taa paa anɩ tɩ-yɔɔ wɛʋ lɩzʋʋ waɖɛ. Ɛsɔɔlaa se ɖa-maɣmaɣ ɖɩlɩzɩ ɛzɩma ɖɩsɔɔlaa se ɖɩcaɣ wezuu yɔ. (Wp. 30:19, 20; Yoz. 24:15) Ye ɖɩlɩzaa se ɖɩcakɩ wezuu kɩbaŋʋ yɔ, ɖɩpɩzɩɣ ɖɩtaa liu se Yehowa kaɣ nʋmɔʋ wɩlʋʋ ɖa-naataŋ. (Ad. 16:9) Ɛlɛ ye ɖɩlɩzaa se ɖɩcakɩ wezuu kɩdɛkɛdʋʋ yɔ, ɖɩkaɣ katʋʋ kala sakɩyɛ. (Gal. 6:7) Ye Yehowa ɛlɩzɩɣnɩ kala wena pɩwɛɛ atalɩ-ɖʋ yɔ, pɩɩwɩlɩɣ se ɛwɛɛ nɛ ɛpasɩɣ tɩ-yɔɔ wɛʋ lɩzʋʋ waɖɛ nɖɩ ɛha-ɖʋ yɔ yaa we?
Nabʋlɛ, Yehowa eeyeki se “alɩwaatʋ nɛ mbʋ ɛyʋ tɩɖʋna yɔ” pɩtaakɔɔ ɖɔ-yɔɔ. (Ekl. 9:11, nwt) Kɛgbɛdɩsaɣ pɩzɩɣ kɔkɔɔ nɛ pɩkɔnɩ-ɖʋ kala sakɩyɛ mbʋ pʋyɔɔ yɔ, ɖɩtaawɛɛ lone kɩbanɖɛ taa alɩwaatʋ ndʋ tɩ-yɔɔ. Yesu kaayɔɔdɩ kɛgbɛdɩsaɣ ŋga kaakɔm ɛyaa 18 waa mba koloŋa ɖabɩ-wɛ nɛ pasɩ yɔ pɔ-tɔm, nɛ ɛwɩlɩ se asɛyʋʋ ŋgʋ pɩtɩkɛ Yehowa ɖʋna se kɩla. (Luka 13:1-5) Pʋyɔɔ lɛ, ye mbʋ ɛyʋ tɩɖʋna yɔ pɩlaba nɛ pɩkɔnɩ nabɛyɛ sɩm nɛ nabɛyɛ ñalɩɩ pɩ-taa yɔ, pɩtɩmʋnaa kaaʋ se ɖɩmaɣzɩ se Ɛsɔ kaaɖʋna se pɩla mbʋ.
Nabudozo lɛ, ɖa-taa paa anɩ lɛ, takɩm talɩɣ-ɩ nɛ pɩhaɣ-ɩ waɖɛ se ɛlɩzɩ ɛ-cɩŋgɩlɩm wɛtʋ nɛ ɛwɩlɩ. Tɔzɩ se Sataŋ kaayɔɔdɩ mba pɛsɛɣ Yehowa yɔ pɔ-yɔɔ cɛtɩm tɔm nɛ ɛtɔ se ye takɩm ɛtalɩ-wɛ yɔ pakaɣ yebu Yehowa sɛʋ. (Yɔɔb 1:9-11; 2:4; Natʋ 12:10) Ye Yehowa ɛkandɩyɩɣ ɖɔ-yɔɔ se kala naayɛ ɛtaatalɩ-ɖʋ mbʋ pʋyɔɔ yɔ ɛmaɣzɩɣ se ɖɩɩkaɣ pɩzʋʋ nɛ ɖɩkaɖɩnɩ-yɛ yɔ, pɩɩwɩlɩɣ se Sataŋ wɛnɩ toovenim se ɖɛ-kɛzɛɣa yaa ɛzɩma Ɛsɔ sɩɣnɩ-ɖʋ yɔ, pɩ-yɔɔ ɖɩsɛɣ-ɩ?
Nabʋnaza lɛ, ye Yehowa ɛsɔɔlaa yɔ, ɛlɩzɩɣ se ɛɛtɩlɩɣ mbʋ payɩ pɩkaɣ-ɖʋ talʋʋ ɖe-wezuu caɣʋ taa yɔ. Ye ɖɩmaɣzɩɣ se Ɛsɔ lɩzɩɣnɩ kala wena ɖɩkaɣ katʋʋ yɔ, pɩwɩlɩɣ se ɛsɩm mbʋ payɩ pɩkaɣ-ɖʋ talʋʋ cee wayɩ yɔ pɩtɩŋa. Ɛlɛ lɩmaɣza ana atɩla nɔɔ kʋyʋmaɣ nɛ ndʋ Bibl yɔɔdʋʋ yɔ. Toovenim taa lɛ, Ɛsɔ pɩzɩɣ nɛ ɛtɩlɩ mbʋ pɩkaɣ labʋ cee wayɩ yɔ. (Iza. 46:10) Ɛlɛ Bibl wɩlɩɣ kpayɩ kpayɩ se pɩtɩkɛ paa ɛzɩmtaa ɛlakɩ mbʋ. (Kiɖe 18:20, 21; 22:12) Ɛwɛnɩ ɖoŋ se ɛtɩlɩ mbʋ pɩkaɣ labʋ cee wayɩ yɔ, ɛlɛ ɛhaɣ-ɖʋ ɖɔɖɔ waɖɛ se ɖɩlabɩnɩ tʋmɩyɛ tɩ-yɔɔ wɛʋ lɩzʋʋ kʋjɔʋ ŋgʋ ɛlabɩ ɖa-taa paa anɩ yɔ nɛ paa weyi ɛpɩzɩ nɛ ɛlɩzɩ mbʋ ɛsɔɔlaa se ɛ-tɛ cee wayɩ ɛkɛna yɔ. Ye mbʋ, pɩwɛ ɖeu pɩdɩɩfɛyɩ se paa Ɛsɔ ɛwɛnɩ ɖoŋ siŋŋ yɔ, ɛlakɩnɩ-ɩ tʋmɩyɛ camɩyɛ se ɩtaakaɖɩnɩ waɖɛ nɖɩ ɛha e-wondu kɩlɩzɩtʋ yɔ.—Wp. 32:4; 2 Kɔr. 3:17.
Lɛɛlɛɛyɔ, ɛzɩma pɩwɛɛ se ɖɩnɩɩ tɔm ndʋ Pɔɔlɩ mawa se Ɛsɔ “ɛɛkaɣ haʋ nʋmɔʋ se pɩcɛzɩ-mɩ nɛ pɩɖɛɛ mi-ɖoŋ yɔɔ” yɔ tɩ-taa? Tobi lɛ, Pɔɔlɩ yɔɔdaɣ mbʋ Yehowa lakɩ alɩwaatʋ ndʋ ɖɩwɛ kaɖɛ naɖɩyɛ taa yɔ, pɩtɩkɛ mbʋ ɛlakɩ alɩwaatʋ ndʋ kaɖɛ nɖɩ ɖɩtɩtɩɩtalɩta yɔ. Apostoloo Pɔɔlɩ tɔm tʋnɛ tɩwɩlɩɣ-ɖʋ se kʋñɔŋ ŋgʋ kɩtalɩɣ-ɖʋ yɔ, paa kɩwɛ ɛzɩma yɔ, Yehowa kaɣ-ɖʋ sɩnʋʋ ye ɖɩtaɣ-ɩ liu yɔ. (Keɣa 54:23) Pɔɔlɩ tɔm tʋnɛ tɩñɩkɩɣ niye toovenim tɔm kɩcɛyɩtʋ naalɛ yɔɔ.
Kajalaɣ lɛ, takɩm mbʋ ɖɩkatɩɣ yɔ, ‘pɩtɩkɩlɩ ɛyʋtʋ ɖoŋ’. Ye mbʋ, kala wena ɖɩkatɩɣ yɔ, atalɩɣ ɖɔɖɔ lalaa. Ye ɖɩtaɣ Yehowa liu yɔ, kala wena ɖɩkatɩɣ yɔ, aakaɣ cɛzʋʋ ɖo-ɖoŋ yɔɔ. (1 Pɩy. 5:8, 9) Takɩm mbʋ pɩɩkɔm Izrayɛɛlɩ piya yɔɔ kañɩmbusuu taa yɔ, pɩ-tɔm Pɔɔlɩ yɔɔdaɣ 1 Kɔrɛntɩ 10:13 taa. (1 Kɔr. 10:6-11) Takɩm mbʋ pɩtalɩ Izrayɛɛlɩ piya yɔ, pɩkɛ takɩm mbʋ pɩtɩcɛzɩ ɛyʋ ɖoŋ yɔ, nɛ paa Izrayɛɛlɩ pɩɣa ŋga lɛ, kapɩzaɣ se kɔɖɔkɩ ke-siɣsiɣ wɛtʋ nɛ kawa takɩm mbʋ. Pɔɔlɩ yɔɔdɩ tam naanza se “pa-taa nabɛyɛ” labɩ kaañamtʋ. Izrayɛɛlɩ piya nasɩyɩ kaakpaɣ lɩmaɣza kɩdɛkɛdɛɛ mbʋ pʋyɔɔ yɔ sɩtaataɣ Yehowa liu.
