Ɛyaa wɛnɩ lɩmaɣza ndɩ ndɩ sʋlʋm yɔɔ. Nabɛyɛ sɔɔlaa se pa nɛ pa-taabalaa pakatɩɣ wiɖii wiɖii nɛ pɔñɔʋ sʋlʋm pazɩ. Lalaa lɛ, paatɩɩñɔʋ sʋlʋm paa ññɩɩ. Lalaa ɖɔɖɔ ñɔñɔʋ kpem nɛ pɩkʋʋ-wɛ. Suwe Bibl yɔɔdʋʋ sʋlʋm yɔɔ?

1. Sʋlʋm ñɔʋ kɛ kɩwɛɛkɩm na?

Bibl tɩyɔɔdɩ se pataañɔɔ sʋlʋm. Toovenim taa lɛ, kɩyɔɔdaa se kʋjɔŋ weyi Ɛsɔ labɩ ɛyaa yɔ, ɩ-taa nakʋyʋ lɛ sʋlʋm. Ðɩkalɩɣ Bibl taa se: «Ɛhaɣ vɛɛ ŋgʋ kɩlakɩ nɛ ɛyʋ laŋɩyɛ nɩɣ leleŋ yɔ.» (Keɣa 104:14, 15) Ɛyaa siɣsiɣ tɩnaa mba pɔ-tɔm pɔyɔɔdɩ Bibl taa yɔ, pa-taa nabɛyɛ ñɔwaɣ sʋlʋm.—1 Timootee 5:23.

2. Lɔŋ weyi Bibl tasɩɣ mba palɩzɩɣ se pɔñɔʋ sʋlʋm yɔ?

Yehowa ɖʋ paɣtʋ se ɖɩtaakpaŋ sʋlʋm nɛ ɖɩtaañɔɔ-pʋ ɖɔɖɔ nɛ pɩkʋ-ɖʋ. (Galaatii mba 5:21) Ðɩkalɩɣ Bibl taa se: «Taawɛɛ mba pɔñɔʋ sʋlʋm sakɩyɛ yɔ pɛ-hɛkʋ taa.» (Aduwa 23:20) Ye mbʋ ye ɖɩlɩzaa se ɖɩñɔʋ sʋlʋm yɔ, paa ɖɩñɔʋ-pʋ alɩwaatʋ ndʋ ɖɩwɛ ɖe-ɖeke yɔ, pɩwɛɛ se ɖɩñɔɔ nɛ pɩmaɣna; pɩfɛyɩ se ɖɩkɩlɩ ñɔʋ nɛ pisidi ɖa-lɩmaɣza taa nɛ pɩwɛɛ-ɖʋ kaɖɛ se ɖɩɖɔkɩ ɖa-tɩ ɖɔ-yɔɔdaɣ nɛ ɖa-lakasɩ taa yaa pɩcamɩ ɖɔ-tɔnʋʋ taa alaafɩya. Ye pɩwɛ-ɖʋ kaɖɛ se ɖɩñɔɔ sʋlʋm nɛ pɩmaɣna yɔ, pɩkɩlɩɣ ɖeu se ɖɩtaatɩɩñɔʋ paa ññɩɩ.

3. Ɛzɩma ɖɩpɩzɩɣ nɛ ɖɩwɩlɩ se ɖɩñaŋ lɩmaɣza wena lalaa kpakɩɣ sʋlʋm ñɔʋ hɔɔlʋʋ taa yɔ?

