Nɛ ɛbɛ kɛnɩ “paradisuu” ŋgʋ kɩ-tɔm Pɔɔlɩ yɔɔdaa yɔ?

Tɔm piye “paradisuu” ɖɔɖɔ pɩzɩɣ nɛ pɩsɩŋnɩ wondu ndɩ ndɩ: (1) Ɛzɩ paayaʋ ɛyʋ ɖɩɣa kajalaɣ ñɩŋga se paradisuu yɔ, tɔm piye “paradisuu” pɩzɩɣ nɛ ɖɩsɩŋnɩ tataa Paradisuu ŋgʋ kɩwɛnɩ ɛsɩndaa yɔ. (2) Kɩpɩzɩɣ nɛ kɩsɩŋnɩ fezuu taa wɛtʋ ndʋ tɩ-taa Ɛsɔ samaɣ kaɣ wɛʋ ɛjaɖɛ kɩfaɖɛ taa yɔ. (3) Kɩpɩzɩɣ ɖɔɖɔ nɛ kɩsɩŋnɩ wɛtʋ kɩbandʋ ndʋ tɩwɛ ɛsɔdaa yɔ, pʋ-tɔbʋʋ se “Ɛsɔ kajaɣ” yaa paradisuu ŋgʋ kɩ-tɔm pɔyɔɔdɩ Natʋ 2:7 taa yɔ. Kalɩ Feŋuu Tilimiye 15 juillet 2015 h 12 tayʋʋ 8.

Pɩpɩzɩɣ nɛ pɩla se hɔɔlɩŋ ɩnɛ ɩ-naadozo ɩ-tɔm Pɔɔlɩ yɔɔdɩ 2 Kɔrɛntɩ 12:4 taa alɩwaatʋ ndʋ ɛkɛdaɣ mbʋ ɛnawa yɔ pɩ-tɔm yɔ.

“Paradisuu” ŋgʋ kɩ-taa “pɩkpazɩ” Pɔɔlɩ yɔ, kɩsɩŋnɩ (1) paradisuu ŋgʋ kɩkaɣ wɛʋ tɛtʋ yɔɔ yɔ, (2) fezuu taa paradisuu ŋgʋ kɩwɛnɩ ɛsɩndaa nɛ kɩkaɣ wɛʋ ɖeu nɛ pɩkpaɖɩ ŋgʋ kɩwɛ sɔnɔ yɔ nɛ (3) “Ɛsɔ kajaɣ” yaa paradisuu ŋgʋ kɩwɛ ɛsɔdaa nɛ kɩ nɛ ɛjaɖɛ kɩfaɖɛ pakaɣ wɛʋ alɩwaatʋ kʋɖʋmtʋ taa yɔ.