Nabʋlɛ lɛ, “Ɛsɔ cakɩ ɛ-tɔm yɔɔ.” Tɔm ndʋ pɔyɔɔdɩ Izrayɛɛlɩ samaɣ yɔɔ yɔ, tɩwɩlɩɣ kpayɩ kpayɩ se Yehowa kɛ Ɛsɔ weyi “ɛɖɔkʋʋ nɛ ɛnaɣ mba pɔsɔɔlʋʋ-ɩ yɔ pa-pʋtɔdɩyɛ, nɛ mba pɔɖɔkʋʋ ɛ-paɣtʋ yɔ.” (Wp. 7:9) Tɩwɩlɩɣ ɖɔɖɔ se Yehowa cakɩ ɛ-tɔm yɔɔ paa ɛzɩmtaa. (Yoz. 23:14) Ye ɖɩmaɣzɩ ɛzɩma Yehowa caɣ ɛ-tɔm yɔɔ nɛ pɩɖɛɛ yɔ pɩ-yɔɔ yɔ, pɩwɩlɩɣ se mba pɔsɔɔlɩ-ɩ nɛ pañaŋɩ-ɩ yɔ, papɩzɩɣ nɛ pataa-ɩ liu se ɛkaɣ-wɛ sɩnʋʋ hɔɔlɩŋ naalɛ ɩnɛ ɩ-taa: (1) Ɛɛkaɣ yebu se kaɖɛ nɖɩ ɖɩ-taa ɖɩwɛɛ yɔ, ɖɩpaɣlɩ nɛ ɖɩkɔɔ ɖɩcɛzɩ ɖo-ɖoŋ yɔɔ kaaʋ, nɛ (2) ɛkaɣ-ɖʋ ‘haʋ lɔŋ nɛ ɖoŋ’ nɛ ɖɩpɩzɩ ɖɩwabɩ-ɖɩ.
Ɛzɩma Yehowa haɣ lɔŋ nɛ ɖoŋ mba pataɣ-ɩ liu yɔ se ɛsɩnɩ-wɛ nɛ pawa kala wena pakatɩɣ yɔ? Toovenim taa lɛ, ye pɩkɛ ɛ-sɔɔlɩm yɔ, eyeki nɛ kaɖɛ nɖɩ ɖɩsɩɩ tɩnaɣ. Ɛlɛ ɛzɩ Pɔɔlɩ yɔɔdʋʋ yɔ, Yehowa ‘haɣ-ɖʋ lɔŋ nɛ ɖoŋ se ɖɩwa’ yaa ɖɩɖɔkɩ ɖa-tɩ kaɖɛ nɖɩ ɖɩ-taa ɖɩwɛɛ yɔ ɖɩ-taa. Ye mbʋ hɔɔlɩŋ sakɩyɛ taa lɛ, Yehowa ‘haɣ-ɖʋ lɔŋ nɛ ɖoŋ’ yaa mbʋ ɖeyi ɖeyi pɩpɔzʋʋ-ɖʋ se ɖɩpɩzɩ ɖɩɖɔkɩ ɖa-tɩ camɩyɛ kaɖɛ nɖɩ ɖɩtalɩ-ɖʋ yɔ ɖɩ-taa yɔ. Yele nɛ ɖɩna nʋmɔŋ weyi ɩ-yɔɔ Yehowa tɩŋɩɣna nɛ ɛsɩɣnɩ-ɖʋ se ɖɩpɩzɩ nɛ ɖɩwa kala yɔ, ɩ-taa nɩɩyɩ.
▪ “Ɛhɛzɩɣ ɖa-laŋɩyɛ kʋñɔmɩŋ kpeekpe taa.” (2 Kɔr. 1:3, 4) Yehowa pɩzɩɣ nɛ ɛtɩŋnɩ Bibl nɛ fezuu kiɖeɖeu yɔɔ nɛ ɛhɛzɩ ɖa-laŋɩyɛ nɛ ɖa-maɣzɩm. Ɛpɩzɩɣ ɛtɩŋnɩ ɖɔɖɔ fezuu taa tɔɔnasɩ nzɩ yom siɣsiɣ tʋ nɛ lɔŋsɩnɖʋ haɣ-ɖʋ yɔ sɩ-yɔɔ nɛ ɛhɛzɩ ɖa-laŋɩyɛ nɛ ɖa-maɣzɩm.—Mat. 24:45; Yoh. 14:16; Roma 15:4.
▪ Ɛtɩŋɩɣnɩ fezuu kiɖeɖeu yɔɔ nɛ eɖiyiɣ-ɖʋ. (Yoh. 14:26) Alɩwaatʋ ndʋ ɖɩkatɩɣ kala yɔ, fezuu kiɖeɖeu pɩzɩɣ kɩsɩnɩ-ɖʋ nɛ ɖɩtɔzɩ Bibl taa tɔm natʋyʋ yɔɔ yaa paɣtʋ kila naayɛ yɔɔ nɛ pɩsɩnɩ-ɖʋ nɛ ɖɩkpaɣ lɩmaɣza kɩbana.
▪ Ɛpɩzɩɣ nɛ ɛtɩŋnɩ e-tiyiyaa yɔɔ nɛ ɛsɩnɩ-ɖʋ.—Ebr. 1:14.
▪ Ɛpɩzɩɣ ɖɔɖɔ nɛ ɛtɩŋnɩ koobiya yɔɔ nɛ ɛsɩnɩ-ɖʋ. Alɩwaatʋ ndʋ koobiya tɩŋɩɣnɩ pɔ-tɔm pee kɩbana yaa pa-lakasɩ kɩbanzɩ yɔɔ nɛ pakpazɩɣ-ɖʋ ɖoŋ yɔ, ɖɩnaɣ Yehowa sɩnʋʋ mbʋ.—Kol. 4:11.
Lɛɛlɛɛyɔ, tobi lɛ, ɛzɩma pɩwɛɛ se ɖɩnɩɩ 1 Kɔrɛntɩ 10:13 taa? Yehowa ɛɛtɔzʋʋ nɛ ɛlɩzɩɣ kala wena pɩwɛɛ se atalɩ-ɖʋ yɔ. Ɛlɛ ye ɖɩkatɩ kaɖɛ naɖɩyɛ yɔ, pɩwɛɛ se ɖɩtɔzɩ tɔm tʋnɛ tɩ-yɔɔ: Ye ɖɩtaɣ Yehowa liu nɛ ɖa-laŋɩyɛ pilim yɔ, ɛɛkaɣ yebu kaaʋ se kaɖɛ nɖɩ ɖɩcɛzɩ ɖo-ɖoŋ; ɛlɛ ɛkaɣ-ɖʋ ‘haʋ lɔŋ nɛ ɖoŋ’ nɛ ɖɩpɩzɩ ɖɩɖɔkɩ ɖa-tɩ kaɖɛ nɖɩ ɖɩ-taa. Tɔm tʋnɛ tɩhɛzɩɣ ɖa-laŋa pɩdɩɩfɛyɩ.
(1 Kɔrɛntɩ mba 10:13) Takɩm nabʋyʋ tɩkɔɔ mɩ-yɔɔ nɛ pɩtɩkɛ mbʋ pɩtalɩɣ ɛyaa yɔ. Ɛlɛ Ɛsɔ wɛ siɣsiɣ, nɛ ɛɛkaɣ yebu se pɩtakɩ-mɩ nɛ pɩcɛzɩ mbʋ ɩpɩzɩɣ nɛ ɩkaɖɩna yɔ, ɛlɛ alɩwaatʋ ndʋ takɩm kɔŋ yɔ, ɛkaɣ-mɩ wɩlʋʋ nʋmɔʋ ŋgʋ kɩ-yɔɔ pɩwɛɛ se ɩtɩŋna yɔ nɛ ɩpɩzɩ ɩɖɔkɩ mɩ-laŋɩyɛ pɩ-taa.
(1 Kɔrɛntɩ mba 10:13) Takɩm nabʋyʋ tɩkɔɔ mɩ-yɔɔ nɛ pɩtɩkɛ mbʋ pɩtalɩɣ ɛyaa yɔ. Ɛlɛ Ɛsɔ wɛ siɣsiɣ, nɛ ɛɛkaɣ yebu se pɩtakɩ-mɩ nɛ pɩcɛzɩ mbʋ ɩpɩzɩɣ nɛ ɩkaɖɩna yɔ, ɛlɛ alɩwaatʋ ndʋ takɩm kɔŋ yɔ, ɛkaɣ-mɩ wɩlʋʋ nʋmɔʋ ŋgʋ kɩ-yɔɔ pɩwɛɛ se ɩtɩŋna yɔ nɛ ɩpɩzɩ ɩɖɔkɩ mɩ-laŋɩyɛ pɩ-taa.
Ðɩñɩnɩ fezuu taa ñɩm
(1 Kɔrɛntɩ mba 10:8) Ðɩtaacaɣ ɖɔɖɔ kʋzʋʋ kɩdɛkɛdʋʋ wezuu, ɛzɩ pa-taa nabɛyɛ caɣʋ kʋzʋʋ kɩdɛkɛdʋʋ wezuu, nɛ pa-taa ɛyaa 23 000 tɔlɩ kɩyakʋ kʋɖʋmʋʋ yɔ.
w04 1/4 29
Tɔm ndʋ ɖa-takayɩsɩ kalɩyaa pɔzʋʋ yɔ
Ɛbɛ yɔɔ 1 Kɔrɛntɩ mba 10:8 yɔɔdʋʋ se Izrayɛɛlɩ piya 23000 sɩbɩna kɩyakʋ kʋɖʋmʋʋ acɛyɛ labʋ yɔɔ nɛ Kɩgalʋʋ 25:9 ñɔyɔɔdʋʋ se Izrayɛɛlɩ piya 24000 sɩbɩna?
Lɩmaɣza wena a-tɔm ɖɩpɩzɩɣ nɛ ɖɩyɔɔdɩ yɔ aɖɔwa. Lɩmaɣzɩyɛ kajalaɣ ñɩnɖɛ lɛ se, pɩtɩla ɛyaa mba paasɩba yɔ paawɛ 23000 nɛ 24 000 pɛ-hɛkʋ taa, nɛ pʋyɔɔ lɛ, nɔɔyʋ pɩzaɣ se ɛkɔ tɔm ñʋʋ se pɛkpɛndɩ 23 000 yaa 24 000.