Paa weyi pɩwɛɛ se ɛlɩzɩ se ɛñɔʋ sʋlʋm yaa ɛɛñɔʋ. Ye nɔɔyʋ ɛlɩzaa se ɛñɔʋ sʋlʋm nɛ pɩmaɣna yɔ, pɩfɛyɩ se ɖɩkʋ ɛ-tɔm; nɛ ye nɔɔyʋ ɛlɩzaa se ɛɛñɔʋ sʋlʋm yɔ, pɩfɛyɩ ɖɔɖɔ se ɖɩñɩɣ ɛ-yɔɔ se ɛñɔɔ sʋlʋm. (Roma mba 14:10) Ye ɖɩnawa se ɛyaa ɩna-ɖʋ ɖiɖiɣni ñɔʋ sʋlʋm yɔ pituuluu-wɛ yɔ, ɖɩlɩzɩɣ se ɖɩɩñɔʋ sʋlʋm. (Kalɩ Roma mba 14:21.) ‘Ðɩɩñɩnɩɣ ɖa-maɣmaɣ ɖɛ-kɛzɛɣa, ɛlɛ ɖɩñɩnɩɣ lɛlʋ ñɩŋga.’—Kalɩ 1 Kɔrɛntɩ mba 10:23, 24.

TAZƖ NƐ PILIMI

4. Tazɩ nɛ ŋna se pɩwɛɛ se ŋñɔɔ sʋlʋm yaa ŋtaañɔɔ

Lɩmaɣza wena Yesu wɛnɩ sʋlʋm ñɔʋ yɔɔ? Pɩsa nɛ ɖɩtɩlɩ-yɛ lɛ, yele nɛ ɖɩyɔɔdɩ kajalaɣ piti lakasɩ nzɩ ɛlaba yɔ sɩ-tɔm. Ɩkalɩ Yohanɛɛsɩ 2:1-11, nɛ pʋwayɩ lɛ ɩtazɩ tɔm tʋnɛ tɩ-taa:

• Piti lakasɩ sɩnɛ sɩsɩɣnɩ-ɖʋ se ɖɩtɩlɩ se lɩmaɣza wena Yesu wɛnɩ sʋlʋm nɛ mba pɔñɔʋ sʋlʋm yɔ pɔ-yɔɔ?

• Yesu tɩɖʋ paɣtʋ se pataañɔɔ sʋlʋm. Ye mbʋ, lɩmaɣza wena pɩwɛɛ se Krɩstʋ tʋ ɛwɛɛnɩ weyi ɛñɔʋ sʋlʋm yɔ ɛ-yɔɔ?

Bibl haɣ nʋmɔʋ Krɩstʋ tʋ se ɛñɔɔ sʋlʋm. Paa mbʋ yɔ alɩwaatʋ natʋyʋ taa pɩwɛɣ ɖeu se ɛtaañɔɔ sʋlʋm. Ɩkalɩ Aduwa 22:3, nɛ pʋwayɩ lɛ ɩtazɩ nɛ ɩna ɛzɩma ɩpɩzɩɣ nɛ ɩlabɩnɩ tʋmɩyɛ paɣtʋ kiɖe nɖɩ ɖɩwɛ mayaɣ ŋga ka-taa yɔ wɛtʋ ndɩ ndɩ ndʋ tɩkɔŋ yɔ tɩ-taa yɔ:

• Ŋkaɣ saʋ lɔɔɖɩyɛ yaa ŋkaɣ labɩnʋʋ tʋmɩyɛ menziini nakʋyʋ.

• Ña nɛ hoɣa.

• Ðɔkɔtɔ nɔɔyʋ tasɩ-ŋ lɔŋ se ŋtaañɔɔ sʋlʋm.

• Pɩwɛ-ŋ kaɖɛ se ŋɖɔkɩ ña-tɩ nɛ ŋñɔɔ nɛ pɩmaɣna.

• Paɣtʋ ɛɛhaɣ-ŋ nʋmɔʋ se ŋñɔɔ sʋlʋm.

• Ña nɛ weyi ɩwɛɛ yɔ, ɛlɩzaa se ɛɛñɔʋ sʋlʋm mbʋ pʋyɔɔ yɔ, ɖooo lɛ ɛɛkɛ sʋlʋm yom.

Pɩpɔzʋʋ se ŋha ɛyaa sʋlʋm nesi ɖɔkʋʋ kazandʋ yaa kazandʋ lɛɛtʋ taa? Pɩsa nɛ ŋtɩlɩ mbʋ pɩpɩzɩɣ nɛ pɩsɩnɩ-ŋ wɛtʋ ndʋ tɩ-taa lɛ, ɩcɔnɩ VIDEO.