Lɩmaɣzɩyɛ lɛɛɖɛ yɔ. Apostoloo Pɔɔlɩ kpaɣ Sitiim Izrayɛɛlɩ piya kɛdaɣ nɛ ɛpakɩnɩ Krɩstʋ ñɩma mba paawɛ Kɔrɛntɩ tɛtʋ taa yɔ. Wezuu kɩdɛkɛdʋʋ caɣʋ kaatɔyɩ tɛtʋ ndʋ tɩ-taa siŋŋ. Ɛmawa se: “Ðɩtaacaɣ ɖɔɖɔ kʋzʋʋ kɩdɛkɛdʋʋ wezuu, ɛzɩ pa-taa nabɛyɛ caɣʋ kʋzʋʋ kɩdɛkɛdʋʋ wezuu, nɛ pa-taa ɛyaa 23 000 tɔlɩ kɩyakʋ kʋɖʋmʋʋ yɔ.” Mba pacaɣ kʋzʋʋ kɩdɛkɛdʋʋ wezuu nɛ Yehowa kʋ-wɛ pa-lakasɩ nzɩ sɩ-yɔɔ yɔ, mba Pɔɔlɩ yɔɔdaa se pɛkpɛndɩ 23 000.—1 Kɔrɛntɩ mba 10:8.
Ɛlɛ Kɩgalʋʋ ñʋʋ 25 ñɔyɔɔdʋʋ se “Izrayɛɛlɩ malɩnɩ Beelfegori. Nɛ pɩwɩzɩ Kɩbaɣlʋ.” Pʋyɔɔ Yehowa heyi Moyizi se ɛkʋ “samaɣ [taa] sɔsaa kpeekpe.” Moyizi ñaɖʋ tʋmɩyɛ nɖɩ Yehowa ɖʋ-ɩ yɔ tɔm hʋyaa. Pʋwayɩ Fineyaasɩ labɩ kpɛdɛyɛ nɛ ɛkʋ Izrayɛɛlɩ pɩɣa ŋga kɔkɔnɩ Madiyaanɩ halɩbɩɣa nakɛyɛ samaɣ taa yɔ lɛ, “kʋñɔŋ ɖɛɛ.” Kɛdaɣ ŋga, kɛtɛmnɩ tɔm tʋnɛ: “Pakʋ ɛyaa akpaba nɛɛlɛ nɛ naanza (24 000).”—Kɩgalʋʋ 25:1-9.
Pɩtʋʋ fɛyɩ se “samaɣ [taa] sɔsaa” mba tɔm hʋyaa kʋwa yɔ, pa nɛ ɛyaa mba Yehowa maɣmaɣ kʋwa yɔ, pɔ-tɔm pɔyɔɔdɩ Kɩgalʋʋ takayaɣ taa. Pɩtɩla yɔ, “samaɣ sɔsaa” mba tɔm hʋyaa kʋwa yɔ, paatalɩ ɛzɩ 1 000 mbʋ yɔ, mbʋ yebina nɛ pɩlɩɩ ɛyaa 24 000. Ye “samaɣ [taa] sɔsaa” mba pacaɣ kʋzʋʋ kɩdɛkɛdʋʋ wezuu, yaa paɖʋ nesi kazandʋ, yaa paahuuzi ɛsa lakasɩ kɩdɛkɛdɩsɩ nzɩ sɩ-yɔɔ kuhuuzuu yɔ, pɩɩkɛnɩ-wɛ kɩdɛkɛdɩm; mbʋ pʋyɔɔ yɔ “pamalɩnɩ Beelfegori.”
Bibl tɔm taa tazʋʋ takayaɣ nakɛyɛ yɔɔdaa se tɔm piye “pamalɩnɩ” pɩzɩɣ nɛ pɩwɩlɩ “ɛgbɛyɛ ɖʋʋ nɛ nɔɔyʋ.” Izrayɛɛlɩ samaɣ kaakɛnɩ samaɣ ŋga kaaha ka-tɩ Yehowa yɔ, ɛlɛ alɩwaatʋ ndʋ “pamalɩnɩ Beelfegori” yɔ, pɛcɛbɩ taabalɩyɛ nɖɩ ɖɩɩwɛ pa nɛ Ɛsɔ pɛ-kɛkʋ taa yɔ. Pɩnzɩ 700 mbʋ yɔ wayɩ lɛ, Yehowa tɩŋnɩ nayʋ Ozee yɔɔ nɛ ɛyɔɔdɩ Izrayɛɛlɩ piya yɔɔ se: “Pa-maɣmaɣ patalɩ [Beelfegori] nɛ powolo pasʋʋ sɩʋ kpeliɣa Koŋfusio nɛ pacaɣ kiniŋ ɛzɩ mbʋ pɔsɔɔlaa yɔ.” (Ozee 9:10) Mba payɩ palabɩ mbʋ yɔ, pɩɩmʋnaa se Ɛsɔ ɛhɔ pa-nɩŋgbaŋʋʋ. Pʋyɔɔ Moyizi tɔzɩ Izrayɛɛlɩ piya se: “Mɩ-ɛsa na mbʋ mbʋ Kɩbaɣlʋ laba Beelfegori yɔ, ɛtɔyɩtɩ ɛ-tɛɛ luŋiyaa tɔyɩtʋʋ mbʋ mɩ-hɛkʋ taa yɔ.”—Wayɩ Wayɩ Paɣtʋ 4:3.
(1 Kɔrɛntɩ mba 11:5, 6) ɛlɛ halʋ weyi ɛtɩmɩɣ yaa ɛyɔɔdʋʋ natʋ tɔm nɛ etihuuzi ɛ-ñʋʋ yɔɔ yɔ, ɛɖʋʋ ɛ-ñʋʋdʋ fɛyɛ, mbʋ pʋyɔɔ yɔ pɩwɛ ɖeyi ɖeyi ɛzɩ halʋ weyi ɛhʋm ɛ-ñʋʋ koloŋgolo yɔ. Mbʋ pʋyɔɔ yɔ, ye halʋ eehuuzuu ɛ-ñʋʋ yɔɔ yɔ, pɩwɛɛ se eyele nɛ pɔkɔ ɛ-ñɔsɩ; ɛlɛ ye pɩkɛnɩ halʋ fɛyɛ se eyele nɛ pɔkɔ ɛ-ñɔsɩ yaa ɛhʋ koloŋgolo yɔ, pʋbʋ pɩwɛɛ se ehuuzi ɛ-ñʋʋ yɔɔ.
(1 Kɔrɛntɩ mba 11:10) Pʋyɔɔ pɩwɛɛ se halʋ ɛwɛɛnɩ ɛ-ñʋʋ yɔɔ yʋsaɣ ŋga kawɩlɩɣ se ɛwɛ ñʋʋdʋ nɔɔyʋ tɛɛ yɔ, Ɛsɔ tiyiyaa yɔɔ.
w15 15/2 30
Tɔm ndʋ ɖa-takayɩsɩ kalɩyaa pɔzʋʋ yɔ
Ye koobu halɩñɩnʋ nɔɔyʋ nɛ koobu abalɩñɩnʋ palɩ tɔm susuu, pɩkɛnɩ kɩjɛyʋʋ se koobu halɩñɩnʋ ete ɛ-ñʋʋ kɛdɛɛka pʋcɔ nɛ ɛkpɛlɩkɩnɩ nɔɔyʋ Bibl yaa we?
▪ 15 juillet 2002 tɛ Feŋuu Tilimiye tɛ tɔm ñʋʋ “Tɔm ndʋ ɖa-takayɩsɩ kalɩyaa pɔzʋʋ yɔ,” tɩ-taa ɖɩɩyɔɔdaa se, ye koobu halɩñɩnʋ nɔɔyʋ nɛ koobu abalɩñɩnʋ palɩ tɔm susuu yɔ, paa pamɩyɩsɩ koobu abalɩñɩnʋ lɩm yaa patɩmɩyɩsɩtɩ-ɩ lɩm yɔ, pɩkɛnɩ kɩjɛyʋʋ se koobu halɩñɩnʋ ete ɛ-ñʋʋ kɛdɛɛka pʋcɔ nɛ ɛkpɛlɩkɩnɩ nɔɔyʋ Bibl. Ɛlɛ ɖɩtasɩ tazʋʋ tɔm taa lɛ, ɖɩna se pɩpɔzʋʋ se ɖɩla lɛɣzɩtʋ natʋyʋ pazɩ tɔm ndʋ tɩ-yɔɔ.
Ye tɔm susuyu abalɩñɩnʋ weyi ɛ nɛ koobu halɩñɩnʋ palɩwa yɔ, pamɩyɩsɩ-ɩ lɩm yɔ, pɛkɛnɩ kɩjɛyʋʋ se koobu halɩñɩnʋ ɛnʋ ete ɛ-ñʋʋ kɛdɛɛka pʋcɔ nɛ ɛkpɛlɩkɩnɩ weyi ɛ nɛ ɩ paatɛm paɣzʋʋ Bibl kpɛlɩkʋʋ yɔ. Ye ɛlabɩ mbʋ yɔ, pɩwɩlɩɣ se ɛwɛnɩ ñamtʋ sɔsɔtʋ ɖʋtʋ ndʋ Yehowa labɩ Krɩstʋ ɛgbɛyɛ taa yɔ tɩ-yɔɔ, mbʋ pʋyɔɔ yɔ ɛwɛɛ nɛ ɛlakɩ tʋmɩyɛ nɖɩ pɩpɔzaa se koobu abalɩñɩnʋ ɛla yɔ. (1 Kɔr. 11:5, 6, 10) Yaa koobu halɩñɩnʋ ɛnʋ ɛpɩzɩɣ nɛ ɛpɔzɩ koobu abalɩñɩnʋ weyi ɛ nɛ ɩ palɩwa yɔ se ɛkpɛlɩkɩnɩ Bibl kpɛlɩkɩyʋ ɛnʋ ye koobu abalɩñɩnʋ ɛnʋ ɛmʋnaa nɛ ɛpɩzɩɣ se ɛkpɛlɩkɩnɩ-ɩ yɔ.
Ɛlɛ ye tɔm susuyu abalɩñɩnʋ weyi ɛ nɛ koobu halɩñɩnʋ palɩwa yɔ, patɩmɩyɩsɩtɩ-ɩ lɩm nɛ ɛtɩkɛ koobu halɩñɩnʋ ɛnʋ ɛ-walʋ yɔ, Bibl paɣtʋ natʋyʋ ɛɛwɩlɩɣ se pɩkɛnɩ-ɩ kɩjɛyʋʋ se ete ɛ-ñʋʋ kɛdɛɛka pʋcɔ nɛ ɛkpɛlɩkɩnɩ weyi ɛ nɛ ɩ paatɛm paɣzʋʋ Bibl kpɛlɩkʋʋ yɔ. Ɛlɛ paa pɩtɩɩkɛ tɔm susuyu abalɩñɩnʋ weyi patɩmɩyɩsɩtɩ-ɩ lɩm yɔ, koobiya halɩñɩma nabɛyɛ teŋ pa-ñʋŋ, mbʋ pʋyɔɔ yɔ pɛ-ɛhʋyɛ cɛyɩɣ-wɛ.
Bibl kalʋʋ
(1 Kɔrɛntɩ mba 10:1-17) Koobiya, mɔnsɔɔlaa se ɩtɩlɩ se ɖɔ-cɔzɔnaa tɩŋa kaawɛ ɛsɔmɩnʋʋ tɛɛ nɛ pa-tɩŋa pɛtɛzɩ teŋgu 2 nɛ pamɩyɩsɩ pa-tɩŋa Moyizi taa pɩtɩŋnɩ ɛsɔmɩnʋʋ nɛ teŋgu pɔ-yɔɔ, 3 nɛ pa-tɩŋa pɔtɔɔ fezuu taa tɔɔnaɣ kʋɖʋmaɣ 4 nɛ pa-tɩŋa pɔñɔɔ fezuu taa lɩm kʋɖʋmʋm. Mbʋ pʋyɔɔ yɔ, pɔñɔwaɣ lɩm fezuu taa kaaʋ ŋgʋ kɩtɩŋaɣ-wɛ yɔ kɩ-taa, nɛ kaaʋ ŋgʋ, kɩɩsɩŋnɩ Krɩstʋ. 5 Paa mbʋ yɔ, pa-taa sakɩyɛ tɔm taakɛdɩnɩ Ɛsɔ, mbʋ pʋyɔɔ yɔ pakʋ-wɛ kañɩmbusuu taa. 6 Nɛ tɔm ndʋ tɩpɩsɩ-ɖʋ kɩɖaŋ, se pɩsa nɛ ɖɩtaasɔɔlɩ lakasɩ kɩdɛkɛdɩsɩ ɛzɩ paasɔɔlʋʋ-sɩ yɔ. 7 Nɛ ɖɩtaapɩsɩ ɖɔɖɔ sɩɩnaa layaa, ɛzɩ pa-taa nabɛyɛ labʋ yɔ; ɛzɩ pamaʋ yɔ: “Samaɣ caɣaa se kɔtɔɔ nɛ kɔñɔɔ. Nɛ kakʋyɩ se kɛmɛyɩ amɛya.” 8 Ðɩtaacaɣ ɖɔɖɔ kʋzʋʋ kɩdɛkɛdʋʋ wezuu, ɛzɩ pa-taa nabɛyɛ caɣʋ kʋzʋʋ kɩdɛkɛdʋʋ wezuu, nɛ pa-taa ɛyaa 23 000 tɔlɩ kɩyakʋ kʋɖʋmʋʋ yɔ. 9 Ðɩtaatakɩ ɖɔɖɔ Yehowa, ɛzɩ pa-taa nabɛyɛ takʋʋ-ɩ, nɛ ɖʋmaa ñasɩ-wɛ nɛ pasɩ yɔ. 10 Itaamidi mɩ-mɔɔŋ tɛɛ ɖɔɖɔ, ɛzɩ pa-taa nabɛyɛ miduu pɔ-mɔɔŋ tɛɛ, nɛ ɖɩzɩyʋ kʋ-wɛ yɔ. 11 Nɛ pɩtalɩ-wɛ mbʋ se pɩkɛnɩ kɩɖaŋ, nɛ pama pɩ-tɔm se papaɣ-ɖʋ, ɖa mba ɛjaɖɛ yɔɔ ɖʋtʋ tɛm talɩ-ɖʋ yɔ. 12 Pʋyɔɔ lɛ, weyi ɛmaɣzɩɣ se ɛsɩŋaa yɔ, ɛkpa ɛ-tɩ nɛ ɛtaatɔlɩ. 13 Takɩm nabʋyʋ tɩkɔɔ mɩ-yɔɔ nɛ pɩtɩkɛ mbʋ pɩtalɩɣ ɛyaa yɔ. Ɛlɛ Ɛsɔ wɛ siɣsiɣ, nɛ ɛɛkaɣ yebu se pɩtakɩ-mɩ nɛ pɩcɛzɩ mbʋ ɩpɩzɩɣ nɛ ɩkaɖɩna yɔ, ɛlɛ alɩwaatʋ ndʋ takɩm kɔŋ yɔ, ɛkaɣ-mɩ wɩlʋʋ nʋmɔʋ ŋgʋ kɩ-yɔɔ pɩwɛɛ se ɩtɩŋna yɔ nɛ ɩpɩzɩ ɩɖɔkɩ mɩ-laŋɩyɛ pɩ-taa. 14 Pʋyɔɔ lɛ, mɛ-ɛyaa kʋsɔɔlaa, ise sɩɩnaa latʋ. 15 Mɔyɔɔdʋʋnɩ-mɩ ɛzɩ ɛyaa mba pɛwɛnɩ lɛɣtʋ yɔ; mɩ-maɣmaɣ ɩmaɣzɩ tɔm ndʋ mɔyɔɔdʋʋ yɔ tɩ-yɔɔ nɛ ɩna. 16 Wazaɣ kɔpʋ ŋgʋ ɖɩwazɩɣ yɔ, kɩɩwɩlɩɣ se ɖɩka Krɩstʋ calɩm yaa we? Kpɔnʋ ŋgʋ ɖɩpɛlɩɣ yɔ, kɩɩwɩlɩɣ se ɖɩka Krɩstʋ tomnaɣ yaa we? 17 Ɛzɩma kpɔnʋ kʋɖʋmʋʋ wɛna yɔ pʋyɔɔ lɛ, paa ɖɩɖɔwa yɔ, ɖɩkɛ tomnaɣ kʋɖʋmaɣ, mbʋ pʋyɔɔ yɔ ɖa-tɩŋa ɖɩtayɩɣ kpɔnʋ kʋɖʋmʋʋ ŋgʋ.
22-28 AVRIL
ÑƖM MBƲ PƖWƐ ƐSƆTƆM TAA YƆ | 1 KƆRƐNTƖ MBA 14-16
“Ɛsɔ kaɣ kɛʋ ‘pɩtɩŋa paa anɩ’”
(1 Kɔrɛntɩ mba 15:24, 25) Pʋwayɩ lɛ, pɩtɩŋa pɩtɛŋ, alɩwaatʋ ndʋ ɛɖʋzʋʋ Kewiyaɣ ɛ-Caa nɛ ɛ-Ɛsɔ nesi tɛɛ yɔ, ɛtɛŋ ɖɩzʋʋ kominawaa tɩŋa nɛ ñʋndɩnaa kpeekpe nɛ ɖoŋ kpeekpe lɛ. 25 Mbʋ pʋyɔɔ yɔ pɩwɛɛ se ɛtɔɔ kewiyitu nɛ pɩkɔɔ pɩtalɩ alɩwaatʋ ndʋ Ɛsɔ sɩ koyindinaa kpeekpe ɛ-nɩŋgbanzɩ tɛɛ yɔ.
w98 1/7 21 § 10
Pakaɣ ɖɩzʋʋ sɩm
10 “Pɩtɩŋa pɩtɛŋ.” Ɛbɛ tɩŋa tɛŋ? Krɩstʋ pɩnzɩ kudoku kewiyitu tɔɔʋ tɛŋna. Alɩwaatʋ ndʋ lɛ, Yesu lɩzɩɣ siɣsiɣ wɛtʋ nɛ tɩ luzuu nɛ ɛwɩlɩ nɛ ɛɖʋzɩ kewiyitu ɛ-Caa nesi tɛɛ. (Natʋ 20:4) Alɩwaatʋ ndʋ lɛ, kaɖʋwa ŋga Ɛsɔ laba se “ekpeɣli wondu tɩŋa Krɩstʋ taa” yɔ kalaba lɛ! (Efɛɛzɩ mba 1:9, 10) Ɛlɛ pʋcɔ nɛ pɩtalɩ mbʋ lɛ, Krɩstʋ kaɣ “ɖɩzʋʋ kominawaa tɩŋa nɛ ñʋndɩnaa kpeekpe nɛ ɖoŋ” weyi payɩ ɛkaɖɩɣnɩ Ɛsɔ Caabiyuu sɔɔlɩm yɔ. Pɩɩsɩɣnɩ mbʋ pakaɣ ɖɩzʋʋ Armaagedɔɔ you taa yɔ pi-ɖeke. (Natʋ 16:16; 19:11-21) Pɔɔlɩ yɔɔdaa se: “Pɩwɛɛ se [Krɩstʋ] ɛtɔɔ kewiyitu nɛ pɩkɔɔ pɩtalɩ alɩwaatʋ ndʋ Ɛsɔ sɩ koyindinaa kpeekpe ɛ-nɩŋgbanzɩ tɛɛ yɔ. Nɛ kɛdɛzaɣ koyindu weyi pakaɣ-ɩ ɖɩzʋʋ yɔ, ɛnʋ lɛ sɩm.” (1 Kɔrɛntɩ mba 15:25, 26) Ɛɛɛ, mbʋ payɩ Aɖam kɩwɛɛkɩm nɛ sɩm pɔkɔnaa yɔ, pɩtɩŋa pɩɩtasɩɣ wɛʋ. Ye mbʋ, Ɛsɔ kaɣ fezuu mba pɛwɛ pɩlaŋ taa yɔ nɛ patasɩ wezuu caɣʋ.—Yohanɛɛsɩ 5:28.
(1 Kɔrɛntɩ mba 15:26) Nɛ kɛdɛzaɣ koyindu weyi pakaɣ-ɩ ɖɩzʋʋ yɔ, ɛnʋ lɛ sɩm.