VIDEO: Pɩpɔzʋʋ se maha ɛyaa sʋlʋm na? (2:41)

Ɩkalɩ Roma mba 13:13 nɛ 1 Kɔrɛntɩ mba 10:31, 32. Ɩkalɩɣ paa mayaɣ ŋga nɛ pɩtɛ lɛ, ɩtazɩ tɔm tʋnɛ tɩ-taa:

• Ɛzɩma paɣtʋ kiɖe ɖɩnɛ ɖɩpɩzɩɣ nɛ ɖɩsɩnɩ-ŋ nɛ ŋkpaɣ lɩmaɣzɩyɛ nɖɩ ɖɩkɛdɩɣnɩ Yehowa yɔ?

5. Ðʋ ña-tɩ kamasɩ sʋlʋm ñɔʋ hɔɔlʋʋ taa

Ye ŋlɩzaa se ŋñɔʋ sʋlʋm yɔ, tɔzɩ tɔm tʋnɛ tɩ-yɔɔ: Paa Yehowa ɛtɩɖʋ paɣtʋ se pataañɔɔ sʋlʋm yɔ, ɛɖʋ paɣtʋ se pataakpaŋ sʋlʋm. Ɛbɛ yɔɔ? Ɩkalɩ Ozee 4:11, 18; nɛ pʋwayɩ lɛ ɩtazɩ tɔm tʋnɛ tɩ-taa:

• Ye ɛyʋ ɛkpaŋɩɣ sʋlʋm yɔ ɛbɛ pɩzɩɣ nɛ pɩtalɩ-ɩ?

Ɛbɛ pɩzɩɣ pɩsɩnɩ-ɖʋ nɛ ɖɩtaatɔlɩ sʋlʋm kpaŋʋʋ kpaca taa? Pɩpɔzʋʋ se ɖɩtɩlɩ ɖo-ɖoŋ kamaɣ yaa ɖenɖe ɖɩpɩzɩɣ nɛ ɖɩñɔɔ sʋlʋm nɛ pɩsɩɩna yɔ. Ɩkalɩ Aduwa 11:2, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ yɔɔ pɩkɛnɩ lɩmaɣzɩyɛ kɩbanɖɛ se ɖɩɖʋ ɖa-tɩ kamaɣ sʋlʋm ñɔʋ hɔɔlʋʋ taa?

6. Mbʋ pɩsɩɣnɩ-ŋ nɛ ŋlɩɩ sʋlʋm kpaŋʋʋ yomiye taa yɔ

VIDEO: ‘Me-wezuu caɣʋ lɩ-m sɔŋ’ (6:32)

• Ðoŋ weyi sʋlʋm kaawɛnɩ Dmitry lakasɩ yɔɔ?

• Ɛkpaɣ lɩmaɣzɩyɛ se eyeki sʋlʋm ñɔʋ lɛ, ɛpɩzaa nɛ eyele kpaagbaa?

• Ɛbɛ sɩnɩ-ɩ nɛ ɛpɩzɩ nɛ ɛlɩɩ sʋlʋm kpaŋʋʋ yomiye taa?

Ɩkalɩ 1 Kɔrɛntɩ mba 6:10, 11; nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ sʋlʋm kpaŋʋʋ pɩzɩɣ nɛ pɩwɛɛkɩ ɛyʋ yɔɔ?

• Ɛbɛ wɩlɩɣ se weyi ɛkpaŋɩɣ sʋlʋm yɔ ɛpɩzɩɣ nɛ ɛlɛɣzɩ?

Ɩkalɩ Maatiyee 5:30, nɛ pʋwayɩ lɛ ɩtazɩ tɔm tʋnɛ tɩ-taa:

• Pɔyɔɔdʋʋ se ɛyʋ ɛsɛtɩ e-nesi yɔ, pɩwɩlɩɣ se pɩpɔzʋʋ se ɛlaa kɩlaŋ pʋcɔ nɛ ɛ-tɔm kɛdɩnɩ Yehowa. Ye ŋwɛɛ nɛ ŋlʋkɩ se ŋlɩɩ sʋlʋm kpaŋʋʋ yomiye taa yɔ, ɛbɛ ŋpɩzɩɣ nɛ ŋla?a

Ɩkalɩ 1 Kɔrɛntɩ mba 15:33, nɛ pʋwayɩ lɛ ɩtazɩ tɔm tʋnɛ tɩ-taa:

• Ðoŋ weyi ña-taabalaa pɩzɩɣ nɛ pɛwɛɛnɩ ñɔ-yɔɔ sʋlʋm ñɔʋ hɔɔlʋʋ taa?