Kewiyaɣ yeki se Ɛsɔ sɔɔlɩm ɛla tɛtʋ yɔɔ
21 Nɛ sɩm yɔ, ɛbɛ pɩtɛŋnɩ-pʋ? Sɩm lɛ “[ɖɛ]-kɛdɛzaɣ koyindu.” Ɛyʋ nɔɔyʋ fɛyɩnɩ ɖoŋ sɩm ɛzɩdaa. (1 Kɔrɛntɩ 15:26) Ɛlɛ sɩm wakɩ Yehowa ɖɔɖɔ yaa we? Cɔnɩ tɔm ndʋ Izaayii kaayɔɔdaa yɔ. Ɛɛtɔm se: “[Yehowa] kaɣ ɖezuu sɩm kpaagbaa ɖezuu nɛ [Yehowa] Ɛsɔ kaɣ hɩzʋʋ ɛzɩtɛɣlɩm ɛyaa kpeekpe ɛzɩdaa.” (Iz. 25:8) Maɣzɩ pazɩ nɛ ŋna! Lɛsɩ, pɩlaŋ, yaa kʋñɔwiye pa-taa nabʋyʋ ɛɛtasɩɣ wɛʋ! Ɛlɛ taa leleŋ ɛzɩtɛɣlɩm kaɣnɩ wɛʋ alɩwaatʋ ndʋ Yehowa feziɣ sɩɖaa ɛzɩ ɛɛyɔɔdʋʋ yɔ! (Kalɩ Izaayii 26:19.) Alɩwaatʋ ndʋ tɩ-taa lɛ, wɩzasɩ nzɩ sɩm ɛɛkɔnaa yɔ, sɩ-tɩŋa sɩkaɣ mʋʋʋ.
(1 Kɔrɛntɩ mba 15:27, 28) Mbʋ pʋyɔɔ yɔ Ɛsɔ “luzi wondu tɩŋa ɛ-nɩŋgbanzɩ tɛɛ.” Ɛlɛ ɛyɔɔdʋʋ se ‘poluzi wondu tɩŋa’ yɔ, pɩwɩlɩɣ kpayɩ kpayɩ se Weyi eluzi wondu tɩŋa ɛ-tɛɛ yɔ, ɛfɛyɩ pɩ-taa. 28 Ɛlɛ alɩwaatʋ ndʋ poluzuu wondu tɩŋa ɛ-tɛɛ yɔ, Pɩyalʋ maɣmaɣ kaɣ ɛ-tɩ luzuu ɖɔɖɔ Weyi eluzi wondu tɩŋa ɛ-tɛɛ yɔ ɛ-tɛɛ, se Ɛsɔ ɛkɛ pɩtɩŋa paa anɩ.
w12 15/9 12 § 17
Laŋhɛzɩyɛ kaɣ wɛʋ pɩnzɩ kudoku nɛ halɩ pɩcɛzɩ mbʋ
17 Tɔm pee naayɛ fɛyɩ se papɩzɩɣ nɛ pakpaɣ nɛ pɛkɛdɩnɩ wɛtʋ ndʋ tɩkaɣ wɛʋ yɔ nɛ pɩkɩlɩ se pɔyɔɔdɩ se Ɛsɔ kaɣ kɛʋ “pɩtɩŋa paa anɩ.” Tɔm ndʋ tɩ-tɔbʋʋ lɛ suwe? Ðaɣnɩ maɣzʋʋ alɩwaatʋ ndʋ Aɖam nɛ Ɛva paatalɩ pilim nɛ pɛwɛɛ Edɛɛnɩ kaɖaɣ taa yɔ tɩ-yɔɔ nɛ ŋna! Pʋbʋ taa lɛ, paawɛ kedeŋa kpeekpe yɔɔ Ɛsɔ hɔʋ ŋgʋ kɩwɛ laŋhɛzɩyɛ nɛ nɔɔ kʋɖʋmaɣ taa yɔ kɩ-taa. Yehowa, kedeŋa kpeekpe yɔɔ Kewiyitu Kɩkɩlɩtʋ Tɔɔyʋ maɣmaɣ ɖiyaɣni e-wondu kɩlɩzɩtʋ pʋ-tɔbʋʋ se Ɛsɔ tiyiyaa nɛ ɛyaa pe-kpeekpe. Papɩzaɣ se pɔyɔɔdɩnɩ Yehowa kpaagbaa patɩŋɩɣnɩ nɔɔyʋ yɔɔ, pɛsɛɛ-ɩ, nɛ ɛlɛ wazɩ-wɛ. Ɛɛkɛ “pɩtɩŋa paa anɩ.”
Ðɩñɩnɩ fezuu taa ñɩm
(1 Kɔrɛntɩ mba 14:34, 35) halaa isu tamɩyɛ agbaa taa, mbʋ pʋyɔɔ yɔ pɩtɩha-wɛ nʋmɔʋ se pɔyɔɔdɩ. Ɛlɛ poluzi pa-tɩ, ɛzɩ Paɣtʋ ɖɔɖɔ yɔɔdʋʋ yɔ. 35 Ye pañɩnɩɣ se patɩlɩ tɔm natʋyʋ yɔ, pɔpɔzɩ pa-walaa ɖɩɣa, mbʋ pʋyɔɔ yɔ pɩkɛnɩ halʋ fɛyɛ se ɛyɔɔdɩ ɛgbɛyɛ taa.
w12 1/9 9, aɖakaɣ
Apostoloo Pɔɔlɩ kizini halaa se pataayɔɔdɩ?
Apostoloo Pɔɔlɩ mawa se: “Halaa isu tamɩyɛ agbaa taa.” (1 Kɔrɛntɩ mba 14:34) Tɔm ndʋ, tɩwɩlɩɣ suwe? Ɛzɩ eniŋaɣ halaa lɔŋsɩnɖɛ yaa we? Aayɩ. Toovenim taa lɛ, alɩwaatʋ sakɩyɛ taa lɛ, ɛyɔɔdaɣ lɔŋ kɩbaŋ weyi halaa pɩzɩɣ nɛ pɛkpɛlɩkɩ ɛyaa lalaa yɔ ɩ-tɔm. (2 Timootee 1:5; Tiiti 2:3-5) Takayaɣ ŋga ɛma Kɔrɛntɩ mba yɔ ka-taa lɛ, pɩtɩkɛ halaa ɖeke ɛtasɩ lɔŋ, ɛlɛ ɛtasɩ lɔŋ ɖɔɖɔ ɛyaa mba paawɛnɩ kʋnʋmɩŋ yɔɔdaɣ haɖɛ yaa natʋ haɖɛ yɔ se “posu tamɩyɛ” alɩwaatʋ ndʋ ɛyʋ lɛlʋ ɖiɣni yɔɔdʋʋ yɔ. (1 Kɔrɛntɩ mba 14:26-30, 33) Pɩtʋʋ fɛyɩ se alɩwaatʋ ndʋ tɩ-taa lɛ, halaa mba paamʋ Ɛsɔtɔm yɔ, pa-taa nabɛyɛ taa kaawɛ leleŋ kpem nɛ tɔm kɩfatʋ ndʋ tɩ-yɔɔ palɩwa yɔ, nɛ halɩ pasɩnzɩɣ tɔm yɔɔdɩyaa nɛ pɔpɔzʋʋ-wɛ tɔm ɛzɩ ɛjaɖɛ hɔɔlʋʋ ŋgʋ kɩ-taa halaa tɩɩlakʋʋ yɔ. Pɩsa nɛ wɛtʋ ndʋ tɩsɩŋ lɛ, Pɔɔlɩ seɣti halaa se ye pɛwɛnɩ natʋyʋ lɛ, “pɔpɔzɩ pa-walaa ɖɩɣa.”—1 Kɔrɛntɩ mba 14:35.
(1 Kɔrɛntɩ mba 15:53) Mbʋ pʋyɔɔ yɔ pɩwɛɛ se mbʋ pɩɖazɩɣ yɔ, pɩpɩsɩ mbʋ pɩɩɖazɩɣ yɔ, nɛ mbʋ pɩsɩkɩ yɔ, pɩpɩsɩ mbʋ pɩɩsɩkɩ yɔ.
it-1 1180-1181
Maaɖazɩɣ maaɖazɩɣ wɛtʋ
Ɛzɩ pefezuu Yesu yɔ, mbʋ ɖɔɖɔ pefeziɣ mba ɛ nɛ wɛ pakaɣ kewiyitu tɔɔʋ yɔ. Pɩtasɩnɩ se pefeziɣ-wɛ nɛ pɛkɛ feziŋ weyi ɩwɛɣnɩ wezuu maatɛŋ yɔ lɛ, pɛwɛɣnɩ ɖɔɖɔ maasɩkɩ maasɩkɩ nɛ maaɖazɩɣ maaɖazɩɣ wɛtʋ. Paacaɣ wezuu, pɛsɛɛ Ɛsɔ nɛ siɣsiɣ wɛtʋ, nɛ pasɩbɩnɩ tomnasɩ nzɩ sɩɖazɩɣ yɔ, ɛlɛ lɛɛlɛɛyɔ lɛ, ɛzɩ Pɔɔlɩ lɩzʋʋ pɩ-taa kpayɩ kpayɩ 1 Kɔrɛntɩ mba 15:42-54 taa yɔ, pefeziɣ-wɛ nɛ fezuu taa maaɖazɩɣ maaɖazɩɣ tomnasɩ. Maasɩkɩ maasɩkɩ wɛtʋ ndʋ pɛwɛna yɔ, tɩwɩlɩɣ se pe-wezuu ɩɩkaɣ sɩʋ tɩnaɣ nɛ nɔɔyʋ ɛɛkaɣ-wɛ ɖɩzʋʋ; nɛ maaɖazɩɣ maaɖazɩɣ wɛtʋ ñawɩlɩɣ se tomnaɣ ŋga Ɛsɔ ha-wɛ yɔ, kaapɩzɩɣ nɛ kɛwɛɛkɩ yaa kaɖazɩ hɔɔlʋʋ nakʋyʋ taa. Ye mbʋ Ɛsɔ ha-wɛ ɖoŋ nɛ pɛwɛɛ pa-tɩ yɔɔ kiya nɛ pɛfɛyɩ ɛzɩ e-wondu kɩlɩzɩtʋ lɛɛtʋ yɔ. Pɩwɩlɩɣ kaɣlaa se Ɛsɔ taɣ-wɛ liu siŋŋ. Paa pɛwɛnɩ maaɖazɩɣ maaɖazɩɣ nɛ maasɩkɩ maasɩkɩ wɛtʋ yɔ, pɩtɩwɩlɩ se patɩtasɩ wɛʋ Yehowa ɖoŋ tɛɛ. Nɛ pakaɣ wobu pɩ-yɔɔ nɛ poluzuu pa-tɩ nɛ palakɩ pa-Caa sɔɔlɩm nɛ pɔɖɔŋ ɛ-paɣtʋ yɔɔ ɛzɩ pa-ñʋʋdʋ Krɩstʋ Yesu yɔ.—1Kɔ 15:23-28; Kalɩ âme; immortalité.
Bibl kalʋʋ
(1 Kɔrɛntɩ mba 14:20-40) Koobiya, ɩtaapɩsɩ piya cikpesi mɩ-tɔm taa nɩʋ lɛɣtʋ taa, ɛlɛ ɩkɛ piya cikpesi kɩdɛkɛdɩm labʋ hɔɔlʋʋ taa; nɛ ɩpɩsɩ sɔsaa mɩ-tɔm taa nɩʋ lɛɣtʋ taa. 21 Pama Paɣtʋ taa se: “‘Mankaɣ kpaɣʋ ɛyaa mba pɔyɔɔdʋʋ kʋnʋmɩŋ lɛɛŋ yɔ pa-nzʋlʋma nɛ agɔma ndomee nɛ mɔyɔɔdɩnɩ samaɣ kanɛ, nɛ halɩ kakaɣ kizuu se kaawelisiɣni-m,’ Yehowa yɔɔdʋʋna.” 22 Ye mbʋ, kʋnʋmɩŋ tɩkɛ mba pɛwɛnɩ tisuu yɔ pa-yʋsaɣ, ɛlɛ ɩkɛ mba pɛfɛyɩnɩ tisuu yɔ pa-yʋsaɣ, piyele nɛ mba pɛfɛyɩnɩ tisuu yɔ pɩtɩkɛ mba tɩnɩ natʋ tɔm, ɛlɛ mba pɛwɛnɩ tisuu yɔ, mba tɩnɩ-tʋ. 23 Pʋyɔɔ lɛ, ye ɛgbɛyɛ tɩŋa ekpeɣli lone kʋɖʋmɖɩyɛ taa nɛ ɛyaa tɩŋa yɔɔdʋʋ kʋnʋmɩŋ lɛɛŋ, ɛlɛ ɛyaa yem waa yaa mba pɛfɛyɩnɩ tisuu yɔ pasʋʋ yɔ, paakaɣ yɔɔdʋʋ se mɩ-ñʋŋ taa cɔwa yaa we? 24 Ɛlɛ ye mɩ-tɩŋa ɩwɛɛ nɛ ɩyɔɔdʋʋ natʋ tɔm nɛ weyi ɛfɛyɩnɩ tisuu yɔ yaa ɛyʋ yem nɔɔyʋ sʋʋ yɔ, mɩ-tɩŋa mɩ-tɔm kaɣ-ɩ tɔm kizinuu nɛ tiseɣti-i nɛ ɛtazɩ ɛ-taa tete. 25 Piyeki nɛ pikuli ɛ-laŋɩyɛ taa mɛsaɣ tɛɛ tɔm yɔɔ, nɛ ɛkaɣ pam ɛ-ɛsa nɛ tɛtʋ nɛ ɛsɛɛ Ɛsɔ nɛ ɛtɔ se: “Toovenim taa lɛ, Ɛsɔ wɛ mɩ-hɛkʋ taa.” 26 Ye mbʋ koobiya, ɛbɛ pɩwɛɛ se ɩla yɔ? Alɩwaatʋ ndʋ ikpeɣliɣ yɔ, nɔɔyʋ wɛnɩ keɣa nakɛyɛ, lɛlʋ ñɛwɛnɩ wɩlɩtʋ natʋyʋ, lɛlʋ ñɛwɛɛnɩ natʋ natʋyʋ, lɛlʋ ñɛwɛɛnɩ kʋnʋŋ nakʋyʋ, nɛ lɛlʋ ñɛwɛɛnɩ tɔm ɖɛzʋʋ. Ɩla pɩtɩŋa se ɩkpazɩ ɖama ɖoŋ. 27 Nɛ ye nɔɔyʋ ɛyɔɔdʋʋ kʋnʋŋ lɛɛkʋ yɔ, pɩsɩɩnɩ naalɛ yaa pɩkɩlaa yɔ naadozo, nɛ pɔyɔɔdɩ kʋɖʋm kʋɖʋm, nɛ pɩwɛɛ se nɔɔyʋ ɛɖɛzɩ. 28 Ɛlɛ ye tɔm ɖɛzɩyʋ nɔɔyʋ ɛfɛyɩ yɔ, pɩwɛɛ se esu tamɩyɛ ɛgbɛyɛ taa nɛ ɛyɔɔdɩnɩ ɛ-maɣmaɣ ɛ-tɩ nɛ Ɛsɔ. 29 Nayaa naalɛ yaa naadozo ɩyɔɔdɩ, nɛ lalaa ñɩnɩ nɛ panɩɩ pʋ-tɔbʋʋ. 30 Ɛlɛ ye ɛyʋ lɛlʋ ɛmʋ natʋ natʋyʋ alɩwaatʋ ndʋ ɛcaɣ peeɖe yɔ, pɩwɛɛ se kajalaɣ tɔm yɔɔdɩyʋ esu. 31 Mbʋ pʋyɔɔ yɔ mɩ-tɩŋa ɩpɩzɩɣ nɛ ɩyɔɔdɩ natʋ tɔm kʋɖʋm kʋɖʋm, se pɩsa nɛ ɛyaa tɩŋa kpɛlɩkɩ nɛ pɩkpazɩ pa-tɩŋa ɖoŋ. 32 Nɛ pɩwɛɛ se nayaa ɩlabɩnɩ nayaa fezuu kʋjɔŋ tʋmɩyɛ camɩyɛ. 33 Mbʋ pʋyɔɔ yɔ, Ɛsɔ tɩkɛ Ɛsɔ weyi esidiɣ wondu yem yem yɔ, ɛlɛ ɛkɛ laŋhɛzɩyɛ tɛ Ɛsɔ. Ɛzɩ pɩwɛʋ ɛyaa kiɖeɖema agbaa tɩŋa taa yɔ, 34 halaa isu tamɩyɛ agbaa taa, mbʋ pʋyɔɔ yɔ pɩtɩha-wɛ nʋmɔʋ se pɔyɔɔdɩ. Ɛlɛ poluzi pa-tɩ, ɛzɩ Paɣtʋ ɖɔɖɔ yɔɔdʋʋ yɔ. 35 Ye pañɩnɩɣ se patɩlɩ tɔm natʋyʋ yɔ, pɔpɔzɩ pa-walaa ɖɩɣa, mbʋ pʋyɔɔ yɔ pɩkɛnɩ halʋ fɛyɛ se ɛyɔɔdɩ ɛgbɛyɛ taa. 36 Mɩ-cɔlɔ Ɛsɔ tɔm lɩnaa yaa we, yaa mi-ɖeke tɩtalaa? 37 Ye nɔɔyʋ ɛmaɣzɩɣ se ɛkɛ nayʋ yaa ɛwɛnɩ fezuu kʋjɔʋ yɔ, pɩwɛɛ se ɛtɩlɩ se tɔm ndʋ mɛwɛɛ nɛ mamaɣ-mɩ yɔ, tɩkɛ Kɩbaɣlʋ paɣtʋ. 38 Ɛlɛ ye nɔɔyʋ ekizi-tʋ yɔ, pakaɣ-ɩ kizuu. 39 Pʋyɔɔ lɛ, mon-koobiya, ɩwɛɛ pana ñaɣʋ yɔɔ se ɩyɔɔdɩ natʋ tɔm, ɛlɛ ɩtaaɖaŋ se pataayɔɔdɩ kʋnʋmɩŋ lɛɛŋ. 40 Ɛlɛ pɩtɩŋa pɩɖɔ camɩyɛ nɛ pʋtʋʋzɩ cɔlɩɩɩ.
29 AVRIL–5 MAI
ÑƖM MBƲ PƖWƐ ƐSƆTƆM TAA YƆ | 2 KƆRƐNTƖ MBA 1-3
“Yehowa kɛnɩ ‘laŋɩyɛ hɛzʋʋ kpeekpe tɛ Ɛsɔ’”
(2 Kɔrɛntɩ mba 1:3) Pasa ɖa-Kɩbaɣlʋ Yesu Krɩstʋ tɛ Ɛsɔ nɛ ɛ-Caa, weyi ɛkɛ pʋtɔdɩyɛ naʋ siŋŋ Caa nɛ laŋɩyɛ hɛzʋʋ kpeekpe tɛ Ɛsɔ yɔ,
“Mɩ nɛ mba pewiɣ yɔ, ɩkpɛndɩ iwii”
4 Ða-Caa pʋtɔdɩyɛ nayʋ ɖɔɖɔ lesi ɛyaa kʋsɔɔlaa; pa-taa nabɛyɛ yɔ, Abraham, Izaakɩ, Yakɔɔb, Moyizi nɛ Wiyaʋ Daviid. (Kɩg. 12:6-8; Mat. 22:31, 32; Tʋma 13:22) Bibl heyiɣ-ɖʋ se piselitiɣ Yehowa se alɩwaatʋ ɛtalɩ lɔŋ nɛ efezi-wɛ. (Yɔɔb 14:14, 15) Pa-taa kaɣ labʋ leleŋ siŋŋ mbʋ pʋyɔɔ pakaɣ caɣʋ wezuu ŋgʋ tɛtʋ yɔɔ yɔ, kɩ-wayɩ fɛyɩ. Maɣzɩ nɛ ŋna ɛzɩma Ɛsɔ Pɩyalʋ kʋsɔɔlʋ weyi ɛkɛ Ɛsɔ “leleŋ pʋyʋ” yɔ, ɛɛnɩ siziŋ siŋŋ nɛ ɛsɩ yɔ pɩ-yɔɔ nɛ ŋna! (Adu. 8:22, 30) Tɔm pee naayɛ fɛyɩ se ɖɩkpaɣ nɛ ɖɩlɩzɩnɩ siziŋ weyi Yehowa nɩwa yɔ ɩ-taa.—Yoh. 5:20; 10:17.