TOBI LƐ

Yehowa ha-ɖʋ sʋlʋm se pɩha-ɖʋ taa leleŋ, ɛlɛ ɛɖʋ-ɖʋ paɣtʋ se ɖɩtaakpaŋ sʋlʋm nɛ ɖɩtaañɔɔ-pʋ kadadayaɣ ɖɔɖɔ.

Tɔm taa tazʋʋ

• Suwe Bibl yɔɔdʋʋ sʋlʋm yɔɔ?

• Ye ɛyʋ ɛñɔʋ sʋlʋm kadadayaɣ yɔ, kala wena pɩpɩzɩɣ nɛ pɩkɔnɩ-ɩ?

• Ɛzɩma ɖɩpɩzɩɣ nɛ ɖɩwɩlɩ se ɖɩñaŋ lɩmaɣza wena lalaa kpakɩɣ sʋlʋm ñɔʋ hɔɔlʋʋ taa yɔ?

WONDU LƐƐTƲ

Ɛzɩma piya evelisi pɩzɩɣ nɛ sɩkpaɣ lɩmaɣza kɩbana sʋlʋm ñɔʋ hɔɔlʋʋ taa?

Pʋcɔ nɛ ŋñɔɔ sʋlʋm lɛ, maɣzɩ mbʋ pɩpɩzɩɣ pɩla pʋwayɩ yɔ pɩ-yɔɔ (2:31)

Kalɩ nɛ ŋna nɩŋgbanzɩ nzɩ ŋpɩzɩɣ nɛ ŋkpɛzɩ nɛ ŋlɩɩ sʋlʋm ñɔʋ yomiye taa yɔ.

«Quelle place l’alcool a-t-il dans votre vie?» (La Tour de Garde, 1^er janvier 2010)

Pɩpɔzʋʋ se Krɩstʋ mba ɩkpazɩɣ kɔpʋnaa ɛsɔdaa?

«Questions des lecteurs» (La Tour de garde, 15 février, 2007)

Kalɩ tɔm ñʋʋ «J’étais une barrique sans fond» nɛ ŋna mbʋ pɩsɩnɩ abalʋ nɔɔyʋ nɛ ɛlɩɩ sʋlʋm kpaŋʋʋ yomiye taa yɔ.

«La Bible transforme des vies» (La Tour de garde, 1^er mai, 2012)

Ða-tɩŋa payɩ ɖɩsɔɔlaa se ɖisuu wondu nɛ ɖɩñɔɔzɩ ɖa-tɩ ɛzɩ ɖɩsɔɔlʋʋ yɔ. Ɛlɛ ye ɖɩlakɩnɩ tʋmɩyɛ Bibl paɣtʋ kila naayɛ yɔ, pɩpɩzɩɣ pɩsɩnɩ-ɖʋ nɛ ɖisuu wondu ndʋ ɖɩsɔɔlaa nɛ tɩkɛdɩɣnɩ ɖɔɖɔ Yehowa yɔ. Yele nɛ ɖɩtazɩ paɣtʋ kila ana a-taa naayɛ taa.