(2 Kɔrɛntɩ mba 1:4) weyi ɛhɛzɩɣ ɖa-laŋa ɖa-nazɩm kpeekpe taa yɔ, se pɩsa nɛ ɖɩtɩŋnɩ laŋɩyɛ hɛzʋʋ mbʋ ɖɩmʋʋ Ɛsɔ cɔlɔ yɔ pɩ-yɔɔ nɛ ɖɩpɩzɩ ɖɩhɛzɩ lalaa laŋa paa nazɩm mbʋ lɛ pɩ-taa.
“Mɩ nɛ mba pewiɣ yɔ, ɩkpɛndɩ iwii”
14 Ɛzɩma pɩwɛ kaɖɛ se ɛyʋ ɛnɩɩ wɩzasɩ nzɩ sɩ-taa ɖeyi ɖeyi lɛlʋ wɛɛ yɔ pʋyɔɔ lɛ, pɩpɩzɩɣ nɛ pɩwɛɛ kaɖɛ ɛyʋ nɔɔyʋ se ɛtɩlɩ tɔm ndʋ ɖeyi ɖeyi pɩpɔzʋʋ se ɛyɔɔdɩ nɛ ɛhɛzɩnɩ weyi ɛwɛ wɩzasɩ taa yɔ ɛ-laŋɩyɛ yɔ. Paa mbʋ yɔ, Bibl yɔɔdʋʋ se “lɔŋsɩnɖaa nzʋlʋmɩyɛ waɣ kɩwaʋ.” (Adu. 12:18) Ɛyaa sakɩyɛ lakɩnɩ tʋmɩyɛ lɔŋ tasʋʋ mbʋ pɩwɛ takayaɣ ŋga payaɣ se Quand la mort frappe un être aimé. . .yɔ ka-taa yɔ. Ɛlɛ, nabʋyʋ taa mbʋ ɛyʋ pɩzɩɣ nɛ ɛla yɔ lɛ se ‘ɛ nɛ weyi ewiɣ yɔ, pɛkpɛndɩ nɛ pewii.’ (Roma 12:15) Gaby weyi ɛ-walʋ sɩba yɔ, ɛyɔɔdaa se: “Maawɛ wiluu yɔɔ paa ɛzɩmtaa. Pʋyɔɔ lɛ, alɩwaatʋ ndʋ koobiya kɔŋ mɔn-cɔlɔ nɛ pewiɣ ɖɔɖɔ lɛ, pɩhɛzɩɣ ma-laŋɩyɛ. Piyekaɣ nɛ manaɣ se pɩtɩkɛ men-ɖeke maawɛnɩ laŋwɛɛkɩyɛ taa.”
Ðɩñɩnɩ fezuu taa ñɩm
(2 Kɔrɛntɩ mba 1:22) Ɛɖʋ ɖɔɖɔ ɛ-mayaɣ ɖɔ-yɔɔ nɛ ɛha-ɖʋ mbʋ pɩkaɣ labʋ nɛ ɛsɩndaa yɔ, pɩ-yʋsaɣ, pʋ-tɔbʋʋ se fezuu, ɖa-laŋa taa.
Tɔm Ndʋ ɖa-takayɩsɩ kalɩyaa pɔzʋʋ yɔ
“Mayaɣ” ŋga nɛ “kʋjɔʋ” ŋgʋ Ɛsɔ tɔm se ɛhaɣ paa patam num weyi?—2 Kɔrɛntɩ 1:21, 22.
▪ Kʋjɔʋ: Takayaɣ nakɛyɛ yɔɔdaa se Grɛɛkɩ tɔm piye nɖɩ pɛɖɛzɩ 2 Kɔrɛntɩ 1:22 taa se “kʋjɔʋ” yɔ, palakaɣnɩ-ɖɩ tʋmɩyɛ “paɣtʋ lɩzʋʋ nɛ tadɩyɛ nʋmɔʋ taa” nɛ ɖɩwɩlɩɣ “liidiye yaa mbʋ ɛyʋ calɩɣ hɛyʋʋ wonuu nakʋyʋ yɔɔ se ɛwɩlɩ se ɛnʋ tɩnɩ-kʋ yɔ.” Alɩwaatʋ ndʋ pataɣ Krɩstʋ tʋ nɔɔyʋ num fezuu kiɖeɖeu ɖoŋ taa yɔ, pɩwɛ ɛzɩ Ɛsɔ cozi ɛ-kʋjɔʋ yɔɔ nɛ ɛha-ɩ nɛ pɩwɩlɩ se paa pɩɩla ɛzɩma yɔ, ɛkaɣ mʋʋ ɛ-kɩhɛyʋʋ yɔ. Pɔyɔɔdɩ kɩhɛyʋʋ ŋgʋ kɩ-tɔm 2 Kɔrɛntɩ 5:1-5 taa. Kɩhɛyʋʋ ŋgʋ lɛ se pakaɣ-wɛ haʋ fezuu taa tomnasɩ ɛsɔdaa nɛ paakaɣ sɩbʋ wiɖiyi kpa.—1 Kɔrɛntɩ 15:48-54.
Palakɩnɩ tɔm piye nɖɩ ɖɩ-ɖaɣʋ tʋmɩyɛ Grɛɛkɩ ŋgʋ pɔyɔɔdʋʋ sɔnɔ yɔ, kɩ-taa. Nɛ tɔm piye nɖɩ, ɖitukuuni kokooye nɖɩ nɔɔyʋ lɛɣ pɛlɛ se ɛwɩlɩ se ɛkaɣ-ɩ kpaɣʋ yɔ. Kɩɖaʋ kʋnɛ kɩmʋnɩ patam numwaa, mbʋ pʋyɔɔ yɔ Bibl yɔɔdaa se pakaɣ pɩsʋʋ Krɩstʋ halʋ.—2 Kɔrɛntɩ 11:2; Natʋ 21:2, 9.
▪ Mayaɣ: Caanaʋ taa lɛ, pañɩkaɣ wonuu nakʋyʋ yɔɔ mayaɣ nɛ pɩwɩlɩɣ se nɔɔyʋ tɩnɩ-kʋ nɛ kɩtɩkɛ cɛtɩm yaa mɩlɩm wonuu. Mbʋ ɖɔɖɔ Yehowa tɩŋnɩ fezuu kiɖeɖeu yɔɔ nɛ ɛyʋsɩ patam numwaa nɛ “mayaɣ” nakɛyɛ nɛ pɩwɩlɩ se ɛnʋ tɩnɩ-wɛ. (Efɛɛzɩ 1:13, 14) Ɛlɛ pʋcɔ nɛ mayaɣ ŋga kɛwɛɛ pa-taa paa weyi ɛ-yɔɔ tam lɛ, pɩwɛɛ se ɛɖɔkɩ e-siɣsiɣ wɛtʋ nɛ pɩkɔɔ pɩsɩɩnɩ ɛ-sɩm wiye yaa kʋñɔŋ sɔsɔʋ ɖɩbazɩyɛ.—Efɛɛzɩ 4:30; Natʋ 7:2-4.
(2 Kɔrɛntɩ mba 2:14-16) Ɛlɛ ɖɩsɛɣ Ɛsɔ se ɛlabaɣ lɛ, ɛnʋ weyi eɖiyiɣ-ɖʋ paa ɛzɩmtaa wabɩtʋ ɖɔnɛ naɖɩyɛ taa ɖa nɛ Krɩstʋ ɖɔ-nɔɔ kʋɖʋmaɣ labʋ taa nɛ ɛtɩŋɩɣnɩ ɖɔ-yɔɔ nɛ ɛmɩzɩɣ ɛ-sɩmtʋ sɔzɩŋ paa le yɔ! 15 Mbʋ pʋyɔɔ yɔ Ɛsɔ ɛsɩndaa lɛ, ɖɩkɛ Krɩstʋ sɔzɩŋ ɛyaa mba peɖiɣni hiɣu ñʋʋ yabʋ nɛ mba peɖiɣni lebu yɔ pɛ-hɛkʋ taa; 16 kɛdɛzaɣ ñɩma ɛsɩndaa lɛ, ɖɩkɛ sɩm sɔŋ weyi ewokini sɩm taa yɔ; kajalaɣ ñɩma ɛsɩndaa lɛ, ɖɩkɛ wezuu sɔzɩŋ weyi ewokini wezuu taa yɔ. Nɛ amʋnɩ camɩyɛ se ɛla tʋmɩyɛ nɖɩ?
w10 1/8 23
Ŋŋsɩm-tʋ?
Ɛbɛ yɔɔ apostoloo Pɔɔlɩ maɣzaɣ alɩwaatʋ ndʋ ɛyɔɔdɩ “wabɩtʋ ɖɔnɛ” tɔm yɔ?
▪ Pɔɔlɩ mawa se: “Ɛsɔ . . . ɛnʋ weyi eɖiyiɣ-ɖʋ paa ɛzɩmtaa wabɩtʋ ɖɔnɛ naɖɩyɛ taa ɖa nɛ Krɩstʋ ɖɔ-nɔɔ kʋɖʋmaɣ labʋ taa nɛ ɛtɩŋɩɣnɩ ɖɔ-yɔɔ nɛ ɛmɩzɩɣ ɛ-sɩmtʋ sɔzɩŋ paa le yɔ! Mbʋ pʋyɔɔ yɔ Ɛsɔ ɛsɩndaa lɛ, ɖɩkɛ Krɩstʋ sɔzɩŋ ɛyaa mba peɖiɣni hiɣu ñʋʋ yabʋ nɛ mba peɖiɣni lebu yɔ pɛ-hɛkʋ taa; kɛdɛzaɣ ñɩma ɛsɩndaa lɛ, ɖɩkɛ sɩm sɔŋ weyi ewokini sɩm taa yɔ; kajalaɣ ñɩma ɛsɩndaa lɛ, ɖɩkɛ wezuu sɔzɩŋ weyi ewokini wezuu taa yɔ.”—2 Kɔrɛntɩ mba 2:14-16.