1. Bibl paɣtʋ kila wena pɩzɩɣ nɛ asɩnɩ-ɖʋ wondu suu nɛ tɩ ñɔɔzʋʋ hɔɔlʋʋ taa?

Pɩpɔzʋʋ se ɖɩlɩzɩ «wondu kususutu ndʋ tɩmʋnaa yɔ, tɩmaɣna nɛ tɩwɩlɩ se [ɖɩwɛnɩ] maɣzɩm mbʋ pɩmʋnaa yɔ,» nɛ paa ɛzɩmtaa lɛ, ɖa-tɩ ñɔɔzʋʋ ɩwɛɛ camɩyɛ nɛ pɩwɩlɩ se «[ɖɩñɔnɩ] Ɛsɔ.» (1 Timootee 2:9, 10) Maɣzɩ paɣtʋ kila naanza anɛ a-yɔɔ: (1) Pɩwɛɛ se ɖisuu wondu ndʋ «tɩmʋnaa» yɔ. Ɛzɩ ŋtɛm naʋ Yehowa Aseɣɖe Tɩnaa kediɣzisi taa yɔ, pa-tɩŋa paasuu wondu kʋɖʋmtʋ, ɛlɛ ɖo-wondu suu nɛ ɛzɩma ɖɩñɔɔzʋʋ ɖɔ-ñɔsɩ yɔ, pɩɖʋʋ hɩɖɛ Ɛsɔ weyi ɖɩsɛɣ yɔ. (2) Pɩwɛɛ se ɖisuu wondu ndʋ ‘tɩmaɣnaa’ yɔ, pʋ-tɔbʋʋ lɛ se pɩtaakɛ wondu ndʋ tiseɣtiɣ kʋzʋʋ lɩmaɣza, tiyeki nɛ pɩnaɣ ɖo-tomnaɣ hɔɔlɩŋ weyi pɩtɩmʋna se pana yɔ, yaa ndʋ tɩhɔŋ lalaa lɩmaɣza nɛ pɩkɔŋnɩ ɖɔ-yɔɔ yɔ. (3) Ye ɖɩɩñɩnɩɣ se ɖɩwɛɛnɩ wondu kɩfatʋ ndʋ payɩ tɩlɩwa nɛ ɛyaa sakɩyɛ maɣzɩɣ se ndʋ pɩpɔzʋʋ se ɛyʋ esuu yɔ, pʋbʋ lɛ ɖɩwɩlɩɣ se ɖɩwɛnɩ «maɣzɩm mbʋ pɩmʋnaa yɔ.» (4) Pɩpɔzʋʋ se ɖa-tɩ ñɔɔzʋʋ ɛwɩlɩ se ‘ɖɩñɔnɩ Ɛsɔ’ nɛ piyele nɛ lalaa na se ɖɩsɛɣ Ɛsɔ toovenim tʋ.—1 Kɔrɛntɩ mba 10:31.

2. Ðoŋ weyi ɖo-wondu suu nɛ ɖa-tɩ ñɔɔzʋʋ pɩzɩɣ nɛ pɩwɛɛnɩ ɖo-koobiya Krɩstʋ mba yɔɔ?

Ðɩwɛnɩ waɖɛ se ɖisuu wondu ndʋ ɖɩsɔɔlaa yɔ; paa mbʋ yɔ, pɩwɛɛ se ɖɩmaɣzɩɣ ɖoŋ weyi ɖo-wondu suu pɩzɩɣ nɛ pɩwɛɛnɩ lalaa yɔɔ yɔ ɩ-yɔɔ. Ðɩñakɩ pana se ɖa-tɩ ñɔɔzʋʋ ɛtaawɛɛnɩ ɖoŋ kɩdɛkɛdɩŋ lalaa yɔɔ, ɛlɛ pɩkɛ mbʋ «pɩkɛdɩɣnɩ ɛyʋ lɛlʋ yɔ nɛ pɩwazɩ-ɩ, nɛ pɩkpazɩ-ɩ ɖoŋ.»—Kalɩ Roma mba 15:1, 2.

3. Ɛzɩma ɖa-tɩ ñɔɔzʋʋ pɩzɩɣ nɛ pɩhɔ lalaa nɛ pɩkɔnɩ toovenim Ɛsɔ sɛtʋ taa?

Ðɩñakɩ pana nɛ ɖisuu wondu ndʋ tɩmʋnaa yɔ paa ɛzɩmtaa kɔzɩ kɔzɩ alɩwaatʋ ndʋ ɖiwoki ɛgbɛyɛ taa kediɣzisi yaa alɩwaatʋ ndʋ ɖɩlakɩ tɔm susuu tʋmɩyɛ yɔ. Ðɩtɩsɔɔlɩ se ɛyaa ɩka pa-lɩmaɣza ɖo-wondu suu yɔɔ nɛ pɩkɩlɩ, ɛlɛ ɖɩsɔɔlaa se paka pa-lɩmaɣza tɔm ndʋ ɖisusuu-wɛ yɔ tɩ-yɔɔ na. Ðɩsɔɔlaa se ɖo-wondu suu ɛhɔ ɛyaa lɩmaɣza nɛ piwoni toovenim yɔɔ nɛ «[pɩcanɩ] ɖa-Ñʋʋ Yaɖʋ Ɛsɔ wɩlɩtʋ.»—Tiiti 2:10.

TAZƖ NƐ PILIMI

4. Ye ɖisuu wondu ndʋ tɩmʋnaa yɔ, ɖɩwɩlɩɣ se ɖɩñaŋ Yehowa

Lɩmaɣza wena a-yɔɔ pɩwɛɛ se ɖɩñɔɔzʋʋ ɖa-tɩ camɩyɛ yɔ a-taa lɛ, nɖɩ kpaɖaa? Ɩkalɩ Keɣa 47:2, nɛ pʋwayɩ lɛ ɩtazɩ tɔm tʋnɛ tɩ-taa:

• Ðɩnawa se ɖɩkɛ Yehowa sɛyaa. Ðoŋ weyi pɩwɛɛ se pɩwɛɛnɩ ɛzɩma ɖisuu wondu yɔ pɩ-yɔɔ?

• Ŋmaɣzɩɣ se pɩcɛyaa se ɖisuu wondu ndʋ tɩmʋnaa yɔ alɩwaatʋ ndʋ ɖiwoki kediɣzisi nɛ alɩwaatʋ ndʋ ɖisusuu tɔm yɔ? Ɛbɛ yɔɔ?

5. Ɛzɩma ɖɩpɩzɩɣ nɛ ɖɩkpaɣ lɩmaɣza camɩyɛ pɩlɩɩnɩ wondu kususutu nɛ tɩ ñɔɔzʋʋ yɔɔ?

Ɩcɔnɩ VIDEO.

VIDEO: «Ɩla pɩtɩŋa Ɛsɔ samtʋ yɔɔ» (10:18)

Pɩtɩkɛ liidiye ɛzɩma ɖɩkpaɣaa nɛ ɖɩyabɩnɩ ɖo-wondu yɔ pɩ-tɔm cɛyɩna, ɛlɛ mbʋ pɩ-tɔm cɛyaa yɔ lɛ se tɩwɛɛ cɩɖɩ cɩɖɩ nɛ tɩmʋnɩ wɛtʋ ndʋ tɩ-taa ɖɩwɛɛ yɔ. Ɩkalɩ 1 Kɔrɛntɩ mba 10:24 nɛ 1 Timootee 2:9, 10. Pʋwayɩ lɛ ɩtazɩ mbʋ pʋyɔɔ pɩtɩmʋna se ɖisuu wondu ndʋ . . .

• tɩfɛyɩ cɩɖɩ cɩɖɩ yaa ticuudaa yɔ.

• tɩɖɔkʋʋ-ɖʋ kpaɖɩɩɩ, tɩhɔŋ lalaa lɩmaɣza yaa tiyeki nɛ pɩnaɣ ɖo-tomnaɣ hɔɔlɩŋ weyi pɩtɩpɔzɩ se pɩna yɔ.

Krɩstʋ mba fɛyɩ Moyizi Paɣtʋ tɛɛ. Paa mbʋ yɔ, paɣtʋ ndʋ tɩsɩɣnɩ-wɛ se patɩlɩ Yehowa lɩmaɣza. Ɩkalɩ Wayɩ Wayɩ Paɣtʋ 22:5, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ yɔɔ pɩfɛyɩ se ɖisuu wondu nɛ ɖɩlakɩ ñɔsɩ nzɩ siyeki nɛ abalaa wɛɣ ɛzɩ halaa yɔ yaa halaa wɛɣ ɛzɩ abalaa yɔ?