Caanaʋ taa Roma mba alɩwaatʋ taa lɛ, ye Roma sɔdʋʋ sɔsɔ nɔɔyʋ ɛwabɩ Roma komina koyindinaa nabɛyɛ you taa yɔ, pɔɖɔŋ avɛɛ ɖɔnɛ nɛ paɖʋnɩ-ɩ hɩɖɛ ɛ-wabɩtʋ yɔɔ. Lakasɩ nzɩ sɩ-tɔm apostoloo Pɔɔlɩ yɔɔdaɣ. Paaɖɔŋ ɖɔnɛ nɖɩ lɛ, wondu ndʋ pehiɣ you taa yɔ, nɛ yomaa mba pakpa you taa yɔ, palɩzaɣ-wɛ nɛ pawɩlɩɣ samaɣ; pakʋʋ naŋ nɛ palakɩnɩ kɩlaŋ, nɛ alɩwaatʋ ndʋ tɩ-taa ɖɔɖɔ lɛ, samaɣ kpalɩɣ sɔdʋʋ sɔsɔɔ weyi ɛwabɩ you yɔ nɛ ɛ-sɔɔjanaa. Pɛtɛŋ ɖɔnɛ nɖɩ lɛ, palaɣ naŋ nɛ pakʋ ɖɔɖɔ salaka tɩnaa sakɩyɛ.
Kɩɖaʋ ŋgʋ Pɔɔlɩ kpaɣaa yɔ kɩ-taa, ɛyɔɔdaa se “ɖɩkɛ Krɩstʋ sɔzɩŋ” weyi ewokini wezuu taa yɔ nabɛyɛ nɛ ɖɩkɛ sɩm sɔŋ weyi ewokini sɩm taa yɔ lalaa. Takayaɣ nakɛyɛ yɔɔdɩ kɩɖaʋ ŋgʋ kɩ-yɔɔ se, “pɩtʋʋ fɛyɩ se sɔzɩŋ tɩlaaɖɩ ŋgʋ Roma mba sɔkaɣ miŋ alɩwaatʋ ndʋ paaɖɔŋ avɛɛ ɖɔnɛ yɔ, kɩ-yɔɔ Pɔɔlɩ maɣzaɣ nɛ ɛyɔɔdʋʋ tɔm ndʋ. Sɔzɩŋ ɛnʋ ɩwɩlɩɣ sɔɔjanaa se pawabɩ you nɛ ɩtɔzʋʋ mba pakpa you taa yɔ se sɩm ɖaŋnɩ-wɛ.”—The International Standard Bible Encyclopedia.
Bibl kalʋʋ
(2 Kɔrɛntɩ mba 3:1-18) Ðɩɖaɣnɩɣ paɣzʋʋ ɖa-tɩ sam yaa we? Yaa ɛzɩ ɛyaa nabɛyɛ yɔ, pɩcɛyaa se ɖɩcɛlɩ-mɩ samtʋ takayɩsɩ yaa ɖɩmʋ-sɩ mɩ-cɔlɔ? 2 Mɩ-maɣmaɣ ɩkɛ ɖa-takayaɣ, ŋga pama-kɛ ɖa-laŋa yɔɔ nɛ ɛyaa tɩŋa sɩm-kɛ nɛ pakalɩɣ-kɛ yɔ. 3 Mbʋ pʋyɔɔ yɔ ɩwɩlaa se ɩkɛ Krɩstʋ takayaɣ ŋga ɖa lɩmɖʋyaa ɖɩmawa yɔ, nɛ patɩma-kɛ nɛ tɔlɩm, ɛlɛ pama-kɛ nɛ Ɛsɔ ɛsadʋ fezuu; nɛ patɩma-kɛ pɛɛ kpenzalasɩ yɔɔ ɛlɛ tomnaɣ kpenzalasɩ yɔɔ, laŋa yɔɔ. 4 Ðɩwɛnɩ lidaʋ ŋgʋ Ɛsɔ yɔɔ pɩtɩŋnɩ Krɩstʋ yɔɔ. 5 Pɩtɩkɛ se ɖa-maɣmaɣ ɖɩmʋnɩ camɩyɛ se ɖɩmaɣzɩ se nabʋyʋ lɩɣnɩ ɖɔ-cɔlɔ, ɛlɛ Ɛsɔ yekina se ɖɩmʋnɩ camɩyɛ, 6 ɛnʋ weyi eyeba se toovenim taa lɛ, ɖɩmʋnɩ camɩyɛ nɛ ɖɩkɛ ɛgbɛyɛ kɩfaɖɛ naɖɩyɛ lɩmɖʋyaa yɔ, pɩtɩkɛnɩ paɣtʋ ndʋ pamawa yɔ tɩ-lɩmɖʋyaa, ɛlɛ fezuu lɩmɖʋyaa; mbʋ pʋyɔɔ yɔ paɣtʋ ndʋ pamawa yɔ tɩkʋʋ ɛyʋ tɔm se ɛmʋnɩ sɩm, ɛlɛ fezuu haɣ wezuu. 7 Lɛɛlɛɛyɔ, ye paɣtʋ ndʋ tɩkɔŋnɩ sɩm nɛ pama-tʋ pɛɛ yɔɔ yɔ, tɩkɔmnɩ samtʋ sɔsɔtʋ nɛ Izrayɛɛlɩ piya taapɩzɩɣ se sɩcɔnɩ Moyizi ɛsɩndaa pɩlɩɩnɩ samtʋ ndʋ tɩɩwɛ ɛ-ɛsɩndaa yɔ tɩ-yɔɔ, samtʋ ndʋ tɩkɔŋ mʋʋʋ yɔ, 8 tʋmɩyɛ nɖɩ fezuu ñalakɩ yɔ, ɖɩɩwɛɣnɩ samtʋ sɔsɔtʋ nɛ pɩkɩlɩ yaa we? 9 Mbʋ pʋyɔɔ yɔ, ye paɣtʋ ndʋ tɩkʋʋ ɛyʋ tɔm yɔ, tɩɩwɛnɩ samtʋ yɔ, tʋmɩyɛ nɖɩ ɖiyeki se ɛyaa ɩwɛɛ siɣsiɣ yɔ ɖɩwɛɣnɩ samtʋ siŋŋ nɛ pɩkɩlɩ! 10 Toovenim taa lɛ, halɩ mbʋ pɩɩwɛnɩ samtʋ ɖooo lɔŋ yɔ pilesi samtʋ, samtʋ ndʋ tɩkɩlɩ-tʋ yɔ tɩ-yɔɔ. 11 Mbʋ pʋyɔɔ yɔ, ye pɔkɔnɩ mbʋ pɩɩwɛɛ se pɩmʋʋ yɔ nɛ samtʋ yɔ, mbʋ pɩwɛɣ yɔ pɩ-samtʋ kaɣ paɣlʋʋ nɛ pɩkɩlɩ! 12 Ɛzɩma ɖɩwɛnɩ lidaʋ ŋgʋ yɔ pʋyɔɔ lɛ, ɖɩyɔɔdʋʋ kaalɛyɩtʋ siŋŋ, 13 nɛ ɖɩɩlakɩ mbʋ Moyizi laba alɩwaatʋ ndʋ eehuuzi kɛdɛɛka ɛ-ɛsɩndaa se pɩsa nɛ Izrayɛɛlɩ piya ɩtaacɔnɩ cuɖuɖu mbʋ pɩkaɣ mʋʋʋ yɔ pɩ-tɩnaɣ yɔɔ yɔ. 14 Ɛlɛ pa-maɣzɩm kaawɛ kpɩzɩŋ. Mbʋ pʋyɔɔ yɔ, pɩkɔm nɛ pɩtalɩnɩ sɔnɔ kɩyakʋ kʋnɛ yɔ, pohuuzi kɛdɛɛka kʋɖʋmaɣ ŋga mbʋ alɩwaatʋ ndʋ pakalɩɣ ɛgbɛyɛ kɩbɩnɖɛ yɔ, mbʋ pʋyɔɔ yɔ Krɩstʋ ɖeke yɔɔ pɩtɩŋɩɣna nɛ pokuli-kɛ. 15 Toovenim taa lɛ, pɩkɔm nɛ pɩtalɩnɩ sɔnɔ yɔ, alɩwaatʋ ndʋ pakalɩɣ tɔm ndʋ Moyizi mawa yɔ, kɛdɛɛka nakɛyɛ huuzuu pa-laŋa yɔɔ. 16 Ɛlɛ alɩwaatʋ ndʋ nɔɔyʋ pɩsɩɣnɩ Yehowa yɔɔ yɔ, pokuluu kɛdɛɛka ŋga. 17 Yehowa kɛ Fezuu, nɛ ɖenɖe Yehowa fezuu wɛɛ yɔ, tɩ-yɔɔ wɛʋ wɛ peeɖe. 18 Nɛ ɖa-tɩŋa lɛ, alɩwaatʋ ndʋ pokuli kɛdɛɛka ɖɛ-ɛsɩndaa nɛ ɖɩmaɣzɩɣnɩ Yehowa samtʋ ɛzɩ ñɩnɩŋ yɔ, ɖɩlɛɣzaa nɛ ɖɩpɩsɩ kɩlɛmʋʋ kʋɖʋmʋʋ ŋgʋ, kpaɣnɩ samtʋ nɛ piwolo samtʋ, ɛzɩ Yehowa weyi ɛkɛ Fezuu yɔ ɛlabʋ ɖeyi ɖeyi yɔ.