Ɩkalɩ 1 Kɔrɛntɩ mba 10:32, 33 nɛ 1 Yohanɛɛsɩ 2:15, 16; nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ yɔɔ pɩwɛɛ se ɖɩñaɣ pana nɛ ɖisuu wondu ndʋ tiiyeki nɛ pituuli ɖɔ-cɔlɔ ñɩma yaa ɛgbɛyɛ taa koobiya nabɛyɛ yɔ?

• Ðenɖe ŋwɛɛ yɔ, wondu ndʋ ɛyaa sɔɔlɩ suu nɛ ñɔsɩ nzɩ pɔsɔɔlɩ labʋ?

• Ŋmaɣzɩɣ se pɩtɩmʋna se Krɩstʋ mba isuu wondu ndʋ tɩ-taa natʋyʋ yaa pala ñɔsɩ nzɩ sɩ-taa nasɩyɩ? Ɛbɛ yɔɔ?

TOBI LƐ

Ye ɖɩkpakɩɣ lɩmaɣza camɩyɛ pɩlɩɩnɩ wondu suu nɛ tɩ ñɔɔzʋʋ yɔɔ yɔ, ɖɩwɩlɩɣ se ɖɩwɛnɩ ñamtʋ Yehowa nɛ ɛyaa lalaa yɔɔ.

Tɔm taa tazʋʋ

• Ɛbɛ yɔɔ ɛzɩma ɖisuu wondu nɛ ɛzɩma ɖɩñɔɔzʋʋ ɖa-tɩ yɔ pɩ-tɔm cɛyɩ Yehowa ɛsɩndaa?

• Paɣtʋ kila wena pɩzɩɣ nɛ asɩnɩ-ɖʋ nɛ ɖisuu wondu camɩyɛ nɛ ɖɩñɔɔzɩ ɖa-tɩ camɩyɛ?

• Ɛzɩma ɖa-tɩ ñɔɔzʋʋ pɩzɩɣ nɛ pɩwɛɛnɩ ɖoŋ lɩmaɣza wena lalaa wɛnɩ toovenim Ɛsɔ sɛtʋ yɔɔ yɔ a-yɔɔ?

WONDU LƐƐTƲ

Kalɩ nɛ ŋna lɩmaɣza wena ño-wondu suu pɩzɩɣ nɛ piyele nɛ ɛyaa wɛɛnɩ ñɔ-yɔɔ yɔ.

«Que révèle ma façon de m’habiller?» (Intɛrnɛɛtɩ yɔɔ tɔm ñʋʋ)

Kalɩ nɛ ŋna mbʋ pʋyɔɔ pɩwɛɛ se ŋkpaɣ alɩwaatʋ nɛ ŋmaɣzɩ pʋcɔ nɛ ŋkpaɣ lɩmaɣzɩyɛ se palɩzɩ kɩlɛmɩŋ nɩɩyɩ ño-tomnaɣ yɔɔ yɔ.

«Tatouages : qu’en dit la Bible?» (Intɛrnɛɛtɩ yɔɔ tɔm ñʋʋ)

Kalɩ nɛ ŋna paɣtʋ kila lɛɛna wena apɩzɩɣ nɛ asɩnɩ-ɖʋ nɛ ɖɩkpaɣ lɩmaɣza camɩyɛ yɔ.

«Ðo-wondu suu ɖʋʋ Ɛsɔ hɩɖɛ na?» (Feŋuu Tilimiye, septembre 2016)

Ɛbɛ sɩnɩ halʋ weyi ɛsɔɔlaa se ɛ-tɔm ɛkɛdɩnɩ Ɛsɔ yɔ, nɛ etisi se lalaa pɩzɩɣ nɛ pɛwɛɛnɩ lɩmaɣza wena awɛ ndɩ nɛ ɛ-ñɩna yɔ wondu suu yɔɔ?

«Je croyais que la coquetterie était condamnable» (Réveillez-vous!, 22 décembre 2003)